LIMBANG, 11 April — Perintah Sarawak disadang deka madahka bantu khas dikena mutarka ungkus pengidup ke deka dipejuraika enggau silik minggu baru, berindik ari penuduk wang nengeri tu ke majak tegap.

Premier Sarawak, Datuk Patinggi Tan Sri (Dr) Abang Haji Abdul Rahman Zohari Tun Datuk Abang Haji Openg madah, inisiatif nya deka dikerandau dalam aum Kabinet Nengeri sebedau dipadahka enggau rasmi, laban nya mungkur agih belanja ke besai.

“Minggu ti deka datai, aku deka madahka siti agi bantu ungkup rayat dikena mutarka ungkus pengidup.

“Bepelasarka belanja ke bisi diatu, pelaba aku kitai ulih bejalaika nya ungkup pengelantang rayat Sarawak,” ku iya.

Iya madah munyi nya lebuh bejaku ba Pengerami Makai Lemai Ketuai Begulai enggau Ketuai Komuniti enggau Ketuai Kaum (KMKK) ba Dewan Sivik Limbang, ditu, kemari.

Ngenang pasal pemansang ekonomi, Abang Johari mantaika Sarawak diatu ba jalai ke betul dalam ngiring ekonomi hidrogen, ke udah nyata lebih ngelimat belanja ari minyak konvensional.

Nitih ku iya, asil pansik bulan Mac tu tadi mandangka ungkus ngasilka hidrogen di Sarawak diatu murah agi ari rega diesel ke diatu ti dikeruga geopolitik global ti enda tentu.

“Kitai udah milih tenaga ke betul dikena nyungkak agi pemansang ekonomi kitai.

“Enggau rega diesel kemaya hari tu, nyata ungkus ngasilka hidrogen murah agi.

“Reti nya visyen kitai deka ngubah ekonomi nengah teknologi gadung enggau pengeraja asal ke ulih dikena baru udah berengkah ngayanka asil,” ku iya nerang.

Berebak enggau nya, Abang Johari mega mai berita manah ngagai ketuai renggat baruh lebuh perintah nengeri setuju mansik baru sereta nambahka tikas elawin ungkup Ketuai Komuniti enggau Ketuai Kaum (KMKK).

Iya nyemetak madahka penambah nya siti chara ngaku pemesai guna KMKK nyadi jematan entara perintah enggau rayat, kelimpah ari nentuka pengawa meri servis ba renggat pun menua mengkang efisyen.

“Ketegal gaya ekonomi kami ti tegap sereta belanja ti tegap, kami ulih meri servis enggau pengelantang ti manah ngagai ketuai suku bansa enggau komuniti kami.

“Aku setuju elawin tu patut diperatika baru sereta ditambah,” ku iya nambah.

Sama bisi datai ngulu pengerami nya Sapit Menteri Besai Datuk Seri Fadillah Yusof, Sapit Premier Sarawak Datuk Amar Awang Tengah Ali Hasan, Menteri Utiliti enggau Telekomunikasyen Dato Sri Julaihi Narawi, Menteri ba Opis Premier Sarawak Dato Sri John Sikie Tayai,
Sapit Menteri Utiliti enggau Telekomunikasyen Sarawak Datuk Liwan Lagang, Sekretari Perintah Nengeri Sarawak Datuk Amar Mohamad Abu Bakar Marzuki, Sapit Menteri Perengka Pengangkut, Datuk Hasbi Habibollah enggau Sapit Menteri Pemansang Pemakai Sarawak enggau Datuk Dr. Abdul Rahman Ismail, ADUN Batu Danau Dato Paulus Palu Gumbang enggau bala pemesai ke bukai. — RBI

SPAOH, 11 April – Siku ular sawa ke benung kenyang pengudah nelan manuk mujur ditangkap Raban Penyaga Orang Periman Malaysia (APM) Spaoh dalam operasyen di Jalai Kebun Cina, ditu.

Penusah nya diripotka pengempu palan nya, ke dikelala enggau nama Cik Jane, ke ngaga kanggau ngagai Palan Penyaga Operasyen Pelilih Menua (PKOD) APM Spaoh pengudah tetemuka ular ke benung engkilung ba kandang manuk iya.

Berindik ari penerang nya, empat iku raban APM Spaoh nengah Tim Alpha terus ngesah ngagai endur penusah nya nyadi ngambi ulih bejalaika operasyen nangkap ular sawa nya.

