SAMARAHAN, 10 Jun — Opis Kereja Raya (JKR) Sarawak benung bejalaika pengawa meresi rampa jalai ba sepemanjai jalai besai Samarahan nuju Batang Lupar nyadi chara proaktif dikena nentuka kandang endur jalai nya seruran dalam gaya ti diatur, likun sereta kondusif ungkup penguna jalai alun.

Nitihka penerang ari JKR Bagi Menua Samarahan, pengawa meresi nya sebagi ari pengawa ngintu ti seruran dipejalaika dikena ngangkatka pengelikun jalai alun, kelimpah ari nentuka rampa jalai alun seruran kemas sereta nadai utai tumbuh ti bepotensi ngachau penglihatan penguna enggau operasyen ngintu infrastruktur.

Opis Kereja Raya Sarawak mega ngingatka peranak menua nya ngambika enda nanam pun kayu tauka sebarang bansa utai tumbuh ba kandang endur nisi jalai alun laban pengawa baka nya ulih nekul pengawa bejalaika kereja ngintu sereta meri risiko pengelikun ngagai penguna jalai alun.

Nitihka penerang nya, kerejasama komuniti beguna amat dalam nentuka kandang endur rizab jalai alun ulih diatur enggau manah agi, ari nya mantu nyaga kualiti enggau pengelikun rentayan jalai alun di nengeri tu.

JKR Sarawak ngenataika pengaga ati enggau terima kasih ngagai semua piak ketegal sukung enggau kerejasama ti diberi dalam pengawa nentuka infrastruktur jalai alun seruran ba tikas pemadu manah ungkup pengelantang enggau pengelikun penguna. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

PUTRAJAYA, 10 Jun – Penyulut komuniti indu misi Sarawak terus nerima kelala ba renggat nasional lebuh nengeri tu mujur bulih tiga Anugerah Tukuh Indu Misi ba Pengerami Ngintu Hari Indu Misi Opis Menteri Pengerai (KKM) 2026 ke diatur ba Auditorium Kompleks E, Putrajaya.

Pemujur ti ngemegahka ati tu ngayanka komitmen enggau profesionalisme ti tinggi bala indu misi Sarawak dalam meri servis pengerai ti bekualiti ngagai rayat, sekalika ba sepital tauka ba renggat komuniti.

Pengerami ke diatur Unit Kejururawatan KKM ngempuruka urung 500 iku indu misi ari serata menua lalu dipenyadika Menteri Pengerai, Datuk Seri Dr. Dzulkefly Ahmad.

Pengerami taun tu berambaika leka jaku “Our Nurses, Our Future: Empowered Nurses Save Lives” ti ngemeratka pengawa ti beguna nyadi indu misi nyadi tulang belakang sistem pengerai menua.

Sarawak teulihka pemujur nengah Puan Bremas Anak Inyang ari Sepital Sarikei ti digelar Jururawat Komuniti Berwawasan (Perubat), lalu Puan Juyah Anak Ritun ari Klinik Pengerai Berkenu nerima anugerah Jururawat Komuniti Berwawasan (Pengerai Mensia Mayuh).

Berebak enggau nya, Puan Polimena Anak Antony ari Sepital Miri mega ngemegahka ati Sarawak lebuh iya dipadu nyadi Tokoh Jururawat Masyarakat Harapan (Perubat).

Pengerami nya mega digulu Dr. Veronica Lugah, Direktor Pengerai Nengeri Sarawak ti seruran meri sukung tegap ngagai pemansang enggau pemanah servis indu misi di nengeri tu.

Anugerah nya nyadi kelai pemadu tinggi ngagai dedikasyen, nyadi ketuai, penyulut profesyenal enggau pemeri besai bala indu misi dalam ngenegapka sistem meri pengerai menua.

Pemujur nya ukai semina dikemegahka Sarawak aja, tang dikearap ulih meri inspirasyen ngagai semua profesyenal indu misi ngambika terus meri servis enggau integriti, penyayau sereta semengat ngereja pengawa ungkup pengelantang rayat.

Meri pengaga ati ngagai semua indu misi ti terus nyadi orang berani rintai mua dalam ngintu pengerai komuniti sereta nempa pengidup dudi hari ti manah agi ungkup servis pengerai menua. – RBI

#ruaiberitaiban#newsiban#beritaiban

Rindu | Titih | Kunsika

MARUDI, 10 Jun — Operasyen ngiga enggau nyelamat (SAR) siku lelaki dipelaba lemas di Sungai Baram, Kampung Long Miri, Telang Usan diteruska sehari tu enggau pengawa ngaul mayuh bengkah ejensi pengelikun sereta bantu ari peranak menua nya.

