BINTULU, 30 April — Kaban Kunsil Nengeri (ADUN) Samalaju, Datuk Majang Renggi udah bejadika Woksyop Ngenegapka Ketuai Raban Bansa ke diatur Gerempung Ketuai Kaum Zon Samalaju, Suai ke ba sebuah hotel ditu kena Hari Satu tu tadi.

Woksyop tu nyadi inisiatif strategik dalam pengawa ngenegapka pangku pengawa Ketuai Raban Bansa nyadi tiang ketuai komuniti ba renggat baruh.

Dalam jaku dipansutka iya, iya nyemetak madahka dalam napi pemar kemaya hari, Ketuai Kaum ukai semina bejalaika tanggungpengawa nyadi penyaga adat, tang mega nyadi fasilitator pemansang enggau kaul ti efektif entara rayat enggau perintah.

Sepemanjai atur pengawa nya, pesereta nyereta diisi bemacham isi ti meri nilai tambah, nyengkaum bekunsika penemu bekaul enggau adat Iban baka adat melaki bini, adat tebalu, adat ruang bilik enggau hak orang indu dalam institusyen ruang bilik.

Pengawa tu dipeda besai reti dalam nentuka penerus pesaka asal ngambika iya terus dijaga sereta dikemeranka setipak enggau arus pemansang kemaya hari.

Kelimpah ari nya, bala pesereta mega bisi dipeda enggau randau penyedar pasal penusah salah guna dadah enggau chara nagang, seriris enggau komitmen ti seruran dipejalaika dikena nempa komuniti ti bepengerai, likun sereta tan.

Ba hari kedua, woksyop nya ngemeratka sukut pengawa merintah enggau nyadi ketuai, kelebih agi bekaul enggau pangku pengawa enggau tanggungpengawa Ketuai Raban Bansa bepelasarka penetap Ordinan Kort Bansa Asal 1992.

Sama bisi dikemerat iya nya pengelandik ngatur protokol, bejaku ba mua mayuh sereta nyendiaka minit aum ti sistematik sereta efektif.

Woksyop ke diatur pengelama dua hari, berengkah ari 27 ngagai 28 April 2026 dikearap ulih ngenegapka kapasiti nyadi ketuai Ketuai Raban Bansa ngambika sida seruran relevan, bekuasa sereta ulih meransang pengelantang komuniti selampur.

Berebak enggau nya, Datuk Majang Renggi mega ngenataika pengaga ati iya ngagai raban pengatur ti udah bebendar ngatur program ti meri penguntung tu.

Iya ngarapka inisiatif baka tu terus ditegapka dikena nentuka penerus adat, pengelantang rama enggau pemansang komuniti ti meruan, kelebih agi ba kandang menua Samalaju. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

MUKAH, 30 April – Program Agenda Kebangsaan Malaysia Sihat (ANMS) dipeda bejalaika tanggungpengawa ti beguna dalam nambahka penyedar mensia mayuh senentang pemesai guna nyaga pengerai enggau nagang penyakit nengah chara idup bepengerai, pia ku Sapit Menteri Pengerai Malaysia, Dato Hajjah Hanifah Hajar Taib.

Ku iya, ANMS tu inisiatif ari baruh Opis Menteri Pengerai Malaysia ti ngembuan juluk deka ngenegapka pengelantang rayat nengah chara nagang enggau pelajar pengerai ti terus ba renggat komuniti.

Dulu ari nya, Hanifah ke mega Kaban Parlimen P213 Mukah nyereta sesi Tai Chi beserimbai enggau ANMS Bagi Menua Mukah 2026 ke diatur ba Padang Pesta Kaul kenyau ari pukul 7.30 pagi.

Program tu nerima timbal ti meransang ari komuniti lokal, lalu enggau nya ngayanka penerima positif komuniti ngagai inisiatif pengerai ti dibai.

Penyereta iya ba aktiviti nya mega ngayanka komitmen ketuai dalam ngelakuka gaya pengidup bepengerai enggau komprehensif.

Kelimpah ari sesi Tai Chi, bemacham aktiviti bukai mega bisi diatur ba selampur ANMS, nyengkaum aktiviti penyedar pengerai, meresa asas pengerai enggau bekunsika penerang bekaul enggau nyaga pengerai ungkup pemaik peranak ngelingi Mukah. -RBI

#ruaiberitaiban#newsiban#beritaiban

Rindu | Titih | Kunsika

MIRI, 30 April – Kort Majistret Miri II kemari ngukum siku lelaki beumur 27 taun jil enam bulan pengudah orang ke dituduh ngaku salah ba dawa ari baruh Seksyen 426 Kanun Keseksaan ketegal ngereja penyalah salah.

