KUCHING, 9 Mac — Sepenyampau 119 iku pengempu tanah udah nerima pampas sepenyampau RM6.5 juta ungkup pengawa bejalaika projek pemansang AgriHub Lubok Punggor di Gedong.

Duit pampas nya disuaka Premier Sarawak Datuk Patinggi Tan Sri Abang Johari Tun Openg ba Pengerami Bebuka Puasa Pelilih Menua Gedong ke diatur ba Masjid Al-Kawthar di Gedong, malam Hari Minggu tu tadi.

Pengawa nyuaka duit pampas nya mandangka komitmen perintah Sarawak ti terus nentuka pengawa bejalaika projek pemansang nya ulih dipejalai enggau lanchar seraya mega beratika pengelantang pendiau pengempu tanah ti bekaul.

Projek AgriHub Lubok Punggor ngaul pengawa ngemansangka palan gudang enggau bengkel jentera, pengawa ngaga entali ai sereta mega pengawa ngaga sereta ngangkatmanah sistem ai enggau parit dikena nyukung pemansang sektor betanam betupi ba kandang menua nya.

Dulu agi ari nya, Abang Johari ke mega Kaban Kunsil Nengeri (ADUN) Gedong bisi nyuaka pemeri ngagai 10 iku penerima asnaf ti ngarika urung 300 iku asnaf di pelilih Gedong nyadika pengeran dikena mantu raban ti begunaka bantu.

Pemeri nya nyengkaum RM10,000 ari Opis Premier Sarawak, RM50,000 ari Lembaga Pemansang enggau Pengintu Tanah (LCDA) enggau RM30,000 ari Bank Rakyat.

Kelimpah ari nya, sepenyampau RM61,000 mega bisi disuaka ngagai 26 iku penerima chek ari baruh agih belanja Projek Mit Menua Pesisir (MRP) ti ngaul pengari masjid enggau surau ngelingi Gedong dikena nyukung bemacham aktiviti jalai pengarap enggau komuniti.

Tekala nya pengudah bebuka puasa, Abang Johari enggau komuniti Islam bejalaika pengawa sembiang Maghrib, Isyak enggau Tarawih bejemaah.

Sama bisi ngulu pengerami nya, Sapit Menteri Infrastruktur enggau Pemansang Palan Penyangkai Kapal Datuk Ir Aidel Lariwoo, Kaban Parlimen Batang Sadong Rodiyah Sapiee, Kaban Kunsil Nengeri (ADUN) Simunjan Awla Dris, Sekretari Perintah Nengeri Sarawak Datuk Amar Mohamad Abu Bakar Marzuki, Penyanding Penemu Opis Menteri Dagang Antarabansa Sarawak enggau Mohamad Intarabansa Mohamad Abu Bakar Marzuki Majais enggau temuai dipebasa ke bukai — RBI

KUALA LUMPUR, 9 Mac — Opis Menteri Pelajar Malaysia (KPM) madahka pemutus peresa Sijil Pelajaran Malaysia (SPM) 2025 deka dipadah kena 31 Mac 2026 (Hari Dua).

Nitihka penerang ari KPM, sepenyampau 413,299 iku chalun udah ngerejista diri ngambi peresa nya ba 3,350 buah palan peresa di serata menua.

Chalun sekula tau ngambi pemutus peresa sida ba sekula sida berengkah pukul 10.00 pagi ba hari pemadah.

Ungkup chalun peribit, sida tau betanya ngagai Opis Pelajar Nengeri ke alai sida ngerejista diri ngambi peresa ngambi pemutus peresa sida.

Kelimpah ari nya, chalun sekula enggau chalun peribit mega ulih meresa pemutus peresa sida nengah dua chara iya nya online nengah link myresultspm.moe.gov.my dikena ngulihka slip pemutus peresa ari pukul 10.00 pagi, 31 Mac 2026 nyentuk pukul 6.00 lemai, 6 April 2026.

Pengawa meresa mega ulih digaga nengah sistem pesan pandak (SMS) nengah chara naip SPM <ruang> NoKP <ruang> AngkaGiliran lalu nganjung ngagai lumur 15888, ti deka diaktifka dalam timpuh ke sama.

