KUALA LUMPUR, 16 MAC – Presiden Parti Pribumi Bersatu Malaysia (BERSATU) Tan Sri Muhyiddin Yassin bebendar nyangkal tuduh ti madahka parti nya nempa kaul rat enggau Pakatan Harapan (PH).

Nitihku iya, tuduh nya tuduh ti enda bebatang, nadai pelasar sereta ngembuan niat ti enda manah dikena ngeruga pengelantang dalam BERSATU enggau kaul entara parti dalam Perikatan Nasional (PN).

Ku Muhyiddin, pekara nya nadai kala dikerandauka ba sebarang renggat parti nyengkaum ba Kaban Supreme Kaunsil ti nentuka polisi enggau kuing BERSATU.

Iya nyemetak madahka BERSATU ngembuan prinsip pengawa ke nyata iya nya ngetanka jalai pengarap, bansa enggau menua kelimpah ari ngetanka pengelantang rayat.

“Kerejasama BERSATU enggau sebarang parti bukai diembing enggau prinsip pengawa ti terang tu,” ku iya nengah sebengkah penerang sehari tu.

Nitihku iya, bepelasarka prinsip tu mih BERSATU numbuhka PN begulai enggau Parti Islam Se-Malaysia (PAS) sebedau gempung nya mega dipasuk Parti Gerakan Rakyat Malaysia (GERAKAN) enggau Parti Rakyat India Malaysia (MIPP).

Ku iya nambah, PN nyadi pelasar ke pemadu manah endur BERSATU ngamatka pejalai parti lalu BERSATU enda kala begilik ari penetap nya.

Berebak enggau nya, Muhyiddin madahka batang fokus BERSATU maya ke diatu iya nya terus ngenegapka parti sereta ngenegapka PN dikena nyikap diri napi Pengawa Bepilih Besai Ke-16 (PRU-16). – RBI

BETONG, 16 Mac — Program Ketuai Begulai enggau Rayat ke diatur ba Rumah Panjai (TR) Barau Unji, Benggang ditu kemari, nyadi pelasar beguna dalam ngerapitka kaul entara ketuai enggau komuniti menua nya.

Kaban Parlimen Betong, Dato Dr. Richard Rapu madah, program baka tu meri awak ngagai bala ketuai begulai sereta beinteraksyen terus enggau rayat ninga terus penemu enggau utai ke diguna komuniti ba kandang rumah panjai nya.

“Program baka tu beguna amat nyadi ruang endur bala ketuai betemu terus enggau rayat sereta meretika isu enggau guna komuniti ngelingi,” ku iya ba sebengkah penerang ba Facebook iya.

Penatai temuai ngagai pengerami nya disambut enggau pengawa mandangka Ngajat sebedau ditampung enggau sampi sereta jaku ari bala ketuai komuniti menua nya nyengkaum Tuai Rumah Panjai Barau, Penghulu Sebastian Kadam Randy, enggau Pemanca Norman Ngumbang.

Pengerami nya mega nyadi saksi pengawa nyuaka setipikit chiri ngagai Tuai Rumah ke baru, Sebastian Kadam Randy, kelimpah ari pengawa nyuaka setipikit chiri ngagai beberapa iku Tuai Rumah ke baru.

Berebak enggau nya, tepa pengingat mega bisi disuaka ngagai ex-Penghulu George Gerrie ti nyadika kelai terima kasih ngagai jasa enggau pemeri iya sepemanjai timpuh iya mangku pengawa nya.

Kelimpah ari pengawa rasmi nya, sekeda aktiviti komuniti mega bisi diatur dikena ngerichahka agi program nya nyengkaum pengawa melah kek ari Biro Indu dikena minta pemeri ari temuai ke bisi datai enggau sesi belagu ke dipelanja.

Pengerami nya mega dirichah enggau jaku Sapit Menteri Pemansang Nembiak, Lumba enggau Orang Dagang Sarawak ke mega Kaban Kunsil Nengeri ( ADUN) N.36 Layar, Datuk Gerald Rentap Jabu.

