BELAGA, 5 Jun 2026 – Komuniti Kenyah Badeng dipinta terus beserakup, ngetanka pengelantang sereta meri sukung ke tegap ngagai agenda pemansang Perintah Sarawak ungkup pengelantang rayat enggau jemah ila rebak dudi hari.
Tesau nya dikenataika Kaban Kunsil Nengeri (ADUN) Murum, Kennedy Chukpai Ugon, nengah jaku ke dibacha pengari iya, Amai Pemanca Tony Kulleh ba Pengerami Nutup Ramai Biu’ Pengerami Kenyah Badeng Sarawak (KEBANA) 2026 di Dewan Mayuh guna Lepo’ Badeng Apau Koyan, BRS Sungai Asap, Belaga.
Ba jaku iya, Kennedy ngenataika pengaga ati ngagai Serakup Kenyah Badeng Sarawak (KEBANA), komiti pengatur, komuniti Lepo’ Badeng Apau Koyan enggau semua piak ti udah bebendar ngemujurka pengerami nya enggau chara richah sereta teratur.
Nitih ku iya, program baka Ramai Biu’ KEBANA ukai semina nyadi pelasar dikena ngerapitka kaul entara komuniti Kenyah Badeng, tang mega bejalaika tanggungpengawa ti beguna dalam nyaga identiti, adat, main asal enggau pesaka asal aki ini ngambika terus dikerinduka nembiak rebak baru.
Iya mega nyemetak madahka penyulut mensia mayuh enda ulih bepanggai ba pengawa ngintu budaya aja, tang lebih agi meseti disempulang enggau penyulut dalam bidang pelajar, ekonomi enggau pemansang mensia.
“Pelajar nyadi kunchi besai ngubah pengidup dudi hari ruang bilik enggau komuniti.Raban nembiak patut ngerebut semua peluang ke bisi disediaka perintah nyengkaum bantu pelajar, sekulasip enggau inisiatif Skim Pelajar Tinggi Perchuma (FTES),” ku iya.
Iya mega meransang rebak baru berani nyerungkai bidang ekonomi digital, teknologi enggau pengawa dagang setipak enggau juluk Sarawak nyadi ekonomi bepelasarka data enggau inovasyen.
Berebak enggau nya, Kennedy ngenataika pengaga ati iya ngagai Perintah Sarawak ari baruh pegai Premier Sarawak, ti seruran ngemeranka polisi pemansang inklusif enda ngira bansa enggau pelilih menua.
Ku iya, bemacham inisiatif pemansang ti dipejalaika nya ngayanka komitmen perintah nentuka komuniti menua pesisir mega ngasaika pengelantang pemansang nengah pengawa nyendiaka infrastruktur, perengka guna pelajar, bekal perengka guna, rentayan digital enggau peluang ekonomi ti manah agi.
Iya mega minta komuniti terus ngetanka ulah ti mulia baka bebasa, semengat bekerejasama enggau pangan diri, bebatak asur enggau pengerindu ti udah nyadi tiang penegap komuniti ngelama tu.
Berebak enggau nya, bemacham aktiviti diatur sepemanjai Ramai Biu’ KEBANA 2026 nyengkaum pengawa mandangka main asal, pekit lumba enggau main baka main bol enggau aktiviti komuniti ti nerima sambut ti chukup meransang ari komuniti Kenyah Badeng ari serata Sarawak.
Kenu ku Kennedy, penyereta ti meri peransang mandangka semengat begulai, beserakup enggau kerejasama ti tinggi entara komuniti Kenyah Badeng.
Iya ngarapka program baka tu deka terus diatur jemah ila nyadika pelasar dikena ngenegapka penyerakup komuniti, ngetanka pesaka asal sereta meri kelala penyelai budaya Kenyah Badeng ngagai rebak baru enggau komuniti luar.
Sama bisi datai iya nya Senator Abun Sui Anyit, Presiden KEBANA Hilary Samah Tet, Penghulu Katan, Chairman KEBANA Pampang Apau Koyan merambu Chairman Pengatur KEBANA Ramai Biu’ Dennis Nyurang, pengari Sarawak Energy Berhad Rom Kulleh, bala ketuai komuniti enggau komuniti Kenyah Badeng ari serata menua Sarawak. -RBI
