KUALA LUMPUR, 15 Mac — Sebedau pengerami Aidilfitri, Menteri Besai Datuk Seri Anwar Ibrahim madahka sekeda inisiatif dikena ngelempungka ungkus pengidup rayat sereta ngemuntangka pejalai pulai ke menua.

Nitihka penerang iya “Alhamdulillah, aku udah ngaga beberapa pemadah khas ungkup rayat sebedau pengerami Aidilfitri ti ngaul Hari besai tambah kena Hari Lima tauka Hari Satu, bepanggai ba haribulan Hari Raya Aidilfitri.

“Skim Rega Maksimum ungkup Musim Pesta Aidilfitri berengkah ari 14 ngagai 28 Mac 2026” ku iya.

Iya madah ngarapka inisiatif tu ulih mantu ngelempungka ungkus pengidup rayat, nentuka rega barang mengkang ulih dibeli, sereta ngemudahka pejalai pulai ke menua diri.

“Ngarapka Syawal ti deka datai mai mayuh agi penyenang, berekat enggau pengelantang ngagai semua rayat Malaysia.” ku iya.

Perintah ngarapka singkang tu ulih nentuka rayat ngasaika pengerami ti lantang sereta diberekat agi, pia mega ngetanka pengelantang ekonomi nyerumba musim pengerami. — RBI

SONG, 15 Mac — Sekretari Politik Datuk Alvin Runggah Jimbun kemari udah ngarika YB Dato Sri Alexander Nanta Linggi ba Aum Besai Gerempung Apai Indai enggau Pengajar (PIBG) SMK No.

YB Dato Sri Alexander Nanta Linggi ngenataika jaku tabi basa sereta minta ampun laban enda ulih datai secara fizikal ketegal komitmen rasmi di Kuching.

Nitihku Datuk Alvin Runggah Jimbun, “Penatai mayuh apai indai enggau penyaga ari rumah panjai ngelingi Song nyata ngayanka pelajar anak mengkang dikemerat sereta nyadi tanggungpengawa bekunsi ti enda begilik.”

Rambau pengerami nya mega iya bisi madahka agih belanja penyampau RM10,000.00 ari YB Dato Sri ngagai PIBG SMK Song No.2

Wang turu tu ngembuan tuju dikena nyukung mayuh macham aktiviti enggau program pemansang sekula dikena nentuka nembiak nerima penguntung pelajar ke pemadu manah.

Ku iya nambah, “PIBG befungsyen nyadi jematan strategik ti nyambung sekula enggau komuniti, nentuka penyulut nembiak dalam sukut akademik enggau kokurikulum.”

Datuk Alvin Runggah Jimbun mega ngemeratka pemesai guna sinergi entara apai indai, pengajar, enggau sukung pelajar nengah inisiatif baka FTES enggau i-GPS, seraya ngarapka semengat begulai tu ulih ngenegapka ekosistem pelajar ti meruan sereta ngasuh SMK Song No.2 — RBI

BAU, 15 MAC – Siku lelaki madahka diri udah mechahka cheremin kerita polis ba palan entepan Indu Opis Polis Pelilih (IPD) Bau tengah hari kemari enggau pengarap diri deka ditangkap lalu diengkah ba lokal dikena nyeliahka diri ari dituduh nyadi ‘mata-mata’ polis.

Ketuai Polis Pelilih Bau, Superintenden Mohd Haide A. Rahman madah, pansik tumu tetemuka saspek ke beumur 32 taun nya ngaku ngereja pengawa nya laban iya enda tan napi pengachau ‘suara halus’ ke nuduh iya nyadi mata-mata polis bekaul enggau aktiviti orang gian dadah ba menua nya.

“Penusah nyadi urung pukul 1 lemai lebuh siku pemesai polis tepedaka saspek bejalai nuju sebuah kerita polis sebedau mansutka tukul lalu mechahka cheremin pesinjir kiba belakang kerita nya,” ku iya ba sebengkah penerang kemari.

Ku iya, pemesai nya terus ngelawa saspek lalu minta bantu ari bakih ke sama gawa enggau iya sebedau lelaki nya mujur ditan ba palan penusah nyadi.

Ku iya nambah, saspek mega bisi bakal mimit ba jari tunjuk kanan ketegal kena repik kacha maya ngereja pengawa nya.

Nitihku iya, saspek dibai berubat ngagai Sepital Bau sebedau ditan dikena mantu pengawa mansik silik agi.

