MIRI, 14 April — Unit Pekara Jalai Pengarap Bukai (UNIFOR) Sarawak udah bejalaika Penemuai Matau enggau Nitihka Adat (13-14 April) ngagai sekeda rumah sembiang ngelingi Zon Utara, Bagi Menua Miri dikena beratika baru pengawa bejalaika projek pemansang, gaya ke diatu enggau tikas pematut udah ditetapka enggau garis lalau ke udah ditetapka.

Penemuai ke diatur pengelama dua hari berengkah ari pukul 9.00 pagi nyentuk pukul 5.00 lemai nya sebagi ari pengawa UNIFOR ti majak dipejalaika dikena nentuka tetiap projek ti dipejalaika ba rumah sembiang diatur enggau teratur, terang sereta ngasi.

Direktor UNIFOR YBg. Georgina Apphia Ngau, mega bisi datai beratika diri empu pengawa bejalaika penemuai nya sereta beratika tikas penyulut enggau pemanah projek ke diatu sereta udah dipejalaika dalam bidang nya.

Entara rumah sembiang ke bisi enggau penemuai nya iya nya Miri Buddhist Meditation Society Temple, Gereja BEM Iban Boulevard Centre, St Barnabas Church Taman Tunku, Hwa Kwang Temple Taman Tunku sereta Agape Grace Methodist Church.

Nitihka penerang ari UNIFOR Sarawak, penemuai tu ngembuan tuju deka nentuka tetiap agih belanja enggau bantu ti diungkupka ngagai rumah sembiang diatur enggau terang, enggau integriti sereta akauntabiliti, kelimpah ari nentuka pengawa bejalaika iya nitihka prosedur enggau garis lalau ke udah ditetapka piak bekuasa.

Kelimpah ari nya, penemuai tu mega nyadi pelasar pengawa matau ba palan dikena ngenegapka pengawa ngenataika projek, kelimpah ari ngerapitka kaul kerejasama entara UNIFOR enggau pengatur rumah sembiang di serata nengeri.

UNIFOR Sarawak tetap komited ngenegapka pengawa merintah ti efisyen, sistematik sereta inklusif, setipak enggau aspirasyen Perintah Sarawak dalam nentuka pengelantang enggau pengelantang entara jalai pengarap dijaga. — RBI

MIRI, 14 April — ‘Puji Tuhan Easter Youth Concert’ ke diatur Gerempung Gerija Sarawak (ACS) Bagi Menua Miri taun tu mujur besai lebuh mujur ngempuruka urung 1,000 iku eklisia ari bemacham renggat umur enggau denominasyen ngelingi mengeri tu.

Nitihka penerang ba laman Facebook rasmi St Barnabas Church Taman Tunku, program nya nerima sambut ti nyelai enggau penatai penuh, lalu enggau nya ngayanka semengat begulai enggau beserakup entara komuniti Kristian ngelingi.

Edisyen pengerami tu diatur Gerija Anglikan ke nyadi pengatur besai pengudah nerima pengandal ari ACS Miri ngiring pengerami nya.

Berebak enggau nya, penerang nya mega madahka pemeri ke digumpul nengah koleksyen “tangguk” deka dikenataika ngagai Miri Red Crescent Sunflower Centre dikena mantu nampung ungkus operasyen palan nya, ti bejalaika tanggungpengawa ngintu pengelantang sereta nangkup peminta nembiak khas.

Raban pengatur mega meri besai terima kasih ngagai semua piak ke udah meri sukung ngemujurka konsert tu lalu ngarapka momentum ke sama ulih diteruska ba pengawa ke deka datai.

“Konsert Nembiak Easter ACS diperambu deka datai baru taun baru ungkup edisi 2027.” ku penerang nya. — RBI

MIRI, 14 April — Penghulu Wilfred Mac ke nyadi Sapit Chairman Ke-2 Bazaar Gawai Dayak & Festival Etnobudaya beserimbai enggau Pengerami Gawai Dayak Renggat Sarawak 2026 udah ngatur penemuai ngagai palan bazaar begulai enggau beberapa iku kaban komiti pengatur, lemai tu tadi.

Penemuai nya ngembuan tuju deka beratika baru tikas penyikap enggau pejalai pengawa nyendiaka palan, kelimpah ari nentuka tetiap pelin dipejalaika enggau teratur sereta nitihka timpuh ke udah ditetapka.

Pengawa ngatur pengerami ti beprestij tu dikearapka ulih nyadi pelasar ti beguna amat dalam ngelakuka pesaka asal, seni enggau produk menua tu komuniti Dayak ngagai mensia mayuh.