Mansa diripotka lenyau kena 6 Jun 2026 urung pukul 3.30 lemai lebuh mandi sereta nyemerai enggau sida sebilik di Sungai Baram.

Nitihka penerang ke diulih, mansa dipelabaka benung ba tengah sungai sebedau dipeda tepawah sereta lemas. Mansa udah nya enda ulih dipeda baru ngagai atas ai.

Penusah nya dikemataka bini iya begulai enggau urung 15 iku peranak genturung ke bisi ba endur nya lebuh penusah nya nyadi. Mansa mega dipelabaka nadai ngembuan pengelandik nyemerai.

Berindik ari penusah nya, pengawa ngiga keterubah dipejalaika peranak genturung pendiau ngena perau sebedau bini mansa ngaga ripot ba Balai Polis Long Lama kena 7 Jun 2026.

Nitihka penerang berita ari Angkatan Pertahanan Awam Malaysia (APM) Marudi, Polis Diraja Malaysia (PDRM) enggau Opis Bomba enggau Penyah Penusah Malaysia (JBPM) dianjung ngagai endur nya bejalaika operasyen matau enggau ngiga.

Raban Bomba diripotka ngena jalai darat enggau entukar pacuan empat roda ngelawa kandang endur penusah nyadi ke bepalan ba kandang menua ulu.

Operasyen SAR rasmi berengkah kena 8 Jun 2026 ti ngaul PDRM, JBPM enggau peranak genturung pendiau.

Raban penyelamat ngena bot bejalai nengah Sungai Baram enggau radius ngiga entara satu ngagai dua kilometer ari palan endur mansa diripotka lenyau.

Kandang endur begiga nya dibagi ngagai dua sektor iya nya ulu enggau ili sungai.

Taja pia, mansa agi bedau ditemu ba hari keterubah operasyen nya dipejalaika.

Masuk hari kedua operasyen kena 9 Jun 2026, pengawa ngiga diteruska enggau ngaul mayuh agi raban penyelamat nyengkaum tim Angkatan Pertahanan Awam Malaysia (APM) ke datai di Kampung Long Miri pagi sebedau nyereta operasyen begulai enggau PDRM, JBPM sereta peranak gentutung pendiau nya.

Radius ngiga nya dikerembaika ngagai entara dua ngagai lima kilometer enggau fokus ngagai kandang menua hilir Sungai Baram.

Taja pia, nyentuk operasyen diketuka urung pukul 4.45 lemai ketegal gaya hari ujan, mansa agi bedau ditemu.

Ngambi penerang ari APM Marudi, gaya Sungai Baram lebuh operasyen nya dipejalaika ba tikas ke baruh, tang faktor gaya hari udah ngeruga pengelanchar pengawa nyidi muak ke tengahari nya.

Raban SAR diripotka bemalam ba Kampung Long Miri dikena meri awak ngagai operasyen diteruska hari siti. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

Photo — PKOD Telang Usan, Apm Marudi

ZURICH, 10 Jun – FIFA udah madahka rintai tim rasmi ungkup Piala Dunya FIFA 2026, ngentaska penyereta 1,248 iku pemain ti ngarika 48 buah menua dalam edisyen pemadu besai dalam sejarah pekit nya.

Penerang nya ke digaga semilan hari sebedau pekit nya berengkah, nyadika siti agi pekara ke beguna dalam pejalai nuju Piala Dunya FIFA 2026, ke deka diatur di Kanada, Mexico enggau Amerika Syarikat.

Sepenyampau 104 main deka dimain sepemanjai pekit tu, ti ngayanka format baru ti dikerembaika sereta muka peluang ngagai mayuh agi menua bepekit ba panggau pemadu tinggi main bol dunya.

Nitihka penerang FIFA, ari penyampau semua pemain ke dirintai, 357 iku pemain sebedau tu udah kala enggau tim Piala Dunya, lalu 891 iku pemain deka ngayanka diri keterubah iya ba pekit ke beprestij nya.

Statistik nya ngayanka champur peneleba enggau bakat baru ti deka nyadika kelai pekit sekali tu.

