KUCHING, 31 Mei – Raban Nembiak Parti Demokratik Progresif (PDP) nyemetak madahka penuduk Dewan Undangan Negeri (DUN) Engkilili meseti terus ditegapka bepelasarka servis ngagai rayat enggau semengat beserakup dalam Gempung Parti Sarawak (GPS), ari ke bepolitik tauka diiri enggau pemerat individu.

Sapit Chairman Nembiak PDP, Conrad Inti madah, parti iya udah beratika ripot nya bekaul enggau niat ex-Kaban Parlimen Lubok Antu, Jugah Muyang, deka minta nyadi chalun ba penuduk Engkilili nengah sebuah agi parti komponen GPS.

Kenu ku iya, tetiap individu bisi hak ba aspirasyen politik, tang semua parti komponen GPS meseti terus negika semengat bebasaka pangan diri, pechaya enggau disiplin gempung ti udah nyadi pelasar penegap enggau pengering GPS betaun ke udah.

“Engkilili diatu diarika PDP. Bebasaka penuduk ke dipegai parti komponen GPS ukai semina pekara budi basa politik aja, tang mandangka pengandal enggau kerejasama ke udah ditempa dalam gempung nya,” ku iya nengah penerang berita.

Ku iya, GPS naka ke diatu mujur midaka diri ari gempung politik ke bukai laban seruran ngengkahka penegap, penaluk enggau tanggungpengawa bekunsi ngelui ari pemerat individu.

Conrad mega betanya rasional pengawa nya berindik ari penama siku orang politik enda nambahka penuduk baru ngagai GPS tauka ngerembaika pengering gempung nya.

“Pekara ke nyadi tanya, nama utai ke amat dijapai nengah pengawa ke baka nya? Baka ni iya ulih ngenegapka GPS? Ke beguna agi, nama pesan ke dianjung ngagai rayat lebuh bisi peragam penuduk ke diarika parti komponen GPS empu nyadi tagit pekit dalam?” ku iya.

Kenu ku iya, enti semengat GPS seruran diambi nyadika lalau, dia disiplin gempung, basa enggau pengarap entara kaling komponen iya meseti disalin ngagai pengawa, ukai semina retorik aja.

Ku iya, sebarang peragam ti ngayanka pengawa berebutka penuduk ke udah bisi dalam GPS nadai nguntungka gempung sereta bisi potensial ngeruga imej penyerakup ke nyadi batang penegap GPS ngelama tu.

Iya nyemetak madahka politik patut diakim bepelasarka rikod servis, komitmen enggau asil ti dibai ngagai rayat, ukai semina berebutka pangku pengawa tauka penuduk aja.

“Rayat Engkilili enda nanya sapa ke deka nyadi chalun. Sida dekaka ketuai ti bepenau mai pemansang, mutarka penanggul sereta ngangkatka kualiti pengidup komuniti menua nya,” ku iya.

Conrad mega nyemetak madahka sebarang randau bekaul enggau pengawa magi penuduk enggau milih chalun patut diputarka nengah jalai rasmi GPS dikena nentuka tetiap pemutus digaga bepelasarka konsensus enggau pemerat begulai.

“PDP deka terus ngemeratka pengawa meri servis ngagai rayat Engkilili sereta nentuka pemansang terus dikembuan tetiap komuniti di kandang menua nya.

“Servis ngagai rayat meseti seruran dulu ari juluk ati politik,” ku iya. – RBI

#ruaiberitaiban#newsiban#beritaiban

Rindu | Titih | Kunsika

SRI AMAN, 31 Mei – Adat bebasaka pangan diri nyadi teras ke beguna dalam nyaga pengelantang komuniti pupu bansa enggau jalai pengarap ti bebida di Sarawak, pia ku Datuk Francis Harden Hollis.

Nitih ku iya, komuniti begunaka terus ngemeranka ulah bebasaka pangan diri sereta nerenakka ulah ti mulia ti nyadi peminta semua jalai pengarap dikena nentuka penyerakup ti tegap ulih terus dikemeran.

Iya mansutka jaku tu lebuh ngulu Pengerami Ngintu Hari Wesak ke diatur Serakup Buddha Sri Aman di Jalai Foochow.

Penatai iya ngulu pengawa nya mandangka sukung perintah ngagai pangku pengawa gerempung jalai pengarap dalam pemansang mensia kelimpah ari pengawa ngenegapka kaul ti likun entara komuniti pupu bansa enggau pengarap.

