MUKAH, 27 Mac – Siki orang ke deriba mutosikal bebadi nyawa ba penusah aksiden ba jalai alun ke nyadi ba Kilometer 20, Jalai Mukah–Balingian, malam tadi.

Nitihka penerang media ari Polis DiRaja Malaysia (PDRM), penusah ke nyadi urung pukul 11.00 malam nya mungkur sebuah mutosikal enggau sebuah lori pemerat 25 tan ke ngundan sum.

Pansik tumu tetemuka lori ke dideriba siku lelaki beumur 36 taun nya bejalai lurus ari Simpang Jalai Metading nuju pasar Mukah, sebedau belantak enggau sebuah mutosikal ari jalai seberai.

Mutosikal nya benung dipasang lelaki beumur 30 taun ke dipelabaka ngenyit tama ngagai jalai lori nya.

Berindik ari penusah nya, deriba mutosikal balat bakal ba pala, kaki kiba enggau jari kiba.

Deriba mutosikal ke beasal ari Kampung Kuala Penipah dientaska midang ba palan penusah ke nyadi ulih pemesai perubat Sepital Mukah.

Deriba lori nya diripotka semina bakal mimit aja.

Diatu kes tu benung dipansik ari baruh Seksyen 41(1) Akta Pengangkutan Jalan 1987. Mensia mayuh ke bisi penerang dipinta datai ke mua mantu tasat nengah chara meri kerejasama enggau pemesai pemansik.

Berebak enggau nya, piak polis ngelalau penguna jalai alun ngambika seruran bejimat, kelebih agi maya deriba tauka nepan mutosikal maya malam hari dikena nyeliahka penusah ke enda dikedekaka nyadi. – RBI

PAKAN, 27 Mac — Pemujur ngatur Program Servis Rama di Pelilih Menua Pakan mandangka komitmen tinggi enggau kerejasama rat entara ejensi pengelikun enggau komuniti kandang menua nya dalam ngenegapka aktiviti komuniti.

Nitihka penerang nya, basa ke pemadu tinggi diberi ngagai Raban Penyaga Orang Periman Malaysia (APM) Pakan ketegal dedikasyen enggau penyulut sida sepemanjai bejalaika program nya.

“Raban APM Pakan udah mandangka komitmen ti tinggi sereta bejalaika tanggungpengawa ti beguna dalam nentuka pengelanchar program tu,” ku penerang nya.

Jaku beterima kasih mega diberi ngagai Komuniti Pakan On The Way ti dianggap nyadi batang pemujur program nengah pengawa bebendar enggau kerejasama rat sida.

“Kerejasama ti disediaka nyadi pun pengelanchar kesemua agenda sereta ngayanka penegap penyerakup komuniti,” ku penerang nya nerang.

Berebak enggau nya, bemacham raban kerejasama bukai nyengkaum YB Datuk Larry Sng Wei Shien begulai enggau Akademi Memandu Ing Sdn. Tim Bhd. Sarikei, Polis IPD Julau, Ejensi Anti Dadah Kebangsaan (AADK) Pelilih Sarikei, C&O Pakan Sarawak enggau Enuluq Park & ​​Countryside Room Rent Pakan bela bejalaika tanggungpengawa ke besai ngemujurka program nya.

Program tu ukai semina mujur nyapai juluk, tang mega muka ruang baru dalam ngenegapka rentayan kerejasama enggau ngenegapka aktiviti rama di Pelilih Pakan. — RBI

Sumber, photo — Apm Pakan

SRI AMAN, 27 Mac – Sarawak sekali agi nyereta pengawa ‘Earth Hour’ global lebuh program ‘Earth Hour 2026’ diperambu deka diatur kena Hari Enam tu, 28 Mac, berengkah ari pukul 8.30 malam nyentuk 9.30 malam.

Bekaul pengawa tu, Sapit Premier Sarawak Datuk Amar Professor Dr Sim Kui Hian minta rayat di serata nengeri dilalau madamka api enggau perengka karan pengelama sejam nyadika tanda sukung ngagai rambai jaku taun tu, “Meri Sejam ungkup Dunya”.

