BETONG, 28 Mei – Sepenyampau 94 buah rumah panjai ba Dewan Undangan Nengeri (DUN) Bukit Saban udah nerima agih belanja Projek Mit Menua Pesisir (MRP) sepenyampau RM1,022,700 dikena nyukung pengawa bejalaika aktiviti komuniti kelimpah ngenegapka pengelantang pendiau peranak menua pesisir.

Sapit Premier Sarawak ke mega Kaban Kunsil Nengeri (ADUN) Bukit Saban, Datuk Amar Douglas Uggah Embas madah, bantu MRP tu mungkur dua komponen besai iya nya pemeri ngagai Komiti Pemansang enggau Pengelikun Genturung Pendiau (JKKK) enggau Biro Indu rumah panjai beserimbai enggau ngintu Gawai Dayak ti deka datai.

Iya madah munyi nya lebuh bejaku ba Pengerami Nyuaka Chek MRP DUN Bukit Saban di Rumah Mendit Unsu, Penom Ulu Paku, ditu, ba bulan Mei tu tadi.

Nitihku iya, sekeda projek pemansang ekonomi mega diperambu ba sitak nya, nyengkaum projek nanam sawit enggau lada dikena mantu nyungkak penatai pemisi peranak menua pesisir.

Kelimpah ari nya, perintah mega bisi nyendiaka agih belanja penyampau RM5,000 ungkup setiap pintu rumah panjai ungkup kereja ngemanahka palan pengentap pendiau dikena ngangkatka pengelantang peranak menua nya.

Berebak enggau nya, Kaban Parlimen P.204 Betong, Dato Dr Richard Rapu ngarapka bantu MRP ke diberi nya ulih dikena enggau manah bala penerima dalam bejalaika bemacham aktiviti ke meri pemaik ngagai genturung pendiau rumah panjai sida empu.

Sama bisi datai iya nya Datin Lucy Mary Johnson, Residen Bagi Menua Betong, Datu Richard Michael Abunawas, Pemesai Pelilih Betong, Laga Kueh, Pemesai Pentadbiran Pelilih Mit Spaoh, Denny Lim enggau Sekretari Kaunsil Pelilih Betong, Lister Clement Guwie. – RBI

#ruaiberitaiban#newsiban#beritaiban

Rindu | Titih | Kunsika

KUCHING, 28 Mei — Kaban Parti Bansa Dayak Sarawak (PBDS) Julius Enchana bepenemu perambu bekaul enggau status Bumiputera ungkup raban bansa Cina rebak ketiga (G3) di Sarawak patut diserenih enggau silik sereta diiring Konstitusyen Perintah Besai enggau semengat penumbuh Malaysia.

Nitihku iya, pekara nya mungkur sensitiviti undang-undang, sejarah enggau komuniti ti patut dikerandau enggau tuai runding sereta silik dikena nentuka pengelantang enggau penegap rama dijaga.

Ku iya, Perkara 153 Konstitusyen Perintah Besai bisi nyendiaka tanggungpengawa nyaga penuduk khas bansa Melayu enggau peranak asal Sabah enggau Sarawak, kelimpah ari nyaga pemerat ke entas semua bansa di menua tu.

Julius mantaika pekara tu maya ditanya penemu iya, dikena nimbal pekara ti benung balat dipejuraika mensia mayuh bekaul enggau jaku Presiden PBDS, Dr John Brian Anthony besetuju meri status bumiputera ngagai raban G3.

Ku iya, jaku ba podcast nya ukai mungkur semua randau ke dipansutka Dr. John ba randau nya, nya alai pelaba ko Julius, tu ti ngasuh batang penemu ke dipansut ka Dr. John ke viral nya, enda semua didinga mensia mayuh.

Ku iya, komuniti asal di Sabah enggau Sarawak ngembuan penatai sejarah, budaya enggau identiti kediri empu ti udah diaku dalam langkar penumbuh Malaysia kenyau ari taun 1963.

“Sebarang perambu ti ngaul definisyen tauka status Bumiputera enda tau enda diperati ari sukut undang-undang enggau sejarah ngambika enda ngasuh saru penemu bepelasarka nyaga hak komuniti asal,” ku iya.

Tampung Julius, iya mantaika jaku tu ukai ngarika parti tang nengah penemu diri empu.

Berebak enggau nya, Julius mega nyemetak madahka isu nya enda patut dipolitikka tauka digaga nyadi polemik ti tau ngenataika saru penemu ba rayat.

Iya bepenemu penyerakup rayat Sarawak ulih ditegapka agi nengah polisi pemansang ti adil, inklusif sereta meri penguntung ngagai semua renggat mensia mayuh enggau enda ngelengkaka hak ti udah ditulis dalam Konstitusyen.

