KUCHING, 16 Jun — Sarawak enggau Austria dipeda bisi penau ngerembaika kerejasama strategik dalam bidang teknologi betanam betupi moden, industri pemakai enggau ngatur komoditi ‘hiliran’ setipak enggau pengawa ngenegapka pemansang sektor agro-pemakai nengeri tu.

Tu entara pekara ti dikerandau rambau penemuai basa beserara PYT Dato’ Fenny Nuli ngagai Menteri Industri Pemakai, Komoditi enggau Pemansang Kandang Menua Sarawak, Dato Sri Dr. Stephen Rundi Utom ba Wisma Bapa Malaysia sebedau iya bekejang ke Vienna ngepunka pengawa rasmi nyadi Duta Malaysia, Austria.

Rambau aum nya, kededua piak mega berandauka peluang dikena ngenegapka rentayan kerejasama antarabansa ti ulih meri penguntung terus ngagai pemansang sektor pemakai enggau komoditi Sarawak.

Menteri nya madah, aum nya ukai semina betukuh rasmi aja, tang mega mai reti ke dalam agi nyadi kaban peranak Sarawak ke temegah ati enggau pemujur bala tokoh diplomatik nengeri tu.

“Momen tu bisi reti ukai semina dalam kapasiti rasmi tang nyadi peranak Sarawak ti temegah ati enggau pemujur siku ari bansa diri empu.”

Dato Sri Stephen Rundi mega meri pengaga ati ngagai Dato’ Fenny ti mayuh peneleba dalam diplomasi entarabansa.

“Dato’ Fenny mai rikod servis diplomatik ke chukup manah. Iya kala nyadi Duta Besai Malaysia ke Switzerland, Poland, Thailand, Belgium enggau Peru.

“Diatu iya nyingkang ngagai Austria enggau peneleba ke lebih tuai runding.” ku iya.

Nitih ku iya, peneleba ke besai nya dipechaya ulih muka bidang kerejasama baru entara Sarawak enggau Austria, kelebih agi ba sukut inovasyen betanam betupi, pemansang industri pemakai enggau rentayan rega komoditi.

“Aku mega bekunsika penemu pasal potensial kerejasama Sarawak-Austria, iya nya dalam teknologi betanam betupi moden, industri pemakai enggau ngatur komoditi hiliran.”

Iya mega andal kaul ti ditempa deka meri pangka positif ngagai pemansang ekonomi Sarawak jemah ila.

“Aku pechaya peneleba Dato’ Fenny ulih muka jematan baru ti meri penguntung ngagai Sarawak.” ku iya.

Berebak enggau nya, iya mantaika jaku selamat ngagai Dato’ Fenny Nuli dalam bejalaika mandat baru iya di Vienna.

“Selamat bejalai, Dato’ Fenny.

“Bai nama Sarawak tinggi ba renggat dunya. Awakka Tuhan seruran ngemuntangka pejalai pengawa dia.” ku Rundi.

Perintah Sarawak ngarapka kaul dua piak enggau peluang kerejasama ke diatu benung dipansik enggau deka dipansik ulih terus ditegapka ungkup pemaik pemansang nengeri enggau jaringan antarabansa ke lebih progresif. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

PETRA JAYA, 16 Jun — Sapit Premier Sarawak Datuk Amar Douglas Uggah Embas ke mega Chairman Komiti Besai Pengerami Gawai Dayak Sarawak 2026, nguluka seraban komiti nya penemuai basa ngagai Premier Sarawak ba Kompleks Satria Pertiwi, sehari tu tadi.

Penemuai nya diatur dikena nyuaka tesau rasmi ngagai Premier Sarawak Datuk Patinggi Tan Sri (Dr) Abang Haji Abdul Rahman Zohari bin Tun Datuk Abang Haji Openg ngulu dua bengkah pengerami besai beserimbai enggau Pengerami Gawai Dayak Sarawak 2026, iya nya Pengawa Bebaris Niti Daun Dayak 20 Jun enggau Pengerami Makai Lemai Renggat Sarawak 2026 ti deka diatur 21 Jun tu.

