SONG, 17 Jun — Kaban Kunsil Nengeri (ADUN) Katibas, YB Lidam Assan, madahka projek ngangkatmanah Jematan Nanga Musah enggau pengawa ngaga baru Jalai Nanga Banjor ngagai Nanga Makut diatu benung bejalai nitihka timpuh ke udah ditetapka.

Nitihku iya, pengawa matau ba palan tetemuka kededua projek nya mandangka penyulut ke manah sereta ba jalai ke betul dikena bejalaika pengawa ke udah ditusun enggau perambu.

“Sechara penuh, projek tu bejalai enggau lanchar. Jematan Nanga Musah dipelaba tembu bulan April 2027, lalu Jalai Nanga Banjor nuju Nanga Makut dipelaba tembu bulan Disember 2027,” ku iya lebuh ngabas projek nya ba kandang endur nya sehari tu tadi.

Iya mega ngenataika pengaga ati iya ngagai semua piak ke bisi kaul dalam nentuka pengelanchar bejalaika projek, nyengkaum tim teknikal enggau kunteriktor ba palan nya.

“Aku puas ati enggau prestasi bejalaika pengawa ba renggat baruh lalu meri terima kasih ngagai semua piak ti bebendar gawa enggau aku,” ku iya nambah.

YB Lidam nyemetak madahka chara kereja ti jampat sereta betul amat beguna dikena nentuka genap projek pemansang di kandang menua Katibas ulih tembu nitihka pelin sereta meri penguntung terus ngagai rayat.

“Pengawa tu dipejalaika enggau jampat sereta betul,” ku iya. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

KAPIT, 17 Jun — Projek ngaga jematan enggau jalai alun baru ari Nanga Belawai nuju Jalai Song–Kapit dikearapka ulih ngenegapka rentayan penyambung menua pesisir sereta ngemanahka akses mensia mayuh ngagai perengka guna pemun, pengelikun pejalai enggau peluang ekonomi di kandang menua Kapit.

Kaban Kunsil Nengeri (ADUN) Katibas, Lidam Assan madah, projek nya entara inisiatif beguna dalam ngenyampatka pemansang infrastruktur menua pesisir ti lebih komprehensif sereta meri empas tinggi.

Ku iya, projek nya ngaul skop ngaga jalai belakin sepemanjai 2.8 kilometer, dua jematan besai iya nya jematan Batang Rajang sepemanjai 550 meter enggau jematan Sungai Belawai sepemanjai 160 meter, kelimpah ari pengawa ngangkatmanah kereja ba simpang jalai enggau infrastruktur ke bekaul.

“Projek tu mungkur pengawa ngaga jalai belakin, jematan sepemanjai 550 meter meraka Batang Rajang, jematan Sungai Belawai sepemanjai 160 meter, ngangkatmanah simpang jalai enggau kereja ke bekaul.

“Nya deka nembuka rentayan Jalai Song–Kapit sereta ngenegapka pemansang menua pesisir di Kapit,” ku iya nengah sebengkah penerang.

Ku iya nambah, pengawa bejalaika projek nya deka meri empas terus ngagai pengawa ngangkatka kualiti pengidup rayat, kelebih agi ari sukut mobiliti, pengelikun enggau pemansang ekonomi kandang menua.

“Projek tu deka ngemanahka agi rentayan komunikasyen, pengelikun pejalai enggau akses ngagai peluang ekonomi enggau servis pemun ungkup peranak menua nya,” ku iya.

Sesi Penerang Tinda enggau Nemuai ke Palan ungkup projek nya bela digulu Menteri Kereja Raya, Dato Sri Alexander Nanta Linggi, ke bisi datai beratika baru pengawa bejalaika enggau perambu projek nya.

Lidam mega meri besai terima kasih ngagai Perintah Besai ti seruran meri sukung dalam pengawa bejalaika projek ti meri empas tinggi tu.

“Aku meri besai terima kasih ngagai Perintah Besai enggau YB Menteri Kereja Raya ketegal komitmen enggau sukung sida dalam nentuka projek tu ulih dipejalai pulaika pemaik rayat,” ku iya.