Berebak enggau nya, iya ngaku komuniti Cina Sarawak udah bejalaika tanggungpengawa besai dalam pemansang ekonomi, pelajar enggau penyulut nengeri tu ngelama tu.

Taja pia, nitih ku iya, pengangkun ngagai pemeri tu ulih disalin nengah mayuh macham chara pemansang enggau polisi perintah enggau enda tentu ngaul ubah status Bumiputera.

Julius mega ngarapka sebarang perambu bekaul enggau pekara nya ulih diperundingka enggau chara tebuka, profesyenal sereta nengah jalai ke betul ngambika ulih ngetanka pengelantang raban bansa ke mayuh macham di Sarawak.

Iya nyemetak madahka batang pemerat iya nya nentuka penyerakup rayat terus dijaga lalu hak semua komuniti dipebasa setipak enggau Konstitusyen Perintah Besai enggau semengat Malaysia 1963.

Ba pekara ke sebaka, maya ti ditanya kedua kali, Julius mengkang enggau penemu iya madah kediri deka belelak dulu ari dunya politik jam ke diatu. -RBI

#ruaiberitaiban#newsiban#beritaiban

Rindu | Titih | Kunsika

KUCHING, 28 Mei — Kaban Parti Bansa Dayak Sarawak (PBDS) Julius Enchana mansutka diri nerangka penemu iya berindik ari tuduh enggau spekulasyen ti viral ba media rama bekaul enggau pengawa bepilih parti sereta kaul iya enggau siku individu ti dikelala enggau nama Dom Erick.

Kenu ku iya, iya enda ngelala individu nya sereta enda nemu penatai individu nya ke bendar.

Dikena nyeliahka saru penemu entara kaban parti enggau komuniti, Julius nyemetak madahka iya udah ngaga pemutus tumu enggau chara volunteer enda bediri minta pilih ba sebarang pangku pengawa beserimbai enggau Aum Pengari Tiga Taun Sekali (TDC) PBDS ti dalam bulan September 2025 suba.

Ku iya, pemutus nya dipadah ngagai mensia mayuh maya Aum Supreme Kaunsil PBDS kena bulan Januari 2025.

“Taja pan bisi ngantung nama ari renggat baruh ungkup aku bediri minta pilih nyadi Sapit Presiden, tang aku udah nulak ngantung nama nya lalu enggai bediri minta pilih,” ku iya ba sebengkah penerang.

Iya mega madahka penerang ke sebaka udah kala dikenataika ngagai portal Dayak Daily sebedau tu dikena ngemeratka penetap ati iya enggai nyereta pengawa bepilih TDC ti deka datai.

Berebak enggau nya, Julius nyemetak madahka diri mengkang nyadi kaban parti sereta tetap taluk ngagai PBDS enggau pengawa parti.

Iya ngarapka penerang nya ulih nagang semua spekulasyen enggau pengawa nguji ngaitka nama iya enggau sebarang parti tauka timbal balas sebedau pengawa bepilih parti. – RBI

#ruaiberitaiban#newsiban#beritaiban

Rindu | Titih | Kunsika

SONG, 28 Mei — Semengat begulai sereta ngemeratka pengelikun komuniti majak ditegapka nengah pengawa nyuaka empat unit perengka pengerara api apin lama ke udah ngagai sebuah rumah panjai di Temalat, Song.

Pemeri nya disuaka Gerempung Terabai Menua ari Kapit ti betuaika Edwin Manggie begulai enggau raban Bomba Song nyadika pengeran dikena nambahka tikas penyikap peranak menua nya dalam napi sebarang penusah ngenyit ke tau nyadi kelebih agi penusah angus.

Tuai Rumah Limbi Jambar seraya ngenataika pengaga ati iya madahka iya chukup beterima kasih ngagai pengibuh enggau pemeri ke udah diberi ngagai peranak rumah panjai nya.

“Terima kasih ngagai Gerempung Terabai Menua ari Kapit ti betuaika Edwin Manggie begulai enggau raban Bomba Song laban udah meri empat unit perengka pengerara api ngagai rumah panjai kami,” ku iya.

Kenu ku iya, pemeri nya ukai semina meri pemaik ari sukut pengelikun, tang mega mandangka semengat kerejasama enggau penyerakup entara komuniti enggau ejensi ke bekaul.

