KUALA LUMPUR, 15 Jun – Gerempung Main Bol Malaysia (FAM) bebendar nyangkal tuduh ti udah viral nengah portal berita ti madahka piak pengatur main bol menua udah mansutka jaku tangkan ngagai Sarawak bekaul enggau penuduk liga nengeri dalam struktur piramid main bol menua.

Dalam penerang rasmi ti dipansutka sehari tu, FAM nyemetak madahka sida nadai kala mansutka sebarang atur, penerang rasmi tauka jaku tangkan baka ti dituduh dalam ripot nya.

Nitihka penerang ari FAM, raban pengatur mega nadai ngaul diri ngasil, ngemendar tauka meri sebarang jaku lalau pasal pun penatai ti ditulis dalam artikel nya.

“Nadai atur, penerang rasmi tauka jaku tangkan kala dipansutka FAM nengah sebarang jalai rasmi tauka enda rasmi dikena nyukung isi ti dipansutka portal nya,” ku penerang nya.

FAM nerang, aum ke udah diatur entara Direktor Teknikal Program Pemansang Main Bol Menua (NFDP), Datuk Ong Kim Swee, enggau Presiden Gerempung Main Bol Sarawak, Datuk Fazzrudin Abdul Rahman bedau lama tu tadi betuju ngatur kuing pemansang main bol di Sarawak.

Nitihka penerang nya, randau ngemeratka pengawa bejalaika garis lalau pemansang renggat baruh sereta mega jalai pemansang pemain ari renggat nembiak redak ngagai arena main bol profesyenal nengah chara ti lebih teratur, diperambu sereta bestruktur.

Berebak enggau nya, FAM ngemeratka sebarang penerang ti bekaul enggau raban pengatur meseti diperatika sereta dientaska nengah jalai rasmi dikena nyeliahka saru penemu ba mensia mayuh enggau komuniti main bol nasional.

Berindik ari nya, FAM nerangka pengawa sebarang piak ti mantaika isu bekaul enggau struktur tauka langkar pengawa ngatur main bol enggau nadai mantaika enggau terang identiti sida tauka mantaika bukti ti ulih dientas nya nadai tanggungpengawa.

FAM mega ngelalau pengawa ngerembaika tuduh tauka penerang ke enda dientaska ba media rama deka dikemerat lalu enda ngenggaika peluang atur ke patut dipejalaika ngagai piak ke bekaul.

Penerang nya mega nerangka nadai jaku tangkan diberi ngagai Sarawak, tang aum ke nyadi nya semina sebagi ari pengawa ngenegapka pemansang main bol renggat baruh enggau jalai pemansang pemain di nengeri tu. -RBI

#ruaiberitaiban#newsiban#beritaiban

Rindu | Titih | Kunsika

KUCHING, 15 Jun – Presiden Gerempung Main Bol Sarawak (FAS), Dato Fazzrudin Abdul Rahman nyemetak madahka Liga Premier Sarawak enggau liga pemansang nembiak baruh umur ti diberi kelala FAS nya sebagi ari pengawa dikena ngenegapka pemansang main bol nengeri, ukai deka nempa liga profesyenal kediri ari struktur main bol menua.

Kenu ku iya, amat ngasuh ati asa laban pengawa ke baru berengkah dikena ngaga baru ekosistem main bol Sarawak nerima bemacham sangka enggau jaku bantah ke nadai pengamat.

“Kitai baru ngepunka Liga Premier Sarawak enggau liga baruh umur nyadi pelasar pemansang main bol nengeri, udah bisi piak mansutka bemacham jaku tangkan sereta ngaga simpul penemu kediri empu.

“Anang berumban ngaga sangka ti madahka Sarawak deka ngatur liga profesional kediri empu.Pekara ti dikemansang kitai iya nya jalai pemansang pemain nuju main bol profesional,” ku iya.

Ku iya nerang, Liga Premier Sarawak ti diberi kelala taun siti nyin kemari ngaul kaban FAS iya nya gerempung main bol bagi menua enggau kelab ti dikangau, lalu nyadi pelasar dikena nyerungkai penau baru ari serata Sarawak.

Liga tu sebagi ari perambu timpuh panjai FAS enggau perintah nengeri dikena ngidupka baru main bol ba renggat baruh.

Ku iya, renggat keterubah ngemeratka pengawa nambahka penyereta sereta mulaika pengerindu komuniti ba main bol ba renggat bagi menua enggau peminta penyereta ke muntang agi.

“Lebuh liga tu mansang tuai, FAS deka berenggat meri kelala peminta ke tinggi agi baka minta pemain baruh 21 taun bisi ba padang, jurulatih belisin B, pemesai pengerai tim enggau bemacham peminta bukai ke ulih ngangkatka tikas pekit,” ku iya nerang.

Fazzrudin ke mega Ketuai Sekretari Politik Premier Sarawak madah, pemansang main bol enda ulih diakim bepelasarka siti musin pekit aja laban proses ngadaka pemain ti bekualiti begunaka awak, perambu enggau komitmen ti enda ngetu.

Iya mega madahka FAS bekerejasama enggau sektor korporat ngatur mayuh agi pekit renggat umur dikena nembuka ekosistem pemansang main bol nengeri tu.

“Juluk kami endang terang, iya nya deka meda mayuh agi anak Sarawak bulih peluang bemain ba renggat profesyenal, sekalika ba Liga Malaysia tauka liga bukai.

“Kami deka nyendiaka jalai ke menyana ari renggat pun menua ngagai renggat profesional,” ku iya.

Ngenang pasal penerang ti ngaitka inisiatif nya enggau penumbuh liga profesional bebas, iya nyemetak madahka sida ti ngaga sangka baka nya patut minta penerang dulu sebedau mansutka penerang.

“Anang terjun ngagai simpul penemu enti enda meretika perambu ke bendar FAS. Kami nemu struktur main bol nasional lalu kami nyingkang dalam langkar pemansang ke terang.

“Fokus kami iya nya deka ngemansangka main bol Sarawak sereta meri peluang ke lebih luas ngagai pemain menua tu nyingkang ngagai renggat ke tinggi agi,” ku iya nyemetak. – RBI

#ruaiberitaiban#newsiban#beritaiban

Rindu | Titih | Kunsika

KUCHING, 15 Jun – Ketuai Pemegai Menua Tuan Yang Terutama (TYT) Yang di-Pertua Negeri Sarawak, Tun Pehin Sri Dr. Haji Wan Junaidi Tuanku Jaafar begulai enggau bini iya Yang Amat Berbahagia Toh Puan Datuk Patinggi Hajjah Fauziah Mohd. Sanusi sehari tu udah nerima penemuai basa ari Komiti Besai Pengerami Makai Lemai Gawai Dayak 2026 di Astana Nengeri Sarawak.

Raban tu betuaika Sapit Premier Sarawak ke mega Chairman Komiti Pengabang Pengerami Makai Lemai Gawai Dayak 2026, Datuk Amar Douglas Uggah Embas ke bisi datai nyuaka surat tesau rasmi ngagai Yang Dipertua Tun Pehin Sri enggau YABhg. Toh Puan deka ngulu Pengerami Makai Lemai Gawai Dayak 2026 ti diperambu deka diatur ba Palan Konvensyen Borneo Kuching (BCCK) kena 21 Jun tu ila.

Rambau penemuai basa nya, komiti meri penerang ngagai TYT Tun Pehin Sri enggau YABhg. Toh Puan senentang isi program, tusun enggau atur besai pengerami Gawai Dayak 2026.

Ba aum nya, TYT Tun Pehin Sri ngemeratka pemesai guna pengawa ti enda ngetu dikena nyaga, dokumentasyen sereta ngelakuka pesaka budaya enggau adat bemacham pupu raban bansa di Sarawak nyadi reta tengkira ti berega ti patut diturun ngagai rebak dudi hari.

Nitih ku iya, Sarawak ke kaya enggau penyelai budaya sereta ngembuan lebih 30 etnik ke ngembuan sejarah, jaku enggau adat ke nyelai meseti terus ngenegapka pengawa meri kelala sereta mantaika penyelai tu ngambika identiti komuniti nengeri tu meruan dijaga.

TYT Tun Pehin Sri enggau YABhg. Toh Puan mega meri besai terima kasih ngagai bala komiti pengatur pengerami ketegal komitmen enggau dedikasyen sida dalam nentuka pengerami Gawai Dayak terus nyadi pelasar beguna dikena ngenegapka penyerakup, pengelantang enggau semengat begulai entara rayat Sarawak.

Pengerami Makai Lemai Gawai Dayak 2026 dikearapka nyadi siti ari batang pengawa pengerami Gawai Dayak renggat nengeri ti ukai semina ngerami penyelai budaya komuniti Dayak, tang mega ngenegapka semengat pemanah ati enggau penyerakup entara rayat pupu bansa di Sarawak.

Sama bisi nyempulang penemuai nya, Menteri Industri Pemakai, Komoditi enggau Pemansang Kandang Menua Sarawak, Dato Sri Dr. Stephen Rundi Utom; Menteri ba Opis Premier Sarawak, Dato Sri John Sikie Tayai; Sapit Menteri Pengerai Mensia Mayuh, Pengawa Berumah enggau Kandang Menua Sarawak, Datuk Dr. Penguang Manggil, Sapit Menteri ba Opis Menteri Besai Sarawak (Undang-undang enggau Adat Bansa Asal), Datuk Jefferson Jamit Unyat; Sapit Menteri Pemansang Nembiak, Lumba enggau Main enggau Orang Dagang Sarawak, Datuk Gerald Rentap Jabu; enggau Sapit Direktor Opis Kereja Raya Sarawak, Puan Josenthiana anak Manggie. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

Photo — Opis Sapit Premier 1

MERADONG, 15 Jun – Operasyen ngelaban pengawa salah guna dadah ti dipejalaika IPD Meradong sekali agi ngerikodka pemujur lebuh tiga individu peranak menua nya nyengkaum siku indu ditan lalu dientaska positif dadah ba pengawa meresa ti dipejalaika ba kandang menua Bintangor nengah Ops Tapis, sehari tu tadi.

Ketuai Polis Pelilih Meradong, DSP Tansli Mering madah, pengawa ngetan nya dipejalaika seraban polis ari Tim Petugas IPD Meradong ti bejalaika operasyen khas urung pukul 3.20 lemai.

Nitihku iya, ketiga-tiga saspek nya mungkur dua iku lelaki enggau siku indu ke beumur entara 23 ngagai 30 taun ditan ketegal dipelabaka bisi kaul enggau aktiviti salah guna dadah sebedau dibai ngagai opis Bagian Tasat Jenayah Narkotik (BSJND) Pelilih Meradong ngambika atur ke silik agi dipejalaika.

“Asil peresa ai kemi ti dipejalaika tetemuka semua saspek positif amphetamine enggau methamphetamine,” ku iya nengah penerang berita sehari tu tadi.

Pengawa mansik baru rikod ke udah mega tetemuka ketiga-tiga saspek nya nadai ngembuan sebarang rikod jenayah tauka penyalah bekaul enggau dadah sebedau tu.

Kes tu dipansik ari baruh Seksyen 15(1)(a) Akta Dadah Berbahaya 1952. Enti dikenuku salah, orang ke ngereja penyalah nya ulih diukum enda ngelui ari RM5,000 tauka dijil nyentuk dua taun.

Berebak enggau nya, IPD Meradong nyemetak madahka sida beratika isu salah guna dadah ba genturung pendiau enggau berat sereta enda belembut ba sebarang pengawa ti ngelanggar undang-undang.

Mensia mayuh ke bisi penerang bekaul enggau aktiviti salah guna tauka bedagangka dadah di pelilih Meradong dipinta ngenataika penerang ngagai polis ngambika ulih mantu pengawa ngelaban fenomena nya.

Penerang tau dikenataika nengah Balai Polis Bintangor nengah lumur 084-693222. – RBI

#ruaiberitaiban#newsiban#beritaiban

Rindu | Titih | Kunsika

KUALA LUMPUR, 15 Jun – Berengkah 1 Julai 2026, pengguna semua bank di Malaysia ulih ngasaika pengelantang ngemansutka duit tunai enggau enda bebayar ba sebarang bank nengah “automated teller machine” (ATM) enggau ‘smart recycling machine’ (SRM) di serata menua enggau nadai dichaj RM1 baka sebedau tu.

Pengawa nya dipadah nengah penerang begulai ari tiga gerempung industri servis wang besai menua tu, ti nerangka inisiatif nya nyadika pengawa dikena ngangkatka pengelantang bank enggau akses ngagai mensia mayuh.

Nengah pengawa bejalaika baru nya, pemegai kad debit ti dikeluarka bank di Malaysia ulih ngaga pengawa ngeluarka duit tunai nadai sekat ba lebih 14,000 ATM enggau SRM di serata menua, enda ngira bank ti ngeluarka kad nya.

Nitihka penerang nya, fasiliti nya disadang meri penguntung ngagai bejuta iku pengguna nengah chara ngemendarka sida ngena sebarang ATM tauka SRM bank ke semak enggau enda ibuh irau pasal chaj tambah ungkup transaksyen ngeluarka duit tunai.

Ketiga-tiga gerempung ti ngaul diri bejalaika inisiatif tu iya nya Gerempung Bank di Malaysia (ABM), Gerempung Perbankan Islam enggau Institusyen Pekara Wang Malaysia (AIBIM) enggau Gerempung Institusyen Pekara Wang Pemansang Malaysia (ADFIM).

Taja pia, pengelepas bayar nya semina dikena ba ATM enggau SRM ti dipejalaika institusyen bank di Malaysia.

Inisiatif tu dipeda nyadi singkang positif nuju ngenegapka mayuh agi perengka guna bank ti mesra pelanggan, kelimpah ari ngurangka ungkus transaksyen ninting hari ti ditanggung penguna. -RBI

Sumber BERNAMA

Gambar AI

#ruaiberitaiban#newsiban#beritaiban

Rindu | Titih | Kunsika

BINTULU, 15 Jun – Pengawa jampat raban bomba ari Balai Bomba enggau Penyah Penusah (BBP) Kidurong mujur nyelamatka dua iku mansa ke tepekul dalam entukar pengudah aksiden ba jalai alun di Jalai Kidurong, lemai tu tadi.

Nitihka penerang ari Pemesai Bomba Kanan II (PBT II) Rary Anak Binjie, piak iya nerima kangau ngenyit bekaul enggau penusah nya urung pukul 4.42 lemai sebedau Tender Penyelamat Bomba (FRT) ti bisi empat iku kaban dianjung ngagai endur nya.

“Lebuh raban operasyen datai ba palan penusah nyadi, ditemu endang amat bisi dua iku mansa tepekul dalam entukar Proton Saga bechura biru.

“Ketuai operasyen udah nya bejalaika pengawa meresa keterubah gaya penusah sebedau raban bomba ngena perengka nyelamat khas dikena mansutka mansa ari entukar ke redak,” ku iya.

Ku iya, kedua-dua mansa mujur dipansutka enggau likun sebedau diserah ngagai Opis Menteri Pengerai Malaysia (KKM) ngambika diperubat enggau silik agi.

Operasyen nya betuaika PBK II (TBBK I) Hashim Tembam berengkah pukul 4.54 lemai lalu mujur dikuasa penuh urung pukul 5.05 lemai sebedau tembu pukul 5.20 lemai.

Sama bela mantu dalam operasyen nya empat iku raban Polis DiRaja Malaysia (PDRM) enggau empat iku raban KKM.

Pengudah nentuka gaya ba endur nya likun bendar sereta nadai agi risiko ngagai penguna jalai alun, raban bomba lalu mupuk lalu pulai ngagai balai. – RBI

#ruaiberitaiban#newsiban#beritaiban

Rindu | Titih. | Kunsika

KUCHING, 15 Jun – Sapit Premier Sarawak, Datuk Amar Douglas Uggah Embas nyemetak madahka Jematan Batang Lupar meseti dijaga nyadi aset mensia mayuh sereta nyadi pematak dagang temuai nengeri, seraya ngingatka mensia mayuh ngambika enda ngamahka kandang endur nya nengah chara bebuaika uras.

Kenu ku iya, isu pemeresi ke udah nyadi ba jematan pemadu panjai meraka sebuah sungai di Malaysia enda patut nyadi enti tetiap individu ngemeranka tanggungpengawa nyaga pemeresi sereta bebasaka perengkaguna mensia mayuh.

“Jematan Batang Lupar endang enggi rayat.Kitai dekaka kandang menua tu seruran beresi, teratur sereta narit ati laban majak narit ati temuai ari menua tu enggau menua luar,” ku iya.

Iya mega mantaika maya pengerami Gawai apin lama ke udah, beberapa iku temuai ari Singapura mantaika pengingin ati deka nemuai ngagai Jematan Batang Lupar, lalu enggau nya ngayanka palan nya diatu benung mansutka diri nyadi siti ari palan dagang temuai ke benung nerima perati.

“Maya Gawai tu tadi, bisi beberapa iku orang ari Singapura madah ngagai aku, sida deka datai meda Jematan Batang Lupar, tu mandangka jematan tu ngembuan pemanah kediri sereta bisi potensial nyadi produk dagang temuai ke beguna ngagai Sarawak,” ku iya.

Iya madah munyi nya lebuh dikerandau media pengudah nyadi chairman Aum Komiti Besai Pengerami Gawai Dayak Renggat Sarawak di Dewan Undangan Nengeri (DUN) Sarawak sehari tu tadi.

Uggah ke mega Menteri Infrastruktur enggau Pemansang Palan Penyangkai Kapal Sarawak madah, perintah nengeri nengah Opis Kereja Raya (JKR) Sarawak deka ngemanahka perengka guna bekaul enggau pemeresi sereta ngenegapka pengawa matau ba kandang endur jematan nya.

Ku iya, JKR deka meresa semua pekara ti dibantai nyengkaum sukut pemeresi, pengelikun enggau ngatur kandang endur sebedau nganjung ripot penuh ngagai iya dalam timpuh dua minggu.

“Aku deka meda ripot nya dulu ngambika atur ke patut ulih dipejalai dikena nentuka kandang endur tu terus diintu sereta likun ungkup mensia mayuh,” ku iya.

Sebedau tu, sekeda gambar bisi viral ba media rama mandangka individu bejalaika aktiviti dagang ba Jematan Batang Lupar, lalu enggau nya ngujungka bemacham reaksyen ba raban netizen.

Mensia mayuh mantaika pengirau ati laban pengawa baka nya tau ngenataika penanggul ba pengawa muai uras kelimpah tau mai risiko pengelikun ngagai penguna jalai alun.

Berebak enggau nya, JKR Sarawak mansutka penerang ngingatka sebarang aktiviti bejual beli enggau berikan ba Jematan Batang Lupar 1 enda dikemendar.

Pengawa nagang nya betuju nentuka pengelikun penguna, nyaga pemeresi kandang endur nya sereta ngetanka imej Jematan Batang Lupar nyadi kelai temegah ati Sarawak ti majak narit ati temuai. -RBI

#ruaiberitaiban#newsiban#beritaiban

Rindu | Titih | Kunsika

PETRA JAYA, 15 Jun — Pengawa Bejalai Niti Daun disadang nyadi sebengkah ari batang pengerami ke deka enchuri perati beserimbai enggau Pengerami Gawai Dayak Renggat Nengeri Sarawak 2026 ke alai sepenyampau 99 kontinjen udah dientaska nyereta pengawa nya ke deka diatur di Kuching Waterfront kena Hari Enam tu ila.

Sapit Premier Sarawak, Datuk Amar Douglas Uggah Embas madah, pengawa nyendiaka diri ngintu pengerami berambaika leka jaku “Segulai Sejalai” diatu nyau deka tembu berindik ari Aum Komiti Besai Pengerami Gawai Dayak Renggat Nengeri Sarawak ke diatur ba Bilik Aum Komiti 1, Renggat 3, Dewan Undangan Nengeri (DUN) Sarawak seharitu.

Nitih ku iya, pengerami ninting taun nya deka terus nyadi pelasar ke beguna dikena mantaika penyelai budaya, adat enggau identiti komuniti Dayak di Sarawak, kelimpah ari ngelakuka pesaka main asal nengeri tu ngagai komuniti lokal enggau temuai.

“Pengawa Bejalai Niti Daun deka diatur di Kuching Waterfront lalu dipelaba deka matak lebih 3,000 iku temuai datai.

“Sepenyampau 99 kontinjen udah ngenukuka penyereta lalu sekeda kontinjen antarabansa mega dipelaba deka ngambi bagi,” ku iya ba aum pengarang berita pengudah aum nya.

Ku iya, pengawa ngatur pengerami Gawai Dayak taun tu diatur komuniti Iban nitihka sistem besilih ti ngaul tiga batang komuniti Dayak iya nya bansa Iban, Bidayuh enggau Orang Ulu.

Ku iya, pekara ti pemadu dikerinduka pengerami nya deka diatur kena 21 Jun nengah Pengerami Makai Lemai Gawai Dayak Renggat Nengeri Sarawak di Palan Konvensyen Borneo Kuching ti dikearapka ulih ngempuru mayuh macham ketuai, orang ti dipebasa sereta pengari komuniti Dayak ari serata Sarawak.

Nitih ku iya, Tuai Pemegai Menua (TYT) Negeri Sarawak, Tun Pehin Sri Wan Junaidi Tuanku Jaafar, diperambu deka nyadi temuai dipebasa ba pengerami nya, seraya Menteri Besai, Dato’ Seri Anwar Ibrahim enggau Premier Sarawak, Datuk Patinggi Tan Sri Abang Abdul Rahman Zohari Abang Openg mega disadang datai.

Ku iya nambah, entara pengerami makai lemai nya iya nya pengawa mandangka teater khas Yayasan Kebudayaan Dayak ti berambaika leka jaku Ari Ruai ngagai Panggau Dunia ti ngayanka pejalai enggau penyulut komuniti Dayak ari pengidup asal nyentuk ke chakah ngaul diri dalam pemansang moden.

Kelimpah ari nya, pengerami nya mega dirichah enggau pemerindang ari artis menua tu baka Rickie Andrewson, Phoebe Chloe Tay enggau Rozzie Mila, kelimpah ari pemerindang khas ari penau biak Little Birdie ke udah nempa Sarawak tebilang ba panggau main asal antarabansa.

Ba pemansang ke bekaul, Uggah madahka program Gawai Bazaar enggau Festival Budaya Etnik ke nyadi di Miri kena 1 ngagai 23 Mei tu tadi udah mujur nyapai juluk dalam ngelakuka budaya enggau pesaka asal komuniti Dayak ngagai mensia mayuh.

Iya mega meri besai terima kasih ngagai Perintah Sarawak, Perintah Besai, piak ti melanja sereta mayuh bengkah ejensi ti bisi kaul enggau sukung sereta kerejasama ti diberi nentuka Pengerami Gawai Dayak Renggat Nengeri Sarawak 2026 ulih dipejalaika enggau mujur.

Pengerami ke berambaika leka jaku “Segulai Sejalai” nya dikearapka nyadi pelasar beguna dalam pengawa ngenegapka penyerakup, ngetanka pesaka asal enggau ngelakuka mayuh macham main asal komuniti Dayak ngagai komuniti ke besai agi, setipak enggau aspirasyen Sarawak ke nyadi sebuah nengeri ke kaya enggau penyelai budaya sereta pesaka asal ke nyelai. – RBI

#ruaiberitaiban#newsiban#beritaiban

Rindu | Titih | Kunsika

PAKAN, 15 Jun – Pengawa ngatur Pekit Futsal Liga Sukan Komuniti terus nyadi pelasar beguna dalam ngenegapka penyerakup komuniti sereta meransang pengawa ngaul raban nembiak enggau chakah dalam aktiviti lumba enggau pemansang komuniti.

Kaban Parlimen Julau, Datuk Larry Sng Wei Shien madah, lumba enggau main ukai semina bejalaika tanggungpengawa dalam nempa komuniti ti bepengerai sereta regas, tang mega nyadi medium ti efektif dikena ngerapitka kaul sereta nerenakka semengat kerejasama entara peranak.

Kenu ku iya, pengawa numbuhka kelab enggau gerempung ba renggat genturung pendiau beguna amat dikena nentuka bemacham program enggau aktiviti ulih dipejalaika belama, kelebih agi ti ngaul raban nembiak.

“Raban nembiak endang reta ke berega ba menua tu lalu bejalaika tanggungpengawa ti besai dalam nentuka kuing pemansang jemah ila.

“Sida begunaka awak diberi ruang enggau awak ngambika chakah ngaul diri dalam program ti ulih nempa personaliti sida, ngangkatka pengelandik nyadi ketuai sereta ngenegapka identiti diri,” ku iya lebuh bejadika pengerami nutup pekit nya empai lama.

Iya mega muji komitmen bemacham gerempung enggau raban komuniti di Pakan ti seruran proaktif ngatur program enggau aktiviti ti ngaul raban nembiak, lalu enggau nya nyadika pelilih menua tu siti ari kandang endur ti chakah dalam pemansang komuniti.

Kelai sukung ngagai pemansang lumba enggau main menua tu, Larry madahka agih belanja penyampau RM3,000 ngagai Kelab Main Bol Pakan dikena mantu kelab nya bejalaika bemacham aktiviti enggau program jemah ila.

Berebak enggau nya, iya ngemeratka pengawa ngangkatmanah sistem lampu gelanggang futsal ngambika palan nya ulih dikena enggau lantang sereta likun agi maya malam hari.

Ku iya, pengawa ngemanahka palan nya deka ngasuh mayuh agi aktiviti lumba enggau main sereta rekreasyen ulih diatur, kelimpah ari meri peluang ngagai peranak menua nya ngena gelanggang nya enggau optimum.

Sekali tu, Pekit Futsal Liga Sukan Komuniti nerima sambut ti chukup meransang ari tim menua nya enggau peranak ngelingi ti bisi datai meri sukung, lalu enggau nya ngayanka semengat lumba enggau main, penyerakup enggau begulai dalam komuniti setempat ti majak tegap. -RBI

#ruaiberitaiban#newsiban#beritaiban

Rindu | Titih | Kunsika

KOTA SAMARAHAN, 15 Jun — Universiti Teknologi MARA (UiTM) Pampang Sarawak meri pengaga ati ngagai Profesor Dr. Corina Joseph ti udah dichiri nyadi Profesor Temuai ba Fakultas Ekonomika enggau Bisnis, Universitas Negeri Semarang, Indonesia, ti udah berengkah 23 nyentuk 30 Mei 2026 tu tadi.

Nengah penerang UiTM Pampang Sarawak madahka pengawa nyiri ti beprestij nya nyadika pengangkun ngagai komitmen Profesor Dr. Corina Joseph ti enda bebatak asur negika penyulut akademik, ngasilka pansik ti meri empas tinggi sereta ngemansangka pengawa bekunsika penemu meraka garis entara menua.

Nitihka penerang nya, penyulut nya ukai semina ngasuh institusyen nya temegah ati, tang mega nyadika peransang ngagai raban akademik enggau nembiak ngambika terus nampung penyulut sereta meri pangka ngagai pemansang penemu ba renggat antarabansa.

“Pengawa nyiri tu dikearap ulih muka mayuh agi ruang ungkup kerejasama strategik, betukar penemu enggau ngenegapka rentayan akademik antarabansa, lalu enggau nya ulih meri pangka ngagai pemansang pelajar tinggi enggau pansik global,” ku penerang nya.

UiTM Pampang Sarawak mega nerangka pemujur Profesor Dr. Corina Joseph nyadika bukti penyulut, pengeliat ati enggau semengat tinggi nyadi pelasar ti beguna dalam nempa empas ti meruan dalam dunya akademik.

Berindik enggau nya, universiti besampi ngambika iya terus bulih pemujur sereta mai mulia enggau penyulut ngagai UiTM enggau menua ba renggat entarabansa nengah pengawa nyadi ketuai akademik sereta meri pemeri ti enda ngetu ngagai mensia mayuh enggau dunya pelajar. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

Sumber, grafik — Universiti Teknologi MARA Cawangan Sarawak