“Polis mega bisi ngerampas tukul ti dipelabaka dikena ba penusah nya lalu peresa ai kemi ba saspek ditemu negatif dadah,” ku iya.

Kes tu dipansik ari baruh Seksyen 90 Akta Polis 1967 enggau Seksyen 427 Kanun Keseksaan.- RBI

JOHOR BAHRU, 15 Mac – Siku Kepala Pengajar ditan polis ba Indu Opis Polis Pelilih Utara Johor Bahru urung pukul 4.55 lemai dikena mantu pansik bekaul enggau kes nyipat siku nembiak lelaki, taun satu, ngujungka nembiak nya bakal.

Ketuai Polis Pelilih Utara Johor Bahru, ACP Radin Ramlan Radin Taha, madahka saspek ke beumur 48 taun nya ditan tim polis ari Bagi Tasat Jenayah pengudah sida nerima penerang bekaul enggau kes nya.

Nitihku iya, polis sebedau tu bisi nerima ripot ari siku lelaki beumur 40 taun ke mega apai anak nembiak ke bisi kaul nya urung pukul 9.46 pagi.

Pansik tumu tetemuka tudah nembiak nya dipelabaka dipalu saspek maya ba kantin sekula urung pukul 7.39 pagi ba hari ke sama.

“Peresa rikod tetemuka saspek nadai rikod jenayah sebedau tu lalu peresa tisi ai kemi keterubah ti dipejalaika mega ditemu negatif,” ku iya ba sebengkah penerang.

Ku iya, saspek udah dibai ngagai kort Hari Tiga tu tadi lalu diriman pengelama tiga hari sebedau dilepas nengah jamin polis kemari.

Kes tu dipansik ari baruh Seksyen 31(1)(a) Akta Anak Mit 2001.

Sebedau tu, siti tulis ba Facebook ari akaun Isu Semasa Online viral ba media rama, ti mantaika pekara bekunsika penusah nya begulai enggau gambar siku nembiak lelaki ti diripotka bakal. – RBI

SELANGAU, 15 Mac — Infrastruktur enggau pemansang ekonomi rayat nyadi batang fokus ba Dewan Undangan Negeri (DUN) N.59 Tamin, pia ku Kaban Kunsil Nengeri (ADUN), Tamin YB Christopher Gira Sambang.

Iya nesau rayat ngambika terus nyukung ketuai ke bisi diatu dikena nentuka agenda pemansang enggau pengelantang pendiau komuniti ulih diteruska enggau nadai penangul.

Iya madah munyi nya lebuh bejaku ba Pengerami Bejadika Kampung Sekeladan ba Rumah Umbu Anak Lang, Sungai Buloh, Selangau kemari.

Kenyau diberi mandat, bemacham pemansang asas udah dipejalaika nyengkaum perengka guna bekal kuasa karan ke diatu nyau deka manggai 95 peratus bungkur.

Beberapa projek besai mega udah dipejalaika dikena ngenegapka perengkaguna mensia mayuh enggau ekonomi menua tu, nyengkaum agih belanja RM38 juta ungkup projek Opis Pelajar, pemansang Palan Pemakai Selangau ke beungkus RM15 juta, pia mega projek jalai by-pass Selangau ke beungkus RM3 juta.

Ba pengawa ke sama, iya mega mantaika pengawa ngelancharka ‘Sumbangan Keperluan Asas Sarawak’ (SKAS) nengah aplikasyen SPay Global dikena ngelempungka ungkus pengidup rayat, kelimpah ari mantaika pangku pengawa Ejensi Pemansang Mid Rejang (MiRRDA) dalam ngenyampatka pemansang enggau pengawa bejalaika 15 projek jalai berenggat.

MiRRDA mega ngemeratka pemansang ekonomi rayat nengah agih belanja RM300 juta ungkup kebun sawit, RM10 juta ungkup jelu tupi, RM10 juta ungkup program nanam kupi, kelimpah ari tambah RM4.8 juta ari Perintah Sarawak.

YB Christopher mega ngenataika pengaga ati iya ngagai Opis Tanah enggau Survei Sarawak ti udah bebendar meri pala tanah nengah Seksyen 18 di Ili Oya enggau Ulu Oya, lalu ngarapka mayuh agi kandang menua dalam DUN Tamin deka diberi pala tanah, nyengkaum kandang menua Lemai.

Kelimpah ari pemansang infrastruktur, pengawa bejalaika Program MyLesen iya nya kerejasama entara Opis Perengka Pengangkut Jalai Malaysia (JPJ), Palan Servis DUN Tamin enggau Institut Memandu Ngu Chung Beng mantu raban nembiak ngulihka lisin mutosikal kelas B2.

