PADAWAN, 8 Mac — Siku lelaki betapi enggau pengirau pengudah nyadi mansa penusah gis meletup enggau angus ke nyadi ba sebuah rumah di Lorong 1, Taman Mas Padawan, ditu, tumu pagi tadi.

Penusah ke nyadi urung pukul 4.40 pagi nya ketegal gis ke pantis ti ngujungka penusah meletup ba seksyen stor palan pengentap pendiau nya, ngujungka pengerusak struktur ke besai ba dapur.

Pemesai Bomba Kanan II Mustaqiim Ibrahim ke nguluka operasyen nya madahka, piak iya nerima kangau ngenyit pukul 4.42 pagi.

Tim raban ari stesyen ke besemak terus dianjung ngagai endur nya lalu datai urung pukul 5.04 pagi bejalaika pengawa meresa.

Asil pengawa meresa ba endur nya tetemuka empas ari penusah meletup nya ukai semina ngasuh api mit nyadi, tang mega ngasuh siling ba bagi dapur rumah nya runtuh ambis.

“Ditemu bisi gis bisi pantis ngujungka penusah meletup mit lalu angus ba endur nyimpan barang rumah nyentukka siling dapur runtuh.

“Taja pia, api diripotka udah padam kediri sebedau penatai raban bomba,” ku iya nengah penerang berita sehari tu.

Siku mansa lelaki diripotka bakal mimit ba penusah nya. Mansa bisi telih ba kening enggau bakal ba kaki ketegal empas letup tauka kerimpak ari struktur ke runtuh.

Dipelabaka mansa udah dulu dibai sida sebilik ke sepital ngambika diperubat enggau lengkas sebedau raban bomba datai ba rumah sida.

Tim Operasyen Penusah Ngenyit (EOT) bejalaika pengawa meresa enggau silik selampur rumah dikena nentuka nadai agi tinggal gis ke tau ngujungka penusah meletup udah nya.

Raban bomba mega ngelalau mensia mayuh ngambika seruran beratika bau gis ke bisi dalam rumah sereta nentuka sistem pengangat angin dalam gaya ke manah dikena nyeliahka gis begumpul ke tau ngujungka penusah ke tau mai penusah baka tu. — RBI

KUCHING, 8 Mac — Gerija Seventh Day Adventist Landeh udah nerima agih belanja sepenyampau RM50,000 ari Unit Pekara Jalai Pengarap Bukai (UNIFOR).

Agih belanja tu udah disuaka Kaban Kunsil Nengeri (ADUN) Batu Kitang Dato Lo Khere Chiang dalam siti pengerami ke diatur ba gerija tu sehari tu.

Dalam jaku iya, Lo madahka agih belanja tu dikena nyukung pemansang, pengawa nyeruri enggau ngintu sereta nambah manah rumah sembiang ukai Islam.

“Perintah Sarawak seruran komited dalam nyaga pengelantang pendiau semua komuniti ti enda ngira penatai asal jalai pengarap enggau budaya,” ku iya.

Lo mega nambah, sukung ti meruan UNIFOR mantaika pengeransing perintah nengeri dalam nentuka tetiap komuniti bulih pemerat ti patut.

Sarawak ku iya tebilang enggau mayuh macham bangsa enggau jalai pengara patut terus dihjaga pemanah ulah ti bebatak asur enggau bebasaka sama diri.

Beserimbai enggau tu iya ngarapkan agih belanja ti diberi tu ulih dikena memanah raban gerija ungkup tuju ti dipadahkan.

KUALA LUMPUR, 8 Mac – Diatu sepenyampau 1,781 buah tadika Penyerakup enggau 41 buah tadika Penyerakup beoperasyen di serata menua, nyendiaka pelajar tumu ngagai nembiak enggau pemerat ba nilai penyerakup ari renggat tumu besekula.

Menteri Penyerakup Bansa, Datuk Aaron Ago Dagang madah, tu nunjukka perintah terus komited meri kuasa ngagai inisiatif tu nengah mayuh macham sukung.

“Sukung tu nyengkaum bantu pemakai tambah, geran per kapita, insurans, sukut pengelikun, perengka PdP enggau nyendiaka kit pemungkal ngagai nembiak.

“Pengawa tu ngembuan tuju deka nentuka rampa belajar ti likun, kondusif sereta bekualiti ungkup semua,” ku iya.

Aaron ke mega Kaban Parlimen Kanowit madahk perkara tu nengah ruai Fecebook iya seharitu.

Beduduk enggau nya mega, Aaron nerangka Taska Perpaduan enggau Taska bejalaika tanggungpengawa ti beguna amat nyadi pelasar pelajar tumu anak mit.