Berebak enggau nya, Dato Dr Richard Rapu meri besai terima kasih ngagai raban pengatur enggau selampur komuniti Rumah Panjang TR Barau Unji, Benggang laban udah ngelaluka sereta nerima pengabang ti chukup manah.

Iya ngarapka program baka tu ulih terus dikena nyadika pelasar dikena ngerapitka kaul entara ketuai enggau rayat kelimpah ari ngenegapka penyerakup entara komuniti setempat. — RBI

JEMATAN BATANG IGAN DIBUKA, BUKTI KOMITMEN PERINTAH NEGAPKA PEMANSANG INFRASTRUKTUR SARAWAK

IGAN, 16 Mac — Pengawa muka Jematan Batang Igan ngagai mensia mayuh sehari tu nyadika sebengkah agi pekara ti beguna dalam pemansang infrastruktur nengeri tu lebuh enggau rasmi ngetuka urung 30 taun operasyen servis feri ti udah lama nyadi batang penyambung di sitak nya.

Sapit Premier Sarawak ti mega Menteri Infrastruktur enggau Pemansang Penyangkai Kapal Sarawak, Datuk Amar Douglas Uggah Embas madah, pengawa muka jematan nya siti momen besejarah, kelebih agi ngagai komuniti di Igan enggau kandang menua ngelingi ke sebedau tu bepanggai ba servis feri meraka sungai.

Nitihku iya, berengkah ari sehari tu, jematan nya ulih dikena penuh mensia mayuh, lalu enggau nya ngelai pengujung pangku pengawa feri ke udah meri servis ngagai kandang menua nya nyau deka tiga dekad.

“Enggau penembu jematan tu, servis feri ke udah lama nyadi batang penyambung ditu diatu nyadi sebagi ari sejarah ungkup peranak menua nya,” ku iya lebuh dikerandau pengarang berita ba Pengerami Pra Ngelancharka Jematan Batang Igan ditu, sehari tu tadi.

Ku iya nerang, jematan pemanjai 1.439 kilometer ke digaga ngena ungkus RM285.5 juta nya ngayanka komitmen perintah nengeri ngenegapka rentayan infrastruktur enggau ngemanahka perengka guna penyambung jalai di Sarawak.

Uggah mega nerangka taun tu nyadi “taun ngetau jematan” lebuh sekeda agi projek jematan di serata nengeri disadang tembu sereta dibuka ngagai mensia mayuh dalam timpuh ke semak tu.

Ku iya, pemujur nembuka projek nya ngayanka pengeran Premier Sarawak, Datuk Patinggi Tan Sri Abang Johari Tun Openg, dalam ngamatka agenda pemansang nengeri tu, nyengkaum semaya deka ngaga lebih 20 buah jematan di serata Sarawak.

Nitihku iya, projek nya dipelanja ngena belanja perintah nengeri pengudah sekeda projek jematan nyengkaum Jematan Batang Igan dikinsil Perintah Besai ba taun 2018 suba.

“Taja pia, perintah Sarawak udah ngambi inisiatif ngiga pemisi belanja kediri empu dikena nentuka projek tu ulih diteruska nyentuk ke mujur ditembu,” ku iya.

Ba pemansang ke sama, iya andal amat servis feri ari Kuching ke Miri deka diketuka abis ujung taun tu lebuh semua projek jematan ke benung dipejalaika diatu udah tembu penuh.

Ku iya, ke diatu agi bisi beberapa endur baka Paloh ke ngena servis feri, tang perengkaguna nya deka diketuka enti projek ngaga jematan ba kandang menua nya tembu ila.

“Pengawa tu mega seriris enggau Strategi Pemansang Pasca COVID-19 2030 (PCDS 2030) ti nagit Sarawak nyapai status nengeri bepenatai pemisi tinggi manggai ba taun 2030,” ku iya.