Dalam jaku dipansutka iya mega, Harden madahka mayuh macham budaya ti dikemeranka rayat Sarawak udah nyadi chunto penyerakup ti pemadu manah, lalu enggau nya meri pangka ngagai gaya ti likun sereta tegap ti nyukung agenda pemansang nengeri seriris enggau Strategi Pemansang Pengudah COVID-19 2030.

Iya mega meri besai terima kasih ngagai piak pengatur Gerempung Buddha Sri Aman laban udah mujur nembuka ruang tambah ungkup rumah sembiang ti dipelanja nengah agih belanja Unit Ungkup Jalai Pengarap Bukai ari baruh pegai perintah Gempung Parti Sarawak (GPS).

Ngelansa pasal pemansang di Sri Aman, Harden nyemetak madahka dawa ti ngumbai Sri Aman nyadi “bandaraya mati” nadai pengamat.

Nitih ku iya, pengawa bejalaika mayuh bengkah projek infrastruktur nyengkaum rentayan jalai alun enggau Jematan Batang Lupar 2 ti disadang tembu taun tu deka ngemanahka agi penyambung entara Bagi Menua Sri Aman enggau Betong sereta nyungkak penumbuh ekonomi kandang menua.

Ba pengawa nya mega, iya bisi nyuaka chek Projek Mit Menua Pesisir (MRP) sepenyampau RM5,000 ngagai Gerempung Buddha Sri Aman dikena mantu bejalaika aktiviti gerempung nya.

Sama bisi datai Chairman Gerempung, Foo Chin Shui, Temenggong Kueh Aik Seng, Pemanca Lee Siang Hua, sekeda kapitan komuniti China setempat enggau kaban kaunsil ari PBT.

Pengerami ngintu Hari Wesak diatur dalam gaya pengelantang enggau pemanah ati, mandangka semengat beserakup ti terus nyadi batang penegap komuniti Sarawak. – RBI

#ruaiberitaiban#newsiban#beritaiban

Rindu | Titih | Kunsika

KUCHING, 31 Mei — Perintah Gabungan Parti Sarawak (GPS) terus ngenegapka agenda pemansang ti komprehensif iya nya nentuka perengka guna infrastruktur, pelajar enggau bantu pengelantang pendiau disalur enggau inklusif ngagai serata nengeri, nyengkaum kandang menua dalam enggau menua pesisir.

Sapit Premier Sarawak Datuk Amar Douglas Uggah Embas madah, chara nya mandangka komitmen perintah nengeri ti terus nentuka nadai seiti komuniti tinggal ari arus pemansang enggau penyulut di Sarawak.

Kenu ku iya, bemacham polisi enggau inisiatif ti dipejalaika perintah GPS ukai semina betuju ngangkatka tikas pengidup rayat, tang mega muka mayuh agi peluang dalam bidang ekonomi, pelajar enggau pengelantang rama.

“Perintah GPS seruran nentuka pemansang datai ba rayat enda ngira dini endur.

“Utai ke diasaika kitai kemaya hari tu iya nya asil ari pengawa merambu enggau bejalaika polisi ti ngemeratka pemerat rayat,” ku iya nengah pesan beserimbai enggau pengerami ngintu Gawai Dayak 2026.

Ku iya, entara batang inisiatif ti dipejalaika iya nya projek ngangkatmanah 5,979 kilometer jalai batang ke suba di serata Sarawak dikena ngenegapka rentayan penyambung jalai sereta ngangkatka tikas aksesibiliti kandang menua ulu.

Nitihku iya, pemansang infrastruktur tu deka ngemuntangka pemindah rayat, nyungkak aktiviti ekonomi kandang menua sereta ngerembaika akses ngagai perengka guna pemun baka servis pelajar enggau pengerai.

Ari sukut pelajar, Douglas Uggah Embas madahka Skim Pelajar Tinggi Pechuma Sarawak (FTES) nyadi inisiatif ke besai reti perintah nengeri dalam nyendiaka peluang pelajar ke lebih luas ngagai nembiak Sarawak, kelebih agi dalam bidang strategik baka Sains, Teknologi, Kejuruteraan enggau Matematik (STEM), undang-undang enggau psikologi ke diempu perintah Sarawak dalam institusyen.

Nitihku iya, pengawa tu nyata ngayanka komitmen perintah nengeri dalam ngasilka modal mensia ti bekualiti enggau enda nating nembiak enggau penanggul belanja.