Dikearapka semua pengawa nyediaka diri bejalai enggau lanchar lalu Pengerami Gawai Dayak Renggat Sarawak 2026 deka diatur enggau chukup mujur sereta richah. — RBI

SEBUYAU, 14 April — Raban Penyaga Pengelikun Mensia Mayuh Malaysia (APM) Pelilih Menua Sebuyau bejalaika pengawa enggau lengkas pengudah nerima kangau ngenyit ari mensia mayuh bekaul enggau penusah aksiden ba jalai alun di Kampung Bajong, sehari tu tadi.

Nitihka penerang APM Sebuyau, seraban raban APM terus dianjung ngagai palan penusah nyadi ngambika ulih bejalaika operasyen bantu tumu sereta nentuka pengelikun mansa.

Penusah aksiden nya mungkur sebuah kerita Perodua Bezza ti benung bejalai ari Kuching nuju ngagai Sebuyau.

Pansik tumu tetemuka kerita nya dipelaba tepawah ketegal gaya jalai ke lichin berindik ari ujan bangat.

Mansa diripotka enda ulih nagang kerita sebedau tepawah ngagai bau jalai.

Taja pia, tudah semina bakal mimit aja.

Raban APM meri perubat keterubah ba endur nya sebedau mansa dianjung ngagai klinik besemak ngambika diperubat enggau silik agi.

Mensia mayuh dilalau ngambika seruran bejejaga sereta bepegai ba atur pengelikun maya deriba, kelebih agi ba gaya hari ke enda meruan dikena nyeliahka penusah ke enda dikedekaka nyadi.

Enti bisi penusah ngenyit nyadi, mensia mayuh tau betanya ngagai APM Sebuyau ba lumur 013-9113937 tauka talipaun penusah ngenyit 999 minta bantu lengkas. — RBI

SERIAN, 14 April — Siku lelaki peranak menua tu beumur 37 taun ditangkap Bagi Pansik Jenayah Narkotik, Indu Opis Polis Pelilih (IPD) Serian ketegal dipelabaka ngembuan 5.19 gram dadah bansa syabu dalam operasyen ke dipejalaika sehari tu.

Ketuai Polis Pelilih Serian nengah siti penerang madahka saspek ke beasal ari Kampung Tebakang Melayu diatu benung dipansik ari baruh Seksyen 39A(1) Akta Dadah Berbahaya 1952.

Enti ditemu salah, individu nya tau diukum jil nyentuk lima taun sereta diukum sipat entara tiga ngagai semilan kali.

Nitihku iya, pemutus peresa ai kemi keterubah mega tetemuka saspek positif Methamphetamine enggau Amphetamine.

Berindik enggau nya, kes tu mega benung dipansik ari baruh Seksyen 15(1)(a) akta ke sama.

Ku iya nambah, Polis Diraja Malaysia nengah Bahagian Pemansik Jenayah Narkotik Pelilih Serian deka terus chakah agi bejalaika pengawa ngemuntanka pengawa nyadung enggau salah guna dadah ba kandang menua nya.

“Polis enda deka belemi enggau sebarang individu ke bisi kaul enggau penyalah dadah nyengkaum penyalah berulang ke tau ditinggang atur ari baruh Seksyen 39C Akta Dadah Berbahaya 1952,” ku iya.

Ku iya nerang, ungkup penyalah ari baruh Seksyen 39C, pesalah ulih diukum jil enda kurang ari lima taun enggau enda ngelui ari tujuh taun enggau rotan enda ngelui ari tiga kali enti dikenuku salah.

Mensia mayuh mega dipinta ngenataika penerang ngagai polis ngambika ulih mantu pengawa ngelaban aktiviti dadah ungkup pengelikun komuniti setempat. — RBI

SIBU, 14 April – Dato Sri Alexander Nanta Linggi, Menteri Kereja Raya udah mansutka jaku gerah bekaul enggau pemisi akaun pelesu ke ngena nama enggau identiti iya ba media rama.

Iya ke mega Kaban Parlimen Kapit, nyemetak madahka iya nadai sebarang kaul enggau akaun nya lalu tekenyit enggau pengawa piak ti nadai tanggungpengawa ti tau ngasuh saru sereta ulih nipu mensia mayuh.

Berindik enggau nya, Nanta ngelalau mensia mayuh anang arapka sebarang penerang ari akaun pelesu lalu semina meda akaun rasmi iya ba link baka tu:
https://www.instagram.com/alexandernantalinggi

Mensia mayuh mega diperansang ngeripot sebarang akaun ti disangka sereta mantu ngerembaika jaku tangkan tu dikena nyeliahka pengawa nipu nengah online. -RBI

SARIKEI, 14 April – Mensia mayuh dilalau nyereta Kimpin Meri Darah ke diatur JKR Sarikei enggau kerejasama Opis Menteri Pengerai Malaysia (KKM) enggau Sepital Sarikei ke nyadi pengeran dikena mantu nangkup guna bekal darah pesakit ke begunaka bantu.

