KUCHING, 27 April — Kompleks Unit Pekara Jalai Pengarap Bukai (UNIFOR) ti dipenyadika kemari, nyadi kelai ke beguna ngagai komitmen Perintah Sarawak ngenegapka penyerakup, pengelantang entara jalai pengarap enggau pengawa merintah ti terang sereta inklusif.

Pengerami rasmi bejadika kompleks ke beungkus RM80 juta nya udah dipenyadika Premier Sarawak, YAB Datuk Patinggi Tan Sri (Dr) Abang Haji Abdul Rahman Zohari bin Tun Datuk Abang Haji Openg ba Jalai Ong Tiang Swee, enggau nya mandangka aspirasyen nengeri ari baruh Strategi Pemansang Pasca COVID-19 2030 (PCDS 2030).

Nitihka penerang ari UNIFOR, pengawa muka kompleks nya dikumbai “legasyen penyerakup” enggau “lambang idup penyerakup rama, pengelantang jalai pengarap enggau semengat Segulai Sejalai” ke nyadi tulang belakang mensia mayuh Sarawak.

Penerang nya mega meri besai terima kasih ngagai Sapit Premier Sarawak ke mega Menteri ti megai tanggungpengawa ba UNIFOR, YB Datuk Amar Douglas Uggah Embas, ketegal iring iya nyadi Chairman Amanah Amal UNIFOR Sarawak (SUCT) ti udah ngemujurka projek meri empas tinggi tu nyadi nyata.

“Pengawa begulai UNIFOR begulai enggau ejensi ti bejalaika pengawa udah ngubah aspirasyen besai tu nyadi nyata ti meri pemaik ngagai semua rayat Sarawak,” ku penerang nya.

Penerang nya nambah, entara batang pematak kompleks nya iya nya ‘laluan imersif LED 15’ panel ti mandangka penyelai komuniti pengarap nyengkaum pengarap Kristian, Buddha, Tao, Hindu, Sikh enggau Baha’i.

“Pemandang digital tu ukai semina pengawa pemandang aja, tang befungsyen nyadi ripot akauntabiliti rama ti nerangka enggau silik guna belanja UNIFOR kenyau ari taun 2017 dalam pengawa ngaga sereta ngangkatmanah palan sembiang enggau sekula indu misi,” ku penerang nya.

Rambau penemuai nya, Premier Sarawak mega meri pengaga ati ngagai tikas transparensi enggau empas ke nyata ari agih belanja ke diungkupka ngagai komuniti renggat baruh.

Pengerami nya mega diias enggau bemacham pengawa mandangka main asal ti mandangka pengelantang komuniti Sarawak ti mayuh jalai pengarap, nyengkaum pengawa betabuh, ngajat enggau pengawa mandangka koir jalai pengarap.

UNIFOR dalam penerang ke sama mega meri besai terima kasih ngagai ketuai jalai pengarap, raban ke bisi pemerat enggau ejensi perintah nyengkaum Opis Kereja Raya (JKR) enggau Unit Protokol, Istiadat dan Pengurusan Acara Sarawak (UPPANS) ke udah meri kerejasama ngemujurka projek nya.

“Di Sarawak, penyelai ukai semina nyadi identiti aja, tang nyadi penegap kunsi,” ku penerang nya, lalu enggau nya ngemeratka komitmen nengeri tu terus nempa raban bansa ti likun, inklusif sereta lantang. — RBI

BINTULU, 27 April — Isu Tanah Hak Adat Bumiputera (NCR) mengkang nyadi sebengkah ari isu ti pemadu sensitif di Sarawak, ti ​​bekaul enggau hak asal komuniti Bumiputera ti udah nguan sereta ngereja tanah sida turun temurun, tang bedau nerima pengangkun undang-undang pengempu sida.

Menteri Industri Pemakai, Komoditi enggau Pemansang Kandang Menua Sarawak, Dato Sri Dr Stephen Rundi Utom, ngerintaika proses ke enda tau enda dititihka iya nya kereja nyukat tanah meseti dipejalaika nitihka Kanun Tanah Negeri (KTN).

