KUCHING, 9 Mei — Parti Pesaka Bumiputera Bersatu (PBB) majak nyerenih strategi organisasyen parti nengah pengawa ngatur Konvensyen PBB Sarawak ti ngaul empat zon besai ti diperambu deka nyadi berengkah ari bulan Julai ngagai September taun tu.

Pekara tu dipadahka Sekretari Besai PBB Dato Sri Alexander Nanta Linggi ke mega Kaban Parlimen Kapit nengah penerang berita pengudah ngulu Aum Kaunsil Tertinggi PBB Sarawak ba Indu Opis PBB, Jalai Bako, sehari tu tadi.

Nitihku iya, konvensyen nya deka ngaul Zon Selatan, Zon Betong, Zon Tengah enggau Zon Utara lalu deka nyadi pelasar beguna dalam ngenegapka pengawa parti ba renggat baruh.

“Konvensyen tu deka nyadi pelasar ti beguna dikena ngenegapka agi pengawa parti ba renggat baruh, ngelengkaska kuing organisasyen sereta nentuka PBB terus nyikap diri napi rampa politik ke diatu enggau jemah ila,” ku iya.

Ku iya, pengawa ngatur konvensyen nya ngayanka komitmen parti ti terus ngenegapka penyerakup dalam, kelimpah ari nentuka organisasyen nya seruran relevan sereta tegap dalam napi pemar politik jemah ila.

Ku iya nambah, haribulan bejalaika pengawa enggau rambai jaku rasmi konvensyen nya deka ditukuka pengudah aum koordinasyen ti diperambu deka diatur dalam timpuh ke semak.

Dalam penerang ke sama, iya ngarapka pengawa nya deka terus ngenegapka komitmen enggau kuing PBB ungkup penegap politik, penyulut enggau pengelantang rayat Sarawak. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

BETONG, 9 Mei – Pengelikun ba Palan Belelak enggau Ngetu (R&R) Jelukong deka dipatau 24 jam sehari dikena nentuka gaya ti likun, teratur sereta kondusif ngagai bala temuai lebuh maya udah berengkah beroperasyen.

Nitihka penerang ari Opis Kereja Raya (JKR) Sarawak, R&R Jelukong ba Jalai Besai Pan Borneo semak Engkilili pengudah Simanggang dipelaba berengkah beoperasyen penuh kena 15 Mei tu.

JKR Sarawak mega madahka, sekeda bansal mega udah berengkah beoperasyen ba skala mit nyadika pemungkal dikena meri peluang ngagai penguna jalai besai ngasaika perengkaguna enggau lantang ba R&R Jelukong.

Sehari tu, Direktor Opis Kereja Raya (JKR) Sarawak, Dr.Cassidy Morris, bejalaika pengawa meresa penyikap operasyen bansal pemakai enggau kedai ba R&R nya.

“Penemuai tu ngembuan tuju deka beratika baru tikas penyedia perengka guna sereta nentuka semua sukut operasyen dalam gaya ke manah sebedau pengawa muka penuh diperambu berengkah kena 15 Mei 2026,” ku penerang nya.

Kelimpah ari nya, pengawa meresi enggau ngintu kandang endur nya mega benung chakah dipejalaika ti ngaul perengka guna jamban, surau enggau kandang ngelingi dikena nentuka pengelantang penguna seruran ba tikas ke pemadu manah. -RBI

#ruaiberitaiban#newsiban#beritaiban

Rindu | Titih | Kunsika

MIRI, 9 Mei — Perambu ngaga Jematan Marina siti ari inisiatif ti beguna dalam ngenegapka penyambung kandang menua Miri enggau kandang ngelingi nya, kelimpah ari nyukung pemansang mengeri ti lebih moden sereta meruan.

Pengudah tembu ila, projek tu dikearapka ulih meri empas positif ngagai mobiliti peranak menua, nyungkak penumbuh ekonomi kandang menua sereta ngangkatka pengelantang pendiau rayat nengah pengawa nyendiaka infrastruktur moden, likun sereta bekualiti.

Pekara tu dibantaika Opis Kereja Raya (JKR) Sarawak Bagi Menua Miri pengudah ngatur sesi ‘Kick-Off Meeting’ ungkup projek Perambu Ngaga Jematan Marina, Bagi Menua Miri.

Pengawa tu nyadi singkang pemungkal ngatur pengawa bejalaika projek infrastruktur strategik ti deka ngenegapka rentayan perengka pengangkut di bagi menua nya.

Sesi nya diatur ba Bilik Aum Ringkat 7, Menara 2, JKR Bagi Menua Miri lalu bechairmanka Injinir Bagi Menua Miri, Ir. Stephen Ung Neng Hui.

