MIRI, 10 April – Sekula Kebangsaan (SK) Senadin nempa sejarah lebuh nyadi sekula keterubah ari baruh Opis Pelajar Pelilih Miri numbuhka Kelab Bomba Cilik (KBoc) enggau Kelab Bomba Junior nengah kerejasama enggau Opis Bomba enggau Penyah Penusah (BBP) Lutong.

Pengawa nyain sempekat pemereti ati (MoU) nya diatur ba Bilik Aum SK Senadin kena Hari Empat tu tadi, nyadi singkang dikena ngenegapka kerejasama strategik entara sekula enggau Opis Bomba enggau Penyah Penusah Malaysia (JBPM) dalam pengawa nerenakka penyedar pengelikun ari penusah angus ba bala nembiak.

Program tu mega ngaul randau bekaul enggau pengawa bejalaika KBoc enggau Kelab Bomba Junior ti dikearapka nyadi pelasar pelajar tumu ungkup nembiak senentang aspek pengelikun, disiplin enggau pengawa ngenyit.

Ketuai Opis Bomba Lutong, PBT II Henry Ak. Jugah begulai enggau Penulung Kanan Pentadbir SK Senadin, Nuing Ak. Jimbai nguluka pengawa nya nengah sukung ari pemesai bukai iya nya PBK I (TBBK II) Iskandar Bin Aus, PBK II (TBBK I) Awang Arizal Bin Awang Affandy, PBB Gabriel enggau PBB Georgetian.

Inisiatif tu dipeda nyadi singkang proaktif dalam ngadaka rebak baru ti sensitif enggau pengelikun sereta bepenemu dalam napi gaya penusah ngenyit, setipak enggau aspirasyen JBPM ti beprestasi tinggi, jampat sereta mesra. -RBI

SRI AMAN, 10 April Program beripai enggau servis komuniti ti diatur Balai Bomba enggau Penyah Penusah (BBP) Sri Aman udah mujur dipejalaika ba Mount Hosanna Chapel, ti bepalan urung 24 kilometer ari balai nya, pagi tadi.

Program tu mungkur semilan iku raban BBP Bagi Menua Sri Aman ti betuaika Pemesai Operasyen Stesyen, PBK I Chimiam Duyu.

Bemacham aktiviti ngerupan dipejalaika dikena mantu meresi kandang endur ngelingi chapel, lalu enggau nya nerenakka semengat kerejasama enggau tanggungpengawa rama entara kaban enggau komuniti lokal.

Inisiatif tu ukai semina mandangka komitmen opis bomba terus bejalaika tanggungpengawa ngagai komuniti, tang mega ngerapitka kaul entara ejensi penyelamat enggau komuniti di kandang menua Sri Aman.

Bala pengatur mega meri besai terima kasih ngagai semua pemesai enggau kaban ti bisi kaul ngemujurka program tu.

Terima kasih mega diberi ngagai Rev.Jerome enggau raban pengatur Mount Hosanna Chapel ketegal sambut enggau kerejasama ti manah ti diberi sepemanjai program tu.

Dikearapka pengawa ngatur program baka tu deka terus nyadi pelasar dalam ngerapitka kaul entara BBP Sri Aman enggau komuniti setempat, setipak enggau semengat begulai sereta nyikap diri ti seruran diterenak — RBI

DEBAK, 10 April — Kaban Parlimen Bagi Menua Betong, Dato Dr Richard Rapu sehari tu udah nemuai ngagai Stesyen Green World Genetics (GWG) Debak ti bepalan di Simpang Debak, beratika baru pemansang pengawa mansik benih betanam betupi enggau aktiviti ngeluarka asil ba kandang menua nya.

Rambau penemuai nya, iya bepeluang ngabas kandang endur nanam ti nyengkaum jagung ungkup benih, soya enggau sekeda utai tanam bukai ti benung ditanam GWG.