“Titihka kereja nyukat tanah ari baruh Seksyen 6 ungkup pengawa ngazet kandang endur komunal dulu, sebedau surat pala tanah individu dikeluarka ari baruh Seksyen 18.,” ku iya.

Iya mansutka jaku nya rambau Pengawa Nyuaka Geran MRP DUN Kemena Renggat 1 ungkup taun 2026 sepenyampau RM505,260 ngagai 32 iku penerima ba Opis Opis Betanam Betupi Bagi Menua Bintulu seharitu tadi.

Terang Rundi, Perintah Sarawak seruran ngansak bala ketuai raban bansa enggau ketuai ruang bilik ngatur pengawa berunding terus enggau Opis Tanah enggau Survei (JTS) dikena mutarka penyarut bekaul enggau tanah NCR sebedau iya balat nyadi nyentuk ngagai renggat kort.

“Penyarut ke dibai ngagai kort ukai semina makai mayuh awak enggau ungkus, tang mega nadai ruang perintah enggau pengari rayat masuk champur mutarka iya.

“Bala ketuai komuniti enggau JKKK enda patut putus pengarap minta kereja nyukat tanah. Semua kandang endur ti bisi penyarut meseti diputarka nengah chara berunding ari pun.

“Enti penyarut tu dikemendarka majak balat nyentuk ngagai renggat kort, pengawa campur tangan ari perintah enggau pengari rayat deka nyadi pekara ti enda ulih dikereja,” ku iya nambah.

Iya mega madahka transisyen ngatur operasyen kompeni nebang kayu ba kandang menua Binyo nyadika chunto begunaka jampat ngentaska garis entara menua NCR enggau terang.

“Enti nadai pengawa ngentaska garis ari sukut undang-undang, perambu pemansang jemah ila bisi risiko tejanggal, lalu hak komuniti lokal mudah kena penyarut berindik ari pengawa ngeluarka Lisin Sementara (PL) ngagai kompeni korporat. – RBI

BINTULU, 27 April — Sarawak deka ngaga gazet nyentuk 15,000 hektar tanah ungkup projek nanam padi bedandang besai, dalam pengawa ngurangka nengeri tu bepanggai ba beras import ke diatu mungkur lebih 80 peratus guna menua tu.

Menteri Industri Pemakai, Komoditi enggau Pemansang Kandang Menua, Dato Sri Dr Stephen Rundi Utom, mantaika perambu nya sehari tu tadi lebuh iya bejaku ba Opis Betanam Betupi Bagi Menua Bintulu rambau pengerami nyuaka geran Projek Mit Menua Pesisir (MRP) DUN Kemena Fasa 1 bagi taun 2026 sepenyampau RM505, 260 ngagai 32 penerima ba kandang menua Kemena.

Nitih ku Dr Rundi, tanah ke ditagit deka dikemansang ngena sistem automasyen penuh.

Tu nyengkaum pengawa nanam chara mekanikal, meri baja ngena dron, kelimpah ari operasyen ngetau enggau kapasiti empat hektar sehari.

“Kitai patut mindah ari pengawa betanam betupi ngidupka diri ngagai sistem moden ke bendar,”

“Proses ngering enggau proses kilang mega deka dipasuk dalam rentayan operasyen tu.” ku iya

Perintah Sarawak nagit pengawa ngaga gazet 14,000 ngagai 15,000 hektar tanah ungkup renggat keterubah projek tu.

“Taja pia, jadual gazet penuh enggau agih belanja kesemua ungkup projek nya bedau dipadah enggau rasmi.

“Teknologi Internet of Things (IoT) deka nyadi teras sistem ngatur kebun dandang besai baru tu.” ku iya.

Ku Dr Rundi, chara nya digaga khas dikena matak raban nembiak ngagai sektor betanam betupi.

“Pengawa betanam betupi meseti ulih meri penatai pemisi ke setanding enggau sektor bukai, baru raban nembiak kitai bisi pengerindu,” ku iya.

