SIBU, 14 Mei — Raban pengatur Queen of Borneo 2026, Sarawak Documentary diatu benung muka pengawa ngiga penyereta beserimbai enggau pengawa ngatur Malam Gawai Ngiling Bidai 2026 ti deka ngempuruka raban indu ti bepenau sereta bisi pengelandik ari serata Pulau Borneo.

Pekit ke beprestij nya deka diatur di Kuching lalu bisi dibagi dalam dua kategori besai iya nya Miss Queen of Borneo 2026 enggau Ms Queen of Borneo 2026, enggau penyereta tebuka ngagai orang indu ke beumur 18 ngagai 50 taun enda ngira etnik, bansa enggau asal penatai.

Nitihku Sarawak Documentary ke nyadi pengatur, pekit tu ukai semina pelasar pekit pemajik gamal aja, tang mega nyadi panggau dikena ngerami penyelai budaya, pesaka enggau identiti komuniti Borneo.

“Program tu meri awak ngagai orang indu Borneo mantaika pengangkun diri, penau enggau semengat sida dalam negika budaya enggau main asal bemacham bansa di pelilih menua tu,” ku iya.

Penyereta dibuka ngagai indu dara, udah belaki enggau indai tunggal ti bisi ati deka nyadi sebagi ari pengawa budaya ti beprestij beserimbai enggau pengerami Gawai 2026.

Sida ke bisi ati tau ngerejista diri nengah Google Form ke disediaka pengatur tauka betanya nengah chara ba WhatsApp https://docs.google.com/…/1FAIpQLSezwURCx…/viewform… -RBI

#ruaiberitaiban#newsiban#beritaiban

Rindu | Titih | Kunsika

PUTRAJAYA, 14 Mei — Sapit Menteri Besai, Dato Sri Fadillah Yusof nyemetak madahka pengawa ngatur sungai menua patut ngalih ngagai chara ti lebih proaktif, bepelasarka pengawa nagang sereta disukung teknologi moden dikena mutarka isu kualiti ai sungai ti majak enda manah enggau lebih efektif.

Nitih ku iya, atur nya ngemeratka pengawa nagang pengamah, ngangkatka kualiti ai sungai sereta ngenegapka pengawa ngatur pengeraja ai menua, enggau tetiap perambu begunaka diperatika ari sukut pemisi, pemanah enggau empas ari pengawa bejalaika iya.

“Batang fokus taun tu iya nya bejalaika pengawa.Tetiap perambu enggau inisiatif begunaka pengawa ti dititihka enggau pengawa ti terang, timpuh ti terit sereta akauntabiliti ti spesifik ari raban ti bejalaika pengawa.

“Pekara ti dikemerat ukai agi nambahka perambu, tang nentuka tetiap pemutus ti dipesetuju ulih dipejalaika enggau manah sereta ngasilka empas ti ulih dipeda,” ku iya.

Iya madah munyi nya lebuh bechairmanka Aum Komiti Khas Mutarka Penusah Kualiti Ai Sungai Menua (JKKAS) Lumur ba Dewan Baiduri, Menara PETRA, ditu sehari tu tadi.

Ku Fadillah, chara reaktif enda chukup agi laban risiko pengamah patut dikelala sereta diputarka tumu sebedau iya ngeruga kualiti enggau bekal ai ngagai rayat.

Iya mega ngemeratka pengawa ngena teknologi baka sistem matau maya nyata, telemetri enggau Internet of Things (IoT) patut dikerembaika ngambika pengawa intervensyen ulih dipejalaika enggau jampat sereta efektif agi.

Nitih ku iya, dunya diatu nyingkang nuju pengawa ngatur sungai bepelasarka daya pengetan iklim, teknologi pintar enggau pengawa tadbir urus ti begempung, nya alai menua tu begunaka pengawa ngatur sungai terus relevan, responsif sereta tan.