Lebuh datai ba endur nya, raban bejalaika pengawa meresa lalu tetemuka siku ular sawa urung tujuh kaki pemanjai dalam gaya kenyang, dipelaba nelan manuk.

Ular nya mujur ditangkap ngena perangkap sebedau dibai ngagai PKOD APM Spaoh ngambika dipejalaika enggau silik agi, lalu udah nya dilepaska pulai ngagai endur asal iya ungkup pengelikun mensia mayuh. -RBI

LIMBANG, 11 April – Direktor Betanam Betupi Sarawak, Dominic Anak Chunggat ngulu Pengerami Nyuaka Midul Perkhidmatan Setia Bagi Menua Limbang ti dipenyadika Premier Sarawak, Datuk Patinggi Tan Sri Dr Abang Abdul Rahman Johari Openg.

Pengerami nya diatur kelai meri terima kasih ngagai raban pengereja pengawa perintah ti udah mandangka komitmen tinggi, penaluk enggau penyulut dalam servis.

Entara pengereja pengawa Opis Betanam Betupi Sarawak Bagi Menua Limbang ke nerima midul jasa setia iya nya AAO Dison Tagal, SCDA Rangai Balang, SCDA Latipah Binti Latip enggau PKA Jeffry Sarang Ukab.

Nengah aku tu ngayanka penerima ti terus bebendar bejalaika tanggungpengawa ti udah dilempaika, kelimpah ari meri bantu ke besai ngagai pemansang sektor betanam betupi nengeri tu.

Berindik enggau nya, pengaga ati dikenataika ngagai semua penerima ketegal pemujur sida, lalu dikearap ulih terus nyadi pematak dikena ngangkatka kualiti pengawa meri servis mensia mayuh.

Sebagi ari penemuai nya, Dominic mega bisi ngabas reruai servis Opis Betanam Betupi Sarawak ti ngemeratka pemansang orang dagang industri bepelasarka agro, kelimpah ari beratika tikas penyikap Komiti Banquet Opis Betanam Betupi Sarawak ungkup Program Sarawakku Sayang Limbang.

Sama bisi datai iya nya Amirul Fikri Bin Jemali, Pemesai Betanam Betupi Bagi Menua Limbang, begulai enggau pemesai ari Indu Opis enggau Bagi Menua Limbang. -RBI

LUNDU, 10 April – Menteri Betanam Betupi enggau Pengelikun Pemakai, Datuk Seri Mohamad Sabu madahka projek nanam padi di Tanjung Purun entara inisiatif beguna dalam agenda pengelikun pemakai menua.

Nitih ku iya, kandang endur ke mungkur urung 140 hektar nya benung dikemansang nyadi kandang endur nanam padi komersial enggau sistem parit enggau entali ai ke diperambu sereta ngembuan potensial ke besai dikena ngemodenka pengawa nya.

“Projek tu siti singkang strategik dikena ngenegapka bekal beras menua tu sereta nambahka pengulih ngatika diri, lalu enggau nya ngurangka bepanggai ba import,” ku iya rambau penemuai kereja ngagai kandang menua nya pagi tadi.

Ku iya nambah, Tanjung Purun mega sebagi ari 48 endur di Sarawak ti udah dikelala endur ngemansangka padi komersial enggau infrastruktur ke penuh.

“Tu mandangka penegap perintah nengeri enggau perintah besai dalam nempa Sarawak entara pemain besai ba pemansut beras menua tu,” ku iya.

Rambau penemuai nya, iya mega disempulang Menteri Industri Pemakai, Komoditi enggau Pemansang Kandang Menua Sarawak, Dato Sri Dr Stephen Rundi Anak Utom, beratika pejalai projek nya enggau potensial ke ulih dikena ungkup nengeri enggau menua tu.

Ku Mohamad, ngena teknologi moden nyengkaum bansa padi hibrid baka GS-30 ulih ngeluarka asil ke tinggi agi sereta nambahka produktiviti sektor betanam betupi.

“Kerejasama entara perintah besai enggau nengeri beguna amat laban agenda pengelikun pemakai enda ulih dipejalaika kediri aja,” ku iya nerang.

Iya nyemetak madahka batang tuju iya nya nambahka pemansut menua tu, nentuka bekal pemakai chukup sereta nentuka penatai pemisi orang betanam betupi terus nambah.

