BINTANGOR, 20 Mac – Balai Bomba enggau Penyah Penusah (BBP) Bintangor udah bejalaika pengawa meresa paip bomba nitihka taga ba sekeda endur ngelingi kandang menua Bintangor, pagi tadi.

Operasyen ke berengkah ari pukul 9.30 pagi nyentuk 11.16 pagi nya mungkur tiga iku kaban iya nya PB Hensley anak Benson, PBBK II Philip anak Chuat enggau PBB Aniq Rasydan bin Bohari.

Pengawa meresa nya dipejalaika ba empat palan besai iya nya di SJKC Kai Chung No.106 (1 unit), Jalai Janting Nicolite No.129-132 (4 unit), Berek JKR Batu ½ No.133-135 (3 unit) enggau Jalai Abang Amin No.152-157 (6 unit).

Sepenyampau 14 buah paip bomba udah diperesa dikena nentuka semua nya dalam gaya ke manah sereta manah enti diguna maya penusah ngenyit nyadi.

Pengawa meresa ari setiap maya tu nyadi singkang proaktif JBPM dalam nentuka penyedia perengka bomba seruran ba tikas ti optimum ungkup pengelikun mensia mayuh. – RBI

SELANGAU, 20 Mac — Pengeransing ngenegapka pengawa nyukat Tanah Hak Adat Bansa Asal (NCR) ba kandang menua Siong Ili terus dipejalaika nengah pengawa ngatur Randau Nyukat Tanah NCR ti ngempuruka penyereta komuniti ari lapan buah rumah panjai.

Kaban Parlimen P.214 Selangau, Edwin Banta madah, chara randau komuniti nyadi siti singkang ke besai reti dalam nentuka proses nyukat tanah NCR dipejalaika nengah chara ke terang, betukuh sereta inklusif.

“Pengawa nyukat tanah NCR tu beguna amat dikena nentuka penetap ngempu sereta nyaga hak peranak, kelebih agi di menua pesisir.

“Kerejasama ari semua piak amat diguna dikena nentuka proses tu bejalai enggau lanchar sereta meri pemaik ungkup timpuh ke panjai,” ku iya.

Iya madah munyi nya lebuh nyadi chairman Randau Nyukat Tanah ke diatur ba Rh. John Antieng, ditu, kemari.

Program tu diatur begulai Opis Tanah enggau Survei Sarawak, Bagi Menua Sibu enggau Palan Servis P.214 Selangau, enggau kaul ti chakah ari Komiti Pemansang Siong Ili ti betuaika Tony Emat.

Berebak enggau nya, Pemesai Opis Pengatur Tanah, Vivilyn Anak Wesley Kapi mega bisi ngenataika penerang senentang prosedur nyukat, pemesai guna dokumentasyen enggau singkang ke patut diambi pengempu tanah NCR.

“Pengempu tanah dilalau nentuka semua dokumen bekaul disediaka enggau penuh dikena ngemudahka proses nyukat enggau ngentaska tanah enggau teratur,” ku iya nerang.

Inisiatif tu ngayanka komitmen ti seruran dipejalaika mayuh bengkah piak dalam nentuka bungkur sukat tanah NCR ti lebih komprehensif, lalu enggau nya ngenegapka pengawa ngaku hak ngempu tanah adat sereta ngangkatka pengelantang pendiau komuniti menua pesisir di Siong Ili. — RBI

KUCHING, 20 Mac – Aidilfitri ukai semina ngayanka terima kasih pengudah sebulan bepuasa, tang mega nyadi pelasar ke beguna dalam ngerapitka kaul pangan diri sereta nerenakka pemanah ati entara komuniti ke mayuh macham enda ngira penatai budaya enggau pengarap, ku Dato Sri Dr Stephen Rundi Utom.

Iya ke mega Menteri Industri Pemakai, Komoditi enggau Pemansang Kandang Menua mega madahka, dalam napi rampa sosio-ekonomi ti majak mayuh pemar, penyulut terus Sarawak bepanggai bendar ba integriti penyerakup enggau bebatak asur entara bansa ti udah lama ditempa.

Iya mantaika jaku tu lebih ngenataika jaku tabi basa sereta meri Selamat Hari Raya Aidilfitri ngagai semua raban Islam, kelebih agi di Sarawak, ti ​​ngintu hari pemenang nya enggau penuh terima kasih.

“Ba pekara tu, aku nesau semua rayat ngambika terus ngetanka pengelantang tu nengah tradisyen nemuai, enggau nya ngayanka nilai penyelai nyadi batang penegap dalam nempa jemah ila ti lebih entap sereta lantang ungkup Sarawak,” ku iya. – RBI

SPAOH, 20 Mac — Siti ruang bilik selamat pengudah kerita ke ditepan sida eksiden ba Jalai Bungin-Seruai tumu pagi tadi.