Ba penerang ke sama, Opis Menteri Pelajar madah ngagai sekula meseti nentuka pengawa ngatur pengawa nyuaka pemutus peresa ngagai chalun dipejalaika enggau efisyen sereta teratur.

Opis Menteri nya mega ngenataika pengaga ati enggau jaku selamat ngagai semua chalun SPM 2025 sereta ngarapka pemujur ke dijapai nya nyadi pemangkin ngagai sida terus nyapai penyulut jemah ila. — RBI

JULAU – Program KRT Begulai Enggau Komuniti Nanga Bilat di Rumah Genta udah nyadi pelasar beguna dalam pengawa meri penyedar ngagai mensia mayuh bekaul enggau bemacham keruga rama baka pengawa nipu nengah ‘online’ enggau salah guna dadah.

Chairman Kaunsil Industri Kayu Ramu Malaysia (MTIB) ke mega Kaban Parlimen Julau, Datuk Larry Sng Wei Shien madah, program baka tu meri awak ngagai ejensi perintah nurun ke renggat baruh sereta bekunsika penerang ke beguna enggau komuniti menua pesisir.

Nitih ku iya, enti nadai penerang ke baka nya, mayuh peranak nyangka enda nemu pasal bansa dadah ke dikelala enggau nama “batu” sereta pangka iya ke enda manah ngagai pengidup enggau pengelantang komuniti.

“Program ke baka tu beguna amat laban meri awak ngagai ejensi perintah ngajar mensia mayuh pasal penanggul rama baka dadah enggau pengawa nipu nengah online.

“Enti kitai enda nemu pasal pekara nya, enti datai ba kitai, kitai enda nemu lalu udah nya kitai enda ulih enda ingat,” ku iya.

Ku iya nambah, penyedar komuniti beguna amat dikena nentuka sebarang kelai salah guna dadah ba genturung pendiau ulih dikelala tumu.

Kelimpah ari nya, iya mega ngemeratka pemesai guna mensia mayuh ngeripot pengawa nipu nengah ‘online’ ngagai piak bekuasa baka polis tauka ejensi ke bekaul ngambika atur ke bukai ulih dipejalai.

Ba pemansang ke bekaul, iya mega ngingatka mensia mayuh ngambika bejimat agi laban taktik nipu diatu nyau majak canggih nyengkaum ngena teknologi pemintar tiru (AI) dikena nunda sada nyawa tauka identiti siku-siku individu.

“Penipu enda milih orang. Enda ngira kitai kaya tauka seranta, semua orang ulih nyadi mansa.Pemar iya nya semua kitai patut bejimat sereta bejaga agi,” ku iya nyemetak.

Iya ngarapka program penyedar komuniti baka nya ulih dipajakka dikena ngenegapka pemereti ati mensia mayuh ba isu rama ti tau ngeruga pengelantang enggau pengelikun komuniti lokal. -RBI

PUNCAK BORNEO, 9 Mac — Kaban Parlimen P198 Puncak Borneo, Datuk Willie Mongin ngulu Program Besembiang Kampung Bisegu 2026 ke udah nyadi kena Hari Minggu tu tadi, ti mungkur penyereta sekeda rumah panjai ngelingi Bunuk.

Program tu berengkah di Gerija St.Paul’s Bunuk sebedau bala pesereta mindah nengah sekeda stesyen sembiang lalu udah nya tembu ba Gerija Roman Katolik St.Matthew Bunuk.

Pengerami jalai pengarap tu mandangka semengat beserakup, pengarap enggau begulai komuniti lebuh peranak ari Kampung Segu Bunuk, Sibatuh, Bratan, Punau enggau sekeda genturung pendiau besemak nyereta pengawa bejalai sembiang nya.

Program tu mega nerima kerejasama rat ari Komiti Pemansang enggau Pengelikun Genturung Pendiau (JKKK) Kampung Segu Bunuk, gerija enggau raban volunteer ti bejalaika tanggungpengawa ke berat nentuka pengawa ngatur pengerami nya lanchar.

