KUCHING, 12 Mac — Sepenyampau 64 iku peranak menua luar ditan dalam operasyen penerit adat besepadu ti dipejalaika Opis Imigresyen Malaysia (JIM) Sarawak ba sekeda endur ngelingi mengeri tu berengkah ari 11 ngagai 12 Mac tu tadi.

Nitihka penerang ari Opis Imigresen Sarawak sehari tu, operasyen ke berengkah tumu pagi nyentuk ke jauh malam nya ngaul 34 iku pemesai penerit adat.

Penerang nya madahka, pengawa nyerungkai maya siang hari nya ngemeratka sebuah palan endur ngaga projek di kandang menua Muara Tebas kelimpah ari sekeda premis kedai makai di Pending Heights ti dipelaba bejalaika aktiviti bejudi nengah ‘online’.

“Asil ari pengawa meresa ke dipejalaika ngagai individu ba endur ke bisi kaul tetemuka bisi sekeda peranak menua luar dipelaba ngereja penyalah ari baruh Akta Imigresen 1959/63, nyengkaum nadai dokumen pejalai ke entas sereta diau ngelui ari timpuh ke dikemendarka,” ku penerang nya.

Operasyen nya udah nya diteruska maya malam hari enggau nagit sebuah palan pemerindang ngelingi mengeri Kuching.

Dalam pengawa ngenyit nya, sepenyampau 22 iku peranak menua luar mujur ditangkap, ke mungkur peranak menua China, Vietnam, Laos, Filipina enggau Indonesia.

Semua individu ke ditangkap dibai ngagai Depot Imigresyen ngambika dipansik enggau silik agi sereta dipejalaika nitihka atur undang-undang imigresyen ke benung dikena. — RBI

JULAU, 12 Mac – Siku lelaki dikeirauka lenyau pengudah nurun berikan di Sungai Kanowit semak Nanga Sebuloh ditu kenyau ari pagi kemari.

Tudah dikelala enggau nama Geoffrey Anak Senah, 39, ari Rumah Gundi, Nanga Sebuloh, ke dipelabaka nurun kediri ngena perau laban deka nyala urung pukul 7 pagi kena 11 Mac tu tadi.

Ketuai Polis Pelilih (IPD) Julau, DSP Alif Haiqal Ramesh Abdullah madah, ripot polis bekaul enggau pengelenyau nembiak nya digaga petunggal iya urung pukul 12.21 tengah hari kena 12 Mac tu tadi pengudah sedarka iya nadai pulai ke rumah.

Nitihku DSP Alif, perau ke ditepan nembiak nya ditemu anyut ulih peranak rumah panjai nya, tang iya nadai dalam perau nya.

“Barang tudah agi bisi dalam perau nya kelimpah ari jala ke dikena iya,” ku DSP Alif ba sebengkah penerang sehari tu tadi.

DSP Alif mega madahka, nembiak dikeirauka lenyau tu ngembuan peninggi 175 cm, bekulit chelum, butak, tubuh kurus lalu maya iya pansut nurun berikan iya nadai bebaju semina betanchut pandak bechura chelum.

Ku iya, saksi mega ngeripotka tudah nembiak nya kepenudi dipeda berikan enda jauh ari penyangkai perau rumah panjai urung pukul 7.40 pagi ba hari penusah nyadi.

Berindik ari ripot nya, operasyen ngiga enggau nyelamat (SAR) udah dilanchar nengah kerejasama sekeda ejensi nyengkaum polis, Opis Bomba enggau Penyah Penusah Bintagor, Penyaga Orang Periman Malaysia (APM) Julau enggau peranak rumah panjai nya.

Nitihku DSP Alif, operasyen hari keterubah berengkah urung pukul 1 lemai enggau PKTK didirika ba Rumah Gundi, Nanga Sebuloh.

“Pengawa ngiga nya dipejalaika ba kandang ulu enggau ili Sungai Kanowit enggau pemesai mungkur urung 1.5 kilometer ari palan endur nembiak nya kepenudi dipeda,” ku iya nerang.

Ku iya nambah, operasyen SAR hari keterubah nya ditangguh urung pukul 4.30 lemai ketegal ujan bangat ba kandang endur penusah nyadi lalu nembiak bedau ditemu.