Nitihku iya, projek tu deka dipejalaika enggau chara ti terang nengah kerejasama kerejasama rat entara Perintah Besai enggau Perintah Nengeri Sarawak, setipak enggau pengawa ngenegapka pemansang infrastruktur menua pesisir ungkup pengelantang rayat.

Projek tu dikearap nyadi siti ari singkang besai pemansang ekonomi enggau rama di kandang menua Kapit kelimpah ari nembuka rentayan jalai besai di Song–Kapit. – RBI

#ruaiberitaiban#newsiban#beritaiban

Rindu | Titih | Kunsika

BELAGA, 17 Jun – Pengeransing ngenegapka penyedar komuniti pasal penusah salah guna dadah majak ditegapka lebuh Ejensi Anti Dadah Kebangsaan (AADK) Pelilih Sibu ngatur Ekshibisyen Anti Dadah beserimbai enggau Program Forum Penyedar Sosial Komuniti Belaga ba Dewan Sri Jayong, Sekula Sekondari (SMK) Belaga empai lama.

Program tu diatur dikena meri penyedar ngagai semua renggat mensia mayuh pasal penusah dadah ti agi nyadi munsuh lumur satu menua, kelimpah ari ngenegapka komitmen enggau kerejasama strategik entara ejensi enggau komuniti dalam pengawa ngelaban pengawa salah guna dadah enggau komprehensif.

Inisiatif tu sebagi ari pengawa AADK ti seruran dipejalaika dikena ngerembaika pesan nagang dadah terus ngagai komuniti, kelebih agi ba kandang menua pesisir ti begunaka penerang ti seruran ngagai risiko enggau empas salah guna dadah.

Pengerami bejadi program nya dipenyadi Sapit Menteri Utiliti enggau Telekomunikasyen I (Telekomunikasyen) ke mega Kaban Kunsil Nengeri (ADUN) sitak N.65 Belaga, Datuk Liwan Lagang.

Program ke diatur Gerempung Bansa Sekapan Belaga enggau kerejasama SMK Belaga mujur ngempuruka urung 150 iku penyereta ti mungkur bala nembiak, apai indai enggau raban komuniti menua nya.

Dikena nyapai juluk ti udah dilangkar, bemacham aktiviti dipejalaika nyengkaum sesi forum penyedar rama, pengawa pemandang anti dadah enggau pengawa ngenataika Pesan Anti Dadah (PESADA) ti ngemeratka chara nyeliah enggau tanggungpengawa bekunsi dalam mutarka isu salah guna dadah.

Nengah program nya, bala penyereta ukai semina dibantaika enggau penerang bekaul enggau empas ke enda manah ari dadah ngagai individu, ruang bilik enggau mensia mayuh, tang mega diperansang bejalaika tanggungpengawa nyadi raban penyaga komuniti dalam nyaga pengelantang enggau pengelantang rama.

AADK ngarapka program ke baka tu ulih terus ngenegapka penyedar mensia mayuh sereta ngerapitka kaul komuniti dalam nyukung agenda nasional nuju ngamatka juluk Dadah Terkawal 2030. – RBI

#ruaiberitaiban#newsiban#beritaiban

Rindu | Titih | Kunsika

PETRA JAYA, 17 Jun — Aum Komiti Pemandu Ejensi Pemansang Bagi Menua Betong (BDDA) Bil 2/2026 ti bechairmanka Sapit Premier Sarawak Datuk Amar Douglas Uggah Embas, Chairman BDDA ke mega Kaban Kunsil Nengeri (ADUN) Bukit Saban udah diatur ba Bilik Aum Besai, Ringkat 2, Wisma Bapa Malaysia, kemari.

Aum nya nyadi pelasar besai dikena beratika baru pejalai projek pemansang ke diatu ba selampur sitak DUN (DUN) enggau Parlimen di Bagi Menua Betong, kelimpah ari ngatur perambu ngambika tetiap inisiatif pemansang ulih dipejalaika enggau lebih sistematik, ngasi sereta meri penguntung terus ngagai rayat.

