KUCHING, 24 April – Bantah sekeda piak ngagai pengawa ngatur Pengerami Hari Pengereja Pengawa Antarabansa enggau Festival Muzik Ai Rain Rave ti diperambu deka diatur berengkah 30 April ngagai 2 Mei 2026 nya kelalu, enda betul sereta betukuh.

Nitihka Menteri Dagang Temuai, Seni enggau Budaya Dato Sri Tiong King Sing, jaku tuduh ke baka nya enda patut nyadika pelasar ngasuh mensia mayuh saru runding tauka ngasuh penyarut rama ke enda patut nyadi.

“Ke bendar iya, pengawa tu sebengkah projek dagang temuai mengeri ti diperambu enggau silik ti dipejalaika ari baruh pengawa matau ti terit, ukai baka ti diperagamka “enda dijaga” tauka “enda teratur”.

“Sebarang penemu ari individu tauka parti politik enda patut dikemesai nyentukka nyadi penyarut rama, nama agi enti diputarka nyadi isu bansa enggau pengarap,” ku Tiong.

Kaban Parlimen Bintulu ke mega Kaban Kunsil Nengeri (ADUN) Dudong nya mansutka penemu ba Facebook rasmi iya.

Tampung Tiong, Malaysia ke nyadi sebuah menua bebilang bansa minta randau mensia mayuh ti rasional sereta bebasa, ukai dipejalai ketegal runding ti ngemesaika bida nyentukka tau ngasuh penyarut nyadi.

“Enti setiap pekara dipolitikka lalu dikaitka enggau sensitiviti bansa enggau pengarap, baka ni menua tu ulih fokus ngagai penumbuh enggau penyulut ekonomi?

“Patut dikemeratka, batang tuju pengawa tu iya nya dikena ngelakuka penyelai budaya Malaysia ti mayuh macham, nyengkaum mayuh macham pemakai, seni asal enggau asil pengelandik jari. Tuju tu terang sereta enda patut dikelikuhka sebarang piak,” ku iya nyemetak.

Iya mega madahka raban pengatur mega nadai kala meransang sebarang ulah ti ngelaban nilai mensia mayuh.

Semua aktiviti dipejalaika nitihka undang-undang enggau bepelasarka pengawa rama. Tuduh ti nadai pelasar semina deka nempa runding ti negatif lalu narit sebengkah pekara ti jelan iya ngagai polemik politik ti enda beguna.

Iya mega madahka enda patut ngemesaika isu baka seraka sosial nyentukka ngelimpangka fokus ari tuju ke bendar.

“Dalam pengidup besehari-sehari, palan mensia mayuh baka perengka pengangkut, supermakit enggau palan bebelika barang endang amat ngaul kerejasama ti rat entara individu.

“Enti jaku tu dikena, patut semua ruang mensia mayuh ditanya? Pekara ke amat iya nya pemisi palan mensia mayuh endang ungkup guna rayat asal bisi atur enggau atur ke patut.

“Kelimpah ari nya, pengawa ngambi bagi ba program tu endang volunteer. Sida ke enda setuju nya bibas enda enggau, tang enda patut nyangkal pilih orang bukai tauka ngeletakka peneka diri empu,” ku iya enggau terang.

Bekaul enggau pengawa ke didawa ngachau operasyen mengeri, semua perambu dipesetuju nengah aum enggau mayuh bengkah opis ke bekaul.

Pengawa nutup jalai alun nya semina ngaul timpuh ke ditetapka maya tengah malam, ukai nyentuk 11 hari baka ke dipadah. Notis tumu mega udah dikeluarka ngambika mensia mayuh ulih nyendiaka diri.

Palan endur ngatur pengawa tu iya nya kandang endur komersial enggau dagang temuai ti endang palan ke rami sereta mayuh orang.

“Nya alai, tuduh bekaul enggau pengawa ngachau bekaul penginggar nadai pengamat. Ngatur pengawa besai ba kandang endur ke baka nya endang patut sereta beguna dalam nyeimbai pemansang enggau atur mengeri.

“Dalam gaya ekonomi dunya ti enda tentu, pengawa meransang ekonomi domestik patut ditegapka agi.

“Pengawa ke baka tu ulih nambahka penatai enggau belanja temuai, lalu enggau nya meri penguntung ngagai dagang mit enggau jelan pemesai sereta raban B40 nengah peluang penatai pemisi.

