PAKAN, 24 April – Pengeransing ngerapitka kaul raban bekuasa enggau komuniti ditegapka agi nengah Program Kepolisan Komuniti “Polis enggau Nembiak Begulai Nagang Penyalah” ti udah diatur enggau ba Sekula Primari Ulu Pedanum, Pakan, kena 23 April tu tadi.
Program ke diatur Indu Opis Polis Pelilih (IPD) Julau ngaul kerejasama mayuh bengkah ejensi nyengkaum Opis Pelajar Pelilih (PPD) Julau, Klinik Pengerai Pakan enggau Opis Bomba enggau Penyah Penusah Bintangor, kelimpah ari penyereta pengari ejensi ngelingi Julau enggau Pakan.
Pengerami nya bela digulu Ketuai Polis Pelilih Julau, DSP Alif Haiqal Ramesh Abdullah, Kepala Pengajar SK Ulu Pedanum, Donny anak Jangan sereta pengari opis enggau ejensi ke bekaul.
Program dipunka enggau jaku pengelalu sebedau ditampung enggau licha ari raban Polis DiRaja Malaysia ti negu isu beduan, jenayah siber enggau pengelikun diri.
Kelimpah ari nya, licha pengerai ari Klinik Pengerai Pakan enggau demonstrasyen ngerara api ari Opis Bomba enggau Penyah Penusah Bintangor mega matak ati bala penyereta.
Bemacham aktiviti bisi diatur nyengkaum lumba enggau main, pemandang aset enggau kereban PDRM, pemandang opis bomba enggau sesi “berandau enggau kami”, lalu enggau nya meri awak ngagai nembiak enggau komuniti betanya terus enggau ejensi ke bekaul.
Lebih 120 iku penyereta ti mungkur nembiak, pengajar, apai indai enggau komuniti lokal nyereta program tu, ti ngembuan tuju deka meri penyedar pasal sukut nagang pengawa salah, pengelikun diri enggau pengerai.
Pengerami nya tembu enggau pengawa nyuaka tepa pengingat, belagu lagu “Fly Kenyalang Fly” sereta sesi begambar kenang. – RBI
LIMBANG, 24 April — Perintah Sarawak nagit penambah penyukup beras ngagai 60 peratus manggai ba taun 2030 nengah pengawa bejalaika projek pemansang padi bedandang besai nyengkaum ba kandang menua Limbang Valley.
Sapit Menteri Industri Pemakai, Komoditi enggau Pemansang Kandang Menua (Industri Pemakai), Datuk Dr.Haji Abdul Rahman Ismail, madahka diatu Sarawak semina ngerikod tikas ngatika diri urung 21 peratus enggau pemansut 51,000 tan metrik.
“Pengawa tu beguna amat berindik ari Sarawak agi bepanggai ba import beras lebih 194,000 tan metrik ti beungkus lebih RM585 juta,” ku iya lebuh bejadika pengerami Sarawak Agrofest Limbang 2026 di kandang Lot 777, mengeri Limbang, sehari tu tadi.
Nitihku iya, projek Limbang Valley mungkur pengawa ngemansangka lebih 3,000 hektar tanah ti mungkur tanah perintah sereta mega tanah Hak Adat Bansa Asal (NCR).
Iya nyemetak madahka pengawa ngemansangka tanah NCR deka dipejalaika enggau chara inklusif sereta beserakup, enggau kaul pengempu tanah nyadi bakih strategik dalam rentayan pemansut.
“Chara tu ukai semina deka nambahka asil padi, tang mega nentuka pengempu tanah NCR mega ngasaika penguntung ekonomi nengah pengawa chakah ngambi bagi dalam projek betanam betupi moden,” ku iya nerang.
Renggat keterubah pemansang mungkur pemesai 1,175 hektar di Limbang enggau Lawas nyengkaum Kampung Pandam enggau Kampung Sinampuan Laut, Sundar.