Iya nandu baru madahka sungai enda ulih agi dipeda semina nyadi parit ai aja, tang nyadi aset menua strategik ti nyukung bekal ai, pengelikun pemakai, biodiversiti, pemansang ekonomi enggau pengelantang rayat.

Berindik enggau nya, iya nesau semua piak nyengkaum Perintah Besai, Perintah Nengeri enggau Opis Perintah Lokal (PBT) ngenegapka komitmen enggau tanggungpengawa dalam ngatur pengeraja ai menua dikena nentuka rayat ngasaika sungai ti beresi sereta bekal ai ti likun agi. -RBI

#ruaiberitaiban#newsiban#beritaiban

Rindu | Titih | Kunsika

KUCHING, 14 Mei – Opis Kereja Raya (JKR) Sarawak nyangkal tuduh enggau gambar viral ti bekaul enggau gaya struktur Jematan Batang Lupar I.

Nitihku Direktor JKR Sarawak, Datu Dr Cassidy Morris madahka gambar ti dikerembaika ba media rama nya enda betul sereta enda ngayanka gaya enggau langkar projek ke bendar.

“Pengawa ngaga Jematan Batang Lupar l agi dipejalaika nitihka pengawa matau teknikal ti terit sereta nitihka standard pengelikun enggau injiniring ti udah ditetapka,” ku iya.

Mensia mayuh dilalau anang ngerembaika penerang ti enda dientas ti tau ngasuh saru penemu sereta ngirauka ati mensia mayuh — RBI

#ruaiberitaiban#newsiban#beritaiban

Rindu | Titih | Kunsika

KUALA LUMPUR, 14 Mei — Opis Menteri Kereja Raya (KKR) meri kelala tuju baru ngatur struktur pemandang iklan ba rizab Jalai Perintah Besai nengah chara ti lebih efisyen, teratur sereta mesra industri dikena ngurangka birokrasyen sereta ngenyampatka proses ngemendarka.

Menteri Kereja Raya, Dato Seri Alexander Nanta Linggi madahka chara baru nya dipadahka rambau sesi penerang keterubah begulai enggau pemain industri iklan luar ti bela digulu Sekretari Besai KKR, Azman Ibrahim enggau Sapit Sekretari Besai KKR, Khairus Masnan Abdul Khalid.

Nitihku iya, entara batang isu ke suah dibantaika industri sebedau tu iya nya proses peminta enggau pemendar ti ngaul mayuh bengkah renggat enggau ejensi nyengkaum Opis Perintah Lokal (PBT), lalu enggau nya ngujungka pengelaun sereta nambahka ungkus nitihka atur.

Ku iya, setipak enggau pemutus Kabinet sereta pengawa bejalaika Seksyen 85A Akta Pengangkutan Jalan 1987 [Akta 333], KKR diatu deka nyadi opis bekuasa tunggal ungkup pengawa ngatur struktur pemandang iklan ba rizab Jalai Perintah Besai.

“Nengah chara tu, proses peminta, meresa enggau ngemendarka ulih digaga enggau jampat agi, sistematik sereta sebela di serata menua.

“Berengkah 1 Mei 2026, peminta ungkup kandang endur rizab Jalai Perintah Besai enda ibuh agi dianjung ngagai PBT, tang deka diganti enggau koordinasyen nengah KKR,” ku iya.

Ku iya, reformasyen nya setipak enggau aspirasyen Perintah MADANI dalam ngenegapka sistem ngenataika perintah, ngurangka birokrasyen sereta nempa rampa dagang ti lebih mesra pemeranak puku enggau industri.

Ku iya nambah, chara nya mega ulih nambahka pengelantang bejalaika pengawa dagang kelimpah mantu ngurangka ungkus bejalaika pengawa dagang ba raban pemain industri iklan luar.

