BAU, 22 Jun — Premier Sarawak, YAB Datuk Patinggi Tan Sri (Dr) Abang Haji Abdul Rahman Zohari Abang Openg sehari tu udah bejadika Pengerami Bejadika Palan Main Asal Bidayuh Bau (BCCB) ti udah nyadi kelai baru dalam pengawa ngenegapka pengawa ngintu pesaka main asal enggau pemansang komuniti di nengeri tu.

Projek beungkus RM9 juta ari baruh agih belanja Projek Rayat udah tembu penuh kena 28 Januari 2026 lalu diatu befungsyen nyadi palan rujukan budaya enggau pelasar ngenegapka identiti komuniti Bidayuh di Bau.

Entara batang perengkaguna ke bisi disediaka nyengkaum sebuah dewan mayuh guna ke ulih ngundan lebih 1,000 iku orang, palan pemandang enggau bilik aum ke disikap ngena perengka guna moden, kelimpah ari baruk tradisional, iya nya replika rumah segala ke nyadi kelai identiti enggau pesaka komuniti Bidayuh.

Nyerumba pengerami ke sama, bisi mega pengawa nyuaka Surat Pala Tanah ari baruh Seksyen 18 Kanun Tanah Sarawak (KTS) ti meri penguntung ngagai 1,797 iku penerima ti mungkur 2,109 lot tanah nyengkaum lot SALCRA.

Nitihka penerang ari Sapit Menteri Pengangkut Sarawak Datuk Henry Harry Anak Jinep, pengawa bejalaika projek Bidayuh Cultural Centre Bau (BCCB) enggau pengawa nyerahka hak ngempu tanah ngayanka komitmen Perintah Sarawak ti terus ngenegapka agenda pemansang ti sebela entara pengawa ngintu pesaka budaya, pemansang sosio-ekonomi enggau pengawa mutarka pensngul tanah Hak Adat Bansa Asal (NCR).

Ku iya, inisiatif nya ukai semina meri kelala undang-undang ngagai pengempu tanah di kandang menua Bau, tang mega ngenegapka agi pengandal komuniti ngagai pengawa pemansang inklusif ti dipejalaika perintah nengeri.

Pemansang palan main asal tu dipeda nyadi siti singkang ke berat dalam nentuka pesaka asal bansa Bidayuh terus diintu sereta ditampung ngagai rebak dudi hari, kelimpah ari ngenegapka identiti budaya komuniti lokal. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

BINTANGOR, 22 Jun – Ulah siku lelaki peranak menua nya dipelaba bisi kaul enggau pengawa enchuri perengka pengangkut enggau buah sawit di Batu 2, Nanga Stras dngujungka iya ukai semina ditan polis, tang mega positif dadah pengudah beperesa ai kemi.

Saspek ke beumur 36 taun nya ditan seraban pemesai enggau kaban Opis Tasat Jenayah (JSJ) Indu Opis Polis Pelilih (IPD) Meradong urung pukul 12.30 tengahari, 20 Jun tu tadi, dikena mantu pansik kes enchuri ke diripotka nyadi ba kandang menua nya.

Kepala Polis Pelilih Meradong, DSP Tansli Mering madah, pengawa ngetan nya digaga berindik ari pansik ripot polis bekaul enggau pengelenyau sebuah perengka pengangkut enggau buah sawit di Batu 2, Nanga Stras, Bintangor.

“Asil peresa ai kemi ti dipejalaika tetemuka saspek positif dadah baka Amphetamine enggau Methamphetamine,” ku iya nengah penerang media sehari tu tadi.

Ku iya, saspek diatu benung dipansik ari baruh Seksyen 15(1)(a) Akta Dadah Berbahaya 1952 ketegal nuchuk dadah ti tau mai penusah ngagai tubuh, seraya pengawa mansik kes enchuri perengka pengangkut enggau buah sawit agi dipejalai.

Nitihku iya, pengawa meresa baru rikod ke udah tetemuka lelaki ke bekaul nya nadai ngembuan sebarang rikod jenayah tauka penyalah bekaul enggau dadah sebedau tu.

Ku iya, enti dikenuku ngereja penyalah ari baruh Seksyen 15(1)(a) Akta Dadah Berbahaya 1952, saspek ulih diukum mata duit nyentuk RM5,000 tauka dijil enda lebih ari dua taun.

