KUCHING, 26 Mei – Bagi Pemansik enggau Pemansang, Opis Kampung Sarawak (FDS) bekerejasama enggau Bagi Servis Pengatur mujur ngatur Kus Kompetensyen Anatomi dan Pengelala Kayu ti diatur pengelama tiga minggu berengkah ari 4 ngagai 22 Mei ba Dewan Pemansik enggau Pemansang Bagian FDS.

Kus nya dipejalaika Kaunsil Pemansang Industri Kayu Sarawak (STIDC) lalu digulu 15 iku pemesai FDS ari mayuh bengkah bidang nyengkaum pengawa neritka adat, pansik enggau ngatur kampung.

Program tu diatur dikena ngenegapka kompetensyen teknikal penyereta dalam bidang anatomi enggau pengelala kayu nengah gempung sesi teori, latih praktikal enggau penilaian ti ngaul 64 bansa kayu ti ditemu di Sarawak.

Sepemanjai kus nya, bala penyereta dikenataika enggau penemu sereta pengelandik praktikal dalam ngelala tukuh anatomi kayu sereta bejalaika proses pemun ngelala kayu dikena nyukung aspek penerit atur kampung, ngentaska kayu, ngatur kampung enggau meruan sereta aplikasyen bekaul enggau industri.

Bala penyereta mega diberi kelala ngena teknologi pemintar tiru (AI) nengah sistem kereban pengelala Wood AI-assisted ti dikemansang piak nya dikena mantu proses ngelala kayu dipejalaika enggau betul sereta efisyen agi dalam aplikasyen kampung.

Pengerami nutup kus nya dipenyadika Ketuai Bagi Pansik enggau Pemansang FDS, Paulus Anak Meleng, ti ngemeratka komitmen opis nya ngenegapka pengelandik teknikal enggau pemansang profesional ti seruran dipejalaika ba raban FDS.

Iya mega meri besai terima kasih ngagai STIDC ba kerejasama enggau sukung teknikal ke udah disedia dalam ngemujurka program nya, seraya ngarapka inisiatif baka nya ulih diteruska jemah ila dikena ngenegapka kapasiti institusyen sereta ngemansangka sektor kampung Sarawak. -RBI

#ruaiberitaiban#newsiban#beritaiban

Rindu | Titih | Kunsika

SELANGAU, 26 Mei – Karnival Nembiak Selangau 2026 deka ngempuruka raban nembiak nengah bemacham program pemansang diri, pelajar enggau pengelandik ti deka diatur ba Dewan Mayuh Guna Selangau berengkah ari pukul 7.30 pagi nyentuk 6 lemai kena 25 Julai tu ila.

Program ke diatur Serakup Intelektual Bansa Asal Sarawak (PERANTIS) enggau kerejasama Palan Servis DUN N.59 Tamin deka dipenyadika Kaban Kunsil Nengeri (ADUN) N.59 Tamin, Ir Christopher Gira Sambang.

Karnival tu ukai semina deka nyadi pelasar ngagai raban nembiak ngulihka penemu enggau pengelandik, tang mega meri peluang ngagai raban nembiak nyerungkai bidang baru ti ulih nyungkak potensial enggau pengidup sida jemah ila.

Entara batang aktiviti ke bisi disediaka nyengkaum pekit e-lumba PUBG enggau Mobile Legends 2026, Woksop Instrumen Pekara Wang nyengkaum pekit bedagang, kus kulinari enggau peluang nyereta program pelajar enda bebayar ari palan pelajar tinggi (IPTA) ke diempu Perintah Sarawak.

Bela deka diperambu iya nya aktiviti TVET baka Pemandang Dron, Pekit Dron ‘Berhalangan’, Pemandang simulasyen welding, Simulasyen sistem tali karan, Servis meresa sistem airkon entukar, Servis meresa sistem ECU entukar.

Kelimpah ari aktiviti pelajar enggau pengelandik, karnival nya mega dirichah enggau penatai khas penanyi tebilang Iban, Gwen, ti tebilang enggau lagu Sanggup Aku dikearapka nyadi pematak besai temuai kelebih agi raban nembiak.