Kimpin tu deka diatur kena 16 April 2026 iya nya Hari Empat, berengkah pukul 8.30 pagi nyentuk ke tembu, bepalan ba Ringkat 3, Begunan Pentadbiran Perintah Sarawak (IAC) Bagi Menua Sarikei.

Nengah rambai jaku penyedar “Setitik darah nuan tau nyadi nyelamatka nyawa ngagai orang bukai”, program tu ngembuan tuju deka meransang mayuh agi orang datai ke mua meri darah nyadi pengawa penyiru ti ulih nyelamatka nyawa.

Mensia mayuh diperansang datai nyukung pengawa ti manah tu, lalu enggau nya ulih mantu nentuka bekal darah seruran chukup dikena sepital. -RBI

SARIKEI, 14 April – Liga Sarikei nyadi batang pugu pekara dikemeratka dalam perambu Gerempung Main Bol Bagi Menua Sarikei (PBBS) ungkup taun 2026, setipak enggau pengawa ngenegapka pemansang main bol ba renggat bagi menua.

Presiden PBBS, Cr Hj Khairulddin Qalam Daud nyemetak madahka setiap Kaban Komiti Eksekutif (AJK) mesti ngembuan pemereti ati enggau tuju ti setipak enggau perambu sereta juluk program sepemanjai taun 2026.

Pekara nya dikemeratka lebuh iya nyadi chairman Aum JK Eksekutif PBBS Siri 1/2026 di ba Kompleks Lumba enggau Main Sarikei kena Hari Enam tu tadi.

Nitih ku iya, PBBS terus nyingkang nyadi sebuah gerempung main bol ti efektif nengah chara ngemeratka kaul semua piak dalam nyukung polisi pemansang Gerempung Main Bol Sarawak (FAS).

“Ari sukut nyadi ketuai, PBBS ngempuruka pengari ari mayuh macham bansa ti chakah dalam arena main bol, lalu enggau nya ngayanka semengat beserakup dalam lumba enggau main nya.

“Aku dibantu Sapit Presiden Mohd Rafi bin Sikh Ali Yusof enggau tiga iku Sapit Presiden iya nya Fakrur Redzuan bin Mahamad, Kevin Jampang anak Ranggak enggau Cr Hj Mornurazli bin Morshidi,” ku iya.

Kalinda PBBS 2026 udah diatur enggau komprehensif, berengkah enggau pengawa ngatur baru struktur pentadbiran dalam bulan Januari enggau Februari, lalu ditangkan enggau pengawa ngatur Aum Besai Ninting Taun (AGM) sebedau Ramadan.

Fokus mega diberi ngagai pengawa ngemaru Penerang ti deka Diberi (MYKB) enggau ngatur sistem organisasyen nyengkaum pengawa ngerejista kaban begulai ti ngaul kelab, gerempung ti berejista enggau kaban individu nitihka Konstitusyen PBBS.

“Ari sukut pemansang, PBBS benung merambu bejalaika Klinik Main Bol Mega ti ngaul Opis Pelajar Pelilih Julau, Meradong enggau Sarikei, ti disadang dipejalaika pemadu laun pun bulan Mei.

“Program tu deka mai nama besai dalam main bol Sarawak sereta bisi sukung ari Direktor Pelajar Nengeri Sarawak, Omar bin Haji Mahli ungkup kerejasama strategik entara sektor pelajar enggau main bol.

“Sebedau Liga Sarikei, PBBS ngemeratka pengawa ngenegapka sistem pengadil. Komiti Pengadil PBBS ti betuaika Tuan Donny Luda benung chakah ngatur baru pengawa pentadbiran sereta ngangkatka kualiti pengadil.

“Minggu nyin kemari, Seminar Undang-Undang enggau Uji Pengeregas Pengadil Zon Tengah mega bisi diatur di Sarikei, ti dipejalaika Komiti Pengadil Nengeri Sarawak enggau kerejasama unit pengadil PBBS.

“Kelimpah ari nya, kus enggau penerang pasal ngatur pekit deka dipejalaika dikena nentuka tetiap pekit diatur enggau profesional ari baruh kemata Komiti Pekit ti betuaika Cr Aziz bin Ahmad enggau bantuYazid bin Yusof,” terang Khairulddin Qalam.

Tampung iya, Liga Sarikei ti dianti-anti deka diidupka baru setipak enggau aspirasyen komuniti menua nya sereta sukung penyanding PBBS, Datuk Hj Len Talif Salleh, ADUN N41 Kuala Rajang.

Pekit tu ukai semina nyadi pelasar endur nyerungkai penau menua tu, tang mega nyadi padang endur milih pemain ngarika Sarikei ba Liga Premier Sarawak 2026 ti diperambu deka diatur urung bulan Ogos taun tu.

