BATU NIAH, 23 Jun – Pengawa jampat raban bomba ari Balai Bomba enggau Penyah Penusah (BBP) Batu Niah mujur ngerara api ti ngaul sebuah bilik ba ringkat tiga sebuah rumah kedai di Bazaar Batu Niah, lemai tu tadi.

Palan Operasyen nerima kangau ngenyit pukul 4.52 lemai sebedau luching ngenyit ditebah urung pukul 4.52 lemai.

Raban bomba udah nya berumban ngelawa endur nya lalu datai semina seminit pengudah jentera nya mindah ari balai ke bepalan urung satu kilometer ari palan nya.

Lebuh datai ba endur nya, raban nya tetemuka penusah angus nya ngaul bilik sub-lot ba ringkat tiga begunan kedai tetap. Taja pia, penusah tu nadai ngaul sebarang orang.

Ketuai Operasyen, PBT II Nasir Drahman tekala nya bejalaika pengawa beratika gaya sebedau ngasuh operasyen madam ngena dua arus hos 100 kaki.

Siti batang ai dikena madamka terus ba ringkat tiga begunan nya, lalu batang ai ke bukai dikena ari luar begunan nya.Ai diulih ari paip bomba ke besemak enggau pam injin bomba.

Penusah angus nya dipelabaka udah nganguska urung 80 peratus ari bilik pemesai 20 kaki x 40 kaki nya.

Api udah mujur dirara urung pukul 5.05 lemai lalu ulih dirara abis urung pukul 5.20 lemai.

Raban bomba udah nya bejalaika pengawa meresa kepenudi dikena nentuka nadai agi kebuah penusah angus nyadi tauka risiko penusah nyadi sebedau operasyen tembu urung pukul 6.30 lemai.

Operasyen nya mungkur tujuh iku raban begulai enggau sebuah kerita Scania FRT enggau sebuah kerita pikap empat taya Toyota Hilux ari BBP Batu Niah.

Sama bisi ba endur nya tiga iku raban Polis Diraja Malaysia (PDRM) Batu Niah enggau tujuh iku raban SESCO mantu nentuka kandang endur likun sepemanjai operasyen nya dipejalaika. – RBI

#ruaiberitaiban#newsiban#beritaiban

Rindu | Titih | Kunsika

KANOWIT, 23 Jun – Kaban Kunsil Nengeri (ADUN) sitak N.49 Ngemah, Anyi Anak Jana begulai enggau Opis Kereja Raya (JKR) Bagi Menua Sibu nurun ngabas gaya jalai kayu batang ke nyadi jalai besai ngelawa 21 buah rumah panjai ba kandang menua Nanga Jagau nuju seharitu tadi.

Penemuai nya mega disempulang Injinir Opis Kereja Raya Bagi Menua Sibu, Ir. Ts. Chieng Siong Ming, kelimpah ari bala penghulu, ketuai raban bansa enggau pengari peranak menua nya.

Pengawa meresa nya ngembuan tuju deka beratika gaya infrastruktur jalai ke diatu sereta ngelala pengerusak enggau isu ti ngeruga pengelikun enggau pengelantang penguna, kelebih agi peranak ti bepanggai ba jalai ungkup aktiviti ninting hari.

Asil perati tetemuka bisi beberapa iti pengerusak ba jalai nya ti ngeruga pengelanchar pejalai peranak enggau akses ngagai kandang rumah panjai sepemanjai jalai nya.

Berindik enggau nya, Anyi ngemeratka komitmen iya deka mai isu ti dibantaika ngagai piak ti bekaul dikena nentuka pengawa nangkanka nya ulih diperunding sereta dipejalaika nitihka pemerat enggau guna peranak menua nya.

Ba penemuai ke sama, iya bisi ngabas lima buah rumah panjai iya nya RH Janting Anak Nanta, RH James Anak Ngali, RH Chaong Anak Kesak, RH Batu Anak Ikil enggau RH Siling Anak Rabing.

Penemuai nya meri awak ngagai iya berandau terus enggau peranak menua nya ngulihka timbal pasal gaya jalai alun enggau pemansang infrastruktur ke diguna ba kandang menua nya.