Berebak enggau nya, piak polis enda ngenggaika bisi individu bukai bisi kaul enggau kes nya lalu pansik silik agi dipejalaika dikena nembuka keretas pansik. – RBI

#ruaiberitaiban#newsiban#beritaiban

Rindu | Titih | Kunsika

BAU, 22 Jun 2026 – Pengawa numbuhka Palan Main Asal Bidayuh Bau (BCCB) di Bau digambarka nyadi siti inisiatif ke besai reti dalam pengawa Perintah Sarawak ngetanka pesaka asal sereta meri kelala adat komuniti Bidayuh ngagai komuniti menua tu enggau antarabansa.

Premier Sarawak, Datuk Patinggi Tan Sri (Dr) Abang Haji Abdul Rahman Zohari bin Tun Datuk Abang Haji Openg madah, palan main asal nya deka nyadi pelasar strategik dalam mantaika penyelai budaya komuniti Bidayuh ngambika terus dikerindu sereta dipeturun ngagai rebak dudi hari.

“Nengah palan tu, penyelai main asal kitai ulih dikemerat sereta dikerinduka ukai semina peranak menua tu aja, tang mega komuniti ari luar,” ku iya lebuh bejadika Pengerami Ngelanchar ‘Bidayuh Cultural Centre Bau’ (BCCB) sehari tu tadi.

Iya nyemetak madahka penegap Sarawak kemaya hari tu ukai semina bepelasarka penyelai budaya aja, tang mega bepelasarka penyerakup rayat ke nyadi pelasar penegap enggau penyulut nengeri tu.

Ba pemansang ke bekaul, iya mega ngenang pasal pengawa Perintah Sarawak ngenegapka sektor pengangkut enggau penyambung nyadi penyungkak pemansang ekonomi enggau industri dagang temuai nengeri tu.

Nitih ku iya, inisiatif baka AirBorneo deka nyadi jematan nyambung Sarawak enggau dunya luar, lalu enggau nya ngemuntangka penatai temuai nyerungkai penyelai budaya enggau palan dagang temuai di nengeri tu.

“AirBorneo baka jematan ngagai kitai. Lebuh mayuh agi temuai datai ke Sarawak, kitai ulih mandangka budaya enggau penyelai Sarawak ngagai dunya,” ku iya.

Ngelansa pasal isu tambang bilun ti agi mar, iya nerangka Perintah Sarawak benung gawa ngenegapka pengawa nyaga dalam sektor penerebai bilun dikena nentuka mayuh agi tambang ti ulih dibeli ungkup pengelantang rayat.

“Rega tikit diatu mar. Lebuh Perintah Sarawak udah nguasa penuh, aku deka bekunsi enggau kita semua,” ku iya. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

KUCHING, 22 Jun — Sapit Premier Sarawak Datuk Amar Douglas Uggah Embas ke mega Chairman Komiti Besai Gawai Dayak Sarawak 2026, ngenataika pengaga ati enggau terima kasih ke pemadu tinggi ngagai semua piak ti udah ngemujurka Pengerami Gawai Dayak Sarawak 2026.

Ku iya, pemujur pengerami taun tu asil ari kerejasama rat ari mayuh bengkah piak ti nentuka pengelanchar empat batang pengerami iya nya Bazaar Gawai, Pesta Main Asal Etnik, Pengawa Bejalai Bebala Mayuh Niti Daun enggau Pengerami Makai Lemai Gawai Dayak Sarawak 2026.

Nitih ku iya, pengerami ti berambaika leka jaku “Segulai Sejalai” udah mujur ngempuruka rayat ari bemacham pupu bansa enggau penatai dalam suasana ti penuh enggau pemanah ati, lalu enggau nya mandangka semengat penyerakup, pengelantang enggau begulai rayat Sarawak.

Uggah mega meri besai terima kasih ngagai Ketuai Pemegai Menua (TYT) Yang di-Pertua Negeri Sarawak, Tun Pehin Sri Dr Wan Junaidi Tuanku Jaafar enggau Toh Puan Datuk Patinggi Fauziah Mohd Sanusi ke udah sanggup ngulu batang pengerami besai nya sereta sukung sida ti terus dalam pengawa ngetan sereta negika pesaka asal komuniti Dayak.