Sama bisi datai pengari tim perunding, kunteriktor enggau ejensi bekaul ti bisi kaul terus bejalaika projek nya.

Aum nya betuju nentuka koordinasyen keterubah projek ulih dipejalaika enggau komprehensif mungkur skop kereja, perambu teknikal, taga bejalaika, spesifikasyen, peminta palan enggau komitmen semua piak ti bekaul.

Nengah sesi nya, JKR Sarawak mega ngemeratka pemesai guna kerejasama begulai entara ejensi, konsultan enggau kunteriktor dikena nentuka projek nya dipejalaika enggau sistematik, efisyen, enggau kualiti sereta dalam timpuh ke udah ditetapka.

Setipak enggau aspirasyen “We Build For You”, JKR Sarawak tetap komited ngenegapka agenda pemansang infrastruktur nengeri tu nengah pengawa bejalaika projek ti meri empas tinggi ungkup penyulut enggau pengelantang rayat Sarawak. -RBI

Gambar semina pengias aja

#ruaiberitaiban#newsiban#beritaiban

Rindu | Titih | Kunsika

SONG, 9 Mei — Peranak di Rh Clement Nanga Manap Batu udah nerima bantu bekal ai beresi ari Opis Pengintu Pengelantang Raban Bansa (JKM) Pelilih Song, Bagi Menua Kapit berindik ari penanggul bekal ai ti nuntung peranak rumah panjai nya, ditu kemari.

Bantu nya dikenataika asil ari pengawa jampat JKM dalam mantu ngelempungka penusah ke ditapi peranak, lalu enggau nya nentuka pekara ke diguna komuniti terus diintu.

Chairman Komiti Pemansang enggau Pengelikun Genturung Pendiau (JKKK) Rh Clement Nanga Manap Batu ngenataika pengaga ati enggau terima kasih ngagai pemesai enggau staf JKM Pelilih Song enggau Bagi Menua Kapit ketegal pengibuh enggau kerejasama ngatur pengawa nyuaka bantu nya.

Bela diberi puji iya nya komitmen Sekretari JKKK, Puan Jacqueline Mak Jang enggau Tukang Wang JKKK, Encik Bayang ti sama-sama mantu proses peminta bantu ai irup ungkup peranak ti kena bungkur.

Berebak enggau nya, semengat kerejasama enggau besaup ti dipandangka peranak rumah panjai nyadung bekal ai mega mandangka penyerakup enggau ulah besaup dalam komuniti.

Dikearapka bantu ke diberi nya ulih mantu peranak neruska aktiviti ninting hari seraya isu bekal ai diputar penuh piak ke bekaul. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

Sumber, photo — JKKK Rh Clement, Manap Batu, Btg Rajang, Song

KUCHING, Mei 9 — Tuduh ti madahka perintah enda bebendar deka mutarka isu tanah Hak Adat Bansa Asal (NCR) di Sarawak nadai pengamat berindik ari nyauka 95 peratus peminta tanah NCR diatu benung diproses nyengkaum sekeda ke udah nerima geran pala tanah.

Menteri Pelajar, Inovasyen enggau Pemansang Bakat Sarawak, Dato Sri Roland Sagah Wee Inn madah, perintah nengeri enda kala ngelaungka isu tanah NCR, lalu proses nyukat enggau ngentaska pala tanah terus dipejalaika enda ngetu.

“Anang mudah tekuing runding enggau jaku tuduh ti bisi kaul enggau politik ti madahka perintah enggai nyukat tanah NCR laban kitai empu ari komuniti NCR,” ku iya.

Iya madah munyi nya rambau Aum Besai Tiga Taun Sekali Ke-11 Serakup Dayak Bidayuh Nasional (DBNA) enggau Pengerami Makai Lemai Muhibah DBNA ba Dewan Serbaguna DBNA kena Hari Lima tu tadi.

Nitihku iya, agi bisi beberapa buah genturung pendiau bedau nganjung peminta tanah NCR taja ngembuan mayuh peranak ke patut sereta mega nerima bantu belanja ari pengari rayat.

Ku iya, gaya tu nyadi ketegal kurang inisiatif enggau pengawa nangkan ba ketuai komuniti empu ngatur aplikasyen ke bekaul.

Berindik enggau nya, iya ngelalau tetiap genturung pendiau ngambika lebih proaktif ngatur sereta minta ngaku tanah NCR dikena nentuka hak ngempu tanah ulih ditan ungkup pemaik rebak dudi hari. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

Sumber — UKAS

SAMARAHAN, 9 Mei — Raban Penyaga Orang Periman Malaysia (APM) Pelilih Samarahan mujur nangkap siku ular sawa urung empat meter pemanjai dalam operasyen Kes Nangkap Ular (KMU) di Kampung Tanjung Bundong Tradisi, Kota Samarahan, sehari tu tadi.

