SRI AMAN, 24 Jun — Projek ngemanahka jalai tama enggau ‘dataran kejat’ Rumah Panjai Tuai Rumah Kasul Anak Dullah, Kuari A Kampung Melugu, Sri Aman udah mujur dipejalaika enggau agih belanja penyampau RM80,000 ari baruh Projek Mesra Rakyat (PMR) 2025.

Projek tu mungkur pengawa ngangkatmanah jalai pemanjai 175 meter enggau pemesai 3 meter, ke sebedau tu semina bisi batu kerikil lalu dalam gaya ke kurang kondusif, kelebih agi ungkup orang ke ngena mutosikal enggau peranak menua nya.

Kaban Parlimen Sri Aman, Dato Sri Doris Sophia Brodie lebuh dirandau nyemetak madahka pengawa bejalaika Projek Mesra Rayat deka terus ditegapka ari sesiti maya ngagai sesiti maya dikena nentuka pekara ke diguna komuniti menua pesisir terus diberi perati, setipak enggau pengawa ngenegapka pengelantang pendiau rayat ba renggat baruh.

“Pengawa bejalaika pengawa ngangkatmanah tu udah meri penguntung terus ngagai komuniti Rumah Kasul ti mungkur 22 pintu rumah panjai.

“Entara batang empas ke ulih diasai nyengkaum penambah pengelikun jalai alun, pengelantang pemindah ninting hari, pia mega perengka guna akses ke manah agi ungkup pengawa ninting hari enggau situasyen penusah ngenyit,” ku iya.

Ku iya, pengawa ngaga dataran kejat mega nyendiaka palan ti lebih teratur sereta lantang endur bejalaika mayuh macham aktiviti komuniti.

“Palan tu ukai semina nyukung aktiviti rama peranak menua tu, tang mega ngenegapka interaksyen enggau penyerakup entara komuniti setempat.

“Projek tu udah ngangkatka kualiti infrastruktur asas ba kandang menua tu sereta meri pangka ngagai pengawa ngangkatka kualiti pengidup peranak menua pesisir belama,” ku iya. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

Photo — Opis Pemansang Nengeri Bagi Menua Sri Aman

Doris Sophia Brodie

SEBUAYAU, 24 Jun — Siti penusah bebadi ba jalai alun ti ngaul dua buah entukar diripotka nyadi ba Jalai Kampung Sangki Iban kena pagi Hari Tiga.

Nitihka penerang Raban Penyaga Mensia Mayuh Malaysia (APM) Sebuyau, Palan Kawalan Operasi (PKOD) Pelilih Menua Sebuyau nerima kangau ngenyit bekaul enggau penusah nya sebedau tim APM dianjung ngelawa endur penusah nya nyadi.

Lebuh datai ba endur nya, raban Angkatan Pertahanan Awam Malaysia bejalaika pengawa meresa keterubah sereta meri bantu ngenyit enggau perubat keterubah ngagai mansa ke bisi kaul sebedau atur ke bukai dipejalaika piak bekaul.

APM ba penerang nya mega ngelalau mensia mayuh ngambika seruran ngasika atur jalai alun, deriba enggau bejimat sereta nentuka perengka pengangkut dalam gaya ke manah sereta likun dikena nyeliahka penusah ke enda dikedekaka nyadi.

Mensia mayuh ti begunaka bantu ngenyit tau betanya ngagai APM Sebuyau ba lumur 013-911 3937 tauka talipaun ngenyit 999. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

MIRI, 22 Jun – Angkatan Zaman Mansang (AZAM) Sarawak majak chakah agi ngenegapka pemansang raban nembiak nengah kerejasama strategik lebuh nemuai meri basa ngagai Universiti Curtin Malaysia sehari tu.

Raban AZAM nya betuaika Ketuai Pemesai Eksekutif, Ali Bin Suhaili, begulai enggau sekeda pemesai kanan gerempung nya.

Penatai sida disambut Profesor Vincent Lee Chieng Chen, Pro Sapit Canselor, Presiden enggau Ketuai Pemesai Eksekutif Universiti Curtin Malaysia.

