BINTULU, 2 Mei – Projek jalai (jematan) baru ti nyambung beberapa buah rumah panjai di Sebauh dikemendar ngena ungkus RM27 juta dikena ngenegapka rentayan komunikasyen menua pesisir.

Sapit Premier Sarawak, Datuk Amar Douglas Uggah Embas madah pengawa ngaga jematan nya udah ngemanahka aksesibiliti, lalu ari nya ngurangka bepanggai ba servis feri.

“Operasyen feri di Sebauh deka dipindah ngagai kandang menua Pandan berindik ari penembu Jematan Sebauh, ke diatu nyadi batang jalai peranak menua nya.

“Perambu keterubah mindahka feri ngagai Kampung Labang udah dipansik, tang asil ari randau nya tetemuka pengawa ngaga jematan ba kandang menua nya engkeman agi nyadika atur timpuh panjai.

“Peminta peranak menua nya minta feri nya dipindah ngagai Pandan mega udah dipesetuju lalu pekara tu deka dibai ngagai renggat opis menteri ngambika ulih dipejalaika,” ku iya.

Iya madah munyi nya lebuh bejaku ba Pengerami Mantar Gawai Dayak Sebauh 2026 di Restoran Dinner World ditu kena Hari Lima tu tadi.

Berebak enggau nya, Uggah madah numbuhka Komiti Pemansang Menua Pesisir Bintulu (BIRDCOM) dipeda nyadi singkang strategik Perintah Sarawak dikena ngenegapka pemansang komuniti menua pesisir nengah chara teratur, inklusif sereta meri empas tinggi.

“Komiti tu bejalaika tanggungpengawa beguna amat dalam nentuka pengawa ngenataika pemansang meri empas positif ngagai rayat, kelebih agi ba kandang menua ulu.

“Berebak enggau nya, perintah mega udah ngambi chara ti engkeman iya nya setuju ngambi jalai batang lama lalu dikemansang ngambika diangkatmanah, lalu ari nya ulih ngemanahka agi akses enggau perengkaguna ungkup peranak menua nya,” ku iya.

Ku Uggah, chara ke baka nya deka nentuka komuniti menua pesisir enda tinggal ari arus penyulut, lalu ari nya sida ulih terus ngasaika perengka guna ke sebaka enggau kandang menua bukai di mengeri.

Sama bisi ngulu pengerami nya Menteri Industri Pemakai, Komoditi enggau Pemansang Kandang Menua Sarawak (M-FICORD) Dato Sri Dr Stephen Rundi Utom, Sapit Menteri Infrastruktur enggau Pemansang Palan Penyangkai Kapal Sarawak enggau Kaban Kunsil Nengeri (ADUN) Samalaju Datuk Majang Renggi, Kaban Kunsil Nengeri (ADUN) Jepak Iskandar Turkee enggau Residen Bagi Menua Bintulu Datu Nyurak Keti. -RBI

Gambar & info kredit UKAS

#ruaiberitaiban#newsiban#beritaiban

Rindu | Titih | Kunsika

BINTULU, 2 Mei 2026 — Shalinie Agnes anak Ali dipadu nyadi champion ba pekit Kumang Gawai Sebauh 2026 ti diatur enggau richah ba Restoran Dinner World, kemari.

Pengerami ke berengkah tumu pukul 7 lemai nya udah disereta penyereta ti ukai semina mandangka pengalus pekayan asal, tang mega mantaika personaliti, pengandal enggau nguasa adat enggau budaya komuniti Iban.

Nengah jaku ti chukup gaga, Shalinie mantaika pengaga ati ketegal pemenang iya ba pekit nya.

Iya nerangka pemujur nya siti basa ke besai, ukai semina ungkup iya empu, tang mega ungkup sida sebilik enggau komuniti ke seruran nyukung iya.

“Aku amat beterima kasih sereta enda nyangka diri dipilih nyadi pemenang malam tu.

“Aku nyerahka pemenang tu ngagai kami sebilik, bala bakih enggau semua orang ti seruran nyukung pejalai aku.