Iya mega meri besai terima kasih ngagai YAB Premier Sarawak, Datuk Patinggi Tan Sri Abang Johari Openg ketegal sukung enggau agih belanja ti tegap ari Perintah Sarawak ti nyadi penyungkak pemujur ngatur pengerami taun tu.

Kelimpah ari nya, iya mega meri terima kasih ngagai Menteri Besai, Dato’ Seri Anwar Ibrahim ke udah sanggup ngulu Pengerami Makai Lemai Gawai Dayak Renggat Sarawak 2026 ti mandangka pengangkun penyelai budaya di Sarawak.

Pengerindu sereta terima kasih mega diberi ngagai Sapit Menteri Pengerai Mensia Mayuh, Pengawa Berumah enggau Perintah Lokal ke mega Chairman Komiti Pengerami Makai Lemai Gawai Dayak Renggat Nengeri Sarawak 2026, Datuk Dr Penguang Manggil, Datuk Majang Renggi, Datuk Jefferson Jamit Unyat enggau Datuk Gerald Rentap Jabu ti udah nyadi ketuai enggau komitmen nentuka batang program lanchar dipejalaika.

Iya mega meri besai terima kasih ngagai semua pengari rayat, senator, ketuai opis, ejensi perintah enggau peribit, gerempung ukai dikuasa perintah (NGO), KMKK enggau kaban komiti bejalaika pengawa ke bisi enggau terus ngemujurka pengerami nya.

“Manah pengawa sereta terima kasih mega ngagai selampur Komiti Pengerami, raban pengelikun, raban media, penaja, volunteer enggau semua piak ti udah bebendar ngemujurka pengerami tu,” ku iya.

Kenu ku iya, pemujur pengerami nya nyadika bukti semengat “Segulai Sejalai” majak ngerembai ba rayat Sarawak sereta nyadi pelasar ti beguna dalam ngenegapka penyerakup enggau pengelantang nengeri tu.

Iya mega meri besai terima kasih ngagai selampur komuniti Dayak enggau rayat Sarawak ti udah begempung ngerichahka agi pengerami nya.

“Arapka semengat Segulai Sejalai terus nyadi lalau kitai nempa Sarawak ti maju, lantang sereta lantang,” ku iya. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

Photo — Opis Sapit Premier 1

BETONG, 22 Jun – Nembiak MRSM Betong, Leia Sara Nyiru anak Lyndon Jenang mai basa ngagai institusyen nya lebuh iya mujur bulih Pingat Perak ngarika Kontinjen MRSM Sarawak ba pekit Poomsae Taekwondo.

Pemujur nya dipuji Chairman Muafakat MRSM Betong, Henry anak Jugah, ti ngenataika pengaga ati ke bekaul penyulut atlit biak nya.

Kenu ku iya, pemujur ke dijapai nya asil ari pengawa bebendar, disiplin ke tinggi sereta semengat besemekih ke nyelai ke dipandangka Leia Sara sepemanjai nyereta pekit nya.

Ku iya, pemujur nya ukai semina ngasuh atlit nya enggau sida sebilik temegah ati, tang mega ngasuh MRSM Betong enggau Kontinjen MRSM Sarawak bela temegah ati.

“Ngarapka pemujur tu ulih meri inspirasyen ngagai nembiak bukai ngambika terus bebendar nyapai penyulut dalam bidang sida sereta ngayanka dedikasyen enggau komitmen ti tinggi ulih ngadaka pemujur ti ngemegahka ati,” ku iya.

Iya mega ngarapka Leia Sara terus teulihka mayuh agi pemujur ba renggat ke tinggi agi dudi hari, lalu ari nya ulih ngangkatka nama MRSM Betong, Sarawak enggau menua tu ba arena lumba enggau main taekwondo.

Pemujur nya sekali agi ngayanka pengulih nembiak MRSM nyulut ukai semina dalam akademik aja, tang mega dalam bidang kokurikulum enggau lumba enggau main. – RBI

#ruaiberitaiban#newsiban#beritaiban

Rindu | Titih | Kunsika

KUCHING, 22 Jun — Perintah Besai dilalau berunding nambahka penyampau geran ninting taun dikena bejalaika pengawa nyukat Tanah Hak Adat Bansa Asal (NCR) komuniti Dayak di Sarawak.

