BETONG, 12 Jun — Kaunsil Pelilih Betong (MDB) majak ngenegapka pangku pengawa sida nyadi raban bekuasa kandang menua (PBT) ti progresif sereta responsif dalam nentuka agenda pemansang kandang menua, meri servis mensia mayuh enggau pengelantang komuniti ulih dipejalaika enggau efektif.

Nitihku Kaban Parlimen Betong, Dato Dr Richard Rapu, Aum Penuh Kaunsil Pelilih Betong Bil 2/2026 ti diatur ba Bilik Aum Heliconia, Opis Kaunsil Pelilih Betong nyadi pelasar beguna endur berandauka mayuh macham agenda bekaul enggau pemansang kandang menua sereta pengawa ngangkatka kualiti servis ngagai rayat.

Ku iya, tetiap iku kaban kaunsil ke dilempaika tanggungpengawa nya ukai semina megai tanggungpengawa nentuka servis ngagai rayat dipejalaika enggau efisyen sereta efektif, tang mega nyadi sada nyawa komuniti dalam mantaika isu, guna enggau aspirasyen komuniti ungkup perati enggau pengawa piak ke bekaul.

“Komitmen, integriti enggau semengat kereja beraban ke tinggi beguna amat dalam nentuka Kaunsil Pelilih Betong terus ngenegapka penyulut iya nyadi sebuah PBT ke progresif, responsif sereta seruran ngemeratka pemerat rayat,” ku iya nengah penerang ba Facebook sehari tu.

Dato Dr Richard ke nyadi chairman aum nya madah, pengawa ti enda ngetu dikena ngenegapka atur merintah enggau ngangkatka pemanah pengawa meri servis nyadi faktor ke berat dalam ngamatka pengingin deka nempa Kaunsil Pelilih Betong entara PBT ke pemadu manah di Sarawak.

Ku iya nambah, juluk tu setipak enggau aspirasyen pemansang ti meruan sereta inklusif, lalu enggau nya nentuka penguntung ari pemansang ulih diasaika enggau komprehensif komuniti di kandang menua Betong. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

SIBU, 12 Jun — Raban pelajar Pelilih Sibu sekali agi ngemegahka pelilih tu lebuh sida mujur ngerikod sekeda pemujur ke nyulut dalam Karnival STEM Renggat Nengeri Sarawak 2026.

Nitihka penerang ti dipansutka Opis Pelajar Pelilih (PPD) Sibu, pemujur ke dijapai nya nyadika bukti nembiak ari pelilih tu majak nyulut dalam bidang Sains, Teknologi, Kejuruteraan enggau Matematik (STEM) nengah kreativiti, inovasyen, runding ti kritikal sereta semengat kereja beraban ti tinggi.

“PPD Sibu ngenataika tabi puji enggau pengaga ati ti pemadu tinggi ngagai semua nembiak, penyanding pengajar, sekula enggau apai indai ketegal penyulut sida ba Karnival STEM Renggat Nengeri Sarawak 2026,” ku penerang nya.

Entara pemujur ke pemadu manah dirikod iya nya pemujur SMK Sacred Heart mansutka diri nyadi champion ba kategori Sekula Sekondari GAMI-CODE.

Sekula tu mega bulih lumur tiga ba kategori Sekula Sekondari ba ‘Bridge Building Competition’

Kelimpah ari nya, SJK (C) Guong Ming mujur nyadi lumur dua ungkup kategori Sekolah Rendah Inovators of Tomorrow Challenge, lalu SMK Bukit Lima teulihka penuduk lumur tiga ba kategori Sekolah Menengah Water Rocket Challenge.

Ungkup kategori lumur empat, SJK (C) Thai Kwang bulih penuduk lumur empat ba Pekit STEM Talent Show Sekolah Rendah, lalu SMK Lanang teulihka penuduk ke sama ba Robot Battle Challenge Sekolah Menengah.

Berebak enggau nya, SK Nanga Tutus ba penuduk lumur lima ba kategori Drone Challenge Sekolah Rendah, lalu SJK (C) Tung Hua ba penuduk lumur lima ba kategori Robot Battle Challenge Sekolah Rendah.

