PETRA JAYA, 22 Jun — Perintah Besai udah dilalau mansik baru struktur insentif beranakka puku ke bisi diatu dikena ngenegapka daya tarik beranakka puku ba sektor ekonomi baru, kelebih agi industri hidrogen enggau semikonduktor ke udah dikelala ngembuan potensial dikena meransang penumbuh ekonomi menua jemah ila dalam taun.

Premier Sarawak, Datuk Patinggi Tan Sri Abang Johari Tun Openg madah, pengawa ngemanahka polisi insentif beguna seriris enggau ubah rampa ekonomi dunya ke diatu majak fokus ngagai teknologi gadung, kuasa beresi enggau pemansang industri bepelasarka inovasyen.

Nitih ku iya, mayuh agi insentif ti ditagit sereta kompetitif ulih meransang pengawa beranakka puku ba rentayan rega industri ti bekaul, lalu enggau nya ulih ngenyampatka pemansang sektor ngaga barang ti berega tinggi di menua tu.

“Nyangka Menteri Besai ulih mansik baru insentif ke ulih disediaka perintah dikena narit puku dalam ekonomi baru tu.

“Tu kelebih agi ari sukut kereban ke dikena ngasilka hidrogen sereta mega kereban semikonduktor ke ulih nyungkak produk nya lalu pengujung iya nyadi sektor ngaga barang ke dipelaba aku deka meri pulai nengah chukai ngagai menua tu,” ku iya.

Iya madah munyi nya lebuh bejaku ba Pengerami Makai Lemai Pengerami Gawai Dayak Renggat Sarawak 2026 ba Palan Konvensyen Borneo Kuching (BCCK), malam tu tadi (21 Jun).

Ku iya nambah, Sarawak diatu majak chakah agi ngemansangka ekonomi bepelasarka kuasa gadung enggau pengelantang rampa menua, nyengkaum ngenegapka pemansang industri ngaga barang ke maju dalam sektor semikonduktor enggau kuasa beresi.

Terang bendar, inisiatif nya dipejalaika dikena nentuka Sarawak mengkang nyadi palan beranakka puku besai, seraya nyukung aspirasyen Malaysia ti deka nyadi seiti ari pemain ti beguna dalam sektor ekonomi enggau tenaga di rantau ASEAN.

“Insya Allah, kami deka bejalaika pangku pengawa kami nyentukka juluk ngengkahka Malaysia nyadi bakih strategik ti beguna dalam ASEAN ulih dijapai,” ku iya.

Iya mega mantaika pengarap ati ekonomi menua tu jemah ila mengkang manah enti perintah enggau industri terus ngenegapka pengawa beranakka puku ekosistem sereta merambu polisi ti kondusif dikena meransang penumbuh sektor strategik baru. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

KUCHING, 22 Jun – Pengawa nyerahka Palan Penyangkai Kapal Bintulu ngagai Sarawak nyadi kelai pengandal, bekaban enggau kaul rat entara Perintah Besai enggau Perintah Sarawak, pia ku Menteri Besai Dato Seri Anwar Ibrahim.

Nitihku iya, pemutus nyerahka pengawa ngatur palan penyangkai kapal besai Liquefied Natural Gas (LNG) menua tu ngagai Sarawak nadai betapi enggau sebarang pemar laban nengeri tu ngembuan kapasiti, pengelandik enggau pengereja pengawa ke chukup dikena mutarka aset strategik nya.

“Diatu aku beterima kasih laban siti ari kelai pengandal, bekaban enggau penyerakup entara Perintah Besai enggau Perintah Sarawak iya nya pengawa nyerahka pengawa ngatur Palan Penyangkai Kapal Bintulu ngagai Sarawak,” ku iya lebuh bejaku ba Pengerami Makai Lemai Pengerami Gawai Dayak Renggat Sarawak 2026 di Palan Konvensyen Borneo Kuching (BCCK) demalam.

