PAKAN, 21 Mei – Pelilih Julau majak ngayanka pengulih diri nyadi siti ari sitak ke pemadu nyulut dalam pengawa lumba enggau main di Bagi Menua Sarikei lebuh mayuh nembiak ngarika pelilih nya konsisten ngerikod pemutus ke pemadu manah ba tetiap pekit ke dipasuk sida.
Chairman Kaunsil Industri Kayu Ramu Malaysia (MTIB), Datuk Larry Sng Wei Shien madah, pemujur ti seruran dijapai atlit ari Julau enggau Pakan mandangka nembiak menua pesisir ngembuan potensial ke besai nyulut dalam lumba enggau main taja pan betapi enggau pengurang perengka guna enti dibandingka enggau kandang mengeri.
Kenu ku Kaban Parlimen Julau nya, nembiak ari Pelilih Julau sigi enda pulai enggau jari puang maya bepekit, enggau nya ngayanka bakat enggau semengat tinggi ti dikembuan atlit menua pesisir.
Iya madah munyi nya lebuh ngulu Pengerami Lumba enggau Main (MSSR) ba Stadium Pakan, kemari.
Ku iya, taja pan Opis Menteri Nembiak, Lumba enggau Main (KBS) udah ngaga mayuh bengkah palan lumba enggau main di kandang mengeri, tang gaya tu enda kala ngelemika ati raban nembiak menua pesisir ngambika terus nyulut dalam lumba enggau main.
Ambika banding, Larry bechuntoka pemujur pelanda nasional Watson Nyambek enggau penerejun nasional Dato Pandelela Rinong, ti asal ari menua pesisir tang udah mujur nempa nama diri ba renggat ke pemadu tinggi berindik ari penau enggau pengepuh sida.
Ku iya nambah, perengka guna lumba enggau main ti meruan ditambah enggau pengerindu sereta penau bala atlit ulih mai pemujur ngagai semua atlit.
Iya mega ngarapka Opis Menteri Nembiak, Lumba enggau Main terus ngemansang sereta nambahka perengkaguna lumba enggau main di menua pesisir ngambika ulih ngadaka mayuh agi atlit ke bekualiti ungkup menua jemah ila. -RBI
