BETONG, 21 Mei — Pengawa muka rasmi Jematan Batang Lupar I sehari tu nyadika sejarah baru dalam pemansang infrastruktur Sarawak lebuh jematan ke pemadu panjai di Malaysia meraka sungai diatu dibuka ngagai mensia mayuh, pia ku Sapit Premier Sarawak, Datuk Amar Douglas Uggah Embas.
Nitihku iya, pengawa muka jematan sepemanjai 4.84 kilometer nya kelai pemujur besai perintah nengeri ari baruh iring Premier Sarawak dalam ngamatka pemansang menua pesisir enggau ngemanahka rentayan komunikasyen rayat.
“Sehari tu hari ke chukup besejarah ngagai Sarawak. Baka ke dipadahka YAB Premier Sarawak ba Dewan Undangan Negeri (DUN) Sarawak kemari, sehari tu Jematan Batang Lupar I dibuka ngagai mensia mayuh,” ku iya.
Ku iya, jematan nya ukai semina jematan sungai pemadu panjai di Malaysia, tang mega ngayanka penau Sarawak bejalaika projek infrastruktur besai nengah belanja perintah nengeri iya empu.
“Tu siti pemujur ti amat ngemegah ati Sarawak.Projek tu dipelanja penuh Perintah Sarawak lalu mujur dipejalaika,” ku iya ti meri pengaga ati ngagai Opis Kereja Raya (JKR) Sarawak ti udah mujur nembuka projek nya.
Uggah madah, pengawa muka jematan nya mega nyadika pengujung penguna jalai alun bepanggai ba servis feri ba jalai besai tebing tasik nengeri tu.
“Ari Kuching nengah Pusa ngagai Miri, diatu nadai agi ngena feri, Feri diatu nyadi sejarah.Kitai ‘bye-bye’ ngagai feri,” ku iya.
Ku iya nambah, pengawa muka jematan nya deka meri empas ke besai ngagai pengelantang pejalai rayat laban timpuh meraka Batang Lupar diatu semina begunaka timpuh urung lima minit enti dibanding enggau urung 45 minit ngena feri sebedau tu.
Ku iya, pemansang nya mandangka komitmen perintah Gempung Parti Sarawak (GPS) dalam ngamatka semaya pemansang ngagai rayat.
“Tu semengat GPS, kami besemaya, kami ngereja lalu kami ngenataika.Siti jalai siti udah tembu, siti jematan udah siti tembu, pia mega bekal ai enggau kuasa karan.Semua nya deka ngubah gaya pemansang di Sarawak,” ku iya.
Iya mega meri besai terima kasih ngagai Premier Sarawak ketegal visyen enggau komitmen iya ti terus dalam meransang pemansang infrastruktur moden ungkup pengelantang rayat nengeri tu. – RBI