PPD Sibu madah, sida amat temegah ati enggau pengawa bebendar ti dipandangka semua pesereta ti udah mai nama pelilih menua nya ngagai renggat nasional.

“Ngarapka pemujur tu nyadi pemangkin ngagai mayuh agi inovasyen enggau penyulut STEM ba raban nembiak Sibu jemah ila,” ku penerang nya nambah.

Pemujur nya mega mandangka komitmen ti terus dipejalaika staf pelajar Pelilih Sibu dalam ngenegapka pelajar STEM sereta ngadaka rebak ti kompetitif sereta inovatif setipak enggau guna jemah ila. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

Photo — PPD Sibu

MACHAN, 12 Jun — Staf ari Palan Servis Parti Pesaka Bumiputera Bersatu (PBB), Pampang Machan, begulai enggau pemesai ari Opis Parit enggau Entali Ai (DID) bejalaika pengawa nemuai sereta meresa palan dikena beratika perambu enggau pejalai sekeda projek ari baruh Program Transformasyen Menua Pesisir (RTP) 2027 sitak Machan.

Entara endur ke dilawa iya nya Rumah Joseph James ungkup perambu ngaga jalai semin nuju rumah individu, kandang endur Jagoi ke ngaul perambu ngaga ‘reinforced concrete’ (RC) ramp baru, enggau Rumah Hendry Ajol meresa kepenudi projek ngaga parit semin ke udah tembu.

Penemuai nya ngembuan tuju deka nentuka tetiap perambu enggau pengawa bejalaika projek nitihka spesifikasyen enggau peminta teknikal ti udah ditetapka, seraya mega nentuka penguntung nya ulih diasaika peranak menua nya.

Kerejasama rat entara ejensi ti bejalaika pengawa enggau Palan Servis PBB Pampang Machan beguna amat dalam nentuka projek pemansang infrastruktur ba kandang DUN Machan ulih dipejalai enggau chara ti diperambu, ngasi sereta ulih nangkup guna rayat.

Pengawa ti seruran dipejalaika tu ngayanka komitmen semua piak dalam ngenegapka perengka guna asas enggau ngangkatka pengelantang komuniti nengah pengawa bejalaika projek pemansang ti meruan sereta meri empas tinggi ungkup penyulut kandang menua Machan. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

Photo — PBB N.50 Machan

KUCHING, 12 Jun — Langkah rapat politik ti kelalu bepelasarka bansa pedis bulih sukung penuh di Sarawak laban ulih meri pengirau ngagai komuniti bukai.

Tuai Pemadah Parti Pesaka Bumiputera Bersatu (PBB), Dato Sri Abdul Karim Rahman Hamzah madahka, bepelasarka peneleba politik ba nengeri tu, sebarang raban ti kelalu ngemeratka sentimen bansa suah enda mujur bulih sukung ari rayat mayuh.

“Sebarang raban ti kelalu lebih ngagai politik bepelasarka bansa enda ulih mujur laban langkah rapat nya deka meri asai nangi ngagai etnik bukai.

“Langkah rapat pemadu manah, iya nya penyemela ngaul semua raban bansa baka Melayu, Melanau, Dayak enggau China. Taja kita iya nya parti Bumiputera, pribumi baka PBB, iringtuai patut meda senentang Sarawak ukai semina diempu siti bansa aja, baka Melayu enggau Dayak. Kitai mega patut nyaga pemesai guna komuniti China,” ku iya madah.

Iya mansutka jaku nya rambau aum media pengudah Aum Kaunsil Pesaka Asal Sarawak kemari.

Abdul Karim nerangka, taja pan kitai bisi pengulih deka numbuhka perintah kediri, PBB tetap milih deka bekerejasama enggau parti bukai, nyengkaum parti China baka Parti Sa’ati Rayat Sarawak (SUPP) laban Sarawak bela diempu semua bansa.