Nitihka penerang ari Angkatan Pertahanan Awam Malaysia (APM) Spaoh, sida nerima kangau ngenyit bekaul enggau penusah nya sebedau ngatur empat iku kaban ngagai endur nya, ti betuaika Sarjan (PA) Kamarrul Badarudin bejalaika operasyen meri bantu.

“Lebuh datai ba endur nya, bala kaban tetemuka sebuah kerita Toyota Corolla ke mai empat iku diri sebilik udah tepawah ke sepiak kiba jalai.

“Dua iku ke besai tuai bakal mimit, siku lelaki bakal ba kuyu, lalu siku indu bakal ba kening enggau patung kanan,” ku penerang nya.

Ngambi penerang ari APM, dua iku nembiak lelaki beumur dua enggau lima taun ke sama dalam entukar nya nadai bakal.

“Tudah ke kena penusah diberi perubat keterubah ba palan penusah nyadi lalu diripotka enggai dianjung ngagai sebuah klinik ngambika diperubat enggau silik agi,” ku iya.

Operasyen nya tembu pengudah semua sida selamat, sebedau raban ke bejalaika pengawa mulaika diri ngagai Palan Kawalan Operasyen Pelilih Menua (PKOD) enggau likun enggau logistik dalam gaya ke manah.

Mensia mayuh diingat ngambika seruran bejejimat maya deriba sereta ngasika atur jalai alun dikena nyeliahka penusah ke enda dikedekaka nyadi. Sebarang penusah ngenyit tau diripot nengah lumur 999 tauka terus betanya ngagai APM ke semak. — RBI

BINTULU, 20 Mac — Balai Bomba enggau Penyah Penusah (BBP) Bintulu bekerejasama enggau Trinity Utama Consultancy udah mujur ngatur Kus Ruang Terkurung pengelama tiga hari berengkah 16 ngagai 18 Mac 2026, dalam pengawa ngangkatka pengulih operasyen nyelamat.

Nitihka penerang ari BBP Bintulu, sepemanjai kus nya, bala pesereta dibantai enggau mayuh macham komponen ti beguna nyengkaum pun penatai kuasa enggau undang-undang ti bekaul enggau operasyen nyelamat ba endur ti bekurung, sereta mega ngatur risiko enggau pansik dalam bejalaika operasyen nya.

“Bala penyereta mega diberi kelala ngena perengka nyidi gis, teknik nyelamat enggau ngatur orang ke dituntung penusah dikena nentuka tetiap operasyen ulih dipejalaika enggau likun sereta ngasi,” ku penerang nya.

Kus tu mega nyengkaum latih praktikal ti ngaul pengawa ngena Self-Contained Breathing Apparatus (SCBA), teknik ngikat enggau ‘rigging’ sereta mega simulasyen situasyen penusah ngenyit dikena ngangkatka pemereti ati enggau kompetensi pesereta dalam napi situasyen ke bendar.

“Latih tu ngembuan tuju deka nambahka tikas penyikap enggau penemu pengelikun bala pesereta dalam napi situasyen penusah ngenyit ba endur ke sekut enggau penusah angus,” ku penerang nya nerang.

Berebak enggau nya, BBP Bintulu mega ngenataika pengaga ati ngagai semua pengajar enggau pesereta ti udah mandangka komitmen tinggi sepemanjai bejalaika kus nya. — RBI

SONG, 20 Mac — Palan Kawalan Operasyen (PKOD) Pelilih Song nerima kangau ngenyit bekaul enggau penusah eksiden jalai alun (KJR) ti ngaul sebuah entukar ba Simpang 4 Jalai Takan, Song.

Nitihka ripot APM sehari tu, penusah eksiden nya ngaul siku lelaki besai tuai ke eksiden kediri empu.

Taja pia, tudah diripotka nadai bakal ba tubuh iya.

Nadai penusah ke enda manah diripot nyadi sekalika ngagai raban penyelamat tauka mensia mayuh maya operasyen nya dipejalaika.

Mensia mayuh dilalau ngambika seruran ngasika atur jalai alun sereta bejimat agi maya deriba dikena nyeliahka sebarang penusah ke enda manah nyadi.

Sebarang penusah ngenyit tau disalur ngagai Palan Kawalan Operasyen (PKOD) Pelilih Song nengah lumur 999 tauka lumur ke udah disediaka. — RBI

KUCHING, 20 Mac — Sapit Premier Sarawak, Datuk Amar Douglas Uggah Embas nyemetak madahka pengawa negika hak enggau pemerat Sarawak begunaka sukung tegap enggau penyerakup semua rayat enda ngira bansa enggau penatai.