Dikearapka pengawa ngatur program baka tu deka terus nerenakka ulah begulai entara komuniti setempat, kelimpah ari mai berekat, pengelantang enggau pengelantang ngagai selampur komuniti di kandang menua nya. — RBI

JULAU, 8 MAC – Datuk Rolland Duat Jubin, Kaban Kunsil Nengeri (ADUN) Meluan sekali agi nerima pengandal penuh lebuh iya dipinta dichalunka baru nyadi chalun ngarika Gempung Parti Sarawak (GPS) ngetanka penuduk Kunsil Nengeri (DUN) Meluan ba Pengawa Bepilih Nengeri (PRN) Sarawak ti deka datai.

Pengawa nya digaga rambau Aum Besai Tiga Taun Sekali (TGM) Parti Demokratik Progresif (PDP) Pampang Meluan ke diatur ba Kompleks Lumba enggau Main Julau sehari tu, mandangka pengandal kaban parti nya meruan arapka iring iya ngiring pemansang kandang menua nya.

Ba aum ke sama, Datuk Rolland mega dichiri baru nyadi Chairman PDP Pampang Meluan ungkup penggal ke deka datai, mandangka sukung tegap ari kaban parti ba renggat pampang.

Ba aum nya mega, Jimmy Jarop dipadu nyadi Sapit Chairman, lalu ketiga – tiga Sapit Chairman iya nya Andrew Janting, Ama Unan enggau Thwaites Geman.

Berebak enggau nya, ungkup sayap parti, Joannes Jelani dipadu nyadi Ketuai Nembiak PDP Meluan, seraya Ida Jais nguluka gerakan Indu.

Nitihku Datuk Rolland, Aum Besai Tiga Taun Sekali taun tu mega ngerikod penatai ti mayuh lebuh urung 1,700 iku kaban datai, jauh ngelui ari ti disadang lalu nyadi siti ari penatai ti pemadu mayuh kala dirikod ungkup pampang nya.

Ku iya, sebedau tu aum ke diatur selalu iya semina digulu urung 500 iku kaban aja, tang timbal sekali tu chukup meransang lebuh nyau deka tiga kali lipat pemayuh ke datai.

“Tu keterubah iya aku meda pemayuh orang ke datai ba Aum Besai Bagi Pampang Meluan kenyau ari nyadi pengari rayat. Tu mandangka tikas komitmen enggau penaluk kaban parti ke majak tegap,” ku iya.

Ku iya nambah, penambah penatai nya mega ngayanka penyedar komuniti sentang pemesai guna penyerakup sereta penyikap parti napi PRN Sarawak ti deka datai.

Datuk Rolland madah, sukung ti dipandangka kaban enggau penyukung parti nya ngayanka pengandal sida ngagai ketuai GPS enggau pangku pengawa PDP ngetanka pemansang ba sitak N48 Meluan.

Iya mega nerangka pemansang nya kelai positif iya nya jentera parti ba renggat pampang seruran beserakup sereta komited ngenegapka penuduk parti.

“Aku ngarapka momentum sukung tu ulih ditan dikena nentuka pemenang besai ungkup GPS ba sitak Meluan ba PRN Sarawak ti deka datai,” ku iya. –

KUCHING, 8 Mac — Parti Islam Se-Malaysian (PAS) Sarawak madahka diri besedia deka bekerejasama enggau Parti Bansa Dayak Sarawak (PBDS) sebedau Pengawa Bepilih Nengeri (PRN) Sarawak ti deka datai nyema bisi juluk ke sama ti meri penguntung ngagai rayat enggau nengeri tu.

Pesuruhjaya PAS Sarawak, Arifiriazul Paijo madah, parti nya enda nutup pintu ngagai sebarang parti lalu seruran tebuka berundingka bemacham tukuh kerejasama, nyengkaum peluang numbuhka gempung dikena napi pengawa bepilih nengeri.

Nitihku iya, taja pan randau rasmi enggau PBDS bedau diatur tang pemanah kaul entara ketuai kededua piak mengkang bisi sereta muka ruang ngagai kerejasama jemah ila.

Iya madah munyi nya pengudah ngulu pengawa bebuka puasa begulai enggau pengamal media sereta pengari gerempung ukai dikuasa perintah di sebuah hotel ditu kena Hari Empat tu tadi.

Ngelansa pasal peluang kerejasama enggau Parti Democratic Action Party (DAP), Arifiriazul nerangka naka ke diatu bedau bisi randau diatur berindik ari gaya politik ke diatu ba renggat Perintah Besai.

“Politik tu dinamik. Pekara ke nyadi kemaya hari tu nyangka deka berubah jemah ila,” ku iya.

Berebak enggau nya, iya mega bisi ngenang pasal pemansang pemadu baru dalam Perikatan Nasional (PN) Sarawak berindik ari ubah ketuai ti nyadi ba renggat menua enggau nengeri.

Ku iya, pemutus ketuai PN di Sarawak diatu bepanggai ba ketuai gempung nya.

Berebak enggau nya, Arifiriazul madahka PAS Sarawak udah ngelala abis nadai empat sitak Kunsil Nengeri (DUN) ke deka diperebut ba PRN ke deka datai, nyengkaum sitak Beting Maro ke udah dientaska deka ditanka parti nya.

Nitih ku iya, PAS udah bediri minta pilih ba penuduk nya kenyau ari taun 2001 lalu suah nyadi penyakal besai ngagai penyandang penuduk nya.

Ba pengawa bepilih nengeri ke udah, iya teulihka 2,058 undi seraya penyandang penuduk Beting Maro ari Gabungan Parti Sarawak (GPS), Razaili Gapor ngetanka pemenang iya enggau 3,769 undi.

Arifiriazul madah, PAS Sarawak terus ngenegapka penatai diri ba kandang menua nya nengah numbuhka palan servis sereta bejalaika mayuh macham program pengelantang pendiau enggau penemuai seruran dikena mantu peranak kandang menua nya.

Iya mega madahka PAS Sarawak tebuka ati nyabung chalun ukai Islam nengah sayap penyukung iya nya Gempuru Penyukung PAS (DHPP), baka ke udah digaga sebedau tu ba Pengawa Bepilih Nengeri Sarawak 2016 suba.

Diatu PAS Sarawak bisi entara 8,000 ngagai 10,000 raban di serata nengeri tu nyengkaum lebih 1,000 kaban ari baruh DHPP, lalu udah numbuhka 11 sitak parti di Sarawak, nyengkaum Petra Jaya, Santubong, Kota Samarahan, Batang Sadong, Batang Lupar, Mukah, Sibu, Bintulu, Sibuti, Miri enggau Limbang.

Kredit Sumber berita — DayakDaily

SELANGAU, 8 Mac — Program Jerayawara Bubur Lambuk ke diatur Saberkas Pampang Tamin udah diatur kena Hari Enam, 7 Mac 2026, pukul 4.00 lemai beserimbai enggau pengerami ngintu bulan Ramadan taun tu.

Program tu dipejalaika asil ari kerejasama entara Saberkas Pampang Tamin enggau Klinik Pengerai Selangau, Balai Bomba enggau Penyah Penusah Selangau sereta Polis Diraja Malaysia (PDRM) Selangau.

Chairman ke mega Sekretari Saberkas Pampang Tamin, Winnie J madah, pengawa ngatur program tu ngembuan tuju mandangka pengibuh ngagai komuniti setempat kelimpah ngerapitka kaul entara komuniti enda ngira bansa enggau jalai pengarap.

Nitihku iya, program nya mega ngaul penyereta raban Opis Bomba Selangau, raban PDRM enggau staf Klinik Pengerai Selangau ti besaup ngemujurka aktiviti bubur lambuk sereta disadung ngagai mensia mayuh.

Iya ngarapka mayuh agi raban nembiak datai ke mua ngaul diri dalam aktiviti komuniti ke baka nya jemah ila, lalu enggau nya meransang semangat kerejasama enggau penyerakup dalam komuniti. — RBI

MIRI, 8 MAC – Projek Ngemanahka Bekau Jalai Batang ti mungkur jalai nuju Mubui ke panjai 6.1 kilometer enggau Long Tungan panjai 8.6 km benung digag

Opis Kereja Raya (JKR) Sarawak madahka, projek tu nyengkaum ngaga dua buah jematan iya nya Jematan Sungai Selaan di Mubui enggau Jematan Sungai Batu Buan di Long Tungan.

“Status bejalaika empat bengkah skop projek tu udah nyapai tikas 64.46 peratus penyulut,” ku penerang JKR Sarawak.

Pengawa bejalaika projek tu dikearap ulih meri pemaik ke besai ngagai komuniti lokal nengah pengawa ngemanahka perengkaguna komunikasyen, lalu ari nya ulih nyukung pemansang sosio-ekonomi di kandang menua ulu Bagi Menua Miri. -RBI

MERADONG, 8 Mac – Siku lelaki peranak menua tu beumur 29 taun ditan polis pengudah diperesa positif dadah dalam operasyen Ops Tapis ti dipejalaika tim “Task Force” Indu Opis Polis Pelilih (IPD) Meradong, pagi tadi.

Ketuai Polis Pelilih Meradong, DSP Tansli Mering madah, saspek ditan urung pukul 10.05 pagi kena 8 Mac 2026 ba kandang pelilih Bintangor pengudah dipelabaka bisi kaul enggau aktiviti salah guna dadah.

Nitihku iya, suspek udah nya dibai ngagai IPD Meradong ngambika atur silik agi dipejalaika sebedau peresa nisih ai kemi dipejalaika ba Opis Bagian Tasat Jenayah Narkotik (BSJND) Pelilih Meradong.

“Asil peresa tisih ai kemi tetemuka saspek positif dadah baka Amphetamine enggau Methamphetamine,” ku iya nengah penerang berita.

Ku iya nambah, pengawa meresa baru rikod ke udah mega tetemuka saspek ngembuan rikod penyalah bekaul enggau dadah.

Kes tu diatu benung dipansik ari baruh Seksyen 15(1)(a) Akta Dadah Berbahaya 1952 ti nyendiaka ukum mata duit enda ngelui ari RM5,000 tauka jil nyentuk dua taun enti dikenuku salah.

Berebak enggau nya, DSP Tansli nyemetak madahka polis beratika penyalah bekaul enggau dadah dalam komuniti enggau berat sereta enda deka belembut ba sebarang aktiviti salah guna dadah.

Iya mega ngelalau mensia mayuh meri penerang ngagai polis nyema sida bisi penerang bekaul enggau aktiviti dadah di pelilih Meradong.

“Sebarang penerang tau dikenataika ngagai Balai Polis Bintangor ba lumur 084-693222 dikena mantu pengawa ngemuntanka penyalah dadah ba sitak tu,” ku iya. -RBI

BINTANGOR, 8 Mac – Gaya ke lantang sereta richah begulai ulih diasai lebuh Balai Bomba enggau Penyah Penusah (BBP) Bintangor nerima penemuai khas Direktor Opis Bomba enggau Penyah Penusah Malaysia (JBPM) Sarawak ba Program Singgah Sahur Ramadan ke diatur tumu pagi tadi.

Program ke diatur urung pukul 4.00 pagi ba bilik jentera BBP Bintangor digulu Direktor JBPM Sarawak, YS PKPjB Jamri Masran ke bela ngelimpangka awak begulai enggau bala kaban ke bejalaika pengawa sepemanjai bulan Ramadan.

Penatai iya disambut Ketuai BBP Bintangor, PPgB Mahmudin Narudin, begulai enggau bala supervisor sereta raban bomba balai nya.

Dalam gaya ti lepa tang bisi reti, Jamri mega ngambi awak manduk pemakai sahur enggau bala bomba sebedau ngelantangka diri makai begulai.

Kelimpah ari nya, program nya ditangkan enggau sembiang Subuh sereta pesan pandak ari iya ti ngemeratka pemesai guna semengat kerejasama, pengelantang kaban enggau ketuai ti tegap entara kaban JBPM.

Kelai meri terima kasih, sesi nyuaka tanda pengingat mega bisi diatur lalu disuaka ketuai BBP Bintangor ngagai Direktor JBPM Sarawak.

Program Singgah Sahur Ramadan ke diatur ba BBP Bintangor bejalai enggau lanchar lalu nyadi pelasar dikena ngerapitka kaul raban pengatur opis enggau kaban ba renggat balai. -RBI