PAKAN, 7 MAC – Sepenyampau RM50,000 udah diungkupka ngagai pengawa ngerataka palan perambu ngaga rumah panjai baru di Rh Dinggai, Amut, nyadi singkang pemungkal dikena nyendiaka perengka guna pengentap pendiau ke lantang agi ungkup komuniti menua nya.

Penyanding Penemu Opis Premier Sarawak (Industri Pemakai, Komoditi enggau Pemansang Kandang Menua), Tan Sri William Mawan anak Ikom, madahka agih belanja nya dikena mantu ngenyampatka pengawa nyendiaka palan ungkup projek ngaga rumah panjai baru ba sitak nya.

Nitih ku iya, pengawa pemansang di menua pesisir meseti disukung penuh ari komuniti ngambika semua projek ti diperambu ulih dipejalaika enggau lanchar ungkup pengelantang peranak menua nya.

“Perintah seruran nguji mai pemansang ngagai menua pesisir. Nya alai, komuniti meseti beserakup lalu anang teparuk enggau politik mit ti tau mechahka komuniti,” ku iya.

Iya madah munyi nya lebuh ngabas palan ke diperambu endur ngaga rumah panjai baru di Rh Dinggai Amut, Pakan, seharitu tadi.

Berebak enggau nya, iya mega mantaika pengingin ati iya deka meda pengawa ngaga jematan ti ulih nyambung kandang menua nya enggau Sekula Kebangsaan (SK) Sembawang, dikena ngemuntangka pemindah peranak, kelebih agi bala nembiak enggau staf sekula.

Ku iya ke mega Kaban Kunsil Nengeri (ADUN) sitak Pakan nambah, peluang pemansang ke dibai perintah meseti diguna enggau penuh ulih komuniti menua nya.

“Anang bepechah entara diri sama diri, tang lebih agi tanka penyerakup komuniti ngambika kitai enda tinggal ari arus pemansang,” ku iya.

Ba pengerami ke sama, iya mega bisi madahka agih belanja penyampau RM5,000 ngagai Biro Indu Rh Dinggai dikena nyukung pengawa bejalaika aktiviti enggau program komuniti ba rumah panjai nya. -RBI

LIMBANG, 7 Mac — Sarawak Water Sdn Bhd (Kandang Menua Utara) madahka bekal ai ba sekeda kandang endur bisi tejanggal ketegal paip HDPE 280mm runtuh entara Kampung Bukit Kota ngagai Kampung Pemukat, Jalai Buangsiol ketegal tanah tusur.

Pengawa ngemanahka udah dipejalaika berengkah pukul 4.00 lemai lalu dipelaba tembu pukul 8.00 malam kena 7 Mac 2026.

Dalam timpuh tu, bekal ai deka diketuka sementara dikena ngemuntangka pengawa ngemanah, bepanggai ba palan enggau gaya hari.

Kandang endur ke kena penusah tu nyengkaum Kampung Pemukat, Jalai Buangsiol; lot kedai sepemanjai Jalai Buangsiol (sebagi); Kampung Limpaong, Jalai Buangsiol (sebagi); Kampung Bukit Kota, Jalai Buangsiol (sebagi); enggau Kampung Buangsiol, Jalai Buangsiol (sebagi).

Penyampau mensia mayuh ke kena empas dipelabaka urung 30 buah rumah enggau 50 unit lot kedai.

Nitihka penerang ari Sarawak Water, pengudah nerima ripot nya, tim teknikal enggau operasyen dianjung ngagai endur nya bejalaika pengawa mindahka paip sereta berengkah ngemanahka enggau ngenyit dikena ngetanka gaya sereta mulaika bekal ai enggau naka pengelengkas.

Tangki ai deka disediaka nitihka peminta enggau pemerat ngagai servis ti beguna, bepanggai ba pemisi.

Mensia mayuh mega dilalau bejejimat lebuh nengah Jalai Buangsiol maya kereja ngemanah sereta nitihka atur ngatur trafik ba endur nya.

Sarawak Water minta ampun ketegal penusah ti nyadi sereta beterima kasih ngagai penyabar enggau kerejasama semua penguna sekumbang timpuh ngemanahka nya.

Sebarang tanya tauka penerang ti dilik tau dikenataika nengah ‘Sarawak Water Careline’ (Wilayah Utara – Limbang) ba lumur 085-215633 / 085-215644 / 085-211601 tauka nengah jalai komunikasyen rasmi Sarawak Water. — RBI

SPAOH, 7 Mac — Pusat Kawalan Operasi (PKO) Raban Penyaga Pengelikun Mensia Mayuh Malaysia (APM) Pelilih Menua Spaoh nerima ripot sentang pun kayu tumbang ba Jalai Bungin-Seruai, ti nyekat pejalai perengka pengangkut ba kededua piak.

