JULAU, 13 Mac – Lelaki ke diripotka lenyau pengudah nurun berikan di Sungai Kanowit, Nanga Sebuloh ditu ditemu lemas ulih peranak rumah panjai pagi tadi.

Tudah dikelala Geoffrey Anak Senah, 39, diripotka pansut berikan ngena perau urung pukul 7 pagi kena 11 Mac tu tadi enda pulai ke rumah, ti meri pengirau ati ngagai sida sebilik enggau peranak menua nya.

Ketuai Balai Bomba enggau Penyah Penusah (BBP) Bintangor, PPgB Mahmudin Narudin, madahka perau tudah ditemu peranak rumah panjai anyut enggau keresa iya agi dalam perau nya, kelimpah ari jala ke dikena.

“Peranak rumah panjai bejalaika pengawa nyidi kena pagi 12 Mac, tang tudah agi enda mujur ditemu sebedau operasyen ngiga enggau nyelamat (SAR) diteruska sehari tu,” ku iya.

Ku iya, raban bomba ari BBP Bintangor ti mungkur tiga iku kaban berumban ngesah ngagai palan penusah ke nyadi ke bepalan urung 72 kilometer ari balai nya, pengudah nerima penerang pasal penusah nya.

Nitihku iya, raban SAR datai ba Rumah Gundi, Nanga Sebuloh urung pukul 9 pagi sebedau nerima penerang ari peranak dia madahka tudah udah ditemu dulu agi ari nya.

“Peranak rumah panjai nya tetemuka tudah urung pukul 7.30 pagi, 100 meter ari kandang endur iya berikan sebedau tuduh iya dibai ngagai tebing sungai,” ku iya nerang.

Ku iya nambah, tubuh tudah udah nya diserah ngagai polis ngambika atur ulih dipejalaika enggau silik agi.

Operasyen SAR ke mega ngaul sekeda ejensi bukai tembu urung pukul 9.20 pagi pengudah berandau enggau ejensi ke bekaul enggau peranak rumah panjai nya.

Entara ejensi ti ngaul diri dalam operasyen nya iya nya Polis Diraja Malaysia (PDRM), Raban Penyaga Orang Periman Malaysia (APM), RELA enggau peranak rumah panjai besemak. -RBI

BETONG, 13 Mac – Kolej Sains Rendah MARA Betong ngelaluka peranak menua Malaysia ti bisi pengelandik ngisi pangku pengawa puang Pemesai Servis Pelajar (DG9) ungkup subjek Matematik ba institusyen nya.

Iklan kereja ti dipansutka Majlis Amanah Rakyat (MARA) madahka bisi disediaka pangku pengawa ba MRSM Betong, Sarawak.

Nitihka penerang nya, chalun ke bisi ati enda tau enda nangkup beberapa syarat pematut nyengkaum beumur enda kurang ari 18 taun, ngembuan degree dalam bidang ke bekaul ti diaku perintah sereta nyulut dalam Peresa Jaku Melayu nyengkaum Peresa Lisan ba renggat Sijil Pelajaran Malaysia (SPM) tauka kelayakan ke sebaka.

Pangku pengawa nya meri tikas gaji ninting hari sepenyampau RM100.

Peminta patut dianjung nengah chara nganjung resume, gambar sebaka pemesai enggau pasport sereta salin dokumen ti udah dientaska ngagai Prinsipal MRSM Betong ba Lot 172, Entaban Land District, Jalan Feeder, 95700 Betong, Sarawak, tauka nengah email ngagai webmaster@betong.mrsm.edu.my.

Semua peminta ke diterima deka ditisih bepelasarka kriteria ke udah ditetapka lalu semina chalun ke udah dipilih aja deka dikangau interbiu.

Haribulan penutup peminta ditetapka kena 20 Mac 2026, lalu peminta ke enda dikangau dalam timpuh tiga bulan pengudah haribulan nya deka dianggap enda mujur. -RBI

KUCHING, 13 Mac — Aum Komiti Mit Pekit Kumang beserimbai enggau pengawa ngatur Bazar Gawai Dayak enggau Pengerami ‘Ethno Cultural Festival’ ungkup Pengerami Gawai Dayak Sarawak 2026 udah diatur kena Hari Minggu tu tadi ba opis Serakup Dayak Miri (DAM).

Aum nya ti bechairmanka Vivienne Nasat ngemeratka sekeda pekara kunsi bekaul enggau pengawa nyendiaka diri ngatur program Pekit Kumang, iya nya sebengkah ari pengawa ke besai dalam pengerami nya.