Penemuai nya mandangka komitmen perintah ti terus nentuka pengelantang pendiau rayat menua pesisir terus diberi perati, kelimpah ari ngenegapka kerejasama entara ketuai, ejensi perintah enggau komuniti kandang menua dalam meransang pemansang ti meruan agi. – RBI

#ruaiberitaiban#newsiban#beritaiban

Rindu | Titih | Kunsika

MERADONG, 23 Jun – Siku lelaki peranak menua tu beumur 34 taun dipelabaka bisi kaul enggau kes ngerumpak enggau enchuri perengka pengangkut di Sungai Tulai, Jalai Tanjung Genting, Bintangor udah ditan polis dalam operasyen Bagi Tasat Jenayah (BSJ) Polis Pelilih Menua Meradong demalam.

Kepala Polis Pelilih Meradong, DSP Tansli Mering madahka saspek ditan urung pukul 10 pagi kena 22 Jun tu tadi asil ari pengawa tim pemesai enggau kaban BSJ IPD Meradong ti betuaika ASP Masitah.

Nitih ku iya, pengawa ngetan nya digaga berindik ari pansik ripot polis bekaul enggau insiden ngerumpak enggau enchuri perengka pengangkut ke nyadi ba kandang menua Sungai Tulai, Jalai Tanjung Genting, Bintangor.

“Saspek udah nya beperesa ai kemi lalu ditemu positif Amphetamine enggau Methamphetamine,” ku iya nengah penerang berita sehari tu tadi.

Ku iya, berindik ari pemutus nya, polis mega udah muka keretas pansik ari baruh Seksyen 15(1)(a) Akta Dadah Berbahaya 1952 bekaul enggau pengawa nguna dadah ti tau mai penusah.

Berebak enggau nya, pengawa mansik kaul saspek dalam kes ngerumpak enggau enchuri kerita agi dipejalai dikena nembuka pansik.

Pengawa meresa baru rikod ke udah tetemuka saspek nadai ngembuan sebarang rikod jenayah tauka penyalah bekaul enggau dadah sebedau tu.

Enti dikenuku salah ngereja penyalah ari baruh Seksyen 15(1)(a) Akta Dadah Berbahaya 1952, saspek ulih diukum mata duit nyentuk RM5,000 tauka dijil enda lebih ari dua taun.

Berebak enggau nya, DSP Tansli nyemetak madahka IPD Meradong beratika pengawa salah guna dadah nya berat sereta enda belembut enggau sebarang piak ke bisi kaul enggau pengawa baka nya.

Iya mega minta mensia mayuh ngenataika penerang bekaul enggau dadah tauka aktiviti jenayah ngagai polis dikena mantu pengawa ngemuntanka aktiviti baka nya di pelilih Meradong.

Penerang tau dikenataika ngagai Balai Polis Bintangor nengah lumur 084-693222. – RBI

#ruaiberitaiban#newsiban#beritaiban

Rindu | Titih | Kunsika

KAPIT, 23 Jun – Komiti Akaun Mensia Mayuh Nengeri Sarawak (PAC Sarawak) udah bejalaika pengawa ngabas palan Projek Jalai Akses Tekat Ai Hidro Baleh di Bagi Menua Kapit dikena beratika pejalai pengawa bejalaika projek infrastruktur strategik nya.

Penemuai nya betuaika Chairman PAC Sarawak, Dato Haji Razaili Bin Haji Gapor, ti nyemetak madahka penemuai ba palan tu beguna dikena nentuka tetiap projek pemansang nengeri dipejalaika enggau teratur, ngasi sereta nyapai juluk ti udah ditetapka.

Raban PAC Sarawak mega diberi penerang ari Opis Kereja Raya (JKR) Bagi Menua Kapit bekaul enggau gaya projek ke diatu, penyulut fizikal ba palan sereta pemar bejalaika pengawa ke ditapi dalam nentuka pengelanchar kereja nitihka timpuh ke udah ditetapka.

Kelimpah ari nya, sesi randau mega bisi diatur entara kaban PAC enggau ejensi bejalaika pengawa dikena ngulihka penerang terus enggau penerang ke silik agi bekaul enggau pengawa bejalaika projek nya.

Nitihka penerang ti dikunsi nengah Facebook Dewan Undangan Nengeri Sarawak, penemuai tu ngemendarka PAC Sarawak beratika diri empu pejalai projek ba renggat baruh seraya ngenegapka agi pangku pengawa komiti dalam nentuka projek pemansang dipejalaika enggau efisyen, enggau integriti sereta meri penguntung ngagai rayat.