Sama bisi diatur iya nya sesi meri penerang pandak ti meri penerang pasal misyen enggau visyen kompeni, kelimpah ari bekunsika pemansang ke pemadu baru dalam bidang pansik enggau pemansang benih (R&D).

Penemuai nya mega dikemerat enggau sesi ngaul. beserimbai enggau pengerami Hari Raya begulai enggau staf GWG.

Green World Genetics (GWG) iya nya sebuah kompeni R&D ti bepalan di Kuala Lumpur sereta pakar dalam pengawa nerenak, ngasilka enggau ngelakuka benih hibrid ukai GMO ti bekualiti tinggi.

Kompeni nya mega udah nempa kerejasama strategik enggau kaling entarabansa ari Amerika Syarikat, China, Thailand, India enggau Mexico dikena ngenegapka pengawa mansik enggau ngemansangka benih.

Diatu, GWG udah mujur rembus ngagai makit dunya nengah chara eksport benih ngagai mayuh bengkah menua di Asia Pasifik, Afrika, Timur Tengah enggau Amerika Latin.

Penemuai tu ngayanka komitmen iya ti terus nyukung pemansang sektor betanam betupi moden, kelebih agi dalam ngenegapka industri benih ti bekualiti tinggi ti ulih nambahka produktiviti enggau daya bepekit sektor agro menua — RBI

JULAU, 10 April – Bungkur telekomunikasyen ba sitak Dewan Undangan Nengeri (DUN) Meluan diatu ba tikas ke manah nyengkaum ba menua ulu ti sebedau tu betapi enggau penanggul akses, pia ku Kaban Kunsil Nengeri (ADUN) Meluan, Dato Rolland Duat Jubin.

Nitihku iya, ari gaya tu ngemendarka peranak menua pesisir ngaga peminta tauka apil baru nengah ‘online’ enggau muntang agi enggau enda ibuh napi pemar maya ngaduka Bantu Barang Pemun Rahmah (SARA) enggau Bantu Tunai Rahmah (STR).

Berebak enggau nya, iya nyemetak madahka perengkaguna internet bejalaika tanggungpengawa ti beguna dalam ngemudahka pekara bekaul enggau peminta bantu perintah.

“Perintah terus ngenegapka bemacham jalai peminta dikena nentuka setiap rayat ke patut enda tinggal ari nerima bantu baka SARA enggau STR,” ku iya.

Iya madah munyi nya lebuh dikerandau raban media pengudah bejadika Program E-Invois enggau Kaunter Luar Bantu Tunai Perintah di Balai Mensia Mayuh Julau, sehari tu tadi.

Program tu digulu 186 iku Ketuai Komuniti enggau Ketuai Raban Bansa (KMKK) ari serata kandang menua DUN Meluan.

Berebak enggau nya mega, Rolland madahka atur mega ditegapka nengah pengawa ngaul ejensi bekaul nyengkaum Kunsil Asil Dalam Menua (LHDN) ti chakah nurun ke renggat baruh ngenataika penerang terus ngagai komuniti.

Iya mega nambah, chara tu ngayanka komitmen tinggi perintah dalam nentuka bantu datai ba raban ke ditagit.

Dikena nyapai tagit tu mega, Rolland nyemetak madahka pengawa ngenataika penerang nengah KMKK beguna amat dikena nentuka setiap ruang bilik nerima penerang ke betul.

Pengeransing nya ku iya, mega mantu nambahka penyedar rayat senentang chara peminta enggau proses ngapil ti disediaka.

“Kelimpah ari nya, pengawa muka kaunter khas ungkup tanya enggau apil ngemuntangka mensia mayuh meresa status tauka nganjung baru peminta enti bisi pematut.

“Inisiatif tu besai amat reti laban meri peranak pemereti ati ke nyemetak agi pasal prosedur ke patut dititih,” ku iya.

