PALOH, 6 April – Penyerakup enggau kerejasama komuniti nyadi batang kunchi pemujur pemansang ba kandang menua Semop, kelebih agi dalam nentuka projek ti udah diperambu ulih dipejalaika enggau lanchar ungkup pengelantang begulai.

Sapit Menteri ba Opis Premier Sarawak (Pekara Korporat, Pemadah enggau UKAS), Datuk Abdullah Saidol nyemetak madahka enti nadai sukung tegap ari rayat, semua pengawa pemansang nyengkaum projek besai bisi potensial kena tekeruga.

Berindik enggau nya, iya ke mega Kaban Kunsil Nengeri (ADUN) Semop ngelalau komuniti pupu bansa ngambika terus ngetanka pengelantang sereta nyeliahka sebarang bansa provokasyen ti tau ngenataika saru penemu enggau asai ati ti enda lantang ba rayat.

Berebak enggau nya, iya madahka projek Jematan Batang Paloh ke benung digaga diatu dikearapka nyadi pematak besai pemansang ba kandang menua nya.

Nitihku iya, projek nya deka meri penguntung ngagai abis nadai 13 buah genturung pendiau nyengkaum palan pengentap pendiau baru Pusat Pertumbuhan Desa (RGC) Semop sereta mega rumah panjai, kelebih agi ari sukut rama enggau ekonomi.

“Jematan tu deka nyadi batang penyambung darat enti udah tembu ila, lalu enggau nya nambahka akses ngagai peranak, kelebih agi ba kandang menua Pulau Bruit,” ku iya.

Ku iya nambah, bemacham projek pemansang ke bukai mega benung dipejalai lalu pengawa ngaga jematan nya dipelaba ulih nyungkak penumbuh sereta ngangkatka tikas pengidup peranak menua nya.

Iya madah munyi nya ba Pengerami Nerima Pengabang Aidilfitri DUN Semop ke diatur ba Kampung Sebako enggau Kampung Sedi, ditu sehari tu tadi.

Sama bisi datai Kaban Parlimen Tanjong Manis, Dato Ir Yusuf Abd Wahab.

Berebak enggau nya, Abdullah mega bisi bekunsika jaku pesan ari siku tuai rumah panjai ke suba maya keterubah ngaul diri nyadi pengari rayat ti ngemeratka pekara ke diguna pemun baka bekal ai, jalai alun enggau telekomunikasyen nyadi pelasar beguna ngagai pemansang.

Ku iya, pesan nya udah nyadi peransang ti enda ngetu dalam pengawa iya meri servis ti pemadu manah ngagai rayat ba kandang menua DUN Semop. – RBI

SIMANGGANG, 6 April – Datuk Francis Harden Hollis, Sapit Menteri Pemansang Bakat enggau Kaban Kunsil Nengeri (ADUN) Simanggang ngemendarka agih belanja MRP sepenyampau RM10,000 ngagai PIBG Sekula Primari (SK) Paku Undop sereta mega RM5,000 dikena melanja program robotik enggau nya ngenegapka pengawa belajar bepelasarka teknologi.

Agih belanja nya dipadah lebuh iya bejadi Pengerami Merarau Segulai Sejalai ke diatur PIBG sekula nya ke digulu urung 700 iku temuai.

Dalam jaku dipansutka iya, Harden ngenataika jaku puji enggau pengaga ati ngagai PIBG SK Paku Undop laban udah mujur ngatur pengerami nya enggau sambut ti chukup meransang, kelebih agi ari komuniti Iban di kandang menua Ulu Undop enggau Batu Lintang.

Nitih ku iya, pemayuh penatai komuniti mandangka kerejasama rat entara PIBG, staf sekula enggau komuniti lokal, lalu enggau nya mandangka sukung tegap ngagai pengawa ngumpul belanja dikena melanja aktiviti ungkup pemansang nembiak.