Nitihka penerang ari Kaban Parlimen Betong, Dato Dr. Richard Rapu, aum nya mega ngemeratka pengawa mantaika ripot pemadu baru bekaul enggau projek BDDA dalam bidang nya kelimpah ngelala isu bejalaika pengawa enggau pemar ke ditapi ejensi ke bekaul.

Ku iya, Chairman aum Datuk Amar Douglas Uggah mega nyemetak madahka semua ejensi ti bejalaika pengawa patut ngenegapka komitmen sida sereta nentuka projek ti udah diperambu sereta udah sedia dipejalaika ulih dikelengkas ungkup pemaik rayat di kandang menua Betong.

Berebak enggau nya, Kaban Kunsil Nengeri (ADUN) Krian, Friday Belik, ba penerang iya nyemetak madahka aum tu beguna amat dalam ngenegapka koordinasyen entara semua ejensi bejalaika pengawa enggau pengari rayat dikena nentuka projek pemansang di Bagi Menua Betong dipejalaika enggau lebih teratur sereta meri empas ke tinggi.

Ku iya, komitmen ti seruran ari semua piak diguna dikena nentuka agenda pemansang Betong terus nyingkang setipak enggau aspirasyen pemansang Sarawak ti meruan, inklusif sereta fokus ngagai pengelantang pendiau rayat.

Sechara penuh, aum tu ngenegapka koordinasyen strategik entara perintah nengeri, ejensi bejalaika pengawa enggau pengari rayat dalam nentuka pengawa bejalaika projek pemansang di Bagi Menua Betong ulih dikelengkas sereta nyapai juluk ke udah ditetapka.

Aum nya bela digulu Sapit Chairman BDDA, Datuk Gerald Rentap Jabu (ADUN Layar) sereta mega pengari rayat nyengkaum ADUN Saribas YB

Datuk Mohammad Razi Sitam, Ahli Parlimen Batang Lupar YB Tuan Mohamad Shafizan Haji Kepli, ADUN Beting Maro YB Dato Haji Razaili Gapor, ADUN Kabong YB Dato Che Kadir, ADUN Kalaka YB Haji Mohammad Bin Duri, ADUN Lingga Puan Dayang Noorazah Bte Awang Sohor, Ketuai-Ketuai Opis enggau PTK BDDA Tuan Abang Mohamad bin Trukie. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

KUCHING, 16 Jun – Premier Sarawak, Datuk Patinggi Tan Sri Abang Johari Tun Openg, udah dichiri enggau rasmi nyadi Patron Yayasan Jantung Sarawak berengkah 15 April 2026, lalu enggau nya ngenegapka tanggungpengawa yayasan nya ngetanka penyedar pengerai jantung enggau pengelantang rayat di nengeri tu.

Pengawa nyiri nya dipadahka nengah penemuai basa raban ari Yayasan Jantung Sarawak betuaika Sapit Premier Datuk Amar Prof Dr Sim Kui Hian ngagai Premier Sarawak ba Kompleks Satria Pertiwi, sehari tu tadi.

Rambau penemuai nya, pengari yayasan nya nyuaka surat rasmi nyiri Abang Johari kelai meri terima kasih sereta ngaku komitmen enggau ketuai iya dalam nyukung pemansang sektor pengerai di Sarawak.

Berebak enggau nya, Dr Sim mega dipadu nyadi Chairman Yayasan Jantung Sarawak berengkah ari haribulan ke sama.

Penemuai nya mega nyadika pelasar meri kelala kaban Kaunsil Pemegang Amanah Yayasan Jantung Sarawak ngagai Abang Johari ti nyadi patron baru yayasan nya.

Kelimpah ari pengawa mantaika surat chiri, sesi randau nya mega ngenang pasal pangku pengawa enggau tuju Yayasan Jantung Sarawak dalam ngangkatka penyedar mensia mayuh pasal nyaga pengerai jantung, pengawa nagang penyakit kardiovaskular enggau pengawa bejalaika program pelajar enggau pengelantang pendiau ti meri penguntung ngagai rayat.

Aum nya mega muka ruang dikena ngenegapka kerejasama strategik entara Yayasan Jantung Sarawak enggau Perintah Sarawak dalam ngerembaika pengawa bejalaika inisiatif pengerai mensia mayuh sereta ngenegapka agenda pengelantang rayat nengah bemacham program enggau aktiviti jemah ila.

Yayasan Jantung Sarawak dalam penerang sida meri pengaga ati ngagai pengeran Premier Sarawak nerima pangku pengawa nya lalu andal ketuai iya deka terus ngenegapka kredibiliti enggau efektiviti yayasan nya dalam ngelakuka pengerai jantung enggau chara idup bepengerai di serata Sarawak.

Sama bisi ngulu penemuai nya, Sapit Menteri Pelajar, Inovasyen enggau Pemansang Bakat, Datuk Dr Annuar Rapaee ke mega Kaban Pemegai Amanah Yayasan Jantung Sarawak enggau Datuk Amar Jamilah Anu. – RBI

SIBU, 16 Jun — Pemekuh media patut terus diberi kuasa dikena napi pemar transformasyen digital ti majak jampat, kelebih agi ba jeman pemintar tiru (AI) enggau penerang ti mayuh ba macham bengkah pelasar media rama.

Kaban Kunsil Nengeri (ADUN) Bawang Assan, Dato Sri Wong Soon Koh madah, pemansang teknologi udah ngubah abis rampa komunikasyen, tang berebak enggau nya minta tikas literasyen media ke tinggi agi ba raban bansa.

Iya nyemetak madahka taja pan AI ulih ngasilka isi enggau jampat sereta efisyen, tang teknologi nya enda ulih nganti pangku pengawa pengarang berita nyadi pemerati ba renggat baruh ti meretika konteks ke bendar sesebengkah pengawa.

“AI nadai ngembuan peneleba, runding enggau akim mensia ti diguna dalam pengawa pengarang berita.

“Iya mega ukai ba palan penusah nyadi dikena meretika realiti ke bendar sesebengkah pengawa,” ku iya lebuh bejaku ba Pengerami Malam Media Gawai Gerempung Pengarang Berita Sibu (SJA) 2026 di Sibu, malam Hari Satu tu tadi.

Nitih ku iya, dalam ekosistem penerang ti majak kompleks, batang pemar ukai agi kurang penerang, tang lebih agi nentuka pemetul, pengamat enggau konteks tetiap penerang ti ditabur ngagai mensia mayuh.

Berindik enggau nya, iya ngelalau mensia mayuh ngambika enda bepanggai ba sumber ti enda ulih dikearapka, tang lebih agi nuju ngagai gerempung media ti ngemeranka standard pengarang berita ti bisi etika enggau tanggungpengawa.

Iya mega nyemetak madahka media nyadi komponen ti beguna dalam sistem demokrasi nyadi “kuasa keempat” ti bejalaika tanggungpengawa nentuka penerang, akauntabiliti enggau timbang penerang dalam mensia mayuh.

Ngenang pasal Ripot Indeks Kebebasan Berita Sedunia 2026 ari Reporters Without Borders, Wong madahka penuduk Malaysia ba penuduk lumur 95 mandangka agi bisi awak dikemanah ari sukut pengelepas media enggau pemansang ekosistem pengawa pengarang berita menua tu.

Ku iya, pengawa ngenegapka agi institusyen media ti tuai runding, media ti bisi etika sereta tan meseti terus ditegapka dikena napi pemar jeman digital.

Ba pengawa ke sama, iya mega meri besai terima kasih ngagai pemekuh media ketegal dedikasyen enggau komitmen sida, nyengkaum nguna awak sereta tekan kereja ke ditapi sida lebuh bejalaika pengawa ninting hari.

Ku iya, pengarang berita ukai semina ngenataika berita aja, tang mega orang ti ngerikod sejarah ti nyadi dokumen realiti enggau pemansang mensia mayuh enggau menua.

