KUCHING, 26 Mei — Parti Pesaka Bumiputera Bersatu (PBB) Sarawak majak bejalaika singkang ngenegapka penyerakup parti pengawa nuju Konvensyen Renggat Zon PBB Sarawak diatu benung masuk renggat kepenudi.
Pengawa nyediaka diri udah dikerandau dalam aum khas ke diatur ba Indu Opis PBB Sarawak di Jalai Bako, lemai tu tadi ti bechairmanka Sapit Presiden PBB ke mega Sapit Premier Sarawak, Datuk Amar Douglas Uggah Embas.
Aum nya ngemeratka bemacham sukut ke beguna nyengkaum koordinasyen kereja, penyikap komiti bejalaika pengawa, penetap endur enggau pengelanchar ngatur konvensyen ba tetiap zon di serata Sarawak.
Sekretari Besai PBB, Dato Sri Alexander Nanta Linggi madah, aum nya mega netapka timpuh ngatur Konvensyen Renggat Zon PBB Sarawak ti deka berengkah ari bulan Julai ngagai September taun tu.
Nitihku iya, konvensyen nya diperambu diatur nitihka zon iya nya Zon Tengah kena 25 Julai, Zon Betong kena 1 Ogos, Zon Utara kena 29 Ogos enggau Zon Selatan kena 12 September 2026.
Ku iya, pengawa netapka taga tumu beguna dikena nentuka tetiap zon bisi timpuh nyendiaka diri ke chukup kelimpah ari ngelengkaska koordinasyen program ba semua renggat organisasyen parti.
“Konvensyen tu ukai semina nyadi pelasar dikena ngempuruka ketuai enggau kaban parti ari serata Sarawak, tang mega nyadi pelasar ti beguna dikena ngenegapka penyerakup, sepenemu enggau kuing pengawa parti,” ku iya nengah sebengkah penerang sehari tu.
Iya mega nyemetak madahka semengat begulai, disiplin organisasyen enggau komitmen selampur jentera parti deka terus nyadi pelasar besai dalam ngenegapka agi pengawa PBB ngulihka penegap politik, pemansang enggau pengelantang rayat Sarawak.
Konvensyen Renggat Zon PBB Sarawak dikearap nyadi siti ari pelasar besai parti taun tu ba pengawa ngenegapka kaul renggat baruh sereta mega ngenegapka agenda parti ba semua renggat. – RBI