Ngelansa pasal Pengawa Bepilih Nengeri Sarawak ke disadang taun tu, iya minta rayat terus meri sukung penuh ngagai iya enggau Gabungan Parti Sarawak (GPS) dikena nentuka agenda pemansang nengeri tu terus dipejalai.

Berebak enggau pengerami nya, pengawa mantaika agih belanja Projek Mit Menua Pesisir (MRP) penyampau RM24,000 ngagai Rumah Umbu Anak Lang dikena nyukung aktiviti enggau pemansang genturung pendiau rumah panjai nya.

Sama bisi nyempulang Kaban Senator Negara YB Senator Rita Sarimah Patrick Insol, Pemesai Pelilih Menua Selangau, Yalin Anak Assan, Ketua Raban Bansa sereta mega peranak menua nya. — RBI

LIMBANG, 15 Mac — Projek ngaga GIATMARA di Limbang diatu nyau deka tembu enggau penyulut fizikal 96.14 peratus naka ke diatu.

Nitihka penerang ti dipansutka Opis Kereja Raya Sarawak, projek nya dipejalaika ejensi nya nyadi pengemata projek lalu entara inisiatif ti beguna dalam pengawa ngenegapka pemansang modal mensia di kandang menua utara Sarawak.

Enti udah tembu ila, fasiliti Giatmara dikearapka ulih ngenegapka ekosistem Pelajar enggau Latih Teknikal enggau Vokasional (TVET) Bagi Menua Limbang, kelimpah ari muka mayuh agi peluang ngagai raban nembiak menua tu ngambi latih pengelandik.

Kelimpah ari nya, fasiliti nya mega dikearapka ulih nyadi pelasar ti beguna dalam ngadaka pengereja pengawa ti bepengelandik sereta kompetitif dikena nangkup guna pemansang nengeri enggau peminta sektor industri.

Projek tu entara pengawa perintah ti seruran dipejalaika dalam ngerembaika akses ngagai latih pengelandik ngagai komuniti setempat, lalu enggau nya nyukung agenda pemansang sosioekonomi di menua pesisir. — RBI

KANOWIT, 15 Mac — Komiti Pemansang enggau Pengelikun Genturung Pendiau (JKKK) Penyulau sehari tu udah mansutka penerang rasmi dikena nerangka fakta ke bendar bekaul enggau penemu tudah dalam operasyen ngiga enggau nyelamat (SAR) ti ngaul siku individu ti dikelala enggau nama Richard Lee enggau nya nyangkal sekeda spekulasyen media media.

Nitihka penerang nya tudah ditemu tepat pukul 11.54 pagi kena hari kelima operasyen, 12 Mac, ulih tim ngiga ti mungkur peranak Rumah Siba, Skuau enggau peranak Kampung Penyulau ti bisi kaul terus enggau pengawa ngiga kenyau ari hari keterubah operasyen nya.

JKKK Penyulau madah, pengudah mansa ditemu, proses mindah tekala nya dipejalaika nengah kerejasama rat entara tim operasyen SAR ti ngaul Polis Diraja Malaysia (PDRM), Opis Bomba enggau Penyah Penusah Malaysia (JBPM) enggau Raban Pengelikun Mensia Mayuh (APM) Malaysia (APM), begulai enggau peranak ari Penyulau enggau Rumah Siba Sekuau.

Tudah udah nya dibai pansut ari palan ditemu sebedau diperubat enggau lengkas ngagai sepital ulih APM ngambika diperubat enggau silik agi.

Dalam penerang ke sama, JKKK Penyulau mega ngenataika pengaga ati ke pemadu tinggi ngagai semua piak ke bisi kaul enggau pemujur operasyen nya, nyengkaum raban Komiti JKKK Penyulau enggau semua peranak rumah panjai ke udah bebendar neresa kandang kampung kenyau ari 8 Mac tu tadi.

Tabi puji mega diberi ngagai ejensi rasmi baka PDRM, JBPM enggau APM ketegal pengelandik, strategi enggau koordinasyen operasyen ti dipejalaika sepemanjai kemisi SAR.

Kelimpah ari nya, terima kasih mega diberi ngagai ketuai Ketuai Nembiak Parti Pesaka Bumiputera Bersatu (PBB) Pampang N.50 Machan ketegal sukung moral enggau pengibuh ti dipandangka sepemanjai operasyen nya dipejalaika.

