BETONG, 12 Jun — Palan Servis Rayat Parlimen P.204 Betong udah nyuaka chek Program Transformasyen Menua Pesisir (MRP) ngagai sekeda gerempung enggau gerempung ukai dikuasa perintah (NGO) ba Pengerami Nyuaka Chek MRP ke diatur ba Palan Servis Rayat Parlimen P.204 Betong tu, lemai tu tadi.
Pengawa ngagihka agih belanja tu nyadi sebagi ari pengawa Parlimen ti seruran dipejalaika dikena ngenegapka agi pangku pengawa NGO enggau gerempung nyadi kaban strategik perintah dalam bejalaika mayuh macham program komuniti ti mungkur sukut pengelantang pendiau, pelajar, lumba enggau main, budaya enggau pemansang komuniti lokal.
Kaban Parlimen Betong, Dato Dr Richard Rapu nyemetak madah, inisiatif MRP tu mandangka komitmen perintah ti seruran dipejalaika dikena nentuka gerempung renggat baruh terus diberi kuasa bejalaika program ti meri penguntung terus ngagai komuniti.
“Pengawa ngagihka agih belanja tu kelai sukung terus ngagai pangku pengawa serakup enggau NGO nyadi kaban strategik dalam mantu perintah bejalaika mayuh macham program pemansang komuniti, pengelantang pendiau, pelajar, lumba enggau main, main asal enggau komuniti,” ku iya.
Ku iya nambah, agih belanja ke disalur nya dikearap ulih dikena enggau optimum ulih semua penerima dikena ngenegapka pengawa bejalaika aktiviti ke meri empas positif sereta meri pangka ngagai pemansang ke lebih meruan sereta inklusif ba sitak Parlimen P.204 Betong.
Iya mega meri besai terima kasih ngagai semua serakup enggau NGO ti terus komited meri servis dalam nyukung agenda pemansang enggau pengelantang komuniti setempat. — RBI
#Beritalban | Ruai Berita Iban
Rinduka | Titihka | Kunsika
