BATU NIAH, 28 Mei – Menteri Industri Pemakai, Komoditi enggau Pemansang Kandang Menua Sarawak, Dato Sri Dr. Stephen Rundi Utom nyukung penuh perambu ngangkatka kandang menua Niah-Ulu Suai ngagai status pelilih menua penuh lalu deka mai perambu nya ngagai renggat Kabinet Sarawak ngambika ulih diperunding enggau silik agi.
Iya madah munyi nya lebuh bejaku nyadi temuai dipebasa ba pengerami Mantar Gawai Dayak 2026 ke diatur Gerempung Ketuai Raban Bansa Ulu Suai (PKKKUS) begulai enggau Komiti Penduduk Iban (JKPI) Zon Niah Kemena ke udah nyadi ba Balai Mensia Mayuh ni Batu Niah, kena Hari Tiga tu tadi.
Nitihku iya, perambu ke dibantaika Residen Miri, Galong Luang, setipak enggau guna ke diatu laban kandang menua Niah-Ulu Suai diatu ngayanka pemansang ke jampat ari sukut penambah penyampau tubuh, peluang kereja enggau penumbuh ekonomi komuniti menua nya.
“Kitai meda pemansang ba sitak tu majak ngerembai, penyampau raban nembiak ti begunaka peluang gawa mega majak nambah lalu kuasa meli komuniti majak tegap.”
Nya alai, sitak tu patut dikira nyadi pelilih menua penuh,” ku iya.
Dr. Rundi ke mega Kaban Kunsil Nengeri (ADUN) Kemena madah, status pelilih menua penuh deka muka mayuh agi peluang pemansang infrastruktur enggau perengka guna mensia mayuh ungkup pemaik rayat.
Entara perengka guna ke bisi potensial dikemansang iya nya stadium, masjid baru, projek kereja rama enggau pemansang tumpuk pendiau baru ke ulih nyungkak agi penumbuh ekonomi kandang menua.
Iya taja pia nerangka nadai jamin timpuh proses ngemendarka perambu nya, tang nyemetak madahka perambu nya deka diberi perati ke serius ba renggat Kabinet Sarawak bepelasarka potensial pemansang enggau pemerat iya ngagai komuniti di kandang menua Niah-Ulu Suai.
Ku iya nambah, pengawa ngangkatmanah sitak nya seriris enggau agenda pemansang perintah Sarawak dalam ngenegapka sistem pentadbiran enggau ngenyampatka pengawa ngenataika perengka guna enggau servis ngagai rayat di menua pesisir. — RBI
#Beritalban | Ruai Berita Iban
Rinduka | Titihka | Kunsika
