KUCHING, 12 Mei – Direktor Opis Kereja Raya (JKR) Sarawak, Datu Dr Cassidy Morris mantaika sukung iya ngagai produk komuniti orang dagang menua tu lebuh iya nemuai ngagai Pavilion Juma’ani beratika enggau silik agi asil pengelandik jari enggau produk menua tu kelebih agi Batik Sadong.

Nitih ku iya, tanggungpengawa nyadi Direktor Opis Kereja Raya ukai semina fokus ngagai pemansang jalai alun enggau infrastruktur, tang mega nyengkaum pengeransing ngelawa komuniti sereta nyukung produk menua tu ke ngembuan potensial ke besai dikemeratka ba makit ke besai agi.

Ku iya, produk menua tu baka Batik Sadong ukai semina mandangka kreativiti komuniti Sarawak, tang mega entara pesaka asal nengeri tu ti patut dijaga sereta diangkatka.

Sukung ari mayuh bengkah ejensi enggau opis perintah dipeda ulih mantu ngenegapka orang dagang menua tu kelimpah muka mayuh agi peluang ngagai sida besemekih dalam industri kreatif enggau dagang mit.

Penatai iya mega disambut Menijar Besai CENTEXS Komersial Sarawak Shahren Yusri, Direktor MATRADE Sarawak Suwardy Abd Shukor enggau Penulung Direktor MATRADE Aidatul Marina Abdul Ghani. -RBI

#ruaiberitaiban#newsiban#beritaiban

Rindu | Titih | Kunsika

KUCHING, 12 Mei – Sumitomo Corporation mantaika pengerindu deka mansik kerejasama strategik bekaul enggau pemansang projek paya bakau, karbon biru enggau kredit karbon ti meruan di Sarawak.

Randau mega bisi ngenang pasal peluang kerejasama ari baruh Mekanisme Kredit Begulai (JCM) entara Malaysia enggau Jepun ungkup pemansang projek karbon ti meri penguntung begulai ngagai kededua menua.

Berebak enggau nya Sapit Premier Sarawak, Datuk Amar Awang Tengah Ali Hasan madah, Perintah Sarawak nyambut manah pengawa beranakka puku ti bekualiti seriris enggau agenda pemansang ekonomi rampa menua gadung nengeri tu.

Ku Awang Tengah, tetiap projek meseti nitihka polisi perintah nengeri sereta ngemeratka pemerat rayat, komuniti lokal enggau pengawa ngintu pengeraja asal.

Iya madah munyi nya pengudah nerima penemuai basa ari raban ari Sumitomo Corporation ba Dewan Undangan Negeri (DUN) Sarawak sehari tu tadi.

Sama bisi datai Sapit Menteri Perambu Mengeri, Pengatur Tanah enggau Rampa Menua Datuk Len Talif Salleh, Sekretari Mendam Opis Menteri Pengeraja Asal enggau Pemansang Mengeri Datu Abdullah Julaihi enggau Direktor Opis Kampung Sarawak Datu Hamden Mohammad.-RBI

Sumber Jiwa Bakti

#ruaiberitaiban#newsiban#beritaiban

Rindu | Titih | Kunsika

KUCHING, 12 Mei Kaban Kunsil Nengeri (ADUN) Telang Usan, Dato Dennis Ngau nerangka pengawa numbuhka Kaunsil Padi enggau Beras Sarawak 2026 nyadi siti singkang ti strategik sereta jauh runding dalam pengawa ngenegapka pengelikun pemakai nengeri tu sereta ngemodenka industri betanam betupi Sarawak.

Nitih ku iya, pengawa numbuhka kaunsil khas ti ngemeratka sepenuh iya ngagai pemansang pengawa nanam padi enggau ngeluarka padi di Sarawak ukai semina inisiatif betanam betupi aja, tang nyadi pelasar ti beguna dalam nempa industri pemakai ti meruan ungkup nengeri jemah ila.