Kelimpah ari nya, iya nerangka Gabungan Parti Sarawak (GPS) seruran nyikap diri napi Pengawa Bepilih Nengeri (PRN) ba sebarang Maya, ti nadai nyadika pengawa bepilih besai nyadi fokus besai administrasyen perintah nengeri.

Tandu iya, pekara ti dikemeratka GPS kenyau PRN suba iya nya bejalaika tanggungpengawa ti udah diberi rayat sereta neruska agenda pemansang nengeri.

Kredit Berita — TVS Berita Iban

Kredit Photo — FB YB Karim Hamzah

MACHAN, 12 Jun — Palan Servis Kaban Kunsil Nengeri (ADUN) Machan sehari tu udah ngenataika Bantu Pemidang ngagai sida sebilik niang Barnabas Ak Andrian yang ke diau ba Rumah Panjai Dennis, Kilometer 4, Jalai Kanowit-Durin, enggau sida niang Tawan Anak Ambau ba Jalai Bukong,Jagoi sehari tu tadi.

Pengawa nyuaka bantu nya diarika diri sebilik ke semak kelai pengibuh enggau sukung ngagai sida sebilik ke benung napi penusah ketegal lenyau orang ti dikesayau.

Bantu ke diagih nya sebagi ari pengawa Palan Servis ADUN Machan ti seruran dipejalaika dikena nentuka pengelantang pendiau rayat seruran diberi perati, kelebih agi ba pengawa mantu ngelempungka tating ruang bilik ke udah ditinggal.

Kelimpah ari nyadi bantu pengelantang pendiau, pemeri nya mega mandangka semengat begulai enggau solidariti ngagai komuniti ti begunaka bantu, setipak enggau komitmen terus nyapai sereta meretika guna rayat di kandang menua Machan.

Palan Servis ADUN Machan mega ngenataika penyinu ati ngagai semua kaban belayan dua iku niang lalu ngarapka seduai iya diberekat enggau pengering sereta pengering napi penusah tu.

“Ngarapka bantu ke diberi tu ulih ngelempungka mimit tating penusah ke ditanggung sida sebilik sereta nyadi kelai pengingat enggau pengibuh ari Palan Servis ADUN Machan nuju komuniti ke benung betapi penusah,” ku penerang ari Palan Servis ADUN Machan. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

Photo — PBB N.50 Machan

PENAMPANG, 12 Jun — Siku lelaki peranak menua tu beumur 34 taun ditemu lesi semak lobi sebuah kondominium di pelilih Penampang pengudah iya dipechayaka labuh ari unit endur diau ba ringkat 26 begunan nya.

Ketuai Polis Pelilih Penampang, Superintenden Sammy Newton, nengah siti penerang kemari madahka, Indu Opis Polis Pelilih (IPD) Penampang nerima ripot bekaul enggau penusah nya kena Hari Empat tu tadi.

Nitihku iya, pansik tumu tetemuka mansa dipelabaka labuh ari unit endur diau sebedau ditemu lesi semak lobi kondominium nya.

“Peresa ba palan penusah udah dipejalaika Bagi Siasatan Jenayah, IPD Penampang begulai enggau Tim Forensik D10, Indu Opis Kontinjen Polis (IPK) Sabah lalu tetemuka nadai elemen jenayah ditemu ke ulih dikaitka enggau penusah tu,” ku iya.

Ku iya, tubuh mansa udah dianjung ngagai Opis Perubat Forensik, Sepital Queen Elizabeth I, Kota Kinabalu ngambika diperesa, dikena nentuka kebuah pemidang ke bendar.

Nitih ku iya, kes nya udah diklasifikasyen nyadi Ripot Pemati Ngenyit (SDR) nganti pemutus buntas tasat enggau pansik ke silik agi.

Superintenden Sammy mega ngelalau mensia mayuh anang ngaga sebarang spekulasyen ti tau ngachau pansik polis.

“Mensia mayuh mega dipinta ngetu ngerembaika gambar tauka video penusah nya dikena bebasa sereta nyaga sensitiviti sida sebilik enggau kaban belayan mansa,” ku iya.