Program tu masuk taun kelima diatur di Sarawak enggau penyereta Opis Perintah Lokal (PBT) ti terus dipejalaika.

Inisiatif tu berengkah enggau Kaunsil Mengeri Sibu (SMC) ba taun 2022, ditangkanka Kunsil Bandaraya Kuching Selatan (MBKS) ba taun 2023, Kaunsil Bandaraya Miri (MCC) ba taun 2024, Kaunsil Pelilih Menua Serian (SRDC) ba taun 2025, lalu taun tu diatur Kaunsil Pelilih Sri Aman.

“Nyadi atur bejalaika pengawa, api ba opis kaunsil, taman reakrasyen mensia mayuh enggau perengka guna ke diempu PBT deka dipadamka dalam timpuh sejam nya.

“Mensia mayuh dilalau anang tekenyit laban nya sebagi ari atur program meri penyedar, lalu nadai ripot ngachau enda ibuh digaga ngagai Sarawak Energy,” ku iya.

“Earth Hour” global ti berengkah di Sydney, Australia dalam taun 2007, diatu udah nyadi lambang penyerakup dunya dalam mutarka ubah gaya hari.

Pengawa madamka api ukai semina mantu ngurangka guna kuasa, tang mega ngangkatka penyedar mensia mayuh pasal isu pengangat dunya.

Taja pan Sarawak udah nyapai status pemansut karbon sifar beresi, tang nengeri tu agi dituntung fenomena gaya hari ekstrem baka ampuh bah enggau kemarau ketegal ubah gaya hari global.

Berindik enggau nya, mayuh bengkah ejensi perintah, sektor peribit nyengkaum hotel, palan bebelika barang, opis korporat enggau palan pelajar tinggi bela ngambi bagi ngemujurka program tu.

Mensia mayuh nyengkaum individu, gerempung, dagang, NGO enggau sekula diperansang enggau Earth Hour 2026 nengah chara madamka api pengelama sejam, lalu enggau nya ulih mantu ngurangka guna kuasa enggau pemansut karbon.

Pengawa begulai tu dikearapka ulih ngerikod pemujur ke manah agi enti dibanding enggau pengawa ngurangka beban kuasa karan ke dirikod taun nyin kemari. – RBI

KUALA LUMPUR, 26 Mac – Opis Perengka Pengangkut Darat (JPJ) ngelalau semua pemegai lisin deriba nentuka lisin sida seruran dikemaru dalam timpuh ke udah ditetapka dikena nyeliahka ari enda aktif, lalu enggau nya ngeruga pematut sida nerima subsidi BUDI MADANI RON95 (BUDI95) ke ditagit.

Pemegai Lisin Deriba Malaysia (LMM) ke udah abis timpuh entas, lebih ari 36 bulan enda layak agi nerima subsidi nya.

Ketuai Direktor JPJ, Aedy Fadly Ramli madah, semina lisin ke agi diklasifikasyen aktif aja ke patut ngasaika subsidi nya.

Nitih ku iya, LMM dianggap aktif enti timpuh entas enda ngelui 36 bulan ari timpuh ngemaru.

“Dalam timpuh nya, pemegai lisin agi layak nerima subsidi BUDI95 lalu ulih ngemaru lisin sida terus enggau nadai sebarang peresa tambah.

“Taja pia, enti timpuh lisin deriba nya abis timpuh lebih ari 36 bulan, orang ke ngempu lisin nya enda layak agi nerima sabsidi BUDI95 nya,” ku iya nengah sebengkah penerang sehari tu.

Ku iya, dalam lisin nya abis timpuh lebih ari 36 bulan, pengawa ngemaru enda ulih digaga terus lalu orang ke ngempu lisin nya meseti ngambi baru peresa deriba ba institut deriba.

Berebak enggau nya, iya ngingatka barang sapa individu ti deriba perengka pengangkut bemotor meseti ngembuan lisin deriba ti agi entas, iya nya bedau abis timpuh.