Sama bisi ngulu atur pengawa nya, Kaban Parlimen Igan, Haji Ahmad Johnie Zawawi, Ahli Parlimen Tanjung Manis, Dato Ir. Yusuf Abd Wahab, Ahli Dewan Undangan Negeri (ADUN) Semop, Datuk Abdullah Saidol, ADUN Jemoreng, Datuk Dr. Juanda Jaya, ADUN Balingian Abdul Yakub Arbi, ADUN Tellian, Royston Valentine enggau Direktor Opis Kereja Raya Sarawak Datu Adj. Prof. Ir. Ts. Gs. Br. PMr. Dr. Cassidy anak Morris — RBI

BETONG, 16 Mac 16 — Kaban Parlimen Betong, Dato Dr. Richard Rapu nyemetak madahka tetiap iku Raban Kaunsil meseti seruran bebendar bejalaika tanggungpengawa dikena nentuka servis ngagai komuniti seruran ba tikas pemadu manah.

Ku iya, nyadi Raban Kaunsil ti dikeandal, sida ukai semina megai tanggungpengawa ngenataika servis ngagai rayat, tang mega nyadi mata enggau pending komuniti dalam ngenataika bemacham isu enggau penanggul ke ditapi komuniti ngelingi.

“Nyadi Raban Kaunsil ke dikeandal, kitai ukai semina megai tanggungpengawa meri servis ke pemadu manah ngagai komuniti, tang mega nyadi mata enggau pending rayat dalam ngenataika isu tauka penanggul ke ditapi komuniti,” ku iya.

Iya madah munyi nya lebuh nyadi chairman Aum Penuh Bil 1/2026 Kaunsil Pelilih Betong ke diatur ba Bilik Aum Heliconia, Opis Kaunsil Pelilih Betong sehari tu tadi.

Nitih ku iya, komitmen ti terus ari semua Raban Kaunsil beguna amat dikena nentuka Kaunsil Pelilih Betong terus mansang nyadi sebuah PBT ti progresif, siru sereta kompetitif di Sarawak.

“Komitmen tu beguna dalam pengawa deka nempa Kaunsil Pelilih Betong entara ke pemadu manah di Sarawak, progresif, siru sereta kompetitif,” ku iya nambah.

Entara batang agenda aum nya nyengkaum pesan ari chairman, ngentaska minit aum sebedau tu, pekara ke bisi nyadi sereta pekara ke bekaul.

Sama bisi datai Sapit Menteri Pemansang Nembiak, Lumba enggau Orang Dagang Sarawak ti mega Kaban Kunsil Nengeri (ADUN) sitak N.36 Layar, Datuk Gerald Rentap Jabu sereta temuai dipebasa bukai. — RBI

MUKAH, 16 Mac – Pengawa ngaga Jematan Batang Igan diatu ngerintaika siti agi pemujur dalam pemansang infrastruktur nengeri tu lebuh nyadi jematan ke sembilan tembu di Sarawak.

Tu pengudah Jematan Marudi, Jematan Muara Lassa, Jematan Tun Taib Mahmud (Jepak), Jematan Tun Datuk Patinggi Tuanku Haji Bujang Tuanku Haji Othman (Jematan Batang Rajang), Jematan Batang Saribas, Jematan Datuk Amar Juma’ani (Bintangor), Jematan Sebauh enggau Jematan Lingga.

Nengah penembu jematan tu, timpuh pejalai ke sebedau tu urung 30 minit ngena servis feri diatu ulih dipandakka ngagai semina beberapa minit aja.

Program Pra Bejadika Jematan Batang Igan tu udah dipenyadi Sapit Premier Sarawak, Datuk Amar Douglas Uggah Embas ke mega Menteri Wang enggau Ekonomi Baru II sereta Menteri Infrastruktur enggau Pemansang Palan Penyangkai Kapal Sarawak.

Projek ngaga Jematan Batang Igan nya sebagi ari pemansang Projek Jalai Tebing Pantai Sarawak Pakej D5 ti dipejalaika Opis Kereja Raya (JKR) Sarawak ti nyadi ejensi bejalaika pengawa ari baruh Opis Menteri Infrastruktur enggau Pemansang Palan Penyangkai Kapal Sarawak.