Ku iya, sebarang penerang bekaul enggau penusah nya tau dikenataika ngagai pemesai pansik kes, Sarjan Mejar Patrick Duffy Francis ba lumur 013-838 5335 tauka betanya ngagai IPD Penampang nengah lumur 088-712222. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

SRI AMAN, 12 Jun — Raban Penyaga Pengelikun Mensia Mayuh Malaysia (APM) Pelilih Sri Aman mujur nangkap siku ular sawa batik urung lima kaki pemanjai ke ditemu ba kandang manuk di Kampung Tengah, ditu, sehari tu tadi.

Nitihka penerang ari APM Sri Aman, sida bisi nerima kangau ari siku peranak genturung pendiau bekaul enggau penatai jelu reptilia nya ti dipelabaka tama ngagai kandang manuk iya.

Tekala nya pengudah nerima penerang nya, seraban raban APM Sri Aman udah dianjung ngelawa endur penusah nyadi ngambika bejalaika operasyen nangkap ular sawa nya.

Asil peresa tetemuka siku ular sawa batik bisi dalam kandang nya.

Operasyen nangkap reptilia nya mujur dipejalaika ngena teknik nyintak, sebedau ular nya mujur ditangkap enggau likun nadai ngaul sebarang penusah ke enda dikedeka nyadi.

APM Sri Aman ba penerang nya mega ngelalau mensia mayuh ngambika seruran bejejaga lalu anang ngambi atur kediri empu nyema betapi enggau jelu bisa tauka jelu siga ke bisi potensial tau ngeruga pengelikun.

Mensia mayuh dilalau lengkas betanya ngagai talipaun penusah ngenyit tauka piak bekaul ngambika atur ke patut ulih dipejalaika enggau lengkas.

Pengawa ti jampat raban APM Sri Aman betapi enggau penusah nya sekali agi ngayanka penyikap ejensi nya dalam nentuka pengelikun genturung pendiau seruran dijaga. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

LAWAS, 12 Jun – Projek Ngaga Tambah Empat Unit Rumah Pengajar enggau perengka guna ke bekaul di SK Long Luping, Lawas udah ngerikod penyulut ke meransang lebuh iya udah manggai 80.87 peratus penyulut fizikal, lalu enggau nya 22.87 peratus dulu ari timpuh ke udah ditetapka.

Pemujur nya entara batang fokus penemuai kereja Direktor Kereja Raya Sarawak, Datu Dr.Cassidy anak Morris, ti neruska pengawa iya meresa palan projek dikena beratika pemansang ke diatu sereta nentuka pengawa bejalaika iya bejalai enggau lanchar.

Penyulut ke dijapai nya ngayanka komitmen tinggi enggau kerejasama rat semua piak ke bisi kaul dalam nentuka projek ulih ditembuka tumu agi ari pelin asal enggau nadai ngeruga sukut kualiti, pengelikun enggau spesifikasyen ke udah ditetapka.

Projek tu mungkur pengawa ngaga tambah empat unit rumah pengajar begulai enggau perengka guna ke bekaul ti ngembuan juluk deka ngangkatka pengelantang, pengelikun enggau perengka guna endur diau raban pengajar di menua pesisir.

Pengawa nyendiaka perengka guna endur diau ti lebih nyamai sereta kondusif dikearapka ulih mantu narit sereta ngetanka staf pengajar di menua pesisir, lalu enggau nya nyukung pengawa ngenegapka pengawa ngenataika pelajar ti bekualiti ngagai komuniti lokal.

Penemuai nya mega meri awak ngagai Direktor Kereja Raya Sarawak beratika diri empu status pengawa bejalaika projek sereta nentuka tetiap komponen pemansang dipejalaika nitihka standard ti udah ditetapka dikena nangkup guna peranak menua nya. – RBI

#ruaiberitaiban#newsiban#beritaiban

Rindu | Titih | Kunsika

SARIKEI, 12 Jun – Balai Bomba enggau Penyah Penusah (BBP) Sarikei udah ngatur Pengerami Ramah Tamah Raya, Pengerami Ngiling Tikai enggau Lambaian Kasih Sanjungan Budi nengah kerejasama Raban Bomba Volunteer (PBS) Lubok Lemba ba BBP Sarikei malam tadi.