Raban pengatur mega nesau raban nembiak Selangau ngambi awak nyereta program nya dikena nambahka penemu, pengelandik sereta ngenegapka kaul rama entara raban nembiak.

Karnival mai rambai jaku “Belia Berilmu, Belia Berdaya, Selangau Gemilang” setipak enggau pengawa deka ngenegapka nembiak rebak baru nuju pengidup ti lebih manah jemah ila. – RBI

#ruaiberitaiban#newsiban#beritaiban

Rindu | Titih | Kunsika

BETONG, 26 Mei — Projek ngemanahka jalai ladang di kandang menua TR. Kandang rumah panjai Ayak, Teberu, Spaoh diatu benung masuk renggat bejalaika pengawa lebuh sesi nyerahka palan projek nya udah diatur Opis Kereja Raya (JKR) Bagi Menua Betong begulai enggau pengari Palan Servis ADUN N.37 Bukit Saban, kena Hari Tiga tu tadi.

Nitihka penerang nengah Facebook Douglas Uggah Embas, projek nya dipejalaika ari baruh Ejensi Pemansang Bagi Menua Betong (BDDA) dikena ngemanahka perengka guna jalai ladang ungkup pemaik peranak menua nya.

Opis Kereja Raya Bagi Menua Betong nyadi ejensi bejalaika projek sereta mega meri penerang ngagai kunteriktor ti udah dipaduka bekaul enggau skop kereja sereta pengawa bejalaika projek nitihka spesifikasyen enggau timpuh ti udah ditetapka.

Pengawa bejalaika projek tu dikearap ulih meri empas positif ngagai komuniti di kandang menua Teberu, kelebih agi ba pengawa ngemanahka perengka guna komunikasyen, akses peranak enggau pengelantang ninting hari komuniti rumah panjai di kandang menua nya.

Pengawa perintah ti enda ngetu nengah projek pemansang infrastruktur menua pesisir mega mandangka komitmen ngenegapka rentayan perengka guna pemun ungkup pengelantang rayat di menua pesisir. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

BETONG, 26 Mei — Projek Ngangkatmanah Jalai Ladang di Sungai Pelandok, Spaoh udah berengkah dipejalaika enggau rasmi pengudah sesi nyerahka palan projek diatur ba rumah panjai TR. Manggat rumah panjai, kena Hari Empat tu tadi.

Nitihka penerang nengah Facebook Douglas Uggah Embas, sesi nya ngaul Opis Kereja Raya (JKR) Bagi Menua Betong begulai enggau pengari Palan Servis ADUN N.37 Bukit Saban.

Penerang nya madahka projek ari baruh Ejensi Pemansang Bagi Menua Betong (BDDA) benung dipejalaika enggau JKR Bagi Menua Betong ti nyadi ejensi bejalaika pengawa dikena nentuka projek nya bejalai enggau lanchar sereta nitihka spesifikasyen ti udah ditetapka.

“Bala kunteriktor ke dichiri mega diberi penerang bekaul enggau skop kereja sereta dikingatka dikena nentuka projek nya ulih ditembuka nitihka timpuh bejalaika pengawa ke udah ditetapka,” ku penerang nya.

Penerang nya nambah, pengawa bejalaika projek nya dikearapka ulih ngemanahka agi perengkaguna komunikasyen sereta meri pengelantang ngagai peranak menua nya, kelebih agi ba pengawa ninting hari enggau aktiviti betanam betupi.

Inisiatif pemansang infrastruktur menua pesisir mega dipeda seriris enggau komitmen perintah Sarawak ngenegapka rentayan jalai alun dikena nyungkak pengelantang pendiau rayat di menua pesisir. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

SARIKEI, 26 Mei – Pengawa mutarka isu Tanah Adat Bansa Asal (NCR) ukai pekara ke baru tauka bemusin tang udah lama dipejalaika enggau konsisten ulih perintah nengeri.

Sapit Menteri Perambu Mengeri, Pengatur Tanah enggau Rampa Menua Datuk Len Talif Salleh madah, perintah Sarawak komited nentuka pengawa nyukat enggau ngeluarka pala tanah NCR dipejalaika belama dikena nyaga pemerat rayat.

