SPAOH, 30 Mei — Perintah Sarawak komited nentuka penguntung ari projek parit enggau entali ai ke benung dipejalaika diatu ba kandang menua Spaoh ulih diasaika pekebun mit enggau komuniti menua pesisir enggau lengkas sereta enda ibuh nganti kesemua projek nya tembu penuh.
Sapit Premier Sarawak, Datuk Amar Douglas Uggah Embas madah, chara nya beguna ngambika rayat jampat agi ngasaika asil pemansang, ari nya ulih nyungkak produktiviti betanam betupi sereta mansutka penatai pemisi ke manah agi ngagai peranak menua nya.
Iya madah munyi nya lebuh nyadi chairman sesi randau bekaul enggau pengawa bejalaika sereta merambu projek pemansang infrastruktur parit enggau entali ai ba Rumah Rehat Spaoh, kemari.
Nitihku iya, pengawa ngemansangka sistem parit enggau entali ai ti efisyen bejalaika tanggungpengawa ti beguna dalam ngenegapka sektor betanam betupi menua pesisir, kelebih agi dalam mantu pekebun mit nambahka asil sereta nentuka pengelantang aktiviti betanam betupi sida.
Ba sesi nya, Opis Parit enggau Entali Ai (JPS) Bagi Menua Betong betuaika Injinir Bagi Menua, Mazolizam Mohamad, begulai enggau Penulung Injinir Bagi Menua, Nash Hafizi Awg Sarbini mantaika status bejalaika sekeda projek besai ba kandang menua Spaoh enggau Betong.
Entara projek ke dibantai iya nya Projek Infrastruktur Parit enggau Entali Ai Baru Skim Parit Tanjung Tisak begulai enggau kereja nyaga tebing sungai di Pamutang, Spaoh ke udah dikemendarka kena 5 Januari 2026 enggau ungkus kunterik RM8.8 juta enggau timpuh bejalaika pengawa pengelama 18 bulan.
Projek ke diatu benung ba renggat ngaga nya dikearapka ulih ngangkatka pemanah sistem parit kandang endur betanam betupi sereta meri penguntung terus ngagai komuniti setempat nengah chara ngatur ai enggau lebih efektif.
Bela dikerandau iya nya Projek Infrastruktur Parit enggau Entali Ai Baru Skim Parit Batang Layar Blok D di Bagi Menua Betong ti udah dikemendarka kena 10 Mac 2025 enggau ungkus kunterik RM29 juta sereta timpuh bejalaika pengawa nya pengelama 18 bulan.
Bekaul enggau pengawa bejalaika projek nya, Uggah meri langgur penemu ngambika JPS berundingka chara nyerahka bilik projek berenggat ngambika bagi ke udah tembu ulih dikena komuniti tumu agi.
“Enti bisi komponen projek ke udah tembu sereta likun dikena, kitai patut mansik chara ke pemadu manah ngambika penguntung nya ulih disalur tekala nya ngagai rayat, kelebih agi pekebun mit ke amat begunaka iya,” ku iya.
Iya nyemetak madahka chara tu ukai semina ulih ngenyampatka pengawa ngenataika pemaik pemansang ngagai rayat, tang mega bisi potensi nyungkak aktiviti ekonomi kandang menua sereta ngangkatka sosio-ekonomi komuniti menua pesisir.
Berebak enggau nya, iya mega bisi ngatur randau enggau Pemesai Pentadbiran Pelilih Mit Spaoh, Denny Lim enggau Sekretari Kaunsil Pelilih Betong, Lister Clement Guwie bekaul enggau sekeda perambu projek pemansang baru ti diperambu ungkup kandang menua Spaoh.
Randau nya ngayanka komitmen Perintah Sarawak ti terus ngenegapka infrastruktur asas menua pesisir nyadi pemangkin pemansang ekonomi, nambahka produktiviti sektor betanam betupi enggau pengelantang pendiau rayat setipak enggau aspirasyen deka nempa Sarawak nyadi pelilih menua ti maju, lantang sereta inklusif manggai ba taun 2030. — RBI
#Beritalban | Ruai Berita Iban
Rinduka | Titihka | Kunsika
Kredit Photo — UKAS
