BINTANGOR, 2 Mei – Sepenyampau 63 iku nembiak Tabika Ria Taman Alomara begulai enggau lima iku pengajar nyempulang nyereta pejalai belajar ngagai Balai Bomba enggau Penyah Penusah (BBP) Bintangor nengah Program Penyedar Mensia Mayuh Kelab Bomba Celik (KBoC) kilah ensanus.

Nitihka penerang ari Ketuai Balai Bomba enggau Penyah Penusah (BBP) Bintangor, PPgB Mahmudin Naruddin, program ke bansa tu ngembuan tuju deka nerenakka penyedar tumu ba nembiak senentang sukut pengelikun ari penusah angus sereta mega penerang ngagai pangku pengawa Opis Bomba enggau Penyah Penusah Malaysia (JBPM).

“Nengah chara berandau enggau belepa, bala nembiak ulih meretika atur pengelikun pemun enggau pengawa keterubah ti patut dipejalaika enti sema bisi penusah ngenyit nyadi,” ku iya.

Penatai raban nya disambut raban pengawa ti betuaika PBK II Khadijah enggau bala raban ke bukai.

Sepemanjai penemuai nya, bala nembiak enggau pengajar diiri enggau mayuh macham aktiviti ti ngerinduka ati nyengkaum randau penyedar pengelikun ari penusah angus, meri kelala enggau guna perengka pengerara api, mandangka chara mutarka penusah ari api dapur (Celik Suri), kelimpah ari latih ngerara api ngena perengka pengerara api enggau hos bomba.

Sama bisi diatur iya nya pengawa mandangka kereban dikena ngerara api enggau awak ngagai bala nembiak nepan jentara bomba, ke nyadi entara pematak besai program nya.

Kelimpah ari nya, penatai bas pemandang khas JBPM ari Bagi Pengelikun Bomba (BKK) Sibu mega ngerichahka program nya nengah chara bekunsika penerang bekaul enggau pangku pengawa sereta guna opis nya ngagai bala penyereta.

Program tu bejalai enggau lanchar sereta nerima sambut ti chukup meransang ari bala penyereta enggau pengajar ti nyempulang, lalu enggau nya mujur nyapai juluk nambahka tikas penyedar pengelikun penusah angus berengkah ari umur agi biak. -RBI

#ruaiberitaiban#newsiban#beritaiban

Rindu | Titih | Kunsika

KUCHING,1 Mei – Kelab Budaya Komuniti Dayak Kuching muka pengawa ngerejista diri masuk Kelas Asas Ngajat Iban (Indu enggau Laki) berengkah bulan Julai tu.

Inisiatif tu meri awak ngagai komuniti kelebih agi rebak baru belajarka main asal Ngajat ti nyadi kelai enggau identiti komuniti Iban sereta kaya enggau nilai estetik sereta pesaka budaya.

Kelas nya dibuka ngagai penyereta ke beumur lapan taun diatur ninting Hari Tiga ari pukul 7.30 malam nyentuk 9.30 malam ba Dewan Mayuhguna SJK Chung Hua Batu 10, enggau bayar penyereta RM150 ungkup timpuh dua bulan.

Nitih ku pengatur, penyereta deka diembing dalam pekara pemun nguasa chara ngajat ke betul, kelimpah muka ruang ngagai lelaki enggau indu nyerungkai seni pemerindang asal.

“Program tu ukai semina ngembuan tuju deka ngasah penau, tang mega nyadi pelasar dikena ngisi maya lepa enggau chara ti meri penguntung seraya ngetanka pesaka asal ngambika seruran relevan,” ku penerang ari pengatur pengawa.

Nyadika peransang, tetiap penyereta ti nembuka sesi latih deka diberi setipikit penyereta.

Mensia mayuh ti bisi ati tau betanya ngagai sekretariat, Mdm. Jassica ba lumur 013-571 6440 tauka Encik Grant ba lumur 013-760 9711 ngambika ulih ngerejista diri enggau penerang silik.

Program tu dikearap ulih ngidupka semengat sayau ke budaya ba raban bansa, setipak enggau rambai jaku “Segulai Sejalai Sama Belajar Ngajat, Main Asal Bansa Kitai Dayak.” -RBI

#ruaiberitaiban#newsiban#beritaiban

Rindu | Titih | Kunsika

LUMUT, 1 Mei — Hari Tebuka Armada 2026 di Pengkalan Soldadu Tasik Diraja Malaysia (TLDM) Lumut richah enggau pengerami penuh istiadat ti dipenyadi Duli Yang Teramat Mulia Raja Muda Perak Darul Ridzuan, Raja Jaafar Ibni Almarhum Raja Muda Musa.