Penyalah nya dikereja kena 13 Januari 2026 urung pukul 11.30 malam ba sebuah palan pengentap pendiau di Ocean Park, Miri, lebuh orang ke dituduh ngimburka cat biru ba pagar mua rumah orang.

Pansik tetemuka penusah nya nyadi ketegal anak pemenggi rumau enda mayar duit injau ke digaga nengah online.

Ketuai Polis Pelilih Miri ngelalau mensia mayuh anang ngaul diri enggau pengawa nginjau duit ti enda beradat nyengkaum ari sindiket Ah Long ke diatu mega beoperasyen nengah ‘online’ dikena nyeliahka diri ari nyadi orang dipenakutka enggau kasar.

Mensia mayuh ke bisi ngembuan sebarang penerang bekaul enggau penyalah tu dipinta ngenataika penerang nya ngagai Indu Opis Polis Pelilih Miri tauka balai polis ke besemak enggau lengkas.

Kerejasama komuniti beguna amat dalam nentuka pengelikun enggau atur mensia mayuh seruran dijaga. -RBI

#ruaiberitaiban#newsiban#beritaiban

Rindu | Titih | Kunsika

KUCHING, 30 April – Komisioner Polis Sarawak, YDH CP Datuk Mohamad Zainal bin Haji Abdullah nyemetak madahka pengawa nyaga saksi ukai semina peminta prosedur aja, tang nyadi pelasar kunsi dalam ngetanka pengelurus.

Nitih ku iya, enti nadai jamin pengelikun ti tegap, pemerani saksi datai ke mua meri bukti deka tejanggal, lalu enggau nya ngeruga pemanah kesemua pekara pansik enggau dawa.

“Dalam pengawa deka ngenegapka sistem pengelurus jenayah sereta ngenegapka elemen pengelikun saksi di menua tu, pengawa nyaga saksi beguna amat,” ku iya

Datuk Mohamad Zainal nibarka jaku tu lebuh Pengerami Bejadi Seminar Program Nyaga Saksi ti diatur enggau pemujur besai di hotel tebilang do mengeri nya.

Pengerami nya ti ngempuruka pemesai kanan enggau pengari ari mayuh bengkah ejensi penerit atur, ngayanka komitmen ti tegap sereta terus dikena ngenegapka penau institusyen pengelikun menua, kelebih agi dalam nentuka setiap iku saksi ti datai ke mua diberi jaga ti komprehensif, begulai sereta nadai belembut.

Seminar tu mega nyadi pelasar strategik dikena ngenegapka jaringan kerejasama entara ejensi, kelimpah ari muka ruang endur bekunsi penemu, peneleba sereta ngenegapka chara pemadu manah dalam mutarka kes ti ngaul saksi berisiko tinggi. -RBI

#ruaiberitaiban#newsiban#beritaiban

Rindu | Titih | Kunsika

JULAU, 30 April – Sepenyampau RM32,000 udah diungkup ngagai PIBG Sekula Primari (SK) Nanga Entaih enggau Klinik Pengerai Nanga Entaih dalam pengawa ngenegapka perengka guna pelajar enggau servis pengerai ba genturung pendiau kandang menua nya.

Nitihka penerang ari Datuk Larry Sng Wei Shien, Chairman Kaunsil Industri Kayu Ramu Malaysia (MTIB), pengawa ngemanahka perengkaguna sekula enda tau enda dikemerat dikena nentuka nembiak menua pesisir enda tinggal ari kaban sida di kandang mengeri.

Tu mega ku iya, nyengkaum fasiliti pengerai ba menua pesisir ke seruran diberi perati ungkup komunikal lokal nguna servis pengerai.

“Kitai ngemeratka semua bidang, ukai semina pelajar aja, tang mega lumba enggau main sereta kurikulum,” ku iya lebuh bejaku ba Pengerami Ngintu Hari Buding Tebuka SK Nanga Entaih kemari.

Ku iya, pemansang nembiak meseti dipeda enggau holistik laban jemah ila pengulih, personaliti enggau pengangkun diri nyadi entara batang tisih raban pengaji.

“Laban jemah ila, sida ke udah badu besekula lalu sida deka minta pengawa, pengaji ba endur gawa deka nemu pengulih sida, personaliti, penau ngereja pengawa enggau pengandal sereta mayuh pekara bukai,” ku iya nerang.

Ku iya nambah, sukung ngagai guna sekula deka terus disediaka nyengkaum ari sukut nyendiaka perengka guna baka TV pintar enggau pengawa ngemanahka infrastruktur.

“Kitai ukai semina ngemeratka semua kurikulum aja, nya alai, ari aku, aku nyukung penuh sekula ba pengawa enggau guna ti dikedekaka sida.

“Kekadang sida minta bantu ba pengawa meli TV pintar, ngemanahka infrastruktur sekula enggau semua pekara ke beguna amat ngagai sekula,” ku iya.

Iya mega ngarapka semua perengka guna ulih diangkatmanah ngambika ulih nempa palan belajar ti lantang sereta meruan.

“Aku enggaika kitai tinggal enti dibanding enggau sida di kandang mengeri lalu aku ngarapka pekara tu diberi perati dalam ngangkatka tikas perengka guna ke diguna bala nembiak kitai,” ku iya nambah. -RBI

#ruaiberitaiban#newsiban#beritaiban

Rindu | Titih | Kunsika

PAKAN, 30 April – Saberkas Pampang Pakan deka ngatur Program Beperesa Mata Pechuma nengah kerejasama Klinik Pakar Mata Sepital Sarikei dikena meri penguntung ngagai peranak menua nya.

Program tu deka diatur kena 9 Mei 2026 (Hari Enam), berengkah ari pukul 9.00 pagi nyentuk pukul 2.00 lemai ba Dewan Masyarakat Pakan.

Mensia mayuh dilalau datai ngambika ulih beperesa mata enggau enda bebayar kelimpah meri penyedar pasal pemesai guna nyaga pengerai mata.

Piak pengatur mega ngelaluka penatai mensia mayuh besaup ngerembaika penerang senentang program tu ngambika mayuh agi peranak teulihka pemaik ari inisiatif tu. -RBI

#ruaiberitaiban#newsiban#beritaiban

Rindu | Titih | Kunsika

NGEMAH, 29 April – Lumba enggau main beguna amat dalam nempa personaliti nembiak, ukai semina ngangkatka pengerai tubuh, tang mega nerenakka disiplin, semangat beraban enggau daya pengetan runding.

Nitih ku Kaban Kunsil Nengeri (ADUN) N.49 Ngemah, Anyi Jana, lumba enggau main mega bidang ke pemadu manah dikena nempa identiti, semengat besemekih enggau penyerakup entara nembiak.

“Lumba enggau main ukai semina pekit aja, tang bidang dikena nempa identiti, semengat besemekih enggau penyerakup,” ku iya nyemetak.

Anyi mansutka jaku tu lebuh bejadika Pekit Lumba enggai Main Antara Rumah Sukan Nitihka Tingkatan Kali Ke-66 di SMK Sedaya.

Berebak enggau nya, iya meri pengaga ati ngagai sekula nya laban udah mujur nyulut ba peresa Sijil Pelajaran Malaysia (SPM) 2025 enggau tikas pas 99.22 peratus, ti dipadahka asil ari pengawa bebendar bala nembiak, dedikasyen pengajar enggau sukung apai indai.

Iya mega meransang bala nembiak ngambika terus bebendar dalam pelajar sida, kelebih agi enggau peluang pelajar enda bebayar ti majak ngerembai nyengkaum masuk ngagai palan pelajar tinggi ti diempu Sarawak.

Kelai sukung ngagai pemansang pelajar enggau aktiviti sekula, iya mega ngentaika pemeri bantu penyampau RM10,000 nengah agih belanja Projek Mit Menua Pesisir (MRP) ngagai sekula nya. -RBI

#ruaiberitaiban#newsiban#beritaiban

Rindu | Titih | Kunsika

SRI AMAN, 29 April — Kaban Parlimen Sri Aman YB Dato’ Sri Doris Sophia Brodie ngulu Pengerami Santai: ‘ Prihatin Menyantuni Rakyat’ ti diatur ba Rumah Panggai, Melugu Dau pagi tadi.

Program tu siti ari chara ti seruran dipejalaika pengari rayat dalam pengawa ngelawa komuniti ngelingi, kelimpah ari ngerapitka kaul dua piak entara ketuai enggau komuniti renggat baruh.

Iya mega nyadika pelasar dikena ngenataika pesan penyerakup sereta mantaika pengibuh ngagai pengelantang pendiau rayat ba kandang menua nya.

Dalam jaku dipansutka iya, Doris Sophia Brodie ngemeratka pemesai guna nerenak sereta ngenegapka semengat beserakup entara komuniti dikena nentuka penegap enggau pengelantang ke diasai kemaya hari tu ulih terus dijaga sereta ditegapka jemah ila.

Iya mega minta sukung ngagai Gabungan Parti Sarawak (GPS) ngambika terus ditegapka agi, setipak enggau komitmen Perintah Sarawak ti seruran ngemeratka agenda pemansang enggau pengelantang rayat nengah chara “Sarawak First”.

“Penyerakup kitai nyadi peranak Sarawak beguna amat laban nyadi pelasar penegap dalam negika hak Sarawak ti patut dijaga, pia mega nentuka penegap enggau penyulut nengeri tu terus dijamin,” ku iya.

Pengerami nya mandangka pengawa ketuai kandang menua ti seruran dipejalaika dalam ngerapitka kaul enggau rayat sereta nentuka agenda pemansang enggau pengelantang komuniti terus diberi perati enggau chara ti inklusif sereta terus. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

Sumber, photo — Doris Sophia Brodie

LUNDU, 29 April — Program Kus Ngenegapka Ketuai Komuniti enggau Ketuai Raban Bansa (KMKK) ungkup sitak DUN Opar enggau Tanjong Datu udah mujur dipejalaika pengelama dua hari berengkah 28 ngagai 29 April 2026 ba Auditorium Kaunsil Pelilih Lundu.

Program ke diatur Opis Pelilih Lundu enggau kerejasama mayuh bengkah ejensi strategik nya ngembuan tuju deka ngenegapka pengawa merintah, kompetensi enggau penau nyadi ketuai KMKK dalam bejalaika tanggungpengawa nyadi penyambung entara perintah enggau komuniti ba renggat baruh, setipak enggau aspirasyen pemansang nengeri ari baruh Pelin Pemansang Pengudah COVID-19 2030 (PCDS 2030).

Sepemanjai program nya, bala pesereta ngulu mayuh macham sesi latih ti mungkur sukut nyadi ketuai komuniti, ngatur organisasyen, prosedur aum, isu kemaya hari enggau intervensyen rama.

Sesi nya dikenataika sekeda ejensi nyengkaum Unit Perambu Ekonomi Sarawak (EPU Sarawak), Akademi Kenegaraan Malaysia (AKM), Institut Tadbiran Awam Negara (INTAN), Polis Diraja Malaysia (PDRM) enggau Ejensi Anti Dadah Kebangsaan (AADK).

Program nya mega dikemeratka Sesi Aspirasi begulai iya nya Yang Berhormat Billy Anak Sujang enggau Yang Berhormat Azizul Annuar Adenan.

Sesi tu nyendiaka ruang interaksyen dua piak dalam tukuh balai raya enggau pesereta, kelimpah ari ngenataika pesan bekaul enggau agenda pemansang sereta utai ke diguna komuniti setempat.

Ba pengawa ke sama, pengawa nyuaka surat chiri enggau setipikit basa ngagai KMKK mega bisi diatur dikena ngaku pemeri enggau pangku pengawa sida ngenegapka sistem meri servis perintah ba renggat baruh.

Pengawa ngatur program tu dikearapka ulih terus ngenegapka rentayan kerejasama strategik entara KMKK enggau ejensi perintah, lalu ari nya ulih nambahka pemanah pengawa merintah komuniti sereta nentuka pemansang ti lebih inklusif, meruan sereta meri empas tinggi di pelilih Lundu. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

SARIKEI, 29 April – Mensia mayuh ditesau nyereta Liga Lumba enggau Main Komuniti 2026 renggat Bagi Menua Sarikei ti deka diatur kena 13 Jun tu ila, enggau bemacham pengerami ti ngerinduka ati deka dipekit dikena ngelakuka gaya pengidup ti bepengerai sereta ngenegapka kaul komuniti.

Program ke diatur Opis Nembiak enggau Lumba Bagi Menua Sarikei deka bepekit ba tiga bengkah lumba enggau main iya nya futsal lelaki, main bol jaring indu enggau main volleyball lelaki.

Ungkup pekit futsal, pekit deka diatur ba Padang Futsal Mambu Temenggong, Pakan, lalu main bol jaring enggau volleyball deka diatur ba Dewan SMK Tinggi enggau padang volleyball sekula nya.

Bayar penyereta ditetapka RM50 ungkup tetiap tim, lalu haribulan penutup ngerejista kena 8 Jun 2026.

Mensia mayuh ke bisi ati tau ngambi pom penyereta nengah ‘batak turun’ nengah ‘link’ ke disediaka nitihka kategori lumba enggau main, kelimpah ari ngambi terus ba Opis Nembiak enggau Lumba Bagi Menua Sarikei.

Bagi futsal https://drive.google.com/…/1_ODqxzNFA1S2x…/view…, bol jaring https://drive.google.com/…/1HzPUemoK-B771nw4…/view… enggau volleyball https://drive.google.com/…/1a3FWmIbYipihVeq9LlT…/view….

Sebarang tanya bukai tau ditanya ngagai Haji Abdul Rani nengah lumur 017-270 5371.

Pengawa ngatur liga tu dikearap nyadi pelasar ti beguna dalam pengawa ngulihka penau baru sereta nerenakka semengat lumba enggau main ba komuniti lokal. -RBI

#ruaiberitaiban#newsiban#beritaiban

Rindu | Titih | Kunsika