KUCHING, 27 Mac — Pengerami nyerahka set drum jenama Pearl ngagai Ujar Jalimin, ti ngarika AWC Sebako udah diatur dikena nembuka kereban muzik Gerija ungkup aktiviti Puji enggau Sembah.

Dalam penerang penuh iya, Kaban Kunsil Nengeri (ADUN) Opar, YB Billy Sujang, madahka dua minggu ke udah iya nyuaka dua unit gitar elektrik dikena nganti perengka elekterik Puji enggau Sembah ti sebedau tu udah rusak ketegal Gerija kena ampuh bah.

“Pengerami sehari tu mega bisi nyerahka set drum jenama Pearl ngagai Menyadi Ujar Jalimin ti ngarika AWC Sebako dikena nembuka perengka muzik Gerija ke mulia Nama Tuhan ungkup Puji enggau Sembah.

“Arapka pemeri kereban muzik tu ulih nyadika pengeransing baru ngagai semua bala umat ngambika terus datai ngagai mua Tuhan”

“Awakka Tuhan merekat semua kitai dalam nama utai ti dikereja kitai ninting hari. Kitai diberekat ngambika merekat.” ku Billy.

Pengawa tu diatur nyadi sebagi ari pengawa ADU. Opar ti seruran dipejalaika dikena nyukung aktiviti rohani enggau pemansang komuniti gerija, kelebih agi pengudah beberapa perengka muzik rusak ketegal ampuh bah sebedau tu. — RBI

SIBU, 27 Mac — Briged Kesembilan Infantri Malaysia (9 Bgd) ngempung raban soldadu ari Batalion Keenam Rejimen Sempadan (6 RS) dikena mantu Opis Bomba enggau Penyah Penusah Malaysia enggau Angkatan Pertahanan Awam Malaysia dalam operasyen ngerara api ti nganguska madang babas di Sibu.

Nitihka penerang ba laman Facebook rasmi Briged Kesembilan Infantri Malaysia, pengawa ngaul Trup Soldadu Darat mega ditambah enggau sekeda Opis enggau ejensi ngelingi dikena ngenyampatka pengawa nagang sereta nagang api ari nyerarai.

“Operasyen bersepadu tu beguna amat dikena nentuka pengelikun komuniti di Sibu,” ku penerang nya.

Penerang nya nambah, pengawa ngaul 6 RS nyata ngayanka tikas penyikap Soldadu Darat Malaysia bejalaika tanggungpengawa mantu piak bekuasa mensia mayuh.

Operasyen nya ngayanka komitmen ti seruran dipejalaika mayuh bengkah ejensi dalam nentuka pengelikun mensia mayuh seruran dijaga, kelebih agi dalam napi penusah angus tebuka ti bisi potensi ngeruga pengelantang pendiau peranak menua nya. — RBI

Sumber, photo — Briged Kesembilan Infantri Malaysia

SARATOK, 27 Mac — Rayat diperansang nganggap tanah nyadi aset strategik timpuh panjai ti ulih mansutka penatai pemisi sereta nentuka penegap ekonomi ruang bilik, lalu ari nya ulih ngenegapka penyukup pemakai nengeri tu.

Menteri Industri Pemakai, Komoditi enggau Pemansang Wilayah Sarawak, Dato Sri Dr Stephen Rundi Utom madahka, pengawa ngempu tanah ukai semina hak reta aja, tang patut dikena enggau manah nyadi pun ekonomi ti produktif.

Iya ti mega nyadi Chairman Lembaga Penyatuan dan Pemulihan Tanah Sarawak (SALCRA) madahka, ba gaya dunya diatu ti betapi enggau mayuh pemar sereta enda meruan, tanah nyadi aset beguna ke ulih meri penguntung timpuh panjai ngagai pengempu tanah.

“Pengawa ngempu tanah ukai semina hak, tang nya nyadi aset strategik ti ulih nentuka penegap ekonomi ruang bilik sereta nyukung agenda penyukup pemakai nengeri, kelebih agi dalam kitai betapi enggau pemar dunya ti majak enda meruan.

“Rayat anang irauka tanah lenyau, tang patut landik ngurus sereta ngena manah tanah nya awak ke ulih nyadi pun penatai ekonomi ti produktif,” ku iya, bepelasarka ripot Unit Komunikasi Awam Sarawak (UKAS) kena Hari Lima.

Dr Rundi madahka pekara nya ba pengerami nyuaka Surat Pala Tanah Seksyen 18 Kanun Tanah Negeri (KTN) ke diatur ba Dewan Serbaguna Ladang Kelapa Sawit Roban Selatan, SALCRA, Saratok, kena Hari Empat.

Ba pengerami nya bisi 280 iku penerima ari 105 buah rumah panjai nerima Surat Pala Tanah ti mungkur 373 iti lot enggau pemesai 626 hektar.

Nitih ke iya, SALCRA udah mujur nyuaka kurang lebih 96 peratus tanah nya ngagai pengempu asal, lalu ke bukai nya agi dalam proses diputarka.

Dr Rundi nyemetak madahka chara betanam betupi moden bekelompok patut ditegapka agi enggau ngemeratka kualiti asil, kelimpah ari ngulihka servis lalau teknikal dikena nambahka produktiviti.

Berebak enggau nya, iya nerangka dalam dunya ti betapi enggau mayuh macham pemar enggau penyarut, pengawa ngempu tanah meri pengelebih ngagai rayat ba pengawa betanamka pun penatai pemakai diri empu, lalu enggau nya deka ulih ngurangka ari bepanggai ngagai pemakai ari luar.

Kelimpah ari nya, iya mega madahka perintah udah ngelala bagi kurang lebih 14,000 hektar tanah alai bumai, kelimpah ari nyediaka infrastruktur enggau mekanisma dikena nyukung pemansang sektor betanam betupi.

Ba pengerami nya ti digulu kurang lebih 500 iku rayat, bisi diatur pengawa keterubah ngelanchar logo genap 50 taun SALCRA ditumbuhka beserimbai enggau Pengerami Jubli Emas agensi nya, kelai penyulut lima dekad dalam pemansang tanah menua pesisir di Sarawak.

Pengerami nya mega mandangka komitmen Perintah Sarawak ba pengawa ngenegapka pengempu tanah sereta nyungkakka pemansang ekonomi menua pesisir ngena chara inklusif enggau meruan.

Sama bisi datai ngagai pengerami nya Sapit Menteri Industri Pemakai, Komoditi enggau Pemansang Wilayah Sarawak, Datuk Martin Ben; Penyanding Penemu ba Opis Premier Sarawak (Industri Pemakai, Komoditi enggau Pemansang Wilayah Sarawak), Tan Sri William Mawan Ikom; Kaban Parlimen Betong, Dato Dr Richard Rapu; Senator Dewan Negara, Pele Peter Tinggom; Kaban Kunsil Nengeri (ADUN) Kabong, Dato Mohd Chee Kadir; ADUN Krian, Friday Belik; ADUN Kalaka, Mohamad Duri enggau Menijar Besai SALCRA, Dato Joseph Blandoi.

Sumber Berita — Utusan Borneo

BETONG, 27 Mac — Pengawa ngenegapka hak ngempu tanah rayat majak ditegapka nengah Pengerami Nyerahka Pala Tanah ari baruh Seksyen 18 Kanun Tanah Nasional (KTN) ungkup kandang pemansang Kaunsil Penyerakup enggau Pengintu Tanah Sarawak (SALCRA) ba Dewan Serbaguna Ladang Kelapa Sawit Roban Selatan, ditu kemari.

Pengerami nya dipenyadi Menteri Industri Pemakai, Komoditi enggau Pemansang Kandang Menua Sarawak YB Dato Sri Dr. Stephen Rundi Utom, ke mega Chairman SALCRA.

Kaban Parlimen Betong, YB Dato Dr. Richard Rapu madah, pengawa nyerahka surat pala tanah tu siti singkang ke berat dalam nentuka hak ngempu tanah rayat terus dijamin, kelebih agi ungkup penyereta projek pemansang tanah ari baruh SALCRA.

Nitihku iya, inisiatif nya ukai semina meri penetap undang-undang, tang mega muka peluang ngagai pemansang ekonomi ti meruan agi ngagai bala penerima.

“Pengawa ti enda ngetu dipejalaika SALCRA begulai enggau Opis Tanah enggau Survei Sarawak chukup dikerinduka dalam ngenegapka pengelantang pendiau rayat sereta meransang pemansang menua pesisir,” ku iya.

Iya mega ngarapka pengawa ngempu tanah ti sah tu deka nyadi pemangkin ngagai bala penerima ngambika terus maju sereta mujur ngangkatka tikas pengidup sida. — RBI

BETONG, 27 Mac — Penemuai gawa, ngentaska penembu Projek Opis Residen Bagi Menua Betong udah diatur dikena beratika asil pengawa bejalaika kereja ngangkatmanah infrastruktur opis, nyengkaum pengawa masang skrin LED enggau sistem pemesai nyawa (PA) ba bilik aum, ditu kemari.

Penemuai nya mungkur pengari Palan Servis Rayat Parlimen Betong P.204 begulai enggau Unit Penyelarasan Pelaksanaan, Jabatan Perdana Menteri (ICU JPM) enggau SDO Sarawak enggau tuju ngentaska penembu sereta nyerahka projek ari baruh inisiatif Projek Mesra Rakyat (PMR).

Projek tu dipejalaika nyadi pengawa ti seruran dipejalaika dikena ngenegapka perengka guna opis perintah ngambika lebih kondusif sereta lantang, kelimpah ari nambahka penyikar pengawa meri servis ngagai rayat.

Kaban Parlimen Betong, Dato Dr Richard Rapu, dalam penerang iya madah, inisiatif nya mandangka komitmen perintah ti terus dalam nentuka perengka guna pentadbiran seruran ba tikas ke pemadu manah ungkup pemaik rayat menua nya. — RBI

Sumber, photo — Dr Richard Rapu

KUCHING, 27 Mac – Siku nembiak lelaki beumur 15 taun dikeirauka ditagup baya ba sebengkah penusah ke nyadi ba Sungai Sarawak semak Rantau Panjang, Batu Kawa, ditu, lemai tu tadi.

Nitihka ripot ari Opis Bomba enggau Penyah Penusah Malaysia (JBPM), sida nerima kangau ngenyit bekaul enggau penusah nya urung pukul 2.41 lemai sebedau seraban bomba ari Balai Bomba enggau Penyah Penusah (BBP) Batu Lintang dianjung ngagai endur nya.

Komander Operasyen, PBK I Chaplin Wan madah, raban nya datai ba endur nya urung pukul 2.55 lemai lalu terus bejalaika operasyen ngiga enggau nyelamat (SAR).

“Penerang keterubah ari saksi madahka tudah dipelabaka benung mandi ba sungai begulai enggau indai iya sebedau diripotka lenyau lalu dikeirauka ditagup baya,” ku iya ba sebengkah penerang.

Ku iya, operasyen SAR diatu benung dipejalaika ngelingi endur penusah nya nyadi dikena ngiga nembiak nya.

Sepenyampau lapan iku raban bomba ngaul diri dalam operasyen nya enggau bantu sebuah entukar FRT.

Naka ke diatu, nadai sebarang pengerembai berita baru diripot lalu operasyen nya agi dipejalai.

Salin ari Utusan Sarawak

SIBU, 27 Mac — Sebuah kerita pacuan empat roda angus lengis ba penusah angus di Jalai Kong Yit Khim nuju ngagai Farley, ditu kemari.

Nitihka ripot, tim ari Balai Bomba enggau Penyah Penusah (BBP) Sibu Sentral berumban ngesah ke palan penusah ke nyadi ke bepalan urung 8 kilometer ari balai nya pengudah nerima kangau ngenyit.

Komander Operasyen, PBK I Terrance Anak Jimbun madah, lebuh datai ba endur nya, sebuah kerita Mitsubishi Triton ditemu benung angus pengudah dipelabaka eksiden ngelantak pun kayu.

Penusah angus nya ngujungka kerita nya abis angus enggau pengerusak dipelabaka 100 peratus.

Raban bomba udah nya bejalaika operasyen madamka api ngena aliran tunggal ai ari pam injin nyentukka api padam abis.

Operasyen nya diketuka pengudah situasyen disahka likun lalu tim nya pulai baru ngagai stesyen nya. — RBI

Sumber, photo — BBP Sibujaya

BAU, 27 Mac – Kaul ke rat entara raban polis enggau komuniti menua nyadi pekara beguna dalam atur ngemuntanka pengawa salah guna dadah di Pelilih Bau.

Sapit Menteri Perengka Pengangkut (Sungai enggau Tasik) Sarawak, Datuk Henry Harry Jinep, madahka kerejasama ke manah entara Polis DiRaja Malaysia (PDRM) enggau Ketuai Komuniti enggau Ketuai Raban Bansa (KMKK), sereta peranak menua nya udah ngemuntangka pekara ke bekaul enggau pengelikun sereta ngenyampatka atur mutarka kes dadah.

“Suba mensia mayuh takutka polis, diatu kitai nganggap sida bakih.Kaul tu ngemendarka isu diputarka enggau jampat agi sereta komunikasyen lanchar agi nyema bisi penanggul nyadi,” ku iya nerang.

Henry nyemetak madahka penanggul salah guna dadah ukai semina nyadi ba kandang mengeri aja, tang nyentukka udah ngerekai ngagai renggat genturung pendiau di menua pesisir.

“Pengawa salah guna dadah tu nyadi ba dini-dini endur nyengkaum di papan pengentap pendiau di menua pesisir.

“Nyauka ninting minggu, indah nyau deka ninting hari, bisi kes ditangkap bekaul dadah,” ku iya pengudah ngulu Pengerami Ngingatka Hari Polis Ke-219 IPD Bau di Gerija St.Henry, Kampung Apar, Singai, sehari tu tadi.