Program ti berengkah pukul 7.00 lemai nya ngembuan tuju deka ngempuruka Opis Bomba Sarikei beserimbai enggau pengerami nya, kelimpah ari meri besai terima kasih ngagai jasa enggau pengawa kaban ti udah meri servis ngagai opis nya.

Pengerami nya mega ngerami PBK II (TBK I) Wan Hamzah bin Wan Malek ti deka pinchin enggau pemindah PBK II (TBK I) Jaffariza bin Ismail, kelai meri terima kasih ngagai servis enggau dedikasyen sida sepemanjai gawa enggau BBP Sarikei.

Nyadi simbolik nutup pengerami Hari Gawai 2026, pengerami Ngiling Tikai diatur pengudah pengawa pemerindang Ngajat ti dibantaika kaban PBS Lubok Lemba, enggau nya ngerichahka agi gaya pengerami enggau isi budaya komuniti Dayak.

Pengerami nya udah dipenyadi Ketuai Stesyen BBP Bagi Menua Sarikei, PPgB Vincent Baling Yabi. Sama bisi datai iya nya Ketuai Stesyen BBP Bintangor, PPgB Mahmudin Naruddin, Pemesai Operasyen Stesyen, Chairman PBS Lubok Lemba enggau bala raban.

Ngatur program baka tu ukai semina ngenegapka kaul pangan diri entara raban bomba enggau diri sebilik, tang mega nyadi pelasar dikena meri terima kasih ngagai pemeri bala kaban sereta nerenakka semengat beserakup enggau begulai dalam komuniti. – RBI

#ruaiberitaiban#newsiban#beritaiban

Rindu | Titih | Kunsika

LAWAS, 12 Jun – Sarawak nempa siti agi sejarah beguna ba pemansang infrastruktur lebuh pengawa ngaga terowong keterubah di nengeri tu diatu benung dipejalai di Bukit Pagon, Lawas.

Projek ti meri empas tinggi nya nerima perati lebuh Direktor Kereja Raya Sarawak, Datu Dr. Cassidy anak Morris, bejalaika penemuai kereja ngagai palan endur ngaga projek nya dikena beratika diri empu pejalai projek ke diatu, ti dianggap nyadi kelai baru dalam pemansang injiniring enggau jalai alun Sarawak.

Terowong nya nyadi komponen besai ari baruh Pakej 4 Projek Jalai Penyambung Sarawak-Sabah (SSLR) Fasa 2, projek strategik ti dipejalaika ari baruh Opis Menteri Kereja Raya Malaysia.

Penatai terowong keterubah di Sarawak ukai semina mandangka pemansang teknologi enggau penau injinir ti majak nambah di nengeri tu, tang mega kelai transformasyen infrastruktur ti deka ngubah landskap perengka pengangkut di utara Sarawak.

Pengudah tembu ila, projek SSLR Fasa 2 dikearapka ulih ngenegapka rentayan sambung darat entara Sarawak enggau Sabah, seraya mega muka akses ti lebih efisyen, likun sereta jampat ngagai genturung pendiau di kandang menua ulu.

Semua iya, SSLR Fasa 2 ngaul pengawa ngaga 335.54 kilometer jalai alun lalu naka ke diatu udah nyapai penyulut fizikal 11.39 peratus.

Pengawa ngaga terowong keterubah Sarawak dipeda nyadi siti singkang ke besejarah ke nyadi kelai nengeri tu nyingkang ngagai jeman baru pemansang infrastruktur moden, lalu enggau nya ulih ngenegapka agenda pemansang pelilih menua sereta nambahka penyambung ungkup pemaik rayat. – RBI

#ruaiberitaiban#newsiban#beritaiban

Rindu | Titih | Kunsika