Piala Dunya 2026 mega deka meda penyereta sekeda ikon main bol dunya ke deka ngaga sejarah enggau ngayanka diri ba pekit nya ke enam kali, nyengkaum Lionel Messi, Cristiano Ronaldo enggau Guillermo Ochoa.

Ari sukut umur, bida rebak ti besai mega nyadika pengirau. Penyaga gol Scotland, Craig Gordon mansutka diri nyadi pemain pemadu tuai ba pekit nya maya umur 43 taun 162 hari, lalu pemain biak Mexico Gilberto Mora nyadi pemain pemadu biak maya umur 17 taun 240 hari.

Sepenyampau 22 iku pemain ke beumur baruh ari 20 taun enggau tujuh iku pemain ke beumur 40 taun ke atas bisi potensial bemain sepemanjai pekit tu.

Kelimpah ari nya, 22 iku ex-champion Piala Dunya mega benung mulaika diri ngagai renggat global dikena mantu menua sida empu ngulihka pemujur.

Rintai tim ke udah dientaska nya ngayanka penyelai, inklusif enggau daya penarit global Piala Dunya FIFA, lalu nyadika edisyen 2026 nyadi siti ari pekit ke pemadu dianti dalam sejarah main bol entarabansa. – RBI

#ruaiberitaiban#newsiban#beritaiban

Rindu | Titih | Kunsika

KUCHING, 9 Jun — Kaban Parlimen Sri Aman, YB Dato’ Sri Doris Sophia Brodie nerangka Aum Besai enggau Pemandang Hidrogen Hijau Asia Pasifik (APGH) 2026 nyadi pelasar strategik ti ngenegapka agi pengawa deka nempa Sarawak enggau Malaysia nyadi ketuai ba pengawa ngemansangka ekonomi hidrogen gadung enggau ekonomi ti baruh.

Nitihka penerang iya pengudah ngulu aum besai ke diatur ba Palan Konvensyen Borneo Kuching (BCCK) sehari tu, APGH 2026 mujur ngempuruka ketuai industri, pengaga polisi, pemeranak puku enggau pakar tenaga ari mayuh bengkah menua berandauka pemansang pemadu baru dalam teknologi transport hidrogen gadung ngagai peluang beranakka puku.

Ku iya, pengawa ngatur aum besai ti beprestij nya mega ngemeratka pelilih menua Asia Pasifik nyadi hab hidrogen gadung besai dunya, setipak enggau aspirasyen Sarawak enggau Malaysia dalam ngiring pemansang kuasa ti meruan.

“Aum besai tu ukai semina nyadi pelasar endur bekunsika penemu enggau peneleba, tang mega mandangka komitmen ti terus ari mayuh bengkah piak dalam ngenyampatka transisyen nuju ekonomi kurang karbon nengah pengawa ngena teknologi kuasa beresi,” ku iya.

Ku iya nambah, pemansang industri hidrogen gadung bisi potensial nyadi pemangkin ngagai penumbuh ekonomi baru, matak mayuh agi puku strategik sereta muka peluang kereja bepengelandik tinggi ngagai rayat.

Doris mega nyemetak madahka agenda kuasa beresi enggau pemanah rampa menua patut ditegapka agi dikena nentuka kuasa ti meruan agi, tan sereta mesra rampa menua jemah ila ungkup rebak dudi hari.

Aum Besai enggau Eksibisyen APGH 2026 nyadi siti ari pengawa besai ti ngempuruka pemain industri tenaga global berandauka inovasyen, polisi enggau tuju ungkup pemansang hidrogen gadung ba pelilih menua Asia Pasifik. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

SARATOK, 9 Jun — Sepenyampau 28 iku penerima ngarika pengempu 31 lot tanah nerima chek pampas sepenyampau RM2,139,241.75 ungkup pengawa nguna tanah ti bisi kaul enggau Projek Pemansang Palan Penumbuh Baru di Pelilih Mit Nanga Budu, sehari tu.

Nitihka penerang ti dikunsi nengah laman Facebook rasmi Kaban Kunsil Nengeri (ADUN) Krian, Friday Belik, bayar pampas nya dikemendarka Perintah Sarawak ungkup pengawa nguna tanah pemesai 42.42546 hektar ari baruh agih Ejensi Pemansang Bagi Menua Betong (BDDA) ungkup sitak DUN N.39 Krian.

Pengerami Nyerahka Chek Pampas Tanah nya sebagi ari proses bejalaika pemansang ti diperambu nengah Pelin Besai Pemansang Pelilih Mit Nanga Budu, ti ngembuan tuju deka ngenyampatka pemansang kandang menua nya kelimpah nambahka perengka guna enggau peluang ekonomi ungkup peranak menua nya.