Nitihka penerang ari pengatur, entara batang agenda ke dikerandau iya nya magi pengawa entara kaban komiti kereja dikena nentuka tetiap sukut ngatur enggau bejalaika program ulih dikoordinasyen enggau lebih sistematik.

Kelimpah ari nya, aum nya mega mansik perambu belanja dikena ngatur Pekit Kumang, nyengkaum peminta agih belanja ungkup mayuh bengkah sukut pengawa nyendiaka diri baka ngatur pengawa, logistik enggau koordinasyen penyereta pesereta.

Randau nya diatur dikena nentuka semua perambu ulih dipejalaika enggau sistematik sereta efektif setipak enggau penyikap Pengerami Gawai Dayak Renggat Sarawak 2026, ti disadang deka mandangka bemacham aktiviti budaya enggau pesaka asal komuniti Dayak. — RBI

MIRI, 13 Mac — Siku nembiak indu ke agi biak diripotka lenyau pengudah iya kepenudi dipeda ba palan pengentap pendiau iya di Rumah Pekerja No.A2, Ladang Sarimas 1, Jalai Miri–Bintulu, kena Hari Satu tu tadi.

Nembiak nya dikelala enggau nama Nurhayati Binti Abdullah, beumur 14 taun lalu ada kena 11 Oktober 2011.

Tudah ukai peranak menua tu lalu diripotka nadai ngembuan sebarang dokumen pengelala diri.

Nitihka penerang ke diulih, mansa kepenudi dipeda kena 9 Mac 2026 urung pukul 3.00 lemai ba alamat nya sebedau iya ditemu lenyau ulih piak ke bekaul.

Mansa digambarka ngembuan tubuh ke tegap enggau peninggi urung 170 sentimeter sereta pemerat dipelabaka urung 90 kilogram.

Mansa mega ngembuan kulit kuning langsat sereta ngembuan buk chelum nyentuk ke bahu.

Berindik enggau nya, mensia mayuh ke bisi penerang bekaul enggau penunga tudah dipinta ngenataika penerang ngagai pemesai pemansik kes, Sarjan Nikol Anak Losa ba lumur 016-8864072.

Penerang mega tau dikenatai ngagai Bilik Gerakan Indu Opis Polis Pelilih (IPD) Miri ba lumur 085-432533 ti beoperasyen 24 jam tauka ngagai sebarang balai polis ke besemak.

Polis mega minta kerejasama ari mensia mayuh mantu ngiga mansa enggau lengkas. — RBI

MIRI, 13 Mac — Aum keterubah komiti mit ngatur ‘Ethnocultural Cultural Night (ECN) sempena Gawai Dayak Bazaar & Ethnocultural Festival 2026’ udah diatur malam kemari nyadi singkang pemungkal ba pengawa nyendiaka program ti diperambu deka diatur kena 13 Mei tu ila.

Aum nya bechairmanka Chairman Pengatur, Daniel Jok Wan, ti nguluka randau begulai enggau kaban komiti mit ti bisi kaul ngatur pengawa nya.

Entara pekara ti dikerandau iya nya perambu keterubah program, pengawa magi pengawa entara komiti mit, koordinasyen pemerindang budaya enggau sukut logistik dikena nentuka pengawa ngatur malam budaya nya bejalai enggau lanchar sereta teratur.

Program Ethnocultural Cultural Night tu dipelabaka deka mandangka bemacham pengawa pemerindang seni enggau main asal ti mandangka penyelai pupu bansa di Sarawak, lalu enggau nya ngerichahka agi pengerami Gawai Dayak Bazaar & Ethnocultural Festival taun tu ti deka diatur di Miri.

Aum nya mega nyadi pelasar koordinasyen keterubah dikena nentuka semua perambu enggau pengawa nyendiaka diri ulih dipejalaika enggau sistematik sereta efektif sebedau haribulan pengawa dalam bulan Mei. — RBI

LIMBANG, 13 Mac — Lorong Tarap ke bepalan ba belakang begunan Choon Cheong deka ditutup sementara ngagai semua penguna jalai alun berengkah sehari tu nyentuk ke haribulan ke deka dipadah.

Nitihka notis ti dipansutka Kaunsil Pelilih Menua Limbang (MDL) pengawa nutup nya dipejalaika berindik ari risiko tanah tusur ba endur nya ti tau ngeruga pengelikun penguna jalai alun.