Ku iya, kaunsil nya deka nyadi batang koordinator ti nyambung kesemua rentayan industri padi enggau beras, mungkur perambu kandang endur nanam, pemansang infrastruktur entali ai, ngena mekanisasyen moden, ngatur input betanam betupi baka benih enggau baja, sistem nanam, pemansut, proses, nyimpan nyentuk ke ngagai makit masar ngagai penguna.

Dalam jaku iya ti nyukung Rang Undang-undang (RUU) Kaunsil Padi enggau Beras Sarawak 2026 ba Dewan Undangan Negeri Sarawak, iya madahka Sarawak ngembuan tanah ti galak sereta engkeman endur ngemansangka pengawa betanamka padi chara moden enggau komersil.

“Enggau perambu ke bisi struktur, aku pechaya Sarawak ulih nyapai pemansut beras ngatika diri jemah ila,” ku iya.

Iya mega merambu ngambika Kaunsil Padi enggau Padi Sarawak ti deka ditumbuhka, bejalaika pansik pemisi ba sekeda kandang endur ti bisi potensial di pelilih menua Telang Usan enggau Baram ti deka dikemansangka nyadi kandang endur nanam padi bedandang besai sereta komersial.

Entara kandang menua ke dikelala ngembuan potensial ke besai iya nya Apoh, Ulu Tinjar enggau Baram Tengah ke nitihku iya ngembuan tanah ke chukup, entali ai ke manah sereta engkeman dikemansangka ngena chara betanam betupi moden.

Ku iya nambah, pemansang betanam betupi moden ba kandang menua ulu ukai semina ulih nambahka pemansut pemakai nengeri tang mega ulih muka peluang ekonomi baru ngagai komuniti menua pesisir.

Berebak enggau nya, iya mega ngemeratka pemesai guna teknologi moden, mekanisasyen, data betanam betupi pintar enggau sistem ngatur ladang ti efisyen agi dikena nentuka industri padi di Sarawak ulih mansang enggau lebih kompetitif sereta meruan.

Ku iya, pengawa ngaul raban nembiak mega beguna amat dalam nentuka pengelantang sektor betanam betupi jemah ila.

“Peragam ti ngumbai sektor betanam betupi nadai jemah ila patut diubah.

“Industri tu patut dimoden ngambika nyadi sektor ti beteknologi tinggi sereta mai penguntung ngambika mayuh agi raban nembiak bisi ati deka ngereja pengawa nya,” ku iya.

Nitihku iya, Sarawak deka ngadaka mayuh agi agropreneur moden ba raban nembiak setipak enggau aspirasyen Strategi Pemansang Pasca COVID-19 2030 (PCDS 2030).

Dalam jaku dipansutka iya, iya mega nyemetak madahka pemansang industri padi enggau beras bisi kaul rat enggau aspek pengelikun pemakai, pemansang menua pesisir, peluang kereja, ngurangka penyeranta enggau penumbuh ekonomi nengeri.

Iya mega ngaitka pemesai guna merambu pemakai dalam timpuh ti panjai enggau cherita Nabi Yusuf dalam ‘Kitab Kejadian 41:47–49 ti nyimpan asil ti diketau maya musim ti mayuh dikena nyendiaka diri napi kemarau enggau lapar pungkang.

“Baka Nabi Yusuf merambu nyimpan pemakai dikena napi pengidup dudi hari ti enda tentu, Sarawak kemaya hari tu begunaka penegap ba pengawa ngeluarka pemakai kediri empu,” ku iya.