Rambau penemuai nya, raban komiti nya mega madahka pemansang ke pemadu baru ba pengawa nyendiaka diri ngintu pengerami berambaika leka jaku “Segulai Sejalai”, ti deka mandangka penyelai budaya, adat pesaka komuniti Dayak di Sarawak.

Nitihku Datuk Amar Douglas Uggah Embas, pengerami Gawai Dayak renggat nengeri terus nyadi pelasar beguna dalam ngenegapka penyerakup rayat sereta ngenegapka agi pengawa ngangkatka penyelai budaya nyadi pelasar penegap Sarawak.

Iya nyemetak madahka rambai jaku Segulai Sejalai mandangka semengat begulai ti udah lama nyadi teras pengelantang komuniti pupu bansa di nengeri tu.

“Pengerami tu ukai semina ngerami pesaka asal komuniti Dayak aja, tang mega nyadi pelasar dikena ngenegapka penyerakup sereta nentuka reta budaya terus dijaga sereta ditampung ngagai rebak dudi,” ku iya.

Iya mega madah, Pengawa Bebaris Niti Daun 2026 ti deka diatur kena 20 Jun tu ila, dipelaba deka ngempuruka kontinjen ari serata Sarawak sereta mega sekeda penyereta khas, lalu nyadika nya siti ari batang pengerami ti deka dianti.

Batang pengerami kepenudi deka diatur kena 21 Jun nengah Pengerami Makai Lemai Gawai Dayak Renggat Sarawak 2026 di Palan Konvensyen Borneo Kuching (BCCK), ti deka ngempuruka bala ketuai nengeri, temuai dipebasa enggau pengari komuniti Dayak ari serata Sarawak.

Raban nya mega meri besai terima kasih ngagai Premier Sarawak ti seruran meri sukung dalam pengawa ngetan sereta negika pesaka asal pupu bansa di nengeri tu, setipak enggau aspirasyen Sarawak ti maju, inklusif sereta meruan.

Pengerami nya dipelaba deka diintu enggau penatai Ketuai Pemegai Menua (TYT) Yang Di-Pertua Negeri Sarawak, Tun Pehin Sri Dr Wan Junaidi Tuanku Jaafar begulai enggau bini iya, Toh Puan Datuk Patinggi Fauziah Mohd Sanusi, sereta mega Menteri Besai Malaysia, Dato’ Seri Anwar Ibrahim.

Sama bisi nyereta penemuai nya, Menteri ba Opis Menteri Besai Sarawak, Dato Sri John Sikie Tayai, Menteri Industri Pemakai, Komoditi enggau Pemansang Kandang Menua Sarawak, Dato Sri Dr Stephen Rundi Utom, Sapit Menteri Nembiak, Lumba enggau Pemansang Orang Dagang Sarawak, Datuk Gerald Rentap Jabu, Menteri Pengerai Mensia Mayuh, Pengawa Berumah enggau Perintah Lokal Datuk Dr Penguang Manggil, Sapit Menteri ba Opis Menteri Besai Sarawak (Undang-Undang enggau Adat Bumiputera), Datuk Jefferson Jamit Unyat enggau Direktor Opis Kerejaraya Sarawak Datu Ir. Cassidy Morris — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

SIBU, 16 Jun — Bala ketuai adat nyengkaum tuai rumah, ketua raban bansa, pemancha enggau temenggung dilalau chakah agi bejalaika tanggungpengawa nyadi kuta dalam nagang isu jadi melaki bini baruh umur di Sarawak.

Menteri Orang Indu, Nembiak Mit enggau Pengelantang Komuniti Sarawak, Dato Sri Fatimah Abdullah, madahka raban tu ngembuan kuasa ke besai dalam proses ngaga pemutus bekaul enggau pengawa jadi melaki bini nitihka adat lalu enggau nya ulih nyadi rintai mua nyaga hak enggau pengidup nembiak jemah ila.