Ku iya, tanggungpengawa tu ukai semina ngemeratka pengawa belajar, tang nerenakka nilai penyerakup, talukka menua enggau pengarap diri ari umur ti agi biak. -RBI

LIMBANG, 8 Mac — Palan Pengenduh Sementara (PPS) ba Balai Mensia Mayuh Medamit ditu dibuka urung pukul 11.30 malam, Hari Enam dikena nampung sida ke tasah ampuh bah ari kandang Ujung Jalai ti dituntung ujan bangat enda ngengetu kenyau ari malam Hari Lima tu tadi.

Nitihka penerang ari Angkatan Pertahanan Awam Malaysia (APM) Limbang, sepenyampau 10 iku mansa ti mungkur lima iku lelaki enggau lima iku indu ari empat ruang bilik dipindah ngagai palan nya.

Situasyen ba PPS diripotka ulih dijaga enggau manah enggau penyampau 23 iku raban ari mayuh bengkah ejensi ti ngaul diri dalam pengawa ngatur enggau operasyen bantu ungkup mansa.

Entara ejensi ti ngaul diri iya nya Angkatan Pertahanan Awam Malaysia (APM), Opis Pengintu Pengelantang Raban Bansa (JKM), Polis Diraja Malaysia (PDRM), Opis Sukarelawan Malaysia (RELA) enggau Opis Bomba enggau Penyah Penusah Malaysia (JBPM).

APM Limbang madah, pengawa matau enda ngetu dipejalai lalu semua ejensi ke bekaul udah nyikap diri napi sebarang peluang nyema gaya ampuh bah majak balat.

Mensia mayuh mega dilalau seruran bejejaga, ngasika jaku tangkan piak bekuasa sereta nyeliahka diri ari tama ngagai kandang endur ti kena penusah ketegal pengelikun begulai.

Sebarang penusah ngenyit tau dipadah nengah talipaun APM Limbang ba lumur 085-210471 tauka talipaun penusah ngenyit MERS 999. — RBI

SPAOH, 8 Mac — Projek ngaga Jematan Sungai Paku ba Jalai Tanjung Sebekut diatu udah manggai 81.94 peratus penyulut fizikal lalu disadang deka dibuka bulan April ti deka datai.

Pejalai projek ke beungkus RM36.9 juta dipatau nengah pengawa penemuai ngagai palan Sapit Premier Sarawak ke mega Menteri Infrastruktur enggau Pemansang Palan Penyangkai Kapal Sarawak, Datuk Amar Douglas Uggah Embas, ti mansik baru status bejalaika projek ba palan nya kemari.

Nitihka pematau ke pemadu baru, kereja ngaga benung chakah dipejalaika dikena nentuka projek nya ulih ditembuka nitihka timpuh ke udah ditetapka sebedau iya dibuka ngagai penguna jalai alun.

Jematan nya dikemansangka nyadi sebagi ari pengawa Perintah Sarawak ngenegapka rentayan infrastruktur menua pesisir sereta nambahka tikas penyambung entara genturung pendiau enggau palan ekonomi ngelingi Spaoh enggau Bagi Menua Betong.

Rambau penemuai nya, kunteriktor mega madahka pengawa bejalaika kereja struktur besai enggau pengawa masang komponen mengkang lanchar enggau pengawa matau rat ari raban teknikal.

Nitihka penerang rasmi ari Opis Kereja Raya Sarawak, projek nya diatu benung ba renggat kepenudi dipejalaika lalu fokus ngagai kereja penembu, peresa teknikal enggau sukut pengelikun sebedau diserah ngagai opis bekuasa.

“Pejalai projek udah manggai 81.94 peratus lalu dipelaba tembu sereta dibuka ngagai trafik dalam bulan April 2026 pengudah semua proses meresa enggau nguji tembu,” ku penerang nya.

Nengah penembu jematan nya, iya dikearap ulih meri penguntung ke besai ngagai peranak menua nya nengah penambah akses komunikasyen, pengelikun penguna jalai alun sereta nyadi pemangkin penumbuh aktiviti ekonomi ba kandang menua nya. — RBI

SARATOK, 8 Mac — Program Jerayawara Bubur Lambuk ke diatur SABERKAS Pampang Krian udah chukup ngerichahka Palan Pasar Ramadhan Saratok dalam gaya ke penuh enggau pengeransing begulai enggau komuniti menua nya, ditu kemari.