“Aku andal enggau komitmen semua piak sereta kerejasama rat entara nengeri enggau Persekutuan, kitai ulih ngenegapka pengelikun pemakai menua sereta nentuka bekal pemakai rayat seruran dijamin,” ku iya. -RBI

LIMBANG, 10 April – Residen Bagi Menua Limbang, Unus Tambi mansutka diri antara penerima Midul Perkhidmatan Setia (PSS) lebuh iya nguluka rintai 110 iku orang gawa perintah ti nerima kelala nya ba sebengkah pengerami ditu, sehari tu tadi.

Unus ngerikod timpuh servis pengelama 33 taun ba Opis Residen Bagi Menua Limbang, begulai enggau lapan iku staf bukai ari opis nya ke mega nerima midul ketegal pemeri sereta servis sida enggau bebendar.

Pengerami nya ngaul 13 bengkah opis enggau ejensi, ti mungkur semilan bengkah opis perintah nengeri enggau empat ejensi perintah besai ti ngempuruka raban pengereja pengawa perintah ari mayuh bengkah sektor servis.

Berebak enggau nya, enam iku penerima ngerikod rikod servis lebih ari 33 taun nyengkaum Kalthom Ahmad (Opis Imigresyen Malaysia, Sarawak) enggau timpuh servis pengelama 37 taun, Maria Cotilla Louise @ Rozita Kulai (Opis Residen Bagi Menua Limbang), Christina Joannes Antas (Opis Kereja Raya Sarawak), Ahad Tusin (Opis Servis Veterinar Sarawak), pia mega Roslan Abu Samah enggau Lollyta Simun ari Opis Pengerai Nengeri Sarawak.

Antara opis ke bisi ngaul diri iya nya Opis Kereja Raya, Opis Tanah enggau Survei, Opis Betanam Betupi, Opis Bekal Ai Menua Pesisir, Opis Servis Veterinar, Opis Agama Islam enggau Opis Kehakiman Syariah.

Kelimpah ari nya, Kaunsil Sungai-sungai Sarawak, Opis Kastam Diraja Malaysia, Opis Imigresen Malaysia, Opis Penabur enggau Opis Pengerai Nengeri Sarawak ngerikodka penyampau penerima pemadu mayuh iya nya 49 iku.

Pengawa nyuaka midul nya udah dipenyadika Premier Sarawak, Datuk Patinggi Tan Sri Abang Abdul Rahman Zohari Tun Abang Openg ba Pengerami Nyuaka Midul Perkhidmatan Setia Bagi Menua Limbang, dikena ngaku komitmen enggau dedikasyen pengereja pengawa perintah dalam servis. -RBI

TATAU, 10 April – Komuniti menua pesisir diperansang nguna pengelandik ke udah bisi, kelebih agi ba pengawa ngasilka pemakai asal, ngambika ulih dikemansangka dalam sektor industri mit enggau jelan pemesai (IKS).

Menteri ba Opis Premier Sarawak, Dato Sri John Sikie Tayai madah, pengawa ngasilka produk hiliran baka sos chabi, kue enggau bemacham produk pemakai ke bukai bisi potensial besai dikomersial, lalu enggau nya nambahka nilai ngagai produk betanam betupi sereta ngadaka mayuh agi orang dagang menua tu ke kompetitif.

Berebak enggau nya, iya madahka kebun sawit terus nyadi pematak besai ngangkatka tikas pengidup komuniti menua pesisir berindik ari rega komoditi nya ti mengkang tegap sereta disadang majak niki, diumbka penyarut geopolitik global, kelebih agi di Timur Tengah.

Nitih ku iya, kelimpah ari sawit, kebun kopi kelebih agi bansa Liberica mega bisi potensial besai rembus ngagai makit dunya nyadi produk premium ti bisi peminta tinggi ba renggat antarabansa.

Ku iya nambah, kedua-dua sektor tu deka terus disukung nengah inisiatif Ejensi Pemansang Wilayah Tengah Rajang (MiRRDA) dikena nyungkak penatai pemisi komuniti menua pesisir.

“Industri sawit ukai semina nyadi pun penatai pemisi ke besai, tang mega ngeluarka biodiesel ti enda ngeruga rampa menua sereta meri pangka ngagai pemansang kuasa tau dikena baru,” ku iya lebuh bejadika Program Outreach Komuniti Betanam Betupi (AgriCOP) di Rumah Lenny Diana, Rantau Tajak, Jalai Samarakan, kena Hari Lima tu tadi.