Penemuai nya ngayanka komitmen PAC Sarawak ti terus ngenegapka mekanisme ‘checks and balances’ ba pengawa bejalaika projek pemansang nengeri, kelebih agi projek infrastruktur skala besai baka Jalai Akses Tekat Hidro Baleh ti meri empas ngagai pemansang kandang menua ulu Sarawak.

Sama bisi nyereta penemuai nya kaban PAC Sarawak, pengari ari Opis Kereja Raya Sarawak, Kaunsil Pemansang Koridor Wilayah (RECODA), Opis Menteri Infrastruktur enggau Pemansang Palan Penyangkai Kapal (MIPD) Sarawak, Opis Audit Negara enggau Sekretari PAC Sarawak. – RBI

#ruaiberitaiban#newsiban#beritaiban

Rindu | Titih | Kunsika

SIBU, 23 Jun – Opis Bomba enggau Penyah Penusah Malaysia (JBPM) Zon 4 Sibu bekerejasama enggau Gerempung Lumba enggau Main enggau Pengintu Pengelantang Pendiau Bomba Sarawak (PESKEBS) deka ngatur Pelanda Pengasih Bomba Sibu 1.0 2026 kena 16 Ogos 2026, di Balai Bomba enggau Penyelamat Sungai Merah.

Program ti ngempung elemen pengerai, rekreasyen enggau pengelantang pendiau nya tebuka ngagai penyereta menua tu enggau antarabansa, lalu disadang nyadi siti ari atur pengawa belanda komuniti pemadu besai di Zon Tengah Sarawak.

Pengawa tu bisi nyendiaka dua kategori besai iya nya Pelanda 10 Kilometer (10KM) ungkup kategori Tebuka enggau Veteran sereta Fun Run 3 KM ti engkeman disereta mayuh bengkah renggat mensia mayuh.

Ungkup kategori 10KM, pemisi penyereta Tebuka enggau Veteran diperambu pukul 6 pagi, lalu penyereta Fun Run deka berengkah belanda pukul 6.20 pagi.

Semua penyereta dipinta begempuru tumu pukul 5 pagi ngambika ulih ngerejista diri sereta ninga penerang pasal pengelikun.

Utai ti narit ati, piak pengatur bisi nyendiaka perais mata duit nyentuk RM400 disempulang enggau midul ngagai pemenang kategori lelaki enggau indu Tebuka.

Kelimpah ari nya, penyereta ke mujur nembuka pelanda deka nerima midul, lalu sekeda kategori mega deka nerima baju rasmi atur pengawa.

Pengawa ngambi bagi ba kategori veteran dibuka ngagai penyereta ke beumur 45 taun ke atas, enggau umur ke patut dikira berengkah 15 Julai 2026.

Bayar nyereta diberi nitihka rega promosyen Early Bird berengkah ari 15 Mei nyentuk 30 Jun 2026, iya nya RM60 ungkup kategori Tebuka enggau Veteran, lalu RM50 ungkup kategori Fun Run.

Pengudah timpuh nya, bayar masuk deka dichaj nitihka rega biasa nyentuk 15 Julai 2026, ke mega haribulan penutup ngambi bagi.

Pengawa ngerejista diri ulih nengah ‘online’ nengah ‘QR code’ ti disediaka pengatur tauka nengah pom ke ulih diambi ba sekeda balai bomba ke dipilih nyengkaum Sibu, Sungai Merah, Sarikei, Bintangor, Daro, Tanjung Manis, Mukah, Kapit, Song, Sibujaya enggau Selangau.

Nitih ku pengatur, pelanda pengasih tu ukai semina ngembuan tuju ngangkatka gaya pengidup ti bepengerai sereta regas, tang mega nyadi pelasar ngerapitka kaul entara raban bomba enggau komuniti lokal kelimpah nyukung aktiviti pengasih ti dipejalaika PESKEBS.

Mensia mayuh ke bisi ati dilalau ngerejista diri tumu ngambika ulih ngasaika tikas yuran promosyen sereta nyeliahka diri asa lebuh penyampau letak penyereta diisi.