Kelimpah ari padi, Dr Rundi mega bisi nyebut potensial dua komoditi premium menua tu iya nya Lada Sarawak enggau Nanas SG1 ti meri timpuh ngetau pandak agi enti dibandingka enggau utai tanam konvensional.

“Kitai patut ngalih ngagai teknologi automasyen lalu ngemeratka rega komersial ari semina pemesai tanah.

“Fokus meseti diberi ngagai kualiti produk enggau rentayan industri hiliran, baka pengawa memproses lada premium Sarawak, ti ​​bisi potensi nyungkak rega eksport global kitai ngelui RM2.2 bilion,” ku iya.

Sarawak diatu benung bejalaika sekeda inisiatif betanam betupi skala besai serentak, nyadi sebagi ari Pelin Transformasyen Agro-Pemakai Sarawak 2030 ti ngembuan juluk deka nempa nengeri tu nyadi hab pemansut pemakai serantau ujung dekad tu.

#ruaiberitaiban#newsiban#beritaiban

Rindu | Titih | Kunsika

BINTULU 27 April – Perintah Sarawak udah ngemendarka agih belanja sepenyampau RM505,260 ngagai 32 iku penerima iya nya kelab, gerempung enggau Komiti Pemansang enggau Pengelikun Genturung Pendiau (JKKK).

Menteri Industri Pemakai, Komoditi enggau Pemansang Kandang Menua Sarawak, Dato Sri Dr Stephen Rundi Utom, madahka belanja ti diagihka ba renggat keterubah kelai pengibuh perintah dalam mantu enggau ngenuluka rayat.

“Perintah Sarawak mantaika penyiru ati bekaul enggau pemar ungkus pengidup nengah chara ngelalau rayat nyikap diri napi empas ekonomi ti enda tentu sereta keruga inflasyen dunya,” ku Rundi.

Iya mega nyemetak madahka perambu ngatur pekara wang enggau betul beguna amat, kelebih agi ngatur belanja ruang bilik berindik ari rega komoditi global enggau ungkus minyak niki.

Rundi mantaika jaku tu ba pengerami nyuaka geran Projek Mit Menua Pesisir (MRP) ba Opis Betanam Betupi Bagi Menua Bintulu sehari tu tadi.

Dr Rundi mega Kaban Kunsil Nengeri (ADUN) Kemena mega madahka deka nagit agih belanja tambah sepenyampau RM1.9 juta ba renggat ke nangkanka nya dikena nentuka penerus aktiviti komuniti ba renggat baruh.

Iya mega nyemetak madahka taja pan menua pesisir di Sarawak agi dijaga ari tating pemisi infrastruktur, berindik ari inisiatif perintah ngaga perengka guna jematan dikena nganti servis feri bebayar, tang rayat enda patut puas ati.

Duit MRP tu patut dikena nyadi geran sukung dikena meransang aktiviti kandang menua enggau optimum, setipak enggau pengawa perintah nagang empas ari pengawa narit subsidi ba renggat perintah besai. -RBI

#ruaiberitaiban#newsiban#beritaiban

Rindu | Titih | Kunsika

KUALA LUMPUR, 27 April — Personaliti menua tu, Jennie Enggah, terus nempa pemujur ti ngemegahka ati lebuh iya dipebasa nyadi kaban panel juri ba pekit pemajik gamal antarabansa ti ngumpul penyereta ari 22 buah menua, kelimpah ari diaku sereta nerima Anugerah Dagang Temuai Glamour (Glamour Tourism Award ) ari pengatur Lumiere International.

Nitih ku iya, peneleba nya nyadi basa ke besai sereta peluang ke bisi reti dikena meri bantu ba renggat global ti ngangkatka rega pemajik, budaya enggau ngenegapka orang indu.

“Aku meri pengaga ati ke pemadu tinggi ngagai ratu ke udah dipilih nyadi pemenang, orang ke amat patut ti ngayanka elegan, pengering enggau tuju ke terang,” ku iya.

Jeni mega nerangka pengawa ngaul diri nyadi akim ungkup pekit Miss Tourism Worldwide 2026 ti ngaul 22 buah menua nyadi peneleba ti beprestij ti ngenegapka pangku pengawa orang indu dalam mayuh bengkah bidang, setipak enggau rambai jaku pekit ti ngemeratka timbang entara intelek enggau personaliti.

