SEBUYAU, 30 Mei — Menteri Perengka Guna enggau Telekomunikasyen Sarawak ke mega Kaban Kunsil Nengeri ( ADUN) Sebuyau, Dato Sri Haji Julaihi Haji Narawi, madahka pemendar agih belanja penyampau RM100,000 ungkup pengawa ngangkatmanah Dewan Komuniti Kampung Lubok Manta Atas ba pengawa Program Ketuai Begulai enggau Rayat sereta pengawa nyuaka bantu Tanggungjawab Sosial Korporat (CSR) ungkup Pengerami Gawai Dayak 2026 di Sebuyau, kemari.

Nitih ku iya, agih belanja nya betuju ngangkatka tikas pengelantang enggau perengka guna balai mensia mayuh dikena nangkup guna peranak menua nya, kelimpah ari ngenegapka pangku pengawa nyadi palan aktiviti komuniti enggau rama.

Penerang nya dibantaika rambau pengawa nyuaka pemeri beserimbai enggau Hari Gawai Dayak ngagai 50 iku penerima ari Zon Sebangan ti nyadi ba Balai Mensia Mayuh Kampung Lubok Manta Atas.

Dulu agi ari nya, program berengkah di Dewan Kampung Bulan, Sebuyau, enggau pengawa nyuaka bakul pemakai enggau bantu mata duit ngagai 50 iku penerima ari Zon Sebuyau.

Pemeri nya sebagi ari pengawa ti enda ngetu dikena mantu raban ti begunaka bantu sereta ngelempungka tating pengidup sida sebedau pengerami Hari Gawai.

Program Ketuai Begulai Enggau Rayat ke diatur mega nyadika pelasar dikena ngerapitka kaul entara ketuai enggau komuniti kelimpah ngerapitka kaul rayat nengah bemacham inisiatif pengelantang pendiau.

Dato Sri Julaihi madah, perintah Sarawak deka terus meri perati ngagai guna komuniti menua pesisir nyengkaum sukut pengelantang pendiau, pemansang infrastruktur komuniti enggau pengelantang pendiau rayat ngambika penguntung ari pemansang ulih diasaika enggau komprehensif.

Iya mega ngarapka pemeri ti disalur enggau agih belanja ti dipadahka ulih meri penguntung ngagai peranak menua nya sereta meri pangka ngagai pengerami Hari Gawai ti lebih richah, harmoni sereta bisi reti.

Program tu mandangka komitmen perintah ti terus ngenegapka pemansang komuniti sereta nentuka pengelantang rayat seruran dikemeratka.

Selamat Datai ngagai Gawai Dayak 2026. Gayu Guru, Gerai Nyamai. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

KANOWIT, 30 Mei – Penanggul bekal ai ke agi nyadi ba sekeda kandang endur di sepemanjai Jalai Nibong–Tada ketegal kapasiti Loji Meresi Ai Akut ke baru tembu digaga ke diatu semina ulih nyukung bekal ai naka Rumah Michael Jalak ku Dr Stephen William

Ba sebengkah penerang, iya madahka penerang pemadu baru ke diterima iya ari Opis Bekal Ai Menua Pesisir (JBALB) mandangka loji nya bedau ulih mekal ai ngagai selampur kandang menua Jalai Nibong–Tada baka ke diperetika sebedau tu.

Nitih ku iya, kandang endur ke dibungkur loji nya agi bepanggai ba Loji Meresi Ai Nanga Tada, lalu enggau nya ngujungka peneras bekal ai enda chukup, kelebih agi ba kandang endur sepemanjai Jalai Rantau Dilang enggau Sengayan.

“Pekara tu baru udah dipadahka JBALB.Sebedau tu aku melabaka Loji Meresi Ai Akut ke baru tembu nya ulih nangkup selampur kandang Jalai Nibong–Tada bepelasarka penerang ke diberi maya nemuai sereta bejadika loji nya,” ku iya.

Berindik enggau nya, Dr Stephen ngarapka JBALB ulih ngangkatka pengawa ngemanahka sistem bekal ai beresi ngagai kandang endur ke kena bungkur sereta ngambi singkang enggau lengkas mantu peranak ke agi napi penanggul bekal.

Iya mega ngarapka bekal ai beresi ulih dianjung ngagai kandang endur ti kena bungkur seraya chara mutarka timpuh panjai dipejalaika dikena mutarka penanggul tekanan ai ti baruh.