Dulu agi ari nya, Kepala Pengajar, Kanang Impin ba jaku pengelalu madahka pengeran sekula nya deka nimbal jaku tangkan perintah ngenegapka program digitalisasyen sereta nambahka pengerindu nembiak dalam bidang STEM.

Ku iya, pemerat ba STEM beguna amat setipak enggau pengerembai teknologi ti jampat ti begunaka pengereja pengawa ti landik dalam bidang teknikal nyadi pematak pemansang menua.

Sama bisi ngulu atur pengawa nya, Chairman MDSA, Anthony Abell Chendan, Presiden PIBG SK Paku Undop, Jinson Restigis, Chairman Kaunsil Kepala Pengajar Malaysia Pelilih Sri Aman, Alfred Kendim enggau sekeda ketuai raban bansa nyengkaum Temenggong Leonard Libau Anol, Pemancha Denneil Saweng enggau Penghulu Mingging Sigan. – RBI

KUCHING, 5 April – Dewan Bandaraya Kuching Utara (DBKU) mansutka jaku tangkan terit ngagai mensia mayuh ngambika enda ngaul diri enggau sebarang pengawa betunu chara tebuka berindik ari gaya hari ti angat sereta kemarau ke nyadi diatu, lalu enggau nya nambahka risiko penusah angus enggau pengamah angin.

Jaku tangkan nya dipansutka berindik ari penusah angus ti mungkur kandang endur urung tiga hektar ba Jalai Sultan Tengah semak Bangunan Sumber Alam, Petra Jaya, lemai kemari, ti dipelabaka ketegal siku individu ti nadai tanggungjawab nunu getah tali karan.

Datuk Bandar DBKU dalam penerang iya nyemetak madahka, sebarang aktiviti betunu chara tebuka ditagang enggau terit lalu tau kena atur undang-undang.

Aktiviti baka nunu uras, uras kebun tauka kandang endur tebuka ukai semina ngeruga pengelikun, tang mega ngeruga pengerai mensia mayuh ketegal sebun asap.

Nitih ku iya, gaya hari ke diatu angat sereta kemarau ngujungka api jampat nyerarai sereta tusah deka ditagang, lalu enggau nya bisi potensial ngujungka penusah angus besai nyadi enti enda ditagang tumu.

Berindik enggau nya, mensia mayuh dilalau ngambika enda ngaul diri ba pengawa betunu chara tebuka enggau sebarang tuju, kelimpah ari seruran beratika gaya ngelingi, kelebih agi ba kandang endur ke mudah angus baka rumput enggau babas.

Kelimpah ari nya, komuniti dilalau ngena chara muai uras ke betul nyengkaum beambi nguna ari servis ngumpul uras ke bisi disediaka DBKU, pia mega ngurangka aktiviti ba luar enti gaya hari kelalu angat sereta kualiti angin enda manah ke pengerai.

Mensia mayuh mega dipinta lengkas ngeripot sebarang penusah angus ngagai piak bekuasa ngambika atur lengkas ulih dipejalaika.

DBKU mega madahka deka chakah agi bejalaika pengawa matau enggau neritka atur ari setiap, kelimpah ari enda kakang ati ngambi atur ke terit ngagai sebarang piak ti ngelanggar atur ari baruh Seksyen 113 Ordinan PBT 1996.

Kerejasama semua piak beguna amat dalam nentuka pengelikun komuniti enggau pengelantang rampa menua terus dijaga. -RBI

BAU, 5 April — Siku lelaki peranak menua luar ke beumur urung 30 taun ditan Polis DiRaja Malaysia (PDRM) pengudah iya dipechayaka ngereja ulah agresif maya mabuk ti meri pengirau ati ngagai peranak ba kandang menua SALCRA, Kampung Opar, Bau, kemari.

Ketuai Polis Pelilih Bau, P/SUPT Mohd. Haide Bin A. Rahman, madahka saspek mujur ditan enggau bantu mensia mayuh ke bisi pengirau ati sebedau polis dikangau ngambika ulih bejalaika atur ke bukai.