Ba pengawa nya mega, iya bisi madahka diri deka nyuaka pemeri RM5,000 ngagai SJA kelai sukung ngagai pengawa gerempung nya bejalaika mayuh macham program enggau aktiviti ninting taun.

Berebak enggau nya, Chairperson SJA, Florence Nervyn, madahka gerempung nya terus ngenegapka agenda pengelantang pendiau kaban enggau pemansang profesyenal dikena nentuka pemekuh media mengkang relevan dalam industri ti majak ngerembai.

Ku iya, entara batang inisiatif taun tu nyengkaum nambahka duit turu KWSP i-Saraan ari RM150 ngagai RM250 ungkup tetiap iku kaban dikena meri terima kasih ngagai pemeri sida ngagai gerempung.

Nitihku iya, SJA mega benung merambu mayuh macham program nyengkaum Hari Ruang Bilik, pengerami Hari Pengarang Berita Nasional (HAWANA), meresa pengerai, kus ngangkatka pengelandik media sereta mega pengelantang pendiau enggau komuniti.

Iya nyemetak madahka sukung terus ari pengari rayat, ejensi perintah, kompeni korporat enggau bakih strategik beguna amat dikena nentuka penerus sereta efektif program gerempung.

Florence mega minta pemekuh media terus ngangkatka pengelandik sida, ngerembaika penemu sereta ngintu teknologi baru ngambika terus kompetitif dalam ekosistem media moden.

Dalam jaku penutup iya, iya ngenataika pengaga ati ke pemadu tinggi ngagai semua piak ke bisi datai ngemujurka Malam Media Gawai SJA 2026, nyengkaum pengari rayat, bakih media enggau kaban gerempung.

Ku iya, penatai enggau sukung ke diberi nyadi penegap ngagai SJA ngambika terus nyingkang ke mua ba pengawa ngenegapka profesyen pengarang berita sereta ngintu pengelantang pendiau bala kaban.

“Tetiap sukung, kerejasama enggau kaul bakih ti ditempa nyadika penegap ngagai SJA ngambika terus nyingkang ke mua,” ku iya.

Iya mega mantaika pengarap iya ngambika semengat Segulai Sejalai terus nyerakupka raban media dalam pengawa nempa komuniti pengarang berita ti tegap agi, lantang sereta progresif jemah ila. — RBI

#ruaiberitaiban#newsiban#beritaiban

Rindu | Titih | Kunsika

KUCHING, 16 Jun — Mohamad Faredhzuan Termizi Saufi mujur nyadi ‘Champion Of Champions’ ba Pekit Mr Kuching 2026 ke diatur ba AEON Mall Kuching Central kena Hari Enam tu tadi, pengudah menang ba kategori Pekit Gumpal Tubuh Atas-70kg.

Nitihka penerang ti dipansutka ‘Kuching Division BodyBuilding

Association (KDBBA) nengah platform rasmi Facebook sida, pemujur nya ngeletakka iya nyadi pemenang penuh ba pekit nya.

Pekit ti ngempuruka atlit gumpal tubuh enggau fizikal ari serata mengeri Kuching nya mega bisi meda sekeda kategori bukai bepekit enggau pekit ti chakah ba mayuh bengkah bagi menua.

Entara pemenang kategori bukai ke udah dipadah iya nya Novice Bodybuilding Open, Ahmad Farhan (Sports Physique Under-170cm), Liau Wei Tsung (Sports Physique Above-170cm), William Hii (Athletic Physique Under-170cm), sereta Gabriel Leroy Andy ungkup kategori Athletic Physique Above-170cm.

KDBBA madahka Mohamad Faredhzuan mandangka prestasi ti konsisten ari sukut tukuh fizikal, ‘simetri’ enggau pengawa mantaika gaya penuh, lalu enggau nya iya layak nerima kelala pemadu tinggi pekit nya. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

Sumber, photo — Kuching Division BodyBuilding Association – KDBBA

PETRA JAYA, 16 Jun 16 — Koordinasyen tumu enggau kerejasama komprehensif entara semua raban nyadi fokus besai dalam nentuka pengelanchar Konvensyen Parti Bumiputera Bersatu (PBB) Zon Betong 2026.