Berebak enggau nya, Khairulddin Qalam madahka tim nembiak Sarikei benung chakah belatih ari baruh iring jurulatih ke bepeneleba, Fadillah Bit dikena nyendiaka diri napi liga pemansang renggat nengeri ke disadang berengkah ba suku ketiga taun 2026.

“Pengawa matau penau mega ngaul kerejasama rat enggau sekula di serata pelilih menua enggau sukung raban pengajar baka Adren Akang enggau Michele Jackson ti mega kaban komiti PBBS,” terang iya enggau lenak.

Dikena nutup kalinda ninting taun, PBBS merambu deka ngatur pekit veteran Sarikei urung bulan November nyentuk Disember dikena meransang pengawa ngaul komuniti main bol ari semua renggat umur terus.

PBBS mega seruran tebuka ngagai kerejasama strategik sereta ngelaluka kaul mayuh bengkah piak dalam pengawa ngemansangka main bol Sarikei, nyengkaum randau kerejasama ti seruran dipejalai enggau Lea Sports Centre. – RBI

MERADONG, 14 April – Ketuai Polis Pelilih Meradong DSP Tansli Mering madahka siku lelaki peranak menua tu beumur 34 taun udah didawa ari baruh Seksyen 39C(1) Akta Dadah Berbahaya 1952 ba Kort Sesyen Sarikei, sehari tu.

Nitihka penerang iya, dawa ngagai orang ke dituduh nya digaga Bagi Pansik Jenayah Narkotik IPD Meradong bekaul enggau lumur kes SKI-62D-33-4/2026.

Orang ke dituduh nya dibai ngagai mua Hakim ke Dipebasa Puan Stella Augustine Druce ketegal ke udah kala diukum lebih ari dua kali ari baruh Seksyen 15(1)(a) Akta Dadah Berbahaya 1952.

“Pengawa meresa tetemuka orang ke dituduh nya bisi empat rikod sebedau tu bekaul enggau penyalah dadah,” ku iya nengah siti penerang.

Kot udah nya ngukum iya enam taun jil, dua kali sipat enggau dua taun dikemataka.

Pengawa bedawa kes nya dipejalaika Sapit Pendawa Raya Sarikei, Aiman ​​Zarith bin Zahrrullail.

Ku iya nambah, Seksyen 39C(1) Akta Dadah Berbahaya 1952 nyendiaka ukum maksimum nyentuk tujuh taun jil enggau tiga kali sipat rotan enti diukum salah.

Berebak enggau nya, raban polis IPD Meradong nyemetak madahka sida enda belembut ba sebarang aktiviti salah guna dadah lalu beratika isu nya berat ba raban bansa.

Mensia mayuh ke bisi penerang bekaul enggau aktiviti dadah di pelilih Meradong dipinta nyalurka penerang ngagai Balai Polis Bintangor nengah lumur 084-693222. -RBI

KUCHING, 14 April — Woksyop Pemansang Agropreneur Lada Siri 1/2026 ke diatur ari 7 ngagai 9 April di Kuching nyadi inisiatif strategik dalam ngenegapka pemansang dagang sektor lada di Malaysia, setipak enggau pengawa bejalaika Atur Pemansang Malaysia Lumpar Ke-13 (RMK13) ungkup timpuh 2026 ngagai 2030.

Program tu diatur Opis Menteri Kebun Bedandang Besai enggau Komoditi ngemeratka pengawa ngenegapka kapasiti orang dagang nengah chara kolaboratif ti ngaul mayuh bengkah ejensi enggau institusyen ti bekaul.

Tu nyengkaum Suruhanjaya Syarikat Malaysia (SSM), Universiti Teknologi MARA (UiTM) Pampang Sarawak, Perbadanan Pembangunan Ekonomi Sarawak (SEDC), Opis Menteri Pengerai Malaysia (KKM), Perbadanan Harta Intelek Malaysia (MyIPO), Agrobank enggau Institut Keusahawanan Nasional.

Nengah pengawa strategik tu, bala pesereta dipeda enggau mayuh macham sukut dagang ti beguna nyengkaum ngatur dagang, nitihka atur, pemansang produk, akses ngagai pekara belanja enggau nyaga reta intelektual, lalu enggau nya nambahka daya bepekit dalam industri lada.

Bisi 40 iku pesereta nyereta siri keterubah woksyop tu, iya nya orang dagang enggau ti deka nyadi orang dagang potensial lada ari bagi menua Kuching, Serian, Sri Aman enggau Betong.

Penyereta tu ngayanka komitmen ti seruran dipejalaika dikena ngenegapka rentayan rega industri lada menua tu.

Pengawa ngatur woksyop tu mega nyukung agenda nasional dalam meri kuasa ngagai sektor komoditi ngambika lebih tegap, inovatif sereta meruan, setipak enggau aspirasyen pemansang ekonomi menua ari baruh RMKe-13. — RBI