Aum nya nyadi pelasar beguna ngagai kedua-dua piak besilih penemu sereta ngenegapka kaul dalam pengawa ngenegapka raban nembiak, kelebih agi dalam bidang nyadi ketuai, volunteer enggau pemansang penau.

Kelimpah ari nya, perambu ngatur program jurai enggau randau intelektual nyadi medium dikena ngasah pengelandik berunding enggau komunikasyen ba nembiak mega bisi dipejuraika.

Nitih ku Ali, kerejasama rat entara gerempung komuniti enggau palan pelajar tinggi nyadi pematak besai dalam ngasilka raban nembiak rebak dudi hari ti tan, kompetitif sereta sedia napi pengawa.

“Nengah kerejasama tu, kitai ulih muka mayuh agi ruang enggau peluang ngagai nembiak ngasah potensial sida, ngerembaika peneleba sida sereta bejalaika tanggungpengawa enggau chakah dalam pemansang komuniti enggau nengeri,” ku iya.

Kedua-dua piak mega mantaika komitmen sida ti terus ngenegapka kaul strategik ke udah bisi sereta ngerembaika kaul raban nembiak dalam mayuh macham inisiatif pemansang komuniti ti meri empas tinggi. -RBI

#ruaiberitaiban#newsiban#beritaiban

Ribdu | Titih | Kunsika

HOUSTON, 24 Jun – Aku udah datai baru, aku udah pulai, nya meh jaku ke disebut kapten tim Portugal, Cristiano Ronaldo pengudah mantu menua iya ngalahka Uzbekistan 5-0 ba Raban K Piala Dunya 2026, tumu pagi tadi.

Iya nya ukai semina mantaika pengaga ati, tang pesan ke terang ngagai bala pemejah ke nanya pengulih penyerang beumur 41 taun nya pengudah main ke enda manah lebuh Portugal seri 1-1 ngelaban Republik Demokratik Congo ba main pemuka.

Ronaldo nyaut semua jaku enggau chara ke pemadu efektif lebuh iya ngemasukka dua gol nyengkaum gol ba pun minit keenam, lalu enggau nya nempa sejarah nyadi pemain keterubah ngemasukka gol dalam enam edisyen Piala Dunya.

Nitihka penerang Ronaldo, iya udah teleba napi jaku pejah sekumbang lebih dua dekad nyadi pemain profesional, tang agi pechayaka diri empu enggau penau tim iya.

“Aku udah nyadi pemain profesional pengelama 23 taun. Tiap kali utai enda manah, orang madah Cristiano udah abis, Cristiano udah tuai.

“Tang tu saut ke pemadu manah ari aku enggau kaban tim aku. Kami mandangka sapa kami ke bendar,” ku iya.

Pemain ke pemadu mayuh ngemasukka gol antarabansa dunya nya, ngaku minggu nyin kemari nyadi siti ari timpuh ke pemadu mar ngagai Portugal lebuh tim enggau jurulatih Roberto Martinez nerima pejah ke berat ari bala peminat enggau media.

Taja pia, pemenang besai ngelaban Uzbekistan nya ngayanka Portugal agi bisi pengering deka besemekih ngulihka gelar nya, seraya Ronaldo terus nyadi pugu tim taja pan ba pengujung karier iya.

Jurulatih Portugal, Roberto Martinez mega ngetanka pemain veteran iya, lalu nerangka Ronaldo siku pemain profesyenal ke chukup nyelai ke seruran lapar ke pemujur.

“Iya mega mensia sereta bisi hak ngembuan runding.Nama utai ke ngasuh iya chukup manah, iya nya pengingin iya deka majak mansang lalu mujur ninting hari,” ku iya.

Pemenang nya ukai semina ngidupka baru kimpin Piala Dunya 2026 Portugal, tang mega nyadika pelasar ke menyana ngagai Ronaldo ngingatka dunya nama iya bedau pudar ba arena main bol entarabansa.

Enggau dua gol enggau siti agi rikod besejarah ke ditempa, Ronaldo diatu bisi saut ke ke betul ngagai semua pemejah iya — RBI

#ruaiberitaiban#newsiban#beritaiban

Rindu | Titih | Kunsika

KUCHING, 24 Jun — Perintah Sarawak majak ngangkatka pemanah sistem meri servis pengelantang pendiau lebuh timpuh proses enggau mayar Bantu Indai Beranak (BIB) mujur dipandakka ari tiga bulan ngagai semina dua minggu aja.