Ku Alexander, industri iklan luar diatu nyadi sebagi ari pekara ti beguna dalam ekosistem ekonomi menua laban pemandang iklan ba jalai besai enggau Jalai Perintah Besai ukai semina ngelakuka produk enggau servis aja, tang mega meransang pengawa dagang, narit puku sereta nambahka pengandal ba landskap ekonomi menua.

Berebak enggau nya, iya nyemetak madahka sukut pengelikun penguna jalai alun mengkang dikemeratka KKR, nyengkaum nentuka semua struktur pemandang iklan nitihka pinta pengelikun sereta mega isi visual ti enda negu elemen sensitif, nyaru tauka belaban enggau undang-undang sereta nilai komuniti.

Dikena nentuka timbang entara guna industri enggau atur perintah, KKR mega deka ngaluska garis lalau baru bepelasarka prinsip ko-atur enggau deklarasyen diri, ti meri pemain industri tanggungpengawa nentuka isi iklan nitihka atur ti udah ditetapka.

Iya mega beterima kasih ngagai timbal positif ari pemain industri ba chara baru nya lalu andal amat pengawa bejalaika nya ulih ngenegapka daya besemekih industri iklan luar rumah enggau digital luar rumah di Malaysia.

Sesi penerang nya mega ngaul pengari ari Opis Menteri Pengawa Berumah enggau Kaunsil Kandang Menua sereta Kaunsil Jalai Besai Malaysia. – RBI

#ruaiberitaiban#newsiban#beritaiban

Rindu | Titih | Kunsika

SIBU, 14 Mei – Siku nembiak lelaki bebadi pengudah mutosikal ke ditepan iya enggau bakih iya aksiden betempuh enggau sebuah lori ba Batu 8, Jalai Ulu Oya semak SK Ulu Sungai Merah, lemai kemari.

Ketuai Polis Pelilih Sibu, Azari Miskon madah, raban polis nerima penerang bekaul penusah nya urung pukul 3.15 lemai, sebedau seraban pemesai dianjung ngelawa endur nya.

Nitihku iya, pansik tumu tetemuka aksiden nyadi urung pukul 3.00 lemai ti mungkur sebuah lori ke dideriba siku lelaki beumur 37 taun ari tunga Kemuyang nuju Sungai Merah enggau mutosikal ke ditepan tudah ari tunga Desa Satria nuju Kemuyang.

“Berindik ari penusah nya, tudah ke beumur 16 taun dientaska bebadi ba endur nya ulih Penulung Pemesai Perubat urung pukul 3.22 lemai.

“Tubuh tudah udah dianjung ngagai Unit Forensik Sepital Sibu ungkup beputung tasat,” ku iya nerang.

Berebak enggau nya ku iya, lelaki ke beumur 18 taun nya bakal ba jari kanan enggau kaki kiba.

“Kes tu dipansik ari baruh Seksyen 41(1) Akta Pengangkutan Jalan 1987,” ku iya. -RBI

Disalin ari Utusan Sarawak

#ruaiberitaiban#newsiban#beritaiban

Rindu | Titih | Kunsika

KUCHING, 14 Mei — Opis Kereja Raya (JKR) Sarawak terus ngenegapka komitmen nentuka pengelanchar projek pemansang nengeri nengah sesi libat urus begulai enggau Sapit Premier Sarawak enggau Kaban Kunsil Nengeri (ADUN) Sarawak beserimbai enggau Aum Ketiga Aum Kunsil Nengeri (DUN) Ke-19, ditu sehari tu.

Direktor Kereja Raya Sarawak, YBhg. Datu Adj. Prof. Ir. Ts. Gs. Br. PMr. Dr. Cassidy anak Morris, begulai enggau raban pengatur pengawa JKR Sarawak ngatur randau begulai enggau Sapit Premier Sarawak, Datuk Amar Douglas Uggah Embas bekaul enggau pemansang pemadu baru dalam pengawa bejalaika projek pemansang di serata Sarawak.