Sarawak mega nempa sejarah lebuh nyadi nengeri keterubah di Malaysia nyerahka agih belanja sepenyampau RM1.8 bilion ngagai Perintah Besai dikena ngambi alih pengawa ngatur Palan Penyangkai Kapal Bintulu, ke nyadi palan penyangkai kapal LNG besai menua tu sereta siti ari ke pemadu beguna di rantau tu.

Ku Anwar, sepemanjai peneleba iya nyadi Menteri Wang enggau Menteri Besai, iya nadai kala nerima bayar ke besai baka nya ari sebuah perintah nengeri.

“Tu keterubah iya aku nerima RM1.8 bilion ari sesebuah nengeri.Pekara tu enda kala nyadi sebedau tu lalu udah tentu siti pengagit ati ti nyelai,” ku iya.

Ku iya, pemujur nya ngayanka pengulih Sarawak ngatur pekara wang enggau pentadbiran nengeri enggau efektif bepelasarka prinsip tadbir urus ti chukup manah.

Berebak enggau nya, iya ngenataika pengaga ati ngagai Premier Sarawak, Datuk Patinggi Tan Sri Abang Abdul Rahman Zohari Tun Abang Openg enggau tim iya ketegal iring sida ti udah mujur ngenegapka penuduk ekonomi nengeri nyentuk ke ulih ngambi aset strategik nya.

Nitihku iya, proses nyerahka pengawa nya mega mungkur randau entara Menteri Perengka Pengangkut, Anthony Loke enggau Sapit Premier Sarawak, Datuk Amar Douglas Uggah Embas sebedau rang undang-undang bekaul dibantai sereta dikemendarka.

Pengerami nya mega digulu Tuai Pemegai Menua (TYT) Negeri Sarawak, Tun Pehin Sri Dr Wan Junaidi Tuanku Jaafar enggau bini iya, Toh Puan Datuk Patinggi Fauziah Mohd Sanusi, kelimpah ari Menteri Kabinet Sarawak enggau ketuai nengeri. – RBI

#ruaiberitaiban#newsiban#beritaiban

Rindu | Titih | Kunsika

LUBOK ANTU, 21 Jun — Sapit Menteri Dagang Antarabansa, Industri enggau Pemeranak Puku Sarawak (MINTRED) Datuk Dr. Malcolm Mussen Lamoh, ke mega Kaban Kunsil Nengeri (ADUN) N.34 Batang Ai, ngulu Pengerami Bejadika Gelanggang Futsal enggau Bejadika Logo Komiti Pemansang enggau Pengelikun Genturung Pendiau (JKKK) enggau Program Ngiling Tikai Gawai Dayak 2026 di Rumah Jubang, Kaong Ulu, ditu kemari.

Iya bisi datai begulai enggau bini iya, Datin Dorothy Sylvester ba pengerami ke diatur Kelab Nembiak Kaong Ulu (KBKU) begulai enggau JKKK Kaong Ulu.

Nyerumba pengerami nya, iya udah ngemendarka agih belanja ari baruh Tabung Khas Projek Mit Menua Pesisir (MRP) sepenyampau RM15,000 ngagai JKKK Kaong Ulu ungkup tuju ngatur rumah panjai, RM5,000 ngagai Biro Indu JKKK Kaong Ulu, enggau RM10,000 ngagai Kelab Indu Kaong Ulu ( Raban Youth Kakuong Ulu).

Iya mega bisi ngemendarka agih belanja Projek Transformasyen Menua Pesisir (RTP) 2027 sepenyampau RM150,000 ngagai JKKK Kaong Ulu.

Nitih ku iya, agih belanja nya deka ngemeratka pengawa ngenegapka pemansang komuniti besemak nengah pengawa bejalaika program ti mungkur pengawa volunteer, lumba enggau main, main asal, pengawa dagang enggau aktiviti pemansang nembiak, kelebih agi ba sitak N.34 Batang Ai.

“Perintah komited nentuka pemansang menua pesisir terus ditegapka ngambika komuniti lokal ngasaika penyulut ti lebih setimbang sereta inklusif,” ku iya.