Iya ngarapka inisiatif baka nya ulih dipajakka jemah ila dikena nentuka pengelikun enggau pengelantang peranak rumah panjai seruran dijaga. -RBI

KUCHING, 28 Mei — Perambu meri status Bumiputera ngagai bansa Cina Sarawak rebak ketiga udah nyungkak bemacham reaksyen enggau randau entara komuniti di nengeri tu, kelebih agi bekaul enggau status hak komuniti asal sereta semengat asal penumbuh Sarawak.

Penemu nya dikaitka enggau penerang Presiden Parti Bansa Dayak Sarawak (PBDS), Dr. John Brian Anthony ti dipeda muka ruang ngagai jurai ke lebih luas bekaul enggau reti Bumiputera di Sarawak.

Beberapa piak bepenemu isu tu patut diperatika enggau tuai runding, silik sereta bepelasarka Konstitusyen enggau sejarah komuniti asal di nengeri tu.

Kenu ku sida, status Bumiputera ukai semina pengangkun rama tauka pentadbiran aja, tang bisi kaul rat enggau hak adat, tanah NCR, pelajar, peluang ekonomi sereta nyaga komuniti asal ke udah lama nyadi pelasar identiti Sarawak.

Berindik enggau nya, sebarang perambu deka ngerembaika reti Bumiputera dianggap enda patut diputuska beguai-guai enggau nadai berandau enggau silik enggau rayat, ketuai raban bansa, pakar konstitusyen enggau institusyen ke bekaul.

Berebak enggau nya, bisi penemu ti meda penerang nya ngembuan dimensi politik kediri empu nyengkaum pengawa ngerembaika sukung parti ngagai sekeda komuniti.

Sarawak udah lama dikelala nyadi sebuah nengeri ti entap sereta likun taja pan diuan komuniti pupu bansa enggau jalai pengarap.

Komuniti Cina di nengeri tu mega diaku bejalaika tanggungpengawa ti beguna dalam pemansang ekonomi, pelajar enggau pengelantang rama enggau nadai ngeruga struktur pemun komuniti Bumiputera ke bisi diatu.

Bala pemerati mega nyemetak madahka penegap Sarawak iya nya ba prinsip bebasaka pangan diri ngagai identiti tetiap bansa enggau pengelantang ke udah ditempa sepemanjai maya, ukai nengah ubah status tauka terminologi politik aja.

Dalam konteks pengawa komuniti Dayak, mayuh ngarapka batang agenda baka pemansang menua pesisir, pelajar rebak baru, peluang gawa, ngempu tanah adat enggau ngenegapka ekonomi komuniti terus nyadi pemerat politik.

Sida pechaya pengawa ngetanka hak komuniti bansa asal meseti meruan terang sereta konsisten ngambika enda ngasuh rayat saru penemu.

Berebak enggau nya, pemerati politik pechaya penyerakup ke bendar meseti ditempa nengah pengelurus rama, penegap enggau ulah bebasaka pangan diri entara bansa dikena nentuka pemansang Sarawak ulih diasaika enggau lurus semua renggat mensia enggau enda ngeruga pelasar sejarah enggau hak komuniti asal nengeri tu. — RBI

ENGKILILI, 27 Mei — Program Belepa Gawai Dayak 2026 enggau pengawa nyuaka chek Projek Mit Menua Pesisir (MRP) ke diberi Sapit Premier Sarawak, YB Datuk Amar Dr Sim Kui Hian beserimbai enggau pengerami ngintu Gawai Dayak 2026 ungkup kandang menua DUN Engkilili Zon Ulu Skrang diatur sepenemu enggau semengat beserakup ba Rh Velly, Sungai Pinang, Ulu Skrang, ditu kemari.

Nitihka penerang nengah Facebook ari Tuai Rumah Velly (Painggie) Anak Rabong, pemeri nya disuaka Sekretari Politik ngagai Premier Besai Sarawak, Kua Jack Seng nyadi pengari Sapit Premier Sarawak.

Program nya bela digulu Penghulu Robert Anggai, Kr. Francis Linggie, Kr. Maling, Kr. Oyo Imang, Kr. Henry Bayur, Kr. Majing Insol, bala tuai rumah sereta mega peranak menua nya ke sama-sama ngerichahka pengerami nya dalam rampa ke manah sereta lantang.

Nitihka penerang, pemeri ke dikenataika nya dikearapka ulih mantu ngenegapka pemansang komuniti, ngenegapka penyerakup rayat sereta ngerichahka agi pengerami Gawai Dayak taun tu.

Program tu mega mandangka komitmen perintah Sarawak ti seruran bejalaika pengawa nentuka pengelantang pendiau rayat terus diberi perati, kelebih agi di menua pesisir, kelimpah ari ngerapitka kaul entara ketuai enggau komuniti setempat.