“Siti basa ke besai ngagai aku nyadi akim ba renggat antarabansa tu.

“Platform tu ukai semina ngerami pemajik, tang mega ngangkatka nilai budaya, intelektual enggau ngenegapka orang indu,” ku iya lebuh nerang ngagai Ruai Berita Iban.

Iya mega nyemetak madahka tema “Beauty with Intelligence, Grace with Strength” terang dipeda sepemanjai pengawa nya, lalu enggau nya ngayanka aspirasyen ngadaka indu ti kompeten sereta kompetitif ba renggat global.

Kelimpah ari nya, Jennie Enggah nerangka kesemua peneleba nya nyadi pejalai ti bisi reti, diias enggau kaul pangan sereta pengingat ti enda ulih dibeli.

“Aku amat beterima kasih ngagai tetiap kaul enggau momen ti besai reti ti ditempa sepemanjai program tu.

“Ngarapka kitai betemu baru jemah ila,” ku iya pengudah ngaul diri nyadi akim pekit Miss Tourism Worldwide di Forest City Marina Resort Johor Bahru kena Hari Enam nyin tadi.

Jennie Enggah mega meri pengaga ati ngagai pengatur sereta beterima kasih ngagai semua pesereta ari mayuh bengkah menua ti ngemujurka pengawa nya enggau besai. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

SIBU, 27 April — Komiti Skuad Anti Dadah Sibu (JK Sibu) bekerejasama enggau Telekom Malaysia nengah Unifi Sibu enggau Ejensi Anti Dadah Nasional (AADK) Pelilih Sibu udah ngatur Pekit Pickleball UnifiXSKUAD taun 2026 (PPUS), kemari.

Pekit ke diatur ba The Kitchen by CCK, Jalai Ling Kai Cheng, ngembuan tuju deka ngelakuka gaya pengidup bepengerai ba komuniti lokal, kelimpah nyadi medium ke efektif dalam ngenataika pesan penyedar pasal penusah salah guna dadah nengah chara bepelasarka aktiviti rekreasyen.

Sepenyampau 24 tim ti ngaul 48 iku pemain ngambi bagi, ti mandangka timbal positif ari komuniti ngagai inisiatif ti begulaika elemen lumba enggau main sereta pelajar rama.

Chairman JK SKUAD Sibu, Raden Khairulzaman Raden Bustari mega bisi nyereta pekit nya kelai sukung enggau komitmen terus dalam pengawa ngenegapka gerakan penyedar anti dadah ba renggat komuniti.

Kelimpah ari pekit nya, piak pengatur mega bisi nyendiaka kaunter ngerejister nengah ‘online’ ungkup raban baru Skuad Anti Dadah, ke dibuka ngagai individu ke beumur 18 taun ke atas.

Berebak enggau nya, Unifi Sibu mega bisi ngatur pengawa ngelakuka sereta ngerijista pakej servis ungkup bala temuai ke bisi datai.

Program tu mega nerima sukung ari kaban strategik enggau penaja menua tu, lalu enggau nya ngenegapka kerejasama entara ejensi perintah, gerempung ukai dikuasa perintah (NGO) enggau sektor peribit dalam nyapai agenda pengelantang komuniti.

Ari sukut pemutus, tim BTS mujur nempa diri nyadi champion, ditangkan Fire Dinking nyadi lumur dua, lalu penuduk lumur tiga enggau empat dimenang tim J&A enggau The Syndikat.

Pengawa nyuaka perais nya udah dipenyadi Menijar Pemakai Unifi Sibu, Nur Etyna Tawil begulai enggau Sapit Chairman JK Sibu enggau Komiti Pengatur, Mohamad Mostapha Lasot.