“Operasyen ngiga enggau nyelamat deka disambung baru pagila, 13 Mac berengkah ari pukul 8 pagi,” ku iya. -RBI

KUCHING, 12 Mac – Pengawa ngenegapka sektor betanam betupi enggau berikan nyengkaum meransang pengawa ngaul pemain industri udah udah dikerandauka lebuh Kaban Kunsil Nengeri (ADUN) sitak N.13 Batu Kitang, Lo Khere Chiang nemuai meri basa ngagai Direktor Betanam Betupi Sarawak, Dominic Anak Chunggat ba Opis Betanam Betupi (Indu Opis) Sarawak, Kuching.

Antara randau ti bela dipejuraika nya mega ngenyampatka pengawa ngasilka barang enggau skala besai nengah pengawa nempa rentayan bekal ti mungkur semua rentayan rega ari pengawa ngeluarka barang nyentuk ke makit.

Penemuai ADUN Batu Kitang nya mega ngembuan tuju deka berandauka potensial kerejasama dalam ngenegapka pemansang sektor betanam betupi di kandang menua Batu Kitang.

Tu kelebih agi ba sukut pemansang utai tanam ke pemakai, sukung ngagai orang betanam betupi enggau bejalaika inisiatif betanam betupi moden ti ulih nyungkak produktiviti enggau penatai pemisi komuniti lokal.

Chara tu ngemeratka pemansang utai tanam pemakai enggau sub-sektor berikan dalam menua tauka akuakultur di Sarawak.

Dikearapka pengawa tu ulih ngerembaika peluang ekonomi ngagai komuniti orang betanam betupi enggau orang dagang lokal, seraya nyukung agenda ngemansangka sektor agro-pemakai ti meruan agi sereta kompetitif di Sarawak. -RBI

SIBU, 12 Mac — Siti penusah aksiden ba jalai alun ti mungkur tiga buah kerita diripotka nyadi ba Jalai Wong King Huo ditu, urung pukul 3.49 lemai kemari.

Nitihka penerang ari Opis Pansik enggau Penerit Adat Trafik, Indu Opis Polis Pelilih (IPD) Sibu, penusah aksiden nya mungkur sebuah kerita Toyota Vios, sebuah kerita Proton Saga enggau sebuah kerita Toyota Hilux.

Pansik tumu tetemuka kerita Toyota Vios enggau Proton Saga benung bejalai terus nuju Bulatan Bukit Lima sebedau dilantak kerita Toyota Hilux.

Penusah nya dipelabaka nyadi lebuh kerita Toyota Hilux nya lenyau tepawah lalu tama ngagai jalai ke betentang sebedau ngelantak dua buah entukar nya.

Berindik ari aksiden nya, deriba kerita Toyota Hilux nya bakal mimit ba kaki enggau jari.

Taja pia, dua iku deriba ke bukai nya diripotka nadai bakal.

Aksiden nya mega ngujungka pengerusak ba tisi kerita Toyota Vios enggau Proton Saga, lalu kerita Toyota Hilux balat rusak ba bagi luan kerita nya.

Berindik ari penusah nya, polis udah muka keretas pansik lalu kes nya dipansik nitihka ‘Kaedah 10 LN 166/56 Kaedah-Kaedah Lalu Lintas 1959’.

Nitihku Pemangku Ketuai Polis Pelilih Sibu, SUPT Boniface Anak Bajai, pansik silik agi dipejalaika dikena ngelala kebuah ke bendar penusah nya nyadi. -RBI

JULAU, 13 Mac – Projek ngangkatmanah jalai alun ari Rumah Musit ngagai Rumah Nyalong ak Tambi udah rasmi masuk renggat bejalaika fizikal berindik ari pengawa ngatur Pengerami Nasih Tanah enggau Sesi Randau ke diatur ba Rh Menyimbang, Sungai Ridan, Ulu Entaih sehari tu.

Pengerami nya dipenyadika Datuk Rolland Duat Anak Jubin, Kaban Kunsil Nengeri (ADUN) sitak N.48 Meluan.

Nitihka penerang ari Opis Kereja Raya (JKR) Sarawak, projek ke beungkus RM19.6 juta nya dipejalaika ejensi nya ari baruh Ejensi Pemansang Delta Rajang (RADDA).

Batang skop pengawa iya nya ngangkatmanah jalai tanah enggau batu ‘kerikil’ pemanjai 14 kilometer ngagai standard jalai R1, penuh enggau pengawa ngaga sistem parit, masang perengka jalai enggau kereja nyaga tinting.