Program tu bela digulu Chairman SABERKAS Krian, Sanggin Amit, Kaban Kunsil Nengeri (ADUN) Kalaka, Mohamad Duri, Kaban Kaunsil Pelilih Saratok sereta mega bala kaban komiti SABERKAS Krian enggau raban ke bela ngagai palan mantu komuniti.

Sepenyampau 200 mangkuk bubur lambuk disuaka ngagai mensia mayuh enggau peranak ngelingi palan Pasar Ramadan Saratok nyadi sebagi ari pengawa ngerichahka agi pengerami ngintu bulan Ramadan di kandang menua nya.

Pengawa ngatur program tu ukai semina ngerichahka bulan Ramadan, tang mega nyadi pelasar nerenakka semengat begulai sereta ngerapitka kaul pangan entara SABERKAS Pampang Krian enggau komuniti menua nya.

Dikearapka inisiatif baka tu deka terus ngenegapka penyerakup enggau asai begulai entara komuniti ngelingi. — RBI

SIBUTI, 8 Mac – Peranak ba sitak Parlimen P218 Sibuti diatu bepeluang ngulihka lisin mutosikal nengah program MYLESEN (B2) ke bisi disedia enggau bayar penyereta RM250.

Program tu dibuka khas ngagai raban ke layak ba kandang menua nya, enggau haribulan nutup ngerejista ditetapka kena 15 April 2026.

Entara batang syarat penyereta iya nya peminta meseti peranak menua Malaysia sereta diau ba sitak Parlimen P218 Sibuti. Kelimpah ari nya, peminta mesti beumur 16 taun ke atas, lalu dibuka ngagai raban B40 enggau orang ke dijaga.

Penyereta mega dipinta ngembuan pengerai tubuh enggau runding ti manah, sereta nadai ngembuan sebarang rikod jenayah enggau Polis DiRaja Malaysia (PDRM) tauka Opis Perengka Pengangkut Jalai (JPJ).

Pom penyereta bisi disediaka ba Opis Palan Servis Komuniti P218 Sibuti ke bepalan ba Taman Tunku enggau Bekenu.

Mensia mayuh ti deka nemu penerang silik tauka bisi sebarang tanya tau betanya ngagai Nur Fatin Fataihah ba lumur 011-2515 9825 tauka Sylvester Tham ba lumur 014-596 2757.

Program MYLESEN dipeda nyadi siti ari inisiatif dikena mantu komuniti kelebih agi raban kurang penatai pemisi ngulihka lisin mutosikal ke entas sereta nambahka mobiliti enggau peluang gawa. -RBI

MIRI, 8 Mac – Sepenyampau 40 iti saman udah dikeluarka lalu 10 buah mutosikal ditan dalam Ops Samseng Jalai ti dipejalaika Bagi Pansik enggau Penerit Adat Trafik, Indu Opis Polis Pelilih (IPD) Miri.

Ketuai Polis Pelilih Miri, ACP Mohd Farhan Lee bin Abdullah madah, operasyen ke dipejalaika kena 07 Februari 2026 ari pukul 4 lemai nyentuk 8 Mac 2026 pukul 0200 betumpu ngelingi Jalai Piasau, Jalai Miri Bypass, Jalai Tanjung Lobang enggau Jalai Marina.

Operasyen nya dipejalaika berindik ari sebana ari mensia mayuh bekaul enggau aktiviti mutosikal ti ngachau pengelanchar pejalai trafik enggau pengelantang mensia mayuh.

Rambau operasyen nya, sepenyampau 22 iku individu ti mungkur 20 iku lelaki enggau 2 iku indu diperesa begulai enggau 15 buah mutosikal.

Asil peresa nya tetemuka mayuh macham penyalah udah dikereja nyengkaum nadai lisin deriba, ngubah struktur mutosikal, ngubah ijus ngambika ngeluarka munyi ke inggar, nadai cheremin tisi, nadai lumur rejista, ngena lumur rejista ‘fancy’ enggau penyalah teknikal ke bukai.

Sepenyampau 10 buah mutosikal ditan ari baruh Seksyen 60 Akta Pengangkutan Jalan 1987 ngambika atur ke bukai dipejalaika.

Iya nyemetak madahka polis enda deka belembut enggau sebarang individu ti bisi kaul enggau aktiviti geng jalai alun ti tau ngeruga diri empu enggau penguna jalai alun ke bukai.

Mensia mayuh dilalau seruran ngasika undang-undang jalai alun, anang ngaga ubah ti ngelanggar spefikasyen asal perengka pengangkut sereta nyeliahka sebarang aktiviti ti tau ngachau pengelantang mensia mayuh.