“Pelajar nyadi puku timpuh panjai ti deka nentuka kuing Sarawak jemah ila. Kitai dekaka mayuh agi peranak Sarawak mujur sereta ulih besemekih,” ku iya.

Iya mega nerangka perintah nengeri seruran beratka pemar ungkus pengidup rayat nengah pengawa bejalaika Bantu Guna Pemun Sarawak (SKAS).

Ungkup taun 2026, tikas bantu SKAS udah ditiki ngagai RM1,100 setaun ungkup ruang bilik, RM600 setaun ungkup orang tuai enggau RM375 setaun ungkup individu bujang dalam pengawa ngelempungka tating belanja rayat.

Ngelansa pasal pengerami Gawai Dayak, iya madahka pengerami nya ukai semina kelai terima kasih ke asil ketau enggau rezeki, tang mega nyadi kelai penyerakup, pengelantang enggau semengat begulai rayat pupu bansa di Sarawak.

Iya nyemetak madahka semengat “Segulai Sejalai” begunaka penegap agi nyadi pelasar penegap enggau pemujur pemansang nengeri.

“Aram mih kitai terus bekerejasama ngemansangka Sarawak ngambika penyulut ke diasai kemaya hari tu ulih ditampung rebak dudi hari,” ku iya.

Iya mega meri Selamat Gawai Dayak ngagai selampur komuniti Dayak sereta ngarapka pengerami taun tu ulih meri penyenang, pengelantang enggau pengelantang ngagai semua peranak Sarawak. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

Kredit photo — UKAS

BARAM, 30 Mei – Palan pengentap pendiau Uma Pawe Long Apu, Ulu Baram nempa siti agi sejarah lebuh blok rumah panjai baru ti mungkur 11 blok enggau 123 ruang bilik dipenyadika enggau rasmi sehari tu nyadi rumah panjai ketiga pemadu besai di kandang menua Telang Usan pengudah Long Bemang enggau Long Bedian.

Kaban Kunsil Nengeri (ADUN) Telang Usan, Dato Dennis Ngau madah, penambah nya nambahka penyampau semua ruang bilik ba rumah panjai nya ngagai 193 ruang bilik.

Kenu ku iya, pemujur nya ngayanka pengeliat ati enggau penyerakup ke tinggi ti dipandangka peranak rumah panjai ari baruh iring Tuai Rumah, Peter Kebing Tinggang, dalam ngemansangka genturung pendiau sida.

“Pengawa ngaga 11 buah blok baru tu ukai pengawa ke muntang.Taja pia, enggau penegap runding, komitmen sereta semengat ke tegap bekerejasama entara peranak dia mimpi deka ngemesaika genturung pendiau tu mujur nyadi nyata,” ku iya lebuh bejaku ba pengawa nya.

Dennis mega ngenataika pengaga ati iya ngagai semua peranak rumah panjai ke udah bejalaika tanggungpengawa besai ngemujurka projek pemansang nya nyadi nyata.

Berebak enggau nya, iya ngingatka peranak ngambika seruran ngemeratka sukut pengelikun, kelebih agi ba pengawa nagang penusah angus ti suah ngeruga rumah panjai.

Iya meri langgur penemu ngambika tetiap ruang bilik bisi perengka pengerara api ba bilik diri nyadi atur nagang tumu ti ulih ngurangka risiko penusah enggau pengerugi enti sema bisi penusah ngenyit nyadi.

Berebak enggau nya, iya mega ngenataika pengaga ati ngagai Anthony Lutang Lawai ti nyadi chairman kaunsil enggau selampur komiti bejalaika pengawa ti bebendar nentuka pengerami bejadi nya diatur enggau lanchar sereta bisi reti.

Pengerami nya bela digulu Kaban Parlimen Baram Dato Anyi Ngau, ADUN Mulu Datuk Gerawat Gala, ketuai komuniti enggau ketuai raban bansa, kaban kaunsil kandang menua enggau peranak ari Kampung Long Anap.

Dennis ngarapka pemansang ke dijapai sehari tu deka nyadi pematak ngagai penyulut ke besai agi dudi hari, ari nya ulih ngenegapka penyerakup, pengelantang enggau pengelikun komuniti Kampung Uma Pawe Long Apu. – RBI

#ruaiberitaiban#newsiban#beritaiban

Rindu | Titih | Kunsika

BEKENU, 30 Mei – Bantu pemungkal sepenyampau RM10,500 udah diagih lemai kemari ngagai sida ke tasah, iya nya ngaul pengawa meri bantu RM500 ngagai tetiap 21 pintu rumah panjai nya.