Kenu ku iya, pengawa nya berat dikena nentuka raban nembiak ulih nampung pelajar sida sereta ngasaika peluang nempa pengidup ke menyana agi.

“Kitai dekaka mayuh agi orang meretika hak anak mit, enti sida belaki bebini maya umur agi biak, selalu iya sida deka badu besekula lalu enda sempat nembuka pelajar nyentuk ke Pom Lima,” ku iya.

Iya madah munyi nya lebuh bejadika Konvensyen Penyedar Hak Nembiak Mit di Sibu, kemari.

Ku iya nambah, pengawa jadi melaki bini enggau betubuh bisi maya umur agi biak ukai semina ngeruga pelajar tang mega tau meri risiko pengerai ngagai indai enggau anak mit laban tubuh nembiak rebak baru bedau penuh mansang napi proses betubuh bisi enggau beranak.

Berindik enggau nya, perintah nengeri deka terus ngenegapka atur nagang nengah advokasyen enggau program pelajar seksual nembiak rebak baru dikena nambahka penyedar mensia mayuh pasal risiko nembiak ngandung sereta empas ari pengawa jadi melaki bini tumu.

Iya nyemetak madahka kerejasama semua piak nyengkaum ruang bilik, komuniti enggau ketuai adat beguna amat dalam nentuka pengelantang enggau hak nembiak terus dijaga ngambika ulih ngadaka rebak dudi hari ti lebih bepelajar sereta lantang. – RBI

Sumber UKAS

#ruaiberitaiban#newsiban#beritaiban

Rindu | Titih | Kunsika

KUCHING, 16 Jun — Gabungan Parti Sarawak (GPS) nyemetak madahka penatai YB Dato’ Sri Tiong King Sing ba sebengkah atur pengawa kimpin politik di Johor ketegal kapasiti diri empu lalu nadai kaul enggau GPS.

Penerang tu digaga berindik ari ripot media ti mantaika mayuh macham spekulasyen bekaul enggau kaul iya dalam program nya.

Nitihka penerang ari Ketuai Pemadah Parti Pesaka Bumiputera Bersatu (PBB) YB Dato Sri Haji Abdul Karim Rahman Hamzah, parti iya semina nemu pasal pekara nya pengudah diripot sebuah portal berita menua tu.

Ku iya nerang, iya semina nemu penatai iya (Dato’ Sri Tiong) ba pengawa kimpin di Johor pengudah dipadahka ripot nya ari sebuah portal berita menua tu.

“Penatai iya sepenuh iya dalam kapasiti diri empu sereta nadai kaul enggau GPS.

“GPS mengkang konsisten enggau penetap enda masuk champur dalam pekara pengawa bepilih di nengeri bukai.

“Sebarang spekulasyen ti ngait GPS enggau aktiviti ti disebut nya enda amat.” ku iya.

GPS mega nyemetak madahka penetap politik gempung nya tetap konsisten iya nya enda masuk champur dalam pekara politik tauka kimpin pengawa bepilih di luar Sarawak.

Berindik enggau nya, GPS bebendar ningkah sebarang tuduh tauka spekulasyen ti nguji deka ngaitka gempung nya enggau aktiviti kimpin ti dikerandauka.

Iya ngarapka penerang tu ulih nyerenih saru penemu semua ti udah nyadi ba media enggau ruang mensia mayuh. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

PAKAN, 16 Jun – Kaban Parlimen Julau, Datuk Larry Sng Wei Shien merambu ngambika perintah berunding numbuhka kandang endur industri khas di pelilih Pakan enggau Julau nyadi singkang strategik dikena ngenyampatka pemansang ekonomi sereta ngenegapka sektor betanam betupi ba kededua kandang menua nya.

Mansutkan jaku ngenang Pengerami Nangguhka Pemakai Agrofest 2026, iya madahka majoriti peranak di Pakan enggau Julau agi bepanggai ba sektor betanam betupi nyadi batang penatai pemisi sida.

Taja pia, sida betapi enggau bemacham pemar ba pengawa ngelakuka asil sida ngagai makit ke lebih luas nyengkaum ba renggat antarabansa.

Nitih ku iya, entara batang penanggul iya nya begunaka nangkup mayuh macham peminta pensijilan baka pensijilan halal kelimpah ari isu ngempu tanah ti entas dikena ngemuntangka orang dagang ngulihka permit enggau setipikit bekaul.

Ku iya nerang, agi mayuh peranak ba kandang menua nya ke bedau bisi geran tanah ari baruh Seksyen 18, lalu enggau nya nyekat pengulih sida ngerembaika dagang nengah chara komersial sereta ngulihka akses ngagai bemacham insentif perintah.

Berindik enggau nya, iya bepenemu pengawa ngaga kandang endur industri di Pakan tauka Julau ulih nyendiaka ekosistem pemansang ti lebih bestruktur ungkup pengawa proses, makit enggau aktiviti pemansang produk betanam betupi menua tu.

Perambu nya mega dipeda bisi potensial muka ruang ngagai orang betanam betupi nambahka rega tambah produk sida sereta ngerembaika peluang dagang ngagai tikas ke lebih kompetitif.

Berebak enggau nya, iya mega meri langgur penemu ngambika perintah beratika pengawa muka kandang endur pemansang dalam kandang lima ngagai 10 kilometer ari Pasar Pakan enggau Pasar Julau ngambika tanah Seksyen 18 ulih diperunding ditukar ngagai status midzone ti engkeman agi ungkup tuju pemansang.

Ku iya, isu status tanah ke diatu nyadi siti ari batang pekara ti nyekat pemansang bedandang besai di kededua pelilih menua nya.

Ku iya nambah, ubah status tanah ke engkeman bisi potensial matak puku baru sereta meransang pengawa ngaga premis dagang, hotel, kandang endur berumah enggau mayuh macham perengka guna infrastruktur.

“Enti mayuh agi kandang endur ulih dikemansangka nengah chara ke diperambu, nya ukai semina ulih nambahka rega tanah tang mega ulih muka peluang gawa, ngangkatka aktiviti ekonomi sereta ngenegapka sosio-ekonomi peranak menua nya,” ku iya.

Iya andal amat perambu numbuhka kandang endur industri enggau ngemesaika zon pemansang di Pakan enggau Julau ulih nyadi pematak ngagai transformasyen ekonomi menua pesisir sereta mai ubah ke besai agi ngagai kededua pelilih menua jemah ila.

#ruaiberitaiban#newsiban#beritaiban

Rindu | Titih | Kunsika

SRI AMAN, 16 Jun – Sapit Menteri Pemansang Bakat Sarawak ke mega Kaban Kunsil Nengeri (ADUN) N.32 Simanggang, Datuk Francis Harden Hollis, bejalaika pengawa nemuai ngagai tiga endur projek Program Transformasyen Menua Pesisir (RTP) ba kandang menua DUN Simanggang beratika diri empu pejalai projek nya.

Penemuai nya ngembuan tuju deka nentuka projek ti udah diserah ngagai kunteriktor ti dipilih nengah chara chabut undi ari Bagi Pemansang Opis Residen bejalai nitihka timpuh enggau spesifikasyen ti udah ditetapka.

Entara projek ke bisi dilawa iya nya projek ngangkatmanah Gelanggang Bola Keranjang ngagai Gelanggang Mayuh Guna Tebuka Beratap ba Sekula Sekondari (SMK) Simanggang, Sri Aman, ke diatu udah nyapai penyulut 80 peratus lalu dipelaba tembu ujung bulan Jun 2026.

Sama bisi dilawa iya nya projek ngangkatmanah Padang Main Bol Sekula Sekondari (SMK) St.Luke, Sri Aman ti udah ngerikodka penyulut 68 peratus enggau disadang tembu bulan September 2026.

Berebak enggau nya, projek Ngangkatmanah Kort Mayuh Guna Tebuka di SMK Sri Aman, Sri Aman udah nyapai penyulut 80 peratus lalu dipelaba tembu penuh dalam bulan Julai 2026.

Nitih ku Datuk Francis Harden Hollis, pengawa matau enggau seruran beguna amat dikena nentuka tetiap projek RTP ulih ditembuka nitihka timpuh, lalu ari nya meri penguntung ngagai komuniti sekula enggau komuniti menua nya.

Penemuai nya mega digulu pemesai ari Opis Kereja Raya (JKR) Bagi Menua Sri Aman, pengari penerima bantu sereta pengari kunteriktor ke bisi kaul enggau pengawa bejalaika projek nya.

Entara ke bisi datai iya nya Injinir Kereja Raya Bagi Menua Sri Aman, Vanessa Siah Anak Sampar, Penulung Injinir JKR Bagi Menua Sri Aman, Johairi Bin Saldrik, Penulung Servis Am JKR Sri Aman, Fredrick Anak Jonathan Isau enggau Lig Sayer Anak Kebong, Kaban Kunsil Pelilih Sri Aman, Cr Dilang Jungai, Ketuai PIBG SMK St. Luke, Alfred Anak Kendim sereta Penulung Kanan Kokurikulum SMK Sri Aman, Abdul Rahim Nawawi.

Penemuai nya mandangka komitmen perintah Sarawak ti terus nentuka pemansang infrastruktur pelajar di kandang menua Simanggang dipejalaika enggau efektif ungkup pengelantang rayat enggau penyulut nengeri tu. -RBI

#ruaiberitaiban#newsiban#beritaiban

Rindu | Titih | Kunsika

LUBOK ANTU, 16 Jun – Tikas ai ba Jalai Nanga Kumpang diripotka niki ngagai 1.0 meter ngujungka jalai ampuh sereta enda ulih ditengah semua bansa perengka pengangkut.

Nitihka penerang Raban Penyaga Orang Periman Malaysia (APM) Pelilih Lubok Antu, gaya nya ditemu asil ari pengawa matau ti dipejalaika tiga iku kaban APM sehari tu.

Arus ai nya diripotka ba tikas ke sedang, tang agi berisiko sereta tau ngeruga pengelikun penguna jalai alun.

Berindik enggau nya, mensia mayuh dilalau anang nengah kandang endur ke ampuh bah lalu dipinta ngena jalai alternatif nengah Jalai Sayat nuju ngagai Engkilili tauka Lubok Antu dikena nyeliahka sebarang penusah ke enda dikedekaka nyadi.

APM madahka pengawa matau ti enda ngetu dipejalaika dikena nentuka pemansang gaya bah ke diatu ulih dipatau enggau silik lalu atur lengkas ulih dipejalaika enti bisi pematut.

Mensia mayuh ti begunaka bantu tauka betapi enggau sebarang penusah ngenyit tau betelefon ngagai talipaun penusah ngenyit 999 tauka Palan Kawalan Operasi (PKOD) Pelilih Lubok Antu nengah lumur 083-584639.

APM mega ngingatka mensia mayuh ngambika seruran nemu jaku tangkan gaya hari sereta ngemeratka pengelikun diri enggau diri sebilik sekumbang timpuh gaya hari enda entap nyerumba Monsun Barat Daya. – RBI

#ruaiberitaiban#newsiban#beritaiban

Rindu | Titih | Kunsika

BINTULU, 16 Jun — Sebuah bot tunda ditan Ejensi Penerit Adat Maritim Malaysia (Malaysia Maritim) Zon Maritim Bintulu pengudah ditemu enda mujur ngibarka tambai Malaysia lebuh ba kandang endur Palan Penyangkai Kapal Malaysia besemak enggau kandang tasik Kuala Kemena, ensanus.

Nitihka penerang rasmi Maritim Malaysia penusah nya ditemu asil ari pengawa matau ti enda ngetu ari baruh Op TIRIS 4.0 enggau Op PERMAI 01/2019, urung 2.4 batu nautika barat laut Kuala Kemena pukul 10.10 pagi.

Pengawa meresa nya tetemuka kapal nya dipelaba ngereja penyalah ari baruh ‘Ordinan Perkapalan Saudagar’ (Merchant Shipping Ordinance 1952) laban enda mandangka tambai Malaysia ba Palan Penyangkai Kapal Malaysia ari mata panas niki nyentuk matahari padam baka ke udah ditetapka undang-undang.

Bot tunda nya dipejalaika kru enam iku ti mungkur lima iku peranak Indonesia nyengkaum juragan enggau siku peranak India.

Semua kru kapal enggau kapal nya ditan sereta diiring ngagai Palan Ngetanka Kapal Zon Maritim Bintulu ngambika dipansik enggau silik agi ulih pemesai pemansik.

Maritim Malaysia nyemetak madahka pengawa neritka atur tu mandangka komitmen ejensi nya terus nentuka nitihka undang-undang maritim, kelimpah ari ngenegapka sukut pengelikun, pemaik enggau kedaulatan kandang tasik menua tu.

Dalam penerang ke sama, Maritim Malaysia mega nyemetak madahka pengawa ngasika atur navigasyen nyengkaum pengawa ngitang tambai menua nyadi elemen ke berat kelai identiti kapal sereta mega aspek pengelikun navigasyen ba kandang tasik Malaysia.

Bintulu – Maritim Malaysia deka terus chakah agi bejalaika pengawa matau sereta matau ba kandang tasik Sarawak dikena nentuka pengawa nitihka undang-undang seruran dikemeratka semua piak ti beoperasyen di tasik.

Berindik enggau nya, komuniti maritim dipinta seruran nitihka atur ti udah ditetapka dikena nyeliahka atur penerit atur diambi. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

MIRI, 16 Jun — Opis Bomba enggau Penyah Penusah Malaysia (JBPM) Zon 6 Sarawak udah bejalaika operasyen madamka ap ba penusah angus ti nuntung sebuah rumah di Jalai Beluru, Bakong, kemari.

Penusah nya ngaul sebuah rumah jenis struktur ukai tetap ke ngembuan pemesai urung 24 x 32 kaki ke 100 peratus angus.

Kangau ngenyit nya diterima urung pukul 6.20 lemai sebedau jentera keterubah ari Balai Bomba enggau Penyah Penusah (BBP) Lopeng dianjung pukul 6.20 lemai.

Bomba datai ba endur nya urung pukul 6.38 lemai enggau penyauh pejalai urung 77 kilometer.

Lebuh datai ba endur nya, Komander Operasyen bejalaika pengawa beratika gaya palan penusah (size up) sebedau pengawa madamka api dipejalaika ngena arus 400 kaki enggau ngena ai ari paip bomba ke semak.

Asil ari pengawa jampat raban operasyen, api mujur dirara urung pukul 6.40 lemai lalu dipadam abis urung pukul 7.47 lemai.

Pengawa meresa silik mega dipejalaika dikena nentuka nadai pun penusah angus bukai ke tau ngasuh penusah angus nya nyadi baru.

Operasyen nya mungkur injin Tender Penyelamat Bomba (FRT) enggau Servis Penyelamat Perubat Ngenyit (EMRS) ari BBP Lopeng lalu dibantu Polis DiRaja Malaysia (PDRM). Nadai perengka khas dikena dalam operasyen nya.

Pengudah nentuka endur nya likun, tim operasyen udah nya mulaika diri ngagai stesyen enggau operasyen tembu enggau rasmi.

