LIMBANG, April 24 — Perintah Sarawak majak ngenegapka pengawa ngubah sektor betanam betupi nyadi injin besai penumbuh ekonomi nengeri, enggau tagit nempa Sarawak nyadi pengeksport beresi pemakai manggai ba taun 2030.
Sapit Menteri Industri Pemakai, Komoditi enggau Pemansang Kandang Menua (Industri Pemakai), Datuk Dr.Haji Abdul Rahman Ismail, madahka sektor betanam betupi meri RM15.1 bilion ngagai GDP Sarawak ba taun 2024 sereta nyendiaka lebih 247,000 peluang kereja.
“Perintah Sarawak bebendar ngubah sektor betanam betupi ngambika lebih kompetitif sereta bepelasarka teknologi moden setipak enggau PCDS 2030,” ku iya.
Iya madah munyi nya lebuh bejadika Pengerami Sarawak Agrofest Limbang 2026 ba Kompaun Lot 777, Bandar Limbang, sehari tu tadi.
Nitihku iya, pengawa ngena teknologi baka betanam betupi pintar, analisis data enggau pansik deka terus ditegapka dikena nambahka produktiviti enggau pemanah sektor nya.
Sarawak Agrofest Limbang 2026 deka diatur pengelama empat hari berengkah ari 23 ngagai 26 April ti nyadi sebagi ari pejalai raun Agrofest sebedau atur pengawa renggat nengeri di Bintulu.
Sama bisi datai Kaban Kunsil Nengeri (ADUN) Batu Danau Dato Paulus Palu Gumbang, Sapit Direktor Betanam Betupi Sarawak Radzhiah Bt Jack, Menija Besai Kaunsil Pengempung enggau Pengintu Tanah Sarawak (SALCRA) Datu Joseph Blandoi, Direktor Opis veteriner Sarawak, Datu Dr Adrian Susin Ambud sereta temuai dipebasa bukai. — RBI