Penerang nya madah, Fasa 1 pelin besai nya benung dipejalaika Lembaga Penyatuan dan Pemulihan Tanah Sarawak (LCDA) lalu mungkur sekeda komponen pemansang besai nyengkaum ngaga begunan opis baru enggau kuarters perintah, sebuah balai mensia mayuh, sebuah kompleks mini lumba enggau main sereta sebaris premis dagang.

Pengawa bejalaika projek tu dikearapka ulih nyadi penyungkak ngagai penumbuh sosio-ekonomi ba kandang menua Nanga Budu kelimpah ari ngenegapka pengawa nyendiaka perengkaguna mensia mayuh sereta nempa palan penumbuh baru, lebih diperambu ba kandang menua nya.

Sama bisi ngulu pengerami nya Pemesai Opis Pelilih Saratok, Mohamad Dino Amid; Penguasa Tanah enggau Survei Betong, TPr. Morris Nayup; pengari Menijar Besai LCDA, Haji Shaferi Rosli; ketuai opis, ketuai komuniti enggau ketuai raban bansa (KMKK) sereta mega penerima chek pampas. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

BINTULU, 9 Jun – Sepenyampau 200 iku peranak Rumah Panjai Renggan Anak Jaraw di Jalai Tanjung Kidurong, Samalaju nyereta latih prosedur ngena perengka pengerara api, penusah angus dapur enggau penerang mindah ari begunan ke diatur Balai Bomba enggau Penyah Penusah (BBP) Kidurong.

Program ke berengkah pukul 10 pagi nya betuaika Pemesai Bomba Kanan II (PBT II) Rary Anak Binjie enggau tiga iku kaban iya nya PBB Mohd Nizam Yusof, PBB Ikmal Haris Sham enggau PBB Carl Aldo Anak Sardi.

Latih nya ngembuan tuju deka nambahka penemu enggau penyedar komuniti ba sukut pengelikun penusah angus, kelebih agi ba pengawa napi penusah angus ke suah nyadi asil ari pengawa enda beratika rumah enggau dapur.

Sepemanjai program nya, bala penyereta diberi penerang pasal pun penusah angus, chara nagang ti engkeman sereta pengawa lengkas ti patut dipejalaika enti sema bisi penusah angus nyadi.

Pia mega bisi mandangka chara ngena perengka pengerara api dikena nentuka penyereta meretika chara ke betul lebuh napi penusah ngenyit.

Kelimpah ari nya, pengawa meri penerang mindah ari begunan mega bisi diatur ngambika peranak meretika prosedur mindah ti likun sereta teratur enti sema bisi penusah angus tauka penusah ngenyit bukai nyadi.

Nitihka penerang ari BBP Kidurong, latih nya mujur dipejalaika enggau lanchar sereta nitihka semua sukut pengelikun ke udah ditetapka.

Program baka tu dipeda ulih nambahka tikas penyikap komuniti dalam napi sebarang penusah angus, lalu ari nya ulih mantu ngurangka risiko lenyau nyawa enggau reta tengkira. – RBI

#ruaiberitaiban#newsiban#beritaiban

Rindu | Titih | Kunsika

KUCHING, 9 Jun — Premier Sarawak, Datuk Patinggi Tan Sri (Dr) Abang Haji Abdul Rahman Zohari bin Tun Datuk Abang Haji Openg nerima penemuai basa ari raban ari Koperasi Guru Bumiputera Sarawak Berhad (KOBAGUS) ba Satria Pertiwi Comp, Satria Pertiwi Jale.

Penemuai nya betuaika Chairman KOBAGUS, Mohamad Mortadza bin Mantrang begulai enggau sekeda kaban kaunsil enggau pemesai koperasi nya.

Rambau aum nya, KOBAGUS meri penerang ngagai YAB Premier bekaul enggau pemansang koperasi ke diatu sereta mega bemacham inisiatif ti benung dipejalaika dikena ngenegapka penuduk ekonomi enggau pengelantang pendiau kaban koperasi.

Randau nya mega ngenang pasal pangku pengawa koperasi dalam nyukung agenda pemansang sosio-ekonomi komuniti setempat.