Pengerami Gawai Dayak 2026 mega deka dirichahka agi enggau pengawa mantaika main asal komuniti Dayak

“Gayu Guru, Gerai Nyamai, Lantang Senang Nguan Menua.” ku tulis Painggie ba Facebook iya — RBI

SARIKEI, 27 Mei — Kaban Kunsil Nengeri (ADUN) Pakan Tan Sri William Mawan Ikom bejadika Pengerami Nyuaka Geran Projek Mit Menua Pesisir (MRP) ngagai Komiti Pemansang enggau Pengelikun Genturung Pendiau (JKKK), Biro Indu, Kelab Opis enggau Gerempung Apai Indai enggau Pengajar (PIBG) ba Rumah Rehat Perintah, Sarikei pagi kemari.

Pengerami nyuaka geran nya disambut enggau ati terima kasih bala penerima, ti mungkur mayuh bengkah gerempung renggat baruh, ti nyadi manifestasyen sukung perintah ti terus ngenegapka pengawa bejalaika program enggau aktiviti komuniti ba renggat genturung pendiau.

Dalam jaku dipansutka iya, YB Tan Sri William Mawan Ikom nyemetak madahka tetiap agih belanja ari baruh Geran Projek Mit Menua Pesisir (MRP) mesti diatur enggau bejimat, enggau integriti sereta dikena penuh ungkup pengawa bejalaika program ti meri empas terus ngagai pengelantang pendiau rayat.

Iya mega nyemetak madahka pangku pengawa JKKK, Biro Indu, kelab jabatan enggau PTA beguna amat dalam merambu enggau bejalaika bemacham aktiviti rama, pelajar enggau pemansang komuniti enggau efektif agi ba renggat baruh.

Pengerami tu mandangka komitmen Perintah Sarawak ti seruran ari baruh iring YAB Premier dalam ngenegapka pemansang menua pesisir sereta nentuka pengelantang pendiau rayat dijaga nengah sukung enggau bantu ti enda ngetu ngagai komuniti setempat. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

LIMBANG, 27 Mei — Sarawak Energy Berhad (SEB) deka mai tiga set pemansut kuasa mindah kin kitu ari Johor Bahru nyadi atur lengkas dikena mantu ngetanka bekal kuasa karan di Limbang ke diatu benung napi penanggul ketegal sekeda set pemansut kuasa menua tu rusak.

Nitihka ripot TVS, Sapit Menteri Perengka Pengangkut, Datuk Hasbi Habibollah madahka pengawa SEB ti jampat ngulihka sukung pemansut kuasa ari luar kandang menua nya ngayanka komitmen kompeni utiliti nya terus nentuka utai ti diguna rayat terus dikemeratka.

“Terima kasih ngagai SEB laban jampat bejalaika atur ngulihka bantu sukung ari luar Limbang.

Ketetiga injin pemansut kuasa mindah kin kitu ari Johor Bahru dipelaba datai Hari Lima tu lalu deka mantu mulaika pemansut kuasa baka selama di Limbang,” ku iya.

Iya madah munyi nya ba aum pengarang berita bekaul enggau isu bekal elekterik enggau ai di Opis Residen Limbang kemari.

Nitih ku iya, penusah putus kuasa karan ke diatu enggau bekal kuasa sementara bepun ari sekeda set kuasa karan di Limbang ke udah napi pengerusak enggau penanggul teknikal, lalu ngujungka ngeruga kapasiti pemansut kuasa karan di pelilih menua nya.

Ku iya nambah, penatai loji kuasa mindah kin kitu nya beguna amat, kelebih agi sebedau pengerami Hari Gawai dikena nentuka peranak ulih ngintu pengerami nya enggau lantang agi sereta dikuasa.

Ba pemansang ke sama, iya madahka kereja nyambung sistem grid nengeri ke benung dipejalaika diatu dipelabaka tembu pun bulan Julai tu lalu deka nyadi chara mutarka timpuh panjai isu penanggul bekal kuasa karan di Limbang.

Ku iya nerang, taja pan sistem grid nengeri udah tembu penuh tang palan kuasa ke bisi diatu tetap deka dijaga nyadi sukung alternatif dikena nentuka penegap bekal kuasa karan terus dijamin.

Iya mega nerangka SEB diatu benung bejalaika atur bekal kuasa karan sementara nengah chara ke dikuasa nyadi atur proaktif dikena nyeliahka semua bekal kuasa tejanggal (padam) seraya kereja ngintu enggau ngemanah benung dipejalaika.