Berebak enggau nya, iya mega meri besai terima kasih ngagai Perintah Sarawak enggau Perintah Besai ti enda ngetu bejalaika pengawa ngangkatmanah infrastruktur ti udah meri penguntung ke besai ngagai rayat. -RBI

LIMBANG, 10 April — Direktor Kereja Raya Sarawak, YBhg. Datu Adj. Prof. Ts. Gs. Br. PMr. Dr.Cassidy anak Morris ngulu Pengerami Nyuaka Pingat Perkhidmatan Setia (PPS) Bagi Menua Limbang ti dipenyadika Premier Sarawak, Yang Amat Berhormat Datuk Patinggi Tan Sri (Dr) Abang Haji Abdul Rahman Zohari bin Tun Datuk Abang Haji Openg Abang Abdul Rahman Zohari.

Pengerami tu nyadi kelai Perintah Sarawak ngaku servis, komitmen enggau penaluk orang gawa perintah bejalaika tanggungpengawa servis enggau dedikasyen ke tinggi, kelebih agi nyukung agenda pemansang nengeri.

Entara penerima PPS Pari Opis Kereja Raya (JKR) Sarawak iya nya
Ir. Ts. Mahathir bin Jokeni – Injinir (Awam), Kalawot anak Idop (Penulung Injinir), Kadir bin Majit (Penulung Servis Am) enggau
Christina anak Joannes Antas – Penulung Pentadbiran (Kerani/Operasyen)

Pengaku tu ngayanka komitmen pengereja pengawa JKR Sarawak ti enda ngetu dalam nentuka pengawa ngenataika projek infrastruktur dipejalai enggau kualiti, integriti sereta meri empas ti tinggi ungkup pengelantang pendiau rayat di serata nengeri.

JKR Sarawak ngenataika pengaga ati ti pemadu tinggi ngagai semua penerima midul lalu ngarapka pengangkun tu ulih meri inspirasyen ngagai semua pengereja pengawa ngambika terus ngenegapka budaya nyulut dalam servis mensia mayuh. — RBI

SPAOH, 10 April — Sapit Premier Sarawak, Datuk Amar Douglas Uggah Embas sehari kemari udah bejadika pengawa nyerahka Projek Penyambung Rentayan Voltan Tinggi/Voltan Rendah (HT/LT) ba kandang menua Tanjung Sebekut, Spaoh, kelai pengawa rasmi bejalaika projek nya.

Projek nya dipejalaika ari baruh inisiatif Ejensi Pemansang Bagi Menua Betong (BDDA), enggau Opis Kereja Raya (JKR) Bagi Menua Betong diberi tanggungpengawa bejalaika nya keterubah iya.

Pengawa bejadi nya ngayanka pengarap ati ngagai penau teknikal enggau penyikar Opis Kereja Raya dalam ngatur projek infrastruktur utiliti skala besai.

Nitihka penerang ari Opis Kereja Raya Bagi Menua Betong, batang skop projek nya mungkur pengawa nyambung rentayan bekal kuasa karan voltan tinggi enggau baruh ngagai kandang menua Sebekut, ke udah dikelala nyadi palan ke strategik endur ngemansangka pengawa betanam betupi moden di Bagi Menua Betong.

“Pengawa nyediaka bekal kuasa karan ti entap sereta chukup dikearap ulih nyadi pemangkin dikena nambahka produktiviti sektor betanam betupi, seraya nyukung pengawa ngena teknologi moden sereta meransang penumbuh ekonomi menua tu,” ku penerang nya.

Pengerami nya mega nyadi kelai renggat ngepunka projek nya, enggau langkar dalam ti dikemansangka JKR Sarawak empu, lalu enggau nya ngayanka tikas penyikar ti tinggi ba raban injinir elektrik opis nya.

Projek tu deka dikemataka penuh JKR Bagi Menua Betong dikena nentuka pengawa bejalaika iya bejalai enggau lanchar, nitihka spesifikasyen teknikal ti udah ditetapka sereta tembu nitihka timpuh.

