SIBU, 13 Jun — Komitmen ti semampai ngenegapka sektor pelajar disalin ngagai pengawa nyuaka pemeri sepenyampau RM45,000 ari Kaban Kunsil Nengeri (ADUN) ungkup sitak N.59 Tamin, YB Ir. Christopher Gira Anak Sambang ngagai sekeda palan pelajar beserimbai enggau Pengerami Ngiling Tikai Opis Pelajar Pelilih Menua (PPD) Selangau ti diatur ba Hotel Kingwood, ditu, sehari tu.
Pengerami ke ngempuruka urung 830 iku apai indai, kepala pengajar, pengajar, staf pelajar enggau temuai ke dikangau ari serata Pelilih Selangau nya diatur nyadi pengerami nutup pengerami Gawai Dayak 2026 ungkup pengerami pelasar pelajar pelilih menua nya dikena ngenegapka baru komuniti pelajar, semengat begulai entara kaban komuniti pelajar enggau ketuai komuniti.
Datai nyadi temuai dipebasa, Christopher Gira ba jaku iya nyemetak madahka pelajar nyadi pelasar ke beguna dalam pemansang komuniti sereta puku ke pemadu manah dikena nyamin pengidup rayat jemah ila enggau penyulut nengeri.
Ba pengawa nya, iya nyuaka pemeri RM30,000 ngagai Gerempung Pelajar Pelilih Selangau, RM10,000 ngagai Gerempung Apai Indai enggau Pengajar (PIBG) SMK Julau enggau RM5,000 ngagai PIBG SK Dijih Selangau dikena nyukung pengawa bejalaika mayuh bengkah program pemansang akademik, kokurikulum nembiak.
Iya ngarapka pemeri nya ulih dikena enggau naka pemanah dalam pengawa ngangkatka pemanah pelajar, kelebih agi di menua pesisir.
Nitih ku iya, Perintah Sarawak seruran ngemeratka sektor pelajar laban nya kunchi besai dalam ngangkatka tikas pengidup rayat sereta ngadaka rebak ti bepenemu, bepengelandik sereta kompetitif.
“Perintah Sarawak seruran ngemeratka sektor pelajar laban kitai pechaya pelajar nyadi kunchi besai dikena ngangkatka tikas pengidup rayat.
“Nengah pelajar, kitai ulih ngadaka rebak ti bepenemu, bepengelandik sereta besemekih ngemansangka Sarawak enggau Malaysia,” ku iya.
Iya mega mantaika pengandal ngagai Selangau bisi penau nyadi palan pelajar ke beguna di tengah Sarawak setipak enggau pengawa bejalaika mayuh bengkah projek pemansang pelajar, nyengkaum ngaga SMK Selangau Baharu ke beungkus RM81 juta enggau Opis Pelajar Pelilih Selangau Baharu ke beungkus RM35 juta.
Ba pengerami ke sama, iya meri pengaga ati ngagai SMK Ulu Balingian ke nyulut ba peresa Sijil Pelajaran Malaysia (SPM) 2025 ke alai sekula nya ngerikodka 99.01 peratus chalun ke layak nerima setipikit nya enggau Gred Purata Sekolah (GPS) 4.13.
Pemujur ti ngemegahka nya mega mandangka dua iku nembiak bulih semua pemutus peresa A, siku teulihka 9A seraya 21 iku nembiak mujur teulihka pemutus peresa 5A ke atas. Kelimpah ari nya, 11 ari 15 subjek ke bisi diberi ngerikod tikas pas 100 peratus.
Christopher Gira madahka pemujur nya nyadika bukti sekula menua pesisir bisi penau nyapai penyulut sebaka enggau sekula bukai enti nerima sukung enggau komitmen ti tegap ari bala pengajar, apai indai enggau komuniti.
Pengerami nya diatur dalam gaya pemanah ati enggau penyerakup, lalu enggau nya mandangka komitmen begulai semua pengereja pengawa pelajar ngambika terus ngangkatka kualiti pelajar sereta ngadaka modal mensia ti bekualiti ungkup penyulut Selangau, Sarawak enggau menua tu.
Sama bisi datai Pemesai Opis Pelajar Pelilih Menua Selangau, Encik Ringgit @ Gawan anak Saut; Pemesai Opis Pelajar Pelilih Julau, Encik Dali; Kepala Pengajar SMK Ulu Balingian, Encik Echi, pia mega bala prinsipal, kepala pengajar, pemesai pelajar enggau pengari sekula ari baruh PPD Selangau. — RBI
#Beritalban | Ruai Berita Iban
Rinduka | Titihka | Kunsika