Sama bisi ngulu aum pengarang berita nya, Sapit Menteri Industri Pemakai, Komoditi enggau Pemansang Kandang Menua, Datuk Dr Abdul Rahman Ismail, Kaban Kunsil Nengeri (ADUN) Batu Danau, Dato Paulus Palu Gumbang enggau Sapit Residen Limbang, Marie Rozita Kulai. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

SEBAUH, 27 Mei — Menteri Industri Pemakai, Komoditi enggau Pemansang Wilayah Sarawak ke mega Kaban Kunsil Nengeri (ADUN) Kemena, Dato Sri Dr. Stephen Rundi Utom sehari tu ngulu Pengerami Nyerahka Chapi beserimbai enggau Hari Raya Aidiladha 1447H ti diatur ba Masjid Kampung Melayu Hilir, Sebauh.

Kenu ku iya, pengerami nya mandangka semengat pengibuh, pengelurus ati enggau penyerakup ti seruran nyadi tiang pengelantang komuniti di Sarawak.

“Sehari tu aku chukup gaga ati ngulu Pengerami Nyuaka Chapi beserimbai enggau Hari Raya Aidiladha 1447H di Masjid Kampung Melayu Hilir, Sebauh.

“Pengerami baka tu mandangka semengat pengibuh, pengelurus ati enggau penyerakup ti nyadi teras komuniti kitai di Sarawak,” ku iya.

Iya mega meri pengaga ati ngagai peluang begulai enggau komuniti Islam di kandang menua Kemena dalam ngintu pengerami Hari Raya Aidiladha ti besai reti.

“Aku amat beterima kasihka peluang begulai enggau komuniti Islam di Kemena ba hari ti manah tu,” ku iya nambah.

Berebak enggau nya, iya mega meri Selamat Hari Raya Aidiladha ngagai semua raban Islam di Sarawak, kelebih agi rayat Kemena, seraya ngarapka pengerami nya mai penyenang, pemaik enggau berekat ngagai semua.

“Arapka hari ti besai reti tu mai pengelantang, pemaik enggau berekat ngagai kita enggau diri sebilik,” ku iya. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

KUCHING, 27 Mei — Aktivis hak asasi mensia Sarawak, Peter John Jaban ngansak Perintah Besai enggau kompeni penerebai bilun bejalaika atur enggau lengkas dikena mutarka isu tambang bilun ti majak niki sebedau pengerami Gawai Dayak enggau Kaamatan.

Nitih ku iya, peranak Sabah enggau Sarawak ke gawa enggau belajar di Semenanjung sekali agi tepejal napi rega tikit penerebai bilun ke dikumbai enda patut ungkup sida pulai ke menua ngintu pengerami begulai enggau diri sebilik.

Ku iya, berita ba media rama mandangka tikit sejalai entara Kuala Lumpur ke Sarawak enggau Sabah manggai entara RM1,000 ngagai RM1,500, lalu enggau nya ngenusahka nembiak, pekereja enggau ruang bilik bepenatai pemisi tengan.

“Gawai Dayak enggau Kaamatan ukai semina pengerami budaya aja, tang kelai penyerakup enggau pengelantang komuniti pupu bansa di Malaysia.

“Akses ngagai perengka pengangkut ke ulih dibeli maya musin pengerami patut nyadi pemerat menua,” ku iya nengah penerang media sehari tu.

Ku iya, peminta penerebai bilun ke majak nambah maya musin pengerami ukai isu baru lalu kompeni penerebai bilun enggau perintah patut udah bisi mekanisme ke lebih efektif dikena nyaga enggaika tambang niki.

Nambahka nya, rayat Sabah enggau Sarawak udah lama nanggung ungkus pengidup enggau ungkus pengangkut ke tinggi agi ketegal faktor geografi, nya alai akses penerebai domestik ke adil sereta ulih dibeli ukai utai ke “mewah” tang nyadi pekara ke diguna.

Berindik enggau nya, iya ngansak Opis Menteri Perengka Pengangkut ti betuaika Anthony Loke begulai enggau kompeni penerebai bilun baka AirAsia enggau Malaysia Airlines ngambi singkang enggau lengkas dikena mutarka isu ti nyadi belama nya.

Entara langgur penemu ke dibantaika iya nya bejalaika mekanisme ngawal tambang ke patut maya musin pengerami, penerebai bilun tambah ba jalai ke bisi peminta tinggi, subsidi khas ungkup nembiak enggau raban ke kurang penatai pemisi, sereta terang dalam netapka rega tikit maya musin pengerami.

“Rayat Sabah enggau Sarawak ukai temuai, kami semina deka pulai ke menua sereta begulai enggau diri sebilik,” ku iya. – RBI

#ruaiberitaiban#newsiban#beritaiban

Rindu | Titih | Kunsika