Ku iya nambah, Sarawak endang amat diberekat enggau tanah ti ami sereta pengeraja ai ti chukup lalu pengelebih tu meseti dikena enggau naka pemanah dikena nentuka pemakai meruan ungkup rebak dudi hari. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

Sumber, photo — DENNIS NGAU

Pengawa melakin ‘premix’ (asphalt) ba Jematan Batang Lupar 1 (Sebuyau-Triso) diatu benung chakah dipejalaika nyadi sebagi ari pengawa ngangkatka kualiti infrastruktur jalai alun sereta dikena nentuka pengelantang enggau pengelikun penguna jalai alun. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

Sumber, photo — Aidel Lariwoo

MIRI, 12 Mei — Ejensi Penerit Adat Maritim Malaysia (APMM) Zon Miri udah ngetan sebuah kapal tunda enggau tungkang pengudah iya ditemu ngereja pengawa ngelanggar Ordinan Kapal Dagang 1952 dalam operasyen rutin di tasik Kuala Miri, kemari.

Direktor Maritim Zon Miri, Kapten Maritim Mohd Khairol Anuar Saad madah, pengawa nya dipejalaika asil ari pengawa meresa ke dipejalaika nengah Op PERMAI 01/2019 enggau Op TIRIS 4.0 pukul 12.50 tengahari ba palan ke dipelabaka 3.42 batu nautika Barat Kuala Miri.

“Asil peresa tetemuka kapal nya enda nitihka sukut pengelikun enggau peminta dokumentasyen ti udah ditetapka,” ku iya.

Ku iya nerang, entara pekara ti enda nitihka atur ti ditemu iya nya rakit penyelamat (liferaft) ti udah abis timpuh enggau enda nganjung Setipikit Rejista ngagai piak penerit adat lebuh dipinta.

Nitihku iya, kapal nya ngundan tujuh iku kru ke mungkur dua iku peranak menua tu enggau lima iku peranak Indonesia ke beumur entara 20 ngagai 70 taun.

Berindik ari penyalah nya, perintah ngetan kapal tunda enggau tongkang nya dikeluarka sebedau diasuh besauh ba endur ke likun ngambika dipansik enggau silik agi.

“Master’ kapal enggau siku kru dibai ngagai Indu Opis Maritim Zon Miri ngambika dipejalaika Pemesai Pemansik nitihka penetap undang-undang ke udah bisi,” ku iya nerang.

Berebak enggau nya, Ejensi Penerit Adat Maritim Malaysia ngemeratka komitmen sida ti terus ngangkatka pengawa matau enggau neritka atur ba tasik menua tu dikena nentuka pengelikun pelayaran enggau nitihka undang-undang maritim seruran dititihka komuniti maritim.

Mensia mayuh ke bisi penerang bekaul enggau sebarang aktiviti tauka penusah ngenyit ke disangka di tasik tau betanya ngagai Palan Operasyen Maritim Zon Miri nengah lumur 085-649111 tauka talipaun penusah ngenyit 999. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

Sumber, photo — APMM

PUTRAJAYA, 12 Mei — Sapit Menteri Pengerai Malaysia, Dato Hanifah Hajar Taib bisi datai bejadika Pengerami Ngintu Hari Indu Misi Antarabansa Renggat Nasional ke diatur ba Palan Konvensyen Antarabansa Putrajaya sehari tu.

Pengerami ke besai reti nya disambut enggau penatai urung 2,200 iku indu misi ari serata menua, lalu enggau nya ngayanka semengat enggau komitmen ke tinggi profesyen indu misi dalam ngenegapka sistem nyaga pengerai nasional.

Pengerami ninting taun ke diatur Gerempung Indu Misi Malaysia nyadi pelasar beguna dikena meri basa ngagai jasa, pengawa enggau dedikasyen jururawat ke dikumbai nyadi tulang belakang servis pengerai menua.

Ngambi rambai jaku “Indu Misi Kami, Masa Depan Kami: Indu Misi Berkuasa Nyelamatka Nyawa”, pengerami taun tu ngemeratka pangku pengawa besai indu misi dalam nentuka rayat nerima servis pengerai ti bekualiti, profesional sereta siru.

Dalam jaku dipansutka iya, Hanifah meri besai terima kasih ngagai semua indu misi ketegal komitmen sida ti seruran meri perubat enggau sukung ngagai pesakit, nyengkaum lebuh napi bemacham pemar pengerai ke diatu.