Menteri Orang Indu, Nembiak Mit enggau Pengelantang Komuniti, Dato Sri Fatimah Abdullah, madahka pemujur nya entara kelai pemujur ti meri empas tinggi asil ari pengawa bejalaika inovasyen enggau integrasyen teknologi digital dalam ngatur servis opis menteri iya.

Nitih ku iya, pengawa ngemanahka nya ngayanka komitmen opis menteri ti terus nentuka sistem meri servis seruran efisyen, responsif sereta beorientasyen ngagai guna rayat kelebih agi indai ti patut nerima bantu.

“Enti suba, proses ngaduka dokumen nyentuk ngagai renggat mayar Bantu Inadai Beranak begunaka timpuh nyentuk tiga bulan.

“Taja pia, diatu, ketegal pengawa enggau komitmen raban opis menteri, semua proses nya udah mujur ulih tembu dalam timpuh dua minggu aja.

“Pengawa ngemanahka tu ukai semina ngelengkaska atur pengawa sereta nambahka penyikar pentadbiran, tang mega nentuka bantu belanja ulih dikenataika ngagai penerima ke patut lebuh iya pemadu diguna,” ku iya.

Iya madah munyi nya lebuh bejaku ba Pengerami Apresiasyen Opis Menteri Orang Indu, Nembiak Mit enggau Komuniti (KPWKS) ke diatur ba sebuah hotel tebilang ditu, kemari.

Berebak enggau nya, iya madahka KPWKS tetap komited bejalaika bemacham inisiatif pengelantang pendiau ti dilangkar enggau komprehensif nangkup guna rayat berengkah ari renggat tumu ada nyentuk umur tuai.

Berindik enggau nya, iya nyemetak madahka tetiap timbal ke diterima ari rayat meseti diberi perati enggau serius sereta dipegai enggau profesyenal dikena nentuka nadai raban ke ditagit tinggal ari nerima pemaik ari bemacham program pengelantang pendiau ti disediaka perintah Sarawak.

Ku iya nambah, pengawa ngemanahka belama ba sistem meri servis enggau prosedur deka terus dipejalaika dikena nentuka bantu enggau inisiatif perintah ulih dikenataika enggau jampat agi, ngasi sereta meri empas terus ngagai pengelantang pendiau rayat. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

HOUSTON, 24 Jun – Kapten tim Portugal, Cristiano Ronaldo mandangka iya agi mengkang beguna ungkup tim lebuh iya ngemasukka dua gol mantu Portugal ninggalka Uzbekistan 3-0 ba setengah main keterubah Piala Dunya 2026 dalam Kumpulan K ba Stadium Houston.

Pengudah enda mujur tetemuka tagit ngelaban Congo ba main pemuka, Ronaldo enda putus pengarap, lalu enggau muka gol ba pun minit keenam enggau siti sipak deras berindik ari pasing João Cancelo.

Portugal terus ngenegapka penuduk sida ba minit ke-17 lebuh sipak percuma ke diambi Nuno Mendes enda mujur ditangkap penyaga gol Uzbekistan nya.

Pekara ti narit ati, Ronaldo ke selalu ngambi sipak percuma meri peluang ngagai pemain belakang kiba nya ngereja pengawa nya.

Uzbekistan nyau deka ngurangka bida ba minit ke-31 enggau siti sipak jauh ari Azizjon Ganiev, tang gol nya enda dikemendarka pengudah pengawa meresa ari Penulung Pengadil Video (VAR) tetemuka penyalah dalam pengawa nya.

Ronaldo udah nya ngayanka penyulut iya baru lebuh iya ngemasukka gol kedua iya ba minit ke-39 pengudah pasing ke chukup manah ari Bruno Fernandes, lalu ngengkahka Portugal ba penuduk ke nyamai nuju setengah main kedua. – RBI

#ruaiberitaiban#newsiban#beritaiban

Rindu | Titih | Kunsika

MERADONG, 24 Jun – Polis udah mujur ngetan dua iku lelaki peranak menua tu ke dipelaba bisi kaul enggau kes ngerumpak ngena senyata enggau enchuri perengka pengangkut nengah operasyen khas ke dipejalaika di Bintangor enggau Sarikei, kena Hari Minggu nyin tadi.