“Enda patut minta penumbuh ekonomi, tang ba awak ke sama nulak pengawa ti nyukung nya,” ku iya.

Berindik ari pekara tu, sebarang peragam enggau runding sempit enda patut nyangkal chara guna ruang mensia mayuh tauka ngeruga pengelantang mensia mayuh.

“Pemansang menua patut bepelasarka rasionaliti, relevan enggau bebasaka pangan diri, ukai nengah chara nempa isu tauka ngemesaika bida,” tandu iya.

Tiong mega ngarapka semua piak ulih begempung, ngemeranka ulah bebatak asur sereta meri sukung ke patut dikena nentuka penumbuh ekonomi menua terus tegap sereta meruan. -RBI

#ruaiberitaiban#newsiban#beritaiban

Rindu | Titih | Kunsika

MIRI, 24 April — Pengawa ti jampat sereta efisyen raban Opis Bomba enggau Penyah Penusah Malaysia (JBPM) ari Balai Bomba enggau Penyah Penusah (BBP) Lutong mujur ngerara penusah angus ti mungkur sebuah setor ti enda dikena dalam penusah ke nyadi tengah hari tu tadi.

Palan Operasyen nerima kangau ngenyit pukul 5.09 lemai sebedau loceng ngenyit memunyi pukul 5.09.30 lemai.

Sebuah Tender Penyelamat Bomba (FRT) Scania ti bisi raban dipindah ngagai palan penusah nyadi ba Lot 8892, Lorong 5, Jalai Dato Permaisuri 2C, urung 12 kilometer ari stesyen nya.

Komander Operasyen, PBK I (TBBK II) Iskandar enggau raban iya datai ba endur nya urung pukul 5.21 lemai lalu ngentaska penusah angus nya ngaul sebuah setor ke enda dikena enggau pemesai urung 6 x 6 kaki.

Operasyen madamka api tekala nya dipejalaika ngena arus 100 kaki enggau muncung ai ti disalur ari tangki jentera. Penusah angus nya udah mujur dirara urung pukul 5.37 lemai.

Operasyen nya tembu urung pukul 5.52 lemai pengudah pengawa meresa enggau silik dipejalaika dikena nentuka nadai agi pun penatai api.

Tim nya udah nya mupuk ke stesyen nya urung pukul 5.53 lemai lalu datai enggau selamat urung pukul 6.30 lemai.

Nadai penusah bebadi nyawa diripotka nyadi ba penusah nya. Sama bisi datai ba endur nya Pemesai Bomba Kanan II, Henry Jugah.

Bantu mega bisi disediaka Polis DiRaja Malaysia (PDRM) ti ngaul tiga iku kaban dikena nentuka gaya nya ulih dijaga.

Pemujur operasyen tu mandangka tikas penyikap enggau profesionalisme tim JBPM ti tinggi dalam nentuka pengelikun mensia mayuh seruran dijaga. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

Sumber, photo — BBP Lutong

SONG, 24 April — Pengawa perintah ti enda ngetu ngenegapka perengka guna pemun menua pesisir majak dipandangka nengah pengawa ngaga jeti besi nyau deka semua ba Sungai Katibas enggau Rajang, ti diatu udah nyadi kelai penyulut enggau komitmen ngagai pengelantang rayat.

Nitihka penerang Kaban Kunsil Nengeri (ADUN) Katibas, Lidam Assan, enti bejalai nengah sungai-sungai besai dalam kandang DUN Katibas, terang bendar dipeda berintai jeti besi bechura kalas ti digaga urung taun 2022 ngagai 2026 suba.

Ku iya nerang, pengawa ngaga jeti tu ukai semina deka ngemuntangka pemindah peranak ninting hari, tang mega ngangkatka pengelikun enggau pengelantang, kelebih agi ungkup komuniti ti bepanggai ba perengka pengangkut sungai.

“Cura kalas nya kelai jeti nya projek baru ti udah dipejalaika dalam beberapa taun ke udah.

“Nya mega mandangka sukung tegap ari rayat ti udah ngemujurka pengawa bejalaika projek tu ulih nyadi nyata enggau mujur,” ku iya.

Ku iya nambah, bepelasarka rikod ke diatu, lebih 90 peratus tagit ungkup pemansang perengka guna pemun di sitak nya udah mujur dijapai asil ari kerejasama rat enggau Kaban Parlimen Kapit, Dato Sri Alexander Nanta Linggi.