Pemujur PPUS tu nyata ngayanka sinergi bersepadu entara mayuh bengkah piak ulih nempa raban bansa ti lebih regas, tan sereta bibas ari keruga dadah, setipak enggau aspirasyen ngenegapka pengelantang rama ba renggat baruh. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

SIBU, 27 April — Aum Besai Tiga Taun Sekali SABERKAS Pampang Tamin ungkup sesi 2026–2029 diatur enggau mujur dalam gaya ti lanchar sereta teratur ba Hotel Li Hua Sibu, ditu kemari.

Aum nya bechairmanka Puan Winnie anak Jawang ti mega megai pengawa milih Kaban Komiti ungkup sesi baru.

Pengawa bepilih sekali tu meda penyereta raban nembiak enggau chakah iya nya sepenyampau 11 iku mua baru ke beumur baruh ari 39 taun dipadu nyadi Raban Komiti.

Entara sida ke dipilih iya nya Morisson Mancha anak James Liang, Catherine J, Vannessa Elezebeth anak Edwin, Dennis L, Billy anak All, Dominic Inu anak David Dhoby, Evelyn Luwen anak Jelma enggau Fatricia Insyeen.

Ungkup pangku pengawa ke udah dipadu, Rozina anak Entili nyadi Sekretari, lalu Rohayu binti Hafiz dipadu nyadi Sekretari I lalu Clayricia Elvyana Sulan anak Bulie dipadu nyadi Penulung Sekretari II.

Pangku pengawa Tukang Wang dipegai Robert anak Lari.

Berindik ari nya, terima kasih dirikod ngagai komiti milih ketegal komitmen enggau kerejasama sida nentuka semua proses aum bejalai enggau lanchar.

Dikearap raban ketuai ke baru dipadu ulih megai tanggungpengawa sida enggau penuh integriti sereta terus ngenegapka pangku pengawa raban nembiak dalam meransang pemansang komuniti, setipak enggau aspirasyen organisasyen. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

JULAU, 27 April – Chairman Kaunsil Industri Kayu Ramu Malaysia, Datuk Larry Sng Wei Shien ngenataika jaku puji ngagai dua iku pemesai polis ketegal servis ti chukup manah dalam nentuka pengelikun pelilih menua Julau terus dijaga.

Iya meri besai terima kasih ngagai Ketuai Polis Pelilih Julau, DSP Alif Haiqal Ramesh Abdullah ke ke deka pinchin enggau Tuan Faisal ke belidar ngagai Saratok.

“Pengawa ke chukup manah enggau komitmen seduai sepemanjai timpuh meri servis ngagai menua Julau.

“DSP Alif Haiqal udah mangku pengawa pengelama setaun tujuh bulan, lalu Tuan Faisal urung semilan bulan, udah meri servis ditu (Julau), aku beterima kasih,” ku Larry.

Ku Larry nambah, DSP Alif Haiqal siku ari Ketuai Polis Pelilih Menua ti pemadu chakah gawa, ngembuan semengat ti tinggi dalam pengawa ngelawa komuniti sereta ngemujurka bemacham inisiatif komuniti di pelilih menua nya.

Iya mansutka jaku nya beserimbai enggau Pengerami Makai Lemai enggau Lambaian Kasih IPD Julau empai lama.

Nitih ku iya, pengerami nya ukai semina pengawa beserara aja, tang kelai meri terima kasih ngagai jasa enggau pemeri sida dalam ngetanka pemaik enggau pengelantang dalam komuniti setempat.

Berebak enggau nya, iya mega ngingatka enda ngira dini endur orang gawa perintah bepalan udah tu, pengingat enggau kaul enggau komuniti ke sebedau tu patut dikenang.

Iya ngarapka dua iku pemesai nya seruran ngingatka Julau nyadi sebagi ari pejalai servis sida.

Ngenang silik, iya mega muji aktiviti IPD Julau ngatur aktiviti komuniti, kelebih agi dalam bidang lumba enggau main.

“Entara program ke nerima mayuh perati iya nya Jom Fit, Fun Run enggau pekit tarit tali ti diatur IPD Julau begulai enggau Palan Servis Parlimen Julau,” ku iya nerang. -RBI

#ruaiberitaiban#newsiban#beritaiban

Rindu | Titih | Kunsika

KUALA LUMPUR, 27 April – Sepenyampau 193 iku raban Soldadu Tasik Diraja Malaysia (TLDM) udah ngaul diri dalam Pengerami Bebaris beserimbai enggau pengerami ngintu Hari TLDM Ke-92 renggat Lembah Klang ti nyadi ba KD Sri Gombak sehari tu.