Nitihku iya, pansik tumu tetemuka lelaki nya madahka diri peranak menua Indonesia tang enda ngayanka sebarang dokumen pejalai ke entas.

“Saspek udah nya ditan polis ngambika atur nangkanka nya dipejalaika ari baruh Seksyen 6(1)(c) Akta Imigresen 1959/63,” ku iya nengah penerang media sehari tu tadi.

Ku iya nambah, saspek mega udah dibai berubat ngagai Sepital Bau berindik ari bakal mimit ba mua iya ke dipelabaka nyadi maya orang nguji ngetanka iya.

Kes tu agi dipansik, lalu polis deka bejalaika atur ti nangkanka nya nyengkaum ngulihka penerang ari Opis Imigresen Malaysia sereta madah ngagai piak ti bekaul.

Berindik enggau nya, mensia mayuh dilalau ngambika enda ngambi sebarang atur kediri empu ti tau mai risiko pengelikun, tang nganti ngeripot sebarang penerang tauka penusah ti dipelabaka nyadi ngagai polis.

PDRM nandu baru komitmen sida ti seruran deka nentuka pengelikun enggau atur mensia mayuh seruran dijaga. – RBI

DARO, 5 April — Penusah angus tanah kerapa ke nyadi semak jalai batang di Kampung Saai mujur dirara berindik ari pengawa jampat raban penyelamat, sehari tu tadi.

Palan Penyaga Operasyen Pelilih Menua (PKOD) Raban Penyaga Orang Periman Malaysia (APM) Daro nerima kangau ngenyit madahka penusah nya sebedau sida ngesah enggau lengkas ngagai endur nya.

Lebuh datai ba endur nya, raban APM ngaga penyikap keterubah nyengkaum ngena kereban pengelikun diri (PPE) sebedau ngepunka operasyen madamka api.

Tim APM mega bisi mantu raban bomba ba pengawa nagang api ari majak nyerarai.

Api mujur dirara ngena pam ai, lalu enggau nya api ulih ditagang nyerarai ngagai kandang endur ke besemak.

Nadai bakal diripotka nyadi, seraya semua kaban enggau perengka operasyen dalam gaya ke manah.

Gaya ba endur nya diatu diripotka ulih dijaga.

Mensia mayuh dilalau seruran bejejaga sereta lengkas ngeripot sebarang penusah ngenyit nyadi ngagai piak bekuasa.

Sebarang penusah ngenyit tau disalur nengah lumur 999 tauka betanya ngagai talipaun APM Daro ba lumur 084-823911 ti beoperasyen 24 jam. -RBI

SIBU, 5 April — Pemujur Sekula Sekondari (SMK) Katibas ngerikodka tikas penyulut 100 peratus ba peresa Sijil Pelajaran Malaysia (SPM) 2025, nyata ngayanka puku ti diperanakka sepenyampau RM84.9 juta dalam sektor pelajar ba sitak Kunsil Nengeri (DUN) Katibas kenyau 2022 ngembuahka asil ti meransang.

Kaban Kunsil Nengeri (ADUN) Katibas, Lidam Asan madah, pemujur tu mandangka pemanah pengawa ti enda ngetu dalam pengawa ngenegapka pemansang pelajar, kelebih agi di menua pesisir.

“Pemujur tu ngayanka sekula menua pesisir mega bisi penau nyapai tikas penyulut ke tinggi, lalu patut diberi kelala ke lebih besai agi,” ku iya lebuh dikerandau ditu, kemari.

Iya nyemetak madahka pemujur SMK Katibas asil ari komitmen tinggi raban pengajar, pengeran nembiak enggau sukung tegap ari komuniti menua nya dalam negika pelajar.

Pemujur tu mega muai penemu ti madahka sekula menua pesisir napi penanggul besai ari sukut geografi, infrastruktur enggau akses ngagai perengka guna pelajar.