JPJ mega ngemeratka komitmen deka terus ngenegapka pengawa ngenataika servis ti efisyen, terang sereta bepelasarka integriti setipak enggau aspirasyen Malaysia MADANI dalam nentuka pengelantang pendiau rayat dijaga. – RBI

MUKAH, 26 — Sapit Menteri Pengerai YB Dato Hajjah Hanifah ke mega Kaban Parlimen P213 Mukah, nyuaka pemeri ngagai Nyeruri Rumah (Penusah Rumah Angus) ngagai Pn Saodah Binti Mawi, ti udah dituntung penusah rumah angus di Kampung Kuala Lama, Mukah tengahari tu tadi.

Pemeri nya dalam tukuh sekeda barang ke diguna enggau pengawa ngemanahka rumah (MRPPRMS) diarika En. Almalhakim Norshidi enggau sekeda staf Palan Servis P213 Mukah.

YB Dato Hajjah Hanifah ngarapka semua kaban belayan sida ti dituntung penusah nya besabar ati napi penusah tu lalu ngarapka pemeri ti nangkanka tu ulih ngelempungka tating penusah ti ditapi.

Iya mega minta sebarang piak datai ke mua meri bantu/pemeri ngagai ruang bilik ke bisi kaul. — RBI

Sumber, photo — Hanifah Hajar Taib

DARO, 26 Mac – Penyikal raban bomba mujur nagang api ari nyerarai ngagai rumah bukai dalam penusah angus ti nganguska sebuah rumah Program Perumahan Rayat Seranta (PPRT) enggau sebuah rumah sarang burung di Kampung Semop, tumu pagi tadi.

Palan Operasyen Opis Bomba enggau Penyah Penusah Malaysia (JBPM) Sarawak, madahka diri nerima kangau ngenyit bekaul enggau penusah nya urung pukul 4.39 pagi sebedau seraban bomba ari Balai Bomba enggau Penyah Penusah (BBP) Daro ngesah ngagai endur nya.

Nitihka penerang, penusah angus nya ngaul sebuah rumah PPRT struktur ukai tetap pemesai urung 30×20 kaki persegi ti 100 peratus angus, kelimpah mega nganguska sebuah rumah sarang burung ke besemak.

Semina urung lima peratus dapur rumah ke besepiak aja kena penusah angus, lalu enggau nya ulih nyeliahka pengerusak ke besai agi ngagai rumah bukai.

Maya penusah nyadi, tiga iku orang ke nguan rumah nya bisi dalam rumah nya iya nya siku indu besai tuai enggau dua iku nembiak lelaki, tang semua sida mujur nyelamatka diri enggau nadai sebarang bakal.

Ketuai ruang bilik nya diripotka nadai ba rumah laban benung pansut gawa maya penusah nya nyadi.

Operasyen madamka api nya dipejalaika ngena arus 200 kaki pemanjai enggau dua munchung (nozzle) ke disambung ngagai pun penatai ai paip bomba.

Sepenyampau lapan iku raban bomba ngaul diri dalam operasyen nya enggau bantu Tender Penyelamat Bomba Kompak (CFRT) enggau sebuah perengka pengangkut utiliti.

Nadai penusah bebadi nyawa diripotka nyadi ba penusah nya. -RBI

LAWAS, 26 Mac – Kaban Kunsil Nengeri (ADUN) N81 Ba’ Kelalan, Baru Bian, madahka diri deka ngambi atur undang-undang ngagai individu di Facebook ke ngena nama “Kam Agong Lawas Sarawak”, ti dipelabaka mantaika jaku petenah ngagai iya, Sapit Premier Sarawak, Datuk Amar Haji Awang Tengah bin Ali Hasan enggau Kaban Parlimen Lawas, Dato Henry Sum Agong.

Tulis ba Facebook ke mega ditaburka baru ba segmen Berita 7.57 kena 25 Mac 2026, nuduh sida bisi kaul enggau pengawa bekaul dadah enggau makai suap di Lawas.

Baru Bian madahka jaku tuduh nya nadai pelasar, ngembuan juluk jai sereta ngembuan tuju deka ngamahka nama iya ke nyadi pengari rayat.

Iya mantaika jaku tu nengah Facebook iya seharitu tadi nimbal jaku petenah nya.

Ku iya, individu nya sebedau tu kala ngaga jaku ke sebaka beberapa kali, tang tuduh ke pemadu baru tu dianggap berat sereta kelalu tinggi.

Baru Bian nyemetak madahka iya deka ngambi semua singkang ke patut nyengkaum ngepunka prosiding undang-undang, dikena ngetanka integriti enggau kredibiliti iya.

“Aku enda diau diri napi serang ti enda manah tu. Atur undang-undang nyadi singkang ti beguna dikena negika pemendar sereta nyaga nama manah aku,” ku Baru Bian. – RBI

JULAU, 26 Mac — Kaunsil Lada Malaysia (MPB) majak chakah agi ngenegapka kaul enggau pekebun mit nengah penemuai kereja Direktor Besai iya, Vincent Sawat, ngagai sekeda palan ngeluarka lada di pelilih menua tu.

Penemuai nya mungkur lima kandang endur pemansut asil lada iya nya ba Wong Keredat, Lubok Besai, Masit, Rantau Chire enggau Rantau Kemedu di Julau ti bejalaika tanggungpengawa ke beguna dalam meri pangka ngagai pemansut lada nengeri tu.

Batang fokus penemuai nya beratika pejalai pengawa bejalaika dua inisiatif beguna ba renggat kebun iya nya Projek Jalai Ladang Mit (JLPK) enggau pemansang Plot Fertigasyen Lada ti ngembuan tuju ngangkatka penyikar ngatur kebun enggau asil pemansut.

Berebak enggau nya, penemuai tu mega dikena nyadi pelasar kaul terus entara MPB enggau komuniti pekebun mit dikena ngulihka timbal pasal peneleba, pemar enggau utai ke diguna sida diatu.

Chara renggat baruh tu ngayanka komitmen MPB ti seruran dipejalaika dikena nentuka pemansang industri lada dipejalaika enggau chara inklusif sereta meri empas tinggi, kelebih agi ba pengawa meri kuasa ngagai pekebun mit nyadi tulang belakang industri.

Pengawa tu setipak enggau aspirasyen Opis Menteri Kebun Bedandang Besai enggau Komoditi dikena ngenegapka daya besemekih sektor komoditi menua, nuju komuniti lokal ti meruan agi, tan sereta bepelasarka pengelantang pendiau. – RBI

Gambar kredit MPB

SARATOK, 26 Mac — Kaunsil Pengintu enggau Penyaga Tanah Sarawak (SALCRA) terus bejalaika tanggungpengawa beguna nyadi penyungkak pengempu tanah enggau pemansang menua pesisir di Sarawak sepemanjai lima dekad iya udah ditumbuh.

Menteri Industri Pemakai, Komoditi enggau Pemansang Kandang Menua, Dato Sri Dr. Stephen Rundi Utom madah, timpuh 50 taun udah meri bemacham peneleba enggau ajar ke berega ba pengawa ngenegapka pengawa bejalaika pemansang tanah enggau lebih ngasi sereta meruan.

Nitih ku iya, pengawa ngiga peluang baru dalam pemansang ekonomi meseti dipejalaika belama sereta chakah, kelebih agi dalam nentuka penguntung ari pemansang ulih diasaika komuniti menua pesisir.

“Semua pengari rayat patut ngelala kandang endur ke bisi potensial ngambika SALCRA ulih bejalaika tanggungpengawa enggau lebih efektif dalam mantu pemansang kandang menua.

“Legasyen penyulut SALCRA meseti diteruska ungkup pemaik rebak dudi,” ku iya lebuh bejadika Pengerami Nyerahka Surat Pala Tanah Seksyen 18 Kanun Tanah Negeri (KTN) ungkup Kandang Pemansang SALCRA, Wilayah Saratok, sereta mega Pengerami Ngelancharka Logo Hari Ulang Taun Ke-50 SALCRA, ba Dewan Serbaguna Ladang Kelapa Sawit Roban Selatan, sehari tu.

Iya ke mega Chairman SALCRA madah, pemujur ejensi nya dalam timpuh 50 taun ke udah ngayanka komitmen sida ti seruran ngenegapka hak ngempu tanah, kelebih agi ngaul tanah Hak Adat Bumiputera (NCR), kelimpah ari meransang pemansang sosioekonomi menua pesisir.

Naka ke diatu ku iya, 96 peratus ari tanah ke dikemansangka SALCRA udah mujur diserah nengah pengawa ngeluarka surat pala tanah, lalu enggau nya mandangka pemujur pengawa bejalaika program pemansang tanah kenyau ditumbuh kena 1 Mei 1976 suba.

Iya mega nerangka pengawa nyukat tanah NCR dipejalaika nitihka Seksyen 19(1)B Ordinan SALCRA dikena nentuka pengawa ngemansangka tanah dipejalaika nitihka perambu sereta meruan.

Dalam pengawa ngenyampatka proses nyukat, SALCRA bekerejasama enggau Opis Tanah enggau Survei (JTS) Sarawak pengawa numbuhka Raban Survei Dalam Menua ba taun 2020 ti bejalaika tanggungpengawa ngelala, nyukat sereta ngesahka tanah NCR sebedau iya direjista sereta dikeluarka enggau pala tanah ari baruh Seksyen 18 KTN.

Ba pengerami ke sama, sepenyampau 280 iku penerima ari 105 buah rumah panjai enggau genturung pendiau nerima surat pala tanah, tetiap lot nya ngaul 373 lot enggau 345 iku pengempu berejista, ti mungkur pemesai 626 hektar.

Pengawa nyerahka nya mungkur lima estet iya nya Estet Saribas, Estet Rimbas, Estet Saratok, Estet Roban Selatan enggau Estet Roban Utara.

Berebak enggau nya, iya ngingatka pengempu tanah ngambika enda nyual tanah ke udah diberi pala tanah dikena nentuka pemerat timpuh panjai ditanka.

Ngelansa pasal pengerami genap taun ke-50 SALCRA, iya madahka nya siti pelasar beguna amat dikena mandangka penyulut enggau pemeri ejensi dalam pemansang menua pesisir kenyau ari lima dekad ke udah. — RBI

SARIKEI, 26 Mac – Raban polis ke dulu suba ke udah pinchin dilalau ngerejista diri nyadi kaban Gerempung Ex-Polis Malaysia (PBPM) ngambika ulih ngasaika bemacham pemaik sereta ngenegapka pengelantang pendiau komuniti pinchin.

Sekretari PBPM Pampang Sarikei, SM (B) George Tigang madah, kerejasama enggau sukung tegap ari kaban beguna amat dikena nentuka gerempung terus chakah ngetanka hak enggau guna kaban.

Iya madah munyi nya lebuh ngenang pasal penyereta 10 iku kaban PBPM Pampang Sarikei dalam gempuru beserimbai enggau Hari Polis Ke-219 ke diatur ba Padang Kawad Indu Opis Polis Pelilih (IPD) Sarikei, kemari.

Nitih ku iya, gempuru nya ukai semina dikena ngingatka pengerami ninting taun ti labuh kena 25 March, tang mega nyadika pelasar dikena ngerapitka kaul entara pemesai, kaban, mensia mayuh enggau raban pinchin polis.

“Nengah awak tu mega kami ngerikodka pengaga ati enggau terima kasih kami ngagai polis IPD Sarikei ke udah ngagauka kami ngagai gempuru tu,” ku iya madah ngagai media.

Dalam pemansang ke sama, iya madahka PBPM Pampang Sarikei deka ngatur Aum Besai Ninting Taun 2026 kena 11 April, berengkah ari pukul 8 pagi ba sebuah hotel di Jalai Masjid Lama, Sarikei.

“Berindik ari pekara tu, kitai ngarapka semua kaban PBPM enggau raban pinchin polis ti bedau ngerejista diri ulih datai bebala mayuh dikena ngerichahka agi aum tu,” ku iya nambah.

Sama bisi datai Chairman PBPM Pampang Sarikei Mohd Ibrahim Abdullah, Chairman Tetap Abang Ibrahim Abang Kipni, Sapit Chairman Tetap Sapian Senuani, Tukang Wang Lee Ah Khiun enggau sekeda kaban ke bukai. – RBI