Ku iya, Sarawak ke nyadi seiti ari pemungkal penumbuh Malaysia ngembuan hak, autonomi enggau martabat ke udah terang ditulis dalam Sempekat Malaysia 1963 (MA63), lalu hak tu ukai pemeri, tang lebih agi komitmen ke udah dipesetuju kenyau ari pun menua tu ditumbuhka.

Nitih ku iya, iring ari baruh pegai Premier Sarawak, YAB Datuk Patinggi Tan Sri (Dr) Abang Abdul Rahman Johari Tun Openg udah ngambi chara ti berani sereta beprinsip dalam ngetanka penuduk Sarawak nengah jalai berunding ti konstruktif enggau nadai konfrontasyen.

“Iya bekaul enggau pengelurus sereta pengeransing mulaika baru hak Sarawak, seraya nentuka rebak dudi hari bempu pesaka nengeri ke tegap agi, tan sereta lantang agi.”

“Nadai ketuai ulih ngereja pengawa nya kediri.”

“Iya begunaka sukung enggau penyerakup semua rayat,” ku iya nengah sebengkah penerang beserimbai enggau pengerami Hari Raya Aidilfitri 2026.

Berebak enggau nya, iya nyemetak madahka penyerakup rayat deka terus ngenegapka sada nyawa Sarawak dalam ngetanka hak nengeri tu, lalu enggau nya nentuka pengidup dudi hari ti lebih likun sereta lantang ungkup rebak dudi hari.

Berindik enggau nya, iya minta rayat bekerejasama semengat begempung maya musim pengerami tu nengah chara terus bediri tegap ba belakang iring Premier Sarawak enggau Gabungan Parti Sarawak (GPS).

“Aram mih kitai sama-sama ngenegapka penyerakup, pemerani enggau komitmen dikena nentuka Sarawak terus maju nyadi pelilih menua ti andal sereta lantang, setipak enggau semengat MA63 sereta aspirasyen rayat,” ku iya. — RBI

SRI AMAN, 20 Mac — Tiga iku individu dientaska bebadi nyawa seraya dua ke bukai bakal ba penusah eksiden jalai alun ti mungkur dua buah entukar di Jalai Pan Borneo, kandang menua Selepong, Jalai Sri Aman–Serian, pagi tadi.

Nitihka ripot ari Opis Bomba enggau Penyah Penusah Malaysia (JBPM), kangau ngenyit diterima urung pukul 8.30 pagi sebedau seraban raban ari Balai Bomba enggau Penyah Penusah Sri Aman dianjung ngagai palan penusah nyadi.

Lebuh datai ba palan nya, raban operasyen tetemuka penusah bebadi ti mungkur sebuah kerita Perodua Alza ti ngundan tiga iku mansa enggau sebuah kerita Proton X70 ti ngundan lima iku mansa.

Penusah nya ngujungka entukar Perodua Alza angus lengis, tang semua mansa mujur pansut sebedau penatai raban bomba.

Berebak enggau nya, entukar Proton X70 diripotka tepawah ke tisi jalai ngujungka tiga iku mansa tepelanting lalu dientaska bebadi nyawa ba palan penusah nyadi ulih tim perubat.

Dua iku agi mansa bakal mujur dipansutka mensia mayuh sebedau penatai raban penyelamat.

Niang dikelala enggau nama Lau Sie Tung, 70 taun, Grace Lau Chi Ai, 22 taun enggau Lau Yok Leh, 22 taun.

Dua iku agi ari entukar ke sama nyengkaum siku anak mit beumur enam enggau empat taun bakal ba pala lalu dianjung ngagai Sepital Sri Aman ngena entukar EMRS.

Berebak enggau nya, tiga iku mansa ari kerita Perodua Alza semina bakal mimit aja lalu dibai ngagai sepital ngena ambulans Opis Menteri Pengerai Malaysia ngambika diperubat enggau silik agi.

Komander Operasyen, PBK I Edwin Jonani, madahka raban bomba bejalaika operasyen madamka api ngena arus tunggal hos bantu tumu nyentukka api abis padam.

Raban nya mega meresi bekau penusah bebadi ba endur nya dikena nentuka pengelikun penguna jalai alun.

Tubuh ketetiga niang udah nya diserah ngagai polis ngambika atur ke patut dipejalaika.

Operasyen nya diketuka pengudah situasyen dientaska likun sereta nadai agi risiko penusah ba palan penusah nyadi.

Sama bisi nyereta operasyen nya empat iku kaban Polis Diraja Malaysia (PDRM) enggau empat iku pemesai ari Opis Menteri Pengerai Malaysia (KKM). — RBI

Ruai Berita Iban (RBI) meri Selamat Nyambut Hari Raya Aidilfitri ngagai semua raban Islam di Sarawak enggau Malaysia.