Sapit Menteri Pengerai Mensia Mayuh, Pengawa Berumah enggau Perintah Lokal ke mega Chairman Komiti Pengerami Makai Lemai Gawai Dayak Renggat Nengeri Sarawak 2026, Datuk Dr Penguang Manggil madah, komuniti Dayak amat beterima kasih ngagai komitmen Perintah Sarawak enggau Perintah Besai ti udah ngungkupka geran ninting taun ungkup tuju tu kenyau ari taun 2019.

Nitih ku iya, inisiatif nya meri empas ke besai dalam ngenyampatka proses nyukat tanah NCR di serata Sarawak, lalu enggau nya muka mayuh agi ruang ungkup pemansang sosio-ekonomi ungkup komuniti menua pesisir.

“Berindik ari pekara tu, kami minta Yang Berhormat Menteri Besai neruska inisiatif tu lalu enti ulih berunding nambahka penyampau geran ninting taun jemah ila dikena ngenyampatka agi pengawa bejalaika kereja nyukat tanah NCR,” ku iya.

Iya nyemetak madahka pengawa ngenyampatka pengawa nyukat tanah NCR beguna dikena ngemuntangka komuniti Dayak nguna sereta nyadi aset komersial tanah ke diempu sida, ari nya ulih ngangkatka sosio-ekonomi peranak menua pesisir.

Iya madah munyi nya lebuh ngenataika jaku pengelalu Pengerami Makai Lemai Pengerami Gawai Dayak Sarawak 2026 ti bela digulu Tuai Pemegai Menua (TYT) Nengeri Sarawak, Tun Pehin Sri Dr Wan Junaidi Tuanku Jaafar, Menteri Besai, Datuk Seri Anwar Ibrahim enggau Premier Sarawak, Datuk Patinggi Tan Sri Abang Johari Tun Openg, ditu kemari.

Ba pemansang ke bekaul, iya ke mega Chairman Pengatur Pengerami madah, pengawa ngatur Pengerami Gawai Dayak Sarawak 2026 udah mujur ngempung mayuh bengkah renggat mensia mayuh nengah bemacham program ti mantaika pengaya budaya enggau pesaka asal komuniti Dayak.

Nitih ku iya, pengerami nya dipunka enggau pengawa ngatur Bazaar Gawai Dayak enggau Etno Budaya Festival berengkah ari 1 ngagai 24 Mei, ti ngerikod penatai urung 110,000 iku temuai enggau rega jual manggai urung RM2.5 juta.

“Tu keterubah iya pengerami tu dibai pansut ari endur asal iya lalu timbal ke diterima chukup ngelantangka ati,” ku iya.

Ku iya, pengerami nya mega bisi mantaika bemacham aktiviti nyengkaum mandangka main asal, pekit ngajat enggau taboh, main asal, pengawa mandangka asil pengelandik jari, pekit pemajik gamal sereta bejualka produk enggau pemakai asal bansa Dayak.

Kelimpah ari nya, Program Niti Daun ke nyadi ba Waterfront Kuching kena 20 Jun tu tadi mega ngerikod pemujur enggau penyereta 99 kontijen enggau 15 perengka pengangkut ke diias ti mungkur urung 3,000 penyereta ari serata Sarawak enggau Sabah.

Ku iya, program nya ukai semina matak beribu iku temuai enggau temuai datai, tang mega nyadi pelasar beguna amat dalam mantaika penyelai pekayan asal, muzik enggau main asal bemacham etnik Dayak di nengeri tu.

Iya nyemetak madahka pemujur ngatur pengerami nya asil ari kerejasama rat entara ejensi perintah, gerempung ukai dikuasa perintah (NGO) Dayak, penaja korporat enggau komuniti menua nya.

Berebak enggau nya, iya mega ngenataika pengaga ati ngagai Perintah Sarawak ti ngungkupka agih belanja sepenyampau RM2 juta dikena ngemujurka pengerami nya, pia mega Perintah Besai nengah Opis Menteri Dagang Temuai, Seni enggau Main Asal (MOTAC) ti meri bantu sepenyampau RM1 juta.

Iya ngarapka kerejasama rat entara Perintah Sarawak enggau Perintah Besai deka terus ditegapka dikena nentuka agenda pemansang menua pesisir ulih dipejalaika enggau ngasi agi ungkup pengelantang rayat enggau penyulut Sarawak selampur.