Nitih ku Lidam, nengah chara ngajar ti ngasi sereta kerejasama rat entara sekula, pengari rayat enggau komuniti, palan pelajar di kandang menua ulu ukai semina ulih nangkup peminta pelajar, tang mega ngelui ari nya.

Iya minta semua piak nyengkaum pengaga polisi enggau piak bekuasa pelajar ngambika terus beratika enggau berat pengawa ngenegapka pelajar menua pesisir nengah pengawa beranakka puku ti enda ngetu, ngagihka perengka guna enggau lurus, sereta sukung ti ditagit.

Lidam mega meri besai terima kasih ngagai Opis Pelajar Nengeri (JPN), Opis Pelajar Pelilih Menua (PPD), raban pengajar enggau pentadbiran tiga buah sekula sekondari di pelilih Song ketegal komitmen sida ngangkatka modal mensia enggau penyulut nembiak bansa.

Iya nyemetak madahka kenyau ari taun 2022 nyentuk ke diatu, JPN udah melanja RM84.9 juta ba pengawa ngemansangka sekula di pelilih Song, ti nyata meri empas positif ngagai penyulut akademik nembiak.

“Pemujur tu enda tau enda nyadika pelasar dikena neruska momentum penyulut pelajar ngambika genap iku nembiak di Sarawak enda ngira endur bepeluang ngasaika pelajar ti bekualiti,” ku Lidam.

Iya mega ngarapka pemujur SMK Katibas ulih nyadika peransang ngagai sekula menua pesisir ke bukai ngambika terus nyapai pemujur ke nyulut. -RBI

SRI AMAN, 5 April — Raban Balai Bomba enggau Penyah Penusah (BBP) Sri Aman bejalaika pengawa enggau lengkas mutarka penangul pun kayu ke tumbang ke benung ngempang jalai nuju sebuah rumah di Kedang, pagi tadi.

Nitihka penerang Komander Operasyen, PBK I (TBK I) Mohd Fadhli bin Buyong, raban iya nerima kangau ngenyit urung pukul 8.39 pagi sebedau tekala nya ngatur raban ngagai endur penusah nya nyadi.

“Lebuh Raban Timbal Operasyen (PKO) datai ba endur nya, ditemu endang amat bisi pun kayu tumbang ngempang jalai nuju rumah orang ke ngaga sebana.

Raban nya udah nya bejalaika pengawa netak, ngupas enggau meresi ngena chinsaw seraya ngena perengka pengelindung diri (PPE) ke lengkap,” ku penerang nya

Ku iya, operasyen nya bejalai enggau lanchar sereta mujur ditembuka enggau nadai sebarang penusah ke enda manah nyadi.

“Pengudah nentuka nadai agi risiko penusah ba endur nya, raban nya ngeripotka diri pulai baru ngagai stesyen nya,” ku iya.

Berebak enggau nya, iya mega madahka operasyen nya napi sekeda pemar berindik ari jalai sempit nuju palan penusah nyadi sereta enda engkeman ditengah perengka pengangkut ke besai sereta tinggi.

Nadai penusah bakal diripotka nyadi ba penusah nya. — RBI

MATU, 5 April — Penusah babas angus ke nyadi ba kandang pendam Kampung Pergau ditu mujur dirara enggau jampat Raban Penyaga Pengelikun Mensia Mayuh Malaysia (APM) Pelilih Matu sehari tu.

Nitihka penerang ari Palan Kawalan Operasyen (PKOD) Pelilih APM Matu, piak nya nerima kangau ngenyit bekaul enggau penusah nya sebedau seraban dianjung ngagai endur nya ngambika atur jampat dipejalaika.

“Lebuh datai ba endur nya, ditemu penusah angus nya mungkur kandang babas ngelingi pendam nya.

“Raban APM bejalaika pengawa enggau jampat bejalaika operasyen madam enggau nagang api dikena nyeliahka api ari nyerarai ngagai kandang endur ke besemak,” ku penerang nya.