APM Samarahan ba penerang sida madahka bisi nerima kangau ari mensia mayuh bekaul enggau penatai ular nya besemak enggau belakang rumah orang ke ngaga sebana nya.

Berindik ari nya, dua iku kaban Skuad Delta dianjung ngagai endur nya bejalaika operasyen nangkap ular nya.

Lebuh datai ba palan penusah nyadi, raban operasyen tetemuka siku ular sawa ba belakang rumah orang ke ngaga sebana sebedau pengawa jampat dipejalaika ngena chara sintak enggau panjuk dikena nentuka operasyen dipejalaika enggau likun sereta ulih dijaga.

Operasyen nya mujur tembu enggau nadai sebarang penusah ke enda manah nyadi.

Berebak enggau nya, mensia mayuh dilalau ngambika seruran bejejaga ari pendiau jelu siga, kelebih agi ba kandang endur ke repa enggau parit enggau rumah.

Sebarang penusah ngenyit tau dikenataika ngagai APM Samarahan nengah lumur 082-672999 tauka talipaun penusah ngenyit 999 ngambika bulih bantu enggau lengkas. -RBI

#ruaiberitaiban#newsiban#beritaiban

Rindu | Titih | Kunsika

LIMBANG, 9 Mei – Sapit Menteri Perengka Pengangkut, Datuk Hasbi Habibollah madah mengeri Medamit deka ngasaika transformasyen sereta nerima pemaik pemansang.

Tu ku iya berindik ari pengawa bejalaika projek besai Jalai Penyambung Sarawak-Sabah (SSLR) Renggat Dua ti nyambung Limbang terus ngagai Miri enda ibuh nengah menua Brunei, kelimpah ari pengawa bejalaika projek pemansang ke bukai.

Berebak enggau nya mega, iya minta Opis Parit enggau Entali Ai (JPS) Sarawak ngenyampatka pengawa ngaga dua buah jematan tetap di Enseriban enggau Semena iya nya Hulu Medamit ke udah lama dianti peranak menua pesisir kenyau ari beberapa taun ke udah.

Kaban Parlimen Limbang nya madah munyi tu lebuh bejaku ba Pengerami Bejadi Gawai Agro Medamit Tamu di Dewan Tebuka Medamit.

Tandu Habibollah madah, pengawa ngaga kedua-dua jematan nya beguna amat laban nyadi jalai beguna ngagai peranak di menua pesisir.

Nitihku iya, proses berati diatu benung dipejalai pengudah tinda projek nya ditutup bulan April tu tadi.

“Aku ngarapka, baka ke udah disemaya JPS rambau Bazaar Krismas taun nyin kemari, projek tu ulih dipejalaika enggau lanchar.

“Tinda ungkup projek tu udah ditutup bulan April tu tadi lalu diatu udah ba renggat berati,” ku iya.

Ku Hasbi nerang, jematan nya beguna amat laban nyambung beberapa buah genturung pendiau ba kandang menua nya.

Sama bisi datai Sapit Residen Limbang Rozita Kulai, Chairman Komiti Temuai Medamit Rumai Sanggau enggau bala temuai ke bukai. -RBI

#ruaiberitaiban#newsiban#beritaiban

Rindu | Titih | Kunsika

BINTULU, 9 Mei – Lima buah rumah dampa ba kandang menua Sungai Plan, Muzako, Jalai Kidurong udah angus ba penusah ke nyadi malam tadi ti ngujungka bepuluh iku peranak nadai endur diau.

Ba penusah ke nyadi urung pukul 11.45 kemari, sebuah blok rumah dampa enggau struktur ukai tetap pemesai 80×30 kaki persegi diripotka nyauka 100 peratus angus.

Entara sida ke bisi kaul iya nya sekeda ruang bilik ke diau ba kandang menua nya nyengkaum Stima Kona Cendang, Micheal Lajan Kenney, Baja, Jara, Nyawai enggau Jonathan, enggau penyampau lebih 30 iku peranak menua nya nyengkaum nembiak mit.

Bela angus dalam penusah nya sebuah kerita Perodua Kancil, seraya sebuah rumah besepiak napi pengerusak urung 10 peratus ketegal pengangat api.

Nitihka Pemesai Bomba Kanan PBT II Rary Binjie, raban operasyen betapi enggau pemar tama ngagai endur penusah nyadi ketegal jalai ke sempit sereta enda ulih ditengah jentera.

Taja pia, operasyen ngerara api nya mujur dipejalaika ngena arus 200 kaki enggau dua iti munchung dikena nagang api ari nyerarai ngagai rumah bukai ke besemak.

Ku Rary, api mujur dijaga sebedau kereja meresa dipejalaika dikena nentuka api padam abis sereta gaya likun.

Nadai penusah bakal tauka bebadi nyawa diripotka nyadi ba penusah nya.

Operasyen nya mega dibantu tiga iku kaban Polis Diraja Malaysia (PDRM).

Kebuah penusah angus nyadi enggau penyampau pengerugi agi dipansik piak bekuasa. -RBI

#ruaiberitaiban#newsiban#beritaiban

Rindu | Titih | Kunsika

KUCHING, 9 Mei – Bagi Pengatur Projek RECODA bedau lama udah ngulu aum pemansang begulai enggau raban penyanding penemu ungkup Projek Jalai Fasa 1 Miri-Marudi, Marudi-Mulu (Kuala Melinau) enggau Long Lama-Long Panai (MMMMLL) ti mungkur Pakej Kontrak 1 enggau 2, kelimpah ari projek Jalai Besai Utara Limbang – Lawas.

Projek Jalai MMMLL mungkur pengawa ngaga jalai JKR R5 pemanjai 42 kilometer ari Miri ngagai Marudi kelimpah ari 100 kilometer jalai JKR R3 ti nyambung Marudi ngagai Mulu enggau Long Lama ngagai Long Panai.

Pengawa ngaga jalai baru nya dikearapka ulih ngangkatka pengelikun pejalai kelimpah ari ngemudahka jalai tama ngagai Taman Negara Mulu, ti diaku nyadi Palan Pesaka Dunya UNESCO.

Rentayan jalai nya mega deka nyambung kandang menua ulu enggau Jalai Penyambung Sarawak-Sabah (SSLR), lalu ari nya ulih ngemanahka agi penyambung di utara Sarawak.

Berebak enggau nya, projek NCH sepemanjai 87.96 kilometer nyengkaum tiga seksyen di Limbang enggau dua seksyen di Lawas.

Jalai nya berengkah ari Kompleks Kastam, Imigresen, Kuarantin enggau Pengelikun (CIQS) Tedungan ngagai CIQS Pandaruan di Limbang lalu ari CIQS Mengkalap ngagai CIQS Merapok di Lawas.

Dua bengkah projek besai ti dipelanja Perintah Sarawak nya deka nempa rentayan jalai ti terus ari selatan ngagai utara Sarawak sebedau disambung terus ngagai Sabah nengah jalai besai baka Jalai Besai Pan Borneo enggau SSLR.

Pengawa bejalaika projek tu dikearapka ulih nyadi pematak ngagai penumbuh ekonomi, ngenegapka akses sereta muka mayuh agi peluang sosio-ekonomi ngagai komuniti ba kandang endur ke bisi kaul. -RBI

#ruaiberitaiban#newsiban#beritaiban

Rindu | Titih | Kunsika

BAU, 9 Mei – Dua iku lelaki nyengkaum siku nembiak dipelaba deka diriman dikena mantu pansik pengudah ditan enggau sekeda senyata ke tau mai penusah ke ditemu dalam sebuah kerita di Siniawan, Hari Lima tu tadi.

Kedua-dua saspek mega deka beperesa ai kemi, seraya peresa polis tetemuka lelaki ke beumur 36 taun nya ngembuan rikod ke udah bekaul enggau kes dadah.

Ketuai Polis Pelilih Bau, Supt Mohd Haide A. Rahman madah, dua iku saspek ke beumur 36 enggau 17 taun nya ditan seraban polis ari Balai Polis Siniawan urung pukul 11.30 pagi lebuh bejalaika pengawa matau nagang penyalah ba Jalai Kampung Bunga Rampai.

Nitihka penerang iya, raban polis ngetanka sebuah kerita Proton Saga ke paking ba tisi jalai pengudah tetemuka dua iku lelaki bisi ulah ngalitka ati dalam kerita nya.

“Asil peresa tetemuka duku enggau paip besi ke dilalaika ba baruh penuduk deriba, lalu sabit ke udah diubah ditemu ba bunit kerita,” ku iya nengah siti penerang.

Ku iya nambah, kedua-dua saspek udah ditan ba palan penusah nyadi begulai enggau kerita ke bisi kaul ngambika atur ke bukai dipejalaika.

Kes tu dipansik ari baruh Seksyen 6 Akta Bahan Kakisan dan Letupan dan Senjata Berbahaya 1958. -RBI

#ruaiberitaiban#newsiban#beritaiban

Rindu | Titih | Kunsika