Randau nya ngemeratka sukut koordinasyen bejalaika projek, matau pejalai pengawa enggau pengawa ngemanahka ti seruran dipejalai dikena nentuka tetiap projek ulih dipejalaika enggau efisyen, sistematik sereta efektif ungkup pemaik rayat.

Kelimpah ari nya, sesi libat urus mega bisi diatur begulai enggau Sapit Premier Sarawak ke mega Menteri Pengerai Mensia Mayuh, Pengawa Berumah enggau Kaunsil Kandang Menua Sarawak, Datuk Amar Dr. Sim Kui Hian, sereta mega pengari rayat menua tu berandauka koordinasyen enggau status pengawa bejalaika projek pemansang ba kandang menua diri empu.

Sesi nya diatur dalam gaya ti positif sereta konstruktif, mandangka komitmen perintah Sarawak enggau JKR Sarawak ti seruran dipejalai dalam ngenegapka kerejasama strategik sereta nentuka tetiap isu enggau guna pemansang ulih diputarka enggau komprehensif sereta efektif.

Pengawa ti enda ngetu tu setipak enggau juluk perintah Sarawak ti deka ngenyampatka pemansang infrastruktur ti meruan sereta inklusif dikena ngangkatka pengelantang pendiau rayat di serata nengeri. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

Bintulu, 14 Mei – Bisi 1,041 iku nembiak sekula nyereta Program Pengelikun Dalam Begunan, Ceramah Pengelikun Penusah Angus, Demonstrasyen Ngena Perengka Pengerara Api enggau Eksibisyen Injin enggau Perengka ti dipejalaika Opis Bomba enggau Penyah Penusah Malaysia (BBP) Kidurong.

Nitihku Ketuai BBP Kidurong PBT II Rary anak Binjie, program ke diatur ari pukul 8.40 pagi nyentuk 9.45 pagi nya ngaul 890 iku nembiak sekula, 49 iku pengajar, 10 iku kaban raban pengatur (AKP), lapan iku pemantu pemeresi, 79 iku nembiak pra sekula enggau lima iku pengajar pra sekula.

Ku iya, sepemanjai program tu, bala penyereta diberi penemu asas bekaul enggau pengelikun penusah angus, pengawa tumu maya penusah ngenyit nyadi sereta prosedur mindah dalam begunan ke betul sereta likun.

Demonstrasyen ngena perengka pengerara api mega nerima perati enggau penyereta ti chakah ari bala nembiak enggau pengajar.

Kelimpah ari nya, pengawa mandangka injin bomba enggau kereban operasyen meri peluang ngagai nembiak sekula ngelala guna enggau aset operasyen Opis Bomba enggau Penyah Penusah Malaysia enggau semak agi.

Latih mindah tauka nyelamatka diri dalam begunan mujur dipejalaika enggau chara ti teratur, dikuasa sereta nitihka prosedur pengelikun ti udah ditetapka.

Program tu enggau chara enda terus nambahka tikas penyedar enggau pemereti ati peranak sekula bekaul enggau pengawa nagang penusah angus enggau pengawa ngenyit.

Ungkup selampur, program tu bejalai enggau lanchar, likun sereta nyapai juluk ke udah ditetapka asil ari kerejasama ke manah entara piak sekula enggau raban bomba BBP Kidurong. -RBI

#ruaiberitaiban#newsiban#beritaiban

Rindu | Titih | Kunsika

PETRA JAYA, 14 Mei — Kaban Kunsil Nengeri (ADUN) Ngemah Anyi Jana meri sukung penuh ngagai jurai Terima Kasih Ketuai Pemegai Menua (TYT) Yang di-Pertua Negeri Sarawak beserimbai enggau Pengawa Bejadika Aum Keterubah Dewan Undangan Negeri Sarawak Kelima Aum Nengeri Ke-19), ditu kemari.

