NIAH, 26 April — Sarawak begunaka rebak baru ti bepenemu tinggi sereta bepenau nguasa teknologi jemah ila baka Pemintar Tiru (AI) enggau teknologi moden dikena nentuka nengeri tu enda tinggal ari arus pemansang dunya.
Menteri Industri Pemakai, Komoditi enggau Pemansang Kandang Menua Sarawak, Dato Sri Dr Stephen Rundi Utom nyemetak madah, kuing pemansang nengeri jemah ila diatu bepanggai ba nembiak ti nyulut dalam pelajar, kelebih agi napi pemar teknologi baru.
Iya madah munyi nya program ke diatur ba Rumah Lawrence, Bukit Kenyalang, seraya minta mayuh agi peranak Sarawak ngemeratka bidang STEM, kelimpah ari ngenegapka pengelandik Jaku English enggau pengelandik teknikal sida ngambika setipak enggau guna pemansang maya ke diatu.
Beambika chunto sektor betanam betupi, iya nerangka chara tradisional aja enda chukup agi dikena nambahka asil.
“Dikena nambahka asil betanam betupi, kitai begunaka injin, sistem automasyen, dron enggau ke bukai.
“Enti kitai enda belajarka teknologi tu, kitai enda ulih ngena iya. Peratika aja menua baka China, Taiwan enggau Thailand, sida udah lama ngena mekanisasyen baru,” ku iya.
Berebak enggau nya, iya mega ngelalau peranak Sarawak ngena penuh peluang belajar enda bebayar ba institusyen ke diempu perintah nengeri baka Universiti Curtin di Miri, Kolej Universiti i-CATS, Universiti Swinburne di Kuching enggau Universiti Teknologi Sarawak (UTS) di Sibu.
Nitih ku iya, atur tu beguna amat dalam ngadaka rebak “orang ti pintar” ti bepenau meransang transformasyen Sarawak nuju nengeri maju bepelasarka teknologi enggau inovasyen. -RBI