Pengawa bebaris nya mungkur 39 iku pemesai enggau 154 iku pangkat bukai, enggau Komander Ir. Ts. Mohd Faisal bin Mohd Razali TLDM dipebasa nyadi Komander Baris, lalu Pemesai Waran I PRL Mohd Harmizie bin Mohd Fawzli nyadi Pemesai Waran Baris.

Pengerami nya diatur dikena ngingatka penumbuh TLDM kena 27 April 1934, lalu enggau nya mantaika komitmen soldadu tasik ti terus ngetanka kedaulatan menua.

Pengawa bebaris nya mandangka disiplin tinggi, sukut pengelikun enggau pengawa bejaga raban ke nyadi kelai penyikap diri, setipak enggau rambai jaku pengerami taun tu, “TLDM Perkasa Kedaulatan Terpelihara”.

Penulung Ketuai Staf Sumber Mensia Markas Soldadu Tasik, Laksamana Muda Muhamad Shakir bin Salleh, nyadi Pemesai Nerima Tabi basa lalu mega ngenataika pesan Hari TLDM Ke-92 ngarika Panglima Soldadu Tasik.

Pengudah lebih semilan dekad ditumbuhka, TLDM terus mengkang komited ngetanka kedaulatan tasik menua sereta nyaga pemerat ekonomi maritim Malaysia.

Pengerami nya mega dirichah enggau iring Platun Batalion Ke-1 Brasband Rejimen Melayu Diraja sebedau tembu ba pengawa begulai enggau “Rayat Soldadu Laut” ti bisi kaul. -RBI

#ruaiberitaiban#newsiban#beritaiban

Rindu | Titih | Kunsika

Datai ari Kampung Sungai Pinang, Serian, pejalai pengidup Komander (Pinchin) Sudin dalam Soldadu Tasik DiRaja Malaysia (TLDM) nyata ngayanka penegap runding enggau disiplin ulih ngubah pengidup peranak rumah panjai nyadi ketuai dalam soldadu pengetan menua.

Iya dibesaika ba ruang bilik ke sedang, ngepunka pengawa nyadi soldadu kena 1 Januari 1993 ba Berek TLDM Woodlands, Singapura sebedau niki pangkat nyadi pemesai dalam bulan Julai 2009 enggau pangkat Leftenan Madya TLDM.

Pengudah gawa lebih tiga dekad, iya pinchin kena 6 Februari 2026 enggau rikod ke chukup manah iya nya 33 taun, 2 bulan enggau 6 hari.

Nitih ku iya lebuh dirandau Ruai Berita Iban, pengerindu iya ba dunya soldadu ukai datai ari siku individu ke aja, tang lebih agi diterenak nengah rampa rumah panjai enggau peransang diri sebilik, nyengkaum dua iku menyadi tuai ke mega nyereta Soldadu Malaysia (ATM).

“Aku milih TLDM laban aku deka nguji pemar ke bebida lalu berebak enggau nya nambahka penyelai pampang servis ATM entara komuniti rumah panjai aku,” ku iya.

Latih dikena Nempa Identiti

Ngenang peneleba iya ke dulu suba, Sudin ngaku latih pemun soldadu ukai pekara ke muntang.

Taja pia, proses nya beguna dalam nempa daya pengetan runding enggau fizikal.

Pekara ti narit ati, iya nengah dua renggat latih pemun, iya nya nyadi rekrut dalam taun 1993 enggau nyadi Pemesai Kadet dalam taun 2009.

“Latih tu penuh enggau pengingat pait enggau manis, tang aku beterima kasih laban ulih nengah nya enggau nadai penanggul besai,” ku iya.

Sukung ari diri sebilik enggau bala bakih nyadi tulang belakang iya sepemanjai timpuh nya, kelebih agi napi pemar nyadi peranak rumah panjai ke kurang perengka guna.