Lebuh bejuraika nya ba Dewan Undangan Negeri (DUN) Sarawak iya nerangka jaku TYT Tun Pehin Sri Dr Haji Wan Junaidi bin Tuanku Jaafar nya bisi aspirasyen, komprehensif sereta ngayanka kuing strategik Sarawak dalam napi pemar dunya kemaya hari tu.

Nitihku iya, Pelin Strategik Pemansang Pasca COVID-19 2030 (PCDS 2030) mengkang nyadi lalau besai perintah ba pengawa nempa Sarawak nyadi nengeri maju, meruan sereta bepenatai pemisi tinggi manggai ba taun 2030.

Ku iya, pemujur Sarawak nyapai status nengeri bepenatai pemisi tinggi baka ti diaku Bank Dunya asil ari pengawa ngatur wang ti manah sereta polisi pemansang ti terang ari baruh iring Premier Sarawak, Datuk Patinggi Tan Sri Abang Abdul Rahman Johari Abang Openg.

Dalam jaku dipansutka iya, iya mega ngemeratka komitmen perintah Sarawak dalam ngenegapka sektor ekonomi baru enggau teknologi tinggi nyengkaum pemintar tiru (AI), aeroangkasa, ekonomi digital enggau tenaga gadung.

Ku iya, Sarawak mega ngambi singkang nyadi hab kuasa gadung serantau nengah pemansang kuasa tau dikena baru baka hidro, solar enggau bioenergi, setipak enggau Polisi Transformasyen Tenaga Sarawak enggau Pelin Jalai Ekonomi Hidrogen.

Kelimpah ari nya, iya mega ngemeratka pemesai guna pemansang modal mensia nengah pengawa ngenegapka pelajar STEM enggau TVET ngambika ulih ngadaka pengereja pengawa bepengelandik ti nangkup guna industri jemah ila.

Ku iya, pengawa bejalaika Skim Pelajar Tinggi Percuma Sarawak (FTES) berengkah ari taun 2026 nyata ngayanka komitmen perintah dalam nyendiaka akses pelajar bekualiti ngagai nembiak Sarawak, kelebih agi dalam bidang strategik baka STEM, perubat enggau undang-undang ba institusyen ke diempu perintah Sarawak.

Berebak enggau nya, iya mega minta sekula repuk kelebih agi di menua pesisir terus diangkatmanah dikena nentuka bala nembiak nerima palan belajar ti lebih lantang sereta kondusif.

Ngelansa pasal pemansang menua pesisir, iya madahka perintah Sarawak tetap bebendar deka ngerembaika perengka guna pemun baka jalai alun, jematan, bekal ai beresi, elekterik enggau rentayan telekomunikasyen dikena ngangkatka pengelantang pendiau rayat di menua ulu.

Iya mega nyukung pengawa bejalaika projek strategik baka Sistem Aliran Transit Automasi (ART) enggau penumbuh serikat penerebai bilun Sarawak empu, AirBorneo, ti dipadah ulih ngenegapka kaul domestik enggau serantau sereta nyungkak penumbuh ekonomi nengeri.

Berebak enggau nya, iya mega ngemeratka pemesai guna pengelantang pendiau rayat nyengkaum orang tuai, Orang Timpang Pendiau (OKU) enggau raban ti mudah kena tinggang penusah kelimpah nerangka inisiatif Bantu Guna Pemun Sarawak (SKAS) nyadi singkang proaktif perintah dikena mantu rayat napi ungkus pengidup ti majak niki.

Iya mega minta pengereja pengawa perintah nengeri terus ngangkatka pemanah sistem meri servis nengah chara ngemeranka semengat “sense of urgency” enggau “sense of ownership” dalam bejalaika mandat ke diberi.