Iya mega nyemetak madahka pengawa ngatur program baka tu ukai semina nyadi pelasar pemansang fizikal aja, tang mega nyadi platform ti beguna dalam ngerapitka kaul, nerenakka penyerakup sereta ngenegapka semengat begulai entara komuniti.

Sama bisi ngulu pengerami nya, Akoi Anak Ejau Pemesai Opis Pelilih Lubok Antu; Rosalin Neging Sekretari Politik ngagai YAB Premier Sarawak, Pemanca Gerang Juben; Jack Meredan, Pemesai Pentadbiran Khas ngagai Sapit Menteri MINTRED; Pemesai Opis Pelajar Pelilih Lubok Antu En Tubau, Ketuai komuniti, Kaunsil Pelilih Lubok Antu (MDLA), Ketuai Raban Bansa enggau peranak ke diau ngelingi. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

MUKAH, 21 Jun – Program Bakti Belia MADANI Sarawak 2026 dipeda nyadi pelasar ti mujur ngadaka raban nembiak ti regas, ngembuan integriti sereta komited meri pangka ngagai pemansang komuniti, nengeri enggau menua nengah pengawa ngaul diri dalam mayuh macham pengawa nyadi ketuai, volunteer enggau aktiviti komuniti.

Program ke diatur pengelama tiga hari dua malam nya tembu enggau Pengerami Nangguhka Program enggau Pengawa Nyerahka Anak Iru ke diatur ba Dewan Mayuhguna Kampung Tellian Laut, Mukah, seharitu tadi.

Pengerami nutup program nya dipenyadika Kaban Kunsil Nengeri (ADUN) Tellian, Royston Valentine ti mega ngemataka pengawa nyerahka penyereta Program Anak Iru ngagai ruang bilik sida empu pengudah nembuka bemacham aktiviti sepemanjai program nya.

Sepemanjai program nya, bala penyereta dibantai enggau aktiviti bepelasarka nyadi ketuai, ngemansangka ulah ti manah, volunteer enggau komuniti dikena nempa rebak nembiak ti lebih tan, bisi tanggungpengawa sereta ngembuan semengat meri servis ti tinggi ngagai komuniti.

Nengah Program Anak Iru, bala penyereta mega bisi peluang ngasaika pengidup begulai enggau ruang bilik ke ngambi anak iru sereta komuniti menua nya.

Inisiatif tu ukai semina ngerapitka kaul, tang mega nerenakka semengat beserakup, bebatak asur enggau rega begulai entara raban nembiak ari bemacham asal penatai.

Pengerami nyerahka anak iru mega nyadi kelai terima kasih ngagai ruang bilik iru ti udah muka pintu sida sereta nerima bala penyereta enggau manah sepemanjai program nya.

Peneleba ke dikunsi nya dikearap ulih nyadi kenang ke bisi reti sereta ngenegapka semengat volunteer enggau begulai ba raban nembiak rebak baru.

Sama bisi datai iya nya Ahmad Farhan Rosli, Iszuan Haroni, Bonnie Manau anak Michael American, Nolin Gengdang, Komiti Saberkas Negeri Sarawak, bala ketuai komuniti ke bisi kaul enggau bala penyereta program.

#ruaiberitaiban#newsiban#beritaiban

Rindu | Titih | Kunsika

BINTULU, 21 Jun — Momen besejarah ditempa lebuh Palan Penyangkai Kapal Bintulu enggau rasmi pulai baru ngagai pentadbiran Perintah Sarawak pengudah nukar status ari palan penyangkai kapal perintah besai ngagai palan penyangkai kapal nengeri.

Pengerami besejarah ke diatur ba Menara Kidurong nya meda Premier Sarawak, Datuk Patinggi Tan Sri Abang Abdul Rahman Zohari Tun Openg nyuaka simbolik chek bayar pemindah kuasa ngagai Menteri Besai Malaysia, Dato’ Seri Anwar Ibrahim dikena nembuka proses ngambi palan penyangkai kapal nya ulih Perintah Sarawak.