Projek nya ti dipelaba tembu kena 11 Ogos 2027, nyadi sebagi ari komitmen Perintah Sarawak ti majak ngenegapka rentayan infrastruktur menua pesisir, lalu enggau nya ngangkatka pengelikun enggau penyikar sistem pengangkut ba kandang menua nya.

Ba pengawa ke sama, sesi randau mega bisi diatur begulai enggau peranak rumah panjai dikena meri penerang ke silik bekaul enggau pengawa bejalaika projek sereta penguntung iya ngagai komuniti lokal.

Nengah projek nya, akses jalai alun ke manah agi dikearapka ulih nambahka akses peranak sereta ngemuntangka pengawa ngangkut asil betanam betupi, lalu ari nya ulih meransang pemansang sosio-ekonomi ba kandang menua Ulu Entaih.

Sama bisi datai Brian Fung, Sekretari Politik ngagai Premier Sarawak, sereta pengari ari Opis Pelilih Julau enggau Pakan. – RBI

MIRI, 12 Mac — Sepenyampau 293 buah perengka pengangkut bemacham bansa udah diperesa dalam operasyen neritka atur ti dipejalaika Opis Perengka Pengangkut Jalai Malaysia (JPJ) Sarawak sepemanjai Jalai Besai Pan Borneo ari Sibu ke Miri kemari.

Nitihka penerang ari JPJ Sarawak, operasyen nya dipejalaika Unit Operasyen nengah Ops Khas Direktor ti ngemeratka pengawa matau perengka pengangkut ti mai barang ti tau mai penusah.

Asil peresa nya tetemuka sekeda penyalah ditemu nyengkaum ngelanggar syarat permit ti dikeluarka Lembaga Perlesenan Kenderaan Perdagangan (LPKP), mai barang ti tau mai penusah enggau bemacham penyalah bukai ti ngaul sukut teknikal perengka pengangkut.

Nitihka penerang nya, JPJ Sarawak deka terus chakah agi bejalaika aktiviti neritka atur ari sesiti maya ngagai sesiti maya dikena nentuka tikas ngasika undang-undang jalai alun seruran ba tikas ke tinggi, lalu enggau nya nentuka pengelikun semua penguna jalai alun.

Operasyen nya mega digulu Direktor JPJ Sarawak, Norizan Jili, ti ngabas terus pengawa bejalaika operasyen nya dikena

KANOWIT, 12 Mac — Pengudah lima hari operasyen Ngiga enggau Nyelamat (SAR) ti ransing dipejalaika, pengujung iya Richard Lee Anak Apang ditemu urung pukul 12.00 tengahari sehari tu tadi.

Nitihka penerang ari Komiti Pemansang enggau Pengelikun Genturung Pendiau (JKKK) Rumah Ricky Umbar, operasyen ba hari kelima nya dipejalaika enggau lebih komprehensi lalu nerima sukung besai ari komuniti ngelingi.

Peranak rumah panjai diripotka udah nurun nyidi enggau begiga, begempung enggau tim penyelamat neresa kandang endur ngiga.

“Richard ditemu lemi tang ‘stabil’. Iya terus dibai Raban Penyaga Pengelikun Mensia Mayuh Malaysia (APM) ke Sepital Kanowit ngambika diperubat enggau silik agi,” ku JKKK nya.

JKKK mega ngenataika pengaga ati ngagai semua piak ke bisi kaul.

“Tim Bomba, PDRM, enggau APM ketegal komitmen sida ti enda belampung ati.”

“Orang rumah panjai ke enda kala putus pengarap nulung.”

“Semua orang ke nulung ngerembaika penerang sereta besampika pengelikun Richard.” ku penerang nya.

Penerang nya ngemeratka “semangat penyerakup kami di Penyulau sehari tu nyadi kunchi pemujur tu,” lalu ngarapka Richard deka jampat gerai lalu pulai ngagai sida sebilik” — RBI

KANOWIT, 12 Mac — Komiti Pemansang enggau Pengelikun Genturung Pendiau (JKKK) Rumah Ricky Umbar, Kanowit madahka siku lelaki ti diripotka lenyau iya nya Richard Lee Anak Apang udah ditemu enggau selamat urung pukul 12.00 tengahari sehari tu.