Ketuai Polis Pelilih Meradong DSP Tansli Mering madahka, kedua-dua saspek ditan urung pukul 12.30 tengahari kena 22 Jun 2026 ulih tim pemesai enggau kaban ari Bagi Pansik Jenayah enggau Pasukan Petugas Indu Opis Polis Pelilih (IPD) Meradong.

Pengawa ngetan nya digaga ba kandang menua Jalai Sungai Labas, Bintangor enggau Jalai Repok, Sarikei berindik ari pansik ripot polis.

Asil ari pengawa ngetan nya, raban polis mujur tetemuka kerita ke diripotka dichuri saspek ba kandang semak Sungai Buloh, Bintangor.

Bela dirampas iya nya sebuah kerita ke dipelabaka dikena saspek lebuh ngereja pengawa ngerumpak ba Jalai Repok, Sarikei.

Semua saspek enggau barang ke dirampas udah dibai ngagai IPD Meradong ngambika dipansik enggau silik agi.

Peresa ai kemi ke dipejalaika tetemuka siku ari saspek positif dadah bansa Methamphetamine enggau Amphetamine.

Kedua-dua saspek diatu ditan riman dikena mantu tasat ari baruh Seksyen 395 Kanun Keseksaan ketegal ngerumpak enggau bakih sereta Seksyen 379A Kanun Keseksaan ketegal enchuri perengka pengangkut.

Enti ditemu salah, sida tau diukum jil nyentuk 20 taun sereta diukum sipat ngena rotan.

Polis Diraja Malaysia (PDRM), kelebih agi IPD Meradong ngelalau mensia mayuh anang ngaul diri enggau sebarang aktiviti jenayah sereta terus nyadung penerang bekaul enggau pengawa jenayah ngagai piak bekuasa dikena nentuka pengelikun enggau pengelantang mensia mayuh seruran dijaga. – RBI

#ruaiberitaiban#newsiban#beritaiban

Rindu | Titih | Kunsika

SARIKEI, 23 Jun — Balai Bomba enggau Penyah Penusah (BBP) Sarikei mujur nangkap siku ular sawa urung 18 kaki pemanjai dalam operasyen servis khas ti dipejalaika ba kandang menua Simpang Jakar-Bayong, Sarikei, sehari tu tadi.

Operasyen nya dipejalaika Tim Bravo BBP Sarikei ti betuaika Pemesai Kanan Bomba II (PBK II) Alffian Sahmat begulai enggau tiga iku raban pengudah nerima kangau sebana bekaul enggau penatai jelu reptilia nya ba kandang endur diau peranak menua nya.

Lebuh datai ba palan nya, raban bomba tetemuka siku ular sawa ba parit belakang rumah orang ke ngaga sebana.

Penatai reptilia nya meri pengirau ati ngagai pengelikun orang ke diau ba rumah nya enggau peranak ke diau ngelingi.

Betindak nitihka sebana ke diterima, raban bomba ngena perengka khas dikena nangkap sereta nagang ular nya enggau likun.

Operasyen bejalai enggau lanchar lalu reptilia nya mujur ditangkap enggau nadai sebarang penusah ke enda manah nyadi.

Pengudah nentuka gaya nya ulih dijaga, ular sawa nya dilepaska pulai ngagai endur asal iya, engkeman enggau kandang endur nya sereta jauh ari kandang endur diau, dikena nentuka pengelikun mensia mayuh.

Raban bomba mega bisi bejalaika pengawa meresa ngelingi endur nya sebedau ngentaska gaya nya udah likun enggau penuh.

Operasyen nya udah nya diketuka lalu tim nya pulai baru ngagai stesyen nya.