Iya mega ngemeratka komitmen ti seruran dipejalaika Opis Menteri Pengerai Malaysia ngambika terus ngenegapka profesyen indu misi nengah pelajar ti bekualiti, latih ti enda ngetu sereta pemansang kereja ti meruan.

Nitihku iya, kerejasama rat entara institusyen pelajar, organisasyen profesyenal enggau institusyen pengerai beguna amat dikena nentuka profesyen indu misi mengkang relevan sereta dipebasa ba renggat nasional enggau antarabansa.

Pengerami nya mega meda pengangku diberi ngagai indu misi ke tebilang ketegal pemeri besai sida dalam ngetanka profesyen indu misi ungkup pengelantang rayat enggau jemah ila sistem pengerai menua. – RBI

#ruaiberitaiban#newsiban#beritaiban

Rindu | Titih | Kunsik

KUCHING, 12 Mei — Bisi 4,694 nembiak di Sarawak udah nerima Skim Pelajar Tinggi Pechuma (FTES) naka 31 Mac tu tadi ku Sapit Menteri Pelajar, Inovasyen enggau Pemansang Pengelandik Sarawak Datuk Dr Annuar Rapaee.

Iya madah, tu nyengkaum 543 nembiak ba Curtin University Malaysia enggau 172 nembiak di Kolej Universiti i-CATS.

“Kelimpah ari nya, 1,959 ba Swinburne University of Technology Sarawak Campus enggau 2,020 nembiak ba University of Technology Sarawak.

“Penyampau tu disadang majak nambah alai enrolmen ba bulan Jun enggau September tu kitai melaba bisi 10,000 iku nembiak bela deka nerima inisiatif tu,” ku iya.

Iya nerangka pekara nya maya nimbal tanya Kaban Kunsil Nengeri (ADUN) Daro, Dr Safiee Ahmad ba Aum Kunsil Nengeri (DUN) Sarawak Ke-19, Hari Dua.

Kelimpah ari nya, iya madah, bisi 64 iti kus disedia nengah FTES naka ke diatu lalu penyampau nya ulih dipeda baru nitihka guna industri di Sarawak.

Ke penemu mayuh, bisi 39,839 nembiak Sarawak diatu benung nampung pelajar ba Palan Pelajar Tinggi Perintah (IPTA) selampur Malaysia naka Februari 2026.

Sumber, photo — UKAS

KUCHING, 12 Mei – Kaban Kunsil Nengeri (ADUN) Meluan (ADUN), Datuk Rolland Duat Jubin madahka mayuh pekebun diatu agi betapi enggau bemacham pemar nyengkaum pengurang ngulihka benih ti bekualiti, ungkus baja ti majak niki, kurang mekanisasyen, sistem ai enda chukup enggau akses makit ti kurang.

Nya alai, Rolland madahka pengawa numbuhka Kaunsil Padi enggau Beras Sarawak dipeda ulih ngubah nasit orang bumai ti udah lama betapi enggau ungkus pemansut ti tinggi, kurang infrastruktur enggau penatai pemisi ti enda tentu.

Terang Rolland, pengawa numbuhka kaunsil nya mega siti singkang ti strategik sereta engkeman ba maya dalam pengawa ngenegapka pengelikun pemakai Sarawak sereta ngurangka bepanggai ba bekal beras import.

Ku iya nengah Rang Undang-Undang Kaunsil Padi enggau Beras Sarawak 2026, Perintah Sarawak ulih ngatur koordinasyen bantu, subsidi, pemansang infrastruktur, latih enggau ngena teknologi moden dikena nyungkak produktiviti enggau penatai pemisi orang bumai.

“Tu ulih meri kuasa terus ngagai komuniti menua pesisir lalu berebak enggau nya ulih matak pengerindu rebak baru ngemeranka sektor betanam betupi ti lebih moden sereta meruan,” ku iya lebuh bejuraika rang undang-undang nya ba Aum Kunsil Nengeri (DUN) Sarawak ba Kompleks DUN Sarawak, sehari tu tadi.

