SIBU, 27 April — Sebengkah tulis ti ada ari semengat ti penuh pengibuh ngagai sejarah bansa deka ulih ngidupka baru semengat merdeka ti jeman moden.

Sapit Menteri Besai, Datuk Fadiilah Yusof madah, bup ke diberi nama “Secebis Kisah Perjuangan Bangsa: Ikhlasnya Pengorbanan, Indahnya Kemerdekaan” ke ditulis niang Haji Hamdan Haji Marais tauka dikelala enggau nama Pak Den, ukai semina rikod sejarah aja, tang manuskrip ke penuh enggau runding ke negu ati, semangat enggau pengawa ngetanka menua.

Kenu ku iya, pengawa nya semak endar ba ati iya laban kelimpah ari niang Pak Den nyadi aya iya, bup nya mega ngerikod pengawa apai indai iya, niang Haji Yusof Haji Marais enggau niang Rosnah Abang Madeli ke kala enggau dalam ngelaban perintah British ba pengawa ngiga jalai merdeka.

“Di belakang setiap lambar ti ditulis, bisi darah, ai mata enggau semengat bala orang ke ngangkatka menua.Pengawa tu ngidupka baru semengat merdeka ti patut dikenang,” ku iya lebuh bejaku ba pengerami ngelancharka bup nya.

Iya mega nerangka kangau ari Dewan Bahasa dan Pustaka (DBP) ngelancharka bup nya siti basa ke besai.

Ngelansa pasal isi bup nya, Fadiilah madahka manuskrip nya nyidi pejalai panjai pengawa komuniti Melayu di Sarawak kelebih agi di Sibu dalam negika kedaulatan enggau maruah bansa.

Iya berengkah enggau pengawa ngelaban penatai James Brooke, lalu ditangkan enggau pemansang ari baruh pegai Kesultanan Brunei, lalu mantaika tukuh tumu baka Petinggi Ali enggau Sharif Masahor ke nyadi lambang pemerani komuniti lokal.

Kelimpah ari nya, bup tu mega nyerenih asal penatai komuniti Melayu di Sibu enggau pangku pengawa serakup enggau organisasyen dalam ngenegapka penyerakup sereta ngetanka hak komuniti nya.

“Pengawa tu mega mai bala pemacha meretika penyedar politik nyengkaum pengawa ti mantah atur nyerahka Sarawak ngagai British,” ku iya nerang.

Ku iya nambah, jerita pengawa ngetanka menua nya ditegapka agi enggau pemerani tukuh baka Rosli Dhoby enggau raban Rukun 13 ti nyadi kelai pemerani enggau penyayau ngagai menua asal.

Kenu ku iya, bup nya kepenudi nyimpulka pejalai Sibu nuju pemansang ba jeman Malaysia merdeka, seraya terus ngingatka jasa orang ke dulu suba.

“Bup tu ngingatka kitai, merdeka enggau pengelantang ke diasaika kemaya hari tu ukai datai enggau mudah, tang asil ari pengawa besai rebak ke dulu ari kitai.

“Sejarah tu begunaka terus dijaga sereta dipebasaka, kelebih agi rebak baru ngambika semengat talukka menua seruran bisi,” ku iya.

Iya mega meri besai terima kasih ngagai DBP ti seruran bebendar negika jaku, sastera enggau budaya menua tu nengah pengawa mansutka karya ti nyadi pesaka asal bansa.

“Ngarapka bup tu ulih nyadi malin enggau inspirasyen ti beguna ngagai komuniti ngambika terus angkunka sejarah sereta ngenegapka identiti bansa,” ku iya. -RBI

#ruaiberitaiban#newsiban#beritaiban

Rindu | Titih | Kunsika

KUCHING, 26 April – Kompleks Unit Pekara Jalai Pengarap Bukai (UNIFOR) deka nyadi pelasar beguna dalam ngenegapka kaul entara komuniti pupu jalai pengarap nengeri tu.

