Miri, 18 Mac — Siku orang ke nepan mutosikal bebadi nyawa ba penusah eksiden ba jalai alun ti ngaul sebuah kerita ba KM822.1 Jalai Pan Borneo semak Jalai Suai, Batu Niah, lemai kemari.

Ketuai Polis Pelilih Miri, ACP Mohd Farhan Lee Abdullah madah, piak iya nerima ripot bekaul enggau penusah nya urung pukul 4.30 lemai.

“Bepelasarka pansik tumu ba palan penusah nyadi, sebuah kerita ke dideriba siku lelaki peranak menua nya ke beumur 36 taun ke bejalai ari Miri ke Bintulu dipelabaka ngelantak siku orang ke nepan mutosikal ke udah pansut ari lurung kiba sebedau ngenyit nukar lurung ke kanan tama ngagai lurung P-turn (Bintulu–Miri ),” ku iya.

Nitihka penerang iya, mansa lelaki peranak menua tu beumur 53 taun disahka bebadi nyawa ba palan penusah nyadi ketegal belantak, lalu deriba kerita nadai bakal.

Ku iya nambah, diatu kes nya benung dipansik ari baruh Seksyen 41(1) Akta Pengangkutan Jalan 1987.

Berindik enggau nya, mensia mayuh ke bisi penerang bekaul enggau penusah nya dipinta datai ke mua mantu tasat nengah chara ngaga kaul enggau Pemesai Pemansik Trafik, Insp. Afifah Nordin nengah lumur 019-5264640 tauka 085-430479, tauka sebarang balai polis ke besemak.

Berebak enggau nya, iya mega ngelalau penguna jalai alun ngambika seruran ngemeranka chara deriba enggau likun sereta ngasika atur jalai alun, kelebih agi sebedau musin pengerami Hari Raya Aidilfitri, dikena nyeliahka penusah ke enda dikedekaka nyadi. — RBI

SELANGAU, 18 Mac – Penembu Projek Ngaga Gelanggang Futsal Rumah Panjai Utul, Dijih Maga mandangka komitmen ti seruran dipejalai dikena nentuka tetiap renggat mensia mayuh nyengkaum raban nembiak di menua pesisir terus diberi perati nengah pengawa nyendiaka perengkaguna ti meri pemaik timpuh panjai ngagai komuniti lokal.

Nitihku Kaban Kunsil Nengeri (ADUN) Tamin, Ir Christopher Gira Sambang, iya ngarapka perengkaguna gelanggang futsal tu ulih dikena penuh ulih raban nembiak, lalu nyadi palan endur belepa, ngenegapka penyerakup sereta nyeliahka ulah ti enda menuku, kelimpah ari nempa rebak biak ti regas, bisi disiplin sereta kompetitif.

Inisiatif tu seriris enggau komitmen iya ti seruran meri perati ngagai guna pemansang raban nembiak menua pesisir ngambika sida bisi ruang ti positif ngaul diri dalam aktiviti ti bepengerai.

Pengawa ngaga gelanggang futsal tu dipeda ulih nyadi palan aktiviti komuniti ti ukai semina ngangkatka gaya pengidup ti bepengerai ba raban nembiak, tang mega nyadi pelasar dikena ngerapitka kaul rama sereta nerenakka semengat lumba enggau main ba peranak menua nya.

Projek ke berengkah digaga kena 30 November 2025 lalu tembu penuh kena 1 Mac 2026, nyadi siti ari inisiatif ke beguna dalam nyendiaka perengka guna rekreasyen ke lebih nyamai sereta teratur, kelebih agi ungkup raban nembiak ba kandang rumah panjai.

Projek ngaga gelanggang tu ari baruh agih belanja Program Transformasyen Menua Pesisir (RTP) mujur tembu sereta disua enggau rasmi kemari.

Pengawa nyerahka palan projek ke udah tembu mega digulu Rashidah ti ngarika Opis Kereja Raya (JKR) Bagi Menua Sibu nyadi ejensi ti bejalaika pengawa, kunteriktor projek enggau Kaunsilor Ajan Dau ti ngarika Palan Servis DUN Tamin. -RBI

SANDAKAN, 18 Mac — Siku lelaki beumur 28 taun diripotka lenyau pengudah iya dipelabaka diserang baya maya nyala udang ba Sungai Segaliud, Kampung Segaliud, kena malam Hari Dua tu tadi.

Tudah benama Mohd Rayyan Abdullah benung ba palan penusah nyadi begulai enggau apai iya lebuh reptilia nya enda mukai-mukai ayan lalu nyambar tudah dalam penusah ke nyadi urung pukul 8.22 malam nya.

Nitihka ripot, penusah nya nyadi enggau naka pengelengkas nyentukka apai iya ke bisi besemak enda sempat meri sebarang bantu.

Mansa udah nya lenyau ari peda pengudah ditabanka arus sungai dalam petang.

Ketuai Balai Bomba enggau Penyah Penusah Kinabatangan, Penulung Ketuai Bomba Hairi Otuh, madahka piak iya nerima kangau ngenyit tekala nya pengudah penusah nyadi sebedau ngatur tim ngagai endur nya.

“Lebuh datai ba palan nya, komander operasyen ngeripotka siku mansa lelaki dipechayaka ditagup baya maya bejalaika aktiviti nyala udang ba sungai.

Operasyen ngiga enggau nyelamat (SAR) benung dipejalai dikena nyidi tudah,” ku iya ba sebengkah penerang.

Iya mega madahka gaya petang maya malam hari enggau faktor pengelikun nyekat operasyen ngiga keterubah ba atas sungai.

Operasyen SAR diteruska sehari tu enggau ngerembaika kandang endur ngiga ti ngaul mayuh bengkah ejensi kelimpah ari bantu peranak menua nya dikena nyidi sebarang kelai bekaul enggau tudah.

Piak bekuasa ngelalau mensia mayuh ngambika seruran bejejaga sereta ngemeratka sukut pengelikun maya bejalaika sebarang aktiviti ba kandang sungai, kelebih agi ba palan berisiko tinggi enggau jelu siga. — RBI

SONG, 18 Mac — Siku deriba napi penusah lebuh kerita pacuan empat roda ti ditepan iya lenyau jaga dalam penusah eksiden kediri empu ba Jalai Embuau, urung pukul 7.20 pagi, kemari.

Taja pan kerita Isuzu D-Max nya napi pengerusak ketegal penusah nya, tang deriba kerita nya diripotka nadai bakal ti begunaka servis nyelamat khas.

Pengari Palan Gerakan Operasyen Bomba (PGO) Sarawak madah, kangau penusah ngenyit nya diterima urung pukul 7.22 pagi.

Sebuah unit jentera enggau raban ari Balai Bomba enggau Penyah Penusah (BBP) Song dianjung ngagai palan nya ke bepalan urung semilan kilometer ari balai nya.

Raban penyelamat datai ba palan penusah nyadi urung pukul 7.31 pagi dikena nentuka gaya mansa enggau pengelikun penguna jalai alun ke bukai.

“Lebuh datai ba endur nya, ditemu nadai mansa tepekul. Deriba diripotka mujur mansutka diri lalu nyelamatka diri empu sebedau penatai raban bomba ba palan penusah nyadi,”

Ketegal nadai operasyen mansutka mansa diguna, raban bomba fokus meresi reba penusah bebadi ba jalai alun dikena nyeliahka risiko ngagai perengka pengangkut bukai ke nengah jalai nya.

Penguna jalai alun ngelingi Song kelebih agi ba kandang menua Jalai Embuau ti ngembuan gaya tanah ti mayuh pemar dilalau ngambika seruran bejejaga enggau gaya jalai ti nyangka lichin maya pagi hari.

Faktor teknikal perengka pengangkut baka gaya tayar enggau sistem brem mega patut diperesa enggau tetap dikena nentuka deriba likun.

Operasyen nya tembu enggau penuh pengudah raban bomba nentuka palan penusah nyadi likun enggau nadai penusah minyak siuh ti tau ngeruga mensia mayuh. — RBI

BINTANGOR, 17 Mac – Balai Bomba enggau Penyah Penusah (BBP) Bintangor sehari tu bejalaika latih operasyen ti ngaul FMB F225i Nozzle dikena ngangkatka penyikar raban dalam napi penusah angus enggau lebih efektif.

Latih ti berengkah urung pukul 9.30 pagi nya ngemeratka pengelandik bejalaika perengka pengerara api kelimpah ari teknik ngerara api ngena bansa bepupu enggau sistematik sereta efisyen.

Latih nya betuaika PBK II Herman Ak Basa, dibantu PBK II Zulfaiza Mohammad begulai enggau raban bomba PB Hensley ak Benson, PBB Amirul, PBB Luther enggau PBB Awg Azman.

Sama bisi nyereta latih tu iya nya Ketuai BBP Bintangor PPgB Mahmudin Narudin ke nyadi pematau enggau koordinator dikena nentuka latih bejalai enggau lanchar sereta nyapai juluk ke udah ditetapka.

Latih baka tu beguna dalam nentuka penyikap raban seruran ba tikas ke pemadu manah setipak enggau komitmen Opis Bomba enggau Penyah Penusah Malaysia nyendiaka servis beprestasi tinggi, jampat sereta mesra. – RBI

KANOWIT, 17 Mac — Opis Pesakit Luar (JPL) Sepital Kanowit deka ditutup sementara beserimbai enggau pengerami Hari Raya Aidilfitri, seriris enggau pemadah hari besai tambah ari Menteri Besai Malaysia.

Nitihka penerang ari sepital nya, pengawa nutup nya berengkah dipejalaika pengelama empat hari berengkah ari 20 ngagai 23 Mac 2026.

JPL deka beoperasyen baru baka selama kena 24 Mac 2026 enggau jam operasyen ari pukul 8.00 pagi nyentuk 5.00 lemai.

Dalam timpuh nya, semua servis berubat pesakit luar ti nadai ngaul penusah ngenyit enda beoperasyen.

Berindik enggau nya, mensia mayuh dilalau merambu penemuai berubat nangkan nya tumu sekalika sebedau tauka pengudah haribulan tutup, kelimpah ari nentuka bekal ubat chukup sepemanjai timpuh hari besai.

Mensia mayuh mega diperansang betanya ngagai sepital enti bisi sebarang tanya bekaul enggau temu danji tauka servis.

Berebak enggau nya, servis penusah ngenyit nengah Opis Penusah Ngenyit enggau Trauma (ETD) deka terus beoperasyen 24 jam baka selama sepemanjai timpuh penutup nya.

Individu ti begunaka perubat enggau lengkas dilalau terus ngagai opis nya enggau enda betangguh.

Piak sepital dalam penerang ke sama mega meri besai terima kasih ngagai kerejasama enggau pemereti ati mensia mayuh sereta minta ampun ba sebarang penusah ke tau nyadi.

Mensia mayuh mega disampika Selamat Menyambut Hari Raya Aidilfitri enggau ‘Maaf Zahir dan Batin’ — RBI

PAKAN, 17 Mac – Projek Bekebun Chara Bedandang (TSB) RISDA di Wong Mengilas, Ulu Sungai ngaul pengawa ngemansangka urung 50 hektar tanah NCR ke udah disukat, enggau penyereta 21 iku ari empat buah rumah panjai di sitak nya.

Kaban Kunsil Nengeri (ADUN) Pakan, Tan Sri William Mawan Ikom madah, projek nya ulih ngenegapka struktur genturung pendiau menua pesisir seraya ngangkatka tikas ekonomi peranak menua nya.

Tan Sri Mawan ke mega Penyanding Penemu ba Opis Premier Sarawak (Industri Pemakai, Komoditi enggau Pemansang Kandang Menua), nerangka pengawa bejalaika projek nya dibagi ngagai dua renggat iya nya Renggat 1 ti ngaul 20 hektar enggau Renggat 2 ti mungkur 30 hektar, enggau asil getah nyadi pun penatai pemisi.

Iya mansutka jaku nya rambau ngulu Program Nasih Tanah enggau Miring TSB NCR Wong Mengilas, Rumah Anita Unjong, Sugai empai lama, begulai enggau Opis RISDA Stesyen Sarikei sereta peranak menua nya.

Iya mega madah, RISDA meri bantu komprehensif ngagai pesereta nyengkaum nyendiaka sum, rachun enggau kereja ngintu dalam timpuh enam taun, enggau rega bantu manggai RM23,000 sehektar.

Ku iya nambah, pun getah nya dipelaba berengkah ngenataika asil pengudah timpuh tuai urung tujuh taun, lalu enggau nya meri pulai ekonomi ti enda ngetu ngagai bala penyereta.

Berindik enggau nya, iya meransang bala penyereta ngemayuhka pun penatai pemisi sida seraya nganti pengawa nangkal getah nyengkaum nengah aktiviti betanam betupi baka nupi manuk enggau kambin, ba kandang endur projek dikena ngangkatka agi tikas pengidup komuniti menua nya. – RBI

PADAWAN, 16 Mac — Penemuai Unit Pengatur Geopark, Opis Kampung Sarawak ngagai ladang lada Nang Ori di Padawan mantaika potensi besai produk geopark bepelasarka pengeraja asal ke ditanam komuniti menua nya.

Ladang lada nya dipejalaika orang dagang indu menua tu, Awaeang Anak Kwasin kenyau ari taun 2016, ukai semina ngetanka pesaka asal betanam betupi, tang mega mujur rembus ngagai makit entarabansa.

Nama “Nang Ori” ti mai reti “bendar tulin” dalam dialek Melayu Sarawak mega mandangka pengamat lada Sarawak ti diasilka ari tanah Borneo.

Sejarah pengawa betanamka lada ba kandang menua tu berengkah enggau pengawa ngaul seraban indu ti dikelala enggau nama “Ring Ladies”, lalu enggau nya mandangka pengawa indu menua pesisir ti beguna nyadi pengerembai ekonomi komuniti enggau pemansang kandang menua.

Diatu, Nang Ori ukai semina ngelakuka lada dalam tukuh benih enggau serbuk, tang mega udah ngasilka mayuh macham produk inovatif baka kopi putih lada chelum, teh susu lada chelum, minyak urut lada chelum enggau ‘lulur’ tubuh.

Pekara ti bebida tu nyadika bukti pengeraja asal menua tu ulih diubah nyadi produk ti bisi rega tambah ti tinggi enggau identiti kediri empu.

Kenyau ari taun 2019, produk Nang Ori udah rembus ngagai makit menua tasik nyengkaum Brunei enggau Singapura, kelimpah ari nempa kerejasama strategik enggau AEON ungkup makit Jepun.

Kebun komuniti tu mega suah nerima temuai antarabansa ari Jepun, Jerman enggau Mauritius, lalu enggau nya ngenegapka potensial iya nyadi palan agrodagang temuai bepelasarka komuniti.

Pemujur tu ngayanka pengulih komuniti setempat ngena pengeraja asal enggau penemu asal dikena ngasilka produk bekualiti tinggi, setipak enggau aspirasyen Sarawak Delta Geopark dalam meri kuasa ngagai pemansang ekonomi bepelasarka komuniti ti meruan. — RBI

MELAKA, 17 Mac – Siku indu diukum jil pengelama tujuh taun ulih Kort Sesyen Ayer Keroh sehari tu pengudah ngaku salah ngereja ngachau chara seksual ngagai anak iya empu dua taun ke udah.

Orang ke dituduh beumur 44 taun nya nyadi orang ke bisi kaul pengarap, iya nya indai kandung, sengaja ngereja pengawa salah seksual fizikal ngagai siku nembiak lelaki beumur lapan taun.

Pengawa tu digaga enggau chara ti enda patut ngagai anak mit nya ungkup tuju seksual ba sebuah rumah di Taman Peruna, Sungai Udang, pelilih tengah Melaka ditu, urung pukul 10.30 malam ujung bulan Disember 2024.

Tetuduh ke mega indai tunggal taja pia dalam apil iya minta ukum jil ke pandak agi laban iya patut ngidupka ketiga -tiga anak iya pengudah nembuka ukum iya.

Kort udah nya ngukum iya tujuh taun jil berengkah ari haribulan iya ditangkap kena 3 Mac tu tadi.

Sumber enggau gambar kredit Malaysia Gazette

MIRI, 17 Mac — Sepenyampau 400 kontena bubur lambuk udah disadung ngagai staf Sepital Miri kelai terima kasih ngagai servis enggau komitmen sida dalam meri servis pengerai ngagai komuniti.

Pengawa nyuaka nya sebagi ari Program Roadshow Bubur Lambuk ke diatur SABERKAS Pampang Pujut ke diatur ba laman Lobi Blok A sepital nya, ke digulu Kaban Kunsil Nengeri (ADUN) Pujut, Adam Yii Siew Sang.

Program tu ukai semina betuju meri terima kasih ngagai pengorbanan raban sepital, tang mega dikena ngerichahka agi pengerami ngintu bulan Ramadan sereta ngerapitka kaul entara komuniti enggau pengereja pengawa pengerai.

Raban pengatur mega meri besai terima kasih ngagai semua piak ti bisi kaul ngemujurka program nya. — RBI