Rolland Duat madah, Sarawak ngembuan potensial ke besai dikena nambahka pemisi padi ke ngatika diri nengah pengawa ngemesaika kandang endur betanamka padi, ngena benih ke meri asil ke tinggi, teknologi betanam betupi ke pintar, ngatur ai enggau efisyen agi sereta pansik enggau pemansang.

Ku iya nambah, nengah perambu enggau puku ti betul, Sarawak bisi potensial nyadi siti ari pelilih menua ti ngeluarka padi besai di Malaysia, lalu enggau nya ulih ngenegapka penegap ekonomi nengeri tu.

Tandu iya dalam jurai nya, kaunsil nya mega bejalaika tanggungpengawa nyadi pematak transformasyen sektor betanam betupi nengah chara ngena teknologi baka dron, sistem matau digital, mekanisasyen ngetau enggau chara betanam betupi ti tan enggau gaya hari.

“Lebuh industri padi enggau beras majak tegap, empas nya mega deka diasai ba sektor bukai nyengkaum logistik, proses, mungkus, pengangkut enggau agro-pedagang.

“Tu deka meransang penumbuh ekonomi menua pesisir sereta mantu ngurangka tikas penyeranta ba komuniti ti nanam padi,” ku iya nambah.

Ku iya, pekara ti enda tentu ba dunya nyengkaum krisis pemakai, ubah gaya hari, penyarut geopolitik, ungkus pengangkut ti majak niki enggau tagang eksport ari menua pengeluar nyata ngayanka Sarawak enda ulih agi bepanggai sepenuh iya ba pun penatai ari luar dikena nyamin bekal pemakai rayat.

“Beras ukai semina komoditi biasa aja, tang nyadi pemakai ungkup majoriti rayat ti bisi kaul rat enggau budaya, pengidup ninting hari sereta pendiau komuniti menua pesisir di serata Sarawak.

“Nya alai, pengawa numbuhka Kaunsil Padi enggau Beras Sarawak siti singkang ti berani ari perintah nengeri dikena ngenegapka pengawa nguasa pemansut, ngagih, merambu enggau ngetanka bekal beras timpuh panjai,” ku iya. -RBI

#ruaiberitaiban#newsiban#beritaiban

Rindu | Titih | Kunsika

KOTA KINABALU, 12 Mei — ‘Minggu Pembinaan Antarabansa’ (ICW) Borneo 2026 dilanchar enggau rasmi sehari tu di Kota Kinabalu nyadi pelasar strategik dikena ngenegapka pemansang industri ngaga rumah di Malaysia Timur nengah inovasyen, teknologi enggau digitalisasyen.

Pengerami ngelancharka nya dipenyadika Sapit Kepala Menteri II Sabah, YB Datuk Seri Panglima Haji Masidi Bin Manjun, ngarika Kepala Menteri Sabah, lalu digulu Menteri Kereja Raya Malaysia, Dato Sri Alexander Nanta Linggi.

Pengawa ngatur ICW Borneo 2026 iya nya inisiatif Opis Menteri Kereja Raya Malaysia nengah ‘Lembaga Pembangunan Industri Pembinaan Malaysia’ enggau kerejasama Qube Integrated Malaysia Sdn Bhd.

Berambai jaku “Beyond Limits”, program nya ngembuan tuju deka ngenyampatka transformasyen industri ngaga rumah nengah aplikasyen teknologi moden enggau pengawa ti meruan, setipak enggau aspirasyen Pelin Pemansang Sabah Maju Jaya 2.0 (2026–2030) ti ngemeratka daya tan ekonomi enggau penambah produktiviti nengeri.

Dalam jaku dipansutka iya, Dato Sri Alexander Nanta madahka Perintah Besai udah beranakka puku lebih ari RM150 juta dikena ngenegapka ekosistem industri ngaga rumah di Sabah.