Inisiatif tu seriris enggau komitmen perintah Sarawak ti majak ngenegapka pengawa nyendiaka infrastruktur asas di menua pesisir, kelimpah muka peluang pemansang baru ti meruan sereta kompetitif di Spaoh enggau kandang menua besemak. — RBI

LUNDU, 10 April — Perintah Sarawak udah netapka tagit strategik deka nyapai tikas pengulih ngatika diri (SSL) beras manggai 60 peratus manggai ba taun 2030, iya nya penambah ke nyata ari tikas ke diatu iya nya 21 peratus, dalam pengawa ngurangka bepanggai ba import pemakai nya.

Menteri Industri Pemakai, Komoditi enggau Pemansang Kandang Menua Sarawak, Dato Sri Dr Stephen Rundi Utom madah, diatu Sarawak agi bepanggai ba import beras sepenyampau 79 peratus, lalu enggau nya ngengkahka nengeri tu ba penuduk berisiko tinggi, kelebih agi betapi enggau gaya geopolitik global ti enda tentu sereta empas ari ubah gaya hari.

Iya madah munyi nya lebuh nyempulang Menteri Betanam Betupi enggau Pengelikun Pemakai, Datuk Seri Mohamad Sabu nemuai seraya gawa ngagai Tanjung Purun, ditu, sehari tu tadi.

Nitihku iya, pengawa ngenegapka pemansut beras nengeri tu begunaka pengawa ti komprehensif sereta besai, nyengkaum pemansang infrastruktur betanam betupi moden ti begunaka belanja besai.

“Lebuh ngenang pasal beras , tu pekara idup enggau mati. Enti duit mayuh pan, enti nadai beras, kitai enda ulih idup,” ku iya nyemetak.

Dr Rundi madah, ungkus ngemansangka infrastruktur betanam betupi di Sarawak dipelabaka urung RM500,000 sehektar.

Naka ke diatu, perintah nengeri udah ngelala pemesai 15,000 hektar endur nanam padi, enggau renggat keterubah ngaul 2,000 hektar tanah enggi perintah ti begunaka pengabis mimit RM1 bilion ungkup pengawa nyendiaka infrastruktur asas.

Berindik enggau nya, iya ngapil ngagai Perintah Besai ngambika ngungkupka sukung belanja dikena nentuka pengawa bejalaika projek estet padi moden tu ulih nyadi nyata.

“Dua ribu hektar begunaka belanja RM1 bilion ungkup infrastruktur. Enti 14,000 hektar, urung RM7 bilion. Minta tulung laban tu beguna amat,” ku iya.

Iya nyemetak madahka kerejasama rat entara perintah nengeri enggau perintah besai beguna amat dikena nentuka inisiatif tu ukai semina nyamin pengelikun pemakai Sarawak, tang mega meri pangka ngagai pengelikun bekal pemakai menua tu selampur.

Berebak enggau nya, perintah nengeri mega udah ngambi singkang proaktif iya nya ngaga gazet kandang endur pemesai 800 hektar di Lawas enggau Limbang khas endur betanamka padi, dikena nagang pengawa nukar tanah ngagai utai tanam komoditi bukai baka sawit.

Strategi nengeri nambahka pemansut beras dipejalaika berenggat nitihka bagi, enggau pemerat diberi ngagai sitak baka Kapit, Kuching enggau Miri ngambika ulih nyapai 100 peratus SSL dalam domestik sebedau ngerembai ngagai pelilih menua bukai.

Ngelansa pasal pemar sektor betanam betupi, Dr Rundi madah, isu orang bumai ke majak tuai patut diputarka nengah chara ngemodenka sektor nya, nyengkaum ngena chara mekanisasyen, betanam betupi pintar enggau teknologi tinggi.

Iya nyemetak madahka sektor agro-pemakai begunaka chara ngalih ari chara tradisional ngidupka diri ngagai model dagang komersial ti lebih ulih dikena narit penyereta rebak baru.

“Sektor agro enda ulih agi nyadi ‘nangkap padi lalu makai padi’. Iya meseti bepelasarka pengawa dagang. Pengawa meseti berubah, runding mega meseti berubah,” ku iya nerang.

Nyadi singkang ke lengkap, Sarawak mega beratika potensial kerejasama serantau enggau pelilih menua Sambas di Kalimantan, Indonesia, ke udah ngerikod lebih asil beras 60,000 tan metrik setaun.

Nitih ku iya, raban petugas khas deka ditumbuhka dikena mansik sukut teknikal enggau ungkus ungkup tuju besilih pengelandik enggau dagang, nyadi pengeran ngenegapka pengelikun bekal pemakai nengeri tu lebuh napi sebarang pekara ti enda tentu ba renggat dunya. — RBI

MIRI, 10 April — Kaban Kunsil Nengeri (ADUN) Mulu, Datuk Gerawat Gala, ngemeratka komitmen iya ti terus ngenegapka pemansang menua pesisir nengah penemuai kereja ngagai Kampung Long Balong, lemai tu tadi.

Iya mantaika pengaga ati ke pemadu tinggi ngagai peranak rumah panjai ketegal sambut ke chukup manah sereta bisi reti, lalu enggau nya ngayanka semengat kerejasama rat entara ketuai enggau komuniti setempat.

Nitihku iya, penemuai nya ngembuan tuju deka beratika diri empu pemansang kemaya hari sereta ngelala batang guna peranak menua nya, setipak enggau pengawa nentuka tetiap pelin pemansang ulih dipejalaika enggau lebih ngasi sereta komprehensif.

“Transformasyen Kampung Long Balong ukai semina perambu aja, tang komitmen ti terus dikena ngangkatka kualiti pengidup rayat, kelebih agi di menua pesisir,” ku iya.

Iya nyemetak madahka pengawa bejalaika pemansang deka terus bepelasarka chara inklusif enggau meruan, dikena nentuka penguntung iya ulih diasaika semua renggat mensia mayuh.

Berebak enggau nya, Datuk Gerawat mega ngemeratka pemerat ngenegapka infrastruktur pemun di rumah panjai, nyengkaum jalai alun, bekal ai beresi sereta nyendiaka bekal kuasa karan ke entap agi.

“Pengawa nyediaka perengka guna pemun tu beguna amat laban nya pun pengelantang enggau penyulut sesebuah komuniti,” ku iya nerang.

Kelimpah ari nya, iya mega nerangka pemesai guna ngenegapka rayat ari sukut ekonomi nengah pengawa ngaul diri dalam sektor betanam betupi, dagang enggau dagang temuai komuniti.

Nitih ku iya, Kampung Long Balong ngembuan potensial besai ungkup pemansang, kelebih agi nengah pemanah rampa menua enggau penyelai budaya komuniti menua nya ke ulih dikemeratka nyadi pematak temuai.

Iya mega madahka akses komunikasyen ba kandang menua nya diatu ngayanka pemanah ke manah sereta entap, setipak enggau guna ke diatu ba jeman digital.

“Ba dunya kemaya hari tu, akses internet ukai agi utai ke mewah, tang nyadi utai ke diguna asas ke patut dikembuan semua,” ku iya.

Ngelansa pasal isu jalai penyambung ari Long Banga ngagai Long Balong, iya madahka pekara nya udah dikerandau enggau Opis Kereja Raya (JKR) dikena nentuka iya dikemeratka dalam perambu belanja Atur Pemansang Malaysia Lumpar Ke-13 (RMK-13).

Iya mega nyamin sada nyawa enggau guna peranak Kampung Long Balong deka terus nyadi pekara ti dikemerat dalam pengawa merambu sereta bejalaika pemansang di kandang menua nya.

“Kitai deka terus bekerejasama nentuka Kampung Long Balong ulih dikemansang nyadi genturung pendiau ke lebih maju, lantang sereta tan,” ku iya. — RBI

KUCHING, 10 April — Kaban Parlimen Kapit, Dato Sri Alexander Nanta Linggi ngenataika pengaga ati enggau terima kasih ke pemadu besai ngagai semua temuai ke bisi datai ngulu pengerami melah pinang enggau nerima pengabang anak indu iya, Lilian Binjan Nanta Linggi begulai enggau kaling iya, Jared Jimbau Chabu, ke udah nyadi ditu apin lama ke udah.

Nitih ku iya, penatai temuai dipebasa, orang ke dikelala enggau bala bakih ari mayuh bengkah serak pengidup ngerichahka agi pengerami nya, lalu enggau nya nyadika maya ti chukup besai reti ngagai semua diri sebilik.

Iya mega meri besai terima kasih ngagai pengeran Tuai Pemegai Menua (TYT) Yang Di-Pertua Negeri Sarawak, Tun Pehin Sri Dr Haji Wan Junaidi bin Tuanku Jaafar enggau bini iya, YABhg Toh Puan Datuk Patinggi Fauziah Mohd Sanusi, ti sanggup meri awak ngintu pengerami nya.

“Penatai TYT Tun Pehin Sri enggau YABhg Toh Puan siti basa ke chukup besai lalu siti pengingat ke deka dikeingatka kitai belama,” ku iya ba sebengkah penerang sehari tu.

Berebak enggau nya, iya mega meri besai terima kasih ngagai Premier Sarawak, Datuk Patinggi Tan Sri (Dr) Abang Haji Abdul Rahman Zohari bin Tun Datuk Abang Haji Openg enggau Sapit Menteri Besai, Datuk Amar Haji Fadillah bin Haji Yusof enggau bini iya, sereta mega bala temuai dipebasaka bukai ngulu pengerami nya.

Ku iya nambah, penatai enggau sampi ari semua temuai ukai semina ngerindangka maya pengerami tu, tang mega ninggalka kenang ti besai reti ngagai iya enggau sida sebilik.

“Kami amat beterima kasih ngagai semua sukung, pengerindu enggau begulai ti udah dipandangka lalu ngasuh hari ti lantang tu manah agi dikenang,” ku iya.

Iya mega ngarapka kaul bakih ti udah ditempa deka terus ditegapka jemah ila. — RBI

BAU, 10 April – Siku lelaki enggau siku indu ditan raban Bagi Tasat Jenayah Narkotik Pelilih Bau ba pengawa ngenyit ba sebuah langkau kayu di Jalai Serasot Utama B, urung pukul 8.30 malam kemari.

Ketuai Polis Pelilih Bau, P/SUPT Mohd Haide bin A. Rahman madah, kedua-dua saspek ke beumur entara 30 ngagai 33 taun dipelabaka bisi kaul enggau penyalah salah guna dadah.

“Asil peresa saspek tetemuka sida bisi ngembuan 17 bungkus plastik senayau ti ngundan leka kristal ti dipelaba syabu,” ku iya.

Nitihku iya, kededua saspek nya ditan ari baruh Seksyen 39A(1) Akta Dadah Berbahaya 1952 ketegal penyalah ngembuan dadah.

Ku iya nambah, asil peresa tisih ai kemi keterubah mega tetemuka kededua saspek positif dadah lalu mega ditan ari baruh Seksyen 15(1)(a) akta ke sama.

Berindik enggau nya, iya nyemetak madahka Polis DiRaja Malaysia (PDRM) enda belembut ba sebarang pengawa ngaul diri dalam aktiviti salah guna dadah.

Mensia mayuh ke bisi penerang bekaul enggau aktiviti dadah dipinta ngenataika penerang nya ngagai polis nengah talipaun ‘hotline’ Opis Tasat Jenayah Narkotik (JSJN) Bukit Aman. -RBI