Nitihka penerang ari APM, empat iku kaban Charlie Squad terus dianjung ngagai endur nya bejalaika operasyen netak enggau meresi ba palan penusah.

“Lebuh datai dia, bala kaban terus netak ngena dua iti chainsaw lalu jalai nya mujur dibuka baru dalam timpuh 20 minit nengah saup mensia mayuh.

“Pengelikun perengka pengangkut udah dipulaika penuh,” ku penerang nya nerang.

APM nambah, maya operasyen nya nadai sebarang bakal diripot nyadi lalu raban udah nya pulai ngagai indu opis enggau perengka.

Mensia mayuh dilalau betanya n

BUKIT MABONG, 7 Mac — Kandang menua Sungai Tunoh di Sarawak ngembuan penau dikemansangka nyadi palan betanamka padi bedandang besai, lalu enggau nya nyukung pengawa perintah nambahka pengelikun pemakai di nengeri tu, ku Menteri Pemakai, Komoditi enggau Pemansang Kandang Menua (M-FICORD) Dato Sri Dr Stephen Rundi Utom

Ku iya, asil pansik nya mandangka Sarawak bisi urung 14,000 hektar tanah ke bisi potensial endur betanamka padi, tang naka ke diatu semina urung 2,000 hektar tanah perintah udah ditanam.

“Sungai Tunoh ke diatu udah diangkat nyadi pelilih mit ari baruh Bukit Mabong engkeman endar endur ngemansangka pengawa betanam betupi bedandang besai,” ku iya lebuh ngabas perambu endur betanamka padi sehari tu.

Nitihku Dato Sri Stephen Rundi, chara moden patut dipejalaika iya nya ngemeratka kandang endur nanam ngelui ari 50 hektar.

Ba Sungai Tunoh aja, bisi lebih 216 hektar tanah ke engkeman endur betanamka padi.

“Diatu asil padi semina urung dua tan aja setaun.Taja pia, ngena bansa benih baru sereta chara betanam moden, kitai ulih nanam dua kali setaun enggau asil manggai 12 tan,” ku iya nerang.

Iya ngemeratka pengawa ngena teknologi moden nyengkaum perengkaguna infrastruktur, mesin ngetau, sereta ngatur ladang enggau sistematik nyadi kunchi dikena nambahka asil padi.

Sarawak nagit ngeluarka padi sepenyampau 450,000 tan metrik, tang agi begunaka beras import dikena nangkup peminta.

Berindik enggau nya, iya ngelalau orang ke ngempu tanah anang nyual tanah sida tang ngereja tanah nya ungkup pengidup rebak dudi hari.

“Anang nyual tanah. Kerami tanah kita ungkup pemaik anak enggau jemah ila.Kitai mega patut bekerejasama ngambika maju,” ku iya.

Iya mega ngelalau pengempu tanah NCR meri kerejasama ba pengawa nyukat enggau nyukat kelingi dikena nentuka tanah nya dikelala sereta dijaga.

“Awakka tanah NCR kitai dipagar enggau sah. Tu berat dikena nyaga pesaka enggau pengidup nembiak redak kitai jemah ila,” ku iya nambah.

Kelimpah ari nanam padi, orang bumai ti berejista ngena sistem e-Tani enggau Gerempung Orang Bumai Kandang Menua (PPK) diperansang ngemeranka aktiviti betanam betupi bukai baka nupi ikan enggau bemacham dagang betanam betupi dikena nyungkak penatai pemisi sida.

Sama bisi datai ba penemuai kereja rasmi nya Sapit Menteri Digital Malaysia Wilson Ugak Kumbong, Sapit Menteri ba Opis Premier Sarawak (Undang-Undang enggau Adat Bumiputera) Jefferson Jamit Unyat, enggau Kaban Kunsil Nengeri (ADUN) Pelagus Wilson Nyabong Ijang. — RB

SRI AMAN, 7 Mac — Gerakan Indu Parti Rakyat Sarawak (PRS) deka ngatur Pekit Futsal Indu PRS 2026 dikena ngulihka gelar Trofi Ketuai Indu PRS Yang Berhormat Dato Sri Doris Sophia Brodie ke mega Kaban Parlimen Sri Aman.

Nitihka penerang ari Chairman Pengatur Pekit, YBhg. PS Rosaline Neging ke mega Sapit Ketuai Indu PRS, pekit tu diperambu deka diatur kena 10 ngagai 11 April 2026 ba Stadium Mini, Jalai Tengah, Sri Aman, lalu DUN Batang Ai nyadi tuai rumah.