Ku iya nambah, bantu ba pengawa nanam sawit deka diberi fokus ngagai sida ke bedau betanamka komoditi nya, lalu ari nya muka peluang dikena mansutka penatai pemisi baru sereta ngangkatka tikas ekonomi sida.

Dulu agi ari nya, Penulung Ketuai Direktor ti ngarika Direktor Betanam Betupi Sarawak, Peter Jarit madahka bisi empat Program AgriCOP udah dipejalaika ba sitak DUN N60 Kakus, enggau program di Tatau keterubah iya diatur ba sitak nya.

Ku iya, program nya ngembuan tuju deka meri penerang enggau penemu ngagai komuniti lokal nengah pengawa bekunsi penerang enggau latih, dikena ngenegapka sektor betanam betupi ngambika ulih mansutka penatai pemisi ke tinggi agi.

“Program tu mega mantu ngangkatka pengelandik enggau daya besemekih orang betanam betupi di menua pesisir nengah chara praktikal enggau fokus,” ku iya nerang.

Program AgriCOP mega bisi mantaika kus bekaul enggau pengawa memproses chabi enggau ngatur utai tanam sawit dikena meri penerang ngagai penyereta bekaul chara betanam betupi ti lebih efektif dalam ngangkatka asil.

Pengerami nya bela digulu Pemesai Betanam Betupi Bagi Menua Bintulu, Jackson Nanta Bernabas Baie enggau Pemesai Tadbir Opis Pelilih Tatau, Raden Azamry Raden Perhan. -RBIIKS produk pemakai nyadi peluang baru dikena ngasilka ekonomi menua pesisir .

BAU, 10 April – Sepenyampau 59 iku orang betanam betupi di Kampung Apar, Singai nerima pemaik lebuh 236 guni baja diagih nengah Program Fasiliti Betanam Betupi (AFF) ungkup sitak Tasik Biru, sehari tu.

Pengawa nyuaka simbolik nya mungkur pengawa nyuaka empat guni baja ungkup setiap ruang bilik ke agi chakah bejalaika aktiviti betanam betupi di menua sida.

Bantu baja nya agih belanja ngagai Kaban Kunsil Nengeri (ADUN) Tasik Biru, Datuk Henry Harry Jinep ari Opis Betanam Betupi dikena nyukung orang betanam betupi nengah AFF ari baruh Opis Menteri Betanam Betupi Sarawak.

Sama bisi datai Pemesai Pelilih Menua Bau, Eddy Nayoi, Pemesai Penguasa Betanam Betupi Pelilih Menua, Eddison enggau pemesai ke bukai. -RBI

BETONG, 10 April — Siku deriba lori ngundan semin beumur 24 taun betapi enggau pemedis pengudah tesepit ba penuduk deriba ba penusah aksiden ba Simpang Samu, Jalai Pan Borneo, tengahari tu tadi.

Opis Bomba enggau Penyah Penusah (JBPM) Sarawak nengah Palan Operasyen Operasyen (PGO) nerima kangau ngenyit bekaul enggau penusah nya urung pukul 12.39 tengah hari.

Berindik ari nya, seraban bomb ari Balai Bomba enggau Penyah Penusah (BBP) Betong terus dianjung ngagai palan penusah nyadi.

Lebuh datai ba endur nya, raban penyelamat tetemuka tudah agi dalam penuduk lori ke rusak sereta bakal.

Tim Operasyen Ngeluarka (PKO) udah ngena perengka penyelamat khas dikena ngalihka lori nya dikena mansutka tudah ke tepekul.

Tudah mujur dipansutka enggau selamat tang bakal.

Iya terus diserah ngagai Opis Menteri Pengerai Malaysia (KKM) ngambika diperubat enggau silik agi.

Raban bomba mega bejalaika pengawa meresi bekau penusah aksiden ba jalai alun dikena nentuka jalai nya likun ditengah penguna jalai alun ke bukai.

Operasyen nyelamat tembu enggau penuh urung pukul 2.10 lemai pengudah kandang endur penusah nyadi dientaska likun sereta ulih dijaga.

Kebuah kebendar aksiden nya nyadi agi benung dipansik piak bekuasa. — RBI

BALAI RINGIN, 10 April – Rentayan jalai alun menua pesisir ba sitak Dewan Undangan Nengeri (DUN) Balai Ringin majak ditegapka ari baruh inisiatif Ejensi Pemansang Bagi Menua Sri Aman (SADA), nengah pengawa bejalaika projek Jalai Kampung Ubah ngagai Kampung Empaling ti beungkus RM39 juta sereta mega pengawa nyambung enggau Kampung Isu enggau belanja tambah RM7 juta.