Lebuh nyimpul debat iya, iya nyemetak madahka penyerakup rayat pupu bansa enggau jalai pengarap sereta mega penegap politik nyadi batang aset Sarawak ti enda tau enda terus dijaga dikena nentuka pemansang enggau pengelantang nengeri tu ulih terus meruan. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

SIBU, 14 Mei – Program Semarak Belia @ Hari Belia Negara Renggat Bagi Menua Sibu 2026 ke diatur ba Sekula Sekondari (SMK) Ulu Balingian mujur ngempuruka raban nembiak, pelajar enggau komuniti menua nya lalu dikearap ulih nyadi pelasar pemadu manah dalam nempa rebak nembiak ti bisi visi, tan sereta bepenau nyadi ejen ubah nuju pemansang menua ti meruan.

Pengawa bejadika pengerami nya dipenyadika Pemesai Pelilih Menua Selangau, Yalin Asan ti nyemetak madahka raban nembiak nyadi aset beguna menua sereta nyadi pematak besai pemansang raban bansa ti progresif, kompetitif sereta bepelasarka integriti.

Kenu ku iya, raban nembiak patut terus ngenegapka diri enggau penemu, pengelandik nyadi ketuai sereta semengat volunteer ngambika sida ulih nyadi penganti ti nyulut jemah ila.

Program tu diatur dikena ngerichahka agi pengawa ngintu Hari Nembiak Menua kelimpah meri penerang ngagai raban nembiak senentang pangku pengawa enggau tanggungpengawa sida dalam pemansang menua.

Sepemanjai program nya, bemacham aktiviti bisi diatur nyengkaum sesi bekunsi motivasyen, aktiviti interaktif enggau ngaul komuniti ti mujur nerenakka semengat beserakup, kerejasama enggau identiti ba bala penyereta.

Raban pengatur mega ngemeratka raban nembiak bejalaika tanggungpengawa ti beguna dalam nempa kuing menua jemah ila nyadi ketuai rebak dudi sereta pengerembai pemansang.

Kelimpah ari nyulut dalam akademik enggau kereja, raban nembiak mega dilalau ngembuan ulah patriotisme, disiplin enggau pengibuh ngagai isu rama enggau pemansang komuniti ngambika ulih nempa mensia mayuh ke lantang agi. -RBI

#ruaiberitaiban#newsiban#beritaiban

Rindu | Titih | Kunsika

JULAU, 14 Mei – Pekit Tarit Tali Parlimen Julau ti sebedau tu diperambu deka diatur kena 16 Mei, udah diinsur ngagai 23 Mei 2026 pengudah nerima pemendar ari komiti pengatur ba aum ke diatur ba Indu Opis Polis Pelilih (IPD) Julau kemari.

Kaban Parlimen Julau, Datuk Larry Sng Wei Shien madah, ubah haribulan nya digaga dikena nentuka pengelanchar pengawa ngatur sereta meri timpuh nyendiaka diri ke manah agi ngagai semua tim ke ngambi bagi.

Nitih ku iya, pekit tu deka diatur ba Padang MDMJ berengkah tumu ari pukul 7 pagi lalu penyereta diperansang datai tumu ungkup pengawa ngerejista enggau nyendiaka diri napi pekit nya.

Berebak enggau nya, komiti pengatur mega udah meri tambah kategori baru khas ungkup orang gawa perintah ba kandang menua Julau dikena ngerichahka agi pengawa nya.

Ku iya, perais pekit mengkang baka ke udah dipadah sebedau tu enggau nadai sebarang ubah.

Ngelansa pasal program Jom Fit Jom Sihat, iya madahka pengawa ngatur nya deka diteruska baka taun nyin kemari ti ngaul dua bengkah endur iya nya ba Julau enggau Pakan.

Ku iya, program tu ukai semina meransang penyereta komuniti dalam aktiviti bepengerai enggau rekreasyen, tang mega ulih ngangkatka pengeregas tubuh enggau pengerai runding ba bala penyereta. -RBI

#ruaiberitaiban#newsiban#beritaiban

Rindu | Titih | Kunsika