Nitihku iya, pengawa beranakka puku nya nyengkaum pengawa ngemansangka fasiliti latih Pemodelan Maklumat Bangunan (BIM) ti beungkus RM2.25 juta, pengawa meri kuasa ngagai Makmal Kereja Raya Malaysia (MKRM) Sabah nyadi palan nguji kelas antarabansa enggau pengawa ngaga kampus eko baru Akademi Binaan Malaysia (ABM) di Papar sepenyampau RM130.6 juta.

ICW Borneo 2026 mega bisi mandangka pengawa pemandang BuildXpo Malaysia (Borneo) ti ngempuruka kompeni teknologi ngaga rumah ari Eropah, China enggau pemain industri menua tu.

Platform tu dipeda ulih muka peluang beranakka puku baru, ngerembaika rentayan kerejasama strategik sereta nambahka daya bepekit industri ngaga rumah di pelilih menua Borneo.

Entara batang pekara ke dikemeratka program tu iya nya Aum ‘Kemuncak Kelestarian Pembinaan’ (CSS) 2026 ti ngemeratka pemansang kurang karbon enggau bejalaika pengawa Rampa Menua, Sosial enggau Tadbir Urus (ESG) dalam sektor ngaga rumah.

Kelimpah ari nya, bemacham sesi teknikal, penemuai industri ngagai MKRM Sabah enggau pengerami konvokesyen ti ngaul 150 iku pelatih ari Akademi Pembinaan Malaysia Sabah enggau CIDB Technologies mega bisi diatur sepemanjai program nya.

ICW Borneo 2026 nyadi pengawa ngepunka pengawa ngatur batang ICW enggau BuildXpo 2026 ti diperambu deka diatur berengkah 10 ngagai 12 November ba Palan Dagang enggau Eksibisyen Antarabansa Malaysia.

Penerang silik pasal program tu tau ditanya nengah laman web rasmi ICW Malaysia https://icw.my/

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

Pemajik, pengandal enggau pengerindu ke dalam ngagai budaya pesaka asal Iban nyadi batang penegap Olivia Ontai lebuh iya dipadu nyadi Kumang Gawai Dayak Saratok 2026 pengudah ngalahka empat iku penyereta bukai ba pekit final ke diatur apin lama ke udah.

Pemenang nya ukai semina nyadi maya ti pemadu besai reti dalam pengidup iya, tang mega muka ruang ngagai iya terus ngetanka adat enggau budaya komuniti Dayak, kelebih agi ba raban nembiak rebak baru.

Kenu ku Olivia, iya berasai amat beterima kasih sereta temegah ati lebuh dipadahka nyadi pemenang besai pekit ti beprestij nya.

“Terima kasih ngagai semua ke seruran nyukung aku sepemanjai pekit tu.

“Aku berasai gaga endar ati sereta teperansang amat laban udah dipaduka menggi gelar Kumang Gawai Dayak Saratok 2026,” ku iya lebuh dirandau Ruai Berita Iban.

Olivia Ontai Odau ke datai ari Rumah Chaong, Sungai Engkerumai, Ulu Roban, Saratok bebansa Kenyah-Iban. Apai iya bansa Kenyah seraya indai iya bansa Iban. Iya anak keempat ari enam iku diri menyadi.

Ku iya, pengerindu iya ba pekit Kumang berengkah ngerembai kenyau ari mit lebuh iya suah meda bala penyereta mantaika pemanah diri ba panggau pekit.

“Aku endang ngembuan minat ke chukup besai enggau pekit Kumang. Kenyau ari mit, aku alit ati meda bala penyereta bejalai ba atas panggau lalu ari nya datai pengerindu nguji diri empu,” ku iya.

Ari sukut akademik, Olivia baru udah nembuka pelajar STPM di Saratok lalu diatu benung nganti pemutus peresa iya.