Ku Kaban Parlimen Sibuti, Dato Lukanisman Awang Sauni madah, bepelasarka peneleba penusah angus ke nyadi ba Rumah Chengki kena 31 Disember 2024 enggau Rumah Sain kena 21 Ogos 2025, Perintah Sarawak deka mantu orang ke tasah nengah Bantuan Ehsan Kebakaran Rumah (BEKR) ke dikoordinasyen Opis Pelilih Subis.

Ku iya, bepelasarka rikod sebedau tu, bantu ke diberi nya urung RM70,000 ungkup tetiap pintu lalu diagih nengah chara tinda ungkup pengawa nyendiaka kereban dikena ngaga rumah.

“Taja pia, bisi bemacham ungkus tambah ti patut ditanggung baka nyendiaka palan endur ngaga, rumah sementara enggau kereja bukai ti bekaul.

“Nya alai, proses ngaga baru rumah peranak Rumah Nelson Ningkan deka begunaka timpuh ti lama,” ku iya.

Berindik enggau nya, iya ngarapka semua piak ulih meri bantu enggau sukung ngagai sida ke tasah kena ngelempungka tating sida sekumbang timpuh ngaduka diri.

Ku Iya mega, penusah angus ke nuntung rumah panjai Nelson Ningkan nya penusah angus rumah panjai ketiga kali nyadi ba sitak Parlimen Sibuti sekumbang lapan taun iya nyadi pengari rayat.

Berebak enggau nya, iya madahka sebedau penusah angus nyadi, sekeda agih belanja pemansang udah dikenataika ngagai rumah panjai nya nyengkaum projek nukar atap sereta ngaga jalai dikena napi penusah ampuh bah.

Iya mega meri jamin begulai enggau Kaban Kunsil Nengeri (ADUN) Bekenu, Rosey Yunus, sida deka nentuka semua bansa bantu enggau inisiatif perintah ulih dikenataika enggau lanchar ngagai semua mansa ti ngaul 21 pintu Rumah Nelson Ningkan. -RBI

#ruaiberitaiban#newsiban#beritaiban

Rindu | Titih | Kunsika

LIVERPOOL, 30 Mei — Liverpool FC udah ngentaska Arne Slot udah ninggalka pangku pengawa nyadi menijar kelab nya enggau tekala nya.

Dalam penerang rasmi platform media rama enggau saluran rasmi kelab nya, Liverpool FC madahka proses nyiri penganti Slot benung dipejalaika.

“Liverpool FC udah ngentaska Arne Slot deka ninggalka pangku pengawa nyadi menijar enggau tekala nya lalu proses nyiri orang ke nganti iya benung dipejalai.

“Iya ninggalka kelab enggau gelar Liga Premier sereta terima kasih enggau pengangkun kami ke pemadu dalam,” ku penerang nya.

Sekumbang ke megai pengawa nya, Slot meri empas ke besai lebuh ngiring Liverpool ngulihka gelar Liga Premier, ngeringka penuduk iya nyadi siku ari menijar ke ninggalka legasi ke besai reti ba Anfield.

Berebak enggau nya, pakar pemindah main bol entarabansa Fabrizio Romano udah ngeripotka, menijar AFC Bournemouth, Andoni Iraola diatu nyadi chalun keterubah ngisi ruang puang ke ditinggalka Slot.

Taja pia, Liverpool FC bedau madahka sebarang pemutus rasmi bekaul enggau pengawa nyiri menijar baru.

Pemansang nya dikearapka terus nyadi fokus bala peminat Reds di serata dunya lebuh kelab nya tama ngagai renggat baru napi pekit musim ti deka datai. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

BINTANGOR, 30 Mei – Ketuai Balai Bomba enggau Penyah Penusah (BBP) Bintangot, PPgB Mahmudin Narudin nyemetak madahka pengawa ngaga kangau penusah ngenyit pelesu ukai semina masau perengka guna perintah, tang tau mega ngeruga nyawa individu ti amat begunaka bantu.

Iya madah munyi nya berindik ari kangau pelesu ke diterima BBP Bintangor kena 27 Mei tu tadi, bekaul enggau ripot penusah angus ba sebuah rumah panjai di kandang menua Ulu Wak, Pakan.

Nitihku iya, kangau nya diterima urung pukul 6.49 lemai sebedau sebuah entukar ke bisi raban Tim Timbal Operasyen dianjung ngagai siti endur ke bepalan urung 67 kilometer ari BBP Bintangor.

“Lebuh datai ba palan nya, raban nya tetemuka nadai penusah angus nyadi baka ke diripot.Pengawa ngaga kaul enggau orang ke betelefon nya baru mega enda mujur, seraya tuai rumah ngentaska nadai penusah angus nyadi ba kandang endur nya,” ku iya.

Ku Mahmudin, kangau bula meri empas ke besai ngagai pemanah operasyen tim penyelamat laban jentera enggau orang ke patut besedia napi penusah ngenyit ke bendar patut dianjung ngagai endur ke enda begunaka bantu.

Ku iya nerang, tetiap kangau ngenyit ke diterima deka ditapi enggau berat sereta begunaka pengawa ngatur orang gawa, ngena minyak, perengka enggau aset perintah, ti ngaul ungkus operasyen ke tinggi.

“Lebih ngirauka ati, maya raban benung nimbal kangau pelesu, bisi peluang penusah ngenyit ke bendar nyadi ba endur bukai ti begunaka pengawa jampat.Gaya tu tau ngasuh bantu laun sereta nambahka risiko ngagai nyawa enggau reta tengkira,” ku iya.

Ku iya nambah, kangau bula mega tau ngasuh bala komuniti teguran, kelimpah meri tekan runding ngagai raban penyelamat ti seruran sedia meri servis mantu mensia mayuh.

Berindik enggau nya, iya ngingatka mensia mayuh anang salah nguna talipaun penusah ngenyit laban individu ke ditemu ngaga ripot bula ulih ditinggang atur undang-undang nyengkaum ukum mata duit ke besai sereta dijil.

“Piak bekuasa bisi penau nyidi lumur telefon enggau endur orang betelefon nengah kerejasama entara Opis Bomba enggau Penyah Penusah Malaysia (JBPM), Suruhanjaya Komunikasyen enggau Multimedia Malaysia (SKMM) enggau Polis Diraja Malaysia (PDRM).

“Kena talipaun penusah ngenyit enggau betanggungjawap.Tetiap kangau bula ti digaga tau mai empas ti berat sereta bisi potensial ngeruga pengawa nyelamatka nyawa sida ti amat begunaka bantu,” ku iya nyemetak. – RBI

#ruaiberitaiban#newsiban#beritaiban

Rindu | Titih | Kunsika

SARIKEI, 30 Mei – Atur jampat raban Opis Pengerara Api enggau Penyah Penusah Malaysia (JBPM) Sarikei mujur nagang penusah angus ti ngaul bilik endur nyimpan barang ba sebuah rumah dua ringkat di Jalai Bakau, ditu sehari tu tadi.

Ba penusah ke nyadi urung pukul 11.07 pagi nya, seraban bomba ari Balai Bomba enggau Penyah Penusah (BBP) Sarikei nerima kangau ngenyit sebedau ngesah ngagai endur ke bepalan urung tiga kilometer ari balai nya.

Tim bomba datai empat minit udah nya lalu setemuka penusah angus nya ngaul palan endur entepan kerita ke udah nyadi bilik endur nyimpan barang ke udah lama nyengkaum peti ais.

Nitihka penerang ari Komander Operasyen, PBK II (TBBK I) Redzuan Hussain, penusah angus dipelabaka udah nganguska urung 15 peratus struktur ke bisi kaul.

“Pengudah ngaga perati keterubah ba endur nya, tim bejalaika operasyen madamka api ngena hos enggau munchung 100 kaki ke disambung ngagai pam bomba enggau pili bomba ke semak.

“Pengawa nya mujur nagang api ari nyerarai ngagai bagi rumah ke bukai sebedau api padam abis,” ku iya.

Pengudah api mujur dirara, raban bomba bejalaika pengawa meresa dikena nentuka nadai agi pun penatai ti tau ngasuh api nyadi baru.

Operasyen nya mujur dijaga urung pukul 11.35 pagi sebedau tembu pukul 11.55 pagi pengudah kandang endur nya dientaska likun.

Nadai penusah bakal tauka bebadi nyawa diripotka nyadi ba penusah nya.

Kebuah penusah angus nya taja pia agi dipansik piak bomba.

Sama bisi ba palan nya mantu operasyen nya dua iku staf SESCO enggau empat iku kaban RELA. – RBI

#ruaiberitaiban#newsiban#beritaiban

Rindu | Titih | Kunsika

KUCHING, 30 Mei – Projek ngaga Indu Opis baru Serakup Pejilin Malaysia Pampang Sarawak nerima sukung penuh ari Premier Sarawak, Datuk Patinggi Tan Sri Abang Johari Tun Openg.