Pengawa ti beprestij nya nyadi momen ti besai reti dalam ngerichahka Pengerami Hari TLDM Ke-92, lalu enggau nya mandangka komitmen tim nya terus ngelawa komuniti sereta nambahka pemereti ati rayat senentang pangku pengawa enggau penau TLDM dalam ngetanka kedaulatan kandang tasik menua tu.

Pengawa ngatur Hari Tebuka Armada tu mega muka ruang ngagai mensia mayuh meda aset penyaga pengelikun menua ari semak, kelimpah ari ngasaika mayuh macham program nyengkaum pengawa pemandang, mandangka penau enggau interaksyen enggau raban TLDM.

Program tu ukai semina ngerapitka kaul entara raban TLDM enggau rayat, tang mega nyadi pelasar beguna dalam nerenakka semengat talukka menua sereta beterima kasih ngagai jasa enggau pengibuh raban pengelikun menua. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

Kredit sumber, photo — Tentera Laut Diraja Malaysia

BETONG, 1 Mei – Siku orang ke ngena mutosikal akisiden kediri empu pengudah ti dipelabaka bepun ari nyeliahka sebuah van ba penusah ke nyadi ba kandang Pasar Besai Medan, ditu.

Bilik Gerakan MERS Raban Penyaga Orang Periman Malaysia (APM) Pelilih Menua Betong nerima kangau ngenyit ari mensia mayuh ti ngeripot penusah nya sebedau minta bantu ungkup perubat keterubah sereta nganjung tudah ngagai Sepital Betong.

Empat iku kaban APM ti betuaika Sjn (PA) Michael Awan Anak Aing udah ngelawa palan penusah nyadi ngambika ulih meri bantu enggau lengkas.

Lebuh datai ba palan nya, raban nya tetemuka tudah gali ba tisi jalai pengudah mutosikal ke ditepan iya aksiden kediri empu.

Raban APM udah nya bejalaika peresa keterubah ngena chara Rapid Body Survey (RBS) lalu tetemuka iya sebana pedis ba selampur tubuh kelimpah ari rajai ba lengan enggau kaki.

Tudah udah nya dianjung ngagai Sepital Betong ngambika diperubat enggau silik agi. – RBI

#ruaiberitaiban#newsiban#beritaiban

Rindu | Titih | Kunsika

RANAU, 1 Mei 2026 — Sebaris kedai runchit di Kampung Timbua udah angus lengis ba penusah angus ke nyadi tengahari tu tadi.

Penusah ke diripot urung pukul 5.50 lemai nya ngaul sebaris premis setengah tetap enggau pemesai dipelabaka urung 1,226 meter persegi.

Ketuai Balai Bomba enggau Penyah Penusah (BBP) Ranau, PPgB Rantey Fred, madahka piak iya nerima kangau ngenyit sebedau tim enam iku raban enggau sebuah injin bomba dianjung ngagai palan penusah nyadi, ke bepalan urung 36 kilometer ari balai nya.

“Raban bomba datai ba endur nya urung pukul 6.40 lemai lalu nemu api udah nyerarai lalu nganguska semua baris premis nya,” ku iya nengah sebengkah penerang sehari tu tadi.

Nitihku iya, operasyen ngerara api nya dipejalaika ngena dua batang ai urung pemanjai 61 meter enggau tiga buah jet.

Penatai ai diulih ari tangki injin bomba enggau paip bomba ke besemak.

Penusah angus udah mujur dijaga urung pukul 7.06 malam, lalu naka ke diatu nadai penusah bebadi nyawa diripotka dalam penusah nya.

Tetiap unit premis ke bebaris nya dipelabaka urung 20 x 66 kaki (kira-kira 123 meter persegi), lalu semua nya diripotka udah abis rusak.

Operasyen madamka api agi dipejalai dikena nentuka nadai agi tinggal api ti tau ngepunka api baru, seraya pun penusah nyadi agi dipansik piak bomba. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

Sumber, photo — INFO X

KANOWIT, 1 Mei — Aum Besai Ninting Taun (AGM) Ke-27 Sarakup Indu Dayak Sarawak (SIDS) Pampang Kanowit diatur enggau mujur dalam gaya pengelantang enggau penyerakup entara raban.

Program ke diatur ba Dewan Serakup Foowhow Kanowit seharit tu tadi nya nyadi saksi penatai bala kaban ti mengkang komited nyukung kuing enggau tuju serakup nya.

Ba penerang iya, Puan Ophelia Tambong meri pengaga ati ngagai pengandal ke diberi ngagai iya ngambika terus ngiring gerempung nya.

Iya mega meri terima kasih ngagai raban komiti ke baru dipadu sereta semua raban ketegal kerejasama enggau sukung tegap.