KOBAGUS mega mantaika pejalai projek berumah koperasi ti benung diperambu di Kandang Menua Bako, mungkur status pejalai projek, pejalai diatu enggau perambu dudi hari dikena nentuka projek nya ulih meri penguntung ngagai kaban koperasi enggau komuniti ti begunaka akses ngagai pengawa berumah ti bekualiti.

YAB Premier nyambut manah pengawa ke udah digaga KOBAGUS dalam nyerungkai peluang pemansang ke ulih nyungkak pengelantang pendiau kaban sereta meri pangka ngagai pemansang nengeri tu.

Iya mega ngemeratka pemesai guna atur pengawa ti manah sereta bejalaika projek ti ulih dipejalaika dikena nentuka penguntung timpuh panjai ungkup semua piak ti bekaul.

Sama bisi datai rambau penemuai basa nya Sekretari KOBAGUS, Nurul Nadia bt Suib; Tukang Wang KOBAGUS, Zulkipli bin Amin; Kaban Lembaga Pengarah, Talip bin Joperi; Penulung Menijar, Rachmady Ibrahim bin Eli; enggau pengari KOBAGUS, Chin Yuan Tai.

Aum nya tembu enggau pengawa besilih penemu sereta meri puji ngagai Perintah Sarawak ti seruran meri sukung ngagai pemansang sektor koperasi di nengeri tu. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

SIBU, 9 Jun – Gerempung Bakat Dayak Sarikei nengah sukung ari Kaunsil Seni Sarawak deka ngatur Woksop Ngerembaika Pantun Iban Edisyen Ke-2 kena 25 ngagai 26 Julai 2026 ti nyadi pengeran dikena ngenegap, ngetan sereta ngemansangka pesaka asal litericha enggau budaya bansa Iban Sarawak.

Program ke deka diatur ba Rumah Rantai, Luyang Baru, Skim Pengentap Pendiau Sekuau, Sibu tu tebuka ngagai penyereta ari semua serak pengidup enda ngira penatai bansa enggau umur, lalu enggau nya nyadi pelasar meri kelala sereta ngelakuka seni pantun Iban ngagai mensia mayuh ke lebih mayuh.

Sepemanjai woksop tu, bala penyereta deka dipeda enggau teknik ngasilka pantun Iban, gaya nilai estetik litaricha asal sereta pengawa pantun nyadi medium dikena ngenataika penemu, adat enggau budaya dalam raban bansa.

Program nya mega ditambah enggau pengawa ngatur Malam Main Asal kena malam 25 Julai, ti mandangka elemen seni enggau main asal nyadi sebagi ari program nya.

Ba hari keterubah, woksop deka berengkah ari pukul 8.00 pagi nyentuk 5.30 lemai sebedau ditampung enggau Malam Main Asal ari pukul 7.00 malam nyentuk 11.00 malam.

Sesi woksop tu deka disambung ba hari kedua ari pukul 8.00 pagi nyentuk 12.00 tengah hari.

Pengatur pengawa madahka penyereta enda bebayar lalu tetiap penyereta ke nembuka woksop deka nerima setipikit penyereta.

Perengka guna pemakai enggau ai irup mega deka disediaka sepemanjai program nya.

Woksyop tu dikearapka ulih nyadi pelasar ti beguna dalam ngadaka mayuh agi aktivis litericha enggau budaya, kelimpah ari ngenegapka agi pengawa ngetanka pesaka pantun Iban ngambika meruan relevan sereta ditampung rebak dudi hari.

Mensia mayuh ke bisi ati nyereta program tu tau betanya ngagai pengatur nengah lumur 013-350 5707 tauka 014-500 2685 penerang silik enggau ngerejista diri. – RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

KUALA LUMPUR, 9 Jun – Penusah bebadi bas temuai ti balat ngenyinuka ati ba jalai Genting Highlands sekali agi ngasuh pengirau ati ti balat bekaul enggau pengelikun jalai alun.

Penusah tu ngujungka Opis Menteri Dagang Temuai, Seni enggau Main Asal (MOTAC) ngansak singkang jampat diambi dikena ngenegapka pengawa ngatur perengka pengangkut dagang temuai ambika likun.

Menteri iya, Dato Sri Tiong King Singmadah, aum koordinasyen khas diatur sehari tu ti ngaul Ejensi Perengka Pengangkut Mensia Mayuh Darat (APAD), Opis Perengka Pengangkut Jalai (JPJ), Polis Diraja Malaysia (PDRM), Palan Meresa Perengka Pengangkut Bekomputer (PUSPAKOM) enggau sekeda ejensi bekaul berandauka pejalai pansik penusah aksiden enggau atur ti nangkanka nya ti patut dipejalaika.

