BETONG, 13 Jun – Tuai Pemegai Menua (TYT) Negeri Sarawak, Tun Pehin Sri Dr. Haji Wan Junaidi Tuanku Jaafar begulai enggau Toh Puan Datuk Patinggi Hajah Fauziah Mohd Sanusi udah datai enggau selamat ba Kompleks Lumba enggau Main Bahagian Betong jam 11.45 pagi tadi ngena bilun engkaban khas ari Palan Penyangkai Hornbill Skyways, Kuching.
Deligit Tun Pehin Sri enggau Toh Puan disempulang Sapit Menteri ba Opis Premier Sarawak (Koordinator Projek Ejensi Pembangunan Wilayah, DBKU enggau Hal Ehwal Islam), Datuk Dr. Haji Abdul Rahman Junaidi ke nyadi Menteri Pengiring begulai enggau bini iya, Datin Hajah Siti Shorgayah Ahmad Zaidin.
Penatai Tun Pehin Sri enggau Toh Puan disambut Sapit Premier Sarawak, Datuk Amar Douglas Uggah Embas begulai enggau Datin Amar Dato’ Doreen Mayang; Kaban Parlimen P.204 Betong, Dato Dr.Richard Rapu @ Aman Begri, Sapit Menteri Pengelantang Orang Indu, Anak Mit enggau Komuniti II Sarawak, Datuk Mohamad Razi Sitam begulai enggau bini iya, Datin Hajah Habsah Salleh enggau Sapit Menteri Pemansang Nembiak Lumba enggau Main) Sarawak, Datuk Gerald Rentap Jabu begulai enggau bini iya, Datin Rosemarie Wong Chiiew Khing.
Sama bisi datai iya nya Residen Bahagian Betong, Datu Richard Michael Abunawas enggau bini iya, Sapit Residen Bagi Menua Betong, Mohammad Nizam Wang, Temenggong Richard Mulok Entring, Temenggong Kuek Tu Teck enggau Pemancha Norman Ngumbang Sanggin.
Penatai Tun Pehin Sri enggau Toh Puan mega diintu enggau pengawa mandangka hadrah ari Raban Hadrah Kampung Melayu Betong, lalu ditangkan enggau pengawa sembiang betuaika Sapit Imam Besar Sarawak, Sahibul Fadilah Ustaz Haji Mohamad Ihsan Haji Haidzir.
Penemuai rasmi Tun Pehin Sri enggau Toh Puan ngagai Bagi Menua Betong beserimbai enggau Pengerami Rasmi Hari Pengada Yang di-Pertuan Agong Ke-17 Renggat Sarawak ba taun 2026.
Penemuai nya mega nempa sejarah nyadi penemuai rasmi keterubah Tun Pehin Sri ngagai Bagi Menua Betong kenyau iya dipadu nyadi TYT Negeri Sarawak.
Berindik enggau nya, Tun Pehin Sri enggau Toh Puan ngarapka penemuai rasmi enggau semua pengawa ke udah diatur sepemanjai pengerami nya dipejalaika enggau lanchar, mujur sereta nyapai juluk ke ditagit. – RBI
#ruaiberitaiban#newsiban#beritaiban
Rindu | Titih | Kunsika