“Aku ngarapka aku ulih ngena pelasar tu terus negika budaya Iban sereta meri inspirasyen ngagai nembiak rebak baru,” ku iya ngagai pemberita Ruai Berita Iban.

Perais pemenang disuaka Dato Doreen Mayang, ti bela ngerami pengawa ke nyadi kelai pengangkun ngagai pesaka asal beserimbai enggau pengerami Gawai Dayak.

Pekit Kumang Gawai nyadi pelasar ke beguna dalam negika identiti indu Dayak, pia mega ngenegapka semengat beserakup enggau sayau ke adat ba raban nembiak rebak baru. – RBI

#ruaiberitaiban#newsiban#beritaiban

Rindu | Titih | Kunsika

SARIKEI, 2 Mei – Kimpin Meresa Pengerai Lelaki “Sari-Creen” Renggat Nengeri Sarawak nagit 200 iku penyereta beperesa pengerai lelaki, lalu enggau nya muka peluang ngagai komuniti beperesa tumu sereta meri jaku lalau perubat enggau enda bebayar.

Berebak enggau nya, Sepital Sarikei nempa sejarah lebuh keterubah iya ngatur kimpin besai nya sereta fokus ba pekara tu di pelilih menua nya.

Direktor Sepital Sarikei, Dr Mohamad Ng Siah Huat madah, sida iya ngenataika pengaga ati ti pemadu tinggi ngagai tim Urologi ari Sepital Besai Sarawak (HUS) ti sanggup bejalai jauh ngemujurka program nya.

“Aku ngarika semua pengereja pengawa ba Sepital Sarikei meri besai terima kasih ngagai tim Urologi HUS, inisiatif besai tu enda ulih nyadi nyata enti nadai pengawa bebendar enggau dedikasyen sida,” ku iya lebuh bejadika kimpin nya.

Nitih ku iya, kimpin tu ngembuan tuju deka meri penyedar ngagai mensia mayuh senentang pemesai guna pengerai lelaki, ti suah dikumbai isu sensitif.

“Pengerai lelaki suah nyadi topik sensitif.Lelaki sanggup agi napi pemedis laban berundingka tanggungpengawa diri sebilik.Taja pia, kemaya hari tu, kitai deka ngubah peragam nya nengah kimpin baka tu,” ku iya.

Iya mega nesau rayat Sarikei kelebih agi sida ke lelaki ngambi peluang emas tu enggau penuh penyedar sereta anang berasai malu minta lalau pasal pengerai.

“Beri kerejasama ti chakah, anang malu sereta anang malu betanya ngagai lutur.Nyeliah manah agi ari ngubat lalu ditemu tumu ulih nyelamatka nyawa,” ku iya nambah.

Ba program ke sama, siku ari penyereta iya nya Cheng Tai Ping, 65, madahka diri nemu pasal kimpin nya nengah Facebook lalu nerangka nya siti pengawa ke chukup manah dalam pengawa ngangkatka penyedar komuniti, kelebih agi di Sarikei.

“Seraya umur kitai majak tuai, beguna amat semua lelaki beperesa pengerai enggau tetap,” ku iya.

Sama bisi datai Dr Lim Meng Shi, Dr Kamal Raj ke nyadi Direktor Program, Dr Ngu Ing Soo, Dr Aaron Ling Shien Loong, Dr Asraf Zuki enggau Penulung Pemesai Perubat Bagi Menua Sarikei, Hamiza Abu Bakar. -RBI

#ruaiberitaiban#newsiban#beritaiban

Rindu | Titih | Kunsika

Penembu jematan tu deka ngemuntang pemindah peranak menua tu, sereta nyungkak sosioekonomi rayat.

BINTULU, 2 Mei – Perintah Sarawak merambu agih belanja urung RM1.17 bilion dikena ngemanah sereta ngemansangka rentayan jalai alun di kandang menua Sebauh enggau Tatau, nyengkaum ngambi jalai batang ke suba ti enda ditengah kompeni batang diatu ungkup pemansang.