“Semua diberi puji enggau terima kasih laban pengelanchar bejalaika aum tu.Terima kasih ke pengandal sekali agi diberi ngagai aku ngiring ketuai.

“Tabi puji ngagai semua kaban enggau raban SIDS. Arapka kitai terus diberekat sereta sama-sama nyingkang ke mua,” ku iya.

Iya mega nyemetak madahka semengat begulai ti diterenak nengah rambai jaku “Besukung Ngemai Pemujur” deka terus nyadi ke lalau dalam ngenegapka pangku pengawa indu Dayak dalam pemansang komuniti.

AGM mega nyadi pelasar ke beguna dalam berandauka mayuh macham agenda strategik nuju ngenegapka pangku pengawa enggau pemeri gerempung ngagai komuniti ngelingi.

Iya mega madah, entara batang pengawa gerempung iya nya meri insentif pelajar ngagai bala anak kaban ninting taun nyadika peransang nampung pelajar ngagai tikas ke tinggi agi.

“Inisiatif tu mandangka komitmen gerempung dalam nyukung penyulut pelajar enggau pemansang modal mensia ba raban nembiak rebak baru” ku iya nerang ngagai – Ruai Berita Iban

#ruaiberitaiban#newsiban#beritaiban

Rindu | Titih | Kunsika

KUCHING, 1 Mei — Opis Kereja Raya (JKR) Kuching udah mayuh bejalaika pengawa ungkup pengidup kitai, ku Direktor Kereja Raya, Datu Dr.Cassidy anak Morris, seraya ngenang pasal pangku pengawa besai begunan lama JKR di Bagi Menua Kuching ti deka ngerandang jalai ngagai pemansang Wisma JKR Sarawak.

Nitih ku iya, pengawa berubah nya ukai pengujung, tang nyadi singkang ke mua dalam ngenegapka penau opis nya setipak enggau peminta ke diatu ti majak moden sereta dinamik.

Dulu agi ari nya, iya bisi nemuai ngagai Begunan JKR Bagi Menua Kuching ti digaga kenyau ari taun 1955 lalu udah lama nyadi palan operasyen opis nya ba bagi menua Kuching.

“Begunan tu ukai semina struktur fizikal aja, tang nyadi kelai pejalai panjai JKR Sarawak dalam ngemansangka infrastruktur nengeri tu, nyengkaum nyadi palan ngatur bemacham perambu, pemutus enggau pengawa ti meri pangka ngagai penyulut Sarawak kemaya hari tu,” ku iya.

Maya penemuai nya, iya mega ngena awak ngabas setiap bilik begunan nya seraya ngenang jasa enggau pemeri pengereja pengawa ke suba enggau ke diatu ti udah nempa pemanah opis nya.

Iya mega meri besai terima kasih ngagai pemesai enggau staf Opis Kereja Raya Bagi Menua Kuching ti seruran bebendar bejalaika tangkup pengawa sida enggau penuh dedikasyen.

Begunan besejarah nya dipelabaka deka direrak dikena ngerandang jalai ngagai pengawa ngaga Wisma JKR Sarawak, ti ​​deka nyadi kelai baru mandangka aspirasyen opis nuju chara moden, inovasyen enggau penyulut ba pengawa meri servis.

Enggau nya, penemuai nya nyadi kelai basa ngagai legasi ke udah, seraya kelai singkang andal Opis Kereja Raya Sarawak nuju jemah ila ke lebih progresif. -RBI

#ruaiberitaiban#newsiban#beritaiban

Rindu | Titih | Kunsika

LUBOK ANTU, 1 Mei – Pemujur dalam bidang pelajar ukai semina bepanggai ba sistem sekula aja, tang lebih agi begunaka sukung belama ari apai indai enggau komuniti menua nya.

Kaban Parlimen Lubok Antu, Roy Angau Gingkoi madah, kaul rat entara sekula, apai indai enggau komuniti ulih nempa rampa belajar ke lebih kondusif sereta nyukung pemansang nembiak sechara holistik.

“Lebuh semua piak bekerejasama, kitai ukai semina ulih ngangkatka penyulut akademik aja, tang mega ulih nempa ulah enggau identiti nembiak,” ku iya.

Iya madah munyi nya lebuh bejadika Pengerami Merarau ke diatur Gerempung Apai Indai enggau Pengajar (PIBG) SMK Lubok Antu ke nyadi ba Dewan Kompleks Lumba enggau Main Pelilih Lubok Antu, kemari.

Nitih ku iya, pangku pengawa PIBG chukup besai reti nyadi pelasar ti nyambung sekula enggau apai indai sereta komuniti menua nya dalam pengawa ngenegapka pemansang pelajar.

Ba pengawa ke sama, iya mega bisi madahka agih belanja penyampau RM100,000 ari Program Transformasyen Menua Pesisir (RTP) ungkup kereja ngemanahka sekula, kelimpah ari pemeri RM30,000 ngagai PIBG sekula nya.

Ku iya, agih belanja nya dikearap ulih ngemanahka perengka guna fizikal sekula, lalu ari nya meri pengelantang ngagai nembiak enggau raban pengajar.

Penatai staf sekula, apai indai enggau komuniti menua nya ti meransang ngulu pengawa nya ngayanka komitmen ti tegap ari semua piak dalam nyukung penyulut pelajar, lalu enggau nya ngenegapka pangku pengawa PIBG nyadi jematan ti nembam entara sekula enggau komuniti. -RBI

#ruaiberitaiban#newsiban#beritaiban

Rindu | Titih | Kunsika

BETONG, 1 Mei — Pengerami Meri Terima Kasih Penghulu Sebastian Randy Kadam sebilik di Rumah Jonathan, Semumok Atas sehari tu diatur dalam gaya ke manah, lalu enggau nya nyadi pelasar ngerapitka kaul bala pengari rayat enggau komuniti menua nya.

Kaban Parlimen Betong, Dato Dr Richard Rapu, madahka penatai iya begulai enggau Sapit Menteri Pemansang Nembiak Lumba enggau Orang Dagang Sarawak ke mega Kaban Kunsil Nengeri (ADUN) Layar, Datuk Gerald Rentap Jabu, enggau bini iya, YBhg. Datin Rosemarie Wong, ngayanka komitmen bala ketuai ti terus ngelawa rayat.

Kenu ku iya, pengerami ke bansa tu ukai semina mandangka semengat diri sebilik ke tegap, tang mega nyadi pelasar beguna dalam ngenegapka penyerakup komuniti menua pesisir.

“Pengerami tu ukai semina mandangka semengat diri sebilik enggau penyerakup komuniti setempat, tang mega nyadi pelasar ngerapitka kaul entara ketuai enggau komuniti,” ku iya nengah sebengkah penerang sehari tu.

Berebak enggau nya, iya mega meri besai terima kasih ngagai tuan rumah ketegal pengawa ngelaluka sereta nerima pengabang ti disediaka sepemanjai pengerami nya.

Berebak enggau nya, iya meri pengaga ati ngagai Penghulu Sebastian Randy Kadam ke udah dichiri nyadi Ketuai Komuniti, seraya nyadaka pengandal amanah nya deka dipejalaika enggau penuh dedikasyen ke penyulut enggau pengelantang peranak menua nya.

“Ngarapka pengandal ti dibai terus mai penyulut enggau pengelantang ngagai komuniti ngelingi,” ku iya.

Iya mega besampika sida sebilik ti seruran diberekat enggau pengerai ti manah sereta bulih rezeki ti meruan lama. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

KOTA SAMARAHAN, 1 Mei – Serakup Main Asal Dayak Sarawak (PEMADAS) udah muka palan ngambi baru ungkup Kelas Ngajar Kuntau Raban Ketupat Lepas Samarahan nengah program Bulan Mei (Siri 2), enggau nya meri peluang ngagai nembiak rebak baru belajarka main asal komuniti Dayak.

Program ti dipejalaika ari baruh raban Dayak Bukit Kelingkang Pampang Melikin nya nyendiaka latih pengelama tiga bulan ti mungkur 12 sesi belajar ti diatur ninting Hari Enam, sekali seminggu pengelama dua jam tetiap sesi.

Nitihku pengatur, penyereta dibuka ngagai mayuh bengkah renggat umur berengkah ari umur tujuh taun nyentuk ke besai tuai, enggau bayar ke patut nitihka kategori umur, kelimpah ari bayar ngerejista ke pemadu mimit.

“Pengawa tu ukai semina ngembuan tuju deka ngelatih pengelandik ngetanka diri, tang mega dikena nerenakka disiplin, pengandal sereta ngenegapka identiti ba bala penyereta kelebih agi rebak baru,” ku penerang ari pengatur pengawa.

Kelas tu deka diatur ba opis PEMADAS Samarindah lalu deka dipejalaika guro ke bepeneleba betuaika Guro Reagan, dibantu Guro Muda Vieny enggau Guro Penulung Kenny.

Individu ke bisi ati diperansang ngerejista diri enggau lengkas laban endur ditatak, kelimpah ari bisi awak mansik enggau dalam agi pesaka asal seni ngetanka diri ke majak bulih perati dalam raban bansa kemaya hari tu. -RBI

#ruaiberitaiban#newsiban#beritaiban

Rindu | Titih | Kunsika