Berindik ari nya, ubah arus trafik udah dipejalaika baka ke dipandangka dalam kar ke dilekatka dikena nentuka pejalai perengka pengangkut ba kandang endur nya lanchar.

Mensia mayuh dilalau ngambika enda nengah kandang endur jalai ke ditutup nya, tang ngena jalai alternatif ke udah ditetapka sereta ngasika semua tanda pengelikun enggau atur ari pemesai ba endur nya.

Kaunsil Pelilih Limbang, berebak enggau nya, minta kerejasama semua piak nentuka pengelikun pangan diri sepemanjai timpuh penutup sereta minta ampun enti bisi penusah nyadi. — RBI

KUALA LUMPUR, 12 Mac — Individu ke ditangkap bebuaika uras ba sepemanjai jalai Besai Pan Borneo Sarawak tau ditinggang ukum ari baruh Ordinan Opis Perintah Lokal (PBT) 1996 ba palan ke bekaul.

Sapit Menteri Kereja Raya, Datuk Seri Ahmad Maslan madah, jalai besai nya meraka sekeda sitak PBT berengkah ari Telok Melano ngagai Miri, ke ngembuan bidang kuasa bejalaika undang-undang ke bekaul.

Ku iya, penanggul bebuaika uras ba jalai besai nya bepun ari sekeda pekara nyengkaum ulah sekeda penguna jalai alun ti bebuaika uras perengka pengangkut sida enggau nadai tanggungpengawa.

“Perengka pengangkut berat kelebih agi lori, ngetu ba kandang endur P-Turn, palan ngetu bas enggau tisi jalai ungkup tuju belelak enggau makai, ninggalka uras pemakai enggau uras ba endur ke dikerandau.

“Penambah trafik ba sekeda kandang endur mega meri pangka ngagai gaya tu,” ku iya rambau sesi tanya saut lisan ba Dewan Negara.

Iya mansutka jaku nya lebuh nimbal tanya ari Senator Roderick Wong Siew Lead bekaul enggau kebuah uras ke ngerekai ba sepemanjai Jalai Besai Pan Borneo.

Ku Ahmad, 15 ari penyampau 26 seksyen jalai besai nya udah diserah ngagai kunteriktor ke udah dipadu iya nya PBH Asset Management Sdn Bhd ungkup tuju ngintu.

Ku iya, rega kunterik ngintu ungkup timpuh tiga taun berengkah ari 1 September 2024 nyentuk 31 Ogos 2027, sepenyampau RM69,248,876.40, nyengkaum pengawa ngumpul uras dua kali seminggu, ngintu ari maya ke maya enggau pengawa ngenyit dikena nentuka pengelikun enggau pengelantang seruran dijaga.

Nyaut tanya tambah ari Senator Datuk Dr Mustafa Musa senentang ungkus lampu solar Opis Kereja Raya (JKR) ti dipadahka besai, Ahmad madahka ungkus nya manggai RM10,000 seunit, nitihka spesifikasyen enggau kualiti ti tinggi ungkup pengelikun penguna jalai alun.

Nitihku iya, ungkus nya nyengkaum waranti lima taun enggau ngena bateri khas ke ulih tan pengelama dua hari enti nadai kena panchar mata panas.

“Kitai ulih meli lampu solar enggau rega RM200 ba pelasar online, tang iya nyangka semina tan beberapa minggu aja lalu engka nadai ngembuan elemen ti dikedeka kitai.

Unit ke dikena Opis Kereja Raya udah diuji ba makmal menua tu enggau antarabansa dikena nentuka prestasi optimum enggau pengelikun,” ku iya.

Ku Ahmad, kelimpah ari kualiti bateri, ungkus nya mega mungkur pekara teknikal bukai baka peninggi tiang ke spesifik, gaji pengereja pengawa enggau ungkus ngintu dikena nentuka tikas penampak datai ba kandang endur ke ditagit ba jalai alun. — RBI

AMSTERDAM, 12 MAC — Malaysia chakah agi ngena teknologi mobiliti pintar enggau ngatur infrastruktur digital dikena nentuka rentayan jalai alun menua tu diatur enggau lebih efisyen seriris enggau peminta mobiliti ti majak nambah.

Menteri Kereja Raya, Dato Sri Alexander Nanta Linggi madah, Malaysia diatu nyingkang ari chara lama ti semina ngemeratka pengawa ngaga sereta ngemesaika jalai alun ngagai model ti lebih manah agi.

Nitih ku iya, chara nya begulaika injiniring, teknologi digital enggau penyereta mensia mayuh dikena ngangkatka pemanah pengawa ngatur mobiliti menua.

Iya madah munyi nya lebuh bejaku ba Intertraffic Amsterdam di Amsterdam.

“Di serata Asia Tenggara, pemansang infrastruktur jampat amat mansang.Pemar ke bendar ukai sekalika infrastruktur nya deka terus mansang, tang baka ni kitai ngatur infrastruktur nya enggau pintar agi,” ku iya.

Nitih ku iya, Malaysia diatu ngintu urung 296,000 kilometer jalai alun, entara rentayan pemadu besai di Asia Tenggara, disukung sistem jalai besai lebih 5,000 kilometer ti nyambung mengeri besai, palan penyangkai kapal enggau koridor ekonomi di serata menua.

Ku iya, penumbuh ekonomi mega nambahka pemerat ngagai sistem mobiliti laban Malaysia ngerikod 1.57 juta ngerejista perengka pengangkut baru ba taun 2024, sama enggau urung 4,300 perengka pengangkut tama ngagai jalai alun ninting hari.

“Berindik enggau nya, Opis Menteri Kereja Raya ngerembaika pengawa ngena Sistem Perengka Pengangkut Pintar (ITS) enggau pelasar digital dikena ngemanahka agi pengawa matau trafik, optimumka arus trafik sereta ngenegapka pengelikun jalai alun.

“Berebak enggau nya, penyereta mensia mayuh mega ditegapka nengah aplikasyen MYJalan ti ngemendarka mensia mayuh ngeripotka isu pengerusak jalai alun enggau pengelikun terus ngagai piak bekuasa,” ku iya ke mega Kaban Parlimen Kapit.

Nitih ku Nanta, kenyau ari dilanchar, pelasar nya udah nerima lebih 54,000 ripot mensia mayuh, lalu lebih 90 peratus ari nya mujur diputarka.

Ba pemansang ke bekaul, projek infrastruktur besai baka Jalai Besai Pan Borneo ke mungkur lebih 2,000 kilometer di Sabah enggau Sarawak dikearap ulih nambahka penyikar logistik sereta muka peluang ekonomi di Malaysia Timur.

Kelimpah ari nya, ari baruh Atur Pemansang Malaysia Lumpar Ketiga Belas (RMK13), perintah deka ngaga sereta ngangkatmanah lebih 2,800 kilometer jalai menua pesisir dikena ngemanahka agi penyambung komuniti ba mengeri mit enggau kandang endur betanam betupi.

Ku iya, pemansang infrastruktur pengujung iya patut meri penguntung terus ngagai rayat nyengkaum ngangkatka kualiti pengidup sereta ngemudahka pemindah ninting hari. -RBI

KUCHING, 12 Mac — Pelin Strategik Opis Menteri Pengerai Mensia Mayuh, Pengawa Berumah enggau Kaunsil Kandang Menua (MPHLG) Sarawak patut ditumbuhka enggau dinamik sereta fokus ngagai guna rayat dikena nentuka polisi enggau perambu opis menteri nya seruran relevan enggau ubah kemaya hari.

Sapit Menteri Perintah Kandang Menua Sarawak, Datuk Dr Penguang Manggil, ke mega Kaban Kunsil Nengeri (ADUN) Marudi madah, pelin strategik nya mega begunaka beratika ubah jeman ke jampat sereta rayat ke majak ngarapka kualiti pengawa meri servis perintah.

“Pelin Strategik meseti bepalan ba pekara ti diguna rayat lalu meseti dinamik dikena napi ubah peminta rayat enggau ubah jeman ti jampat,” ku iya.

Iya madah munyi nya lebuh ngulu Woksyop Meresa Pelin Strategik MPHLG ungkup taun 2026 ke diatur ba Hotel UCSI Kuching kena Hari Dua tu tadi.

Woksyop nya diatur dikena beratika baru kuing enggau strategi bejalaika program opis menteri dalam pengawa ngenegapka perambu pemansang enggau ngangkatka pemanah pengawa meri servis ngagai rayat.

Sama bisi datai Sekretari Mendam MPHLG, Elizabeth Loh, enggau pemesai kanan ari opis menteri enggau ejensi ari baruh kemata opis menteri nya. — RBI