“Pemujur tu ukai semina asil ari pengeransing siku-siku aja, tang asil kereja beraban enggau sukung komuniti.

“Kitai ngemeranka chara ‘Anang Rindang’ terus bekerejasama sereta bebendar nangkup utai ke bedau dijapai,” ku iya nambah.

Iya mega nyamin pengawa deka terus chakah dipejalaika dikena nentuka perengka guna ke bedau bisi deka diberi perati ke patut ungkup pemaik rayat selampur.

Inisiatif ngaga jeti besi tu dipeda nyadi singkang ke besai reti dalam ngerapitka seraka pemansang entara kandang mengeri enggau menua pesisir, setipak enggau aspirasyen perintah nentuka nadai komuniti tinggal ari arus pemansang. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

Sumber, photo — Lidam Assan

MIRI, 24 April — Projek ngaga loji Combined Cycle Gas Turbine (CCGT) kuasa 500 megawatt (MW) di Miri diatu bejalai enggau lanchar sereta udah nyapai penyulut fizikal 45 peratus.

Menteri Perengka Guna enggau Telekomunikasyen Sarawak, Dato Sri Julaihi Narawi madah, projek ke diempu PETROS nya dipelaba tembu penuh ujung taun 2027, lalu enggau nya ngenegapka agi bekal kuasa karan di Sarawak.

Nitihku iya, projek ke beungkus RM2.0 bilion ke dilanchar kena 30 November 2024 ulih YAB Datuk Patinggi Tan Sri (Dr) Abang Haji Abdul Rahman Zohari bin Tun Datuk Abang Haji Openg nyadi komponen beguna dalam pengawa bejalaika Pelin Jalai Gis Sarawak (SGR), kelebih agi ungkup hab utara di Miri.

“Pengawa bejalaika projek tu beguna amat dalam nentuka timbang bekal kuasa Sarawak, kelimpah ari nangkup peminta ti majak nambah nyengkaum guna sektor industri,” ku iya nengah sebengkah penerang pengudah bejalaika penemuai kereja ngagai palan projek sehari tu.

Iya mega nyemetak madahka pemansang loji CCGT tu seriris enggau pengawa Sarawak nuju transisyen kuasa ti beresi sereta meruan agi, seriris enggau agenda pemansang kuasa nengeri tu.

Projek CCGT Miri dikearap nyadi pemangkin besai dalam ngenegapka infrastruktur tenaga di pelilih menua utara Sarawak sereta nyukung penumbuh ekonomi nengeri tu ti terus.

Penemuai kereja nya bela digulu Sapit Menteri Utiliti enggau Telekomunikasyen, Datuk Ibrahim Baki, Sekretari Mendam Opis Menteri Datu Jafri Lias, Ketuai Pemesai Eksekutif PETROS Dato Janin Girie, Direktor Gis MUT Kasvena Kassim sereta mega pemesai kanan opis menteri enggau PETROS. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

Sumber, photo — Julaihi Narawi

SELANGAU, 24 April — Pengawa bejalaika projek ari baruh Program Transformasyen Menua Pesisir (RTP) ungkup kandang menua DUN N.59 Tamin majak ditegapka nengah sesi nyerahka palan projek baru sereta mega pengawa nyerahka projek ke udah tembu dipejalaika begulai enggau Opis Kereja Raya bagi menua Sibu ngelingi menua Selangau.

Entara projek ke bisi disengkaum iya nya ngaga Padang Futsal Rumah Panjai Jeli ti udah diserah, lalu berengkah dipejalaika 23 April 2026 sereta ditaga tembu penuh kena 22 Ogos 2026.

Kelimpah ari nya, Projek Jalai Kebun Sungai Alat Rian, Selangau mega ngerikod pemujur ti chukup meransang lebuh iya mujur tembu dulu ari timpuh ke ditetap, berengkah kena 5 Januari 2026 sereta tembu sebedau haribulan ti disadang iya nya 4 Mei 2026.

Pengawa ngaga fasiliti padang futsal tu dipeda nyadi singkang strategik dalam nyendiaka palan rekreasyen ti likun sereta kondusif, kelebih agi ungkup raban nembiak ba kandang rumah panjai.