Projek tu deka ngena teknologi moden enggau bansa benih padi ti meri asil tinggi dikena nambahka produktiviti enggau daya bepekit sektor padi nengeri tu.
Sama bisi datai Kaban Kunsil Nengeri (ADUN) Batu Danau Dato Paulus Palu Gumbang, Sapit Direktor Betanam Betupi Sarawak Radzhiah Bt Jack, Menija Besai Kaunsil Pengempung enggau Pengintu Tanah Sarawak (SALCRA) Datu Joseph Blandoi, Direktor Opis veteriner Sarawak, Datu Dr Adrian Susin Ambud sereta temuai dipebasa bukai.— RBI
MIRI, 24 April – Siku lelaki ngaga ulah kasar lebuh iya ngemba deka menyati menyadi biak iya empu ngena duku ba sebengkah penusah ke nyadi di Ulu Suai, Niah, kena 22 April tu tadi.
Ketuai Polis Pelilih Miri, ACP Mohd Farhan Lee Abdullah madahka, Bagi Tasat Jenayah (BSJ) Indu Opis Polis Pelilih (IPD) Miri nerima ripot pukul 1.44 lemai ari tudah, siku indu peranak menua luar beumur 35 taun.
Nitihka penerang iya, indu nya madahka diri diemba siku saspek lelaki peranak menua luar beumur 37 taun ke mega menyadi tuai iya empu.
Penusah nya diripotka nyadi ba rumah iya di ladang ba Ulu Suai, Niah.
Berindik ari penerang, seraban pemesai enggau kaban BSJ IPD Miri ngepunka pengawa ngerap ngagai sebuah langkau kebun besemak enggau ladang sawit di Suai.
Saspek mujur ditan lalu polis mega ngerampas sebilah duku enggau senapang patah digaga diri empu begulai enggau enam igi seterum.
Diatu saspek ditan riman empat hari nyentuk 27 April 2026. Peresa ai kemi tetemuka saspek positif dadah.
Kes tu dipansik nitihka Seksyen 506 Kanun Keseksaan ngenakutka enggau Seksyen 8(a) Akta Senjata 1960.
Enti dikenuku salah, saspek tau diukum jil nyentuk tujuh taun tauka ukum mata duit tauka kededua ukum nya.
Mohd Farhan nyemetak madahka Polis DiRaja Malaysia beratka tetiap ripot ke diterima lalu minta mensia mayuh ke bisi penerang bekaul enggau orang ke ngempu senapang patah digaga diri empu, nya datai ke mua mantu dalam pansik nengah chara ngaga kaul enggau pemesai pemansik kes, Inspektor Mohd Rayhan bin Albert tauka ngelawa balai polis ke besemak. -RBI
LIMBANG, April 24 — Perintah Sarawak majak ngenegapka pengawa ngubah sektor betanam betupi nyadi injin besai penumbuh ekonomi nengeri, enggau tagit nempa Sarawak nyadi pengeksport beresi pemakai manggai ba taun 2030.
Sapit Menteri Industri Pemakai, Komoditi enggau Pemansang Kandang Menua (Industri Pemakai), Datuk Dr.Haji Abdul Rahman Ismail, madahka sektor betanam betupi meri RM15.1 bilion ngagai GDP Sarawak ba taun 2024 sereta nyendiaka lebih 247,000 peluang kereja.
“Perintah Sarawak bebendar ngubah sektor betanam betupi ngambika lebih kompetitif sereta bepelasarka teknologi moden setipak enggau PCDS 2030,” ku iya.
Iya madah munyi nya lebuh bejadika Pengerami Sarawak Agrofest Limbang 2026 ba Kompaun Lot 777, Bandar Limbang, sehari tu tadi.
Nitihku iya, pengawa ngena teknologi baka betanam betupi pintar, analisis data enggau pansik deka terus ditegapka dikena nambahka produktiviti enggau pemanah sektor nya.
Sarawak Agrofest Limbang 2026 deka diatur pengelama empat hari berengkah ari 23 ngagai 26 April ti nyadi sebagi ari pejalai raun Agrofest sebedau atur pengawa renggat nengeri di Bintulu.
Sama bisi datai Kaban Kunsil Nengeri (ADUN) Batu Danau Dato Paulus Palu Gumbang, Sapit Direktor Betanam Betupi Sarawak Radzhiah Bt Jack, Menija Besai Kaunsil Pengempung enggau Pengintu Tanah Sarawak (SALCRA) Datu Joseph Blandoi, Direktor Opis veteriner Sarawak, Datu Dr Adrian Susin Ambud sereta temuai dipebasa bukai. — RBI
LIMBANG, 24 April — Perintah Sarawak chakah agi bejalaika pengawa industrialisasi agro pemakai nengah pengawa ngemansangka rentayan bekal ke penuh nyengkaum numbuhka Palan Ngumpul, Memproses enggau Mungkus (CPPC).
Sapit Menteri Industri Pemakai, Komoditi enggau Pemansang Kandang Menua (Industri Pemakai), Datuk Dr.Haji Abdul Rahman Ismail, madahka CPPC Limbang dipelaba deka berengkah bejalaika operasyen taun tu, lalu CPPC Lawas dipelaba berengkah bejalaika operasyen dalam taun 2027.
“Perengka guna tu deka ngenegapka rentayan bekal betanam betupi ari kebun ngagai makit kelimpah nambahka rega tambah asil betanam betupi menua tu,” ku iya.
Nitih ku iya, CPPC deka ngemeratka pengawa memproses utai tanam ti berega tinggi baka chabi, nanas, pisang, jagung manis enggau nangka madu.
Kelimpah ari nya, pemansang kandang endur betanam betupi moden baka Agropark, Precision Farming Park enggau Taman Pengeluar Pemakai Tetap (TKPM) mega dikerembaika dikena matak penyereta raban nembiak enggau orang dagang.
Berebak enggau nya, perintah mega meransang pengawa ngena teknologi baka fertigasyen enggau hidroponik sereta bejalaika inisiatif uras ngagai pengaya dikena nyukung agenda ekonomi gadung.
“Chara tu nentuka sektor betanam betupi ukai semina produktif, tang mega meruan sereta tan,” ku iya.
Sama bisi datai Kaban Kunsil Nengeri (ADUN) Batu Danau Dato Paulus Palu Gumbang, Sapit Direktor Betanam Betupi Sarawak Radzhiah Bt Jack, Menija Besai Kaunsil Pengempung enggau Pengintu Tanah Sarawak (SALCRA) Datu Joseph Blandoi sereta temuai dipebasa bukai. – RBI
SRI AMAN, 24 April — Unit Latih Kejururawatan Sepital Sri Aman udah ngatur Bengkel Audit Kejururawatan Kebangsaan (NNA) enggau Audit Kejururawatan Bilik Bedah Kebangsaan (NORNA)Bil. 1/2026 kena 22 ngagai 23 April tu tadi ba Bilik Aum sepital nya.
Program tu ngempuruka 21 iku indu misi ari mayuh bengkah disiplin, enggau iring 12 fasilitator ti mungkur Penyelia Jururawat enggau Penyelia Jururawat Sepital Sri Aman.
Nitihka penerang ari Sepital Sri Aman, woksyop tu diatur nyadi singkang dikena ngenegapka agi pengawa nambahka penyedar ngagai jururawat ke udah dilatih pasal pemesai guna nitihka prosedur jururawat klinikal.
“Bengkel tu ngembuan tuju deka bebendar agi nambahka penyedar ngagai jururawat ke udah dilatih pasal pemesai guna nitihka prosedur kejururawatan klinikal kelimpah ari ngenegapka pengawa kualiti kejururawatan ba staf klinikal,” ku penerang nya.
Penerang nya nambah, inisiatif nya beguna amat dalam nentuka genap iku pesakit nerima servis enggau perubat ti likun sereta bekualiti sepemanjai timpuh ngintu.
“Inisiatif tu beguna amat dalam nentuka genap iku pesakit nerima servis enggau perubat ti likun sereta bekualiti sepemanjai timpuh ngintu,” ku penerang nya.
Pengawa ngatur woksyop tu ngayanka komitmen Sepital Sri Aman ti seruran ngenegapka standard profesionalisme kejururawatan sereta nentuka sukut pengelikun pesakit seruran dikemeratka. — RBI
BETONG, 24 April – Sebuah begunan opis RISDA ba Stesyen Betong di Pasar Medan Betong angus tumu pagi tadi ti ngujungka urung 45 peratus struktur begunan nya rusak.
Jentera ari Balai Bomba enggau Penyah Penusah Betong datai ba endur nya dalam timpuh seminit aja, mandangka pengawa raban penyelamat ti jampat meri timbal.
Nitihka ripot keterubah, penusah angus nya ngaul belakang ringkat satu begunan nya sebedau ngerekai ngagai bilik fail. Anggar pemesai begunan nya 22 kaki x 50 kaki.
Tim operasyen bejalaika pengawa ngena dua tali hos bantu, iya nya nengah jalai nyeliahka api enggau tangga begunan dikena nagang sereta madamka api.
Api mujur dirara dalam timpuh lima minit pengudah operasyen berengkah, sebedau dipadamka abis.
Operasyen nya betuaika Ketuai Stesyen, PPgB Muhammad Badrulamin Mohd Fodzi begulai enggau lapan iku kaban ngena jentera Scania FRT.
Nadai penusah bakal tauka bebadi nyawa diripotka nyadi ba penusah tu.
Sama bela mantu iya nya Raban Penyaga Orang Periman Malaysia (APM) Betong enggau empat iku kaban.
Operasyen nya tembu enggau penuh pukul 5.51 pagi sebedau semua tim pulai ngagai stesyen enggau likun. -RBI
SIBU, 24 April – Tiga iku lelaki beumur entara 19 ngagai 40 taun ditan pengudah ditemu positif dadah dalam Operasyen Sekat Jalai Begulai (SJR) Lumur 5 taun 2026 ti dipejalaika Ejensi Anti Dadah Nasional (AADK) Pelilih Sibu.
Operasyen nya mega ngaul kerejasama Opis Perengka Pengangkut Jalai (JPJ) enggau Opis Imigresyen Malaysia (JIM), enggau penegap 34 iku pemesai enggau raban ari ketiga ejensi nya.
Dalam operasyen nya, sepenyampau 30 iku individu diperesa tisih ai kemi keterubah. Asil peresa nya tetemuka tiga iku ari sida nya positif dadah.
Semua individu ke bisi kaul enggau kes nya ditan nengah Seksyen 3(1) Akta Penagih enggau Penyalah Guna Dadah sereta Bahan 1983 (APPDB 1983) ngambika atur ke bukai dipejalaika.
Operasyen nya dipejalaika setipak enggau penegap Akta 283 ti ngemeratka chara berubat enggau mulaika ulah kelimpah ari penerit atur.
Nitih ku iya, batang fokus ejensi nya ukai semina ba pengawa ngetan aja, tang nentuka individu ke bisi kaul bisi akses ngagai program berubat enggau pengerai ke engkeman ungkup pengelantang komuniti.
Kerejasama strategik entara ejensi penerit adat tu mega ngembuan tuju deka ngenegapka pengelikun mensia mayuh enggau komprehensif ngelaban pengawa salah guna dadah ba kandang menua Sibu enggau Kapit.
AADK ngemeratka komitmen sida ti terus chakah agi bejalaika pengawa nyidi, seraya ngingatka mensia mayuh ngambi ngenyauhka diri ari dadah lalu anang nyadika nya gaya pengidup.
Langkah rapat nagang tumu tu setipak enggau aspirasyen nasional nuju juluk “Dadah Terkawal 2030”.
Sama bisi datai Ketuai Bagi Penerit Adat JPJ, Pampang Sibu, Mohd Ariffin Zaini enggau Ketuai Unit Penerit Adat JIM Pampang Sibu, Douglas Rundang.-RBISIBU, 24 April – Tiga iku lelaki beumur entara 19 ngagai 40 taun ditan pengudah ditemu positif dadah dalam Operasyen Sekat Jalai Begulai (SJR) Lumur 5 taun 2026 ti dipejalaika Ejensi Anti Dadah Nasional (AADK) Pelilih Sibu.
Operasyen nya mega ngaul kerejasama Opis Perengka Pengangkut Jalai (JPJ) enggau Opis Imigresyen Malaysia (JIM), enggau penegap 34 iku pemesai enggau raban ari ketiga ejensi nya.
Dalam operasyen nya, sepenyampau 30 iku individu diperesa tisih ai kemi keterubah. Asil peresa nya tetemuka tiga iku ari sida nya positif dadah.
Semua individu ke bisi kaul enggau kes nya ditan nengah Seksyen 3(1) Akta Penagih enggau Penyalah Guna Dadah sereta Bahan 1983 (APPDB 1983) ngambika atur ke bukai dipejalaika.
Operasyen nya dipejalaika setipak enggau penegap Akta 283 ti ngemeratka chara berubat enggau mulaika ulah kelimpah ari penerit atur.
Nitih ku iya, batang fokus ejensi nya ukai semina ba pengawa ngetan aja, tang nentuka individu ke bisi kaul bisi akses ngagai program berubat enggau pengerai ke engkeman ungkup pengelantang komuniti.
Kerejasama strategik entara ejensi penerit adat tu mega ngembuan tuju deka ngenegapka pengelikun mensia mayuh enggau komprehensif ngelaban pengawa salah guna dadah ba kandang menua Sibu enggau Kapit.
AADK ngemeratka komitmen sida ti terus chakah agi bejalaika pengawa nyidi, seraya ngingatka mensia mayuh ngambi ngenyauhka diri ari dadah lalu anang nyadika nya gaya pengidup.
Langkah rapat nagang tumu tu setipak enggau aspirasyen nasional nuju juluk “Dadah Terkawal 2030”.
Sama bisi datai Ketuai Bagi Penerit Adat JPJ, Pampang Sibu, Mohd Ariffin Zaini enggau Ketuai Unit Penerit Adat JIM Pampang Sibu, Douglas Rundang.-RBI
KUCHING, 24 April — Pengawa nyendiaka diri kepenudi ungkup pengawa muka rasmi Kompleks UNIFOR diatu udah ba pelasar ke tegap lebuh latih penuh mujur diatur ba Kompleks UNIFOR.
Nitihka penerang rasmi ari UNIFOR, program belatih ke diatur ari pukul 10.00 pagi nyentuk pukul 5.00 lemai nya mungkur pengawa belatih ‘dry run’ muak ke pagi enggau latih penuh muak ke lemai, ti mungkur kerjasama ke silik ba tetiap komponen pengawa nya.
“Sehari tu nyadi singkang ke beguna nuju pengawa bejadi enggau rasmi Kompleks UNIFOR laban tim enggau raban ke bisi pemerat begempung bejalaika pengawa belatih penuh.
“Tetiap pekara udah dikerandauka enggau silik dikena nentuka pengawa nya lanchar sereta bisi reti,” ku penerang nya.
Sesi latih tu betuaika Dato Georgina Apphia Ngau enggau kaul UNIFOR, SUCT, pengari rumah sembiang enggau ejensi sukung baka Opis Kereja Raya Sarawak enggau Unit Protokol, Istiadat enggau Pengatur Acara Sarawak (UPPAN) sereta mega bakih media.
Kerejasama rat ti dipandangka semua piak mandangka komitmen tinggi dalam nentuka pengerami bejadi rasmi lanchar.
Sapit Premier Sarawak ke mega Menteri ke megai tanggungpengawa ba UNIFOR, Datuk Amar Douglas Uggah Embas mega bisi datai ngulu pengawa belatih nya kelai sukung tegap ngagai tim bejalaika pengawa nya.
Penatai ketuai jalai pengarap mega mantaika semengat penyerakup enggau pengelantang ti nyadi pugu penumbuh UNIFOR di nengeri tu.
“Enggau pengawa nyendiaka diri diatu nyau deka tembu, kami ngarapka pengerami rasmi bejadi ti deka nyadi kena Hari Minggu tu nyadi siti pemujur ti beguna dalam ngenegapka penyerakup enggau pengelikun di Sarawak,” ku penerang nya.
Pengerami tu dikearapka nyadi sebengkah agi kelai besejarah ti mandangka komitmen Perintah Sarawak terus ngenegapka penyerakup, pengelantang entara jalai pengarap enggau inklusif entara rayat.
Pengerami rasmi bejadi Kompleks UNIFOR diperambu deka dipenyadika Premier Sarawak, Datuk Patinggi Tan Sri (Dr) Abang Haji Abdul Rahman Zohari bin Tun Datuk Abang Haji Openg. -RBI
KUALA LUMPUR, 23 April– Pekit Pemacha Berita Online 2026 diatu dibuka ngagai mensia mayuh, kelebih agi ngagai sida ti deka mantaika penau diri dalam bidang mantaika berita enggau chara profesyenal sereta kreatif.
Pengawa ngatur pekit tu ngemeratka guna Jaku Iban Standard enggau betul, terang sereta berurun, lalu enggau nya nyukung pengawa ngenegapka jaku enggau budaya nengah pelasar digital moden.
Pekit tu dibuka ngagai tiga kategori iya nya nembiak sekula sekondari, IPTA/IPTS enggau mensia mayuh, enggau penyereta semina dikemendarka siku aja sereta siti video ungkup siku penyereta.
Penyerta dipinta nitihka atur ke udah ditetapka, nyengkaum ngena Jaku Iban Standard enggau betul, begari kemas sereta diperansang ngena pekayan asal, kelebih agi pekayan asal Iban dikena mandangka identiti budaya.
Kelimpah ari nya, setiap penyereta meseti ngisi surat deklarasyen sereta mayar chengkeram penyereta sebedau nyereta pekit.
Bala pengatur ngemeratka semua pemutus akim nya ke penudi, seraya sebarang pekara ke enda manah tauka isi ke enda patut ditagang enggau terit lalu deka ngujungka penyereta dikinsil tekala nya.
Ari sukut format, penyereta mesti mantaika berita dalam Bahasa Iban Standard enggau gaya mantaika berita ti setipak enggau tukuh pemacha berita nyata, nyengkaum aspek lengguk, sebut, gaya mua enggau pengangkun diri.
Teks berita tau dipilih penyereta empu, tang mesti nadai elemen negatif enggau sensitif.
Timpuh video ke ngambi bagi ditetapka entara dua ngagai lima minit, lalu penyereta dikemendar ngena skrip nyadika bantu enggau syarat, pengawa mantaika nya digaga enggau profesyenal.
Video mega ulih diedit enggau kreatif sebedau dianjung nengah link tauka kod QR ti disediaka.
Pekit tu dikearapka ulih nyadi pelasar ti beguna dalam ngadaka penau baru ti ukai semina landik mantaika berita, tang mega ulih ngangkatka tikas Jaku Iban ngagai tikas ti lebih besai sereta beprestij.
Haribulan penudi nganjung nama iya nya 30 Jun 2026 lalu sebarang penerang enggau pengawa ngerejista tau betanya ngagai Alyster 013-5749529 enggau Brennice 011-27535246.-RBI
KUCHING, 28 Mei – Sarawak enggau rasmi udah berengkah nyendiaka diri keterubah nyadi sebagi ari tuai rumah begulai ngatur Lumba enggau Main SEA 2027...