Ku iya, pengawa sekeda piak ti nguji mantaika isu nya dikena ngumbuk rayat enda patut laban perintah seruran ngiga jalai mutar ke pemadu manah.

“Perintah Sarawak majak ngenegapka pengawa mutarka isu tanah NCR pengudah urung 1.2 juta hektar tanah mujur disukat ari semak tiga juta hektar kandang endur ke udah dikelala naka ke diatu,” ku iya

Len madah munyi nya pengudah Pengerami Nyerahka Chek Pengatur Projek CSR ngagai Rukun Tetangga Kampung Warisan Susur kediatur ba Palan Pentadbiran Perintah Sarawak (IAC) Sarikei, kemari.

Nitih ku iya, RM40 juta diagih ninting taun dikena melanja kereja nyukat tanah nyengkaum ngenyampatka proses ngeluarka geran ngagai pengempu ti patut.

“Pengawa bejalaika program nyukat tanah dipejalaika nengah Seksyen 6 enggau Seksyen 18 Kanun Tanah Nengeri (KTN) dikena nentuka tetiap kandang menua diatur enggau teratur sereta diaku ari sukut undang-undang,” ku iya

Nitihku iya, siti ari batang pemar dalam kereja nyukat iya nya pemuntan pengempu tanah datai ba endur nya mantu nentuka garis entara kandang endur ke udah dipesetuju begulai.

Ku iya nambah, penatai peminta beguna amat dikena nentuka proses ngaga garis entara menua bejalai enggau lanchar sereta dikena nyeliahka penyarut nyadi jemah ila.

Berebak enggau nya, Len nerangka Perintah Sarawak mega benung ngenegapka kapasiti Opis Tanah enggau Survei Sarawak enggau penambah 367 iku pengereja pengawa baru dikena ngenyampat bejalaika pengawa nyukat di serata pelilih menua tu.- RBI

Sumber TVS

#ruaiberitaiban#newsiban#beritaiban

SIBU, 25 Mei – Perintah Gempung Parti Sarawak (GPS) ngemeratka pemansang pelajar, kelebih agi di menua pesisir dikena nentuka nembiak menua tu bulih akses ngagai pelajar ke bekualiti.

Kaban Kunsil Nengeri (ADUN) Daro, Dr Safiee Ahmad madahka, GPS seruran ngemeratka pelajar enggau pengelantang rayat mayuh.

“Kebendar, Premier Sarawak, Datuk Patinggi Tan Sri Abang Johari Tun Openg udah meri kelala bemacham inisiatif nyengkaum Bantu Wang Khas Pelajar Sarawak, subsidi pelajar tinggi enggau pelajar enda bebayar.

“Tu ngayanka Perintah GPS amat bebendar deka nentuka nadai siku nembiak Sarawak tinggal dalam arus pelajar laban bidang tu nyadi kunchi besai dalam nempa pengidup rayat jemah ila enggau pemansang nengeri tu,” ku iya.

Iya madah munyi nya lebuh bejadika Pengerami Mantar Gawai Dayak 2026 enggau Pengerami Ketuai Rayat Begulai Sungai Lengan ti nyadi ba Rumah Bunga, Sungai Lengan.

Ba pengerami nya, sepenyampau 25 buah Komiti Pemansang enggau Pengelikun Genturung Pendiau (JKKK) enggau tiga buah Gerempung Apai Indai enggau Pengajar (PIBG) di kandang menua Sungai Lengan enggau ngelingi nya nerima pemeri sepenyampau RM132,000 ditu.

Penerima pemeri nya nyengkaum semilan buah JKKK di Sungai Lengan, tujuh di Batang Lassa, empat di Sungai Serban enggau sebuah di Nanga Singat, Sungai Sebinjai, Sungai Mawan enggau Tanjung Keling.

Sama bisi nerima pemeri PIBG Sekolah Primari (SK) Sungai Lengan, SK Singat enggau SK Batang Lassa.

Bekaul pemansang ku Dr Safiee, pemansang di menua pesisir nyengkaum Daro, Matu enggau menua pesisir majak chakah dipejalaika nengah pengawa bejalaika bemacham projek infrastruktur, perengka guna asas enggau pemansang rama ti enda ngetu.