Sama bisi datai ngemataka momen ke beguna nya, Sapit Menteri Premier Sarawak ke mega Menteri Infrastruktur enggau Pemansang Palan Penyangkai Kapal Sarawak, Datuk Amar Douglas Uggah Embas, ti nerangka pengawa ngambi kuasa tu nyadi pemujur ke besai reti dalam ngenegapka hak enggau autonomi Sarawak ari baruh semengat Sempekat Malaysia 1963 (MA63).

Nitihku Sapit Premier Sarawak, Datuk Amar Douglas Uggah Embas, pengawa ngambi alih Palan Penyangkai Kapal Bintulu nyadi siti singkang strategik ti ukai semina mai ubah ari sukut pentadbiran, tang mega meri empas ke besai ngagai pemansang ekonomi nengeri tu.

Iya nyemetak madahka singkang tu mandangka komitmen Perintah Sarawak ti terus ngenegapka autonomi ekonomi enggau nentuka aset strategik nengeri tu diatur enggau efisyen agi ungkup pemaik rayat.

“Pengawa ngulihka tu ngelaika batang baru dalam sejarah pemansang Sarawak.

“Nya mandangka pengawa perintah nengeri ti terus ngenegapka autonomi pentadbiran sereta nentuka aset strategik nengeri diatur enggau lebih efektif ungkup pemaik rayat enggau penumbuh ekonomi timpuh panjai,” ku iya.

Ku iya nambah, pengawa ngatur baru palan penyangkai kapal nya dikearapka ulih ngenegapka penuduk Sarawak nyadi hab dagang enggau logistik serantau, lalu enggau nya nyungkak agi penumbuh industri ke bekaul di Bintulu enggau kandang menua besemak.

Pengawa ngulihka tu mega dipeda nyadi siti pemujur ke beguna dalam ngenegapka agenda pemansang nengeri ungkup agenda ke meruan agi, inklusif sereta kompetitif.

Bala pemesai bukai ke bisi datai iya nya Sapit Menteri Besai Datuk Amar Fadillah Yusof, Menteri Pengangkut Anthony Loke Siew Fook, Sapit Premier Sarawak Datuk Amar Prof. Dr. Sim Kui Hian, Speaker DUN Sarawak, Tan Sri Datuk Amar Mohamad Asfia Awang Nassar, Sekretari Perintah Sarawak Datuk Amar Mohamad Abu Bakar Marzuki, Menteri Industri Pemakai, Komoditi enggau Pemansang Wilayah, Dato Sri Dr. Stephen Rundi Utom, Menteri Dagang Temuai, Seni enggau Main Asal (MOTAC) Datuk Seri Tiong King Sing enggau Menteri Pengangkut Sarawak Dato Sri Lee Kim Shin — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

BINTULU, 21 Jun — Pengawa ngulihka Palan Penyangkai Kapal Bintulu ulih Perintah Sarawak dipeda nyadi singkang strategik dalam ngenyampatka agenda pemansang ekonomi gadung nengeri tu sereta ngenegapka penuduk Bintulu nyadi hab industri besai di rantau tu.

Premier Sarawak, Datuk Patinggi Tan Sri Abang Johari Tun Openg madah, palan penyangkai kapal nya deka bejalaika tanggungpengawa beguna dalam nyukung penumbuh sektor kuasa tau dikena baru, hidrogen enggau industri kurang karbon ti jampat mansang di Sarawak.

Ku iya, pengangkun Forum Ekonomi Dunya Bintulu nyadi Kluster Industri Transisyen mega ngenegapka agi penuduk mengeri tu nyadi palan transisyen industri ti meruan ba renggat entarabansa.

“BPA udah diaku Forum Ekonomi Dunya nyadi Kluster Industri Transisyen.”

“Nengah penuduk tu sereta pengelebih ke dikembuan kitai dalam pemansang industri kuasa tau dikena baru enggau hidrogen, kitai ulih ngangkatka pangku pengawa Malaysia dalam pemansang ekonomi ke meruan jemah ila.

“Insya Allah”, Bintulu deka terus ngenegapka status nyadi hab industri strategik ti nyukung transisyen tenaga enggau agenda ekonomi gadung, lalu pemansang ke nyadi diatu di Sarawak mega udah matak perati pemeranak puku antarabansa nyengkaum ari menua China,” ku iya.

Iya madah munyi nya lebuh bejaku ba Pengerami Nyuaka Chek Berindik ari Pengawa Nukar Status Palan Penyangkai Kapal Bintulu ari Palan Penyangkai Kapal Perintah Besai ngagai Palan Penyangkai Kapal Negeri ke diatur ba Lembaga Pelabuhan Bintulu, sehari tu tadi.

Pengerami nya dipenyadika Menteri Besai, Datuk Seri Anwar Ibrahim nengah pengawa nyuaka chek ke beungkus RM1.8 bilion ngena chara simbolik.

Nitih ku iya, Perintah Sarawak deka terus bekerejasama rat enggau Perintah Besai sereta ejensi ke bekaul dikena nentuka pemansang Palan Penyangkai Kapal Bintulu diangkatka enggau perengka guna enggau teknologi ke pemadu baru, setipak enggau guna ekonomi dunya jemah ila. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

LAWAS, 21 Jun — Operasyen nangkap ular mujur dipejalaika Palan Kawalan Operasyen (PKOD) Pelilih Menua Lawas pengudah nerima kangau ngenyit bekaul enggau bisi siku reptilia ba kandang endur diau di Kampung Dato’ Kuala Lawas.

Nitihka penerang ari Angkatan Pertahanan Awam Malaysia (APM) Lawas, tim My ASPA-O 02 udah dianjung ngelawa endur penusah nyadi pengudah nerima ripot lalu tetemuka siku ular sawa batik ke ngembuan pemanjai urung 3.5 meter dalam kandang manuk pengudah nelan siku manuk.

Tim operasyen bejalaika pengawa enggau jampat ngena teknik nyepit dikena nangkap reptilia nya enggau likun enggau nadai sebarang penusah ke enda manah nyadi.

“Operasyen bejalai enggau lanchar nadai sebarang penusah ke enda manah nyadi.

“Pengudah mujur nangkap ular nya dibai pansut ari kandang genturung pendiau dikena nentuka pengelikun peranak menua nya,” ku penerang ari APM Lawas.

Ketetiga raban ti bekaul diripotka udah selamat pulai ngagai PKOD enggau perengka operasyen dalam gaya ti lengkap pengudah operasyen tembu.

Berebak enggau nya, APM Lawas mega ngelalau mensia mayuh anang nguji nangkap tauka megai jelu siga nya kediri laban nya tau ngenataika risiko pengelikun.

Mensia mayuh dilalau ngambika lengkas betanya ngagai opis bekuasa nyema bisi penatai jelu bisa tauka tau mai penusah ba genturung pendiau, lalu tau betanya ngagai PKOD Lawas ba lumur 085-262073 ungkup sebarang penusah ngenyit. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

Sumber, photo — Apm Lawas

KUCHING, 21 Jun – Pengawa Bejalai Niti Daun ke nyadi kelai Pengerami Hari Gawai Sarawak 2026 dipeda nyadi pemujur nengah evolusyen baru lebuh iya ukai semina mandangka pesaka asal komuniti Dayak, tang mega nyadi pelasar ngenegapka ekonomi enggau ngenegapka identiti budaya sereta nyerakupka komuniti pupu bansa nengeri tu.

Ketuai Kontinjen Gerempung Intelektual Orang Asal Sarawak (PERANTIS), Wellie Henry Majang madah, pengerami Hari Gawai ukai agi patut dipeda semina nyadi pengerami asal aja tauka kelai meri terima kasih ngagai asil ke diketau, tang lebih agi begunaka pemansang nyadi pematak pemansang komuniti Dayak ke lebih progresif sereta kompetitif.

Nitih ku iya, pengeraja budaya komuniti Dayak baka asil pengelandik jari, pekayan asal, motif etnik, main asal enggau pemakai asal ngembuan rega ekonomi ke tinggi sereta bisi potensial dikomersial dikena mansutka penatai pemisi sereta ngangkatka tikas pengidup komuniti.

“Pengawa Bejalai Niti Daun tu engkeman amat nyadi pelasar interaktif ti ngempung elemen budaya enggau pemansang ngambika komuniti Dayak ulih terus ngenegapka identiti diri ba jeman moden bansa,” ku iya nengah komen media beserimbai enggau Pengerami Ngintu Hari Gawai Renggat Sarawak 2026 kemari.

Iya mega ngenataika pengaga ati enggau terima kasih ngagai Komiti Pengatur Pengerami Hari Gawai 2026 Renggat Nengeri Sarawak laban udah mujur ngatur pengerami ti beprestij nya.

Ku Wellie, penyereta 114 kontinjen ba pengawa Bejalai Niti Daun taun tu mandangka sukung tegap ari mayuh bengkah renggat mensia mayuh lalu patut terus dikerembaika enggau pengawa ngaul bemacham bansa enggau budaya nyadi siti pengawa dikena ngenegapka penyerakup enggau pemanah ati rayat Sarawak.

Ku iya, pengerami ngintu Hari Gawai ukai semina diempu sebengkah etnik aja, tang diintu begulai bemacham komuniti Dayak nyengkaum raban bansa Iban, Bidayuh enggau Orang Ulu ti udah lama bekunsika semengat diri sebilik enggau begulai.

Iya bepenemu, pengawa Perintah Sarawak ti deka ngaga Pengawa Bejakai Niti Daun nyadi pelasar integrasyen budaya nya singkang ti betul laban sida ulih nempa semengat nasionalisme ti lebih inklusif, kelebih agi ba komuniti ti mayuh macham di Sarawak ti dikelala enggau pengelantang sereta bebatak asur entara bansa.

Kelimpah ari nya ku iya, Pengawa Bejalai Niti Daun mega mai nilai semengat ti dalam nengah kaul komuniti enggau rampa menua, kelimpah ari nanam nilai beterima kasih, bebasaka aki ini enggau tanggungpengawa nyaga pesaka budaya ungkup rebak dudi hari.

“Taun 2026 iya nya taun ketiga PERANTIS nyereta pengawa tu lalu kitai ngarapka program tu terus nyadi kelai penyerakup rayat Sarawak enggau Malaysia.

“Berebak enggau nya, komuniti Dayak begunaka terus ngenegapka budaya nyadi penegap ekonomi sereta bejalaika tanggungpengawa ti beguna dalam pemansang nengeri enggau menua,” ku iya. – RBI

#ruaiberitaiban#newsiban#beritaiban

Rindu | Titih | Kunsika

KUCHING, 21 Jun — Datuk Patinggi Tan Sri Abang Johari Tun Openg nyereta Pengawa Bejalai Bebala Mayuh Niti Daun 2026 ke diatur di Kuching Waterfront lemai kemari, ti disambut enggau chukup pengeransing nengah penyereta mensia mayuh ari pupu bansa enggau etnik.

Pengawa bejalai mandangka penyelai budaya komuniti Dayak nengah pengawa mandangka budaya, pekayan asal enggau iring muzik etnik ti mandangka penyelai pesaka budaya Sarawak.

Penatai Premier Sarawak mandangka komitmen Perintah Sarawak ti seruran bebendar dalam pengawa ngintu, meri basa sereta ngenegapka pesaka asal nyadi aset ti beguna ti meri pangka ngagai penyerakup rayat enggau pemansang sektor dagang temuai nengeri tu.

Program tu mega nyadi pelasar beguna dalam meri kelala pengeraja budaya Sarawak ngagai rebak baru enggau komuniti luar, enggau nya nentuka pesaka asal terus diintu sereta diturun belama. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

MIRI, 21 Jun – Kandang menua San ngembuan potensial ke besai ngambika terus besemekih nyadi hab ekonomi menua pesisir nengah sektor sawit, betanamka buluh, dagang temuai enggau ekonomi gadung, pia ku Kaban Kunsil Nengeri (ADUN) Telang Usan, Dato Dennis Ngau.

Kenu ku iya, pemansang kandang menua tu jemah ila mega begunaka sukung ari pengawa beranakka puku ti enda ngetu ba pekara pelajar laban nya nyadi kunchi besai ngangkatka tikas pengidup komuniti.

Iya madah munyi nya lebuh bejadika Pengerami Makai Lemai Ketuai Begulai enggau Rayat beserimbai enggau Pengerami Ngintu Ulang Taun Ke-10 Komiti Tindakan Pembangunan Kandang Menua San (JBPKS) ke udah nyadi malam kemari.

Dato Dennis madah, sepemanjai penumbuh JBPKS udah bejalaika tanggungpengawa ke besai dalam mantu guna rayat sereta nyadi pengerembai pemansang ba kandang menua San.

Ku iya, asil ari kerejasama rat entara rayat enggau Perintah Gempung Parti Sarawak (GPS) mayuh bengkah projek pemansang mujur dipejalaika nyengkaum nyendiaka bekal kuasa karan nengah Skim Bekal Kuasa Karan Alternatif Menua Pesisir Sarawak (SARES), pengawa ngaga Klinik Pengerai Long San ke beungkus RM50 juta, pemansang jalai alun, fasiliti telekomunikasyen balai mayuh guna enggau mayuh macham projek pemansang kampung.

Taja pia, iya ngaku batang pemar ke agi ditapi iya nya aspek infrastruktur jalai alun.

“Dalam timpuh lima taun ke udah, urung 200 kilometer jalai alun udah digaga sereta diangkatmanah, tang agi beguna amat ngemansangka mayuh agi jalai alun enggau jematan ba kandang menua ulu,” ku iya.

Ku iya nambah, Perintah Sarawak diatu mega benung bejalaika program nyeruri jalai nengah agih belanja MARRIS dikena ngenegapka rentayan jalai menua pesisir.

Ba atur pengawa nya mega, Dato Dennis meri besai terima kasih ngagai Chairman Pengatur, Lucas Kalang enggau Chairman JBPKS, Pemanca Anthony Kula begulai enggau semua komiti laban udah mujur ngatur program ti udah ngempuruka lebih 700 iku peranak ari 11 buah rumah panjai.

Kenu ku iya, penatai ti chukup meransang mandangka semengat beserakup enggau kerejasama rat entara komuniti San.

Iya mega meri besai terima kasih ngagai rayat Telang Usan ketegal pengandal ke udah diberi sida ngagai iya sepemanjai tiga penggal nyadi pengari rayat lalu ngemeratka komitmen iya deka terus ngetanka pemansang kandang menua nya nyengkaum pengawa numbuhka opis Pelilih Mit di San enggau pengawa masang lampu solar di rumah panjai.

Sama bisi datai ngerichahka agi pengerami nya Sekretari Politik Premier Sarawak, Dominic Nyurang Ajang, ex-Kaban Parlimen Baram, Datuk Jacob Dungau Sagan begulai enggau Datin Winnie Jolly, Pemancha Anthony Kula, Lucas Kalang, Temenggong Elizabeth Deng, Pemancha Nawan Luhat, Pemesai Pelilih Menua Charles Aloysius, Penghulu Augustine Supen Taja kelimpah bala ketuai komuniti, ketuai raban bansa, kaunselor enggau raban komuniti kandang menua San. – RBI

#ruaiberitaiban#newsiban#beritaiban

Rindu | Titih | Kunsika