Sapit Premier Sarawak, Datuk Amar Douglas Uggah Embas nyadi chairman Aum Penyelarasan Konvensyen Parti Bumiputera Bersatu (PBB) Zon Betong 2026 ke diatur kena Hari Satu tu tadi dikena nerangka enggau silik senentang penyikap program, koordinasyen komiti enggau aspek semua pengawa bejalaika konvensyen nya.

Bemacham pekara bekaul enggau perambu program, koordinasyen komiti, logistik enggau batang konvensyen nya dikerandauka enggau komprehensif dikena nentuka Konvensyen PBB Zon Betong 2026 ulih dipejalaika enggau lanchar, teratur sereta nyapai juluk ti udah ditetapka.

Nitih ku Sapit Premier Sarawak, Datuk Amar Douglas Uggah Embas, koordinasyen tumu entara semua piak beguna amat dikena nentuka tetiap perambu ulih dipejalaika enggau lebih sistematik sereta ngasi.

“Koordinasyen tumu enggau kerejasama ari semua piak beguna amat dikena nentuka tetiap pelin ulih dipejalaika enggau teratur, lanchar sereta meri empas ngenegapka organisasyen ba renggat baruh,” ku iya.

Iya nyemetak madahka chara bekerejasama entara ketuai enggau komiti bejalaika pengawa deka nentuka konvensyen nya ukai semina bejalai enggau lanchar, tang mega nyadi pelasar beguna dalam ngenegapka penyerakup parti sereta ngerapitka kaul entara ketuai enggau renggat baruh di Zon Betong.

Aum nya bela digulu Sapit Menteri Orang Indu, Nembiak Mit enggau Pengelantang Komuniti Sarawak ke mega Kaban Kunsil Nengeri (ADUN) Saribas, Datuk Mohammad Razi Sitam; Kaban Parlimen Betong, Dato Dr Richard Rapu; Kaban Kunsil Nengeri (ADUN) Kalaka, Mohamad Duri; Kaban Dewan Negara Senator Susan Chemerai Anding; Sekretari Politik Premier Sarawak, Roseline Mapong; enggau Ketuai Indu PBB Pampang Bukit Saban, Natasha Nasa Uggah, begulai enggau pemesai Palan Servis sereta pengari komiti mit ke bisi kaul. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

Photo — Opis Sapit Premier 1

LIMBANG, 16 Jun — Opis Parit enggau Entali Ai (DID) Sarawak udah ngatur ‘Kick-Off Meeting’ enggau Pengerami Nyerahka Taba Projek “Jalai Akses ke Limpaku Pinang, Bagi Menua Limbang, Sarawak” ngagai kunteriktor ke udah dichiri, Hexatrend Sdn Bhd, ditu kemari.

Pengerami nya diatur ba Opis Residen Limbang lalu bechairmanka Penulung Direktor Kanan, Unit Injinir Betanam Betupi enggau Infrastruktur Menua Pesisir, Ir. Faizul Abdul Wahab.

Nitihka penerang projek ti dibantaika penyanding penemu, Konsortium Malaysia ti diarika Kelang Jongga, projek tu inisiatif Perintah Besai nengah Opis Menteri Pemansang Menua Pesisir enggau Kandang Menua (KKDW) ari baruh Program Jalai Menua Pesisir dikena ngenegapka rentayan infrastruktur pemun di kandang menua pesisir Sarawak.

Projek tu ngembuan tuju deka nyendiaka penyambung strategik ti deka nyambung Kampung Bulantak, Kampung Limpaku Pinang, Sekula Primari Kebangsaan Limpaku Pinang enggau kandang ngelingi ngagai jalai besai nuju ngagai Bandar Limbang.

Diatu, peranak menua nya agi bepanggai ba perengka pengangkut sungai nengah Sungai Limbang dikena ngelawa Bandar Limbang ungkup aktiviti ninting hari nyengkaum servis pengerai enggau meli barang ke diguna.

Projek ke beungkus RM173.65 juta nya diperambu deka dipejalaika dalam timpuh 156 minggu.

Pengawa ngaga deka berengkah kena 15 Jun 2026 lalu dipelaba tembu kena 11 Jun 2029.

Batang skop projek tu mungkur pengawa ngaga jalai belakin pemanjai 14.8 kilometer nitihka standard JKR R3 sereta mega ngaga tiga buah jematan konkrit tegap.

Nitihka penerang nya mega, enti udah tembu ila, projek tu dikearapka ulih ngangkatka tikas penyambung rentayan jalai alun ba kandang menua nya, lalu enggau nya nyadi penyungkak pemansang sosio-ekonomi kandang menua nyengkaum sektor ekodagang temuai, pemansut pengawa berikan kelimpah ari nambahka akses ngagai infrastruktur enggau servis mensia mayuh ke manah agi ungkup komuniti kandang menua nya.

Projek tu mega dikearap ulih ngerapitka seraka entara menua pesisir enggau mengeri sereta meri penguntung timpuh panjai ngagai pengelantang pendiau rayat di Limbang.

Pengerami nya mega digulu pengari Opis Parlimen P.221 Limbang, Opis ADUN N.79 Bukit Kota, Opis Residen Limbang, Pemesai Pelilih Menua Limbang sereta mega tim pengawa matau projek ari Konsortium Malaysia enggau Injinir JPS Bagi Menua Limbang. — RBI

#ruaiberitaiban#newsiban#beritaiban

Rindu | Titih | Kunsika

KAPIT, 16 Jun – Menteri Kereja Raya ke mega Kaban Parlimen Kapit, Datuk Seri Alexander Nanta Linggi madahka pemeri dikena mantu ngemanahka rumah pendiau aktivis seni betenun pua kumbu, Belantau Anak Bantan, ngambika nyadi wokshop betenun pua kumbu di Nanga Yong, Kapit.

Penerang nya dibantai lebuh iya ngabas palan pengentap pendiau Belantau pengudah ngabas palan ngaga Jematan Batang Rajang ti nyambung Nanga Belawai ngagai Jalai Song-Kapit.

Kenu ku Nanta, bantu nya dikena nyukung pengawa Belantau ngintu sereta ngemansangka seni nenun pua ​​kumbu, pesaka budaya komuniti Iban ti ngembuan rega sejarah enggau identiti kediri empu.

Ku iya, Belantau siku ari artis tenun pua kumbu ke chakah lalu asil tenun iya ukai semina nerima kelala ba menua tu aja, tang iya nyentuk udah mantaika nyadi buah tepa nya ngagai Menteri Besai, Datuk Seri Anwar Ibrahim rambau penemuai iya ke Kapit.

“Dikena nyukung pengawa iya ngidupka baru pengawa asal nenun pua kumbu, aku deka meri pemeri dikena mantu iya ngubah rumah iya nyadi wokshop nenun pua kumbu,” ku iya.

Nanta mega bekunsi madahka diri temegah ati laban bisi selambar ngepan ke ditenun ngena pua kumbu enggau chura “Buah Pating 1,000”, asil ari keranjai kreatif Belantau ke asal ari Mujong, Kapit.

Iya pechaya pesaka asal baka pua kumbu ukai semina kelai identiti budaya komuniti Iban, tang mega bisi potensial nyadi pengeraja ekonomi komuniti nengah pemansang industri di Kapit.

Ku iya, pengawa ngenegapka industri tenun asal ulih muka peluang penatai pemisi ngagai komuniti lokal kelimpah ari nentuka pesaka asal terus diintu sereta ditampung rebak dudi hari.

Berindik enggau nya, iya ngarapka pengawa manah ti dipejalaika Belantau deka terus ngerembai sereta nyadi peransang ngagai rebak baru ngemeratka, ngetan sereta negika pesaka seni komuniti Sarawak. – RBI

#ruaiberitaiban#newsiban#beritaiban

Rindu | Titih | Kunsika