Ku iya, pekit ke berengkah pukul 12.00 tengah hari kena 10 April tu ila diatur dikena meransang penyereta orang indu dalam aktiviti lumba enggau main kelimpah ngenegapka semengat lumba enggau main sereta beserakup entara kaban Gerakan Indu PRS.

“Semua Gerakan Indu PRS ba Bagi Menua sida empu di serata Sarawak ditesau nganjung penyereta dikena ngerichahka agi pekit tu,” ku iya ba sebengkah penerang.

Ku iya nambah, haribulan penutup penyereta ditetapka kena 10 Mac 2026, lalu semua ungkus perengka pengangkut enggau endur diau sepemanjai pekit nya nyadi tanggungpengawa PRS Bagi Menua nya empu.

Berebak enggau nya, piak pengatur mega meri pengaga ati ngagai kerejasama enggau sukung semua piak sereta ngarapka penyereta ke diterima ulih ngerichahka agi semengat lumba enggau main sereta begulai enggau orang indu PRS di serata nengeri. — RBI

BETONG, 7 Mac — Opis Kereja Raya (JKR) Bagi Menua Betong begulai enggau pengari Palan Servis Kunsil Nengeri (DUN) N.37 Bukit Saban bejalaika pengawa nemuai mansik sereta meresa palan ungkup Projek Transformasyen Menua Pesisir (RTP) 2026 ba sekeda endur ke udah dikemendarka ba sitak nya.

Nitihka penerang ba laman Facebook DUN Bukit Saban, pengawa mansik palan nya ngaul sekeda projek ngangkatmanah perengkaguna pemun ba kandang menua Spaoh, nyengkaum ngangkatmanah jalai nuju kandang pendam Rumah Panjai TR. Pendam William Rabong di Pelawa, ngangkatmanah Palan paking kerita rumah panjai TR Entinggang di Munggu Gernis, pia mega ngangkatmanah jalai konkrit di belakang Rumah Panjai TR. Rumah Lium di Bangkit Rembai Asal enggau Rumah panjai TR. Jantai di Bangkit Kemantan.

“Penemuai tu ngembuan tuju deka meresa gaya palan enggau silik skop pengawa dikena nentuka pengawa bejalaika projek bejalai enggau lanchar, nitihka spesifikasyen ke udah ditetapka sereta nangkup peminta komuniti setempat,” ku penerang nya.

Penerang nya mega madahka pengawa ti enda ngetu dalam pengawa bejalaika projek pemansang menua pesisir tu mandangka komitmen piak bekaul ngenegapka perengka guna pemun sereta ngangkatka pengelantang pendiau peranak ba kandang DUN Bukit Saban.

“Dikearapka semua projek ti udah diperambu ulih dipejalaika nitihka timpuh sereta meri penguntung timpuh panjai ngagai peranak menua nya, lalu ari nya meri pangka ngagai pemansang ti meruan agi sereta sebela di menua pesisir,” ku penerang nya. — RBI

PAKAN, 7 Mac – Peranak menua pesisir dilalau nguna tanah ke bisi sereta ngena pelasar digital dikena ngenegapka ekonomi sereta nyungkak penatai pemisi ruang bilik.

Tesau nya dikenataika Tan Sri William Mawan Ikom lebuh bejadika Projek Program Transformasyen Menua Pesisir (RTP) ba Rumah Awin, Sungai Amut, ditu.

Nitihku iya ke mega Penyanding Penemu ba Opis Premier Sarawak (Industri Pemakai, Komoditi enggau Pemansang Kandang Menua) ke mega Kaban Kunsil Nengeri (ADUN) Pakan, ngena tanah enggau produktif ulih nyadi pematak pemansang ekonomi komuniti menua pesisir.

Iya mega meransang peranak beambi ulih ari perengkaguna jalai kebun ke udah digaga ngambika asil betanam betupi ulih ditanam enggau ngasi agi sereta ngemudahka pengawa ngangkut asil ngagai pasar.

Ku iya nambah, pemansang teknologi kemaya hari udah muka peluang ke besai ngagai komuniti ngelakuka produk betanam betupi nengah bemacham pelasar digital ke majak ngerembai.

Berebak enggau nya, iya ngingatka bala komuniti ngambika enda teparuk enggau pekara ti tau ngerusak penyerakup enggau pemanah kaul dalam komuniti.

“Anang kitai ngerembaika pekara ti tau ngerusakka kaul entara komuniti tauka ngembuan runding ti tau mambarka komuniti,” ku iya.

Ba pengerami nya, Biro Indu Rumah Awin mega bisi nerima pemeri RM5,000 dikena nyukung pengawa bejalaika aktiviti komuniti di kandang menua nya. -RBI

BETONG, 7 Mac — Opis Kereja Raya (JKR) Bagi Menua Betong begulai enggau pengari Palan Servis DUN Bukit Saban apin lama tu tadi udah bejalaika pengawa nemuai mansik sereta meresa palan ungkup pengawa bejalaika projek ari baruh Projek Transformasyen Menua Pesisir (RTP) 2026 ba sekeda endur ke udah dikemendarka ba sitak nya.

Penemuai nya mungkur tiga batang projek iya nya ngaga baru Palan Komuniti China Spaoh, kereja ngerataka tanah ungkup palan baru rumah panjai TR Jawa di Suri Lalang, Spaoh enggau pengawa ngaga ‘awning’ baru ba rumah panjai TR Rayong di Nanga Lop, Debak.

Nitihka penerang ti dikunsika ba laman Facebook rasmi Palan Servis DUN Bukit Saban, penemuai mansik enggau meresa palan nya diatur dikena beratika gaya endur projek sereta nerangka enggau silik skop kereja ngambika pengawa bejalaika projek ulih dipejalaika enggau lanchar sereta nangkup guna komuniti setempat.

Pengawa bejalaika projek nya dikearap ulih meri pemaik ngagai peranak menua nya seraya terus ngenegapka pemansang perengka guna pemun di menua pesisir, kelebih agi ba kandang DUN Bukit Saban. — RBI

DEBAK, 7 Mac — Projek ngangkatmanah jalai ladang ba kandang rumah panjai Tuai Rumah (TR) Nicholas Brayan di Ulu Teru, Debak udah tembu penuh lalu diatu ulih dikena komuniti menua nya.

Nitihka penerang ti dikunsika nengah Facebook DUN Bukit Saban, projek nya dipejalaika ngena agih belanja ari Ejensi Pemansang Bagi Menua Betong (BDDA) ari baruh inisiatif Perintah Gabungan Parti Sarawak (GPS) dikena ngenegapka pemansang infrastruktur menua pesisir.

Penerang nya madahka enggau penembu projek nya, peranak diatu ulih ngasaika perengkaguna jalai alun ke manah agi, lalu ari nya ngemuntangka pejalai sida ninting hari.

Kelimpah ari nya, perengkaguna nya mega dikearapka ulih mantu nyukung aktiviti ekonomi komuniti setempat, kelebih agi ungkup peranak ti bepanggai ba kandang endur ladang nyadi pun penatai pemisi.

Projek tu mandangka komitmen perintah ti seruran bejalaika pengawa ngemanahka perengka guna pemun enggau pengelantang komuniti menua pesisir. — RBI

SPAOH, 7 Mac — Aum koordinasyen komiti pengatur ‘Food Festival’ enggau Program Lumba enggau Main Bukit Saban udah diatur sehari kemari ba Bilik Aum Opis Pelilih Mit Spaoh dikena nentuka pengawa nyendiaka program bejalai enggau lanchar.

Aum nya bechairmanka Ketuai Indu PBB Pampang N.37 Bukit Saban Puan Natasha Nasa Uggah, lalu bela digulu Sekretari Politik ngagai YAB Premier Sarawak Puan Roseline Mapong Sabai, begulai enggau pengari ari mayuh bengkah ejensi perintah nyengkaum UKAS, Opis Betanam Betupi Bagi Menua Betong Bomba Betong, KPDN Sri Aman, Palan Servis Sarawak Centre Betong, Opis Pengintu Pengelantang Betong, pia mega kaban Indu PBB Pampang Bukit Saban.

Nitihka penerang Facebook DUN Bukit Saban, aum nya ngembuan tuju ngatur pengawa tetiap komiti ke bisi kaul enggau ngatur program tu, ti diperambu deka diatur kena Hari Enam, 14 Mac 2026, ba Rumah Panjai TR. Mendit Unsu, Penom, Ulu Paku, Spaoh.

Bemacham aktiviti ti ngerinduka ati deka diatur, nyengkaum pekit nyumai, pekit bemain pangka, enggau main tarittali.

Kaunter servis ari Opis Pengintu Pengelantang Pendiau enggau Palan Servis Sarawak mega deka disedia dikena ngemuntangka mensia mayuh ngulihka penerang enggau servis ke bekaul.

Program tu mega bisi mandangka ‘Jualan Rahmah’ kelimpah bansal nyual pemakai menua tu enggau asil pengelandik jari, meri awak ngagai peranak ngelakuka produk sida empu.

“Pengawa ngatur program tu dikearap ulih negapka kaul komuniti sereta meri penguntung ngagai komuniti setempat ba kandang menua DUN Bukit Saban,” ku penerang nya. — RBI