KUCHING, 15 April – Peminta agih belanja tambah dikena ngenegapka pengawa nagang pengelekai igi penyakit rabies di Sarawak deka dibai ngambika diperunding perintah, nyengkaum ba pengawa mantaika bajet bulan November tu ila.
Menteri Industri Pemakai, Komoditi enggau Pemansang Kandang Menua, Dato Seri Dr Stephen Rundi Utom, madahka pengawa nya beguna amat dikena nentuka semua inisiatif nagang penyakit rabies ulih dipejalaika enggau ngasi sereta nembam agi.
“Kitai deka beratika guna tu enggau lenak sereta berandau enggau Perintah Sarawak dikena nentuka pengawa nagang rabies ulih ditegapka agi,” ku iya.
Iya madah munyi nya pengudah ngabas proses meri Vaksin Rabies Oral (ORV) ngagai ukui lelang ngelingi Dewan Serbaguna Taman Malihah, Jalai Matang, ditu sehari tu.
Nitihku iya, Sarawak majak chakah agi bejalaika pengawa dalam bidang nya taja pan betapi enggau pengurang pengereja pengawa, kelebih agi dalam operasyen nangkap ukui enggau mayau ke nadai orang ngempu sereta bejalaika vaksinasyen komprehensif.
Ku iya nerang, Opis Servis Veterinar Sarawak (DVS) diatu semina bisi 84 iku staf enti dibandingka enggau penyampau semua peminta 566 iku dikena ngerembaika operasyen di serata nengeri.
“Enggau penegap ke bisi diatu, pengawa bejalaika operasyen deka diteruska berenggat, kelebih agi ba kandang endur berisiko tinggi.
“Kitai deka terus ngangkatka pengawa ke udah bisi nyengkaum operasyen nangkap ukui lelang enggau vaksinasyen, taja pan napi sekeda penanggul,” ku iya.
Berebak enggau nya, iya nyemetak madahka chara nagang deka terus dikemerat dikena nentuka pengelekai igi penyakit rabies ulih dijaga tumu.
Ku iya, kerejasama mayuh bengkah piak nyengkaum ejensi perintah, Opis Perintah Lokal (PBT) enggau gerempung ukai dikuasa perintah (NGO) beguna amat dalam ngemujurka pengawa nya.
“Enggau sukung ari semua piak, kami andal amat pengawa tu ulih dikemanahka agi ari setiap maya,” ku iya nambah. -RBI