Kompleks tu mega ngayanka chara lama Sarawak ti ngemeratka penyerakup nengah pengawa ngaul diri, bebasa sereta megai tanggungpengawa bekunsi dalam nempa raban bansa ti lantang begulai.

Premier Sarawak, Datuk Patinggi Tan Sri (Dr) Abang Haji Abdul Rahman Zohari bin Tun Datuk Abang Haji Openg, nerangka kompleks nya nyadi ruang guna ti digaga dikena ngemudahka randau, kerejasama enggau mutarka isu begulai entara komuniti jalai pengarap.

Iya nyemetak madahka bida enda patut dipeda nyadi pemar, tang nyadi penegap ke ulih dikena nengah inisiatif ke betukuh baka UNIFOR, ti nyendiaka langkar institusyen dikena ngerapitka kaul entara gerempung pengarap ukai Islam.

“Bida enda ulih diseliah dalam sebarang raban bansa, tang ke beguna iya nya chara kitai ngatur iya.

“Kompleks tu nyendiaka ruang endur berandau enggau tebuka sereta meretika pangan diri dikena nentuka pengelantang dijaga,” ku iya.

Berebak enggau nya, iya mega meri puji ngagai kerejasama mayuh bengkah piak dalam ngamatka projek nya, kelebih agi pangku pengawa Sapit Premier Datuk Amar Douglas Uggah Embas enggau ketuai jalai pengarap dalam nempa visyen penyerakup nengeri nyadi nyata sereta sebuah institusyen ti beguna.

Ari sukut pemansang, Kompleks UNIFOR ukai semina nyadi palan pentadbiran jalai pengarap, tang mega bisi potensial nyadi palan endur ngatur aum besai, program rama enggau inisiatif komuniti ti ulih meri pangka ngagai kerejasama rama sereta nyungkak aktiviti ekonomi kandang menua.

Kompleks nya mega ngayanka komitmen Sarawak ngagai pemansang ti meruan lebuh bulih setipikit Indeks Begunan Hijau (GBI), lalu enggau nya ngayanka aplikasyen elemen langkar ti meruan setipak enggau agenda pemansang timpuh panjai nengeri tu.

Digaga ngena ungkus urung RM80 juta ba tanah pemesai tiga ekar, begunan 10 ringkat nya disikap enggau mayuh macham perengka guna moden nyengkaum dewan pengerami besai, perengka guna aum besai, palan endur bejual enggau taman atas perabung ti nyukung mayuh macham pengawa besai.

Pengawa numbuhka Kompleks UNIFOR mega ngenegapka atur bejalaika Strategi Pemansang Pengudah COVID-19 2030 (PCDS 2030), kelebih agi dalam meransang pemansang inklusif sereta ngenegapka sukung institusyen ungkup pengelantang rama.

Nengah rampa sosial ke majak mar, Kompleks UNIFOR dipeda nyadi puku jemah ila dalam ngenegapka penyerakup dalam meri kuasa ngagai randau sereta nentuka pengelantang mengkang nyadi pugu penyulut Sarawak. -RBI

Info & gambar kredit Sarawakku

#ruaiberitaiban#newsiban#beritaiban

Rindu | Titih | Kunsika

KUCHING, 26 April 26 — Pengawa muka rasmi Komleks Unit Pekara Jalai Pengarap Bukai (UNIFOR) Sarawak mandangka komitmen Perintah Sarawak terus ngetanka pemaik, pengelantang enggau ulah bebasaka pangan diri nyadi penegap raban bansa nengeri tu ti mayuh macham.

Sapit Premier Sarawak, Datuk Amar Douglas Uggah Embas madah, kompleks nya ukai semina kelai fizikal aja, tang nyadi kelai pengeran perintah nengeri nentuka semua komuniti jalai pengarap terus diberi ruang, sukung enggau kelala dalam proses pemansang.

Iya madah munyi nya ba jaku pengelalu beserimbai enggau pengawa bejadi rasmi kompleks nya ti dipenyadika YAB Premier Sarawak ialah Datuk Patinggi Tan Sri Dr. Abang Haji Abdul Rahman Zohari bin Tun Datuk Abang Haji Openg, ditu, sehari tu.

Nitihku iya, ba dunya ke majak kompleks sereta besambung enggau pangan diri, rayat Sarawak meseti terus bepegai ba nilai ke sama iya nya pemaik, seraya ngetanka chara ke mudah, inklusif sereta bebasa.

“Penyerakup ukai nyadi ‘kebetulan’. Iya begunaka pengawa ti enda ngetu, ngaul diri enggau lurus sereta pengeran bekunsi bebasaka bida seraya ngerami nilai mensia universal,” ku iya.

Ku Uggah, UNIFOR iya nya inisiatif strategik Perintah Gabungan Parti Sarawak ti ditumbuhka bepelasarka penemu jauh ketuai nengeri dikena nyukung sereta ngenegapka komuniti ukai Islam di serata Sarawak.

Ku iya, Sarawak aja nengeri di Malaysia ti bejalaika chara baka nya nengah penumbuh UNIFOR, lalu enggau nya mandangka model merintah ti nyelai ti ngemeratka pengelantang, bebatak asur enggau pengelantang bekunsi.

Ku iya nambah, pangku pengawa UNIFOR ukai semina nyadung bantu ngagai rumah sembiang aja, tang mega befungsyen nyadi jematan penyerakup ti ngelakuka randau, kerejasama enggau pemereti ati entara bemacham pengarap.

“Nengah pengawa nyukung guna semengat rumah sembiang jalai pengarap bukai, UNIFOR terus ngenegapka pelasar pemaik, basa enggau penyerakup ti udah lama nyadi penegap Sarawak nyadi model pengelantang,” ku iya.

Kompleks UNIFOR ti digaga ngena ungkus RM75.663 juta, ngembuan langkar moden enggau konsep “One Wrap” sereta langkar ti meruan enggau motif bintang ti berulang nyadi kelai penyelai pupu bansa mensia di Sarawak.

Begunan 10 ringkat nya digaga ba tanah pemesai 3.19 ekar ba kandang endur ti strategik dikelala enggau nama “Unity Lane”, besemak enggau sekeda institusyen ti beguna baka Palan Pemadah Islam (IIC) Yayasan Budaya Dayak (DCF), Balai Dagang enggau Industri Dayak (DCCI) enggau Gerempung Bansa Dayak Bidayuh (DBNA).

Setipak enggau agenda pemanah rampa menua, kompleks nya digaga bepelasarka Indeks Begunan Hijau enggau ngena penampak asal, sistem angin ti efisyen sereta perengka elektrik ti ngelimatka kuasa.

Perengka guna ke bisi disediaka nyengkaum menara opis semilan ringkat, lounge eksekutif enggau dua bilik function, taman atas beratap, dewan pengerami makai lemai ke ulih endur 1,000 iku orang, semilan unit palan komersial enggau 286 palan endur ngengkah kerita nyengkaum pengecas perengka pengangkut elektrik ari SEDC Energy.

Ku Uggah, perengka guna ba ringkat semilan enggau taman atas beratap ba ringkat 10 disedia enggau enda bebayar ungkup guna mayuh bengkah palan besembiang, lalu enggau nya meransang interaksyen enggau randau entara jalai pengarap.

Ku iya, kompleks nya deka nyadi pelasar ti dinamik dikena ngenegapka pemereti ati enggau kaul ti harmoni entara bemacham komuniti jalai pengarap di nengeri tu.

Nitihku iya, Perintah Sarawak udah ngemendarka agih belanja sepenyampau RM685 juta ngagai UNIFOR ari taun 2017 ngagai 2026, kelimpah ari nerima pemeri tanah besepiak ari Arif Hemat Sdn Bhd (Samling).

Ku iya nambah, kompleks nya deka diurus Lembaga Amanah Kebajikan Unit Hal Ehwal Agama Lain Sarawak (SUCT) ti udah digazet kena 25 April 2018 ari baruh Ordinan Amanah Kebajikan 1994.

Kelimpah ari ngatur begunan nya, SUCT mega nyukung bemacham aktiviti jalai pengarap nyengkaum program pengelantang pendiau, aktiviti semengat sereta mega bantu bebelika perabot enggau perengka elekterik.

“Ari taun 2025 nyentuk Mac 2026, sepenyampau RM629,000 udah dipelanja dikena nyukung pengawa bejalaika 26 program ti ngaul aktiviti pengelantang pendiau enggau jalai pengarap,” ku iya.

Iya mega meri besai terima kasih ngagai Premier Sarawak ketegal ti seruran meri sukung ngagai operasyen SUCT sereta mega ngagai pemeri nyengkaum PETROS, Sarawak Energy Berhad, Pengeluar Kuasa Hidro Bakun enggau Bank Pemansang Sarawak.

Uggah nyemetak madah, pemisi Kompleks UNIFOR nyata ngayanka penyerakup enggau pemaik di Sarawak terus dijaga nengah polisi ti praktikal, inklusif sereta ngemeratka pemerat semua renggat mensia mayuh.

Iya mega minta rayat Sarawak terus nyukung ketuai nengeri dalam pengawa ngenegapka pengelantang, nempa komuniti ke tan sereta ngetanka pemaik ke diasai kemaya hari tu.

“Kitai betuah laban bisi ketuai ti inklusif, progresif sereta komited nyadi ketuai ungkup semua” ku iya. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

BETONG, 26 April — Pengerami Nangguhka Regatta Betong 2026 Regatta Betong 2026 diatur enggau chukup pengeransing ba Tebing Ai Betong, lalu enggau nya nutup pengawa ngatur pengawa lumba enggau main ai ninting taun ti nyadi fokus komuniti menua tu enggau temuai ari menua luar.

Kaban Parlimen Betong Dato Dr Richard Rapu ti ngarika Sapit Premier Sarawak Datuk Amar Douglas Uggah Embas ke Menteri Pekara Wang enggau Ekonomi Baru sereta Menteri Infrastruktur enggau Pemansang Pelabuhan Sarawak, bisi datai bejadika pengawa nangguhka pengawa nya.

Penatai iya ngerichahka agi gaya pengerami ti diisi enggau semengat lumba enggau main, beserakup sereta ngaul komuniti ari bemacham lapis.

Pengawa ke diatur ari 15 ngagai 26 April 2026 tu, meda penyereta mayuh bengkah tim bepekit enggau pengeransing ke besai, disiplin sereta daya bepekit ke tinggi, lalu enggau nya ngayanka pemujur gerempung ke diatur enggau manah sereta meri empas ke tinggi.

Dato Dr Richard Rapu dalam penerang rasmi iya madah pengawa meri terima kasih enggau terima kasih ke pemadu tinggi dirikod ngagai semua piak ke bisi kaul enggau pemujur ngatur Regatta Betong 2026.

“Menang tauka alah endang adat bepekit, tang semengat lumba enggau main enggau pengawa ti enda ngetu enda tau enda diteruska ba taun-taun ke deka datai.”

Iya mega ngenataika pengaga ati ngagai semua penyereta ke bisi ngambi bagi lalu minta semengat lumba enggau main sereta penyereta chakah terus ditegapka ba edisyen ke deka datai.

Pengerami nangguhka pengawa tu ukai semina nyadika kelai pengawa nutup enggau rasmi, tang mega nyadi kelai ngenegapka penyerakup komuniti sereta nyadi penyungkak pemansang sosio-ekonomi setempat di kandang menua Betong. — RBI

NIAH, 26 April — Sarawak begunaka rebak baru ti bepenemu tinggi sereta bepenau nguasa teknologi jemah ila baka Pemintar Tiru (AI) enggau teknologi moden dikena nentuka nengeri tu enda tinggal ari arus pemansang dunya.

Menteri Industri Pemakai, Komoditi enggau Pemansang Kandang Menua Sarawak, Dato Sri Dr Stephen Rundi Utom nyemetak madah, kuing pemansang nengeri jemah ila diatu bepanggai ba nembiak ti nyulut dalam pelajar, kelebih agi napi pemar teknologi baru.

Iya madah munyi nya program ke diatur ba Rumah Lawrence, Bukit Kenyalang, seraya minta mayuh agi peranak Sarawak ngemeratka bidang STEM, kelimpah ari ngenegapka pengelandik Jaku English enggau pengelandik teknikal sida ngambika setipak enggau guna pemansang maya ke diatu.

Beambika chunto sektor betanam betupi, iya nerangka chara tradisional aja enda chukup agi dikena nambahka asil.

“Dikena nambahka asil betanam betupi, kitai begunaka injin, sistem automasyen, dron enggau ke bukai.

“Enti kitai enda belajarka teknologi tu, kitai enda ulih ngena iya. Peratika aja menua baka China, Taiwan enggau Thailand, sida udah lama ngena mekanisasyen baru,” ku iya.

Berebak enggau nya, iya mega ngelalau peranak Sarawak ngena penuh peluang belajar enda bebayar ba institusyen ke diempu perintah nengeri baka Universiti Curtin di Miri, Kolej Universiti i-CATS, Universiti Swinburne di Kuching enggau Universiti Teknologi Sarawak (UTS) di Sibu.

Nitih ku iya, atur tu beguna amat dalam ngadaka rebak “orang ti pintar” ti bepenau meransang transformasyen Sarawak nuju nengeri maju bepelasarka teknologi enggau inovasyen. -RBI

KUCHING, 26 April — Sepenyampau 216 iku pesereta mujur nembuka kelas Budaya Dayak Iban (Ngajat, betabuh, Ai Ansah enggau kuntau) ke diatur Gerempung PEMADAS ba pengerami makai lemai meri terima kasih ke diatur ba Palan Christian Ecumenical Worship Centre (CEWC), kemari.

Pengerami nya bela digulu Sapit Menteri Dagang Temuai, Industri Kreatif enggau Seni Persembahan Sarawak ke mega Kaban Kunsil Nengeri (ADUN) Balai Ringin, Datuk Snowdan Lawan ke nyadi Penaung PEMADAS.

Pemungkal Dayak Bukit Kelingkang, (DBK) Victor Ason dalam jaku dipansutka iya ngenataika pengaga ati iya ngagai Datuk Snowdan Lawan ke udah sanggup nyadi penaung serakup nya kelimpah ari sukung iya ti seruran meri kuasa dalam ngenegapka seni enggau budaya komuniti Dayak.

Iya mega nerangka pengawa nyadi ketuai Datuk Snowdan nyadi seiti ari pugu ke besai reti dalam pengawa ngenegapka ngintu budaya, kelebih agi dalam nentuka seni asal baka ngajat mengkang relevan sereta diturun ngagai nembiak rebak baru.

“Kami amat beterima kasih ngagai pengeran YB Datuk Snowdan Lawan nyadi Penaung Gerempung Main Asal Dayak Sarawak (PEMADAS).”

“Sukung iya nyadi penyungkak ti beguna dalam pengawa meri ti bebasa ngagai pesaka asal Dayak,” ku iya.

Victor Ason mega ngelaluka mensia mayuh ngambika terus meri sukung ke tegap ngagai ketuai ke bisi diatu ba tuju nentuka penerus pemansang enggau pengelantang komuniti jemah ila.

Iya mega madahka kenyau ari taun 2021, kerejasama entara PEMADAS enggau DBK Pampang Melikin udah mujur ngadaka lebih 2,000 iku penari ngajat ke udah dilatih.

“Kenyau ari taun 2021, PEMADAS begulai enggau DBK Melikin udah ngadaka lebih 2,000 iku pesereta ti udah dilatih ba main ngajat, lalu enggau nya ngayanka komitmen sida terus dalam nentuka pesaka tu terus ngerembai,” ku iya.

Berebak enggau nya, iya ngenataika pengaga ati ngagai ketuai PEMADAS, DBK Melikin sereta mega apai indai ke seruran meri sukung dalam meransang penyereta nembiak rebak baru ba program main asal tu.

“Sukung ti tegap ari semua piak kelebih agi apai indai beguna amat dalam nentuka pengawa ngangkatka basa budaya Dayak terus mujur.”

“Aku ngarapka mayuh agi orang datai ke mua belajar sereta ngetanka seni pesaka tu,” ku iya nambah.

Dulu agi ari nya, iya nerangka pemujur program main asal nya mega diperansang ari pengawa ngatur belanja enggau efektif dikena nampung guna baka pengawa meli kereban asal, nyuwa dewan enggau pengawa ngatur pengawa mandangka main asal ti mungkur penyereta ari mayuh bengkah kandang menua nyengkaum ari luar Sarawak.

“Pengawa tu nyadi pelasar ke beguna dalam ngenegapka agi pengawa ngintu pesaka asal Dayak kelimpah meransang pengawa ngaul diri nembiak rebak baru enggau chakah dalam seni asal” ku Victor Ason nerang ngagai Ruai Berita Iban. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

BINTULU, 26 April – Dikena ngerapitka kaul renggat baruh sereta ngempung raban nembiak, Raban Nembiak Parti Progresif Demokratik (PDP) Bagi Menua Bintulu begulai enggau empat pampang bukai udah ngatur program bekelala ba Pantai Tanjung Batu sehari tu.

Antara ngulu program tu iya nya nembiak ari Pampang N67 Jepak, N68 Tanjung Batu, N69 Kemena enggau N70 Samalaju, lalu enggau nya nyadi pelasar nyerakup ketuai biak ari mayuh bengkah kandang menua.

Kelimpah ari nya mega, bela diatur iya nya pekit main bol pantai dikena meransang kerjasama enggau semangat tim, pengawa manggang mega bisi diatur nyadi pelasar dikena ngerapitka kaul sereta meri kelala kaban ngagai pangan diri. -RBI

#ruaiberitaiban#newsiban#beritaiban

Rindu | Titih | Kunsika

PAKAN, 26 April – Tanggungpengawa nempa pengidup nembiak jemah ila ukai semina dilempaika ba bau pengajar aja, tang begunaka kaul apai indai enggau komuniti dalam nempa rebak baru ti bekualiti.

Penyanding Penemu ba Opis Premier Sarawak (Industri Pemakai, Komoditi enggau Pemansang Kandang Menua), Tan Sri William Mawan Ikom nyemetak madahka tanggupengawa begulai dalam narak nembiak endang patut disan semua.

“Pangku pengawa pengajar dalam nerenak nembiak udah nyata efektif dalam nempa modal mensia ti nyulut.

“Ari sukung semua kelebih agi apai indai, nempa nembiak baru ti bekualiti deka lantang agi,” ku iya ke mega Kaban Kunsil Nengeri (ADUN) Pakan.

Iya mansutka penemu ti beserimbai enggau pengawa bejadika Dewan Sri Kota sereta Program Merarau ti diatur ba Sekula Primari (SK) Nanga Kota kemari.

“Pengawa tu nyadi kelai komitmen terus ngenegapka perengka guna pelajar menua pesisir, lalu enggau nya nyukung pemansang komuniti menua tu,” ku iya nerang.

Tan Sri Mawam mega madah, pemansang semina ulih dipejalaika enggau efektif nengah kaul rat entara Perintah Besai enggau Nengeri.

Ngelansa pasal palan baru nya, iya madahka penembu Dewan Sri Kota beguna amat dikena nyukung bemacham aktiviti sekula, lalu enggau nya nyendiaka palan belajar ti lebih kondusif.

Kenu ku iya, nadai bida pengawa ngemansangka menua laban tanggungpengawa nya ditanggung begulai, nya alai kerejasama enggau pemanah kaul entara semua piak beguna amat dalam nentuka pemansang ulih dipejalaika enggau komprehensif.

Ba jaku iya mega, Mawan ngingatka mensia mayuh anang mudah tekuing runding enggau berita selebubu ngapa tauka berita pelesu ba media rama ti tau nyaru runding sereta ngeruga runding ti rasional.

Kelai nyukung pemansang sekula, iya mega bisi ngenataika agih belanja penyampau RM10,000 nengah geran MRP ungkup PIBG SK Nanga Kota.

Nambahka nya, iya madahka sebarang peminta bantu tau dianjung nengah jalai rasmi disempulang enggau surat peminta. -RBI

#ruaiberitaiban#newsiban#beritaiban

Rindu | Titih | Kunsika

KANOWIT, 26 April – Program Ketuai Begulai Enggau Rayat di Rumah Martin La, Emperan Paoh, Sungai Poi nyadi pelasar ke beguna dalam ngenyemakka diri enggau komuniti sereta meretika utai ke amat diguna peranak menua nya.

Kaban Kunsil Nengeri (ADUN) Machan, Allan Siden Gramong madah, chara nurun ke ngelawa rayat ulih meri peluang ngagai bala ketuai mendingka diri empu penanggul, guna enggau penemu rayat ba renggat baruh.

Nitih ku iya, randau betunga mua baka tu beguna amat dikena nentuka setiap isu ke dibantai ulih dikelala sereta diberi perati ke patut, lalu enggau nya ulih mantu merambu pelin pemansang ke lebih efektif ungkup kandang menua nya.

Iya mega meri besai terima kasih ngagai Tuai Rumah Martin La enggau semua peranak rumah panjai nya ketegal sambut enggau kerejasama ti dipandangka sepemanjai program nya.

Aum nya mega digulu Penghulu Pelilih Kanowit, bala kaunselor, Tuai Rumah, ketuai Exco PBB Kanowit enggau bala temuai bukai ke dikangau.-RBI

#ruaiberitaiban#newsiban#beritaiban

Rindu | Titih | Kunsika

KUCHING, 26 April — Presiden Parti Bumi Kenyalang (PBK), Voon Lee Shan udah merambu visyen timpuh panjai ti minta Sabah enggau Sarawak mansik pekara wang ke besai agi, nyengkaum perambu konsep numbuhka institusyen bank bepalan di Borneo.

Iya merambu numbuhka “Bank Sarawak” enggau “Bank Sabah,” ti bisi potensial beoperasyen begulai enggau randau pasal instrumen wang menua.

Perambu nya ku iya, ngembuan tuju deka muka randau nasional bekaul enggau ngenegapka pengulih pekara wang serantau dalam langkar Konstitusyen Perintah Besai Malaysia.

Nitih ku Voon, inisiatif nya ngembuan tuju deka mansik baka ni penegap kuasa wang serantau ulih mantu ngurangka birokrasyen, nambahka akses ngagai puku, sereta ngenyampatka pengawa bejalaika projek pemansang di Malaysia Timur, seraya ke agi nitihka undang-undang perintah besai sereta ari baruh kemata Bank Negara Malaysia.

Iya nyemetak madahka perambu tu ukai semina institusyen aja, tang strategik, nyadi pengawa dikena ngelangkar baru atur pengawa wang ti ulih ngenegapka ekonomi Sabah enggau Sarawak sereta meri pangka ti lebih dinamik ngagai penumbuh Malaysia ba selampur iya.

Voon nerangka visyen tu nyadi sebagi ari “pengawa ngiga pengelepas” dalam sukut pekara wang enggau bank, ti ​​fokus ngagai pemansang struktur timpuh panjai ungkup kedua-dua nengeri tu. – RBI

#ruaiberitaiban#newsiban#beritaiban

Rindu | Titih | Kunsika