Bela datai maya nya Sapit Premier Sarawak ke mega Chairman Komiti Besai Gawai Dayak Renggat Sarawak 2026 Datuk Amar Douglas Uggah Embas, Sapit Premier Sarawak Datuk Amar Profesor Dr Sim Kui Hian, Sekretari Perintah Sarawak Datuk Amar Mohamad Abu Bakar Marzuki, raban Menteri Kabinet Perintah Besai enggau Sarawak, Yang di-Pertua Dewan Negara Senator Dato Awang Bemee Awang Ali Basah, raban Menteri, Sapit Menteri sereta temuai dipebasa ke bukai. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

Kredit photo — Jabatan Penerangan Malaysia

KUCHING, 22 Jun — Kerejasama strategik entara PETRONAS enggau PETROS dipechaya ulih ngenegapka pemansang ekonomi komprehensif Sarawak enggau Malaysia nengah chara ‘win-win’ ti meri penguntung ngagai kededua.

Menteri Besai, Datuk Seri Anwar Ibrahim madah, pekara nya dikerandau enggau Premier Sarawak, Datuk Patinggi Tan Sri Abang Johari Tun Openg, enggau ngemeratka pemesai guna semua piak bebasaka hak, atur enggau undang-undang ke udah bisi ke nyadi pelasar pengawa ngatur enggau kerejasama kededua entiti nya.

“Iya ulih digaga lalu endang amat begunaka dipejalaika nengah potensial besai pengeraja asal bekunsi kitai.

“Malaysia dikelala nyadi sebuah menua ke chukup likun di dunya.

“Kitai ngembuan polisi ekonomi ti terang amat lalu kitai patut nentuka kitai mujur dalam pengawa tu,” ku iya.

Iya madah munyi nya lebuh bejaku ba Pengerami Makai Lemai Pengerami Gawai Dayak Renggat Sarawak 2026 ti dipenyadi Ketuai Pemegai Menua (TYT) Yang di-Pertua Negeri Sarawak, Tun Pehin Sri Dr Wan Junaidi Tuanku Jaafar, ditu malam Hari Minggu.

Nitih ku iya, PETRONAS enggau PETROS begunaka terus fokus ngagai pemerat begulai sereta ngenegapka kerejasama strategik bepelasarka prinsip menang-menang dalam pengawa ngerebut potensial ekonomi ti majak nambah.

“Kitai dekaka pekara tu diputarka enggau adil, enda bechiping sereta engkeman enggau semengat dua kaling gawa nyadi seiti tim,” ku iya.

Berebak enggau nya, Menteri Besai madahka pejalai pengawa berunding entara kededua piak ngayanka penyulut ke positif amat bepelasarka ripot pemadu baru ke diterima iya.

“Aku gaga ati madahka pejalai pengawa berunding entara kededua kompeni nya diatu ngayanka penyulut ke chukup positif.

“Aku udah nerima ripot ke pemadu baru, lalu Sapit Menteri Besai Datuk Amar Fadillah Yusof mega mantu nengah komiti teknikal ke ditumbuh,” ku iya nerang.

Iya mega mantaika pengarap sempekat kepenudi entara PETRONAS enggau PETROS ulih disain dalam timpuh ke semak dikena ngenegapka agi penuduk ekonomi Sarawak enggau Malaysia.

“Aku ngarapka dalam timpuh ke semak tu kitai ulih nembuka sempekat entara PETRONAS enggau PETROS dikena ngangkatka prestij ekonomi kitai di Sarawak sereta mega di Malaysia,” ku iya.

Bela datai maya nya Sapit Premier Sarawak ke mega Chairman Komiti Besai Gawai Dayak Renggat Sarawak 2026 Datuk Amar Douglas Uggah Embas, Sapit Premier Sarawak Datuk Amar Profesor Dr Sim Kui Hian, Sekretari Perintah Sarawak Datuk Amar Mohamad Abu Bakar Marzuki, raban Menteri Kabinet Perintah Besai enggau Sarawak, Sapit Menteri Pengerai Mensia Mayuh, Pengawa Berumah enggau Perintah Lokal ke mega Chairman Komiti Pengerami Datuk Dr Penguang Manggil, Yang di-Pertua Dewan Negara Senator Dato Awang Bemee Awang Ali Basah,, raban Sapit Menteri sereta temuai dipebasa ke bukai. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

KUCHING, 22 Jun — Pengawa ngulihka Palan Penyangkai Kapal Bintulu ulih Perintah Sarawak enggau pengawa ngaku Bintulu nyadi Kluster Perindustrian Beralihan (TIC) ari Forum Ekonomi Dunya dikearapka ulih ngenegapka agi penuduk Sarawak nyadi hub industri, kuasa enggau ekonomi baru di rantau tu.