JKKK Penyulau mega ngaku semengat bepangan ti dipandangka Tuai Rumah Siba enggau peranak Skuau ti sama-sama mantu dalam pengawa ngiga, kelimpah ari meri terima kasih ngagai semua raban volunteer ti datai ke mua meri bantu enggau sukung moral sepemanjai operasyen nya dipejalaika.

Nitihka penerang, pemujur nyidi mansa asil ari pengawa begulai entara peranak menua nya enggau ejensi penyelamat ti bejalaika pengawa enggau konsisten ari pun nyentuk operasyen tembu.

“Nadai jaku ‘hero individu’ dalam misi tu laban tetiap piak bejalaika tanggungpengawa ti beguna dalam pemujur operasyen nyelamat tu,” ku penerang nya.

JKKK Penyulau mega meri pengaga ati ngagai semengat begulai enggau penyerakup komuniti ti dipandangka sepemanjai operasyen nya, ti dipadahka nyadi manifestasi semengat “Segulai Sejalai” ba komuniti ngelingi. — RBI

KAPIT, 15 Mac — Tudah ti diripotka lenyau pengudah bot karam di Sungai Batang Rajang besemak enggau kandang menua Pantu, urung 1.5 kilometer ari Wharf Kubu, Pekan Kapit, kemari ditemu raban Ngiga enggau Nyelamat (SAR) lemas pagi tadi.

Mansa udah dikelala enggau nama Brando Jawi anak Mamba, 25 taun, ari Rumah Kawin, Nanga Peraran, Sungai Katibas, Song.

Sekretari Politik Menteri Kereja Raya, Datuk Alvin Runggah Jimbun ke bisi ba endur nya bisi ngabas sida sebilik ba palan operasyen meri jaku peransang enggau sukung moral lebuh sida nganti pejalai operasyen ngiga mansa.

Iya ke bisi datai begulai enggau Ketuai Penyelaras Palan Servis P215 Kapit, Ambrose Abong Bugek mega ngelimpangka awak betemu enggau sida sebilik tudah ke agi dalam gaya penyinu ati berindik ari penusah nya.

Nitih ku Alvin, iya amat sinu enggau nasit ke nuntung sida sebilik mansa lalu besemaya deka mantu ngenataika bantu ke patut dikena ngelempungka tating sida.

“Aku ngarika Menteri Kereja Raya, Dato Sri Alexander Nanta Linggi ngenataika penyinu ati ngagai sida niang sebilik.

“Kitai deka meda baka ni bantu ke engkeman ulih disalur dikena mantu sida nengah maya ti tusah tu,” ku iya.

Ba penusah ke nyadi urung pukul 3.50 lemai kemari, tudah enggau empat iku bakih ke bukai dipelabaka dalam pejalai pulai ke rumah pengudah mandi ba sungai sebedau perau ke ditepan sida karam.

Nitihka penerang bakih tudah ti ngaga ripot nya, penusah nya dipelabaka nyadi ketegal gelumbang besai ti ditempa sebuah tongkang ti nengah kandang endur nya.

Empat iku bakih tudah mujur nyelamatka diri, seraya tudah diripotka lenyau sebedau operasyen SAR dipejalaika tim Balai Bomba enggau Penyah Penusah Kapit enggau kerejasama Polis Diraja Malaysia.

Tubuh tudah udah nya ditemu melepung ba kandang jeti ili Bandar Kapit pagi tadi, lalu enggau nya ngujungka operasyen ngiga mansa ke udah berengkah kenyau ari kemari. — RBI

LUNDU, 15 Mac — Kaban Kunsil Nengeri (ADUN) Opar, Billy Sujang madahka agih belanja sepenyampau RM350,000 dikena nyukung pemansang enggau ngenegapka pangku pengawa komuniti nengah Gerempung Bansa Dayak Bidayuh (DBNA) Pampang Lundu.

Ku iya, ari penyampau nya, sepenyampau RM300,000 diungkupka dikena ngangkatmanah Begunan DBNA Lundu enggau Dewan DBNA Lundu, lalu RM50,000 nengah agih belanja MRP diungkupka dikena nyukung pengawa bejalaika mayuh macham program komuniti.

Penerang nya dibantai lebuh iya bejadika Aum Besai Tiga Taun Sekali DBNA Pampang Lundu ti diatur ba Dewan DBNA Lundu kena Hari Enam tu tadi.