Menteri Industri Pemakai, Komoditi enggau Pemansang Kandang Menua Sarawak ti mega Kaban Kunsil Nengeri (ADUN) Kemena, Dato Sri Dr. Stephen Rundi anak Utom. mega madah, raban iya begulai enggau Residen Bagi Menua Bintulu enggau Opis Kereja Raya (JKR) udah ngenataika perambu ngagai Datuk Amar Douglas ngambika Kaunsil Pemansang Bintulu (BDA) mantu nyendiaka infrastruktur jalai alun di Tatau, Sebauh, Bintulu enggau Samalaju.

“Jalai ari Sebauh ngagai Ulu Pandan agi bedau tembu, pia mega jalai di Tatau, urung RM1.17 bilion diguna ungkup jalai tu aja,” ku iya.

Dr. Rundi mega nyemetak madahka Perintah Sarawak deka ngambi jalai batang ungkup pemansang ti udah ditinggalka dulu suba ngambika nyadi jalai mensia mayuh, setipak enggau peminta ti dibantaika Premier Sarawak.

Iya mega mantaika pengirau ati bekaul enggau sebuah jematan ke udah bisi ba kandang menua nya ke semina ulih nanggung pemerat nyentuk 10 tan, lalu perengka pengangkut berat ke ngena nya ulih manggai 30 tan.

Beduduk ari nya, iya ngansak bala ketuai komuniti kandang menua nya matau pengawa ngena jematan nya enggau silik agi.

Perambu tu disadang deka dipejurai sereta dibai dalam timpuh Langgur Pemansang Malaysia Lumpar Ke-13 ti berengkah taun tu.

Sama bisi ngulu pengerami nya, Sapit Premier Sarawak ke mega Menteri Wang enggau Ekonomi Baru Kedua sereta Menteri Infrastruktur enggau Pemansang Palan Penyangkai Kapal, Datuk Amar Douglas Uggah Embas, ke nyadi temuai dipebasa sereta temuai ke bukai. -RBI

#ruaiberitaiban#newsiban#beritaiban

Rindu | Titih | Kunsika

BINTULU, 2 Mei – Menteri Industri Pemakai, Komoditi enggau Pemansang Kandang Menua Sarawak merangkap Kaban Kunsil Nengeri (ADUN) Kemena, Dato Sri Dr. Stephen Rundi Anak Utom mantaika perambu ambika menua Bintulu bisi sebuah palan konvensyen ke besai dikena nangkup peminta ngatur pengerami enggau program ba menua nya.

“Udah datai ba maya iya Bintulu bisi sebuah palan besai endur rayat kitai begempuru begulai, enda ngira nama guna iya,” ku Dr.Rundi.

Iya mantaika perambu nya ba mua mayuh maya bejaku ba Mantar Gawai Sebauh 2026 di Dinner World, Bintulu, kena malam kemari, ke digulu Sapit Premier Sarawak ke mega Menteri Ekonomi Baru Kedua sereta Menteri Infrastruktur enggau Pemansang Palan Penyangkai Kapal, Datuk Douglas Uggah Embas ambi ngenataika perambu nya ngagai Premier Sarawak.

Iya ngaga banding enggau Begunan Konvensyen Kuching (BCCK) ke suah dibuking penuh, lalu ngemeratka guna enggau lengkas fasiliti ke sebaka di Bintulu ke nyadi hab ekonomi besai tebing tasik utara Sarawak.

Dr Rundi madahka, palan ke bisi diatu di Bintulu diatu enda ulih nangkup kapasiti ke diguna ungkup pengawa besai ungkup nengeri enggau pelilih menua, lalu nyadika pengawa ngaga palan konvensyen ke besai agi nyadi pekara ke diguna enggau lengkas ke enda ulih ditangguh agi. -RBI

#ruaiberitaiban#newsiban#beritaiban

Rindu | Titih | Kunsika

MUKAH, 2 Mei – Sharvel Irisi binti Sebastian dichiri nyadi pemenang pekit Teluwaih Jinih 2026 ke diatur ba Panggau Besai Tapak Kaul Mukah, beserimbai enggau Pesta Kaul Mukah, kemari.