Sebarang tanya tau dituju ngagai sekretariat program nengah talipaun ti disediaka pengatur, Andy anak Alie (Ketuai Zon 4), 012-4383866 enggau Muhammad Shukri bin Muhammad ba lumur 016-8351182. – RBI

#ruaiberitaiban#newsiban#beritaiban

Rindu | Titih | Kunsika

KUCHING, 23 Jun — Tuduh bekaul enggau bisi sempekat kena 7 Julai 1970 ti dikaitka enggau isu hak Dayak udah dipadahka nadai pelasar sereta bisi potensial nempa saru penemu sereta mambarka penyerakup komuniti pupu bansa di Sarawak.

Sapit Menteri ba Opis Premier Sarawak (Pekara Korporat, Pemadah enggau UKAS), Datuk Abdullah Saidol, madahka tuduh Presiden Parti Bansa Dayak Sarawak (PBDS), Dr John Brian Anthony, bekaul enggau dokumen ke enda ulih dientas pengamat iya enda tau enda disempulang enggau bukti ke tegap dikena nyeliahka sebarang spekulasyen.

Iya nyemetak madah, mantaika isu sensitif enggau nadai pengentas ulih ngeruga pengelantang komuniti, kelebih agi lebuh Sarawak ngemeratka agenda pemansang enggau penyerakup.

“Enti amat sempekat nya bisi, iya begunaka bukti. Enti enda, pekara baka tu semina deka ngasuh saru penemu lalu pengujung iya ngujungka petenah enggau salah sangka,” ku iya.

Nitih ku iya, ngerembaika tuduh ba pelasar media rama enggau nadai pelasar ke nyemetak tau ngasuh komuniti enda lantang sereta ngelimpangka fokus ari pengawa ngemansangka nengeri.

“Lebuh pekara baka tu dibantaika, nya mudah ngasuh komuniti saru sereta penyarut. Pengawa ke bansa tu enda manah ngagai pengelantang kitai,” ku iya.

Abdullah ke mega Kaban Supreme Kunsil Parti Pesaka Bumiputera Bersatu (PBB) nyemetak madahka Sarawak sebuah nengeri bepupu bansa ti seruran ngemeratka semengat bebasaka pangan diri entara bansa, budaya enggau jalai pengarap.

Berindik enggau nya, iya ngelalau semua piak ngambika ngemeratka agenda pemansang enggau pengelantang rayat, ari ke mantaika isu ke bedau dientaska pengamat iya.

“Pekara ti dikemeratka kami iya nya ngaga nengeri lalu ukai ngenusahka gaya enggau isu ti enda tentu. Nya ukai budaya politik ti manah,” ku iya. — RBI

#ruaiberitaiban#newsiban#beritaiban

Rindu | Titih | Kunsika

TAMIN, 23 Jun — Peminta Skim Pinjau Rumah Panjai ba sitak Dewan Undangan Negeri (DUN) Tamin N.59 udah dikemendarka Komiti Milih, nyadi sebagi ari pengawa perintah ti majak ngenegapka pemansang komuniti dalam infrastruktur menua pesisir.

Skim nya dipejalaika ari baruh inisiatif Kaban Kunsil Nengeri (ADUN) Tamin Ir Christopher Gira anak Sambang, iya nya dalam tukuh duit jali nadai bungai enggau timpuh mayar pulai 25 taun, lalu diberi dalam tukuh kereban ngaga rumah enggau perengka guna nitihka peneka tuju sida ngaga baru rumah panjai.

Entara penerima ke udah dikemendarka iya nya Tuai Rumah Raphael Ramba anak Elom ari 36, Jalan Sibu–Bintulu, Selangau (14 pintu), Tuai Rumah Johnny anak Llam dari Batu 26, Jalan Oya, Selangau (10 pintu), sereta Tuai Rumah Roshida Minah anak Bair dari Bukit Mengeris, Selangau (28 pintu).

Tetiap penerima layak nerima duit jali nitihka tikas pematut sepintu ti udah ditetapka, iya nya entara RM30,000 ngagai RM50,000 sepintu, bepanggai ba projek sida empu.

Berebak enggau nya, Kaunsil Pemansang Pengawa Berumah (HDC) madahka pengawa bejalaika skim tu sebagi ari komitmen sida ti seruran dipejalaika dikena nentuka pemansang pengawa berumah menua pesisir terus ditegapka enggau chara teratur sereta meruan.

Berebak enggau nya, Ir Christopher Gira meri besai terima kasih ngagai semua piak ti bisi kaul enggau pengawa bejalaika skim nya, kelebih agi ngagai komiti milih enggau ejensi pengatur ti nentuka pemendar ulih dikenataika enggau chara ti teratur sereta terang.

Iya mega mantaika pengarap ati ngambika bantu ke diberi nya dikena penuh bala penerima dikena ngenyampatka pengawa ngaga rumah panjai ke lebih lantang, likun sereta kondusif, kelimpah ari ngenegapka penyerakup enggau pengelantang komuniti lokal ba kandang DUN Tamin.

Nitihku iya, inisiatif baka tu deka terus ditegapka nyadi sebagi ari agenda pemansang menua pesisir ti inklusif sereta meri empas tinggi ba kandang menua nya. – RBI

#ruaiberitaiban#newsiban#beritaiban

Rindu | Titih | Kunsika

KUALA LUMPUR, 23 Jun – Pengerami Hari Pengereja Pengawa Sedunya Festival Muzik Ai Rain Rave mujur mansutka penyampau pulai ekonomi lebih RM392 juta nengah penatai beratus ribu iku temuai menua tu enggau antarabansa.

Menteri Dagang Temuai, Seni enggau Main Asal, Datuk Seri Tiong King Sing madah, pengerami nya mujur matak urung 150,000 temuai domestik nyengkaum ari Sabah enggau Sarawak sereta mega 100,000 temuai ari menua luar ari mayuh bengkah menua baka China, Jipun, Bangladesh, India, Korea Selatan, Thailand, Singapura, Indonesia enggau Vietnam.

Nitih ku iya, penatai bala temuai tu meri anggar pulai ekonomi RM320.43 juta, lalu pengawa ngatur pengerami nya ba enam endur bukai di serata menua meri penambah RM71.9 juta.

“Pengerami tu mujur matak urung 150,000 iku temuai domestik enggau 100,000 iku temuai ari menua luar enggau anggar pulai RM320.43 juta ngagai ekonomi menua.

“Berebak enggau nya, organisasyen di enam buah nengeri nyengkaum Terengganu, Melaka, Labuan, Negeri Sembilan, Johor enggau Langkawi mujur matak urung 165,000 iku temuai sereta mansutka anggar pulai ekonomi RM71.9 juta,” ku iya rambau sesi tanya saut di Parlimen sehari tu tadi.

Ku iya, perintah milih ngetanka penama nadai bebayar ngagai mensia mayuh taja pan pengerami nya bisi potensial ngenataika asil entara RM50 juta ngagai RM75 juta enti tikit dichaj entara RM200 ngagai RM300 siku.

Nitihka penerang ari King Sing, pengawa nya deka ngemendarka penguntung ekonomi nya diagih enggau lebih luas ngagai pemain industri dagang temuai, orang ke bempu hotel, orang dagang enggau pedagang menua tu.

Ku iya nambah, 80 buah hotel di serata menua bisi meri diskaun entara 30 ngagai 50 peratus beserimbai enggau pengerami nya, enggau tebal agi ngerikod tikas penguna urung 100 peratus.

Kelimpah ari nya, sekeda palan palan bebelika barang besai di indu nengeri mega nerima penguntung lebuh sida ngerikod penambah ba pengawa bejual urung 45 peratus enggau penambah penyampau temuai 31 peratus. – RBI

#ruaiberitaiban#newsiban#beritaiban

Rindu | Titih | Kunsika

SARIKEI, 23 Jun – Pengawa bejalaika projek ari baruh Ejensi Pemansang Delta Rajang (RADDA) mandangka pemansang positif lebuh ari 15 projek ke udah masuk renggat bejalaika, enam projek bejalai nitihka timpuh, enam dulu ari timpuh, dua ngasaika pengelaun penuh seraya siti projek udah tembu.

Sapit Menteri Perambu Mengeri, Pengatur Tanah enggau Rampa Menua ke mega Chairman RADDA, Datuk Len Talif Salleh madah, pemansang nya mandangka komitmen perintah dalam nentuka sepenyampau 90 projek pemansang ke beungkus RM1.525 bilion ulih ditembuka nitihka perambu manggai ba taun 2029.

