MIRI, 18 Jun – Siku lelaki peranak menua tu beumur 27 taun udah ditan polis pengudah dipechayaka bisi kaul enggau pengawa nyerungkai kedai makai nasi lemak di Permyjaya ti ngujungka pengerugi dipelabaka manggai RM590.35.

Saspek ditan tim kaban Pampang Nagang Penyalah (CPJ), Balai Polis Sentral Miri ti betuaika ASP Goldy Jangan ba kandang menua Pujut kena 18 Jun 2026 urung pukul 4.50 pagi bepelasarka penerang enggau pemansik.

Nitihka penerang ari Polis Pelilih Miri sehari tu, raban polis mega ngerampas gari ke dipelabaka dikena saspek lebuh ngereja penyalah nya kelimpah ari mesin duit ke dipelabaka dichuri ari premis ke bisi kaul.

Polis sebedau tu bisi nerima ripot bekaul enggau penusah nya kena 5 Jun 2026 urung pukul 7.16 malam.

Asil pansik tetemuka penusah nya dipelabaka nyadi urung pukul 3.43 pagi ba kedai makai nasi lemak ke bepalan ba Kompleks Komersial Pusat Bandar, Permyjaya Fasa 3.

Rikod televisyen litar tertutup (CCTV) premis nya bisi ngayanka siku lelaki ke dipelaba nyerungkai kedai nya sebedau ngambi sereta ngelarika diri ari mesin duit ke diengkah ba kaunter premis nya.

Saspek diatu benung ditan ba lokap Balai Polis Sentral Miri dikena mantu tasat ari baruh Seksyen 457 Kanun Keseksaan ketegal nyerungkai begunan tauka rumah ketegal deka ngereja penyalah.

Berindik enggau nya, polis ngelalau mensia mayuh kelebih agi sida ke ngempu premis dagang ngambika seruran nambahka tikas pengelikun nengah pengawa masang sistem pengelikun ke patut, nentuka premis dikunchi enggau manah pengudah jam operasyen sereta enda ninggalka duit tunai tauka barang ke berega dalam premis nya.

Mensia mayuh mega dipinta lengkas ngeripot sebarang aktiviti ti disangka ngagai polis ngambika atur jampat ulih dipejalaika. – RBI

#ruaiberitaiban#newsiban#beritaiban

Rindu | Titih. | Kunsika

KUCHING, 18 Jun – Sepenyampau 5,257 chalun tauka 99.96 peratus ari semua chalun Sijil Tinggi Persekolahan Malaysia (STPM) 2025 di Sarawak mujur bulih pas penuh, lalu enggau nya mandangka penyulut akademik ti ngemegah di nengeri tu.

Prestasi selampur STPM 2025 mega ngayanka pemanah lebuh Purata Nilai Gred Keseluruhan (CGPA) nengeri niki ngagai 2.75 dibandingka enggau 2.68 ba taun 2024, iya nya niki 0.07 puin.

Direktor Pelajar Nengeri Sarawak, Omar Mahli madah, pemujur nya mega disukung penambah penyampau chalun ke bulih CGPA 4.00 iya nya 115 iku tauka 2.19 peratus ari semua chalun.

“CGPA STPM 2025 niki 0.07 poin enti dibanding enggau taun nyin tadi, ari 2.68 ngagai 2.75.

“Kelimpah ari nya, penyampau chalun ke bulih CGPA 4.00 mega bisi nambah 23 iku tauka 0.58 peratus enti dibanding enggau STPM 2024,” ku iya.

Teks jaku iya dibacha Sapit Direktor Sektor Pengatur Sekula, Opis Pelajar Nengeri Sarawak (JPNS), Dr Les Met ba Pengerami Ngelansa Pemutus Peresa STPM 2025 di SMK Tun Abang Haji Openg, ditu, sehari tu.

Nitih ku Omar, ari 22 subjek ke bisi disediaka ngagai chalun sekula di Sarawak, bisi semilan subjek ngerikod penambah tikas pas penuh enti dibandingka enggau taun sebedau tu.

Ku iya, peratus chalun ke bulih pas penuh dalam empat enggau lima subjek mega niki ngagai 98.71 peratus enti dibanding enggau 98.16 peratus ba STPM 2024, iya nya niki 0.55 peratus.

Berebak enggau nya, 52 ari 79 buah sekula di serata Sarawak mujur ngerikod penambah CGPA dibandingka enggau pemutus peresa STPM taun nyin kemari, lalu enggau nya ngayanka pemanah prestasi akademik ti majak konsisten ba renggat sekula. – RBI

#ruaiberitaiban#newsiban#beritaiban

Rindu | Titih | Kunsika

BALAI RINGIN, 19 Jun — Projek ngangkatmanah Jalai Kampung Tapang Lebat ke beungkus RM2.5 juta ari baruh Greater Kuching Coordinated Development Agency (GKCDA) udah tembu penuh tumu ari timpuh, kira-kira tiga bulan dulu ari timpuh ke udah ditetapka.

Nengah penerang Facebook Kaban Kunsil Nengeri (ADUN) Balai Ringin nya, ke mega bisi madahka pasal pejalai status bejalaika projek ba sitak DUN N.30 Balai Ringin.

Projek tu dipejalaika JKR Serian ba sitak DUN N.30 Balai Ringin ti diarika Kaban Kunsil Nengeri (ADUN) Datuk Snowdan Lawan.

Penerang nya madahka skop kereja mungkur pengawa ngangkatmanah jalai genturung pendiau nya nyadi jalai bebelakin pemanjai 1.8 kilometer enggau pemesai 5 meter nitihka standard JKR R1 Standard.

“Kelimpah ari nya, projek tu mega mungkur pengawa ngaga enam (6) sambung jalai tama ngagai rumah peranak, lima (5) unit parit Reinforced Concrete (RC) Pipe Culvert), kereja sistem parit enggau pengawa masang perabot jalai.

“Kereja tambah mega mungkur pengawa melakin palan ngengkahka kerita ba kandang gerija, ngaga ‘struktur gabion’ ba kandang endur lereng ti berisiko, enggau melakin tambah sepemanjai 125 meter ba simpang pintu penama besai rumah panjai nya,” ku iya.

Kampung Tapang Lebat ti betuaika Tuai Rumah Bana ak Entili bisi urung 30 pintu Ketuai Ruang Bilik.

“Enggau penembu projek tu, peranak menua tu diatu ngasaika perengkaguna akses jalai alun ke manah sereta likun agi, lalu enggau nya ngemuntangka aktiviti ninting hari nyengkaum pengawa ngangkut produk betanam betupi, sawit, pia mega mindah ngagai sekula, pasar enggau fasiliti pengerai.

“Pengawa bejalaika projek tu mandangka komitmen perintah ti terus ngenegapka rentayan infrastruktur menua pesisir ungkup pengelantang rayat, setipak enggau agenda pemansang ari baruh GKCDA sereta aspirasyen “GPS – Utamakan Sarawak,” ku penerang nya. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

KANOWIT, 18 Jun — Bisi 36 iku pengajar nyereta Sesi Randau PANDei ke diatur ba SK Rantau Dilang, Kanowit ari pukul 8.00 pagi nyentuk 9.30 pagi kena Hari Dua tu tadi.

Program tu diatur dikena meri kelala inisiatif digital enggau perengka guna belajar bepelasarka teknologi ti ulih dikena raban pengajar dalam pengawa ngenegapka budaya penemu sereta nyukung agenda belajar sepemanjai umur.

Sepemanjai sesi nya, pesereta diberi kelala nyengkaum ngerejista Sarawak Pass, meri penerang pasal pelasar e-pelajar PANDei, sereta meri kelala Modul Reading Seeds 4.0 nyadi siti ari inisiatif literasyen digital ti nyukung penguasaan pelajar moden.

Pengawa bejalaika program tu dikearap ulih meri nilai tambah ngagai pengajar nengah akses ngagai mayuh macham perengka guna enggau perengka guna belajar digital, kelimpah ari ngenegapka pemansang profesional ti terus sereta ngangkatka pemanah proses ngajar enggau belajar di sekula.

Program tu mega nerima kerejasama rat ari piak sekula enggau institusyen pelajar ti bisi kaul dikena nentuka iya lanchar dipejalaika.

Berebak enggau nya, terima kasih mega diberi ngagai semua piak ti bisi kaul ngemujurka program tu, kelebih agi rayat SK Rantau Dilang ketegal komitmen enggau sukung sida.

Inisiatif tu setipak enggau pengawa ke seruran dipejalaika Pustaka Negeri Sarawak dalam ngerembaika akses ngagai pelajar digital sereta ngenegapka ekosistem belajar inovatif di Sarawak. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

SPAOH, 18 Jun — Projek Ngaga Pagar Rumah Panjai Teberu, Spaoh ari baruh agih belanja Program Transformasyen Menua Pesisir (RTP) udah berengkah enggau rasmi sehari tu nengah sesi nyerahka palan ngagai kunteriktor.

Sesi nyerahka palan nya dipejalaika pemesai ari Palan Servis Rayat Parlimen P204 Betong begulai enggau pengari ejensi ti bejalaika pengawa, kelai berengkah renggat bejalaika projek ba tanah.

Projek nya nyengkaum ngaga pagar perimeter ngelingi kandang rumah panjai sereta mega ngaga pintu penama besai.

Inisiatif tu dikearapka ulih ngenegapka sukut pengelikun, kelimpah ari ngangkatka pengelantang peranak menua nya.

Pengawa bejalaika projek nya deka dipejalaika kunteriktor ti udah dipaduka nitihka spesifikasyen kereja enggau taga bejalaika projek ti udah ditetapka piak bekaul.

Nitihku Kaban Parlimen Betong, Dato Dr Richard Rapu, nengah penerang iya, pengawa bejalaika projek tu mandangka komitmen ti seruran dipejalai dalam nentuka pemansang menua pesisir terus diberi perati, kelebih agi dalam aspek nyendiaka perengka guna pemun ngagai komuniti setempat.

Iya mega nyemetak madahka projek nya ukai semina meri nilai tambah ari sukut pengelikun, tang mega meri pangka ngagai pengawa ngangkatka kualiti pengidup peranak rumah panjai.

Projek RTP tu dikearapka ulih meri penguntung terus ngagai peranak Rumah Panjai Teberu enti udah tembu penuh.- RBI

#ruaiberitaiban#newsiban#beritaiban

Rindu | Titih | Kunsika

MUKAH, 18 Jun — Raban Penyaga Mensia Mayuh Malaysia (APM). Mukah udah bejalaika operasyen nangkap ular (KMU) pengudah nerima kangau ngenyit ari mensia mayuh bekaul enggau bisi ular ba kandang manuk di Mukah, kemari.

Tekala nya pengudah nerima penerang nya, tim PKOD APM Mukah udah digerah ngagai palan penusah nyadi ngambika bejalaika pengawa lengkas dikena nagang sereta nangkap jelu reptilia nya.

Pansik keterubah ba endur nya tetemuka siku ular sawa batik ke ngembuan pemanjai urung 1.5 meter bisi ba kandang manuk lalu bisi potensi meri risiko ngagai pengelikun jelu tupi enggau peranak menua nya.

Tim ke bejalaika pengawa bejalaika operasyen ngena chara nangkap ke likun sereta dikuasa, ngaul teknik nyepit enggau nyintak dikena nentuka nadai sebarang penusah ngagai mensia mayuh tauka raban operasyen.

Operasyen nya mujur tembu enggau nadai sebarang penusah ke enda dikedekaka diripotka nyadi.

Situasyen ba endur nya dientaska likun sereta ulih dijaga pengudah aksi nangkap dipejalaika.

APM Mukah mega meri besai terima kasih ngagai mensia mayuh ti lengkas meri penerang ngagai piak bekuasa, lalu enggau nya mantu nentuka pengawa jampat ulih dipejalaika.

Mensia mayuh dilalau ngambika seruran bejejaga sereta lengkas betanya ngagai APM enti sema napi penusah ngenyit tauka bisi jelu bisa nengah talipaun 084-872814.

Raban Pengelikun Mensia Mayuh Malaysia (APM) tetap komited meri timbal ti jampat, ngasi sereta profesyenal ungkup pengelikun komuniti. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

MERADONG, 18 Jun — Pengawa nyerahka pampas tanah sepenyampau RM1,774,808.50 ngagai empat iku pengempu tanah nyadi siti agi singkang ke besai reti nuju pengawa ngamatka projek ngaga enggau nembuka projek Pegung Nyemerai Meradong ke beungkus RM22.4 juta ke udah lama dianti peranak pelilih menua tu.

Pengerami Nyuaka Chek Pampas Tanah ungkup projek nya udah diatur ba Bilik Aum Opis Pelilih Meradong kena Hari Dua tu tadi lalu dikemataka Kaban Kunsil Nengeri (ADUN) Meradong, Datuk Ding Kuong Hiing.

Nitihku Datuk Ding, iya berasai gaga endar ati lebuh palan endur ngaga Pegung Nyemerai Meradong pengujung iya mujur ditentuka pengudah nengah bemacham proses perambu enggau pemendar.

Ku iya, projek nya udah dianjung beberapa kali sebedau mujur bulih pemendar nengah Opis Menteri Nembiak, Lumba enggau Pemansang Orang Dagang Sarawak enggau penyampau ungkus sepenyampau RM22.4 juta.

“Pengawa nyabut undi ungkup projek tu dipelabaka deka diatur bulan Julai ti deka datai lalu aku ngarapka pengawa bejalaika projek renggat keterubah tu bejalai enggau lanchar nitihka timpuh ti udah ditetapka,” ku iya kena Hari Dua tu tadi.

Iya mega meri besai terima kasih ngagai pengempu tanah ke bisi kaul laban udah meri kerejasama sereta pengibuh ngemujurka projek pemansang nya.

Nitihku iya, pengeran sida ngelepaska tanah ungkup pemansang pelilih menua nyadi pemeri besai ti chukup dikerindu sereta deka seruran dikeingatka komuniti Meradong.

Datuk Ding madah, pengawa ngaga Pegung Nyemerai nya ukai semina nyendiaka perengka guna rekreasyen moden ungkup peranak menua nya, tang mega bisi potensial nyadi pelasar ngadaka mayuh agi atlit nyemerai ti landik ari Meradong jemah ila.

Ku iya nambah, palan nya mega deka ulih nyadi palan endur ngatur pekit lumba enggau main renggat nengeri enggau menua nyengkaum Lumba enggau Main Malaysia (SUKMA).

“Projek tu ukai semina meri penguntung ngagai pemansang lumba enggau main sereta rekreasyen ungkup komuniti menua nya, tang mega nyadi kelai penyulut enggau temegah ati ngagai peranak Meradong,” ku iya.

Pengawa mayar pampas tanah ke tembu ba pengerami nya dipeda nyadi sebengkah agi pemujur ke berat dalam nentuka projek ke meri empas tinggi nya ulih dipejalaika enggau lanchar ungkup pemaik rayat pelilih menua nya dalam timpuh ke panjai.- RBI

#ruaiberitaiban#newsiban#beritaiban

Rindu | Titih | Kunsika

Sumber, photo — UKAS

JULAU, 17 Jun — Kaban Parlimen Julau, Datuk Larry Sng Wei Shien, udah nyemetak madahka komitmen iya deka terus nyukung penuh semua pengawa ti dipejalaika sekula ba dalam ngenegapka pemansang pelajar, kelebih agi di menua pesisir.

Nitihku iya, pelajar nyadi pelasar ti beguna dalam nempa pengidup nembiak enggau mensia mayuh jemah ila menyana agi, nya alai semua piak begunaka kerejasama dikena nentuka sekula menua pesisir terus mansang sereta seruran relevan.

Iya madah munyi nya lebuh ngulu Program Begulai SK Ng Serau ke diatur empai lama.

Dalam jaku dipansutka iya, Larry ngenataika pengaga ati diri lebuh dipadahka penyampau nembiak sekula ba SK Ng Serau udah nambah semilan iku enti dibandingka enggau sebedau tu, lalu enggau nya mandangka pengandal komuniti ba sekula nya jemah ila.

Ku iya, penambah penyampau nembiak nya kelai positif ti mandangka apai indai majak sedarka pemesai guna pelajar enggau pangku pengawa sekula menua pesisir dalam nempa rebak dudi hari.

Berindik enggau nya, iya nyemetak madahka pengawa ngintu enggau ngenegapka sekula di menua pesisir patut terus diberi perati, nyengkaum nyendiaka infrastruktur pemun ti chukup dikena nentuka akses pelajar ke manah agi ungkup peranak menua nya.

Iya mega ngingatka perengkaguna jalai alun ti manah bejalaika tanggungpengawa ti beguna dikena nentuka bala nembiak sekula ulih besekula enggau lantang sereta likun.

Nitih ku iya, apai indai deka andal agi nganjung anak sida besekula lebuh perengkaguna jalai alun udah manah, lalu jalai ke rusak tauka enda diintu enggau manah tau ngeruga pejalai peranak sereta ngeruga pengerindu apai indai nganjung anak sida nerima pelajar.

Sebedau tu, iya udah ngenataika pemeri sepenyampau RM35,000 dikena mantu pengawa ngaga jalai alun ba kandang menua ke dikerandau nya nyadika pengeransing ngemanahka perengka guna pemun ungkup peranak menua pesisir.

Berebak enggau nya, iya ngelalau komuniti ngambika terus nyukung sekula menua pesisir nengah chara nganjung bala anak sida ngagai sekula besemak dikena nentuka pengelantang palan pelajar tu.

Ku iya, penyampau nembiak ke majak nurun tau ngasuh sebuah sekula napi risiko ditutup, lalu enggau nya ngeruga pemansang komuniti menua nya jemah ila.

“Nya alai, kitai patut berunding jauh sereta merambu pemansang pelajar ungkup pemaik rebak dudi,” ku iya.

Kelai sukung terus ngagai pemansang pelajar ba sekula nya, Datuk Larry mega bisi nyuaka pemeri RM20,000 ngagai SK Ng Serau.

Iya mega nesau bala apai indai, pengajar, ketuai komuniti enggau semua staf sekula ngambika terus bekerejasama dalam ngemansangka SK Ng Serau dikena ngadaka rebak ti bepenemu sereta nentuka pengidup dudi hari ungkup komuniti lokal. – RBI

#ruaiberitaiban#newsiban#beritaiban

Rindu | Titih | Kunsika

KUCHING, 17 Jun — Opis Kereja Raya (JKR) Sarawak nempa sejarah lebuh diberi tanggungpengawa nyadi tuai rumah keterubah 1st Malaysian Regional Geotechnical Engineering Conference 2026 (MRGEC2026) ti diatur kena 17 ngagai 19 Jun ba The Imperial Hotel, Kuching.

Aum teknikal renggat pelilih menua tu dipenyadika Menteri Kereja Raya Malaysia, Dato Sri Alexander Nanta Linggi, ti mantaika komitmen perintah dalam ngenegapka pemansang infrastruktur menua nengah pengawa meri kuasa ngagai teknologi enggau inovasyen injinir.

MRGEC2026 mujur ngempuruka lebih 700 iku pesereta ti mungkur pakar injinir, akademik, pemansik, profesyenal enggau pengemeran industri ari dalam enggau luar menua, nyadika pelasar ti beguna endur besilih penemu ba renggat pelilih menua.

Aum besai nya mega bisi mantaika 33 iku temuai enggau 45 langkau pemandang ti ngaul mayuh bengkah ejensi, penyendia servis enggau pemain industri geoteknikal.

Berambaika jaku “Resilient Ground, Sustainable Future”, aum besai nya ngemeratka empat batang pekara iya nya inovasyen dalam geoteknik enggau pansik palan, penegap lereng enggau tanah tusur, pelasar begunan enggau ngemanahka tanah.

Dalam jaku bejadika pengawa nya, Dato Sri Alexander Nanta Linggi ngemeratka pemesai guna teknologi moden baka dron, Building Information Modelling (BIM) enggau model kembar digital dikena ngangkatka pemanah pengawa matau enggau pengelikun infrastruktur menua tu.

Pengawa ngatur MRGEC2026 asil ari kerejasama strategik entara Opis Menteri Kereja Raya Malaysia, JKR Malaysia, JKR Sarawak enggau JKR Sabah ba pengawa ngenegapka pengawa bekunsika penemu, inovasyen enggau chara mutarka teknikal ngagai pemar geoteknikal kemaya hari.

Nyadi sebagi ari program nya, bala pesereta mega diperambu ngambi bagi ba penemuai teknikal ngagai Palan Ngaga Jematan Sungai Sarawak di Sejingkat kena 19 Jun 2026 ngambika ulih meda enggau mata diri empu pengawa bejalaika chara ngaga enggau chara mutarka teknikal ba palan nya.

Pemujur organisasyen tu ngayanka penau Opis Kereja Raya Sarawak bejalaika aum teknikal skala besai kelimpah ari ngenegapka komitmen ti seruran dipejalai ngagai penyulut injinir, inovasyen enggau pemansang infrastruktur ti meruan.

Sama bisi datai Sekretari Mendam Opis Menteri Infrastruktur enggau Pemansang Palan Penyangkai Kapal Sarawak, Datu Chiew Chee Yau, enggau Direktor Kereja Raya Sarawak, Datu Ir. Cassidy Morris, Sapit Direktor Besai Kereja Raya (Sektor Infra), Ir. Mohd Shahrom bin Ahmad Saman enggau Sapit Direktor Kereja Sabah, Mohammad Safri bin Abd Hadi. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

KANSAS CITY, 17 Jun — Pemain tebilang dunya Lionel Messi terus ngayanka pengelandik iya ba panggau pemadu tinggi lebuh iya mujur ‘hatrik’ mantu Argentina ngalahka Algeria 3-0 ba main pemuka Kumpulan J pekit Trofi Dunya ba Stadium Kansas City.

Pemenang nya mega ngasuh Messi sama enggau rikod 16 gol ke dipegai legenda Jerman Miroslav Klose, lalu enggau nya ngenegapka nama iya nyadi siku ari pemadu mayuh ngemasukka gol sepanjai maya dalam sejarah Trofi Dunya.

Ke lebih manis agi, Messi mega ngerikod siti agi pemujur lebuh iya nyadi pemain keterubah bemain ba enam edisyen Trofi Dunya ke bebida.

Ba main nya, Messi nyau deka tumu muka gol ba pun minit kelima, tang gol nya enda dikemendarka ketegal ‘offside’.

Argentina udah nya nguluka ba main nya nengah serang jauh Messi ari bol anjung Rodrigo De Paul, ke enda mujur diselamatka penyaga gol Algeria Luca Zidane, anak legenda Perancis Zinedine Zidane.

Masuk ba setengah main kedua, Messi ngenapka tim ba minit ke-60 pengudah nyambar gol ari tendang Alexis Mac Allister ke enda ulih diselamatka Luca Zidane.

Penyerang ke bepeneleba nya udah nya nembuka hatrik iya ba minit ke-76 enggau seiti agi serang ke bekuasa pengudah nerima bol anjung ari pemain ganti Nicolas Gonzalez.

Ketuai Jurulatih Argentina, Lionel Scaloni nerangka pemenang nya nyadika peransang moral ke beguna dalam misi ngetanka gelar champion dunya, pekara ke bedau dijapai kenyau ari Brazil ngereja nya dalam taun 1962.

Argentina deka bepekit enggau Austria ba Arlington, Texas, lalu Algeria deka bepekit enggau Jordan ba main sida ke nangkanka tu. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika