LIMBANG, 24 April — Perintah Sarawak chakah agi bejalaika pengawa industrialisasi agro pemakai nengah pengawa ngemansangka rentayan bekal ke penuh nyengkaum numbuhka Palan Ngumpul, Memproses enggau Mungkus (CPPC).
Sapit Menteri Industri Pemakai, Komoditi enggau Pemansang Kandang Menua (Industri Pemakai), Datuk Dr.Haji Abdul Rahman Ismail, madahka CPPC Limbang dipelaba deka berengkah bejalaika operasyen taun tu, lalu CPPC Lawas dipelaba berengkah bejalaika operasyen dalam taun 2027.
“Perengka guna tu deka ngenegapka rentayan bekal betanam betupi ari kebun ngagai makit kelimpah nambahka rega tambah asil betanam betupi menua tu,” ku iya.
Nitih ku iya, CPPC deka ngemeratka pengawa memproses utai tanam ti berega tinggi baka chabi, nanas, pisang, jagung manis enggau nangka madu.
Kelimpah ari nya, pemansang kandang endur betanam betupi moden baka Agropark, Precision Farming Park enggau Taman Pengeluar Pemakai Tetap (TKPM) mega dikerembaika dikena matak penyereta raban nembiak enggau orang dagang.
Berebak enggau nya, perintah mega meransang pengawa ngena teknologi baka fertigasyen enggau hidroponik sereta bejalaika inisiatif uras ngagai pengaya dikena nyukung agenda ekonomi gadung.
“Chara tu nentuka sektor betanam betupi ukai semina produktif, tang mega meruan sereta tan,” ku iya.
Sama bisi datai Kaban Kunsil Nengeri (ADUN) Batu Danau Dato Paulus Palu Gumbang, Sapit Direktor Betanam Betupi Sarawak Radzhiah Bt Jack, Menija Besai Kaunsil Pengempung enggau Pengintu Tanah Sarawak (SALCRA) Datu Joseph Blandoi sereta temuai dipebasa bukai. – RBI