Dalam penerang ke sama, Dr Stephen William minta ampun ketegal penerang ke diterima iya sebedau tu enda betul lalu ngemeratka pemesai guna ngenataika penerang ke betul sereta nitihka timpuh ari ejensi ke bekaul ngagai pengari rayat enggau ketuai komuniti.

“Aku ngarapka JBALB ngambi inisiatif meri penerang ke betul ngagai pengari rayat kandang menua enggau ketuai raban bansa ngambika sebarang isu ulih diputarka enggau lebih efektif,” ku iya.

Ku iya, perintah seruran komited nentuka akses ngagai bekal ai beresi ke chukup terus nyadi pekara ti dikemeratka, kelebih agi ngagai peranak menua pesisir ti bepanggai ba sistem bekal ai mensia mayuh ungkup guna ninting hari. – RBI

#ruaiberitaiban#newsiban#beritaiban

Rindu | Titih | Kunsika

SAMARAHAN, 30 Mei – Peranak di Kampung Sungai Batu, Kota Samarahan tekenyit enggau penatai siku baya ti ayan ba mua sebuah rumah kena Hari Lima tu tadi, lalu enggau nya ngasuh peranak menua nya irau ati.

Nitihka penerang ari Raban Penyaga Orang Periman Malaysia (APM) Pelilih Samarahan, sida nerima kangau ngenyit bekaul enggau penusah nya sebedau tim sida dianjung ngagai endur nya bejalaika operasyen nangkap jelu siga (MHL).

Asil ari pengawa jampat raban APM, baya nya mujur ditangkap ngena teknik ‘sintak’ enggau nadai sebarang penusah ke enda manah nyadi.

Berindik ari penusah nya, mensia mayuh dilalau ngambika seruran bejaga-jaga, kelebih agi lebuh besemak enggau tebing sungai, kandang endur ke bepaya tauka endur ke bisi ai ke bisi potensial nyadi palan jelu nya.

Peranak menua nya mega diingat ngambika enda ngelakka nembiak mit bemain nadai dikemataka ba kandang endur ke berisiko sereta lengkas ngeripot enti bisi tepeda tauka bisi baya ngagai piak bekuasa ngambika atur ke silik agi dipejalaika.

Sebarang penusah ngenyit tauka sebana ke bekaul tau disadung ngagai APM Samarahan nengah lumur 082-672999 tauka lumur penusah ngenyit 999. -RBI

#ruaiberitaiban#newsiban#beritaiban

Rindu | Titih | Kunsika

KANOWIT, 30 Mei – Pemansang menua pesisir deka terus dikemeratka dikena nentuka rayat di menua pesisir ngasaika perengka guna ke lebih lantang sereta peluang pemansang ke sebaka enggau kandang menua bukai, pia ku Kaban Kunsil Nengeri (ADUN) Machan, Allan Siden Gramong.

Nitih ku Allan, perengka guna ke manah agi ukai semina meri pengelantang ngagai peranak, tang mega nyadi pematak ngagai pemansang rama, ekonomi enggau penyerakup komuniti lokal.

“Rumah panjai ukai semina endur diau aja, tang nyadi palan pengidup komuniti ke nyadi pelasar ngenegapka semengat begulai, bekerejasama sereta beserakup entara peranak,” ku iya.

Iya madah munyi nya lebuh bejadika Pengerami Begunan Baru Rh JKKK Rh Robert Bugap di Rantau Ensurai, ti dikumbai iya nyadi sebengkah agi pemujur beguna dalam pengawa ngangkatka tikas pengidup peranak menua pesisir.

Iya mega nyemetak madahka pemansang ti dipejalaika meseti meri penguntung ungkup timpuh panjai ngagai rayat sereta ulih nangkup guna rebak diatu enggau jemah ila.

Ku Allan, perintah deka terus bebendar ngenataika pemansang enggau perengka guna ke diguna komuniti menua pesisir ngambika sida enda tinggal ari penyulut nengeri tu.

Sama bisi datai bini iya, Dinamicayanti Daris, bala tuai rumah, ketuai raban bansa, kaban komiti enggau bala temuai ti dikangau meri sukung ngagai komuniti menua nya.

Berebak enggau nya, Allan ngenataika pengaga ati ngagai semua piak ti udah meri komitmen, awak enggau kerejasama ngemujurka projek nya nyentuk mujur tembu sereta dipenyadika.