Nitihku iya, pansik tumu bekaul enggau penusah aksiden ke nyadi kena 30 Mei tu tadi mandangka bisi peluang sistem brek ba entukar ke bisi kaul nya rusak.

Taja pia, kebuah ke bendar agi nganti penetap kepenudi ari tim teknikal ti bejalaika pansik enggau silik.

Iya mantaika rikod mandangka deriba bas nya bisi enam penyalah sebedau tu ari baruh JPJ enggau 29 rikod penyalah trafik dirikod polis nyengkaum deriba ngelui ari tikas pengelaju, nadai lisin PSV ke entas, deriba nadai lisin, ngelanggar tanda trafik enggau ngena telefon binching lebuh deriba.

“Pekara tu balat ngirauka ati lalu mandangka pematut jampat neritka agi pengawa matau deriba enggau operator perengka pengangkut temuai,” ku iya.

Iya nyemetak madahka pengelikun perengka pengangkut temuai ukai semina ngaul nyawa pesinjir aja, tang mega meri empas terus ngagai imej industri dagang temuai menua tu.

Berindik enggau nya, iya meri langgur penemu ngambika piak ke bekaul beratika pengawa masang perengka guna ngurangka pengelaju baka ‘road humps’ tauka chara nagang trafik ke bukai ba kandang endur ke berisiko tinggi.

Tu kelebih agi ba jalai nurun ke Tanah Tinggi Genting enggau sekeda endur ke strategik ba jalai besai tama enggau pansut ari kandang endur ngelantangka ati.

Ku iya, perambu masang kamera penerit adat enggau sistem matau pengelaju udah kala dibantaika JPJ sebedau tu, tang bedau dipejalaika laban jalai ke dikerandau nya ari baruh pengawa ngatur peribit.

“Diatu semina bisi mimit aja kamera televisyen litar tertutup (CCTV) ba sekeda endur.Nya alai, atur ngerembaika pengawa ngena teknologi matau patut dikelengkas ngambika ulih ngangkatka pengelikun jalai alun,” ku iya.

Iya mega ngingatka atur pengelikun ukai semina patut diberi perati pengudah penusah aksiden nyadi, tang patut dipejalaika enggau proaktif dikena ngurangka risiko sebedau penusah ngenyit nyadi.

Taja pan jalai alun nya ari baruh pengatur peribit, tang iya ngarapka piak pengatur ulih meri kerejasama penuh bepelasarka pemerat mensia mayuh enggau tanggungpengawa rama korporat (CSR) dikena nyaga pengelikun penguna jalai alun enggau temuai.

Berebak enggau nya, iya nyemetak madahka atur ti terit agi patut dipejalaika ngagai sebarang deriba tauka operator ti ngembuan rikod suah ngereja penyalah, enda ngintu perengka pengangkut enggau manah, udah abis timpuh chukai jalai tauka bisi kaul enggau pengawa ngelanggar atur ti tau ngeruga pengelikun mensia mayuh.

“Enti penanggul nya majak nyadi enggau nadai pengawa ngemetulka ti efektif, dia sistem nya empu patut diperesa sereta dikemanahka agi,” ku iya.

Iya mega madahka MOTAC deka ngatur randau silik agi enggau piak pengatur Genting Highlands dikena meresa gaya ngatur pengelikun jalai alun ke diatu sereta ngelala chara ngemanahka ti ulih dipejalaika enggau lengkas.

Ku iya, rayat ukai semina dekaka ripot tauka penerang aja, tang ngarapka pengawa ti tegap ti ulih mutarka penanggul sereta nyeliahka penusah ke sebaka nyadi baru.

“Nentuka pengelikun temuai, ngetanka pemanah nama industri dagang temuai menua enggau ngangkatka kualiti servis pengangkut dagang temuai nyadi tanggungpengawa begulai semua piak.Kitai patut bejalaika pengawa enggau proaktif sereta bepelasarka ngagai chara mutarka penanggul,” ku iya.

MOTAC deka terus matau pengerembai isu tu sereta bekerejasama rat enggau semua ejensi ti bekaul dikena nentuka tikas pengelikun perengka pengangkut dagang temuai di menua tu terus diangkatka ungkup pengelantang pendiau temuai menua tu enggau antarabansa. – RBI

#ruaiberitaiban#newsiban#beritaiban

Rindu | Titih | Kunsika