Ku iya nambah, pengawa ngemuntanka aktiviti dadah begunaka kerejasama ti seruran dipejalaika piak bekuasa enggau komuniti.

“Pengawa tu ukai muntang, tang pengurang kes tu dianggap siti pemujur ke positif,” ku iya.

Ku Henry nambah, penanggul salah guna dadah diatu udah nadai ngira umur, begunaka perati semua piak ngambika sama-sama nagang penanggul tu. – RBI

KUCHING, 27 Mac – Sekretari Besai Gempung Parti Sarawak (GPS) ke mega Menteri Kereja Raya, Dato Sri Alexander Nanta Linggi madah, ari penyampau 4,666 iku penyereta Konvensyen GPS 2026, Parti Pesaka Bumiputera Bersatu (PBB) ngerikod penyereta pemadu tinggi iya nya 1,466 iku.

Pia mega lalu ditangkanka penyereta ari Parti Demokratif Progresif (PDP) enggau 1,050 iku enggau Parti Rakyat Bersatu Sarawak (SUPP) 1,020 iku penyereta.

Nitih ku iya, naka ke diatu penyampau penyereta konvensyen nya bisi 4,666 iku, ti ngaul penyereta ari semua parti komponen GPS.

“Pengawa nyendiaka diri napi konvensyen nya diatu benung dipejalai nengah kerjasama rat entara parti komponen dikena nentuka pejalai lanchar sereta nyapai juluk ke udah ditetapka,” ku Nanta.

Ku iya, pekara nya udah dikerandau ba Aum Ketiga Komiti Pengatur Konvensyen ti diatur ba Indu Opis PBB di Jalai Bako, kemari.

“Randau ngemeratka kerjasama rat enggau penyikap ti penuh dikena nentuka pengawa ngatur Konvensyen GPS 2026 bejalai enggau lanchar, teratur sereta nyapai juluk ti udah ditetapka,” ku iya nengah Facebook sehari tu tadi.

Ku Nanta, aum nya bechairmanka Sapit Premier Sarawak ke mega Sapit Presiden PBB, Datuk Amar Douglas Uggah Embas.

“Enggau semengat ‘Sarawak First’, kami ngarapka konvensyen tu ti enda diatur kenyau ari beberapa taun ke udah ulih ngempuruka beribu iku kaban dalam gaya ti lantang, dikena ngemujurka mimpi ngasuh Sarawak terus maju sereta lantang,” ku iya.

Konvensyen GPS 2026 diperambu deka diatur kena 19 April tu ba Palan Konvensyen Borneo, Kuching.

Sebedau tu bisi diripotka konvensyen keterubah kenyau penumbuh GPS ba taun 2019 deka ngemeratka pemujur Strategi Pemansang Pengudah COVID-19 (PCDS) 2030, enggau penyereta pengari ari semua empat parti komponen, tang penyampau pengari bedau ditetapka. – RBI

SIBU, 27 Mac — Penusah angus madang babas ke nyadi besemak ba Jalai Besai Kemuyang, ditu, lemai kemari mujur dijaga berindik ari pengawa jampat raban penyelamat.

Angkatan Pertahanan Awam Malaysia (APM) Pelilih Sibu nengah penerang madahka sida udah bejalaika pengawa matau endur penusah nyadi pengudah nerima penerang ari mensia mayuh.

Nitihka penerang, penusah angus ti diripotka nyadi urung pukul 5.30 lemai nya mungkur madang babas enggau rumput ti rangkai.

Operasyen madamka api nya dipejalaika Opis Bomba enggau Penyah Penusah Malaysia (JBPM) enggau pengering 16 iku, dibantu tiga iku kaban APM ke sama bisi ba endur nya meri sukung operasyen.

“Raban bomba bejalaika pengawa enggau lengkas dikena nagang api ari nyerarai ngagai kandang endur ke besemak.

“Asil operasyen tetemuka api mujur dirara lalu gaya ba endur nya diatu udah likun sereta ulih dijaga,” ku penerang nya.

Operasyen nya mega ngaul pengawa ngena sebuah Light Rescue Vehicle (LRV) APM, dua buah entukar Scania P310 enggau sebuah unit Servis Penyelamat Perubat Ngenyit (EMRS) enggi JBPM.

Berindik enggau nya, APM Sibu nesau mensia mayuh ngambika seruran bejejaga sereta sensitif ngagai sebarang penusah ngenyit ke nyadi, kelimpah ari nya lengkas nyadung penerang ngagai opis bekuasa dikena nentuka atur jampat ulih diambi. — RBI

Sumber, photo — APM SIBU