Nitihka penerang rasmi Facebook JKKK Rumah Ricky Umbar, JKKK ngenataika pengaga ati ngagai semua raban ti ngaul diri dalam operasyen ngiga enggau nyelamat, nyengkaum tim SAR ti mungkur Raban Bomba enggau Penyah Penusah, Polis Diraja Malaysia (PDRM), enggau Raban Penyaga Pengelikun Mensia Mayuh Malaysia (APM), pengari Parti Pesaka Bumiputera Bersatu (PBB) Pampang Machan, Tuai Rumah Siba ari Skuau enggau Tuai Rumah Ricky Umbar ari Penyulau.

Sida mega ngenataika pengaga ati ngagai semua peranak rumah panjai ke udah mantu sereta besampika pengelikun mansa.

JKKK mega madahka operasyen SAR udah ditutup enggau rasmi lalu semua pengawa ngumpul belanja turu diketuka tekala nya. — RBI

PADAWAN, 12 MAC – Sepenyampau 31 buah rumah ba sitak DUN N19 Mambong deka diseruri ari baruh Program Ngemanahka Rumah Seranta Sarawak (PPRMS) Renggat 1 2026 ti dipelaba berengkah bulan April 2026.

Pekara tu dipadahka Datuk Dr Jerip Susil, Sapit Menteri Perengka Pengangkut (Langit enggau Darat) Sarawak ke mega Kaban Kunsil Nengeri (ADUN) Mambong rambauProgram Chabut Undi Projek PPRMS Renggat 1 2026 ungkup Kandang Menua DUN Mambong ba Opis Palan Servis DUN Mambong sehari tu tadi.

Nitihku iya, projek ngemanahka rumah nya disadang tembu dalam timpuh dua minggu pengudah kunteriktor nerima surat bejalaika kereja.

Berebak enggau nya, iya mega meri penerang senentang pengawa ngemanahka chara ngatur pengawa enggau prosedur baru bejalaika projek PPRMS Fasa 1 2026 dikena nentuka pengawa bejalaika projek lebih efisyen, terang sereta meri penguntung ngagai rayat ti begunaka bantu. -RBI

Jagung manis diatu entara utai tanam pemakai ke bisi potensial tinggi ketegal timpuh mansau iya pandak sereta asil iya ke ulih meri penguntung ke besai ngagai orang dagang.

Nitihka penerang ari Opis Betanam Betupi Malaysia, utai tanam tu ulih diketau dalam timpuh 65 ngagai 75 hari pengudah ditanam enti pengawa ngatur utai tanam dipejalaika enggau manah.

Ke bendar, jagung manis ulih ngasilka nyentuk 35,150 tangkai sehektar, lalu nyadika iya entara utai tanam ti bepenatai pemisi tinggi.

Dikena nentuka penumbuh ti optimum, pengawa nanam jagung manis begunaka pengawa berengkah enggau pengawa nyendiaka bakut ti pemesai 30 cm enggau peninggi 22 cm, enggau takah 60 cm entara garis entara bakut.

Udah nya, ungkup teknik anak benih, dua ngagai tiga igi benih ditabur ba penalam 2.5 cm, lalu ditangkan enggau proses nyarang pengudah dua minggu dikena nentuka semina siti aja utai tumbuh ke pemadu manah tumbuh.

Pengawa ngatur utai tanam mega ngaul pengawa ngintu ninting hari ti meruan.

Utai tumbuh patut dipanjah dua kali sehari pagi enggau lemai, kelimpah ari ngena rachun rumput sebedau tumbuh dikena nagang penumbuh rumput.

Bala orang bumai mega patut matau keruga ‘Fall Armyworm’ enggau penyakit daun, sereta bejalaika pengawa nagang nguna rachun indu utai enggau tetap.

Ari sukut baja, Opis Betanam Betupi Malaysia ngelalau ngena baja organik tiga tan sehektar tujuh hari sebedau nanam.

Udah nya, baja NPK 12:12:17:2 300 kg sehektar diberi sehari sebedau nanam, ditangkan enggau NPK 15:15:15 150 kg sehektar ba hari 20 enggau 40 pengudah nanam dikena nyukung penumbuh pun jagung enggau ngasilka tangkai ti bekualiti.

Nengah chara ngatur utai tanam enggau sistematik, pengawa meri baja ti diperambu, sereta pengawa matau enggau sebarang penyakit, jagung manis bisi potensial nyadi utai tanam ti mai penguntung sereta ulih mantu nambahka pemansut pemakai menua. — RBI