Peranak Malaysia, anak Sarawak ke beumur enda kurang ari 18 taun dipinta minta pengawa ba Opis Kereja Raya Sarawak baka ke di baruh tu:

Sumber — JKR Sarawak

MANCHESTER, 16 Mac — Manchester United ngenegapka penuduk sida ba empat tim pemadu atas Liga Premier pengudah ngalahka Aston Villa 3-1 ba main ke ranchak ba Old Trafford, demalam.

Pekit ke meda dua tim besatup ba penuduk liga berengkah enggau chukup bejimat enggau kedua tim enda mujur nempa mayuh peluang ba setengah main keterubah.

Bol tanduk ari Amad Diallo ti ngujungka penyaga gol Villa, Emiliano Martinez ngaga penyelamat enggau chukup sikar nyadi siti ari maya ti pemadu manah sebedau ngetu main keterubah.

Pengujung iya United mujur ngenulu, ngemasukka gol ba minit ke-53 nengah bol tanduk Casemiro ari sipak sukut Bruno Fernandes ngasuh tim enggau penyukung tuai rumah berasai lantang.

Taja pia, Villa ngemasukka gol ba minit ke-64 lebuh Ross Barkley ngemasukka gol enggau siti sipak ke deras, lalu enggau nya ngidupka baru pengarap tim temuai.

Taja pia, pengelebih nya nyukung United lebuh Fernandes sekali agi ngemeranka tanggungpengawa ke beguna ba minit ke-71.

Ketuai tim United nya nganjung bol ti manah ari sepiak kiba ngagai Matheus Cunha ti enggau lantang ngemasukka gol ngambika 2-1.

Gol nya mega nyadika kelai kediri empu Fernandes laban nya nempa ‘pemeri bantu gol’ ke-16 iya ba musin tu, lalu udah mechahka rikod David Beckham sebedau tu ke udah mantu ‘pemeri gol’ 15 kali ba musin 1999/2000.

United nambahka penyampau gol sida ba minit ke-81 lebuh Cunha meri bantu ngagai Benjamin Sesko ke ngelepaska siti tendang ngena kaki kanan dikena ngetanka pemenang 3-1.

Pemenang ti beguna amat nya ngengkahka Manchester United ba penuduk ti nyamai agi dalam pengawa bepekit ungkup Liga Champions UEFA musim ti deka datai, lalu meri ‘tekan’ ngagai pemekit bukai dalam pengawa belaban ba penuduk empat pemadu atas.

Ungkup pemutus ke bukai nangkan ke main nya Forest 0-0 Fulham enggau Liverpool semina bekunsi puin enggau Spur. Liverpool mengkang dibaruh Manchester United enggau Aston Villa. — RBI

KUCHING, 15 MAC – Opis Perengka Pengangkut Darat (JPJ) Malaysia udah madahka notis tagang deriba perengka pengangkut barang beserimbai enggau pengerami Hari Raya Aidilfitri 2026 kena 19, 20, 28 enggau 29 Mac.

Tagang nya mungkur sekeda kategori perengka pengangkut berat nyengkaum lori pengangkut enggau lori ti ngembuan pemerat ngelui 7,500 kilogram, lori ‘muatan’ baruh, ‘pole’ treler, lori tangki semin, treler platform, lori kayu batang, jentera roda berat enggau traktor ti ngangkut barang mineral sereta mega beoperasyen sepanjai maya ba haribulan ti bekaul.

Kelimpah ari nya, lori kontena ti ngundan barang, lori ti ngangkut barang elektronik tauka karan enggau kimia industri ari palan penyangkai kapal tauka padang bilun, lori ti ngundan minyak sawit enggau getah ngagai kandang endur industri sereta mega lori puang mega kena tagang ari pukul 8 malam ngagai 8 pagi.

Ungkup kren mindah kin kitu enggau lori nunyau semin, tagang deriba ditetapka ari pukul 6 lemai nyentuk 6 pagi, enggau operasyen semina dikemendarka dalam penyauh 25 kilometer ari palan endur ngaga ngagai hab operasyen.

Nitihka penerang ari JPJ Malaysia, injin berat betaya enggau kren mindah kin kitu taja pia diberi kelaung enti bisi kaul enggau pengawa ngenyit, lalu perengka pengangkut barang ke enda ditetapka dalam taga tagang agi dikemendarka beoperasyen sepemanjai timpuh nya.

Atur nya dipejalaika dikena ngelantangka arus trafik sereta ngangkatka pengelikun penguna jalai alun nyerumba musin pengerami ti meda penambah penyampau perengka pengangkut ba jalai besai enggau jalai batang. – RBI

BAU, 15 Mac – Isu magi penuduk ungkup Pengawa Bepilih Nengeri (PRN) Sarawak ti deka datai enda ulih diputuska siku-siku tang meseti diperundingka ba renggat parti sereta dipesetuju nengah konsensus dalam Gempung Parti Sarawak (GPS).

Sapit Presiden Parti Demokratik Progresif (PDP), Henry Harry Jinep madah, sebarang pemutus bekaul enggau penuduk meseti dulu dibai ngagai Kaban Supreme Kaunsil parti nya sebedau dipejuraika.

“Aku enda ulih ngaga pemutus kediri empu.Pekara tu enda tau enda dibai ngagai parti sereta dipejuraika ba Supreme Kaunsil parti.

“Kesuah iya, enti PDP dipilih, pemutus kepenudi tetap meseti digaga dalam konsensus GPS enggau randau entara ketuai parti,” ku iya.

Iya madah munyi nya pengudah nyadi chairman Aum Tiga Taun Sekali (AGM) PDP Bagi Tasik Biru ba Dewan Masyarakat Bau sehari tu tadi.

Ngelansa pasal peluang PDP meri jalai ngagai parti bukai bediri minta pilih ba sekeda penuduk baka di Pakan, iya madah pekara nya mega patut diperunding dulu ba renggat parti sebedau sebarang pemutus digaga.

Berebak enggau nya, iya nerangka berita selebubu bekaul enggau perambu nukar nama Dewan Undangan Negeri (DUN) Tasik Biru ngagai Singai enda ulih diputuska parti politik laban pekara nya ari baruh kuasa Komiti Pengawa Bepilih Malaysia (SPR).

Nitihku iya, perambu bekaul enggau nama sitak selalu iya digaga dalam proses ngaga baru garis entara menua ari SPR lalu parti politik nadai kuasa nentuka ubah nya.

Henry mega nerangka pengawa nukar nama sitak ukai pekara baru laban udah kala nyadi sebedau tu, nyengkaum ba kandang menua Bau ke sebedau tu ngaul sitak Bengoh sebedau nyadi Serembu lalu sebagi ari nya numbuhka sitak Puncak Borneo.

Berebak enggau nya, iya madahka PDP ngambi chara nganti pemutus rasmi bekaul enggau perambu nambahka 17 penuduk baru Sitak Kunsil Nengeri (DUN) sebedau ngaga sebarang penetap ba pengawa magi penuduk.

“Proses bekaul enggau penambah 17 penuduk baru DUN agi nganti pemendar ari Parlimen.Nya alai ke diatu kami enda nyebut utai lebih agi… minta kita besabar,” ku iya nambah. – RBI

BETONG, 15 Mac — Pengeransing ngetanka pesaka lumba enggau main asal di Bukit Saban ditegapka agi lebuh Sapit Premier Sarawak, Douglas Uggah Embas ngansak komuniti menua nya numbuhka Kelab Main Asal Bukit Saban, lalu enggau nya ngemendarka geran pemungkal penyampau RM30,000.

Kenu ku iya, inisiatif nya beguna ukai semina dikena nentuka main asal terus ditampung nembiak rebak baru, tang mega ngembuan potensial dikena nyadi produk dagang temuai ti meri kelala identiti enggau penyelai Bukit Saban ngagai temuai luar.

“Kitai patut ngetanka main asal tu laban nya sebagi ari pesaka enggau identiti komuniti kitai.

“Nya kebuah aku dekaka sebuah kelab ditumbuhka, lalu aku udah ngemendarka geran keterubah sepenyampau RM30,000 dikena nyukung penumbuh iya,” ku Uggah lebuh bejaku ba pengawa bejadika Pengerami Pemakai enggau Lumba enggau Main Bukit Saban di rumah panjang Mendit anak Unsu, Penom, Ulu Paku, kemari.

Iya mega ngemeratka pangku pengawa orang tuai enggau sida ke bepenemu pasal main asal dalam matak pengerindu nembiak rebak baru.

Pengawa ngaul raban nembiak beguna ngambika lumba enggau main asal enda lenyau ketegal jeman, tang terus idup nyadi aktiviti komuniti ti nyerakupka komuniti ari semua serak pengidup.

Kelimpah ari nya, Uggah madahka pengawa ngatur Trofi Main Pangka Bukit Saban bulan Mei tu ti nyadi sebagi ari pengawa ngidupka baru pengerindu ba main asal ba peranak menua nya.

Ba pemansang bukai, iya madahka Projek Replika Rentap Kubu udah ditender lalu pengawa nyiri kunteriktor dipelaba deka digaga enda lama agi, enggau timpuh bejalaika pengawa nya urung dua taun.

Sama bisi ngulu pengerami nya Datin Amar Dato Doreen Mayang, Kaban Parlimen Betong Dato Dr Richard Rapu enggau bini iya Datin Lucy Mary Johnson, Sekretari Politik Premier Sarawak Puan Roseline Mapong Sabai, Ketuai Indu PBB N.37 Bukit Saban Puan Natasha, Pemesai Bagi Menua Betong Beton, Laga Kueh, Jurutera Bagi Menua Betong Jason Ng Boon, Ketui Jabatan Tanah dan Survei Betong TPr Moris Nayup, Sekretari Kaunsil Pelilih Betong Lister Clement Guwie sereta Ketuai Raban Bansa enggau Tuai Rumah ngelingi. — RBI

BETONG, 15 Mac — Menu pemakai asal enggau mesan pemakai komuniti Bukit Saban deka dirintai ba laman web dikena ngerembaika promosyen, enggau nya muka peluang makit ke besai agi ngagai orang dagang menua pesisir, kelebih agi orang indu.

Sapit Premier Sarawak, Datuk Amar Douglas Uggah Embas madah, inisiatif nya beguna dikena nentuka mensia mayuh ulih nemu pasal bansa pemakai ke bisi disediaka ari kandang menua Bukit Saban, kelimpah ari ngemudahka rujukan nyema bisi sebarang tanya bekaul enggau menu enggau bekal pemakai jemah ila.

Iya madah munyi nya lebuh bejadika Pengerami Pemakai enggau Lumba enggau Main Bukit Saban ke nyadi ba Rumah Panjai Mendit anak Unsu, Penom, Ulu Paku, ditu kemari.

Nitih ku iya, tetiap pesereta ke ngambi bagi ba program tu dilalau nganjung ripot pasal bansa menu ke bisi disediaka ngagai Palan Servis ungkup tuju rikod rasmi.

“Rikod tu beguna amat dikena mantu Palan Servis ngelala pesereta enti sema bisi sebarang tanya bekaul enggau menu enggau bekal pemakai jemah ila.

Menu tu mega deka dirintai ba laman web ngambika mensia mayuh nemu bansa pemakai ke bisi disediaka ari Bukit Saban,” ku iya.

Berebak enggau nya, iya muji bala pesereta ti mandangka kreativiti enggau inovasyen ba pengawa nyendiaka sereta mantaika pemakai, lalu enggau nya ngayanka komuniti menua pesisir ukai semina ngembuan pengelandik nyendiaka pemakai asal tang mega ulih mantaika nya enggau manah sereta ngerinduka ati.

Uggah mega ngelalau raban Indu PBB Bukit Saban ngambi peluang nyereta Agrofest di Spaoh nengah chara muka bansal pemandang endur mandangka pemakai enggau produk pemakai sida, lalu ari nya ulih mansutka penatai pemisi tambah ngagai sida sebilik.

Ku iya nambah, pemansang teknologi ngintu pemakai ke diatu ngemendarka sesebengkah produk disimpan sereta mengkang tau diempa pengelama beberapa bulan, lalu enggau nya muka potensial besai ngagai orang dagang pemakai menua pesisir ngerembaika makit sida.

Sama bisi datai maya tu iya nya bini iya Datin Amar Dato Doreen Mayang, Kaban Parlimen Betong Dato Dr Richard Rapu enggau bini iya Datin Lucy Mary Johnson, Sekretari Politik ngagai Premier Sarawak Roseline Mapong Sabai, Ketuai PBB Indu N.37 Bukit Saban Natasha Nasa Douglas kelimpah bala ketuai opis enggau ketuai komuniti kandang menua nya. — RBI

KANOWIT, 15 Mac – Projek ngaga jematan pejalai kaki ke beungkus RM150,000 di Rumah Kulih Jete, Nanga Seperu Sungai Ngemah mujur tembu sereta dipenyadika ba Aum Ketuai enggau Rayat ke diatur sehari tu.

Pengawa bejadika projek nya dipenyadika Kaban Kunsil Nengeri (ADUN), Anyi Jana ti mega meri besai terima kasih ngagai Komiti Pemansang enggau Pengelikun Genturung Pendiau (JKKK) Rumah Kulih ti udah bebendar nentuka projek nya ulih dipejalaika enggau manah.

Nitihku iya, projek jematan pejalai kaki ti dipejalaika Opis Parit enggau Entali Ai Malaysia entara pengawa perintah ngemanahka perengka guna pemun enggau pengelantang ungkup peranak rumah panjai di menua pesisir.

Berebak enggau nya, iya mega bisi madahka sebengkah agi projek pemansang ungkup Rumah Kulih iya nya ngaga palan entepan perengka pengangkut ti deka dipejalaika nengah agih belanja Projek Transformasyen Menua Pesisir (RTP) DUN Ngemah.

Iya ngarapka projek pemansang ti benung dipejalaika deka terus meri pemaik ngagai peranak menua nya sereta ngangkatka pengelantang pendiau komuniti dia.

Dulu agi ari tu dalam jaku pengelalau Tuai Rumah Kulleh, iya bisi bekunsika mimit sejarah penumbuh panjai sida iya ti udah lama nyadi palan pengentap pendiau peranak menua nya.

Iya mega mantaika pengarap iya ngambika mayuh agi pemansang ulih dikenataika ngagai rumah panjai nya, kelebih agi ungkup pengawa ngangkatmanah perengkaguna ke udah bisi.

Iya mega madah, peranak rumah panjai nya diatu betapi enggau penanggul rentayan komunikasyen telefon ti enda entap kenyau ari beberapa hari ke udah.

Kelimpah ari nya, Tuai Rumah Kulleh mega mantaika sukung komuniti lokap ngambika Anyi Jana dichalunka baru ba pengawa bepilih ti deka datai dikena neruska agenda pemansang di sitak nya. -RBI

SEBUYAU, 15 Mac — Komiti Pemansang enggau Pengelikun Genturung Pendiau (JKKK) Rumah Junau di Kampung Kelait, Sebuyau sehari tu tadi udah ngatur program ngerupan dikena meresi Dewan Mayuh Guna enggau Padang Futsal ba genturung pendiau nya.

Program tu mega ngaul pengawa meresi kandang endur ba sepemanjai jalai alun enggau ngerachun babas ba endur ngelingi dikena nentuka kandang rumah panjai seruran beresi, teratur sereta likun ungkup peranak.

Sepenyampau Urung 20 iku pengari peranak menua nya nyereta aktiviti ngerupan nya nengah chara begempung bejalaika pengawa meresi sechara sukarela kelai komitmen nyaga perengka guna mensia mayuh enggau rampa rumah panjai.

Tuai Rumah Junau ak Dugi lebuh dikerandau madah, program gotong-royong baka tu beguna amat dalam nerenakka semengat kerejasama enggau tanggungpengawa begulai ungkup peranak.

Iya mega ngenataika pengaga ati enggau terima kasih ngagai semua ke bisi kaul enggau kerejasama sereta meri sukung tegap ngemujurka program nya.

“Kerejasama baka tu beguna amat dikena nentuka kandang rumah panjai seruran beresi sereta likun.”

“Aku ngarapka pengawa tu deka terus dikemeran sereta dikemanahka agi jemah ila ungkup pengelantang enggau pengelikun peranak menua tu,” ku iya nerang ngagai Ruai Berita Iban — RBI

PAKAN, 15 MAC – Komuniti dipinta besaup nyaga ulah nembiak ngambika sida enda tepejuh ba penanggul rama enggau pengawa ke enda manah tau ngerusak pengidup sida dudi hari.

Tesau nya dikenataika Kaban Kunsil Nengeri (ADUN) ungkup sitak Pakan, Tan Sri William Mawan Ikom lebuh ngelanjarka Program Gerak Kerja RT Sejahtera: Program Gerakan Permerkasaan Rakyat (GEGAR) ti diatur Ejensi Anti Dadah Nasional (AADK) Sarikei begulai enggau Opis Penyerakup Bansa enggau Integrasyen Nasional ba Rumah Willie Anjot, Darau tadi.

Program ke dilangkas khas nya ngembuan tuju ngambika bala penyereta nambahka pemereti ati enggau pengelandik raban komuniti pasal pangku pengawa sida napi penanggul dadah dalam komuniti.

Pia mega, ulih nambahka kaul raban komuniti begulai ngelaban dadah sereta ngurangka penanggul dadah ngambika ulih nempa komuniti ti nadai ngaul dadah.

Mawan ke mega Penyanding ba Opis Premier Sarawak ungkup Industri Pemakai, Komoditi enggau Pemansang Kandang Menua madah, kaul komuniti ke chakah beguna amat dalam nempa komuniti ke tegap sereta tan.

Nitih ku iya, kerejasama entara komuniti, pentadbiran enggau pengawa bejalaika program ti betukuh ulih nempa komuniti ti tegap sereta lantang agi kelimpah ari nagang pengerekai pengawa salah ba menua tu.

Berebak enggau nya, iya nyemetak madahka Ketuai Komuniti enggau Ketuai Raban Bansa (KMKK) meseti bejalaika tanggungpengawa ti chakah dalam atur nyaga pengelikun enggau pengelantang komuniti lokal.

Bela datai ba program tu iya nya Johny Banyang, Pemesai Opis Penyerakup Bansa dan Integrasyen Nasional Sarikei, raban AADK Sarikei, tuai komuniti enggau peranak ngelilingi nya. – RBI

KUCHING, 15 Mac — Komuniti Dayak di Sarawak dilalau nyadi pesereta ti chakah ba pengawa ngemansangka nengeri tu lalu ukai semina ngemataka penyulut ke bisi nyadi.

Nitihka ripot ari The Borneo Post, Sapit Presiden Gerempung Bansa Dayak Sarawak (SDNU), Ir. Christopher Gira Sambang madah, komuniti Dayak meseti berani ngerebut peluang ke bisi sereta bejalaika tanggungpengawa ke lebih proaktif sama ngemansangka pemansang Sarawak.

Iya nyemetak madah, komuniti Dayak meseti ngubah ulah ari semina meratika ngagai nyadi penggerak batang dalam pemansang dikena nentuka komuniti nya enda tinggal ari penyulut.

“Baka jaku ke suah disebut Sapit Premier Sarawak, Datuk Amar Dr Sim Kui Hian iya nya ‘Jangan Tengok sahaja’, komuniti Dayak mega meseti ngemeranka semengat ke sama nengah chara nyadi pesereta ke chakah dalam pemansang nengeri tu,” ku iya.

Iya madah munyi nya lebuh bejadika Pengerami Makai Lemai Ngintu Ulang Taun Ke-62 SDNU Pampang Siol ke diatur ba Palan Christian Ecumenical Worship Centre ditu kena malam Hari Enam tu tadi.

Gira ke mega Kaban Kunsil Nengeri (ADUN) Tamin madah, penyerakup nyadi batang penegap komuniti Dayak lalu patut ditegapka agi nengah kerejasama rat entara komuniti sereta kaul ke manah enggau komuniti bukai di Sarawak.

Ku iya nambah, jemah ila Sarawak balat bepanggai ba penegap modal mensia, nya alai komuniti Dayak dipinta terus beranakka puku ba pelajar, penemu enggau pengelandik dikena nentuka sida mengkang relevan sereta kompetitif.

Berebak enggau nya, iya mega meransang raban nembiak Dayak berani bemimpi besai sereta bebendar nyapai pemujur dalam mayuh bengkah bidang profesional baka perubat, sains, injinir, pengawa dagang enggau nyadi ketuai.

Ku iya nambah, pengerami ngintu genap taun SDNU mega nyadi pelasar beguna dikena ngingatka pejalai panjai enggau ‘perjuangan’ komuniti Dayak dalam ngenegapka penuduk sida di nengeri tu.

Berebak enggau nya, Gira mega nyemetak madahka pekara begunaka Pampang SDNU Siol enggau lengkas ngulihka palan pendam baru laban palan ke udah bisi di Kampung Siol Kandis nyau deka manggai kapasiti maksimum.

Berindik enggau nya, iya ngansak pampang nya ngelala kandang endur ke engkeman sebedau ngenataika perambu ngagai perintah nengeri ngambika ulih diperunding enggau silik agi.

Ba atur pengawa nya mega, iya bisi madahka pemeri RM20,000 ngagai SDNU Pampang Siol enggau RM10,000 ngagai sayap nembiak iya dikena nyukung pengawa bejalaika program ninting taun gerempung nya. — RBI