Operasyen madamka api bejalai enggau lanchar lalu api ulih dijaga enggau penuh dalam timpuh ke pandak.

Nadai mansa diripotka bisi kaul enggau penusah nya lalu kandang endur nya dientaska likun pengudah diperesa enggau silik agi.

Berindik enggau nya, mensia mayuh dilalau ngambika seruran bejejaga ari risiko angus kelebih agi maya hari angat enggau kemarau, lalu lengkas ngeripot sebarang penusah ngenyit nyadi ngagai piak bekuasa.

Sebarang penusah ngenyit tau disalur ngagai PKOD APM Pelilih Matu nengah lumur 084-832208. — RBI

KANOWIT, 5 April — Penumbuh Gerempung Ketuai Komuniti Ngemah Hilir nyadika singkang ke besai reti nuju pengawa ngenegapka penyerakup sereta koordinasyen nyadi ketuai komuniti ba renggat baruh ba kandang menua nya.

Gerempung tu ditumbuh enggau rasmi nengah aum khas ke diatur ba Dewan Serbaguna SPS Nanga Ngungun, pagi tadi, ke digulu Kaban Kunsil Nengeri (ADUN) Ngemah, Anyi Jana, ke bela meri sukung penuh ngagai inisiatif nya.

Dalam jaku dipansutka iya, iya ngenataika tabi puji enggau pengaga ati ngagai semua Penghulu enggau Tuai Rumah ketegal komitmen tinggi sida dalam ngamatka penumbuh gerempung nya, ti digambarka siti singkang strategik dalam nyerakupka iring Ketuai Komuniti enggau Ketuai Raban Bansa (KMKK).

“Penumbuh gerempung tu nyendiaka pelasar ke lebih bestruktur dikena ngatur pengawa KMKK. Nengah gempung tu, sada nyawa komuniti ulih dikenataika enggau lebih efektif ngagai raban ke bisi pemerat,” ku iya.

Ku iya nambah, pemisi gerempung tu mega beguna dalam nentuka tetiap isu enggau guna rayat ba renggat genturung pendiau enggau rumah panjai ulih dikemeratka enggau kolektif sereta sistematik.

Ngenang sukut pemansang, iya madahka semua Komiti Pemansang enggau Pengelikun Genturung Pendiau (JKKK) rumah panjai di Ngemah Hilir udah nerima projek ari baruh Program Transformasyen Menua Pesisir (RTP).

Projek ke dikerandau diatu benung dalam mayuh bengkah renggat dipejalaika nyengkaum projek ke udah tembu, benung dipejalai sereta ke udah dikemendar sereta nganti dipejalaika ejensi ke bekaul.

Ba aum ke sama, raban ketuai serakup nya dipilih enggau sepenemu ti mandangka semengat pengarap ti tinggi entara bala ketuai komuniti.

Tuai Rumah Kulleh Jabu dipadu nyadi Chairman, lalu ditangkanka Tuai Rumah Saini nyadi Sapit Chairman.

Pangku pengawa Sekretari dipegai Tuai Rumah Juro disaup Tuai Rumah Merebai nyadi Sapit Sekretari, lalu Tuai Rumah Linggi Sawing dipadu nyadi Tukang Wang enggau Tuai Rumah Baginda nyadi Sapit Tukang Wang.

Sama bisi datai Puan Gelim Utan, bini Kaban Kunsil Nengeri (ADUN) N.49 Ngemah, Penghulu Pree Minggat, siku penghulu kandang menua enggau Kaunsilor Mutang Karani.

Penumbuh Gerempung Ketuai Raban Bansa Ngemah Hilir dikearap ulih nyadi peyungkaj ngagai pemansang komuniti ti lebih bestruktur, kelimpah ari ngerapitka kaul kerejasama entara ketuai komuniti enggau ejensi perintah ungkup pengelantang rayat selampur. — RBI

SIBU, 5 April — Penanggul bekal ai di Sibujaya sekali agi nyadi batang sebana peranak lebuh penemuai pemanah ati beserimbai enggau musin pengerami kemari betukar nyadi sesi sebana bebala mayuh.

Nitihka penerang ari Dato’ Seri Tiong Kin Sing, “Kemari, aku bisi ke Sibujaya nemuai beserimbai enggau musim pengerami, tang utai ke dipelabaka penemuai enggau ati ti manah nyau betukar nyadi ‘sesi sebana bebala mayuh’; ari rumah ke rumah, utai ke dikerandauka ukai agi pengerami, tang pengawa penangul ai.

“Tu ukai agi kes kediri, tang krisis dalam pengidup rayat ti mungkur serata Sibujaya.”

Iya nyemetak madahka penanggul tu udah lama nyadi lalu pengawa ke dipejalaika agi bedau mutarka isu nya enggau penuh.

“Opis Menteri Perengka Guna enggau Telekomunikasyen (MUT) Sarawak enggau tu dipinta lengkas nganjung pelin mutar ke amat efektif dikena mutarka enggau penuh penanggul bekal ai tu.

“Anang semina bejaku pasal bekal ai tang nadai ngambi tindakan sekali.

Penanggul pemun rayat tu ukai semina enda teputar tang majak balat.”

Dato’ Seri Tiong mega bisi mantaika empas penanggul bekal ai ngagai pengidup ninting hari peranak menua nya.

Pengawa ai tejanggal tu ngujungka rayat idup tusah. Tebal agi peranak diatu dipejal meli ai mineral ari supermakit dikena nyumai.

Ukai semina nya aja, lebuh pengawa penangul nya majak nyadi, orang dagang mega enda ulih bejalaika pengawa dagang baka selama lalu daya idup sida majak tekeruga.

“Lebih balat agi, aku mega bisi nerima sebana taja pan nadai ai, meter ai agi bejalai lalu chaj agi diberi.”

Iya mega ngingatka pekara tu kala dibantai sebedau tu ba Dewan Undangan Nengeri (DUN)

“Aku udah suah mantaika isu bekal ai di Sibujaya nyengkaum ba bulan November 2023 ba Dewan Undangan Negeri, minta penanggul tu diberi perati sereta diputarka.

“Nama asil iya? Ukai pengawa tang nyangkal, ukai chara mutarka tang tuduh ti madahka isu tu nadai lalu aku dikumbai ‘ngaga cherita’.

“Pekara ke amat, penanggul bekal ai tu udah nyadi baru kenyau ari bepuluh taun tang majak ditangguh sereta enda dikeibuhka.” ku iya.

Iya nyemetak madahka rayat minta hak sida ke pemadu beguna, iya nya bekal ai ke entap.

“Utai ti dikedeka rayat semina pekara ti pemadu pemun, iya nya bekal ai ti entap.

Taja pia, piak bekuasa majak meri mayuh macham dalih, kekadang paip meletup, kekadang pejalai arus ai baruh, ninting hari sida nekan enggau narit enggau dalih baru, lalu indah guna bekal pemun tu diperubat enggau enda bejimat.”

Dato’ Seri Tiong mega minta piak bekuasa nyengkaum Premier Sarawak, YAB Datuk Patinggi Tan Sri (Dr) Abang Haji Abdul Rahman Zohari bin Tun Datuk Abang Haji Openg, masuk champur terus mutarka isu tu.

“Kitai suah ngenataika rambai jaku ‘Sarawak First’ sereta besemaya enda melakangka infrastruktur pemun.

“Rayat diatu minta semaya tu dikeamatka lalu krisis bekal ai ti lama tu diputarka enggau penuh.” ku iya.

Penerang tu ngemeratka isu bekal ai nyadi pekara ti pemadu diguna rayat lalu pengawa jampat diguna dikena nentuka pengidup rayat Sibujaya enda tekeruga agi. — RBI