Sebedau bulih gelar Kumang Gawai Dayak Saratok 2026, iya mega udah ngerikod sekeda pemujur ti ngemegahka ati ba pekit bekaul enggau budaya sereta pemajik, nyengkaum Pesta Pemakai Kumang Roban 2024 enggau gelar Selinggar Matahari Gawai Dayak Saratok 2025.

Kelimpah ari chakah nyereta pekit, Olivia mega chakah dalam aktiviti budaya kenyau ari sekula suba, nyengkaum mandangka main asal enggau program ke bekaul enggau pesaka asal komuniti Iban.

Bekunsi pasal pengawa nyediaka diri sebedau bepekit, iya madahka mayuh sukut patut diperatika nyengkaum penemu budaya, komunikasyen, pengangkun diri enggau gamal.

“Aku nyediaka diri nengah chara belajarka adat enggau main asal Iban baka bejawang enggau beganu, kelimpah ari ngelatih pengandal diri bejaku ba mua orang mayuh sereta chara bejalai ba atas panggau,” ku iya nerang.

Kenu ku Olivia, siti ari pemar ke besai sepemanjai pekit tu iya nya belatih ninting hari sereta ngena ngepan asal ke berat dalam timpuh ke panjai.

“Aku ngena ngepan ti pemerat lebih 20 kilogram berengkah urung pukul 3 lemai nyentuk ke lebih pukul 1 pagi. Nya endang amat mayuh pemar sereta begunaka pengeliat tubuh enggau runding,” ku iya.

Berebak enggau nya, iya nyemetak madahka nembiak rebak baru megai tanggungpengawa ke besai nentuka adat, budaya enggau jaku Iban terus dijaga ngambika enda lenyau nitihka jeman.

“Raban nembiak patut ngembuan pengerindu belajar pasal budaya diri empu. Nambahka nya anang malu ngambi matapelajar Jaku Iban di sekula laban jaku nya kelai bansa,” ku iya.

Ngelansa pasal pengawa ngena ngepan maya pekit nya, Olivia madahka diri ngelimpangka diri mansik tetiap kereban enggau tusun perengka pengias asal nya dikena nentuka guna iya nitihka adat enggau budaya ke bendar.

“Aku mayuh betanya ngagai sida ke lebih teleba nyengkaum tukang kebat enggau tuai raban bansa, pia mega ngiga penerang ba internet,” ku iya.

Taja mujur bulih gelar besai tu, Olivia mega ngaku penau sereta pemanah penyereta bukai ti bela ngembuan pengelebih enggau penau kediri empu.

“Pemekit ke bukai endang layak nerima anugerah Video Kreatif enggau Ngepan Pemadu Manah laban pemekit ke bukai bisi pengelebih kediri empu dibantaika sida ba pekit tu.

“Tanggungpengawa aku nyadi Kumang Gawai Dayak Saratok 2026 iya nya meransang nembiak rebak baru awakka sama-sama belajarka adat sereta main asal, meransang sida awakka besemekih ba penggawa besekula sereta nyaga ulah diri empu” ku Olivia.

Bekaul enggau pengidup dudi hari, Olivia bisi juluk ati deka nampung sekula ngagai tikas ke tinggi agi udah tu sereta deka nyadi pengelicha ke niti entali nembiak rebak baru jemah ila.

Iya mega nangkan, enti bisi ngembuan minat deka enggau bepekit anang takut nguji. Belajarka main asal, belajai ba mua mayuh enggau ke bukai. Enti ukai kitai sapa agi meh ke deka niti entali pengawa sida ke tuai.

Iya mega ninggalka jaku pesan ngagai nembiak indu ke agi biak ti bisi ati nyereta pekit Kumang ngambika enda takut nguji sereta seruran bebendar ngemanahka diri.

“Enti bisi minat, anang takut nguji. Belajarka budaya diri empu lalu berani ngayanka diri ba mua orang. Enti ukai kitai ke neruska legasyen tu, sapa agi?” ku iya ngujungka randau enggau Ruai Berita Iban. -RBI

#ruaiberitaiban#newsiban#beritaiban

Rindu | Titih | Kunsika