Jematan pemanjai 1,439.40 meter nya digaga nitihka Standard R5 JKR iya nya jematan dua lurung ngena sistem Prestressed Post-Tensioned T-Beam enggau Balanced Cantilever.

Projek tu mega ngaul pengawa ngaga jalai alun dua lurung ba kedua-dua piak jematan kelimpah ari ngangkatmanah sebagi ari jalai ke diatu ngagai standard R5 dikena ngangkatka pengelikun enggau pengelantang penguna jalai alun.

Pengerami pra-bejadi tu ngelaika siti agi pemujur beguna dalam pengawa Perintah Sarawak ngenegapka rentayan infrastruktur nengeri nengah pengawa bejalaika projek Jalai Tebing Pantai Sarawak ti udah meri pemaik ke besai ngagai rayat. – RBI

BRUNEI, 16 Mac — Mensia mayuh dipadahka jam operasyen ba pos bejaga imigresen deka dilanjar berengkah Hari Tiga, 18 Mac 2026 ngagai Hari Minggu, 29 Mac 2026, dikena ngemuntangka pemindah pansut tama garis entara menua dalam timpuh nya.

Nitihka penerang ke dikunsi nengah akaun rasmi @jipkbrunei, pengawa ngelanjarka jam operasyen dipejalaika dikena nentuka pejalai mensia mayuh lanchar, kelebih agi maya timpuh pemindah meraka garis entara menua majak nambah.

Berindik enggau nya, mensia mayuh dilalau merambu pejalai sida tumu sereta nitihka semua atur enggau gerah ti udah ditetapka piak bekuasa ba pos bejaga imigresen.

Dikearapka inisiatif tu ulih mantu ngurangka penyekut sereta nentuka proses meresa enggau pekara imigresen bejalai enggau lanchar agi dalam timpuh ke dipadah nya. — RBI

BETONG, 16 MAC – Pekit Pekit Kumang Gawai Betong 2026 deka berengkah 9 Mei enggau tiga panggau besai diperambu deka diatur ba Dewan Tan Sri Datuk Amar Stephen Kalong Ningkan.

Pekit ke nyadi siti ari pengawa budaya beserimbai enggau pengerami Gawai Dayak deka berengkah enggau renggat pemungkal kena 9 Mei 2026, ditangkan enggau renggat semi-final kena 16 Mei 2026, lalu renggat kepenudi diperambu deka diatur kena 23 Mei 2026.

Program tu ngembuan tuju deka mantaika pengalus enggau penyelai ngepan asal indu Iban nengah pekit Kumang, kelimpah ari meri basa ngagai pesaka asal komuniti Dayak, kelebih agi ba kandang menua Betong.

Orang ke bisi ati deka nyereta pekit tu tau ngulihka penerang silik nengah chara betanya ngagai Edward Batin Wil (019-4125732), Chang Li Li (019-8864522) tauka Olivia Serembang (019-8559476).

Raban pengatur mega bisi nyendiaka kod QR dikena ngemuntangka proses ngerejista penyereta, enggau nya meransang mayuh agi penyereta pekit ti nyadi kelai pemanah main asal komuniti Iban. – RBI

MERADONG, 16 Mac – Siku lelaki peranak menua tu beumur 48 taun ditan polis pengudah diperesa positif dadah dalam operasyen Ops Tapis ti dipejalaika Pasukan Petugas Indu Opis Polis Pelilih (IPD) Meradong, lemai kemari.

Ketuai IPD Meradong, DSP Tansli Mering madah, suspek ditan urung pukul 5 lemai kena 15 Mac tu tadi ba kandang pelilih menua Bintangor pengudah dipelabaka bisi kaul enggau aktiviti dadah sebedau dibai ngagai IPD Meradong ngambika atur ke silik agi dipejalaika.

Nitihku iya, pemutus peresa ai kemi ti dipejalaika ba Opis Bagi Tasat Jenayah Narkotik (BSJND) Pelilih Meradong tetemuka saspek positif Amphetamine enggau Methamphetamine.

“Meresa baru rikod ke udah, tetemuka saspek nadai ngembuan sebarang rikod jenayah tauka penyalah dadah sebedau tu,” ku iya nengah sebengkah penerang sehari tu.

Ku iya nambah, kes tu dipansik ari baruh Seksyen 15(1)(a) Akta Dadah Berbahaya 1952 ti nyendiaka ukum mata duit enda ngelui ari RM5,000 tauka jil nyentuk dua taun enti dikenuku salah.

Iya nyemetak madahka polis beratika penyalah bekaul dadah ba genturung pendiau enggau berat lalu enda deka belembut ba sebarang aktiviti salah guna dadah di pelilih Meradong.

Berindik enggau nya, mensia mayuh ke bisi penerang bekaul enggau aktiviti dadah dipinta ngenataika penerang nya ngagai polis nengah chara betanya ngagai Balai Polis Bintangor nengah lumur 084-693222. -RBI

BINTULU, 16 Mac — Pekit Kumang Gawai 2026 ti diatur Parti Pesaka Bumiputera Bersatu (PBB) N.60 Kakus deka diatur kena 2 Mei tu ba Dinner World, Bintulu berengkah pukul 6.00 lemai.

Pekit tu ngembuan tuju deka ngerichahka pengerami Gawai Dayak seraya mega meri basa ngagai pesaka asal komuniti Iban, kelebih agi pekayan asal Ngepan Iban enggau elegan indu Dayak ti nyadi kelai identiti budaya komuniti nya.

Pekit tu nyediaka perais besai RM5,000 ungkup pemenang gelar Kumang Gawai, ti bela nerima mahkota, selampai, trupi enggau Mok Cek.

Penuduk lumur dua tauka Lulong deka mai pulai perais mata duit RM3,000 disempulang selampai, trupi enggau Mok Cek, lalu penuduk lumur tiga Selinggar Matahari deka nerima perais mata duit RM2,000 disempulang selampai, trupi enggau Mok Cek.

Kelimpah ari nya, perais sagu ati RM500 mega deka disediaka ngagai penyereta ke bulih penuduk lumur empat ngagai lapan kelai meri terima kasih ngagai penyereta sida.

Mensia mayuh ke bisi ati deka nyereta pekit tu dikelaluka ngerejista diri tumu dikena ngerichahka agi pengawa tu ila.

“Program tu mega nerima sukung ari Raban Ngepan Iban (RNI) dalam pengawa ngenegapka pengawa ngelaku sereta ngintu main asal komuniti Iban” ku penerang nya. — RBI

SEMPORNA, 16 Mac — Siku raban soldadu udah diripotka lenyau

pengudah enda ditemu ba pos pengentap pendiau Pulau Pandanan, ditu, kenyau ari pagi Hari Enam tu tadi.

Soldadu ke bekaul nya udah dikelala enggau nama Fredenick anak Petrus, 21, bebansa Iban ari Batalion Ke Enam Rejimen Renjer Diraja (6 RRD), Kem Ulu Tiram, Johor.

Pengelenyau tudah ditemu urung pukul 7 pagi kena 14 Mac maya pengawa meresa bebaris pagi ba pos pengentap pendiau nya.

Nengah penerang ba laman Facebook rasmi Polis Pelilih Semporna sehari tu, pemesai renjer soldadu Moha Azhar Sainuddin madahka kaban iya nadai ba pos pengentap pendiau Pulau Pandanan maya pengawa meresa nya.

“Berindik ari nya, pengawa ngiga enggau lengkas dipejalaika raban ngelingi kandang endur pos pengentap pendiau, tang mansa agi enda ditemu,” ku iya.

Ku iya nambah, mensia mayuh ke bisi penerang tauka bisi meda mansa dipinta datai ke mua mantu mansik kes nya.

“Mensia mayuh ke bisi penerang tau

tau betanya ngagai pemesai pemansik kes tu, ASP Mohammad Ali bin Amat ba lumur 013-2120852 tauka datai ngagai balai polis ke semak.

“Kerejasama mensia mayuh diguna ngambika mantu ngiga mansa,” ku iya. — RBI