Nitih ku iya, pengawa ngemanahka perengka guna nya dikearapka ulih nyendiaka palan ti lantang agi sereta kondusif endur bejalaika mayuh macham aktiviti komuniti enggau program pemansang komuniti di kandang menua Lundu.

“Dikearapka agih belanja tu ulih dikena penuh DBNA Lundu nyadi palan aktiviti komuniti ti nyukung pemansang rama, pelajar enggau main asal komuniti setempat,” ku iya.

Dalam jaku dipansutka iya, iya mega ngemeratka pemesai guna DBNA nyadi pelasar ti nyerakupka komuniti Bidayuh di pelilih Lundu, ti mungkur bemacham sub etnik baka Salako, Jagoi enggau Rara.

Ku iya, taja pan mayuh macham dialek enggau penatai budaya ba komuniti Bidayuh tang sida agi bekunsika pesaka asal enggau identiti ke sama ti patut dijaga.

Kenu ku iya, dalam jeman moden kemaya hari tu, pengawa ngetanka jaku, budaya enggau adat komuniti Bidayuh nyadi tanggungpengawa ke berat dikena nentuka pesaka tu enda lenyau ditinggang jeman.

Berebak enggau nya, iya mega ngelaluka pengawa DBNA dalam mantu ngaga dokumentasyen tanah Hak Adat Asal (NCR) komuniti Bidayuh dikena nentuka hak enggau pesaka asal komuniti nya terus diintu sereta dikelala jemah ila.

“Tanah NCR ukai semina pengeraja ekonomi ungkup komuniti, tang nyadi pesaka turun temurun ti ngembuan rega sejarah enggau identiti ungkup komuniti kitai,” ku iya nerang.

Iya mega nyemetak madahka kerejasama rat entara gerempung komuniti enggau perintah beguna amat dikena nentuka agenda pemansang ulih dipejalaika enggau efektif nurun ngagai renggat baruh.

Ku iya, Perintah Sarawak ari baruh iring Menteri Besai Sarawak, Abang Abdul Rahman Zohari Abang Openg seruran ngemeratka pemansang menua pesisir, ngangkatka tikas pengidup rayat enggau ngenegapka komuniti.

Berindik enggau nya, iya minta komuniti Bidayuh di Lundu terus ngenegapka penyerakup enggau semengat kerejasama dikena nentuka komuniti nya terus maju sereta ulih besemekih jemah ila.

Pengerami nya bela digulu Ketuai Komuniti Bidayuh Bagi Menua Kuching, Temenggong Atok Darop, Chairman DBNA Pampang Lundu Cikgu Suimi Kimseng, bala ketuai genturung pendiau, kaban komiti enggau kaban DBNA Lundu. — RBI

KAPIT, 15 Mac — Siku lelaki dikeirauka lemas pengudah perau kayu ke ditepan iya enggau empat iku bakih iya karam di Sungai Batang Rajang semak kandang menua Pantu, urung 1.5 kilometer ari Wharf Kubu, kena malam Hari Lima tu tadi.

Nitihka ripot ari Balai Bomba enggau Penyah Penusah (BBP) Kapit, penusah nya nyadi urung pukul 7 lemai kena 13 March tu tadi lebuh lima iku pekereja tungkang nepan perau kayu deka pulai ke rumah pengudah mandi ba sungai.

Taja pia, perau ke ditepan sida dipelabaka karam pengudah betempuh enggau gelumbang besai lebuh sebuah bot tunda nengah kandang endur nya.

“Empat iku mansa mujur ngelarika diri seraya siku agi diripotka lenyau lalu dikeirauka lemas,” ku penerang nya.

Kangau bekaul enggau penusah nya diterima urung pukul 3.59 lemai Hari Enam tu tadi sebedau operasyen ngiga enggau nyelamat (SAR) dipejalaika.

Operasyen nya berengkah urung pukul 3.30 lemai pengudah raban penyelamat bulih penerang bekaul enggau mansa.

Penerang operasyen mega bisi diatur begulai enggau Polis Diraja Malaysia (PDRM) ba Indu Opis Polis Pelilih (IPD) Kapit sebedau pengawa ngiga nya dipejalaika.

Raban penyelamat bejalaika pengawa nyidi dalam kandang radius satu kilometer ari palan alai mansa dipelabaka labuh ngena chara ‘water surface’ ngelingi Sungai Batang Rajang.

Operasyen SAR hari keterubah taja pia ditangguh pukul 6 lemai lalu deka ditampung baru pagi pagila dikena neruska pengawa ngiga mansa ke agi lenyau. — RBI