JBPM Zon 6 Sarawak terus komited bejalaika pengawa ti jampat, bedisiplin sereta efektif dikena nentuka pengelikun komuniti seruran dijaga. – RBI

#ruaiberitaiban#newsiban#beritaiban

Rindu | Titih | Kunsika

KUCHING, 15 Jun – Angkatan Zaman Mansang (AZAM) Sarawak bebendar deka ngadaka mayuh agi raban nembiak ti bepenau, besemekih sereta ulih nyadi ejen ubah ti mai empas positif ngagai komuniti enggau pemansang nengeri.

Ketuai Pemesai Eksekutif AZAM Sarawak, Ali Suhaili madah, pemansang raban nembiak kemaya hari tu patut ngelui ari semina nyereta program aja, tang ngemeratka pengawa ngemansangka individu ti bepenau meri embing ngagai komuniti nengah pengawa nyadi ketuai, penemu enggau pengawa ti positif.

Nitih ku iya, AZAM meda raban nembiak nyadi aset strategik ti bisi potensial nyadi ketuai komuniti, ejen ubah enggau pengerembai pemansang komuniti, kelimpah ari bejalaika tanggungpengawa nyadi malin dalam konteks ke lebih luas.

“AZAM deka meda mayuh agi raban nembiak Sarawak nyadi individu ti ulih meri embing ngagai mensia mayuh nengah nilai, integriti, nyadi ketuai enggau pengawa ti positif.

“Pengawa ngembing bepelasarka penau ti deka diasilka kami ukai semina sida ti ngembuan raban ti mayuh, tang sida ti ulih meri inspirasyen, nempa peluang sereta mai ubah ti bisi reti ngagai komuniti.

“Nengah pelasar baka AZAM Young Souls (AYS), kami nyendiaka ruang ngagai raban nembiak nempa pengarap diri, ngenegapka pengelandik nyadi ketuai enggau komunikasyen sereta ngerembaika potensial sida nyadi ketuai jemah ila ke ulih meri pangka ngagai pemansang Sarawak,” ku iya lebuh bejaku ba Pengerami Nutup Program AYS Capacity Building 2026 di Kompleks AZAM seharitu tadi.

Iya mega nyemetak madahka AYS begunaka terus mansang nyadi pelasar pemansang nembiak ke relevan enggau guna ke diatu, kelimpah ari nyadi ruang endur nembiak rebak baru nempa kaul, mansik peluang baru sereta ngerembaika potensial sida.

Program AYS Capacity Building 2026 ti diatur ari 12 ngagai 15 Jun tu tadi ngempuruka 51 iku penyereta ti mungkur kaban AYS enggau Toastmasters AYS.

Berambai jaku “Leading the Legacy: Lead Today, Inspire Tomorrow”, program nya diatur nyadi sebagi ari pengawa AZAM ti seruran dipejalaika dikena ngenegapka raban nembiak nengah pemansang nyadi ketuai, komunikasyen, pengawa volunteer enggau ngaul komuniti.

Program tu mega beguna nyadi pelasar pemansang dikena ngiring sereta ngenegapka pangku pengawa Komiti AYS baru ungkup penggal 2026 ngagai 2028 dalam ngiring mayuh macham inisiatif nembiak jemah ila.

Sepemanjai pengawa empat hari nya, bala penyereta dipeda enggau mayuh macham aktiviti pemansang diri enggau nyadi ketuai bepelasarka chara belajar peneleba, ti ngemeratka pengawa nempa ulah, berunding kritikal, pengelandik komunikasyen, kereja beraban enggau penyedar rama.

Pengawa ngatur program tu mandangka komitmen AZAM ti seruran ngemansangka modal mensia nembiak ti ukai semina ngembuan pengelandik enggau penemu, tang mega bepenau nyadi ketuai enggau ejen ubah ti ulih nyaup pemansang komuniti, nengeri enggau menua.

Seriris enggau rambai jaku program, bala penyereta mega dikingatka tetiap pengawa ke dipejalaika sehari tu bisi potensial nyadi inspirasyen enggau legasi ke deka ditampung rebak dudi hari. – RBI

#ruaiberitaiban#newsiban#beritaiban

Rindu | Titih | Kunsika