Berebak enggau nya, projek Jalai Kebun Sungai Alat Rian udah meri empas ke besai ngagai peranak menua nya nengah chara nambahka akses ngagai kandang endur betanam betupi sereta ngemuntangka pemindah ninting hari komuniti menua pesisir.

Kaban Kunsil Nengeri (ADUN) Tamin, Ir. Christopher Gira Sambang nyemetak madahka tetiap projek ti dipejalaika nengah RTP meseti meri penguntung terus ngagai rayat, kelebih agi ari sukut nyendiaka sereta ngemanahka perengka guna pemun di menua pesisir.

Iya mega madahka perengka guna baka padang futsal bisi potensi nyadi pelasar aktiviti bepengerai enggau pemansang rama nembiak, seraya ngemanahka jalai kebun ulih nyukung penambah produktiviti sereta nyungkak aktiviti ekonomi peranak menua nya.

Sesi Nyuaka Tapak enggau Nyuaka Projek nya mega digulu Pemesai Palan Servis DUN Tamin, Kunsilor Ajan Dau enggau Kunsilor Nyireng Saleh, sereta mega pengari ejensi teknikal JKR Bagi Menua Sibu ti diarika Puan Diana, Puan Nur Afifah enggau Puan Nur Hayati.

Pengawa terus bejalaika projek RTP mandangka komitmen perintah nentuka pemansang menua pesisir terus dikemerat enggau chara inklusif sereta meri empas ti tinggi, ngambika ulih ngangkatka pengelantang pendiau enggau kualiti pengidup rayat. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

LIMBANG, 24 April — Agrofest Limbang 2026 majak ngayanka tanggungpengawa iya nyadi pelasar beguna dalam ngenegapka sektor betanam betupi nengeri tu, kelebih agi ba pengawa ngelakuka inovasyen, teknologi pintar sereta ngadaka orang dagang betanam betupi rebak baru.

Pengerami rasmi bejadika Agrofest nya dipenyadi Sapit Menteri Industri Pemakai, Komoditi enggau Pemansang Kandang Menua Sarawak (M-FICORD) Datuk Dr. Abdul Rahman Ismail, ti ngemeratka komitmen perintah dalam nentuka sektor betanam betupi terus nyadi pemansut ekonomi menua pesisir.

Nitihka penerang Facebook Datu Joseph Blandoi, Menija Besai Kaunsil Pengempung enggau Pengintu Tanah Sarawak (SALCRA), penatai iya ngulu program nya mega muka ruang interaksyen terus enggau komuniti menua nya sereta ejensi ke bekaul.

“Agrofest tu nyadi pelasar ti besai reti dikena meransang sektor betanam betupi mansang ke mua, nyengkaum ngelakuka inovasyen enggau teknologi pintar, kelimpah ari ngadaka mayuh agi orang dagang betanam betupi ti kompetitif,” ku iya.

Iya mega nambah, ngatur program ke bansa nya bejalaika tanggungpengawa besai dalam ngenataika polisi perintah bekaul enggau pengelikun pemakai, ngenegapka akses makit produk agro, sereta matak temuai ngagai Limbang nyadi palan agro-dagang temuai.

Rambau penemuai nya, iya mega bepeluang dirandau Radio Televisyen Malaysia (RTM) Limbang bekunsika pemansang ke pemadu baru dalam fokus pemansang SALCRA enggau pangku pengawa ejensi nya ngenegapka komuniti menua pesisir.

Sama bisi dikerandau iya nya pengawa nyendiaka diri napi Pesta Bisaya Babulang & Lumba Kerbau 2026 ti deka nyadi pematak besai ba kandang menua nya.

“Agrofest Limbang taun tu mega meda sukung tegap ari mayuh bengkah ketuai enggau ejensi, nyengkaum Dato Paulus Gumbang, Kaban Kunsil Nengeri (ADUN) Batu Danau; Datu Adrian Susin, Direktor Opis Servis Veterinar Sarawak; enggau Radziah Jack, Sapit Direktor Opis Betanam Betupi” ku iya.

Pengerami ti richah ti nerima timbal ti chukup meransang nya mandangka komitmen begulai semua piak dalam ngenegapka sektor betanam betupi sereta ngangkatka tikas pengidup komuniti bumai, setipak enggau aspirasyen pemansang ti meruan di Sarawak. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

Jabatan Pertanian Sarawak, Ministry of Food Industry, Commodity & Regional Development SarawakSarawak Land Consolidation and Rehabilitation Authority

BALAI RINGIN, 24 April — Pengawa ngenegapka pelajar bepelasarka teknologi majak chakah lebuh 20 buah sekula ari baruh kandang menua DUN N.30 Balai Ringin nerima pemeri ViewSonic Interactive Touchscreen Smartboard Display ti pemesai 65 inci ba sebengkah pengerami nyua kena Hari Tiga tu tadi.

Pengerami nya dipenyadika Sapit Menteri Dagang Temuai, Industri Kreatif enggau Seni Pemerindang Sarawak, YB Datuk Snowdan Lawan, ke mega Kaban Kunsil Nengeri ( ADUN) Balai Ringin ti ​​ngemeratka pemesai guna integrasyen teknologi dalam ngangkatka pemanah proses ngajar enggau belajar di sekula, kelebih agi kandang menua pesisir.

Nitih ku iya, pengawa nyendiaka perengka guna papan pintar interaktif tu setipak enggau guna pelajar abad ke-21 ti begunaka chara ti lebih dinamik, interaktif sereta bepusatka ba nembiak.

“Pengawa bekenaka teknologi pintar baka tu ukai semina ulih mantu pengajar ngenataika penemu enggau efektif agi, tang mega ulih matak bala nembiak chakah agi sereta kreatif dalam sesi belajar,” ku iya lebuh bejaku ba pengerami nya.

Sepenyampau 20 buah sekula nerima pemeri nya iya nya 19 buah Sekolah Kebangsaan (SK) enggau sebuah Sekolah Menengah Kebangsaan (SMK). Semua sekula diarika Kepala Pengajar sida enggau Presiden Gerempung Apai Indai Pengajar (PIBG) sida empu nerima perengka nya.

Sama bisi datai Pemesai Opis Pelilih Menua Pantu, Raca Mulong; SAO Opis Pelilih Mit Balai Ringin, Mohd Adam; pengari Opis Pelajar Pelilih Menua (PPD) Serian, Simunjan enggau Sri Aman; pia mega ketuai komuniti, ketuai suku bansa enggau peranak menua nya.

Inisiatif tu ngayanka komitmen ketuai kandang menua ti seruran dipejalaika dalam nentuka akses ngagai pelajar ti bekualiti sereta perengka guna teknologi moden ulih diasaika enggau komprehensif, lalu enggau nya ulih ngerapitka seraka digital entara kandang mengeri enggau menua pesisir di Sarawak. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

KANOWIT, 24 April — Pengawa nyuaka simbolik kad nyadi raban Parti Rakyat Sarawak (PRS) udah dipenyadika Kaban Kunsil Nengeri (ADUN) Ngemah, Anyi Anak Jana, kemari ba sebengkah pengerami ti mandangka sukung renggat baruh ti enda ngetu ngagai parti nya.

Sepenyampau 154 iti kad nyadi raban baru udah disuaka ngagai raban, lalu nya kelai penambah ke nyata ba kaban PRS ba sitak nya.

Nitihka rikod Palan Servis N49 Ngemah, dalam timpuh Januari nyentuk April 2026, sepenyampau 238 pom nyadi raban baru udah diterima, ti mandangka pemansang positif sereta nambahka pengarap ati mensia mayuh ngagai pangku pengawa enggau kuing parti ba renggat baruh.

Dalam jaku dipansutka iya, Anyi meri pengaga ati ngagai sukung enggau pengarap ke diberi komuniti ngelingi.

Iya nyemetak madahka pengawa chakah ngaul kaban baru beguna amat dalam ngenegapka jentera parti sereta nentuka penerus agenda pemansang di kandang menua Ngemah.

“Semengat begulai ti dipandangka sehari tu nyadika pelasar penyerakup ti tegap.

“Iya ukai semina ngenegapka parti, tang mega nyadi pelasar pengawa deka mai pemansang ti lebih komprehensif ngagai rayat,” ku iya.

Pengawa tu mega nyadi pelasar ngerapitka kaul entara raban ketuai enggau bala raban, lalu enggau nya ngenegapka agi penyerakup entara penyukung PRS ba sitak N49 Ngemah. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

Sumber, photo — Pusat Khidmat Masyarakat ADUN N.49 Ngemah

KUCHING, 24 April — Pengudah beberapa jam bejalaika operasyen betapi enggau gaya ke mayuh pemar, siku indu peranak ari Australia ke diripotka lenyau ba Gunung Santubong pengujung iya ditemu likun sebedau dibai pansut ulih raban ngiga enggau nyelamat (SAR).

Ketuai Polis Pelilih Kuching, ACP Alexson Naga Chabu madah, tudah dikelala enggau nama Belinda Lapier ditemu pengudah tim SAR betapi enggau pemar nengah jalai ti renjan ti mayuh pemar diumbaka hari ti petang.

Ku iya, operasyen nya tekala nya dipejalaika enggau lengkas pengudah ripot orang lenyau diterima enggau raban pengelikun fokus ngagai pengawa ngiga ba kandang endur F7 kelimpah ari jalai ‘off-trail’ ke dipelaba ditengah iya.

Operasyen nya ngaul kerejasama mayuh bengkah ejensi nyengkaum polis, bomba enggau raban penyaga kampung. -RBI

KUCHING – Pemidang ex-Kaban Kunsil Nengeri (ADUN) Belaga, Datuk Seri Bo’ Tajang Laing nyadi pengelenyau besai ngagai nengeri tu, ninggalka legasi nyadi ketuai ti bepelasarka servis, pemaruh ati enggau komitmen ti enda begilik ngagai rayat Sarawak.

Iya madamka seput kepenudi lebuh umur iya manggai 100 taun.

Niang antara orang ti bebendar negika nengeri tu merdeka sereta ngemansangka menua pesisir

Pemidang iya udah dipadahka anak iya, Lohong Tajang nengah ‘Facebook’ malam tadi.

“Malam tu, kami lenyau apai ti dikesayau. Terima kasih ke pengidup ti penuh enggau pengelurus ati sereta servis ngagai ruang bilik enggau komuniti,” ku iya.

Niang diadaka kena 14 Februari 1926, lalu iya dibesaika ba kandang menua ulu Sarawak dalam gaya penyeranta, enggau sungai nyadi batang perengka pengangkut sereta akses pelajar enggau servis pengerai ti mimit.

Peneleba tu nempa pengarap iya ti madahka pelajar nyadi kunchi besai dikena ngubah tikas pengidup komuniti menua pesisir.

Ngepunka pengawa nyadi pengajar, iya meda enggau mata diri empu pemar ke ditapi bala nembiak ngulihka pelajar nyengkaum bejalai kaki jauh sereta bisi mega badu besekula.

Peransang ari bala ketuai komuniti lokal udah nya ngujungka iya masuk politik ngarika pemerat komuniti Orang Ulu.

Pejalai tu meda iya dipadu nyadi menteri nengeri dalam Kabinet keterubah Sarawak di baruh pegai Kepala Menteri Tan Sri Stephen Kalong Ningkan, lalu enggau nya nyadi individu keterubah ari komuniti Orang Ulu dipadu nyadi menteri penuh.

Sepemanjai iya gawa, iya seruran ngemeranka pemansang menua pesisir nengah chara fokus ngerembaika akses ngagai pelajar sereta pengawa ngerapitka seraka pemansang entara mengeri enggau menua pesisir.

Kena 14 Februari 2026, niang ngintu hari pengada iya ke-100 begulai enggau diri sebilik, bala bakih sereta pengari komuniti ke bisi datai meri terima kasih ngagai pemeri iya.

Sepemanjai pengidup iya, iya nerima mayuh macham pengangkun nyadika tanda terima kasih ketegal pengawa iya ti bebendar gawa.

Berebak enggau nya mega, Senator Pele Peter Tinggom ke mega uchu ari petunggal niang madahka, niang siku orang ke beguna dalam sejarah politik tumu Sarawak pengudah penumbuh Malaysia ba taun 1963 suba.

Nitihku iya, niang entara kaban Kabinet Sarawak ke pemadu tumu ba taun nya lalu terus mangku pengawa nyadi menteri sepemanjai taun 1960-an enggau 1970-an.

“Iya ngayanka pangku pengawa ketuai rebak tumu dalam nempa pelasar pentadbiran moden Sarawak, kelebih agi pemansang menua pesisir, penyerakup komuniti pupu bansa enggau penegap institusyen perintah nengeri.

“Seiku tukuh baka iya patut dikeingat nyadi pemungkal ti mai sada nyawa rayat menua pesisir ngagai renggat ke pemadu tinggi dalam pengawa ngatur nengeri,” ku iya. -RBI

Kredit Suara Sarawak