Arapka Aidilfitri taun tu mai pengelantang, berekat sereta ngerapitka kaul pangan diri ba kitai semua.

Dalam semengat pengerami tu, aram kitai terus nerenakka ulah penyerakup, pengelantang enggau semengat ti beserakup taja pan kitai diau dalam mayuh pupu raban bansa, pengarap enggau budaya ti bebida.

Penyelai Sarawak iya nya ba penegap kitai bebasaka pangan diri sereta ngintu penyelai pengerami begulai terus ditanggam.

Ngetanka budaya manah enggau pangan diri, nemuai ngagai pangan diri, betanya berita enggau pangan diri sereta berami enggau pangan diri.

Pia mega, ba pengerami tu iyarka penemu ti bebida tang kemeranka semengat berakup ke udah nyadi identiti kitai dalam pengidup ke lantang sereta likun.

Reti tu nyadika pelasar pengelantang enggau pemaik nengeri kitai terus meruan sereta likun.

RBI mega deka ngenataika tabi puji enggau terima kasih kami ti pemadu tinggi ngagai semua ketegal sukung ti terus diberi ari semua piak.

Sukung kita nyadika penyungkak ngagai kami ngambika terus ngenataika berita enggau penerang ti meri penguntung ngagai raban bansa.

“Selamat Hari Raya Aidilfitri 2026, Maaf Zahir dan Batin”

Ari kami

Ruai Berita Iban (RBI).

PAKAN, 20 MAC – Sepenyampau 41 iku penerima ti ngaul Komiti Pemansang enggau Pengelikun Genturung Pendiau (JKKK), Biro Indu, serakup enggau gerempung ukai dikuasa perintah (NGO) nerima agih belanja sepenyampau RM420,000 nengah Pengerami Nyuaka Chek MRP DUN N.47 Pakan kemari.

Pengerami nya dipenyadi Tan Sri William Mawan anak Ikom, Penyanding Penemu ba Opis Premier Sarawak (Industri Pemakai, Komoditi enggau Pemansang Kandang Menua) ke mega Kaban Kunsil Nengeri (ADUN) Pakan ba Bilik Aum, Opis Pelilih Menua Pakan.

Dalam jaku dipansutka iya, Tan Sri Mawan nyemetak madahka perintah mengkang komited ngeluarka agih belanja ngagai rayat dikena ngenegapka pemansang menua pesisir, kelebih agi ba pengawa ngangkatka tikas ekonomi komuniti lokal.

Nitihku iya, pengawa bejalaika projek baka ngaga jalai kebun beguna amat dikena ngemuntangka pengempu tanah ngeluarka asil betanam betupi sereta meransang aktiviti ekonomi bepelasarka sektor agro.

“Aku meransang pengempu tanah nguna tanah ke bisi enggau bemacham bansa utai tanam dikena nyungkak penatai pemisi ruang bilik,” ku iya.

Ku iya, ba dunya ke majak mayuh pemar, tanah nyadi reta ke berega ke patut diatur enggau betul sereta nitihka perambu.

Ngelansa pasal tuduh ti madahka kandang menua Pakan nadai nerima pemansang, iya nulak tuduh nya enggau nerangka bemacham infrastruktur pemun udah digaga sereta benung dikemansang.

Entara nya baka projek waterfront, Dewan Pakan, jalai alun enggau perengkaguna bukai ti meri penguntung terus ngagai rayat.

“Agih belanja perintah ke dikenatai nya ungkup guna rayat sereta dikena ngemansangka kandang menua tu. Bemacham inisiatif baka RTP, MRP, RADDA enggau ke bukai udah dipejalaika dikena nentuka pemansang terus diasaika,” ku iya.

Ku iya nambah, pemansang infrastruktur baka jalai kebun deka terus dikemerat dikena mantu rayat ngasilka ekonomi nengah aktiviti betanam betupi.

Berindik enggau nya, komuniti diperansang bekerejasama, merambu sereta berunding dalam ngatur sereta ngemansangka pengidup diri empu.

Iya mega ngemeratka pemesai guna penemu ba raban nembiak rebak baru nyadika pelasar penyulut ti enda ngetu, kelimpah ari minta rayat terus nyukung pengawa perintah dikena nentuka pemansang ulih dipejalaika enggau komprehensif sereta meruan di kandang menua Pakan.

Sama bisi datai iya nya Pemesai Pelilih Menua Pakan, William Manggoi, raban opis perintah enggau ejensi bekaul, raban tuai komuniti enggau tuai raban bansa (KMKK) enggau raban penerima. – RBI