Semua nya sebagi ari pengawa perintah ti ngenataika bantu belanja dikena bejalaika mayuh macham projek ti meri empas tinggi ti berega beratus juta ringgit nuju ngubah rampa sosio-ekonomi kandang menua nya.

Sapit Menteri Dagang Temuai, Industri Kreatif enggau Seni Pemerindang Sarawak, Datuk Snowdan Lawan madah, entara batang pemerat iya nya mutarka isu bekal ai lebuh Opis Menteri Pemansang Menua Pesisir enggau Kandang Menua ngemendarka agih belanja sepenyampau RM110 juta dikena ngangkatmanah Loji Ai Pantu.

Nitih ku iya, projek tu mungkur pengawa ngaga tangki ke ngembuan kapasiti manggai enam juta liter dikena nangkup guna peranak ari Pantu nyentuk ke Jaong.

Iya madah munyi nya lebuh bejaku ba Pengerami Bejadika Program Begulai Komuniti Siri 1/2026 enggau Pengerami Nyuaka Setipikit Nyiri enggau Ngelanjarka Ketuai Kaum enggau Ketuai Ketuai Raban Bansa (KMKK) DUN Balai Ringin, kena Hari Lima tu tadi.

Berebak enggau nya, iya ke mega Kaban Kunsil Nengeri (ADUN) Balai Ringin madahka pemansang infrastruktur jalai alun mega udah chakah agi dipejalaika nengah projek ngangkatmanah Jalai Kampung Tuba sepemanjai 42 kilometer enggau ungkus belanja RM265 juta.

Projek besai tu dikearapka ulih ngangkatka akses peranak, lalu enggau nya ulih nyungkak aktiviti ekonomi kandang menua.

Kelimpah ari nya, perintah mega meda potensial sektor dagang temuai nyadi pematak ekonomi baru enggau perambu ngemansangka Wong Jaban nyadi palan eko-dagang temuai ti mungkur ungkus anggar RM4.6 juta.

Beserimbai enggau pemansang fizikal, pengawa ngenegapka pengawa ngiring komuniti mega udah diberi perati nengah pengawa ngatur Program Begulai Komuniti ke diatu benung masuk siri ketiga dipejalaika.

Ba pengerami ke sama, sepenyampau 46 iti setipikit chiri baru enggau sambung udah disuaka ngagai penghulu, tuai rumah enggau kapitan dikena ngaku tanggungpengawa sida ngiring raban bansa.

Sama bisi datai Pemesai Opis Pelilih Pantu Raca Mulong, Penguasa Opis Tanah enggau Survei Bagi Menua Sri Aman Michealson Nisen sereta temuai dipebasa ke bukai. -RBI

KUALA LUMPUR, 10 April – Projek Karbon ari Opis Penyaga Kampung Sarawak udah nempa temegah ati lebuh nerima Anugerah Khas ari Kaunsil Pemansik Nasional Thailand nengah Anugerah Thailand ungkup Penemu enggau Inovasyen Antarabansa Pemadu Manah, enggau nya ngaku inovasyen nengeri tu ba renggat dunya.

Pemujur nya nyadi lebuh dua projek inovasyen opis nya, Carbon enggau Terrasphere, sama bulih Anugerah Emas ari baruh kategori Anugerah Inovasyen Perkhidmatan Awam (PSIA) ba Ekspo Teknologi Malaysia 2026.

Pengawa nyuaka anugerah nya udah diatur ba Palan Dagang Dunya Kuala Lumpur, sehari tu tadi.

Pemujur tu ngayanka komitmen Opis Penyaga Kampung Sarawak ti terus meransang inovasyen, ngenegapka kerejasama strategik enggau ngangkatka penau teknikal dikena nyukung agenda pengelantang rampa menua.

Pemujur nya mega ngangkatka pangku pengawa Sarawak nyadi ketuai dalam pemansang teknologi ngatur pengeraja asal, lalu enggau nya ngenegapka penuduk nengeri tu ba renggat antarabansa.

Opis Penyaga Kampung Sarawak deka terus chakah agi bejalaika pengawa ngenegapka inovasyen sereta meri pangka ngagai pengelantang global nengah chara bepelasarka teknologi enggau pansik. -RBI