Sama bisi datai Kaban Parlimen Igan, Ahmad Johnnie Zawawi, pengari Pemesai Pelilih Sibu, ADO Cynthia Ong Hshiang Ping, Pengulu Denish Ansam, Pengulu Tanjung Keling, Kaunsilor N.43 Kaunsil Pelilih Sarikei (SRDC) enggau bala ketuai rumah ba kandang menua nya.- RBI

#ruaiberitaiban#newsiban#beritaiban

Rindu | Titih | Kunsika

KUCHING, 25 Mei – Opis Perengka Pengangkut Jalai Darat (JPJ) Sarawak chakah agi bejalaika pengawa matau enggau nginau ba kandang endur ti dikelala nyadi palan endur penusah aksiden suah nyadi di serata nengeri beserimbai enggau pengawa bejalaika Ops Hari Raya Aidiladha enggau Hari Gawai 2026.

Operasyen nya dipejalaika enggau ngemeratka pengawa ti mungkur matau maya siang enggau malam dikena nentuka tikas pengelikun penguna jalai alun seruran ba tikas pemadu manah kelimpah matau gaya trafik ba kandang endur berisiko tinggi.

Sepemanjai operasyen nya, raban penerit adat JPJ mega bejalaika pengawa meresa bemacham bansa perengka pengangkut nyengkaum perengka pengangkut komersial, perengka pengangkut servis mensia mayuh enggau perengka pengangkut peribit.

Pengawa meresa nya mungkur aspek dokumentasyen, spesifikasyen teknikal enggau tikas pengelikun perengka pengangkut dikena nentuka semua perengka pengangkut ba jalai alun nitihka atur ke udah ditetapka.

JPJ Sarawak madahka pengawa neritka atur deka dipejalaika ngagai sebarang piak ti ditemu ngereja penyalah ari baruh penetap undang-undang jalai alun ti benung dikena.

Berebak enggau nya, mensia mayuh kelebih agi penguna jalai alun dilalau ngambika seruran ngasika atur jalai alun, deriba enggau bejimat sereta bebatak asur ketegal pengelikun pangan diri.

Penguna jalai alun mega diingat nentuka perengka pengangkut sida dalam gaya ti likun sereta menyana sebedau berengkah bejalai, kelebih agi maya musin pengerami ti meda penambah penyampau trafik ba jalai alun. – RBI

#ruaiberitaiban#newsiban#beritaiban

Rindu | Titih | Kunsika

LUBOK ANTU, 25 Mei — Kaunsil Pansang Pekebun Mit Industri Getah (RISDA) tetap komited ngenegapka pemansang ekonomi enggau ngangkatka tikas pengidup lebih 25,000 iku pekebun mit di serata Sarawak nengah mayuh bengkah program pemansang komuniti menua pesisir.

Chairman RISDA, Manndzri Nasib madah, pangku pengawa ejensi nya ukai agi semina fokus ngagai sektor nanam getah aja, tang udah dikerembaika nengah pengawa bejalaika mayuh macham inisiatif bantu, iring enggau program pemansang sosio-ekonomi ke lebih komprehensif.

Nitih ku iya, individu ke ngembuan taja pan semina satu ekar kebun getah agi layak ngerejista diri nyadi pekebun mit RISDA lalu udah nya ngasaika pengelantang ke disediaka ejensi nya.

“RISDA seruran muka ruang enggau peluang ngagai pekebun mit ngangkatka tikas pengidup sida nengah program dagang, pemansang ekonomi enggau peluang pelajar dikena nentuka kuing pengidup dudi hari,” ku iya.

Iya madah munyi nya lebuh bejadi Program Pengelantang Pekebun Mit (PKPK) RISDA Renggat Nengeri Sarawak 2026 ti nyadi ba Rumah Panjai Budit sehari tu tadi.

Berebak enggau nya, iya mega madahka RISDA nyendiaka peluang pelajar nengah Kolej Universiti Agrosains Malaysia dikena ngemuntangka bala anak pekebun mit nampung pelajar tinggi lalu enggau nya mantu ngangkatka tikas pengidup sida sebilik.