Presiden Kaunsil Pejilin Sarawak, Tan Sri William Mawan Ikom madah, Premeir Sarawak mega setuju ngaga nama begunan baru nya nyadi Begunan Tun Openg dikena ngingatka jasa niang Tun Abang Openg.

“Perintah Sarawak udah berengkah ngaga Indu Opis baru Serakup Pejilin Malaysia Pampang Sarawak ti deka diberi nama Begunan Tun Openg dikena nyilih begunan lama ti udah angus kena bulan Februari taun nyin kemari,” ku Mawan ke mega Kaban Kunsil Nengeri (ADUN) Pakan.

Ku iya, niang Tun Abang Openg sebedau tu kala bejadika Indu Opis Pengakap Sarawak kena 10 Jun 1967.

Iya madah munyi nya lebuh bejaku ba pengerami nasih tanah Begunan Indu Opis Pejilin Sarawak (Begunan Tun Openg) kena seharitu.

Nitihku iya, pengelenyau begunan besejarah nya udah nempa pengeransing baru ba ketuai pejilin ngaga baru indu opis nya.

Ku iya nambah, enti udah tembu ila, begunan baru nya deka meri penguntung ke besai ngagai Pejalai Pejilin Sarawak, kelebih agi ba pengawa pemansang nembiak enggau nyadi ketuai.

Tandu Mawan seraya ngenang begunan indu opis asal ke digaga dalam taun 1965, begunan nya udah nyadi kelai penyerakup, servis enggau pemansang nembiak lebih enam dekad sebedau angus kena 6 Februari 2024.

“Sehari tu nyadi maya ti beguna dalam sejarah Pejalai Pejilin di Sarawak.Kenyau ari iya digaga dalam taun 1965, begunan tu udah nyadi kelai penyerakup, servis enggau pemansang nembiak,” ku iya ngenang. – RBI

#ruaiberitaiban#newsiban#beritaiban

Rindu | Titih | Kunsika

KUCHING, 30 Mei — Perintah Sarawak udah berengkah ngaga baru Indu Opis Persekutuan Pejilin Malaysia Pampang Sarawak, ti ​​deka dikelala enggau nama Begunan Tun Openg, nganti begunan asal ti udah angus ketegal penusah angus bulan Februari 2024.

Nitihka ripot TVS, Presiden Kaunsil Pejilin Sarawak, Tan Sri William Mawan Ikom madah, begunan indu opis asal ke digaga dalam taun 1965 udah nyadi kelai penyerakup, servis komuniti enggau pemansang nembiak lebih enam dekad sebedau angus kena 6 Februari 2420.

Ku iya, pengerami nasih tanah ke diatur sehari tu ngelaika siti momen ke berat dalam sejarah Gerakan Pejilin di Sarawak, lalu enggau nya muka batang baru dalam pengawa ngenegapka pemansang rebak baru nengah gerakan Pejilin.

Nitihka ripot, pengelenyau begunan besejarah nya udah nempa pengeransing baru ba raban ketuai Pejilin Sarawak deka ngaga baru indu opis ti moden agi ti bepenau nangkup guna gerempung nya jemah ila.

William Mawan mega madah, projek ngaga baru nya bisi sukung penuh ari Premier Sarawak, Datuk Patinggi Tan Sri Abang Johari Tun Openg, ti setuju meri nama begunan baru nya nyadi Begunan Tun Openg dikena ngingatka jasa enggau pemeri niang Tun Abang Openg ngagai nengeri Sarawak.

Nitihku iya, niang Tun Abang Openg ngembuan kaul ke chukup besai reti enggau Gerakan Pejilin Sarawak lebuh iya bejadika pengawa bejadika Indu Opis Pejilin Sarawak kena 10 Jun 1967.

Enti udah tembu ila, Begunan Tun Openg dikearap ulih nyadi kelai baru ngagai Gerakan Pejilin Sarawak sereta nyendiaka perengka guna ke manah agi dikena bejalaika program pemansang nembiak, latih nyadi ketuai enggau bemacham aktiviti komuniti di serata nengeri.

Berebak enggau nya, pengawa ngaga baru indu opis nya dipeda nyadi kelai penerus legasi Gerakan Pejilin Sarawak dalam ngadaka rebak baru ti bisi disiplin, kompetitif sereta ngembuan runding volunteer. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika