LUBOK ANTU, 25 Mei — Tim Gerakan Am (PGA) mujur ngemuntanka aktiviti mai orang luar tama chara belalai pengudah mujur ngetan seiku lelaki peranak menua tu begulai enggau 12 iku peranak menua luar nyengkaum dua iku nembiak mit.
Pengawa tu dipejalaika ba Op Taring/Batas ba kandang endur garis entara menua Lubok Antu-Sarawak enggau Badau, Kalimantan Barat, tumu pagi tadi.
Ketuai Polis Pelilih Menua DSP Pricha Azin madah, pengawa ngenyit dipejalaika urung pukul 3.30 pagi nya dipejalaika Raban Pemansik enggau Raban Petugas Batalion 10 PGA Sibu pengudah polis tepedaka dua buah entukar dalam gaya ke ngirauka ati nuju jalai alun ke enda digazet ba kandang menua Ensawang, Lubok Antu.
Ku iya, pengawa matau tetemuka sebuah ari entukar nya dipasang siku lelaki peranak menua tu beumur 27 taun, lalu sebuah agi entukar mit dideriba siku peranak menua luar ke dipelabaka mai orang ke datai ari menua bukai ke nadai dokumen pejalai ke entas.
“Peresa silik tetemuka semua peranak menua luar ke bisi kaul enda mujur mandangka dokumen pejalai ke entas,” ku iya nengah sebengkah penerang sehari tu.
Nitihku iya, raban polis mega ngerampas dua buah entukar enggau kunchi, sebuah injin bot sepit enggau dua telefon binching enggi saspek ti dipelaba bejalaika pengawa nyadi ‘tekong darat.
Kes tu dipansik ari baruh Seksyen 26A Akta Anti-Penjualan Orang enggau Anti-Penyeludupan Migran (ATIPSOM) 2007 enggau Seksyen 6(1)(c) Akta Imigresen 1959/63.
Berebak enggau nya, DSP Pricha minta mensia mayuh ngenataika penerang ngagai polis nyema bisi tetemuka sebarang aktiviti ke ngirauka ati kelebih agi ba kandang garis entara menua, ngambika atur lengkas ulih dipejalaika.
Ku iya, Indu Opis Polis Pelilih Menua (IPD) Lubok Antu begulai enggau Kompeni Taktikal (Komtak) Batalion Ke-10 PGA Sibu deka terus ngenegapka pengawa nyaga pengelikun garis entara menua dikena ngelaban penyalah meraka garis entara menua sereta nentuka pengelantang mensia mayuh seruran dijaga. – RBI