Sebarang penerang bekaul enggau aktiviti geng jalai alun tau dikenataika ngagai IPD Miri ngambika atur ke silik agi dipejalaika. -RBI

LIMBANG, 7 Mac — Penusah tanah tusur ke nyadi ba Kampung Bukit Kota lemai tu tadi ngeruga tiga buah rumah besemak sereta ngempang jalai besai di kandang menua nya.

Nitihka penerang berita ari Opis Bomba enggau Penyah Penusah Malaysia (JBPM) Sarawak, opis nya nerima kangau ngenyit bekaul enggau penusah nya urung pukul 2.11 lemai sebedau seraban raban ari Balai Bomba enggau Penyah Penusah Limbang dianjung ngagai endur ke bepalan urung tiga kilometer ari balai nya.

Raban bomba ke datai beberapa minit udah nya tepedaka penusah tanah tusur udah nuntung tiga buah rumah ke besemak sereta ngempang jalai besai ba kandang endur nya.

Taja pia, pengawa meresa enggau silik agi ngentaska nadai mansa diripotka bisi kaul enggau penusah nya.

Komander Operasyen, Stanley Liaw madah, piak bomba udah bejalaika pengawa matau ba endur penusah nya nyadi lalu ngelalau sida ke nguan rumah ke kena penusah mindah ari rumah sida laban gaya ba endur nya diasaika enda likun.

“Kitai mega ngelalau peranak ke besemak mindah ngagai kandang endur ke likun agi nyadika chara bejejaga dikena nyeliahka sebarang penusah nangkanka nya nyadi,” ku iya.

Ku iya, penusah runtuh nya mega ngujungka paip besai bekal ai enggau beberapa iti tiang karan ba endur nya rusak.

Operasyen matau nya mega dipatau Ketuai Zon Limbang, Ramlan Ramlan, kelimpah ari penatai Kaban Parlimen Limbang, Datuk Hasbi Habibollah enggau Kaban Kunsil Nengeri (ADUN) Bukit Kota, Datuk Abdul Rahman Ismail.

Operasyen ti ngaul dua iku raban enggau sebuah entukar pacuan empat roda nya tembu enggau penuh pukul 5.00 lemai pengudah gaya nya dientaska ulih dijaga, seraya pengawa matau ke silik agi deka terus dipejalaika ari sesiti maya ngagai sesiti maya dikena nentuka nadai agi penusah runtuh nyadi.

Sama bisi mantu ba palan penusah nyadi iya nya Polis DiRaja Malaysia (PDRM), Sarawak Energy Berhad (SEB), Angkatan Pengelikun Mensia Mayuh Malaysia (APM), Opis Residen enggau Sarawak Water. — RBI

SRI AMAN, 7 Mac — Peranak Kampung Sungai Pinang, Ulu Skrang udah bekerejasama meresi sereta nyeruri gerija dalam pengawa nentuka rumah sembiang nya terus befungsyen nyadi palan rohani ungkup komuniti besemak.

Tuai Rumah Valley ak Rabong (Painggie) madah, gerija nya digaga dalam taun 2002 lalu naka 7 March 2026, begunan nya udah manggai umur 24 taun lalu terus nyadi palan endur raban Kristian begempuru besembiang, muji enggau ngemuliaka Tuhan.

Kenu ku iya, sepemanjai timpuh nya, gerija meruan bediri tegap ukai semina asil ari pengawa mensia, tang mega ketegal pengasih enggau berekat Tuhan ti seruran begulai enggau nembiak Iya.

Iya mega nerangka pemansang enggau pengelantang gerija tu mega asil ari kerejasama, komitmen enggau pengibub mayuh bengkah piak, kelebih agi gerija BEM KEC (Kuching Evangelical Church) begulai enggau bala umat ti udah taluk gawa ke Tuhan kenyau ari suba nyentuk ke diatu.

“Semua pengawa enggau pengibuh ke udah digaga mayuh bengkah piak amat besai reti sereta amat diberi basa dalam nentuka gerija tu terus nyadi palan endur nembiak Tuhan begempuru ngenegapka pengarap sereta nerenakka semengat pengerindu enggau penyerakup,” ku iya nerang ngagai Ruai Berita Iban.

Ku iya nambah, dikearapka gerija tu terus nyadi rumah rohani ungkup nembiak Tuhan sereta palan endur pengarap ditegapka, pengerindu diterenak sereta rebak dudi hari ulih ngelala Tuhan enggau semak agi.

“Program beripai ke diatur nya mungkur sepenyampau 15 iku peranak rumah panjai enggau tetiap pintu diarika siku pengari ngambika sama ngemujurka aktiviti nya” ku iya nerang. — RBI