Premier Sarawak, Datuk Patinggi Tan Sri (Dr) Abang Haji Abdul Rahman Zohari Bin Tun Datuk Abang Haji Openg madah, kedua-dua pemansang strategik nya muka ruang ke lebih luas ngagai Sarawak matak puku ke bekualiti tinggi sereta ngenyampatka transformasyen ekonomi bepelasarka teknologi, kuasa gadung enggau industri ke bisi nilai tambah.

Nitihku iya, pengawa ngulihka Palan Penyangkai Kapal Bintulu asil ari kerejasama rat entara Perintah Besai enggau Perintah Sarawak ti mandangka kaul strategik ungkup pemaik pemansang nengeri enggau pengelantang rayat.

Ku iya, penegap politik enggau pemanah kaul entara kedua-dua piak udah nyadi pematak bejalaika mayuh macham agenda pemansang nengah chara ke lebih betukuh sereta ngasi.

Berebak enggau nya, iya nerangka Bintulu udah diaku nyadi siti ari 30 palan Kluster Industri Transition ari baruh inisiatif Forum Ekonomi Dunya, siti kelala antarabansa ti ngelala potensial transformasyen industri ti meruan.

“Aku udah madah ngagai Menteri Besai iya nya Bintulu diatu dalam raban Kluster Industri Transisyen ari baruh Forum Ekonomi Dunya.

“Semina bisi 30 palan di dunya ke nerima kelala tu lalu Sarawak entara nya,” ku iya.

Ku iya, pengangkun nya dikearapka ulih nambahka pengandal pemeranak puku di Sarawak, lalu ari nya ulih ngenegapka pemansang ekonomi baru ti bepelasarka kuasa tau dikena baru, teknologi beresi enggau industri ngaga beteknologi tinggi nyengkaum semikonduktor.

“Kitai deka ngemansangka ekonomi baru bepelasarka kuasa gadung enggau pengelantang rampa menua.

“Kitai mega ulih ngemansangka industri begaga barang ti maju ti ulih ngenataika penguntung ti besai ngagai nengeri enggau menua tu,” ku iya nerang.

Ku iya nambah, penegap pengeraja asal kuasa Sarawak enggau penuduk strategik bisi potensial nempa nengeri tu nyadi pemekal kuasa besai ngagai rantau ASEAN jemah ila.

“Pengawa kitai jemah ila chukup manah lalu aku andal amat Sarawak deka terus bejalaika tanggungpengawa ti beguna dalam ngenegapka penuduk Malaysia ti nyadi kuasa ekonomi ti bepengaruh ba rantau ASEAN,” ku iya. – RBI

#ruaiberitaiban#newsiban#beritaiban

Rindu | Titih | Kunsika

SIBU, 22 Jun – Ketuai Komuniti enggau Ketuai Raban Bansa (KMKK) enggau Komiti Pemansang enggau Pengelikun Genturung Pendiau (JKKK) nyadi tulang belakang nentuka polisi enggau inisiatif perintah seruruan dikenataika ngagai rayat menua pesisir.

Kaban Kunsil Nengeri (ADUN) Daro, Dr Safiee Ahmad madah, KMKK enggau JKKK nyadi batang penyambung entara perintah enggau komuniti dalam nentuka pengelantang pendiau rayat seruran dijaga.

“Bemacham pemar udah ditapi begulai sepemanjai timpuh aku nyadi pengari rayat, tang KMKK enggau JKKK terus mandangka komitmen ke tinggi dalam bejalaika pengandal ngagai komuniti,” ku iya.

Iya madah munyi nya ba Malam Meri Terima Kasih KMKK Tanah Besai Daro ba sebuah hotel tebilang ditu, malam Hari Enam tu tadi.

Pengawa tu ngempuruka KMKK, kaban JKKK enggau ketuai opis ari serata Daro kelai meri basa ngagai pengawa nyadi ketuai ba renggat baruh.

Ku Dr Safiee, bala ketuai renggat baruh bejalaika tanggungpengawa nyadi rintai mua dalam mantu perintah ngatur sereta nyalurka bantu ngagai rayat.

“Peneleba tu nyata ngayanka jentera pemansang ba renggat pun menua beguna amat dikena nentuka tetiap inisiatif perintah ulih dipejalaika enggau komprehensif sereta efektif,” ku iya. – RBI

#ruaiberitaiban#newsiban#beritaiban

Rindu | Titih | Kunsika

KUCHING, 22 Jun – Premier Sarawak, Datuk Patinggi Tan Sri Abang Johari Tun Openg ngarapka Perintah Besai ulih mansik baru insentif beranakka puku ke bisi diatu ngambika ulih besemekih agi sereta narit ati pemeranak puku antarabansa, kelebih agi dalam sektor hidrogen enggau semikonduktor ti dikelala nyadi penyungkak ekonomi menua jemah ila.

Nitih ku iya, Malaysia begunaka mayuh agi pakej insentif ti narit ati ti setipak enggau guna industri beteknologi tinggi dikena nentuka menua tu terus kompetitif berebutka puku strategik ba renggat dunya.

“Sektor hidrogen enggau semikonduktor ngembuan rega ekonomi ke besai laban ngaul aktiviti ngaga beteknologi tinggi sereta ngena barang mata ke strategik.

“Nya alai, pengawa meresa baru insentif ke udah bisi patut digaga dikena nentuka Malaysia terus kompetitif matak pemeranak puku antarabansa,” ku iya.

Iya madah munyi nya lebuh bejaku ba Pengerami Makai Lemai Pengerami Gawai Dayak Renggat Sarawak 2026 di Palan Konvensyen Borneo Kuching (BCCK), malam tadi.

Datuk Patinggi Tan Sri Abang Johari madah, landskap ekonomi dunya ti jampat berubah begunaka perintah nyendiaka polisi beranakka puku ti lebih progresif dikena narit kompeni besai dalam sektor kuasa gadung enggau teknologi maju ngambika Malaysia nyadi palan beranakka puku ti dikerindu.

Nitih ku iya, pengawa beranakka puku ba industri hidrogen enggau semikonduktor ukai semina ulih ngenegapka palan industri menua tu, tang mega bisi potensial mansutka pun penatai pemisi baru ungkup perintah nengah pengawa ekonomi ti nambah sereta ngumpul asil.

Berebak enggau nya, iya madahka pemansang kedua-dua sektor strategik nya deka muka mayuh agi peluang gawa bepengelandik tinggi, lalu ari nya ulih mantu ngadaka pengereja pengawa ti nangkup guna industri jemah ila.

Abang Johari mega nyemetak madah negapka ekosistem beranakka puku dalam industri beteknologi tinggi deka nambahka daya besemekih antarabansa Malaysia sereta nyukung agenda transisyen nuju ekonomi bepelasarka inovasyen, teknologi enggau kuasa beresi.

Dalam jaku ke sama, iya ngenataika pengaga ati ngagai Menteri Besai, Datuk Seri Anwar Ibrahim ketegal kerejasama rat entara Perintah Besai enggau Perintah Sarawak ke udah ngemujurka sekeda agenda strategik dipejalaika, nyengkaum pengawa nyerahka Palan Penyangkai Kapal Bintulu ngagai Sarawak.

Ku iya, penegap politik enggau pemanah kaul entara kedua-dua perintah nyadi faktor ke besai dalam nambahka pengandal pemeranak puku sereta ngenyampatka pengawa bejalaika agenda pemansang ekonomi menua.

Sama bisi datai iya nya Tuai Pemegai Menua (TYT) Negeri Sarawak, Tun Pehin Sri Dr Wan Junaidi Tuanku Jaafar begulai enggau bini iya, Toh Puan Datuk Patinggi Fauziah Mohd Sanusi, Menteri Besai Datuk Seri Anwar Ibrahim, Sapit Menteri Besai Datuk Amar Fadillah Yusof, Yang di-Pertua Dewan Negara Senator Dato Awang Bemee Awang Ali Basah, Sapit Premier Sarawak Datuk Amar Douglas Uggah Embas, Sapit Premier Sarawak Datuk Amar Profesor Dr Sim Kui Hian, Sekretari Perintah Sarawak Datuk Amar Mohamad Abu Bakar Marzuki kelimpah ari baris menteri, menteri muda, ketuai opis enggau bala pemesai ke bukai. – RBI

#ruaiberitaiban#newsiban#beritaiban

Rindu | Titih | Kunsika