Peneleba enggau Pemar Servis ti Besai

Sepemanjai gawa, iya kala gawa ba mayuh bengkah unit enggau kapal nyengkaum KD Marikh, KD Hang Tuah, KD PELANDOK, KD MALAYA kelimpah ari sekeda indu opis strategik TLDM.

Entara peneleba ke pemadu mar iya nya lebuh iya diasuh nyikap kapal sukung KA Tun Azizan ba Pengkalan Operasyen Maju (FOB) di Sandakan, dipejalaika kediri mungkur sukut logistik, teknikal enggau operasyen.

“Nya amat nguji penau enggau kuasa aku nyadi pemesai laban aku patut ngatur mayuh macham pengawa ba maya ke sama,” ku iya nerang.

Kelimpah ari nya, iya mega bisi ngaul diri dalam operasyen ti beguna baka Ops Pasir, penemuai operasyen ngagai Filipina enggau latih begulai enggau Raban Soldadu Brunei.

Pengawa enggau Penanggul Anak Sarawak

Nyadi siku peranak Sarawak ke udah mayuh gawa di menua luar, muai awak begulai enggau diri sebilik udah nyadi siti ari pemar besai.

“Bisi maya aku enda ulih pulai ke rumah panjai nyentuk tiga taun, kelebih agi maya musin pengerami. Penanggul belanja mega nyadi faktor,” ku iya.

Taja pia, pengawa ti pemadu meri empas iya nya pengelenyau apai ti dikesayau lebuh iya ngambi kus ba KD Pelandok.

Ketuai Bepelasarka Disiplin enggau Penyayau

Ari sukut nyadi ketuai, Sudin ngemeratka pemesai guna pengandal enggau ngatur pengawa ti efektif.

Iya nyemaka sedadu baka tim main bol, begunaka strategi, kerejasama enggau pangku pengawa ke terang ungkup setiap iku kaban.

“Raban TLDM baka sebuah ruang bilik ke besai.Enti nadai disiplin enggau kaul kaban, enda ulih nyapai misyen,” ku iya nyemetak.

Pinchin enggau Renggat Baru Pengidup

Diatu, pengudah nembuka servis iya, iya beterima kasih laban udah lama gawa enggau pengerai.

Taja pan agi nyerenih diri nyadi orang periman, iya agi bisi pengingin deka terus meri bantu ngagai mensia mayuh nyengkaum nyangka deka ngereja pengawa politik enggau betanam betupi.

“Aku deka terus meri servis ngagai tanah Sarawak seagi-agi diguna,” ku iya.

Penemu Senentang Pengawa Raban TLDM Jemah Ila

Ngelansa pasal pangku pengawa TLDM kemaya hari tu, iya bepenemu pemar pengelikun majak mayuh, kelebih agi ba kandang tasik Borneo enggau Tasik Cina Selatan.

Nitih ku iya, chara perang konvensional enda relevan agi, tang nganti nya TLDM begunaka mansik teknologi enggau strategi perang moden.

“Pengawa ngulihka aset ke lebih manah agi sereta nitihka timpuh meseti dikemerat dikena nentuka penyedia nasional,” ku iya.

Pesan Ngagai Nembiak Rebak Biak

Iya mega minta mayuh agi nembiak Sarawak nyereta TLDM dikena nentuka penyereta ti sebela entara nengeri.

“Aku ngarapka bisi hari ila bisi peranak Sarawak nyadi Panglima pengkalan TLDM di nengeri tu,” ku iya enggau pengandal.

Lebuh nyimpul randau enggau Ruai Berita Iban, iya nyemetak madahka semengat talukka menua patut diterenak ari pun, kelebih agi ba raban nembiak rebak baru.

“Raban nembiak patut meretika pengawa rebak ke dulu dalam nyapai merdeka.Ari nya mih semengat deka gawa ke menua ada,” ku iya.

“Selamat Hari Ulang Tahun Tentera Laut Diraja Malaysia Ke-92” — RBI

#ruaiberitaiban#newsiban#beritaiban

Rindu | Titih | Kunsika