JBPM seruran komited meri servis ti efisyen, jampat sereta profesional ngagai komuniti, nyengkaum ba pengawa mutarka kes servis khas ti ngaul jelu siga enggau reptilia bisa ti bisi potensial ngeruga pengelikun mensia mayuh. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

KUCHING, 23 Jun – Operasyen khas ti betuaika siku pemegai lisin nangkap baya ti entas di Sarawak, Eric Cat udah mujur nangkap siku baya besai ti ngembuan pemanjai urung 3.96 meter ti sebedau tu balat ngirauka ati mensia mayuh ba kandang Tebing Sungai Kuching.

Ba operasyen ti dipejalaika urung pukul 4 pagi sehari tu, baya nya mujur ditangkap pengudah diumpan sebedau ditarit raban penangkap baya ti betuaika Eric Cat ba tebing Sungai Sarawak.

Eric Cat ke mega dikelala enggau nama “Raja Ai Tabar” madahka atur tekala nya dipejalaika lebuh nerima penerang pasal baya nya ke dipadahka suah dipeda ba palan dagang temuai.

Nitih ku iya, tim nya udah nguji beberapa kali sebedau tu, tang operasyen ke pemadu baru mujur mutuska pengawa ngasu baya nya, ke dipelabaka nyadika pun pengirau ngagai temuai enggau peranak menua nya.

Iya mega meri besai terima kasih ngagai semua kaban tim ke bisi kaul ketegal komitmen enggau kerejasama sida sepemanjai operasyen, lalu enggau nya nentuka pengawa nangkap ulih dipejalaika enggau likun nadai sebarang penusah ke enda manah nyadi.

Pemujur operasyen nya nerima perati ke mayuh ari mensia mayuh enggau penguna media rama ti nerangka nya nyadi singkang proaktif ngurangka risiko pengelikun ba kandang endur mensia mayuh ke nyadi entara ikon dagang temuai besai mengeri tu.

Pengawa nangkap baya semak empat meter nya dipeda nyadi pemujur besai ba pengawa nyaga mensia mayuh sereta nentuka kandang Tebing Ai Kuching mengkang likun endur peranak enggau temuai nemuai. – RBI

#ruaiberitaiban#newsiban#beritaiban

Rindu | Titih | Kunsika

KATIBAS, 23 Jun – Nyendiaka ruang dagang mit terus nyadi siti ari batang chara dalam pengawa deka meransang ekonomi, kelebih agi nengah pengawa ngemansangka palan dagang tebuka tauka “open air”, dikena nyendiaka peluang ngagai komuniti ngulihka penatai pemisi.

Kaban Kunsil Nengeri (ADUN) Katibas, Lidam Assan madah, inisiatif nya mandangka komitmen perintah terus ngenegapka ekonomi rayat ba renggat pun menua nyengkaum di menua pesisir.

Nitih ku iya, pemansang ekonomi ukai semina fokus ngagai projek besai aja, tang mega nyengkaum pengeransing nyendiaka ruang enggau peluang ngagai pedagang mit bejalaika aktiviti dagang enggau lebih teratur sereta ulih dipejalaika.

“Nyendiaka palan ungkup dagang mit baka kandang endur tebuka tu dikena ngiga belanja sereta ngangkatka tikas ekonomi.

“Kitai deka nentuka genap renggat mensia mayuh bisi ruang endur bejalaika pengawa dagang sereta mansutka penatai pemisi,” ku iya.

Ku iya nerang, pengawa bejalaika pemansang infrastruktur deka terus ditegapka nengah G7, seraya G1 deka ngerembaika skop pangku pengawa nyukung penumbuh ekonomi komuniti setempat.

Berebak enggau nya, lisin dagang kedai genturung pendiau deka terus dikemendar dikena nentuka bekal barang ke diguna ninting hari baka barang pemakai sereta pengawa bejalaika program BUDI ulih terus lanchar ba renggat baruh.

“Kitai nempa ruang enggau peluang, enda ngira mit, laban tetiap peluang meri reti ngagai pengidup rayat,” ku iya nambah.

Inisiatif tu dipeda nyadi sebagi ari atur inklusif perintah dalam ngenegapka ekonomi menua pesisir sereta nentuka penguntung ari pemansang ulih diasaika semua renggat mensia mayuh. -RBI

#ruaiberitaiban#newsiban#beritaiban

Rindu | Titih | Kunsika