Iya ngarapka perengkaguna baru nya ulih dikena enggau pemadu manah ulih peranak menua nya nyadi palan aktiviti komuniti ti ulih ngerapitka kaul sereta meri pangka ngagai pemansang enggau pengelantang komuniti di kandang menua Rantau Ensurai. – RBI

#ruaiberitaiban#newsiban#beritaiban

Rindu | Titih | Kunsika

BETONG, 29 Mei — Polis DiRaja Malaysia (PDRM) ngenukuka sida udah muka keretas pansik bekaul enggau laya ti ngaul seraban individu ba premis main snuker di pasar Debak, ti ​​viral ba Facebook kenyau ari pagi tadi.

Ketuai Polis Pelilih Betong, DSP Wan Mohamad Ali Wan Malek madah, polis nerima ripot bekaul enggau kes nya urung pukul 11.56 pagi tadi.

Nitih ku iya, kes tu dipansik ari baruh Seksyen 148 Kanun Keseksaan ketegal ngachau ngena senyata, ti nyendiaka ukum jil nyentuk lima taun tauka ukum mata duit tauka kededua ukum enti dikenuku salah.

“Bejalaika pengawa nitihka penerang enggau pansik ke udah dipejalaika, sepenyampau semilan iku lelaki peranak menua tu ke beumur entara 23 ngagai 35 taun mujur dipansik sereta ditan ba sekeda endur ngelingi Pusa enggau Debak entara pukul 2.30 lemai nyentuk pukul 4.00 lemai hari ke sama,” ku iya nengah penerang media.

Semua saspek ditan pengelama empat hari berengkah ari 29 Mei nyentuk 2 Jun 2026 dikena mantu pansik ke silik agi.

Asil peresa nya tetemuka dua iku saspek bisi rikod ke udah bekaul enggau pengawa salah guna dadah.

Berebak enggau nya, peresa nisih ai kemi tetemuka siku ari seduai nya positif ketamin lalu siku agi negatif.

Pansik keterubah tetemuka kes nya bepun ari penyarut mit entara dua iku individu ke dipelabaka mabuk sereta ngelala pangan diri sebedau gaya nya nyadi kasar.

Beberapa iku individu bukai ke bisi ba palan penusah nyadi dipelabaka nguji deka mechahka laya nya lalu penusah nya nadai ngaul elemen bayat.

Nadai penusah bakal balat diripotka nyadi ba penusah nya.

Berebak enggau nya, PDRM ngenataika pengaga ati ngagai mensia mayuh ke datai meri penerang bekaul enggau kes nya.

Mensia mayuh mega dilalau anang ngerembaika berita ti enda entas tauka mansutka sebarang komen ti tau ngasuh penyarut sereta ngachau pengelantang mensia mayuh, kelebih agi ba pelilih menua Betong. – RBI

#ruaiberitaiban#newsiban#beritaiban

Rindu | Titih | Kunsika

KUCHING, 29 Mei – Perintah Sarawak majak nambahka penyampau bantu ngagai rayat nengah Bantu Barang Diguna Pemun Sarawak (SKAS).

Nitih ku Sapit Premier Sarawak, Datuk Amar Dr.Sim Kui Hian, bantu ungkup orang tuai ke beumur 60 taun ke atas mega ditambah ari RM400 taun nyin tadi, ngagai RM600 taun tu.

Ku iya, Perintah Nengeri melabaka urung 900,000 iku orang deka nerima bantu SKAS, enti dibanding enggau urung 800,000 iku penerima ke dirikod naka ke diatu.

“Premier Sarawak amat dekaka duit nya dipulaika baru ngagai rayat,” ku iya lebuh dikerandau pengudah pengawa meresa pengawa bejalaika Skim Rega Maksimum ungkup Musin Pengerami Gawai 2026 ba Emart Tabuan Jaya, sehari tu tadi.

Beduduk ari nya, Dr. Sim ngelalau rayat Sarawak ke patut tang bedau nerima bantu SKAS dilalau lengkas ngerejista diri ba Kaunsil Asil Dalam Negeri (LHDN) nengah sistem Caruman Tunai Mercy (STR) dikena nentuka data penerima nya betul.

Nitih ku iya, Perintah Sarawak udah nyendiaka agih belanja ke besai ungkup pengawa bejalaika SKAS, tang proses ngagih meseti digaga enggau terang sereta bepelasarka data rasmi.

“Mupuk muka akaun enggau LHDNM laban ari baruh STR, data beguna.Kitai deka ngumpul data enggau betul.

“Enti enda pia, kitai deka meda raban B40 nyau majak mimit tang kebendar mayuh bedau ngerejista diri,” ku iya.

Ku iya, sistem ngerejista nya beguna dikena nentuka pengawa ngatur bantu dipejalaika enggau manah sereta ulih diaudit.

“Kitai enda ulih sepeneka ati meri bantu enti nadai data laban baka ni kitai deka ngaudit nya ila?Tu pekara ‘governance’,” ku iya.

Dr Sim mega ngaku rayat diatu betapi enggau tekan ba ungkus pengidup berindik ari rega barang niki ke bela besangkut penyarut dunya.

“Rega pemakai pan udah niki.“Indah rega laksa pan udah niki,” ku iya seraya betundi. – RBI

#ruaiberitaiban#newsiban#beritaiban

Rindu | Titih | Kunsik

SIMANGGANG, 29 Mei – Kaban Parlimen Sri Aman Dato Sri Doris Sophia Brodie nyemetak madahka pengerami Gawai Dayak ukai semina kelai terima kasih pengudah musin ngetau tauka semina pengawa budaya aja, tang lebih agi kelai pengangkun ngagai pemisi, pesaka budaya enggau pemeri komuniti Dayak di Sarawak.

Nitihku iya, hari besai Hari Gawai kena 1 Jun ti udah digazet kenyau ari bulan September 1964, nyata ngayanka pengangkun ngagai komuniti Dayak di nengeri tu, kelimpah nyadi pelasar ti beguna dalam ngenegapka penyerakup ruang bilik, bansa enggau komuniti.

“Hari Gawai diatu ukai semina diintu nyadi tradisyen komuniti Dayak aja, tang mega nyadi pelasar nyerakupka rayat pupu bansa di Sarawak,” ku iya.

Iya madah munyi nya lebuh ngulu Pengerami Nganchau Tikai Gawai Dayak PRS N.32 Simanggang 2026 ke diatur ba sebuah hotel tebilang menua tu ti belq digulu laki iya, Dr. William Chua.

Dalam jaku ke sama, iya mega nerangka rambai jaku “Penyerakup Mai Pengelantang, Nuju Pemansang” chukup besai reti laban semengat beserakup enggau kerejasama nyadi pelasar penegap sesebuah parti enggau raban bansa, kelebih agi sebedau pengawa bepilih ti deka datai.

“Enti kitai beserakup, kitai tegap sereta tan, enti kitai bepechah, kitai deka rugi lalu punas,” ku iya.

Sama bisi bejaku ba atur pengawa nya iya nya Kaunsilor Sugom Sadai ke nyadi Chairman Pengatur.

Entara temuai ke bisi datai iya nya Sekretari Politik Premier Sarawak, Pandang Semat, Pengulu Biju enggau ex-Temenggong, Datu Samuel Lawen begulai enggau bini iya, Datin Annie Lai.-RBI

Doris Sophia Brodie

#ruaiberitaiban#newsiban#beritaiban

Rindu | Titih | Kunsika

KUCHING, 29 Mei — Menteri Penyerakup Menua, Datuk Aaron Ago Dagang meri Selamat Nyambut Pengerami Kaamatan ngagai selampur komuniti Kadazan, Dusun, Murut enggau Rungus (KDMR) di Sabah sereta rayat Malaysia ke sama ngintu pengerami nya.

Ku iya, pengerami Kaamatan ukai semina pengerami ngetau aja, tang nyadi kelai terima kasih, penegap komuniti enggau pesaka asal ti diturun ari setiap ari rayat Sabah.

Nitih ku iya, rambai jaku pengerami taun tu iya nya “Mongomot Pisompuruan, Mamaramai Piunungan”, mai pesan penyerakup enggau pengelantang ti setipak enggau semengat Malaysia Madani.

“Kaamatan ngajar kitai iya nya pengawa ngetau ukai semina bekaul enggau jereki ari tanah aja, tang mega ngetau pengerindu, pemereti ati enggau begulai entara rayat ti bebida bansa enggau jalai pengarap,” ku iya nengah pesan beserimbai enggau pengerami nya.

Ku Aaron, penyelai budaya ti dikembuan rayat Malaysia nyadi batang penegap menua lalu ukai pekara ti tau mambarka raban bansa.

Iya mega ngemeratka pangku pengawa nembiak rebak baru nyadi aris budaya enggau pengibun identiti bansa ngambika adat pesaka komuniti terus dijaga sereta dipebasa.

Ku iya, main asal ukai semina ulih dipandangka maya musin pengerami tauka disimpan ba muzium aja, tang meseti terus dikemeranka dalam pengidup besesehari lalu ditampung ngagai rebak dudi hari.

Iya mega ngansak raban nembiak ngena teknologi enggau pelasar moden meri kelala budaya menua tu ngagai tikas ke lebih luas ngambika pesaka asal bansa terus relevan dalam dunya moden.

“Bangsa ke tegap ukai semina ditempa nengah pemansang ekonomi enggau teknologi, tang mega nengah orang ke ngelala pun budaya diri, bebasaka penyelai sereta temegah ati enggau identiti bansa,” ku iya.

Iya nyimpul jaku pesan iya enggau jaku ti berambaika leka jaku “Kotobian Tadau Tagazo Do Kaamatan”. – RBI

Aaron Ago Dagang

#ruaiberitaiban#newsiban#beritaiban

Rindu | Titih | Kunsika

MIRI: Pejalai seiku orang tuai ke ngena mutosikal tembu enggau penusah ngenyit lebuh iya parai ba penusah bebadi ti ngaul perengka pengangkut mayuh guna (MPV) di Jematan Sepupok, Batu Niah, malam ensanus.

Penusah urung pukul 8.15 malam nya dipelabaka nyadi pengudah mutosikal ke ditepan mansa dilantak ari belakang ngujungka lelaki peranak menua nya ke beumur 62 taun tepelanting ke jalai lalu balat bakal.

Ketuai Polis Pelilih Menua Mohd Farhan Lee Abdullah madah, mansa udah disahka parai ba palan penusah ke nyadi ulih pemesai perubat ari Klinik Pengerai Batu Niah urung pukul 9.40 malam.

Ku iya, deriba kerita MPV ke bisi kaul taja pia nadai bakal.

Nitihku iya, pansik ke silik benung dipejalai nitihka Seksyen 41(1) Akta Pengangkutan Jalan 1987.

Mensia mayuh ke bisi penerang bekaul enggau penusah tu dipinta mantu mansik nengah chara betanya ngagai Pemesai Pemansik Trafik, Inspektor Mohd Faizal Moktar nengah lumur 012-8186509 tauka 085-430479, tauka mantaika diri ba sebarang balai polis ke besemak.

Berebak enggau nya, polis ngelalau penguna jalai alun ngambika seruran ngemeratka pengelikun sereta deriba enggau bejimat dikena ngurangka risiko penusah bebadi ti nabanka nyawa

BEKENU, 29 Mei — Sepenyampau 29 pintu rumah panjai di Rumah Nelson Ningkan, Jalai Sungai Saeh, Kampung Labau, Bekenu udah angus lengis ba penusah angus tumu pagi tadi.

Palan Operasyen Opis Bomba enggau Penyah Penusah Malaysia (JBPM) Sarawak nerima kangau ngenyit urung pukul 1.17 pagi sebedau tim ari Balai Bomba enggau Penyah Penusah (BBP) Batu Niah enggau bantu ari BBP Miri Sentral ngesah ngagai palan penusah nyadi.

Raban bomba datai ba endur nya urung pukul 1.40 pagi pengudah bejalai penyauh 23 kilometer.

Nitihka ripot operasyen, penusah angus nya mungkur semua struktur rumah panjai ke bisi 29 pintu lalu semua nya diripotka udah angus 100 peratus.

Ungkup operasyen madamka api, tim BBP Miri Sentral ngena dua tali hos pemanjai 300 kaki enggau pemanjai 800 kaki dikena nagang api ba mua rumah panjai nya.

Berebak enggau nya, tim BBP Batu Niah mega bisi bejalaika pengawa madamka api ngena dua batang hos ai pemanjai 600 kaki enggau 800 kaki ba belakang enggau tisi begunan dikena nyeliahka api ari nyerarai jauh agi.

Naka ripot ke dipansutka, raban bomba agi bejalaika pengawa dikena nentuka nadai agi pun penatai api ke tau ngepunka api baru.

Operasyen nya mungkur sepenyampau 11 iku raban bomba enggau pengering dua injin Tender Penyelamat Bomba (FRT) enggau sebuah Servis Penyelamat Perubat Ngenyit (EMRS).

Nadai penusah bebadi nyawa diripotka ba penusah nya naka ke diatu. -RBI

#ruaiberitaiban#newsiban#beritaiban

Rindu | Titih. | Kunsika