Nitihku iya, semua projek ke udah dikemendarka diatu udah ba bemacham renggat dipejalaika sereta dipejalaika nitihka taga enggau renggat ke udah ditetapka.

Ku iya, projek nya mungkur Bagi Menua Mukah, Bagi Menua Sarikei enggau sekeda kandang menua di Pelilih Sibu, nyengkaum projek Jalai Batang Lebaan–Batang Lassa ti dipelaba beungkus urung RM95 juta.

Iya madah munyi nya pengudah nyadi chairman Aum Komiti RADDA ke diatur ba Bilik Aum Ringkat 12, Palan Pentadbiran Perintah Sarawak Bagi Menua Sarikei, sehari tu tadi.

“Sechara selampur nya, pengawa bejalaika projek tu bejalai enggau manah lalu aku berasai lantang taja pan agi bisi beberapa projek dalam proses tinda.

“Kitai udah bisi taga bejalaika semua projek tu lalu tetiap renggat udah dikelala dikena nentuka pengawa bejalaika nya bejalai enggau lanchar,” ku iya.

Iya ke mega Kaban Kunsil Nengeri (ADUN) Kuala Rajang madah, lima projek diatu benung dalam proses tinda, lalu 41 projek agi ba renggat langkar, 26 projek ba renggat nentuka palan enggau langkar lalu tiga agi projek agi dalam proses nentuka palan.

Ku iya nambah, bisi 41 projek beungkus lebih RM685 juta dipelaba deka ditinda ba suku ketiga taun tu, ditangkanka 23 projek beungkus RM339 juta ba suku keempat.

Lima agi projek ti beungkus RM100 juta dipelaba deka ditinda ba suku keterubah taun baru.

Nitihku iya, taga ke udah dilangkar ungkup semua 90 projek ke udah dikelala sereta dikemendarka Komiti RADDA meri pengandal tebal agi projek nya ulih ditembuka dalam timpuh ke udah ditetapka.

“Alhamdulillah, bepelasarka taga ke udah dilangkar, tebal agi projek tu disadang tembu manggai ba taun 2029, “Insya Allah,” ku iya. – RBI

#ruaiberitaiban#newsiban#beritaiban

Rindu | Titih | Kunsika

BINTULU, 23 Jun — Direktor Betanam Betupi Sarawak, Dominic Anak Chunggat bejadika pengawa lumba enggau main beserimbai enggau Seminar Pemansang enggau Ngenegapka Modal Mensia Betanam Betupi Sarawak sereta Lumba enggau Main Betanam Betupi Sarawak (SUPERSAR 2026) ti diatur di Bintulu, kemari.

Atur pengawa lumba enggau main ti mandangka pekit snooker enggau pickleball nyadi siti ari batang isi program, ti ngempuruka penyereta pengereja pengawa ari mayuh bengkah pampang enggau pelilih menua di serata Sarawak.

Dalam jaku iya, iya nyemetak madahka pengawa ngatur SUPERSAR 2026 ngayanka komitmen Opis Betanam Betupi Sarawak ti seruran nerenakka gaya pengidup ti bepengerai sereta ngenegapka timbang pengidup kereja entara pengereja pengawa.

Iya mega nyemetak madahka pengawa ngambi bagi enggau chakah dalam aktiviti lumba enggau main ukai semina meri pangka ngagai pengawa ngangkatka pengerai tubuh enggau pengelantang runding, tang mega ngenegapka kereja beraban, kerejasama enggau ‘networking’ entara pengereja pengawa opis.

SUPERSAR 2026 ngempuruka 14 kontinjen enggau penyereta urung 700 iku penyereta, nyadika pelasar ti beguna dalam nerenakka rega begulai, lumba enggau main sereta budaya kereja ti nyulut dalam organisasyen.

Program tu mega setipak enggau aspirasyen jabatan dalam ngasilka modal mensia ti kompetitif, integriti sereta beprestasi tinggi.

Pengawa ngatur program tu di Bintulu dikearapka ulih terus ngenegapka jalai kerejasama sereta nerenakka semengat beserakup entara pengereja pengawa nuju ngamatka aspirasyen “Bersama Melakar Kecemerlangan”. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

Photo — Jabatan Pertanian Sarawak