Sapit Menteri Pengerai Malaysia ke mega Kaban Parlimen Mukah, Dato Hajjah Hanifah Hajar Taib mega bisi datai ngerichahka agi pengawa nya, ke nyadi siti ari batang pengerami ninting taun komuniti Melanau.

Teluwaih Jinih ti mai reti “indu bajik” dalam jaku Melanau iya nya pekit pemajik gamal tradisional ti ukai semina mantaika penau bala penyereta, tang mega ngangkatka budaya enggau identiti penyelai indu Melanau.

Ungkup edisyen tu, sepenyampau 12 iku penyereta bepekit ngulihka gelar berprestij nya.

Pengawa ngatur pekit tu dipeda nyadi pelasar ke beguna dalam ngenegapka pangku pengawa orang indu sereta ngetanka pesaka budaya menua tu ngambika terus mengkang relevan dalam arus moden.

Kelimpah ari nya, program tu mega nyadi sebengkah ari batang pematak sepemanjai Pesta Kaul ti mujur matak penatai temuai ari dalam enggau luar Bagi Menua Mukah, lalu enggau nya meri empas positif ngagai ekonomi menua tu, kelebih agi ngagai orang dagang mit enggau orang dagang menua tu.

Sama bisi datai Tan Sri Dr Muhammad Leo Michael Toyad Abdullah, Kaban Kunsil Nengeri (ADUN) Tellian, Royston bin Valentine enggau ADUN Balingian, Abdul Yakub bin Haji Arbi. -RBI

#ruaiberitaiban#newsiban#beritaiban

Rindu | Titih | Kunsika

BINTULU, 2 Mei – Mensia mayuh patut pintar merambu belanja sida nyengkaum utai ke diguna bala anak ke agi besekula.

Menteri Industri Pemakai, Komoditi enggau Pemansang Kandang Menua Sarawak, Dato Sri Dr Stephen Rundi Utom madah, ngurangka belanja ke enda diguna ulih mantu nentuka duit dikena ungkup utai ke beguna agi sereta nentuka pengelantang ruang bilik.

Iya nibarka jaku lalau tu lebuh bejaku ba Pengerami Mantar Gawai Dayak Sebauh 2026 ba Restoran Dinner World, ditu kena Hari Lima tu tadi.

Berebak enggau nya, iya ngelalau mensia mayuh ngambika ngatur belanja sida enggau bejimat kelebih agi nyerumba musin pengerami Gawai dikena nyeliahka penanggul ba pekara belanja.

“Pengerami Gawai enda patut kelalu lama nyentukka ngeruga gaya belanja diri sebilik.

“Enti ulih, pengerami Gawai patut ditatak ba timpuh ke ditetapka ngambika belanja enda kelalu mayuh lalu belanja ruang bilik mengkang ulih diatur,” ku iya. – RBI

#ruaiberitaiban#newsiban#beritaiban

Rindu | Titih | Kunsika

MANCHESTER, 2 Mei – Premier Sarawak Datuk Patinggi Tan Sri Abang Johari Tun Openg nguluka raban perintah nengeri ngagai Manchester ngepunka penemuai kereja rasmi ngagai Manchester enggau Bristol, United Kingdom (UK) sereta mega Dublin, Ireland ti deka berengkah 2 ngagai 5 Mei tu.

Penatai iya disempulang Sekretari Perintah Nengeri Sarawak, Datuk Amar Mohamad Abu Bakar Marzuki enggau Sapit Menteri ba Opis Menteri Besai Sarawak (Undang-Undang, MA63 enggau Kaul Nengeri enggau Perintah Besai) Datuk Sharifah Hasidah Sayeed Aman Ghazali ti diripotka sangkai di Manchester pukul pukul 1.15 pagi jam ditu.

Penemuai strategik tu ti dipeda nyadi siti pengeransing ngenegapka penuduk Sarawak dalam rentayan nilai global, kelebih agi ngaul pemansang infrastruktur palan data, teknologi pemintar tiru (AI), industri semikonduktor sereta mega pemansang bakat tikas antarabansa.

Penemuai kereja tu dikearapka nyadi pelasar beguna ngagai Sarawak mansik peluang kerejasama baru enggau institusyen sereta pemain industri di United Kingdom enggau Ireland, setipak enggau juluk nengeri nuju ekonomi bepelasarka teknologi tinggi enggau inovasyen.

Sumber TVS

#ruaiberitaiban#newsiban#beritaiban

Rindu | Titih | Kunsika

KANOWIT, 2 Mei – Pekara pelajar terus nyadi batang agenda dalam nempa pengidup nembiak rebak baru jemah ila seretw ngemeratka pemesai guna kerejasama begulai entara sekula, apai indai enggau komuniti dalam nentuka penyulut nembiak selampur.

Kaban Kunsil Nengeri (ADUN) N.49 Ngemah, Anyi Jana madahka pelajar ukai semina nyadi medium dikena meri penemu, tang nyadi pelasar ti beguna dalam nempa ulah, identiti enggau nilai mulia ba nembiak.

“Ba dunya ke majak mayuh pemar tu, pelajar nyadi kunchi ke muka peluang ngagai pengidup ke menyana.Taja pia, pemujur dalam pelajar ukai semina bepanggai ba bau raban sekula aja, tang lebih agi begunaka sukung ke tegap ari apai indai enggau komuniti,” ku iya.

Anyi munyi nya lebuh bejadika Pengerami Malam Main Asal enggau Lumba Gerempung Apai Indai Pengajar (PIBG) Sekula Primari Nanga Balingiau, Mapai, Kanowit ti nerima sukung komuniti menua nya.

Dalam jaku iya, Anyi ngemeratka PIBG nyadi jematan entara sekula enggau apai indai dalam pengawa deka nempa rampa belajar ti lebih kondusif sereta efektif.

Iya mega nyemetak madahka kaul apai indai ti chakah dalam pemansang pelajar anak ulih meri empas ke besai ngagai penyulut akademik enggau penumbuh personaliti nembiak.

“Lebuh apai indai ngintu, meri sukung moral sereta bekerejasama enggau pengajar, kitai deka ulih meda asil ba penyulut akademik enggau personaliti nembiak,” ku iya nambah.

Berebak enggau nya, Anyi mantaika pengandal kerejasama rat antara sekula, PIBG enggau komuniti ulih ngadaka rebak ti ukai semina nyulut dalam akademik, tang mega sebela ari sukut personaliti, lumba enggau main sereta budaya.

Iya mega pechaya SK Nanga Balingiau Mapai bisi penau besai ngambi ulih terus ngadaka nembiak ti bekualiti tinggi sereta ulih besemekih jemah ila.

Dikena nyukung pengawa ngenegapka kerejasama tu, iya madahka agih belanja Projek Mit Menua Pesisir (MRP) sepenyampau RM8,000 ngagai PIBG sekula nya.

Dikearapka agih belanja nya ulih mantu bejalaika mayuh macham aktiviti pelajar sereta mega pemansang personaliti enggau penyulut nembiak ba sekula nya.

Lebuh nyimpul jaku iya, Amyi meri besai terima kasih ngagai semua piak ti udah ngemujurka program nya.

“Meri pengaga ati ngagai semua ke bisi kaul.Ngarapka Malam Main Asal enggau Lumba tu nyadi kenang ti besai reti sereta meri penguntung ngagai semua raban sekula enggau komuniti,” ku iya.

Pengawa tu ukai semina ngerapitka kaul entara sekula enggau komuniti, tang mega nyadi pelasar mantaika penau nembiak dalam bidang budaya enggau lumba, setipak enggau pengawa deka ngadaka rebak ti holistik sereta kompetitif. -RBI

#ruaiberitaiban#newsiban#beritaiban

Rindu | Titih | Kunsika