Pengerami nya mega dirintai enggau pengawa nyuaka bakul pemakai ngagai pengari rumah panjai ngelingi Lubok Antu ke nyadi sebagi ari pengawa ngintu pengelantang enggau sukung RISDA ti seruran dipejalaika ungkup komuniti menua pesisir.

Sama bisi ngulu pengerami nya Kaban Parlimen Lubok Antu Roy Angau Gingkoi, Direktor RISDA Nengeri Sarawak Shaharuddin Saberi enggau Pemesai Pelilih Lubok Antu Akoi Ejau.

Kredit Gambar — BKK RISDA

KUCHING, 25 Mei – Menteri Pemansang Orang Indu, Ruang Bilik enggau Komuniti, Datuk Nancy Shukri nyemetak madahka pengawa berambunka nyawa siku indai enda patut diterima semina maya ngintu Hari Indai aja, tang lebih agi patut dibantaika ninting hari nengah penyayau, pengibuh enggau basa ti enda ngetu.

Nitih ku iya, di belakang tuchum siku indai bisi bemacham pengawa ke suah enda dipeda, nyengkaum berambunka nyawa, penguat runding enggau mimpi iya empu nentuka bala anak mansang besai dalam gaya ke penuh enggau pengerindu sereta pengibuh.

“Lebuh kitai betapi enggau penusah, indai seruran nyadi palan endur kitai pulai ngiga pengering enggau pengelantang. Nya alai, pengangkun ngagai indai ukai semina dibantaika maya Hari Indai aja,” ku iya.

Iya madah munyi nya lebuh ngulu Pengerami Ngintu Hari Indai Renggat Nengeri Sarawak 2026 ke diatur ba Pustaka Negeri Sarawak, pagi tadi.

Ku iya nambah, mensia mayuh diperansang ngambi awak betanyaka pengelantang pendiau sida, mendingka cherita sida sereta mantu ngelempungka tating pengidup siku indai laban perati ke mit ulih meri reti ke besai ngagai pengidup sida.

“Kekadang, perati ke mit nya utai ke pemadu mai reti ngagai siku indai,” ku iya nambah.

Berebak enggau nya, Nancy mega meri besai terima kasih ngagai semua indai di serata menua ketegal semua sampi, pengawa enggau pengerindu ti nadai bebagi ti dituang ungkup pengelantang ruang bilik.

Iya mega besampi ngambika semua indai seruran diberekat enggau pengerai, pengelantang enggau berekat dalam pengidup. -RBI

#ruaiberitaiban#newsiban#beritaiban

Rindu | Titih | Kunsika

MERADONG, 25 Mei — Indu Opis Polis Pelilih (IPD) Meradong majak chakah agi bejalaika pengawa nagang penyalah nengah pengawa bejalaika Operasyen Nagang Penyalah Begulai ba sekeda kandang endur ‘angat’ ngelingi pelilih menua nya.

Operasyen nya betuaika Insp Norfadilah Zainal begulai enggau SI Jivson anak Rockson Chin Chang.

Entara kandang endur ke diberi peratiba operasyen iya nya Jalai Kelupu, Jalai KJD, Jalai Bakong, Jalai Kilang, Taman Bintang, Taman Alomara sereta mega jalai tama ke Bintangor.

Operasyen nya mungkur pengawa matau nagang penyalah, meresa enggau jampat sereta Sekat Jalai (SJR) dikena nyidi sebarang aktiviti jenayah kelimpah ari nambahka pengawa polis ba palan mensia mayuh.

Sepemanjai operasyen nya, sepenyampau 76 iku individu enggau 72 buah entukar diperesa.

Polis mega bisi ngeluarka lima iti saman trafik ketegal mayuh macham penyalah jalai alun.

Nitihka penerang ari polis, operasyen begulai nya ngembuan tuju dikena ngelaban pengawa salah, nyidi individu ke digiga sereta nentuka tikas pengelikun enggau pengelantang mensia mayuh di pelilih Meradong seruran dijaga.

Nadai kes ditangkap tauka dirampas dirikodka maya operasyen nya. – RBI

#ruaiberitaiban#newsiban#beritaiban

Rindu | Titih | Kunsika